January

Zonke izinceku zikaNkulunkulu ezithembekileyo zifuna ukufunda ukuthi ‘zingayenza njani ngokupheleleyo’ inkonzo eziyiphathisiweyo. (2 Tim. 4:5) Phela umsebenzi wokutshumayela uqakatheke kakhulu futhi kumele wenziwe ngokuphangisa ukwedlula eminye imisebenzi esingayenza empilweni. Kodwa kungaba nzima ukuthi sichithe isikhathi esinengi enkonzweni ngendlela esifisa ngayo. Kulokunye okuqakathekileyo okumele sikwenze okufuna sisebenzise isikhathi lamandla ethu. Ngokwesibonelo, singabe sisebenza amahola amanengi ukuze sizinakekele thina kanye lezimuli zethu. Kanti njalo singabe sigula, sihlulukelwe kumbe sithwaliswe nzima yikuguga. Kwezinye izikhathi lokhu kungabe kusenzakala kwabanye ezimulini zethu. Akumelanga sidane nxa izimo zethu zingasivumeli ukuthi sichithe isikhathi esinengi sisenza inkonzo kaJehova. UJesu wayekwazi ukuthi kasisoze sithele izithelo zoMbuso ngendlela efananayo. (Mat. 13:23) UJehova uyakuqakathekisa konke esikwenzayo enkonzweni ingqe nje sikwenza ngenhliziyo yonke.—Heb. 6:10-12. w19.04 2 ¶1-3

Amanga kaSathane mayelana labafileyo enza uJehova akhanye emubi. Amanga la agoqela imfundiso ethi abafileyo bayatshiswa emlilweni. Imfundiso enjalo yenza uNkulunkulu akhanye emubi ngoba abantu basuke bacabange ukuthi uNkulunkulu oluthando ulesihluku njengoDeveli. (1 Joh. 4:8) Wena uzwa njani ngalokho? UJehova yena uzwa njani njengoba kunguye oqanjelwa amanga? Phela uyasizonda isihluku. (Jer. 19:5) Amanga kaSathane mayelana labafileyo enza abantu bacabange ukuthi akuqakathekanga ukukholwa emhlatshelweni kaKhristu. (Mat. 20:28) Amanye amanga kaSathane ngathi abantu balomphefumulo ongafiyo. Nxa lokhu bekuliqiniso, kutsho ukuthi abantu bonke bebezaphila phakade. Bekungeke kudingeke ukuthi uKhristu asifele ukuze sibe lokuphila okungapheliyo. Akumelanga sikhohlwe ukuthi ukufa kukaKhristu kutshengisa uthando olukhulu uJehova loJesu abalalo ngabantu. (Joh. 3:16; 15:13) Akucabange ukuthi uJehova leNdodana yakhe bezwa njani ngezimfundiso lezi ezenza isipho lesi esiligugu kangaka sikhanye singaqakathekanga. w19.04 14 ¶1; 16 ¶8-9

Lokho uJesu ayekufundisa kutholakala ngaphi? EmaVangelini amane kulezinto ezinengi azikhulumayo lazenzayo ngesikhathi esemhlabeni. Leminye yonke iMibhalo YamaKhristu YesiGrikhi iyasinceda sizwisise imicabango kaJesu ngoba abayibhalayo babephefumulelwe ngomoya ongcwele njalo ‘babelengqondo kaKhristu.’ Zonke izinto uJesu azifundisayo ziyasebenza empilweni kungelani lokuthi singaphi. “Umthetho kaKhristu” uyasebenza nxa sisemakhaya ethu, emsebenzini kumbe esikolo kanye lasebandleni. (Gal. 6:2) Umthetho lo siwufunda ngokubala iMibhalo YamaKhristu YesiGrikhi lokucabangisisa ngayo. Siyabe siwulalela umthetho lo nxa silalela imilayo kanye lezimiso ezitholakala emibhalweni le. Nxa silalela umthetho kaKhristu siyabe silalela uNkulunkulu wethu osithandayo uJehova ngoba konke uJesu ayekufundisa kwakuvela kuye.—Joh. 8:28. w19.05 3 ¶6-7

Kuyadanisa ukubona abantu besenza lokho okufunwa nguDeveli ngoba amacebo akhe mabi kakhulu. Lanxa kunjalo uJehova uyakubona konke okwenziwa nguSathane. Ngakho ubazi kuhle ubuhlungu esibuzwayo njalo uyenelisa ukusiduduza. Sibusisiwe ngoba sikhonza ‘uNkulunkulu wenduduzo yonke, osiduduza kuzo zonke inhlupho zethu ukuze senelise ukududuza abanye kuloba yiziphi inhlupho, sibaduduza ngenduduzo esiyiphiwa nguNkulunkulu.’ (2 Khor. 1:3, 4) Abanye abazali kabazange benze lutho ukuthi bavikele abantwababo lanxa babekwazi ukuthi bayahlukuluzwa. Abantwana laba kanye lalabo abake bahlukuluzwa ngabantu ababathembayo bayayidinga sibili induduzo. Umhubi uDavida wayekwazi ukuthi uJehova ngeke ehluleke ukumduduza. (Hubo. 27:10) Wayeleqiniso lokuthi uJehova uyabemukela bonke abadelwe zimuli zabo. Ukwenza njani lokhu? Usebenzisa izinceku zakhe ezithembekileyo. Abafowethu labodadewethu abasebandleni bayimuli yethu. Ngokwesibonelo, uJesu wathi bonke ayekhonza labo bangabafowabo, odadewabo kanye lonina.—Mat. 12:48-50. w19.05 15-16 ¶8-9

