March

Kasifuni ukuzondwa futhi kasikholisi nxa sihlukuluzwa ngenxa yalokho esikukholwayo. Manje kungani sithokoza? Nanzi izizatho ezintathu. Esokuqala, nxa siqinisela, uNkulunkulu uyathokoza ngathi. (1 Phet. 4:13, 14) Esesibili, ukholo lwethu luba ligugu kakhulu futhi luyaqina. (1 Phet. 1:7) Esesithathu, sizathola ukuphila okungapheliyo. (Rom. 2:6, 7) UJesu wathi esevusiwe, abaphostoli bayithola intokozo ayekhulume ngayo. Bathokoza lanxa babeqeda ukubhaxabulwa futhi belaywe ukuthi bayekele ukutshumayela. Kungani babethokoza? “Ngenxa yokuthi kwakubonakale kufanele ukuthi baphathwe kubi ngenxa yebizo [likaJesu].” (ImiSeb. 5:40-42) Babeyithanda kakhulu iNkosi yabo yikho babengazesabi izitha zabo futhi batshengisa uthando lolo ‘ngokungayekeli’ ukutshumayela izindaba ezinhle. Abafowethu labodadewethu abanengi lamuhla baqhubeka bekhonza uJehova bethembekile lanxa besebunzimeni. Bayakwazi ukuthi kasoze awukhohlwe umsebenzi wabo lothando abalutshengisa ebizweni lakhe. w21.03 25 ¶18-19

AmaKhristu agcotshiweyo kawazalwa elethemba lokuya ezulwini, uNkulunkulu nguye owanika lelothemba. Nxa amaKhristu la esegcotshiwe ayacabangisisa ngethemba alalo, athandaze ngalo njalo ayabe esekukhangelele ngabomvu ukuthola umvuzo wawo wokuyaphila ezulwini. Kodwa kawakwazi ukuthi imizimba yawo yomoya izabe injani nxa esekhonale. (Flp. 3:20, 21; 1 Joh. 3:2) Lanxa kunjalo, akhangelele ukuhlala ezihlalweni zawo zobukhosi eMbusweni. Abezinye izimvu bona bakhangelele ukuphila emhlabeni kuze kube nini lanini. Lokhu yikho okufiswa ngumuntu wonke. Basilindele isikhathi lapho abazancedisa khona ukutshintsha umhlaba wonke ube lipharadayisi. Sesibaphuzele isikhathi lapho abazakwakha izindlu zabo, bahlanyele izingadi njalo babe lempilakahle bona kanye lezimuli zabo. (Isaya. 65:21-23) Balindele ngabomvu ukuvakatshela indawo ezinengi emhlabeni, bebuka izintaba, amagusu kanye lolwandle futhi befunda ngazo zonke izinto uJehova azidalileyo. Kodwa okubathokozisa kakhulu yikwazi ukuthi ubungane babo loJehova buzaqhubeka buqina. w21.01 18-19 ¶17-18

Kwathi abaseBhabhiloni sebelihlasele balitshabalalisa ilizwe abantu bathi: “Lilugwadule oluphundlekileyo, olungelabantu lezinyamazana, ngoba lanikelwa kumaKhaledi.” (Jer. 32:43) Ngemva kweminyaka engaba ngu-200 kulotshwe isiphrofetho sikaJoweli, uJehova wasebenzisa uJeremiya ukuthi aphrofethe ngokunye okumayelana lokuhlasela lokhu. Wathi abaseBhabhiloni babezawadinga baze bawathole ama-Israyeli ayesenza izinto ezimbi njalo bawathumbe wonke. “UJehova uthi, ‘Kodwa khathesi ngizathumela abagoli benhlanzi abanengi, bazababamba. Emva kwalokho ngizathumela abazingeli abanengi, bazabazingela ezintabeni zonke lasemaqaqeni wonke njalo lasezingoxweni zamadwala. . . . Ngizaphindisela ngokuphindiweyo ububi babo lesono sabo.’” Lanxa ama-Israyeli ayengacatsha elwandle loba eguswini, abaseBhabhiloni babezawabamba kuphela.—Jer. 16:16, 18. w20.04 5 ¶12-13

