February

Bazi kuhle abafowenu labodadewenu. Xoxa labo imihlangano ingakaqalisi lalapho isiphelile, phuma labo ekutshumayeleni futhi nxa kusenza banxuse lizekudla lonke. Nxa ungenza njalo, ungathola ukuthi okwenza udade othile akhanye engajayeleki yikuthi ulenhloni lokuthi umfowethu olemali enengi kagijimisi inotho kodwa uyaphana. Kanti njalo ungathola ukuthi udade othile labantwabakhe abajayele ukuphuza emihlanganweni yebandla basuka emulini elabantu abaphikisa lokho abakukholwayo. (Jak. 4:12) Lanxa kunjalo akumelanga ‘singenele endabeni zabantu.’ (1 Tim. 5:13) Kodwa kuhle ukuthi sazi okuthile ngabafowethu labodadewethu lalokho okwenzakale ezimpilweni zabo. Lokho kuzasinceda ukuthi sibazwisise. Kumele ukuthi uzamzwisisa umfowenu loba udadewenu okubhowayo nxa ungabakwazi okwake kwenzakala empilweni yakhe. Akulula ukubazi kuhle abazalwane. Lanxa kunjalo, nxa ungalandela iseluleko seBhayibhili sokuthi uyivule ngokupheleleyo inhliziyo yakho uzalingisela uJehova othanda “yonke imihlobo yabantu.”—1 Tim. 2:3, 4; 2 Khor. 6:11-13. w20.04 16-17 ¶10-12

Ngobusuku bokucina uJesu engakabulawa, wakhumbuza abafundi bakhe ukuthi bathandane. Ukwenza njalo kwakuzabanceda ukuthi bahlale bemanyene futhi baqinisele nxa umhlaba ubazonda. Ake sixoxe ngokwenziwa ngamaKhristu ayesebandleni leThesalonika. AmaKhristu la aqalisa ukuhlukuluzwa ibandla lawo lisanda nje ukubunjwa. Kodwa aqhubeka eqotho futhi ethandana. (1 Thes. 1:3, 6, 7) UPhawuli wawakhuthaza ukuthi aqhubeke etshengisana uthando futhi ‘akwenze kakhulu lokho.’ (1 Thes. 4:9, 10) Uthando lwaluzawenza aduduze abahlulukelweyo futhi asekele ababuthakathaka. (1 Thes. 5:14) Enza khona kanye uPhawuli awakhuthaza ukuthi akwenze ngoba kwathi sekudlule phose umnyaka, uPhawuli esebhala incwadi yakhe yesibili, wathi: “Uthando elilalo komunye lomunye luqhubeka lusanda.” (2 Thes. 1:3-5) Indlela ayethandana ngayo yawanceda ukuthi aqinisele ngesikhathi ehlukuluzwa. w21.03 22 ¶11

Kumele sigijime endleleni amaKhristu akhangelelwe ukuthi agijime kuyo nxa sifuna ukuthola umvuzo wokuphila okungapheliyo. (ImiSeb. 20:24; 1 Phet. 2:21) Kodwa uSathane lalabo abamlingiselayo bafuna ‘siqhubeke sigijima labo.’ (1 Phet. 4:4) Bayayichothoza indlela esiphila ngayo futhi bathi eyabo ingcono njalo ibanika inkululeko. Kodwa abakutshoyo kungamanga. (2 Phet. 2:19) Kuqakathekile sibili ukuthi sikhethe indlela eqondileyo esizagijima kuyo. USathane ufuna sonke sisuke endleleni encinyane ‘eyisa ekuphileni’ siye endleleni ebanzi ehanjwa ngabantu abanengi bomhlaba lo. Abanengi bagijima kuyo futhi kulula ukuhamba kuyo. Kodwa ‘iyisa ekubhujisweni.’ (Mat. 7:13, 14) Kumele sithembe uJehova njalo simlalele ukuze sihlale sisendleleni eyiyo futhi singaphambukiswa. w20.04 26 ¶1; 27 ¶5, 7

Eminyakeni esanda kwedlula iRussia labangane bayo labo bangenile ‘eLizweni Elihle.’ (Dan. 11:41) Njani? Ngo-2017 inkosi le yasenyakatho yavimba umsebenzi wabantu bakaJehova njalo yavalela abanye abafowethu labodadewethu ejele. Yaphinda yathi amabhuku ethu awasavunyelwa elizweni lelo okugoqela le-Nguqulo Yomhlaba Omutsha. Kanti njalo yasithathela iwofisi yegatsha eRussia, amaWolu oMbuso kanye lamaWolu Emihlangano Emikhulu. Konke lokhu kwenza ukuthi ngo-2018 iQula Elibusayo lithi iRussia labangane bayo bayinkosi yasenyakatho. Lanxa abantu bakaJehova behlukuluzwa kabuhlungu abasoze balwisane laloba nguphi uhulumende kumbe bazame ukumtshintsha. Bona balandela iseluleko esiseBhayibhilini sokuthi bakhulekele “bonke abasezikhundleni eziphezulu” ikakhulu nxa labobantu besenza izinqumo ezingenza sikhonze sikhululekile loba ezingasivimba. w20.05 14 ¶9