Kuyini okuqakathekileyo okumele sikutaditshe? Kumele sibe lesikhathi nsuku zonke sokutaditsha iLizwi likaNkulunkulu. Amavesi okumele siwabale iviki ngayinye ekubalweni kweBhayibhili okwenziwa libandla asephunguliwe ukuze sibe lesikhathi esinengi sokucabangisisa ngalokho esikubalayo futhi sichwayisise. Inhloso yethu akumelanga ibe ngeyokubala nje amavesi lawa kodwa kumele sivumele lokho okutshiwo liBhayibhili kuthophele ezinhliziyweni zethu njalo kusenze sisondele kakhulu kuJehova. (Hubo. 19:14) ISifundo SeNqabayokulinda sisinceda ukuthi sizwisise iBhayibhili. Ngakho yihlolisise yonke imibhalo ikakhulu leyo ezabalwa ebandleni. Nanzelela ukuthi amabala loba imitsho esemibhalweni isekela njani umcijo oqakathekileyo osendimeni. Kanti njalo zinike isikhathi sokucabangisisa ngemibhalo oyibalayo futhi ucabange ukuthi ungayisebenzisa njani empilweni yakho.—Josh. 1:8. w19.05 27 ¶5; 28 ¶9

UJesu wasitshiyela isibonelo esihle endleleni ayebona ngayo inkonzo yakhe. Izikhathi ezinengi wayehlala ekhuluma ngoMbuso kaNkulunkulu. Wahamba imango emide ukuze atshumayeze abantu abanengi futhi wayedinga lezindlela zokuxoxa labantu emakhaya abo loba kwezinye nje izindawo. Umsebenzi ayewuqakathekisa kakhulu ngowokutshumayela. Singalingisela uKhristu ngokuxoxela abantu izindaba ezinhle loba ngaphi, loba nini lapho okuvela khona ithuba. Sizimisele ukudela loba yini ukuze sitshumayele. (Mak. 6:31-34; 1 Phet. 2:21) Abanye ebandleni bangamaphayona aqakathekileyo, awesikhathi sonke loba asizayo. Abanye bafundele olunye ulimi njalo abanye bathuthele ezindaweni ezilabamemezeli abalutshwana. Kodwa abanye abamemezeli abenelisi ukukwenza lokhu. Loba kunjalo, umsebenzi omnengi wokutshumayela wenziwa ngabamemezeli boMbuso abenza konke abangakwenza emsebenzini lo. Kungelani lokuthi kungakanani esikwenzayo, uJehova kakhangelelanga ukuthi senze esingeke sikwenelise. w19.04 4 ¶7-8

Ungazibuza ukuthi, ‘Ngilenhlansi yomona kumbe umhawu yini enhliziyweni yami?’ (1 Phet. 2:1) ‘Ngizibona ngingcono kulabanye yini ngenxa yalapho engakhulela khona, imfundo engayitholayo loba imali engilayo?’ (Zaga. 16:5) ‘Ngibakhangelela phansi yini abantu abangelazinto engilazo kumbe abomunye umhlobo?’ (Jak. 2:2-4) ‘Ngiyazithanda yini izinto ezisemhlabeni kaSathane?’ (1 Joh. 2:15-17) ‘Ngiyakukholisa yini ukuzilibazisa ngezinto ezilodlakela lezitshengisa abantu abaziphatha kubi kwezemacansini?’ (Hubo. 97:10; 101:3; Amos. 5:15) Izimpendulo zemibuzo le zingakunceda ubone lapho okumele untshintshe khona. Abangane bethu bayasibumba sibe yilokho abayikho. (Zaga. 13:20) Abantu esitshona labo esikolo loba emsebenzini abasenzi sicabange ngendlela uNkulunkulu ayamukelayo. Kodwa abangane abahle singabathola ebandleni. Lapho yikho esingavuselelwa khona loba sikhuthazwe “ethandweni lasemisebenzini emihle.”—Heb. 10:24, 25, amabala angaphansi. w19.06 12 ¶13-14

UJehova wayengahlosanga ukuthi sikhathazeke futhi sehlelwe zinhlupho. Yikho akumangalisi ukuthi inceku kaJehova ethembekileyo ikhulume amazwi abhedayo nxa isebunzimeni. (Jobe. 6:2, 3) Lanxa ingaze ikhulume izinto ezingaqondanga ngoJehova kumbe ngathi akumelanga sihle siyizondele loba siyahlulele. Kwesinye isikhathi umuntu osebunzimeni kungadingeka ukuthi elulekwe loba alaywe. (Gal. 6:1) Abadala kumele bakwenze njani lokho? Kumele balingisele u-Elihu owatshengisa uzwelo lapho elalele uJobe. (Jobe. 33:6, 7) U-Elihu weluleka uJobe eseyizwisisile indlela ayecabanga ngayo. Abadala bangalingisela u-Elihu ngokulalelisisa nxa umuntu osebunzimeni ekhuluma langokuzama ukuzwisisa uhlupho aphakathi kwalo. Nxa bangenza njalo, iseluleko abazamnika sona sizathophela enhliziyweni. w19.06 22-23 ¶10-11

