Iziqhwaga Emhlabeni

NXA bekungaba lomuntu othutsha esiza kuwe emude efika ephahleni lwendlu yangakini, ubuzacabangani? Umuntu lo uyabe eyisiqhwaga! Ngesinye isikhathi zazikhona sibili iziqhwaga emhlabeni. IBhayibhili litshengisa ukuthi obaba bazo kwakuzingilosi ezivela ezulwini. Kodwa lokhu kwenzakala njani?

Khumbula ukuthi ingilosi embi uSathane yayilokhu ihlupha. Wayezama lokwenza ukuthi izingilosi zikaNkulunkulu zenze izinto ezimbi. Ngokuhamba kwesikhathi ezinye izingilosi lezi zaqalisa ukulalela uSathane. Zekela ukwenza umsebenzi ezaziwunikwe nguNkulunkulu ezulwini. Zasezibuya emhlabeni zazenzela imizimba yabantu. Uyakwazi ukuthi kungani?

IBhayibhili lithi kungenxa yokuthi izingilosi lezi zabona abafazi abahle emhlabeni zasezifuna ukuhlala labo. Yikho zabuya emhlabeni zatshada labafazi laba. IBhayibhili lithi lokhu kwakukubi ngenxa yokuthi uNkulunkulu wayedale izingilosi efuna zihlale ezulwini.

Lapho izingilosi labafazi bazo zisiba labantwana, abantwana laba babengafanani labanye. Ekuqaliseni babebonakala bengahlukananga labanye kakhulu. Kodwa baqhubeka bekhula besiba bakhulu njalo baqhubeka besiba lamandla kakhulu baze baba yiziqhwaga.

Iziqhwaga lezi zazizimbi. Iziqhwaga lezi zazizinkulu njalo zilamandla amakhulu yikho zazilimaza abantu. Zazama ukubamba abantu ngamandla ukuthi benze okubi njengazo.

U-Enoki wayesefile kodwa kwakulomuntu oyedwa emhlabeni owayelungile. Ibizo lomuntu lo kwakunguNowa. Wayesenza okwakufunwa nguNkulunkulu ngasosonke isikhathi.

Ngelinye ilanga uNkulunkulu watshela uNowa ukuthi sasesifikile isikhathi sokuthi abhubhise bonke abantu ababi. Loba kunjalo, uNkulunkulu wayezasindisa uNowa lemuli yakhe lezinyamazana ezinengi. Ake sibone ukuthi uNkulunkulu wakwenza njani lokhu.