Bazali, nxa lifuna abantwabenu bangalithandabuzi iqiniso, kumele babe ngabangane bakaNkulunkulu futhi bangathandabuzi ukuthi iBhayibhili lifundisa iqiniso. Nxa ufuna ukufundisa abantwabakho iqiniso ngoNkulunkulu kumele uqale ube ngumfundi okhutheleyo weBhayibhili. Kufanele ube lesikhathi sokucabangisisa ngokufundayo. Nxa ungakwenza lokhu kuzabalula ukuthi ubafundise ukuthi labo benze njalo. Kanti njalo kumele ubafundise ukuthi kuchwayisiswa njani njengoba usenza ezifundweni zakho zeBhayibhili. Ukwenza njalo kuzanceda abantwababo ukuthi bathande uJehova futhi bathembe ‘inceku ethembekileyo lehlakaniphileyo’ ngoba yiyo ayisebenzisayo ukuthi asinike ukudla okusiqinisa ukholo. (Mat. 24:45-47) Ungapheleli ekufundiseni abantwabakho izimfundiso zeBhayibhili eziyisisekelo kodwa bancedise babe lokholo oluqinileyo ngokubafundisa ‘izinto ezijulileyo zikaNkulunkulu’ kusiya ngeminyaka yabo lokuzwisisa kwabo.—1 Khor. 2:10. w20.07 11 ¶10, 12-13

Lamuhla kulamamiliyoni abantu angabangane bakaJehova abaseduze. Okwenza abantu laba babe ngabangane bakhe yikuthi balokholo enhlawulweni kaJesu. Siyenelisa ukuba ngabangane bakaJehova lokuzinikela kuye futhi sibhabhathizwe ngenxa yenhlawulo. Nxa singakwenza lokhu sizaba phakathi kwamamiliyoni amaKhristu azinikeleyo njalo abhabhathizwa ‘asekhwapheni’ loMuntu omkhulu kulabo bonke. Singatshengisa njani ukuthi siyakuqakathekisa ukuba ngabangane bakaNkulunkulu? U-Abrahama loJobe bahlala bethembekile kuNkulunkulu okweminyaka edlula 100. Kumele sibalingisele ngokuhlala sithembekile kuJehova kungelani lokuthi sesimkhonze okweminyaka emingaki emhlabeni lo omdala. Kanti njalo kumele silingisele uDanyeli ngokuqakathekisa ubungane bethu loNkulunkulu ukwedlula impilo yethu. (Dan. 6:7, 10, 16, 22) UJehova uzasincedisa siqinisele kuloba yibuphi ubunzima esihlangana labo ukuze sihlale singabangane bakhe.—Flp. 4:13. w20.05 27 ¶5-6

INkosi uDavida yabona umfazi wenye indoda egeza. UDavida wayewazi umthetho kaJehova othi: “Ungahawukeli umfazi kamakhelwane wakho.” (Eks. 20:17) Lanxa kunjalo waqhubeka elokhu emkhangele. Inhliziyo yakhe yehlukana, wafisa ukuya emacansini loBhathisheba ngapha efisa ukuthokozisa uJehova. Lanxa uDavida wayeselesikhathi eside ethanda uJehova njalo emesaba, wavumela ukukhulelwa yinkanuko yakhe wenza okwakufunwa nguye kulokuthi athokozise uJehova. Lokhu kwabangela ukuthi enze izinto ezimbi. Wangcolisa ibizo likaJehova njalo wenza abantu abangelacala bahlupheka okugoqela labemuli yakhe. (2 Sam. 11:1-5, 14-17; 12:7-12) UJehova wamlaya uDavida futhi uDavida waphinda waba ngumngane wakhe. (2 Sam. 12:13; Hubo. 51:2-4, 17) UDavida wakhumbula ubunzima losizi olwalubangelwe yikuvumela kwakhe ukuthi inhliziyo yehlukane. UJehova wamncedisa yini uDavida ukuthi abe lenhliziyo epheleleyo kumbe engehlukananga? Ye, ngoba ngemva kwesikhathi iLizwi likaJehova lithi uDavida wayeyindoda ‘elenhliziyo elandela uJehova uNkulunkulu wakhe ngokupheleleyo.’—1 AmaKho. 11:4; 15:3. w20.06 11 ¶12-13