Ngesikhathi esiqakathekileyo empilweni yakhe, uLothi waphuza ukwenza lokho uJehova ayemtshela khona. Singacabanga ukuthi uLothi wayengelandaba layekutshelwe nguJehova kumbe ukuthi wayengalaleli. Kodwa uJehova kazange akhalale ukuzama ukumsindisa. Izingilosi zamxhakalaza ngesandla yena lemuli yakhe zabakhipha edolobheni “ngoba uJehova wayelomusa kubo.” (Gen. 19:15, 16) Kulezizatho ezithile ezingabe zenza uJehova wamzwela uLothi. Mhlawumbe okwenza uLothi watomatoma yikuthi wayesesaba abantu ababengaphandle kwedolobho. Kanti njalo kulokunye ayengabe ekwesaba. Kumele ukuthi wayesazi ukuthi kwakulamakhosi amabili awela emigodini eyayilethara esigodini esasiseduze. (Gen. 14:8-12, NWT) Mhlawumbe wayekhathazekile ngemuli yakhe njengoba wayengubaba womuzi. Kanti njalo wayenothile yikho kungenzeka wayelendlu enhle eSodoma ayengazimiselanga ukuyitshiya. (Gen. 13:5, 6) Lezi kwakungayisizo zizatho ezizwakalayo zokuthi aphuze ukwenza lokho ayekutshelwe nguJehova. Lanxa kunjalo, uJehova kazange agxile ekuphambaniseni kukaLothi kodwa wambona ‘engumuntu olungileyo.’—2 Phet. 2:7, 8. w20.04 18 ¶13-14

Bafowethu abasakhulayo kungathatha isikhathi ukuthi abantu abalazi kusukela lisesebancane bananzelele ukuthi selikhulile. Kodwa uJehova kagxili ekuthini uleminyaka emingaki. Ukwazi kuhle futhi uyakwazi lalokho owenelisa ukukwenza. (1 Sam. 16:7) Qinisa ubungane bakho laye. UDavida wakwenza lokho ngokukhangela izinto uJehova azidalileyo langokucabangisisa ngokuthi izinto lezo zimfundisani ngoMdali. (Hubo. 8:3, 4; 139:14; Rom. 1:20) Okunye ongakwenza yikucela uJehova ukuthi akunike amandla owadingayo. Ngokwesibonelo, abanye esikolo bakwenza inhlekisa yini ngenxa yokuthi unguFakazi kaJehova? Nxa kunjalo, khuleka kuJehova umcela ukuthi akuncedise uqinisele futhi usebenzise izinto ozifunda eLizwini lakhe, emabhukwini ethu lakumavidiyo. Nxa ungabona indlela uJehova akuncedisa ngayo nxa uphakathi kohlupho, kawusoze uthandabuze ukuthi uzakuncedisa nxa ungahlangana lobunzima esikhathini esizayo. Kanti njalo abanye bazakuthemba nxa bangananzelela ukuthi uyamthemba uJehova. w21.03 4 ¶7

Abangane abaseduze bayakuthanda ukuxoxelana izinto abazicabangayo lendlela abazizwa ngayo. Lokhu yikho okwenzakala phakathi kwethu loJehova. UJehova ukhuluma lathi ngeLizwi lakhe futhi yilo alisebenzisa ukusitshela akucabangayo lendlela azizwa ngayo. Thina sikhuluma laye ngomthandazo njalo siyenelisa ukumtshela esikucabangayo lendlela esizizwa ngayo. UJehova kaphonguyilalela kodwa uyayiphendula ngoba unguMngane osithandayo. Ngezinye izikhathi uyaphangisa ukusiphendula ikanti ngezinye kungadingeka ukuthi siqhubeke sikhuleka ngendaba ethile. Lanxa kunjalo kumele sibe leqiniso lokuthi uzasiphendula ngesikhathi esifaneleyo langendlela engcono kulazo zonke. UNkulunkulu angasiphendula ngendlela esingayikhangelelanga. Ngokwesibonelo, kulokuthi asuse ubunzima angasinika ukuhlakanipha lamandla okuthi ‘siqinisele.’ (1 Khor. 10:13) Singatshengisa njani ukuthi siyasiqakathekisa isipho lesi esiligugu? Enye indlela yikulalela umlayo wokuthi ‘sithandaze kokuphela.’—1 Thes. 5:17. w20.05 27-28 ¶7-8