Ungenzani ukuze uqhubeke ukhonza uJehova nxa sesingasavunyelwa ukwenza umsebenzi wethu? Iwofisi yegatsha izatshela abadala bebandla lakini ukuthi kumele benzeni. Nxa igatsha lingenelisi ukuxhumana labadala, abadala bazakunceda wena kanye labanye ebandleni ukuthi liqhubeke likhonza uJehova. Bazalikhokhela besebenzisa lokho okutshiwo liBhayibhili kanye lamabhuku ethu. (Mat. 28:19, 20; Heb. 10:24, 25) UJehova uthembise ukuthi izinceku zakhe zizakuthola konke ezikudingayo ukuze ukholo lwazo luhlale luqinile. (Isaya. 65:13, 14; Luk. 12:42-44) Yikho qiniseka ukuthi inhlanganiso yakhe izakwenza konke engakwenza ukuze ikuncede uqhubeke uthembekile. Kodwa kulokunye ongakwenza lawe. Nxa umsebenzi wethu ungasavunyelwa, dinga lapho ongafihla khona iBhayibhili lakho kanye lamanye amabhuku ethu ongabe ulawo. Nanzelela ukuthi awutshiyi izinto lezi eziligugu endaweni lapho ezingatholakala khona lula. Lokhu kugoqela lezempucuko ezilamabhuku ethu. Sonke kumele senze okusemandleni ethu ukuze sihlale silokholo oluqinileyo. w19.07 10 ¶10-11

Okweminyaka eminengi abantu abanengi bebesonta. Kodwa eminyakeni esanda kwedlula kube lontshintsho olukhulu. Inani labantu abangasontiyo liqhubeka liqansa. Kwamanye amazwe abantu abanengi vele kabasonti. (Mat. 24:12) Kungani kulokhu kusiba labantu abanengi abangasontiyo? Abanye bathatheka ngobunandi bempilo ikanti abanye baphanjulwa zinkathazo. (Luk. 8:14) Abanye bona sebesithi uNkulunkulu kakho. Abanye bayakholwa kuNkulunkulu kodwa bacabanga ukuthi ukuya esontweni akusancedi futhi akuhambelani lesayensi njalo akulangqondo. Kungenzeka bajayele ukuzwa abangane babo lababalisi besithi izinto zazenzakalela. Lokhu bayakuzwa ngitsho lakuma-TV lamarediyo. Kukalutshwane ukuthi bake bezwe izizatho ezilengqondo zokukholwa kuNkulunkulu. Abanye abasonti ngoba benyanyiswa yindlela abakhokheli bamasonto abathanda ngayo imali labasebenzisa ngayo izikhundla zabo. Kwezinye indawo ohulumende bafaka imithetho eyenza kube nzima ukuthi abantu bakhonze uNkulunkulu bekhululekile. w19.07 20 ¶1-2

Akudingi ukuthi sibe ngabaphilileyo emzimbeni ukuze sibe lokholo oluqinileyo lokuthi sitshiseke enkonzweni. Phela banengi abangaphilanga kuhle emzimbeni abazimisele ukuqhubeka bethuthuka ekukhonzeni. (2 Khor. 4:16) Engxenye usumkhonze okweminyaka eminengi uJehova njalo khathesi awusaphilanga kuhle emzimbeni futhi awusenelisi ukwenza owawukwenza kuqala. Nxa kunjalo ungalahli ithemba. Qiniseka ukuthi uJehova uyawukhumbula njalo uyawuqakathekisa umsebenzi omuhle owamenzela wona. (Heb. 6:10) Kanti njalo khumbula ukuthi ukuzinikela ngenhliziyo yonke akulinganiswa ngokuthi senza okunganani. Kodwa sikutshengisa ngokuhlala sithokoza futhi silethemba njalo sisenza konke okusemandleni ethu. (Kol. 3:23) UJehova uyazwisisa ukuthi kulezinye izinto esingenelisi ukuzenza futhi kalindelanga ukuthi senze okungaphezu kwamandla ethu.—Mak. 12:43, 44. w19.08 3 ¶6; 5 ¶11-12

UJehova usebenzisa ‘imisebenzi emihle’ yezinceku zakhe ukuze asondeze abantu kuye. (Mat. 5:14, 15; 1 Phet. 2:12) Nxa umkakho engayisuyeFakazi kaJehova uyabazi yini abazalwane ongena labo ebandleni? Mnxuse emihlanganweni yethu yebandla. (1 Khor. 14:24, 25) Sifisa ukuthi izihlobo zethu lazo zimkhonze uJehova. Kodwa kungenzakala ukuthi zingamkhonzi lanxa singazama ngazo zonke izindlela ukuzincedisa ukuthi zibe yizinceku zakhe. Nxa kungaba njalo thina akumelanga sizisole ngalokho okukhethwe yizihlobo zethu. Phela ngeke sibambe umuntu ngamandla ukuthi abe nguFakazi. Kodwa nxa izihlobo zakho zibona ukuthi uyathokoza ngenxa yokuthi ukhonza uJehova lazo zingafisa ukumkhonza. Zithandazele izihlobo zakho, ukhulume lazo ngomusa njalo ungayekeli ukuzincedisa. (ImiSeb. 20:20) Qiniseka ukuthi uJehova uzakubusisa. Kanti njalo izihlobo zakho zizasindiswa nxa zingakhetha ukukulalela. w19.08 18-19 ¶15-17