IBhayibhili lifanisa indlela uJehova athanda ngayo abantu bakhe lentambo. Uthando lukaNkulunkulu lufanana njani lentambo? Ake sithi usugalula elwandle olulamagagasi alolaka lamanzi aqandayo, omunye osesikepeni abesekuphosela okuthile ongabambelela kukho okwenza ungagaluli. Ungambonga sibili kodwa kukhona okunye okudingakalayo. Kumele uphume emanzini. Yikho udinga ukuthi uphoselwe intambo ngabantu abasesikepeni futhi udonswe ukuze uyengena kuso. UJehova watshela ama-Israyeli ayesephambukile amazwi asembhalweni walamuhla. Ngothando wayelokhu ‘ewadonsa.’ UNkulunkulu ufuna ukwenza njalo kulabo abatshiye ukumkhonza futhi abathwele nzima ngezinhlupho kanye lokukhathazeka. Ufuna bakwazi ukuthi uyabathanda njalo ufuna ukubadonsela kuye. UJehova angakusebenzisa ukuthi ancedise abantu labo babone ukuthi uyabathanda. Kuqakathekile ukuhlala sitshela abangasayifezi inkonzo ukuthi uJehova uyabathanda lokutshengisa ukuthi lathi siyabathanda. w20.06 27 ¶12-13

Ngesikhathi umfundi uStefane esebulewe, amaKhristu amanengi abaleka eJerusalema ‘asabalala kuzo zonke izabelo zeJudiya leSamariya’ aze ayafika eKhuphro le-Antiyokhi. (ImiSeb. 7:58–8:1; 11:19) Lanxa amaKhristu la ehlelwa zinhlupho ezinengi, aqhubeka etshumayela izindaba ezinhle loba ngaphi lapho ayesiya khona futhi kwabunjwa amabandla amanengi endaweni ezinengi. (1 Phet. 1:1) Kodwa kukhulu okwakusiza. Ngokwesibonelo, phose ngomnyaka ka-50 C.E., umbusi weRoma uKlawudiyu wakhipha umlayo wokuthi amaJuda wonke aphume aphele eRoma. Yikho amaKhristu angamaJuda kwasekungaselanto ayengayenza ngaphandle kokuthi atshiye imizi yawo ayehlala kwezinye indawo. (ImiSeb. 18:1-3) Ngabo-61 C.E., umphostoli uPhawuli wabhala wathi amaKhristu la ayephathwe kubi phambi kwabantu, afakwa emajele futhi aphundlwa impahla yawo. (Heb. 10:32-34) Kanti njalo amanye ayengabayanga futhi ayeke agule njengabo bonke abantu.—Rom. 15:26; Flp. 2:25-27. w21.02 26-27 ¶2-4

Nxa singasebenza nzima ukuthi siqinise ukholo lwethu, uSathane lalabo abamsekelayo abasoze basiyekelise ukuhamba eqinisweni. (2 Joh. 8, 9) Kumele sikhangelele ukuthi abantu bomhlaba lo basizonde. (1 Joh. 3:13) UJohane usikhumbuza ukuthi “umhlaba wonke ungaphansi kwamandla omubi.” (1 Joh. 5:19) USathane ulokhu ezonda ngamandla njengoba ukuphela komhlaba lo kusondela. Kasihlaseli esebenzisa izindlela ezicatshileyo kuphela njengokusilinga ukuthi siziphathe kubi kwezemacansini kumbe ngamanga akhulunywa ngabahlamuki kodwa uphinda asihlasele okusegcekeni ngokusihlukuluza okulolunya. Uyakwazi ukuthi ulesikhathi esifitshane yikho ezama ngamandla wonke ukumisa umsebenzi wethu wokutshumayela lokusenza singabi lokholo. Ngakho asimangali ukuthi kulamanye amazwe lapho umsebenzi wethu ongavunyelwa khona ngokupheleleyo lalapho eminye imisebenzi yethu engavunyelwa khona. Lanxa kunjalo abafowethu labodadewethu emazweni lawo bayaqinisela. Benza kukhanye ukuthi sizanqoba kuphela kungelani lokuthi omubi usihlasela njani! w20.07 24 ¶12-13