Abantu abagijima emncintiswaneni omude bagijima benanzelela okuphambili ukuze bangakhubeki. Nxa bangawa bayavuka baqhubeke begijima. Abazihluphi kangako ngalokho okubenze bakhubeka kodwa baqakathekisa ukutshaya intambo lomvuzo abakhangelele ukuwuthola. Emncintiswaneni esikuwo singakhubeka kanengi ngalokho esikutshoyo loba esikwenzayo. Kwesinye isikhathi esigijima labo bangasiphambanisela besesisizwa ubuhlungu. Lokhu akumelanga kusimangalise. Sonke silesono futhi sigijima ndawonye endleleni encinyane eyisa ekuphileni. Yikho kwesinye isikhathi sizakhubana njalo sizaba ‘lesizatho sokusolana.’ (Kol. 3:13) Kodwa kulokuthi sizihluphe ngalokho okusikhubileyo kasihlaleni sicabanga ngomvuzo ophambili futhi siqhubeke sigijima. Nxa singazonda sibe silokhu sibhazalele, kasisoze siyitshaye intambo futhi sithole umvuzo. Kanti njalo singavala indlela yabanye abazama ukugijima endleleni encinyane eyisa ekuphileni. w20.04 26 ¶1; 28 ¶8-9

Umphrofethi uDanyeli wakhuluma ngohulumende abatshiyeneyo abahlasela abantu bakaNkulunkulu. Bamelwa zingxenye ezitshiyeneyo zesithombe esikhulukazi. Uhulumende wokucina umelwa zinyawo zesithombe ezenziwe ngensimbi exubene lebumba. Inyawo ngumbuso olamandla kulayo yonke we-Anglo-America. Isiphrofetho leso sitshengisa ukuthi umbuso lo uyabe ulokhu ubusa ngesikhathi uMbuso kaNkulunkulu utshabalalisa bonke ohulumende. Umphostoli uJohane laye ukhuluma ngohulumende abatshiyeneyo ababuse abantu bakaJehova. Ohulumende laba bamelwa yisilo esilamakhanda ayisikhombisa. Ikhanda lesikhombisa yi-Anglo-America. Kuqakathekile ukwazi lokhu ngoba alikho elinye ikhanda elilandela leli. Ikhanda lesikhombisa lesilo lizabe lilokhu libusa ngesikhathi uKhristu lamabutho asezulwini belichoboza lona kanye lesilo sonke.—Isam. 13:1, 2; 17:13, 14. w20.05 14 ¶11-12

Amazwi la asikhumbuza ukuthi uNkulunkulu, onguMthombo wokuphila, nguye futhi onguMthombo wothando. UJehova uyasithanda njalo lokhu kwenza sizizwe sivikelekile, sithokoza futhi sisuthiseka. AmaKhristu kumele athandane ngoba alaywa ukuthi enze njalo. (Mat. 22:37-40) Nxa sesimazi kuhle uJehova kuzakuba lula ukuthi silalele umlayo wokuqala. Phela uJehova uphelele, ulendaba lathi futhi ulomusa. Kodwa kungaba nzima ukuthi silalele umlayo wesibili ngoba abafowethu labodadewethu abangomakhelwane bethu abaseduze kabafanani loJehova, balesono. Yikho kwezinye izikhathi bangenza izinto ezitshengisa ukuthi abalandaba lathi kumbe abalamusa. UJehova wayekwazi ukuthi kuzasithwalisa nzima ukulalela umlayo lo, yikho wasebenzisa abanye abalobi beBhayibhili ukusifundisa ukuthi kungani kumele sithandane lokuthi singatshengisa njani ukuthi siyathandana. Omunye wabo kwakungumphostoli uJohane.—1 Joh. 3:11, 12. w21.01 8 ¶1-2

Kungelani lokuthi sisanda kuqalisa ukukhonza uJehova kumbe sesileminyaka eminengi simkhonza, kumele sizibuze umbuzo lo: ‘Ngiyalwisana yini loSathane ukuthi angehlukanisi inhliziyo yami?’ Kuyini okwenzayo nxa ungabona umfanekiso ku-TV kumbe ku-inthanethi ongavusa izifiso zemacansini? Kungaba lula ukuzitshela ukuthi umfanekiso lo kumbe ifilimu ethile ayisiyo phonografi ngokwayo. Kodwa lokhu kungaba yinto uSathane ayisebenzisayo yini ukuze enze inhliziyo yakho yehlukane? Umfanekiso lo ungaba njengehloka indoda elisebenzisa ukubanda ugodo olukhulu. Nxa iqalisa ukugamula, ugodo lolo aluhle ludabuke kodwa ingabe ilokhu igamula, lucina ludabukile. Ngokufananayo nxa umuntu eqalisa ukubona imifanekiso evusa inkanuko zemacansini kungenzeka kungakhanyi khonapho ukuthi iyamlimaza. Kodwa ngokuhamba kwesikhathi imifanekiso le ingabangela ukuthi inhliziyo yakhe yehlukane acine enze izono njalo angabi qotho kuJehova. Ngakho ungavumeli loba yini engaqondanga ingene enhliziyweni yakho. Igcine ingehlukananga ukuze yesabe ibizo likaJehova. w20.06 11-12 ¶14-15

