Indoda Elesibindi

NJENGOBA abantu babeqhubeka besibabanengi emhlabeni, inengi labo lenza izinto ezimbi njengoKhayini. Kodwa kulendoda eyayitshiyene labanye. Yindoda le ethiwa ngu-Enoki. U-Enoki wayeyindoda elesibindi. Bonke abantu ayephakathi kwabo babesenza izinto ezimbi kakhulu kodwa yena waqhubeka ekhonza uNkulunkulu.

Uyakwazi ukuthi kungani abantu laba benza izinto ezinengi ezimbi ngalesosikhathi? Akucabange: Ngubani owabangela ukuthi u-Adamu lo-Eva bangalaleli uNkulunkulu lokuthi badle isithelo uNkulunkulu ayethe bengasidli? Ye, yingilosi embi. IBhayibhili liyibiza ngokuthi nguSathane. USathane uzama ukwenza ukuthi bonke abantu babe babi.

Ngelinye ilanga uJehova uNkulunkulu wathuma u-Enoki ukuthi atshele abantu into ababengafuni ukuyizwa. Yilokhu: ‘Ngelinye ilanga uNkulunkulu uzabhubhisa bonke abantu ababi.’ Kumele ukuthi lokhu kwabacaphula kakhulu abantu. Bangabe bazama lokumbulala u-Enoki. Yikho u-Enoki kwakumele abe lesibindi ukuze atshele abantu lokhu okwakuzakwenziwa nguNkulunkulu.

UNkulunkulu kazange avumele ukuthi u-Enoki aphile isikhathi eside ephakathi kwabantu laba ababi. U-Enoki waphila okweminyaka engu-365 kuphela. Kungani sisithi “engu-365 kuphela”? Ngoba ngalesosikhathi abantu babelamandla kulakhathesi njalo babephila okwesikhathi eside kulalamuhla. Indodana ka-Enoki, uMethusela yaphila iminyaka engu-969.

U-Enoki esefile abantu baqhubeka besenza okubi kakhulu. IBhayibhili lithi ‘zonke izinkanuko zeminakano yezinhliziyo zabo zaziyibubi kuphela sonke isikhathi,’ lokuthi ‘umhlaba wagcwala udlakela.’

Uyasazi yini esinye isizatho kungani kwakulobubi obunengi kangaka emhlabeni ngalezo nsuku? Kungenxa yokuthi uSathane wayeselenye indlela yokwenza ukuthi abantu benze okubi. Sizafunda ngalokho ekhasini elilandelayo.