UJehova wayehlose ukuthi abantu baphile nini lanini emhlabeni omuhle ayewudalile. Kodwa u-Adamu lo-Eva bahlamukela uYise olothando yikho isono lokufa kwagubuzela umhlaba. (Rom. 5:12) Manje uJehova wenzani? Wahle watsho ukuthi uzabakhulula njani abantu. (Gen. 3:15) Wayezanikela ngeNdodana yakhe uJesu ukuthi ibe ngumhlatshelo ozakhulula abantwana baka-Adamu lo-Eva esonweni lasekufeni. Kanti njalo wayezanika loba ngubani okhetha ukumkhonza ukuphila okungapheliyo. (Joh. 3:16; 1 Khor. 15:21, 22) Nxa uJehova esevusa amamiliyoni abantu esebenzisa iNdodana yakhe, asikhangelelanga ukuthi awavuse wonke ngasikhathi sinye. Phela kungaba lokuxokozela emhlabeni nxa lokhu kungenzakala. UJehova ngeke enze loba yini ngendlela engahlelekanga. Uyakwazi ukuthi izinto kumele zihleleke ukuze kuhlale kulokuthula.—1 Khor. 14:33. w20.08 14 ¶3; 15 ¶5

Umfundi kumele azwisise ukuthi inhloso yethu yokufunda laye yikumsiza ukuthi abe nguFakazi kaJehova. Kulezinto ezinengana umfundi azenzayo ukuze abhabhathizwe. Ubamazi uJehova, amthande futhi abe lokholo kuye. (Joh. 3:16; 17:3) Kanti njalo uba ngumngane wakhe lowabafowethu labodadewethu ebandleni. (Heb. 10:24, 25; Jak. 4:8) Ngokuhamba kwesikhathi uyatshiya izinto ezimbi akade ezenza njalo aphenduke. (ImiSeb. 3:19) Uyatshela labanye lokho asekukholwa. (2 Khor. 4:13) Ngemva kwalokho uyazinikela kuJehova njalo abhabhathizwe. (1 Phet. 3:21; 4:2) Lelo lilanga elithokozisa kakhulu kubo bonke! Kumele ube umncoma umfundi nxa esenza konke lokhu njalo umkhuthaza ukuthi aqhubeke ekwenza. w20.10 17-18 ¶12-13

Nxa ungaziqathanisa labanye ebandleni, ungazibona angani kawulancedo. Abanye ebandleni bangabe bezingcitshi ekufundiseni, ekuhleleni izinto, ekududuzeni lasekukhuthazeni abanye. Engxenye ucabanga ukuthi kawenelisi ukwenza njengabo. Lokhu kutshengisa ukuthi uthobekile lokuthi uyavuma ukuthi kulezinto ongenelisi ukuzenza. (Flp. 2:3) Kodwa kumele unanzelele ngoba ukuhlala uziqathanisa labantu abazingcitshi kuzakwenza utshone udanile. Kanti njalo umphostoli uPhawuli waveza ukuthi ungacina ubona angani kawulancedo ebandleni. UJehova wanika amanye amaKhristu akuqala izipho ezimangalisayo esebenzisa umoya ongcwele kodwa kazange awaphe izipho ezifananayo. (1 Khor. 12:4-11) Lanxa kunjalo umKhristu ngamunye wayeqakathekile. Lamuhla thina kasiphiwanga izipho ezimangalisayo zomoya ongcwele. Sileziphiwo ezitshiyeneyo kodwa sonke siqakathekile kuJehova. w20.08 23 ¶13-15

Nxa ungathandaza ucela isibindi, uJehova uzayiphendula imithandazo yakho njalo kasoze akutshiye loba sekutheni. (ImiSeb. 4:29, 31) Uzahlala ekusekela. Cabanga ngendlela uJehova akuncedisa ngayo usebunzimeni lakunika ngayo amandla okuthi utshintshe indlela owawuphila ngayo. Akuthandabuzwa ukuthi lowo owakhokhela abantu bakhe bedabula phakathi koLwandle Olubomvu angakuncedisa ukuthi ube ngumfundi kaKhristu. (Eks. 14:13) Lawe ungaba lokholo oluqinileyo njengomhubi owatsho amazwi asembhalweni walamuhla. UJehova angancedisa lalabo abasanda kuba ngabamemezeli ukuthi babelesibindi. Cabanga ngalokho okwenzakala kudade okuthiwa nguTomoyo. Wathi eqalisa ukutshumayela endlini ngendlu umninimuzi wokuqala wamtshingela wathi: “Angifuni kukhuluma laboFakazi bakaJehova,” wasetshayelela isivalo. UTomoyo kazange esabe, kodwa watshela ayehamba laye wathi: “Umzwile ukuthi utheni? Angikhulumanga lutho, kodwa uhle wabona ukuthi nginguFakazi kaJehova. Sengithabe!” Khathesi uTomoyo uliphayona lesikhathi sonke. w20.09 6 ¶13-14