Kumele siqhubeke sincedisa futhi sikhuthaza abangasayifezi inkonzo. Bangabe besizwa ubuhlungu obukhulu obungathatha isikhathi ukuthi buphele njengendodana yolahleko esemzekelisweni kaJesu. (Luk. 15:17-24) Kanti njalo kumele ukuthi abasaqinanga ekukhonzeni njengakuqala ngenxa yalokho abahlangana lakho emhlabeni kaSathane. Yikho kuyabe kudinga ukuthi sibasize baqinise ukholo lwabo kuJehova. Emzekelisweni wemvu elahlekileyo, uJesu uthi umelusi uyayetshatha emahlombe akhe abeseyibuyisela emhlambini. Umelusi useqede isikhathi eside futhi wasebenzisa amandla edinga imvu elahlekileyo. Kodwa uyananzelela ukuthi kumele ayithwale imvu leyo ngoba ayilamandla okuthi ibuyele yodwa emhlambini. (Luk. 15:4, 5) Kungadinga isikhathi eside lokusebenza nzima ukuze sincede abangasayifezi inkonzo ukuthi balwisane lalokho okwenza kube nzima ukuthi babuyele kuJehova. Kodwa uJehova uzasincedisa ngomoya wakhe, ngeLizwi lakhe langamabhuku esiwanikwa yinhlanganiso ukuthi senelise ukubasiza ukuthi baphinde baqine ekukhonzeni. Yikho nxa usenelisa, vumela phezulu nxa ungacelwa ukuthi ufunde lomuntu okade engasayifezi inkonzo. w20.06 28 ¶14-15

Sonke kumele sibe lothando ukuze kukhanye ukuthi singamaKhristu eqiniso. Kodwa kumele siphinde sibe “lolwazi oluqondileyo lokuqedisisa konke.” (Flp. 1:9) Singayekela ukwenza njalo singaphanjulwa “yimimoya yonke yemfundiso, ngobuqili babantu” okugoqela abahlamuki. (Efe. 4:14) Ngesikhathi sabaphostoli, abafundi abanengi batshiya ukulandela uJesu kodwa umphostoli uPhetro watshengisa ukuthi kathandabuzi ukuthi uJesu “ulamazwi okuphila okungapheliyo.” (Joh. 6:67, 68) Lanxa ngalesosikhathi uPhetro wayengakuzwisisi konke okwakutshiwo ngamazwi lawo, wahlala eqotho ngoba wayenanzelela ukuthi uJesu nguye uKhristu. Lawe qhubeka utaditsha iBhayibhili ukuze ungathandabuzi ukuthi lokho elikutshoyo kuliqiniso. Nxa ungenza njalo, ukholo lwakho luzahlala luqinile kungelani lokuthi kuyini okukwehlelayo futhi uzancedisa labanye ukuthi baqinise ukholo lwabo.—2 Joh. 1, 2. w20.07 8 ¶2; 13 ¶18

Kumele sibatshengise isihawu abafowethu labodadewethu ukuze bahlale beseqinisweni. (1 Joh. 3:10, 11, 16, 17) Akumelanga sithandane kuphela nxa izinto zihamba kuhle kodwa kumele sithandane lalapho sekulenhlupho. Ngokwesibonelo, ukhona yini omaziyo ofelweyo odinga ukududuzwa kumbe ukuncediswa ngezinye indlela? Bakhona yini abazalwane abalahlekelwe yimpahla yabo ngenxa yomonakalo wemvelo njalo abadinga ukuncediswa ukwakha kutsha amaWolu oMbuso loba izindlu zabo? Kulokukhuluma nje ngomlomo, okuqakatheke kakhulu yikutshengisa ngezenzo ukuthi siyabathanda kakhulu abafowethu labodadewethu futhi silesihawu. Nxa sithandana siyabe silingisela uBaba wethu osithandayo osezulwini. (1 Joh. 4:7, 8) Indlela eqakathekileyo esitshengisa ngayo ukuthi siyathandana yikuthethelelana. Ngokwesibonelo, omunye umuntu angakhuluma loba enze into ekuzwisa ubuhlungu. Uyabe utshengisa ukuthi uyamthanda nxa umthethelela ukhohlwe ngakwenzileyo.—Kol. 3:13. w20.07 24 ¶14-15