Wayesitshoni uJesu ngamazwi la? Wayesitsho ukuthi kumele sigcine impilo yethu ilula, ngamanye amazwi sikhangele entweni eyodwa futhi singavumi ukuphanjaniswa ngezinye izinto. UJesu waqakathekisa kakhulu inkonzo njalo wafundisa abafundi bakhe ukuthi baqakathekise kakhulu uMbuso kanye lokukhonza uJehova ukwedlula loba yini. Siyabe silingisela uJesu nxa siqakathekisa kakhulu umsebenzi wokutshumayela, ‘sifuna kuqala uMbuso kanye lokulunga [kukaNkulunkulu].’ (Mat. 6:33) Enye indlela esingafaka ngayo inkonzo kuqala yikuchitha isikhathi esilutshwana sisenza izinto ezingaqakathekanga kangako ukuze sibe lesikhathi esinengi sokuncedisa abanye ukuthi bamazi uJehova njalo bamthande. Ngokwesibonelo, singaphungula amahola esiwachitha emsebenzini wokuziphilisa ukuze sibe lesikhathi sokutshumayela phakathi kweviki kumbe sitshiye okunye esizilibazisa ngakho okusiqedela isikhathi esinengi. w19.04 5-6 ¶12-13

Eminyakeni edlulileyo abafowethu labodadewethu abanengi asebekhonze uJehova okweminyaka eminengi bantshintshwe imisebenzi yenkonzo ababeyenza. Abanengi kwabathwalisa nzima ukuntshintsha. Akuthandabuzwa ukuthi babeyithanda kakhulu imisebenzi yenkonzo ababeyenza futhi abanengi babo basebeyenze okweminyaka eminengi. Kwabanye kwakubuhlungu ukujayela izimo ezintsha kodwa ngokuhamba kwesikhathi benelisa. Kuyini okwabancedayo? Okwabanceda kakhulu yikuthanda uJehova. Babekwazi ukuthi bazinikele kuJehova hatshi emsebenzini othile kumbe esikhundleni esithile. (Kol. 3:23) Bayakholisa ukukhonza uJehova ngokuthobeka besenza loba yiwuphi umsebenzi enkonzweni yakhe. ‘Baphosela kuye konke okubakhathazayo’ besazi ukuthi ulendaba labo. (1 Phet. 5:6, 7) Nxa singaba ngabantu abathobekileyo abanye bazakholisa ukuba lathi njalo kuzasinceda kuphinde kubancede labo. Kuzakwenza kubelula ukuthi siqinisele nxa sisehlelwa yibunzima empilweni. Okuqakatheke kakhulu yikuthi kuzasenza sisondele eduze loBaba wethu osezulwini. w19.09 6-7 ¶15-17

UDavida wayeyinhloko yemuli yakhe njalo uJehova wamenza waba yinhloko yesizwe sonke sako-Israyeli. UDavida wayelamandla amakhulu njengoba wayeyinkosi. Kwezinye izikhathi wayewasebenzisa kubi amandla akhe futhi wenza amaphutha amakhulu. (2 Sam. 11:14, 15) Kodwa watshengisa ukuthi uyazehlisa kuJehova wamukela iseluleko. Nxa wayekhuleka wayemtshela indlela ayezizwa ngayo njalo wenza konke ayengakwenza ukuthi alalele iseluleko sikaJehova. (Hubo. 51:1-4) Kanti njalo wayethobeke okokuthi kazange alalele iseluleko esivela emadodeni kuphela kodwa walalela lesivela kwabesifazana. (1 Sam. 19:11, 12; 25:32, 33) UDavida wafunda emaphutheni akhe futhi waqakathekisa ukukhonza uJehova ukwedlula loba yini. Wayekwazi ukuthi ukuzehlisa kuJehova kuyanceda. Lamuhla siyazibonela umehluko okhona phakathi kwabantu abazehlisa kuJehova labangafuni ukulalela iseluleko sakhe esilothando. Abazehlisa kuJehova ‘bahlabela ngentokozo yezinhliziyo zabo.’—Isaya. 65:13, 14. w19.09 17 ¶15; 19 ¶21