U-Asa watshela abantu ukuthi uJehova nguye ‘owayebanike ukuthula nxazonke.’ (2 ImiLan. 14:6, 7) Kazange acabange ukuthi isikhathi leso sokuthula sasingesokuziphumulela nje. Kodwa wasisebenzisa ukwakha amadolobho, imiduli lemithangala kanye lamasango. Watshela abantu bakoJuda wathi: “Ilizwe lilokhu lingelethu.” Wayesitshoni? Wayesitsho ukuthi abantu babekhululekile ukubhoda elizweni uNkulunkulu ayebanike lona futhi bakhe kungelazitha ezibaphikisayo. Wabakhuthaza ukuthi basisebenzise kuhle lesosikhathi sokuthula. U-Asa waphinda wasebenzisa isikhathi leso sokuthula ukuthi aqinise ibutho lakhe. (2 ImiLan. 14:8) Kodwa lokhu akutsho ukuthi wayengamthembi uJehova. Wayekwazi ukuthi kwakungumsebenzi wakhe njengenkosi ukuthi ancedise abantu balungele ubunzima obabungabehlela esikhathini esizayo. U-Asa wayekwazi ukuthi isikhathi sokuthula sasingaphela futhi yikho kanye okwenzakalayo. w20.09 15 ¶4-5

Ehlose okuhle umdala angafaka imithetho ukuze avikele izimvu zikaNkulunkulu. Lanxa kunjalo, amandla aphiwe abadala bebandla atshiyene kakhulu lamandla aphiwe inhloko zezimuli. Ngokwesibonelo, uJehova unike abadala umsebenzi wokwahlulela kodwa kawunikanga izinhloko zezimuli. Uphinde wanika abadala umthwalo wokuthi basuse ebandleni izoni ezingaphendukiyo. (1 Khor. 5:11-13) Kodwa uJehova unike inhloko zezimuli amandla angawanikanga abadala bebandla. Ngokwesibonelo, inhloko yemuli ilelungelo lokufaka imithetho lokuba leqiniso lokuthi iyalandelwa. (Rom. 7:2) Ilamandla okutshela abantwabayo ukuthi bangene sikhathi bani endlini futhi ilelungelo lokubajezisa nxa bengawulaleli umthetho lowo. (Efe. 6:1) Kodwa inhloko yemuli elothando iqala ibonisane lomkayo ingakafaki imithetho. Phela bobabili ‘banyamanye.’—Mat. 19:6. w21.02 16-18 ¶10-13

Okwenza iqiniso eliseLizwini likaNkulunkulu libe ligugu yikuthi uJehova ulambulela abathobekileyo kuphela ‘abalesifiso sokuthola ukuphila okungapheliyo.’ (ImiSeb. 13:48) Abantu laba bayakholwa ukuthi inceku ethembekileyo lehlakaniphileyo yiyo esetshenziswa nguJehova ukusifundisa iBhayibhili. (Mat. 11:25; 24:45) Phela kasingeke silizwisise nxa singancediswanga futhi akulanto eligugu ukwedlula ukulizwisisa. (Zaga. 3:13) UJehova uphinde wasiphathisa isibusiso sokufundisa abantu iqiniso elimayelana laye lalokho akuhlosileyo. (Mat. 24:14) Umlayezo esiwutshumayelayo uligugu kakhulu ngoba wenza abantu benelise ukuba ngamalunga emuli kaJehova futhi ubanceda bathole ukuphila okungapheliyo. (1 Tim. 4:16) Kungelani lokuthi sitshumayela amahola amangaki, sonke siyancedisa emsebenzini lo oqakatheke kulayo yonke. (1 Tim. 2:3, 4) Kuyisibusiso sibili ukusebenza loNkulunkulu!—1 Khor. 3:9. w20.09 26-27 ¶4-5

Ngesikhathi umphostoli uPhawuli esiya eRoma, uJehova wamnceda kanengi esebenzisa abazalwane. Ngokwesibonelo, abangane bakhe abathembekileyo u-Aristakhu loLukha bakhetha ukuhamba laye eRoma. IBhayibhili kalisitsheli ukuthi uJesu wabathembisa ukuthi babezafika kuhle khonale. Yikho babefaka ukuphila kwabo engozini ngesikhathi bethatha uhambo lolu oluyingozi. Kodwa babezimisele ukuhamba ukuze bancede uPhawuli. Baze babakwazi sekudlule isikhathi ukuthi bazafika bephila eRoma. Bathi sebefike ethekwini leSidoni, uJuliyu wavumela uPhawuli “ukuthi aye kubangane bakhe bayemnakekela.” (ImiSeb. 27:1-3) Ngemva kwensuku ezilutshwana sebesedolobheni lePhuthewoli, uPhawuli labangane bakhe ‘bathola abazalwane, ababancenga ukuthi bahlale labo okwensuku eziyisikhombisa.’ Akuthandabuzwa ukuthi abazalwane bendawo lezo bathokoza kakhulu ngezindaba ezikhuthazayo uPhawuli ayebaxoxela zona.—Khangela imiSebenzi 15:2, 3. w20.11 15-16 ¶15-17