Umuntu ngamunye ovusiweyo uzaba lomuntu omfundisayo yini njengalokho esikwenzayo lamuhla nxa sifundisa abantu iBhayibhili? Abantu laba bazaphiwa amabandla abazangena lawo yini njalo baqeqetshwe ukuthi bafundise labo abazavuswa ngemva kwabo? Sizaphela sibone. Kodwa esikwaziyo yikuthi ekupheleni kokubusa kukaKhristu kweminyaka eyinkulungwane “umhlaba uzakuba usugcwele ulwazi lukaJehova.” (Isaya. 11:9) Mnengi sibili umsebenzi esizakholisa ukuwenza phakathi kweminyaka le eyinkulungwane! Ngesikhathi sokubusa kukaKhristu kweminyaka eyinkulungwane bonke abantu bakaJehova kuzamele baqhubeke betshintsha impilo zabo ukuze bamthokozise. Yikho bazaba lesisa esikhulu nxa bencedisa abavusiweyo ukuthi balwisane lemicabango kanye lezifiso ezimbi njalo baphile ngendlela uJehova ayifunayo. (1 Phet. 3:8) Akuthandabuzwa ukuthi labo abazavuswa bazafuna ukuba phakathi kwabantu bakaJehova abathobekileyo, abazabe belokhu ‘besebenzela ukusindiswa kwabo.’—Flp. 2:12. w20.08 16 ¶6-7

Nxa singalalela iseluleko somphostoli uPhawuli esiphefumulelweyo sihlole ezethu izenzo, sizananzelela ukuthi kukhona esenelisa ukukwenza abanye abangakwenelisiyo. Ngokwesibonelo, umdala webandla angabe engenelisi ukufundisa kuhle nxa esenza inkulumo kodwa eyingcitshi emsebenzini wokwenza abafundi. Angabe engenelisi ukuhlela kuhle izinto njengabanye abadala ebandleni lakhe kodwa esaziwa njengomelusi olothando, abamemezeli abakhululeka ukuya kuye ukuze abancede esebenzisa iMibhalo. Kumbe angabe esaziwa ngokwamukela kuhle abanye. (Heb. 13:2, 16) Nxa singabona ukuthi kukhona esenelisa ukukwenza, sizathokoza ngokwazi ukuthi siluncedo ebandleni. Kanti njalo kasisoze sibe lomhawu ngabafowethu abaleziphiwo ezitshiyene lezethu. Lanxa sonke siqakathekile ebandleni, kumele sibe lesifiso sokuthuthukisa inkonzo yethu lendlela esifundisa ngayo. w20.08 24 ¶16-18

Inkulumo eqakathekileyo eyayilesihloko esithi “Ixuku Elikhulukazi” yenziwa ngumfowethu uJ. F. Rutherford ngo-1935 emhlanganweni omkhulu owawuseWashington, D.C. eMelika. Wathi esenza inkulumo yakhe wachasisa ukuthi ngobani ababumba “ixuku elikhulu” okukhulunywa ngalo kuSambulo 7:9. Wathi engakenzi inkulumo le, aBafundi beBhayibhili babecabanga ukuthi ixuku elikhulu libunjwa ngabantu abazakuya ezulwini, kodwa abangathembekanga njengamaKhristu agcotshiweyo. Umfowethu uRutherford wasebenzisa iMibhalo ukuchasisa ukuthi abantu laba kabakhethwanga ukuthi bayephila ezulwini kodwa bangezinye izimvu zikaKhristu ezizasinda “ekuhluphekeni okukhulu” njalo baphile emhlabeni kuze kube nini lanini. (Isam. 7:14) UJesu wathi: “Ngilezinye izimvu ezingasizo zalesi isibaya. Lazo kumele ngizilethe, futhi zizalilalela ilizwi lami, zibe ngumhlambi owodwa phansi komelusi oyedwa.” (Joh. 10:16) Izimvu lezi ngoFakazi bakaJehova abathembekileyo abalethemba lokuphila emhlabeni oliPharadayisi kuze kube phakade.—Mat. 25:31-33, 46. w21.01 14 ¶1-2