Ngo-1935 oFakazi bakaJehova kwabacacela ukuthi ukuma kwexuku elikhulu “phambi kwesihlalo sobukhosi laphambi kweMvana” akutsho ukuthi sekumele libe sezulwini. Bakuzwisisa ukuthi lima ngendlela engokomfanekiso. Lanxa ixuku elikhulu laliyabe lisemhlabeni, bakuzwisisa ukuthi lima “phambi kwesihlalo sobukhosi” ngokuvuma ukuthi uJehova nguye uMbusi wendawo yonke langokumlalela. (Isaya. 66:1) Lima ‘phambi kweMvana’ ngokutshengisa ukuthi lilokholo emhlatshelweni kaJesu. UMathewu 25:31, 32 uyasinceda sizwisise ukuthi okutshiwo kuSambulo 7:9 yinto engokomfanekiso. Usitshela ukuthi “zonke izizwe” okugoqela abantu ababi “zizabuthelwa” phambi kukaJesu osesihlalweni sobukhosi esikhazimulayo. Kusegcekeni ukuthi zonke izizwe lezi azikho ezulwini kodwa zisemhlabeni. Ukuntshintshwa kwalokho esasikukholwa kulengqondo ngoba kuveza ukuthi kungani iBhayibhili lingakhulumi ngokuthi ixuku elikhulu lizakuya ezulwini. Liqembu elilodwa kuphela elithenjiswa ukuphila ezulwini. Iqembu leli ngabayi-144 000 ‘abazakuba ngamakhosi babuse umhlaba’ beloJesu.—Isam. 5:10. w19.09 28 ¶9

UJehova ufuna siphume siphele eBhabhiloni Enkulu. Kodwa ukwenza njalo akwenelanga, kumele sizimisele ukukhonza uJehova. Singakwenza njani lokhu? Kasixoxeni ngendlela ezimbili. Okokuqala, kumele siqhubeke siziphatha ngendlela ethokozisa uJehova. Kasiwamukeli amanyala enziwa ngabantu bomhlaba lo. Ngokwesibonelo, kasivumelani laloba yikuphi ukuziphatha kubi kwezemacansini okugoqela ukutshada kwezitabane lokunye ezikwenzayo. (Mat. 19:4, 5; Rom. 1:26, 27) Okwesibili, kumele siqhubeke sikhonza ndawonye lamanye amaKhristu. Sizaqhubeka singena imihlangano kungelani lokuthi siseWolu yoMbuso, endlini yomzalwane kumbe sicatshile kwenye indawo. Kasisoze siyekele ukungena imihlangano loba sekutheni. Khathesi kuqakatheke kakhulu ukuthi siyingene ‘ikakhulu njengoba sibona usuku lusondela.’—Heb. 10:24, 25. w19.10 16 ¶6-7

UJehova ufuna sikholise ukuphila futhi ukuzilibazisa kwenza sikholise. ILizwi lakhe liyakusekela lokho ngoba lithi “akukho okungcono emuntwini ngaphandle kokuthi adle, anathe njalo azuze ukusuthiseka ngomsebenzi wakhe.” (UmTshu. 2:24) Kodwa okokuzilibazisa okunengi okusemhlabeni lo kungasiphambanisa. Kwenza abantu abanengi baziphathe kubi njalo kubakhuthaza ukuthi bavumele loba bathande izinto iLizwi likaNkulunkulu elithi zimbi. Sifuna ukuzinikela kuJehova ngenhliziyo yonke yikho asingeke sidle “etafuleni kaJehova lasetafuleni yamadimoni.” (1 Khor. 10:21, 22) Izikhathi ezinengi ukudla lomunye umuntu kutshengisa ukuthi lingabangane. Nxa singakhetha ukuzilibazisa ngezinto ezilodlakela, isidimoni, ukuziphatha okubi loba okunye okwenza sibe lezifiso lemicabango emibi kuyabe kufanana lokuthi sidla lezitha zikaNkulunkulu ukudla ezikuphekileyo. Lokhu kuzasilimaza kuphinde kuphambanise ubungane bethu loJehova. w19.10 26 ¶2; 29-30 ¶11-12

Umtshayeli wesikepe kumele enze izinto ezimbili nxa efuna umoya umncede. Okokuqala, kumele akhangelise isikepe sakhe lapho umoya oyakhona. Phela vele kasingeke sihambe nxa angasiyekela sisekhunjini khatshana lalapho okulomoya. Okwesibili, kumele aphakamise futhi avule amaseyili. Lanxa isikepe sakhe besingaba lapho okulomoya khona besingeke sihambe amaseyili evaliwe. Lathi sizenelisa ukuqhubeka sikhonza uJehova nxa sincediswa ngumoya ongcwele. Kulezinto ezimbili okumele sizenze ukuze umoya ongcwele usincede. Okokuqala, kumele senze lokho umoya ongcwele okhokhela abantu bakaJehova ukuthi bakwenze. Okwesibili, kumele siwavule kakhulu amaseyili ethu ngokwenza ngamandla ethu wonke lokho umoya ongcwele osikhokhela ukuthi sikwenze. (Hubo. 119:32) Umoya ongcwele uzasinika amandla futhi uzasinceda ukuthi sihlale sithembekile nxa siphakathi kobunzima. w19.11 9 ¶8; 10 ¶11.