Abazali kumele batshengise abantwababo ngalokho abakutshoyo labakwenzayo ukuthi bayamthanda sibili uJehova. Isipho esingcono kakhulu abangasinika abantwababo yikubancedisa ukuthi bathande uJehova. Okunye okuqakatheke kakhulu abangakwenza yikubafundisa ukuthi bahlale betaditsha iBhayibhili, bethandaza, besiya emihlanganweni yebandla njalo betshumayela. (1 Tim. 6:6) Kanti njalo kumele babanike abakudingayo. (1 Tim. 5:8) Kodwa okufanele bakukhumbule yikuthi okuzakwenza abantwababo basinde futhi bangene emhlabeni omutsha yibungane babo loJehova hatshi imali kumbe izinto abalazo. (Hez. 7:19) Kuyathokozisa kakhulu ukubona abazali abanengi abangamaKhristu bekhetha ukwenza izinto ezizanceda abantwababo ukuthi basondele kuJehova. Izikhathi ezinengi abantwana abakhulela emulini ezinje baqhubeka besenza izinto ezinhle abazifundiswayo lanxa sebekhulile njalo bayathokoza ngendlela abazali babo ababakhulisa ngayo.—Zaga. 10:22. w20.10 28-29 ¶10-11

Ngezinye izikhathi umphostoli uPhetro wayekhuluma kumbe enze izinto engacabanganga okwakubangela ukuthi acine ezisola. Ngokwesibonelo, ngesikhathi uJesu etshela abaphostoli bakhe ukuthi uzahlupheka afe, uPhetro wamtshela amazwi asembhalweni walamuhla. (Mat. 16:21-23) UJesu wamkhuza uPhetro. Ngesikhathi kusiza ixuku elalizobopha uJesu, uPhetro kazange atshone ecabanga kabili, waquma indlebe yenceku yomphristi omkhulu. (Joh. 18:10, 11) Lalapha uJesu wamkhuza. Ngesikhathi uJesu esithi abaphostoli bakhe bazamtshiya, uPhetro wazikhukhumeza wathi yena kasoze amtshiye loba sekutheni lanxa abanye bonke bengamtshiya. (Mat. 26:33) Kodwa ngobusuku lobo uPhetro wakhulelwa yikwesaba waze waphika iNkosi yakhe kathathu. Lokhu kwamenza wadana kakhulu “waphuma phandle wakhala okuzwisa usizi.” (Mat. 26:69-75) Wayengabe ezibuza ukuthi uJesu uzafa wamxolela yini. Lanxa uPhetro wadana kakhulu kazange amtshiye uJehova, waqhubeka emkhonza kanye labanye abaphostoli.—Joh. 21:1-3; ImiSeb. 1:15, 16. w20.12 20 ¶17-18

Zinengi indlela inhloko yemuli engatshengisa ngazo ukuthi ithobekile. Ngokwesibonelo, kayisoze ikhangelele ukuthi imuli yayo ingaphambanisi. Izalalela njalo icabangisise nxa umkayo labantwabayo beveza lokho abakucabangayo lanxa ingavumelani lakho. Kanti njalo indoda ingatshengisa ukuthi ithobekile ngokwenza imisebenzi yendlini lanxa abantu emphakathini besithi imisebenzi leyo ngeyabomama. Lokhu kudinga ukuthi izimisele. Kungani sisitsho njalo? Udade okuthiwa nguRachel uthi: “Lapho engakhulela khona, nxa indoda incedisa umkayo ukugezisa imiganu kumbe ukuklina endlini, omakhelwane lezihlobo bathi ayisiyondoda kuzwa. Bangacabanga ukuthi ibuswa ngumfazi.” Nxa kuyikuthi lokho yikho okwenzakala lapho ohlala khona, khumbula ukuthi uJesu wagezisa inyawo zabafundi bakhe lanxa lo kwakungumsebenzi owawusenziwa yinceku. Indoda ephatha kuhle imuli yayo iqakathekisa ukuthi umkayo labantwabayo bathokoze kulokuthi abantu bayibone iyindoda kuzwa. w21.02 2 ¶3; 4 ¶11

