Incwadi Evela KuQula Elibusayo

Bamemezeli Bezindaba Ezinhle:

Kuyisibusiso esikhulu ukukhonza uJehova uNkulunkulu weqiniso simanyene. ‘Sisebenza laye’ emsebenzini oqakathekileyo futhi ozasindisa abantu wokutshumayela izindaba ezinhle zoMbuso wakhe osubusa. (1 Khor. 3:9; Mat. 28:19, 20) Kodwa ukuze senze umsebenzi lo ngokuthula futhi simanyene kumele sihleleke.—1 Khor. 14:40.

Ibhuku leli lizakunceda ubone indlela ibandla lamaKhristu elisebenza ngayo namuhla. Likhuluma ngemisebenzi yenkonzo etshiyeneyo okumele uyenze ebandleni. Nxa ungayiqakathekisa imisebenzi le futhi wenze okhangelelwe ukuthi ukwenze, “uzaqiniswa ekukholweni.”—ImiSeb. 16:4, 5; Gal. 6:5.

Yikho sicela ukuthi ulibale ulizwisise ibhuku leli njalo ukusebenzise ekuphileni kwakho lokho ozakubala. Ngokwesibonelo nxa usanda kuba ngummemezeli ongabhabhathizwanga, kuyini okumele ukwenze ukuze ubhabhathizwe ube nguFakazi kaJehova? Nxa usubhabhathiziwe kuyini ongakwenza ukuze uthuthuke ekukhonzeni? (1 Tim. 4:15) Ungenzani ukuze kuhlale kulokuthula ebandleni? (2 Khor. 13:11) Dinga izimpendulo zemibuzo le ngesikhathi ubala ibhuku leli.

Nxa ungumzalwane obhabhathiziweyo, ungenzani ukuze ube yinceku ekhonzayo njalo ngokuya kwesikhathi ube ngumdala? Abantu baqhubeka besanda enhlanganisweni kaJehova yikho kudingakala abazalwane abafaneleyo abazakhokhela. Ibhuku leli lizakunceda ubone ukuthi kumele wenzeni ukuze “ulalamele” imisebenzi le.—1 Tim. 3:1.

Sithandaza ngenhliziyo yonke silesifiso sokuthi ibhuku leli likuncede uyazi imisebenzi okumele uyenze enhlanganisweni kaJehova futhi uyiqakathekise. Siyalithanda kakhulu lonke njalo sithandazela ukuthi liqhubeke limkhonza ngentokozo uBaba wethu osezulwini uJehova, kuze kube nini lanini.—Hubo. 37:10, 11; Isaya. 65:21-25.