UJesu wayekhathazeke kakhulu ngelanga ayezabulawa ngalo. Phela wayesezabulawa ngendlela elesihluku ngabantu abangelamthetho. Kodwa lokhu kayisikho okwakumkhathaza kakhulu. Wayemthanda okwamagama uYise futhi efuna ukwenza okwakuzamthokozisa. UJesu wayekwazi ukuthi nxa wayengaqhubeka ethembekile ngesikhathi esehlukuluzwa wayezalwela ibizo likaJehova. Wayebathanda labantu njalo wayekwazi ukuthi babezakuba lethemba lokuphila phakade nxa engaqhubeka ethembekile kuJehova aze afe. Lanxa uJesu wayekhathazeke kakhulu, wayelokuthula. ‘Wayelokuthula kukaNkulunkulu’ okutsho ukuthi wayehlalisekile. Umuntu uba lokuthula okunjalo nxa engumngane kaJehova. Ukuthula lokhu yikho okwalinda inhliziyo lengqondo kaJesu. (Flp. 4:6, 7) Akulamuntu ozakwehlelwa yibunzima obunjengalobo uJesu abubekezelelayo. Loba kunjalo, bonke abamlandelayo bazahlupheka. (Mat. 16:24, 25; Joh. 15:20) Ngezinye izikhathi sizakhathazeka njengaye. w19.04 8 ¶1-3

Kuhle ukuthi sizibuze, ‘Ngiyambonga yini uJehova ngokuba lilunga lengxenye esemhlabeni yenhlanganiso yakhe?’ Lamuhla uJehova usinike ubufakazi obucacileyo bokuthi uyababusisa abantu bakhe. Kunengi sibili okumele simbonge ngakho. (1 Thes. 5:18) Singatshengisa njani ukuthi siyayisekela inhlanganiso esetshenziswa nguJehova? Ngokusebenzisa lokho esikufunda eBhayibhilini, emabhukwini ethu, emihlanganweni yebandla, eyeziqinti leyezabelo. Kanti njalo singatshengisa ukuthi siyayisekela ngokukhuthala emsebenzini wokutshumayela lowokufundisa. (1 Khor. 15:58) Kasizimiseleni ukwenza izinto ezithokozisa uJehova ukuze amukele imihlatshelo yethu. Siyamkhonza ngoba siyambonga ngalokho asenzele khona. Sizaqhubeka simnika okungcono kakhulu ngenxa yokuthi simthanda ngenhliziyo yonke. Kanti njalo sizakwenza konke okusemandleni ethu ukuthi sisekele inhlanganiso ayisebenzisayo. Singenza konke lokhu siyabe sitshengisa uJehova ukuthi siyasiqakathekisa isibusiso sokuba ngoFakazi bakhe. w19.11 25 ¶17-18

UJesu wayengatsho ukuthi sizakwenza izimangaliso njengaye kodwa wayesitsho ukuthi sizatshumayela ezindaweni ezinengi, okwesikhathi eside kulaye njalo sifundise abantu abanengi. Nxa usebenza zibuze imibuzo le: ‘Ngaziwa njengomuntu okhutheleyo yini emsebenzini? Ngiwuqeda ngesikhathi yini umsebenzi wami futhi ngisebenza ngamandla ami wonke yini?’ Nxa ukwenza lokhu, umqhatshi wakho angakuthemba njalo kungenza labanye osebenza labo babe lesifiso esikhulu sokulalela izindaba ezinhle. Kumele uzibuze imibuzo elandelayo mayelana lendlela otshumayela lofundisa ngayo: ‘Ngaziwa njengomuntu okhutheleyo yini ekutshumayeleni? Ngiyalungiselela yini nxa ngisiya ekutshumayeleni? Ngiyaphangisa yini ukuphindela ebantwini abafuna ukufunda? Ngiyahlanganyela yini engxenyeni ezitshiyeneyo zenkonzo?’ Nxa ukwenza lokhu, uzakukholisa ukutshumayela. w19.12 5 ¶14-15

Kuhle ukuthi abatshadileyo abafuna ukuba labantwana baxoxe ngemibuzo emibili eqakathekileyo: Owokuqala, bafuna ukuba labo nini? Owesibili, bafuna ukuba labangaki? Bangaxoxa nini ngemibuzo le futhi kungani iqakatheke kakhulu? Izikhathi ezinengi abanye bakubona kungcono ukuxoxa ngendaba yabantwana bengakatshadi. Kungani kukuhle ukuthi baxoxe ngakho ngalesosikhathi? Esinye isizatho esikhulu yikuthi kuqakathekile ukuthi babe ngqondonye endabeni le. Kumele baxoxe langokuthi bazakwenelisa yini ukuba ngabazali. Abanye bakhetha ukungabi labantwana okomnyaka owodwa kumbe emibili ngemva kokutshada ngoba ukukhulisa umntwana kudinga isikhathi lamandla. Bathi lokhu bakwenzela ukuthi baqale bajayele ukuphila ndawonye betshadile njalo kubanika isikhathi sokuba ngabangane. w19.12 23 ¶4-5