Ukukhumbula izinto ezinhle ezenzakala empilweni yethu kuyisipho esivela kuJehova. Kodwa kungelani lokuthi impilo yethu yayimnandi njani kudala, emhlabeni omutsha izabe imnandi kakhulu. Abanye bangasizwisa ubuhlungu, kodwa nxa singabathethelela sizenelisa ukuqhubeka sikhonza uJehova ngenhliziyo yonke. Ukuhlala sizisola kungabangela ukuthi singathokozi ekukhonzeni uJehova. Kodwa kumele silingisele umphostoli uPhawuli sikholwe ukuthi uJehova usithethelele. (1 Tim. 1:12-15) Silethemba lokuphila kuze kube nini lanini. Nxa sesisemhlabeni omutsha, kasisoze sikhumbule loba yini ezakwenza sidane. IBhayibhili lithi: “Izinto zakuqala aziyikukhunjulwa.” (Isaya. 65:17) Ngokwesibonelo, abanye bethu sebeze baguga bekhonza uJehova kodwa emhlabeni omutsha bazaphinda babe batsha. (Jobe. 33:25) Yikho kasizimiseleni ukungahlali sicabanga izinto zakudala kodwa kasikhangeliseni amehlo ethu phambili! w20.11 24 ¶4; 29 ¶18-19

Ikusasa lisiphatheleni? Ngesikhathi sokuhlupheka okukhulu, uJehova uzasisindisa ngendlela ezimbili ezimangalisayo. Eyokuqala, uzavikela izinceku zakhe eziqotho lapho ebangela amakhosi omhlaba ukuthi abhubhise iBhabhiloni Enkulu, okutsho inkolo yamanga. (Isam. 17:16-18; 18:2, 4) Eyesibili, uzavikela abantu bakhe lapho esetshabalalisa okuyabe kusele emhlabeni kaSathane empini ye-Amagedoni. (Isam. 16:14, 16) Nxa singahlala siseduze loJehova, kakulalutho uSathane angalwenza ukuthi asitshabalalise. Yena nguye ozatshabalaliswa, angaphindi abe khona! (Rom. 16:20) Yikho gqoka zonke izigqoko zokuzivikela futhi ungazikhiphi. Ungazami ukulwa loSathane lomhlaba wakhe uwedwa. Ncedisa abafowenu labodadewenu futhi ulalele lokho okutshelwa nguJehova. Ungenza njalo, uYihlo okuthandayo uzakuqinisa njalo akuvikele.—Isaya. 41:10. w21.03 30 ¶16-17

Singatshengisa njani ukuthi siyamthemba uJehova? Ngokwenza lokho asitshela khona. IBhayibhili lilezindaba ezinengi ezitshengisa ukuthi kuqakatheke kakhulu ukuthi sihlaliseke lokuthi sithembe uJehova. Ngesikhathi uzibala, nanzelela ukuthi kuyini okwanceda izinceku zikaNkulunkulu ukuthi zihlaliseke lanxa zazihlukuluzwa. Ngokwesibonelo, abaphostoli kabazange besabe ngesikhathi umthethwandaba omkhulu wamaJuda ubatshela ukuthi bayekele ukutshumayela. Bakhuluma ngesibindi bathi: “Kumele silalele uNkulunkulu umbusi kulokuthi silalele abantu.” (ImiSeb. 5:29) Langemva kokubhaxabulwa, abaphostoli babehlalisekile ngoba babekwazi ukuthi uJehova wayebasekela lokuthi wayethokoza ngabo. Lokhu kwabanceda ukuthi baqhubeke betshumayela izindaba ezinhle. (ImiSeb. 5:40-42) Langesikhathi umfundi uStefane esekhangelane lokufa wayehlaliseke okokuthi ubuso bakhe “babunjengobuso bengilosi.” (ImiSeb. 6:12-15) Kuyini okwenza wahlaliseka? Wayengathandabuzi ukuthi uJehova wayethokoza ngaye. w21.01 4 ¶10-11

Lokhu kutsho ukuthi abexuku leli balomzwangedwa ohlanzekileyo lokuthi uJehova uyathokoza ngabo. (Isaya. 1:18) BangamaKhristu azinikele kuNkulunkulu njalo abhabhathiziweyo, atshengisa ukuthi alokholo emhlatshelweni kaJesu futhi angabangane bakaJehova. (Joh. 3:36; 1 Phet. 3:21) Lokhu yikho okwenza afanele ukuma phambi kwesihlalo sobukhosi sikaNkulunkulu lokumenzela ‘inkonzo engcwele emini lebusuku’ lapha emhlabeni. (Isam. 7:15) Ayatshiseka futhi enza okunengi emsebenzini wokutshumayela lokwenza abafundi ngoba aqakathekisa uMbuso kaNkulunkulu ukwedlula loba yini. (Mat. 6:33; 24:14; 28:19, 20) Abexuku elikhulu abasinde ekuhluphekeni okukhulu kabathandabuzi ukuthi uNkulunkulu uzaqhubeka elabo ngoba “Lowo ohlezi esihlalweni sobukhosi uzakwendlala itende lakhe phezu kwabo.” Kuzagcwaliseka isithembiso osekulesikhathi eside abezinye izimvu besilindele ngabomvu esithi: “[UNkulunkulu] uzakwesula zonke izinyembezi emehlweni abo, ukufa ngeke kusabakhona.”—Isam. 21:3, 4. w21.01 16 ¶9-10

Kuyasithokozisa ukuba semulini kaJehova futhi senza konke okusemandleni ethu ukuthi sihloniphe labo uJehova ababeke ukuthi basikhokhele. IBhayibhili liveza ukuthi uJehova uthanda abesifazana ngendlela athanda ngayo amadoda. Ngokwesibonelo, lisitshela ukuthi ngesikhathi sabaphostoli, uJehova wanika labesifazana umoya ongcwele ukuze benze imisebenzi emangalisayo egoqela ukukhuluma ngezindimi. (ImiSeb. 2:1-4, 15-18) Ugcobe abanye babo ukuthi bayebusa loKhristu ezulwini. (Gal. 3:26-29) Abanye balethemba lokuphila emhlabeni kuze kube nini lanini. (Isam. 7:9, 10, 13-15) Kanti njalo labo baphiwe umsebenzi wokutshumayela lowokwenza abafundi. (Mat. 28:19, 20) Ngokwesibonelo, ibhuku lemiSebenzi lisitshela ngodade okuthiwa nguPrisila. Yena lomkakhe u-Akhwila bachasisela enye indoda eyayifundile okuthiwa ngu-Apholo iqiniso ukuze liyicacele kuhle.—ImiSeb. 18:24-26. w21.02 14 ¶1; 15 ¶4

Badala, lilomlandu wokuncedisa abamemezeli ukuthi babe zingcitshi emsebenzini wokutshumayela lowokufundisa. Nxa ummemezeli esesaba ukuqhuba isifundo wena ukhona ungacela ukusiqhuba. Kunengi abadala abangakwenza ukuze bakhuthaze abamemezeli. (1 Thes. 5:11) Lanxa ungelasifundo seBhayibhili osiqhubayo khathesi, ungenelisa ukuncedisa omunye ukuthi athuthuke aze abhabhathizwe. Siza ofundisayo ngemicijo oyilungiselele kuhle kodwa ungakhulumi kakhulu. Woba ngumngane labantu abafunda iBhayibhili ababuya emihlanganweni yebandla futhi ube yisibonelo esihle kubo. Badala, khuthazani izifundo zeBhayibhili ngokuzinika isikhathi sokuba lazo njalo liqeqetshe abamemezeli liphinde libancome. Kambe kuyini okuthokozisa ukwedlula ukwazi ukuthi senze okuthile, lanxa kukuncane ekuncediseni omunye ukuthi athande futhi akhonze uBaba wethu uJehova? w21.03 13 ¶18-19

UDavida wayesenza izinto ezenza abanye bamthemba. Ngokwesibonelo, esakhula wayekhuthele ekweluseni izimvu zikayise. Lo kwakungumsebenzi oyingozi. Ngokuhamba kwesikhathi watshela iNkosi uSawuli wathi: “Inceku yakho yayiselusa izimvu zikayise. Kwathi kufike isilwane kumbe ibhere lajwamula imvu emhlambini, ngalilandela, ngalitshaya ngahlenga imvu emlonyeni walo.” (1 Sam. 17:34, 35) UDavida wayekwazi ukuthi kungumlandu wakhe ukuthi anakekele izimvu. Abafowethu abasakhulayo bangamlingisela ngokukhuthala emisebenzini abayiphiweyo. UDavida waba ngumngane kaJehova oseduze ngesikhathi esesemutsha. Ubungane lobu babuqakatheke kakhulu ukwedlula ukuba lesibindi kumbe ukuba yingcitshi yokutshaya ichacho. UDavida wayengaboni uJehova enguNkulunkulu wakhe kuphela, kodwa wayembona enguMngane wakhe oseduze. Bafowethu abasakhulayo, into eqakatheke kakhulu okumele liyenze yikuqinisa ubungane benu loYihlo osezulwini. w21.03 3 ¶4-5