Abantu bakaJehova abanengi emhlabeni jikelele bahlangana lezimo ezibenza bakhathazeke kumbe badane. Amanye amaKhristu athwaliswe nzima yikugula kumbe azwa ubuhlungu bokufelwa. Amanye azwa ubuhlungu obukhulu obubangelwa yikubona umngane kumbe isihlobo sitshiya uJehova. Amanye wona athwele nzima ngenxa yomonakalo wemvelo. Bonke abafowethu labodadewethu laba bayakudinga ukududuzwa. Manje singakwenza njani lokhu? Woba ngumngane oqotho. Abangane abaqotho basebenzisa isikhathi lamandla abo ukuthi bancede abafowabo labodadewabo. Ngokwesibonelo, omunye umfowethu okuthiwa nguPeter watshelwa ukuthi ulomkhuhlane omubi kakhulu futhi owawuzacina umbulele. Umkakhe uKathryn uthi: “Omunye umfowethu lomkakhe abasebandleni esikulo bahamba lathi kudokotela owasitshela ngomkhuhlane kaPeter. Bahle benza isinqumo khonapho sokuthi babengasoze basitshiye sodwa ebunzimeni esasiphakathi kwabo futhi bahlala besincedisa nxa sidinga uncedo.” Kuyaduduza sibili ukuba labangane beqiniso abasincedisayo ukuze siqinisele nxa siphakathi kwenhlupho. w20.01 8 ¶1; 9 ¶5; 10 ¶6

Aluba wawungomunye wabafundi ababebuthene endlini ephezulu ngePhentekhosti lika-33 C.E., wawungasoze uthandabuze ukuthi usugcotshwe ngomoya ongcwele. (ImiSeb. 2:5-12) Kodwa bonke abagcotshwe ngomoya ongcwele bagcotshwa ngendlela emangalisayo njalo ngesikhathi esifananayo yini? Hatshi. Ake sixoxe ngokuthi umuntu angagcotshwa nini. Abafundi abangaba ngu-120 ayisibo bodwa abagcotshwa ngomoya ongcwele ngalelolanga. Kulabanye futhi abangaba ngu-3 000 abagcotshwa ngomoya ongcwele ngelanga lelo. Laba bona bagcotshwa ngesikhathi bebhabhathizwa. (ImiSeb. 2:37, 38, 41) Kodwa eminyakeni eyalandelayo ayisiwo wonke amaKhristu agcotshwa lapho ebhabhathizwa. AmaKhristu angamaSamariya agcotshwa sekudlule isikhathi ebhabhathiziwe. (ImiSeb. 8:14-17) Kwesinye isenzakalo esingajayelekanga, uKhoneliya labendlu yakhe bagcotshwa bengakabhabhathizwa.—ImiSeb. 10:44-48. w20.01 20-21 ¶2-4

EmaVangelini amane sithola ukuthi uJesu wasebenzisa ibala elithi “Baba” izikhathi ezingaba ngu-165 ekhuluma ngoJehova. Kungani wakhuluma kanengi kangaka ngoJehova? Esinye isizatho yikuthi wayefuna ukuqinisekisa abantu ukuthi uJehova unguBaba olothando. (Joh. 17:25) Ake ucabange ngalokho esikufunda ngoJehova endleleni ayephatha ngayo iNdodana yakhe uJesu. UJehova wayehlala eyilalela imithandazo kaJesu futhi eyiphendula. (Joh. 11:41, 42) Kungelani lenhlupho uJesu ayehlangana lazo, wayehlala ebona ukuthi uYise uyamthanda futhi uyamsekela. (Luk. 22:42, 43) UJehova unguBaba olothando yikho waqinisekisa uJesu ukuthi uyamsekela. (Mat. 26:53; Joh. 8:16) Lanxa engamvikelanga kukho konke okwakungamlimaza, wamncedisa ukuthi aqinisele ebunzimeni. UJesu wayekwazi ukuthi loba yibuphi ubunzima obabungamehlela babungobesikhatshana. (Heb. 12:2) UJehova watshengisa ukuthi uyamthanda uJesu ngokumlalela nxa ekhuleka, ngokumnika lokho akudingayo, ngokumfundisa langokumsekela.—Joh. 5:20; 8:28. w20.02 3 ¶6-7, 9

Nxa sisazibuza ukuthi silandele yini isiko loba umkhuba othile, kumele sicabange ngokuthi isinqumo sethu sizabaphatha njani abanye ikakhulu esikhonza labo. Kasifuni lakancane ukubakhuba. (Mak. 9:42) Kanti njalo kasifuni ukuphongucaphula labo abangakhonzi uJehova. Uthando lwenza sikhulume labo ngenhlonipho futhi ukwenza njalo kudumisa uJehova. Kasifuni ukuxabana labantu kumbe ukweyisa amasiko abo. Nxa singatshengisa ukuthi siyabathanda abanye ngokuba lendaba labo langokubahlonipha singancibilikisa lenhliziyo zalabo abasiphikisayo. Uthando lulamandla! Tshela abanye emphakathini wakini ukuthi unguFakazi kaJehova. (Isaya. 43:10) Nxa omunye emulini yangakini engafa, izihlobo labomakhelwane bangazonda nxa ungalandeli isiko elithile. Kodwa kuzaba lula ukuthi uyiphathe kuhle indaba le nxa ungahle ubachasisele okukholwayo kusesengaphambili. Akumelanga sibe lenhloni zokusekela iqiniso elimayelana lokufa.—Rom. 1:16. w19.04 17-18 ¶14-16

Abaphostoli abangu-12 babeloJesu ngesikhathi esenza inkonzo yakhe emhlabeni kodwa umphostoli uPhawuli yena waba ngumKhristu ngemva kokufa lokuvuswa kukaJesu. Lanxa uPhawuli wacina ekhethwa ukuthi abe ‘ngumphostoli kwabezizweni,’ kazange abe ngomunye wabaphostoli abangu-12. (Rom. 11:13; ImiSeb. 1:21-26) Kazange abe lomona ngamadoda lawo angu-12 langokuthi ayeke ahamba loJesu kodwa wasuthiseka ngalokho ayelakho. Nxa singabantu abasuthisekayo labathobekileyo sizakwenza njengoPhawuli sibahloniphe labo abaphiwe amandla nguJehova. (ImiSeb. 21:20-26) UJehova uhlele ukuthi kube labadala abakhokhelayo ebandleni. Ubabona ‘beyizipho ezingabantu’ lanxa besenza amaphutha. (Efe. 4:8, 11) Nxa singawahlonipha amadoda la abekiweyo futhi silalele akutshoyo sizahlala siseduze loJehova njalo sibe lokuthula lamanye amaKhristu esikhonza lawo. w20.02 17 ¶13-14

Kungenzeka ukuthi wawuvele uliqakathekisa kakhulu iBhayibhili ungakaqalisi ukufunda laboFakazi bakaJehova futhi kungenzeka wawusumthanda uJesu. Khathesi mhlawumbe uyakuthanda ukuba laboFakazi njengoba usubazi. Kodwa ukuthanda uJesu, oFakazi leBhayibhili ayisikho kodwa okungenza ufune ukuzinikela kuJehova njalo ubhabhathizwe. Ukuthanda uJehova uNkulunkulu yiso isizatho esiqakatheke kulazo zonke sokuthi ufune ukubhabhathizwa. Nxa umthanda ukwedlula zonke ezinye izinto, awusoze uvume ukuthi olunye ulutho loba omunye umuntu akuvimbele ukumkhonza. Ukuthanda uJehova kuzakwenza ufune ukubhabhathizwa njalo kuzakunceda ukuthi uqhubeke uthembekile kuye ngemva kokubhabhathizwa. UJesu wathi kumele sithande uJehova ngenhliziyo yethu yonke, langomphefumulo wonke, langengqondo yonke, langamandla ethu wonke. (Mak. 12:30) Ungenzani ukuze umthande futhi umhloniphe kangako uJehova? Ukucabangisisa ngokuthi usithanda kangakanani kuzakwenza lathi simthande. w20.03 4 ¶4-5

Kutshoni ukuyenza ngokupheleleyo inkonzo yethu? Kutsho ukwenza konke okusemandleni ethu emsebenzini wokutshumayela lowokufundisa. Kodwa lokho akusindaba yokuchitha isikhathi esinengi kuphela. Okuqakatheke kakhulu kuJehova yisizatho esenza sitshumayele. Senza inkonzo yethu ngenhliziyo yonke ngenxa yokuthi sithanda uJehova kanye labomakhelwane. (Mak. 12:30, 31; Kol. 3:23) Ukukhonza uNkulunkulu ngenhliziyo yonke kutsho ukusebenza ngamandla ethu wonke ukuze senze konke esingakwenza enkonzweni. Ngakho nxa sisiqakathekisa isibusiso sokutshumayela sizazimisela ukutshela abantu abanengi izindaba ezinhle. Singabe singachithi isikhathi esifisa ukusichitha emsebenzini wokutshumayela. Lanxa kunjalo umsebenzi lo yiwo esithanda ukuwenza. Siyazama ukuthuthukisa indlela esitshumayela ngayo ukuze sifundise abantu izindaba ezinhle ngendlela ezathophela ezinhliziyweni zabo. Siyawuqakathekisa umsebenzi wokutshumayela ukwedlula ezinye izinto. w19.04 2 ¶3; 3 ¶4, 6

Amanga kaSathane enza abantu bezwe ubuhlungu kakhulu njalo bahlupheke nxa befelwe. Abazali abafelwe ngumntwana bangatshelwa ukuthi uNkulunkulu umthethe umntanabo ukuthi ayekuba yingilosi ezulwini. Amanga la enza ubuhlungu bube nganeno yini kumbe ayabubasela? Imfundiso yamanga yokutshiswa esihogweni yiyo eyayisenza abantu benze isihluku sokubophela esigodweni labo abaphikisana lalokho okufundiswa ngamasonto besebebatshisa. Elinye ibhuku elikhuluma ngomthethwandaba owawuseSpain kudala libika ukuthi abanye ababesenza isihluku lesi babesithi batshengisa abahlamuki benkolo yamaKatolika ukuthi “kunjani ukutshiswa phakade esihogweni,” ukwenzela ukuthi baphenduke bengakafi njalo bangatshiswa kokuphela esihogweni nxa sebefile. Emazweni amanengi abantu bayakuqakathekisa ukukhonza abafileyo futhi bayabahlonipha kumbe bacele izibusiso kubo. Abanye bafuna ukuthokozisa amadlozi abo ukwenzela ukuthi angabajezisi. Okudanisayo yikuthi izimfundiso ezisekelwe emangeni kaSathane azibaduduzi abantu kodwa zibenza bakhathazeke kakhulu futhi besabe. w19.04 14 ¶1; 16 ¶10