Nxa singasebenza ngamandla ethu wonke sizenelisa ukuqinisela emsebenzini wokutshumayela esiwenzayo futhi siwuqede. (Mat. 28:19, 20) Sijayele ukufuna ukwenza izinto ngendlela elula. Kodwa kwezinye izikhathi ukwenza izinto eziqakathekileyo akulula, yikho kuyabe kumele sifunde ukuzibamba. Sidinga uncedo ukuze sizifundise ukwenza izinto okungabe kunzima ukuthi sizenze. UJehova uyasincedisa esebenzisa umoya wakhe ongcwele. (Gal. 5:22, 23) Umphostoli uPhawuli wayesebenza ngamandla akhe wonke. Kodwa wavuma ukuthi kwakumele ‘awutshaye kakhulu’ umzimba wakhe ukuze enze okuqondileyo. (1 Khor. 9:25-27) Wakhuthaza abanye ukuthi basebenze ngamandla abo wonke lokuthi benze izinto zonke “ngendlela efaneleyo lehlelwe kuhle.” (1 Khor. 14:40) Kumele sisebenze nzima ukuze siqhubeke sikhonza uJehova futhi lokhu kugoqela ukuhlala sitshumayela njalo sifundisa abanye izindaba ezinhle.—ImiSeb. 2:46. w20.09 6-7 ¶15-17

Emazweni amanengi oFakazi bakaJehova bakhululekile ukutshumayela. Wena uhlala elizweni elinjalo yini? Nxa kunjalo zibuze, ‘Ngisisebenzisa njani isikhathi leso sokuthula?’ Izinsuku lezi zokucina ziyabathokozisa abantu bakaJehova ngoba bakhuthele okuzwayo emsebenzini omkhulu wokutshumayela lokufundisa futhi bawenza ngendlela ongakaze wenziwe ngawo. Kunengi esingakwenza emsebenzini lo. Ungasisebenzisa njani isikhathi sokuthula? (2 Tim. 4:2) Hlola izimo zakho ubone langabe ungenelisa yini ukungezelela inkonzo yakho mhlawumbe ngokuba liphayona. Kumbe lingaxoxa liyimuli libone ukuthi ukhona yini ongenelisa ukwenza okunengi enkonzweni mhlawumbe ngokuba liphayona. Lesi ayisisosikhathi sokubuthelela inotho kumbe ukuzifunela izinto ezinengi ngoba izinto lezi zizadlula lomhlaba lo. (Zaga. 11:4; Mat. 6:31-33; 1 Joh. 2:15-17) Abamemezeli abanengi bafunde olunye ulimi ukuze batshumayele njalo bafundise ngolimi lolo. Inhlanganiso kaNkulunkulu iyabasekela ngokuhumutsha amabhuku asekelwe eBhayibhilini ngezindimi ezedlula 1 000. w20.09 16 ¶9-11

Isotsha elihle liqotho. Lilwa nzima ukuze livikele umuntu elimthandayo kumbe into eligugu kulo. UPhawuli wakhuthaza uThimothi ukuthi azinikele kuNkulunkulu okutsho ukuthi abe qotho kuye. (1 Tim. 4:7) Nxa singamthanda kakhulu uNkulunkulu futhi sizinikele kuye, sizazimisela ukugagadlela iqiniso. (1 Tim. 4:8-10; 6:6) Isotsha elihle kumele liphinde liziqeqetshe ukuze lihlale lilungele impi. UThimothi wahlala eqinile ekukhonzeni ngoba walalela iseluleko sikaPhawuli esiphefumulelweyo sokubalekela izifiso ezimbi, sokuba lobuntu obuhle lesokuhlangana lamanye amaKhristu. (2 Tim. 2:22) Lokho kwakudinga ukuthi azifundise ukwenza okulungileyo. Lathi kumele sizifundise ukwenza okulungileyo ukuze sinqobe izifiso ezimbi. (Rom. 7:21-25) Kufanele sizifundise ukwenza okulungileyo ukuze sikhiphe ubuntu obudala sigqoke obutsha. (Efe. 4:22, 24) Kanti njalo nxa sidiniwe ekupheleni kosuku, kungadinga ukuthi sizibambe ngamandla ukuze siye emhlanganweni webandla.—Heb. 10:24, 25. w20.09 28 ¶9-11

Kumele sibekezele nxa sincedisa umfundi ukuthi athuthuke aze abhabhathizwe. Kodwa kuzamele sihlole ukuthi uyafisa yini ukukhonza uJehova uNkulunkulu. Kukhona yini akwenzayo okutshengisa ukuthi uyazama ukulalela imilayo kaJesu kumbe ukholisa ukufunda izinto eziseBhayibhilini kuphela? Hlola ukuthi umfundi uyathuthuka yini. Ngokwesibonelo, uyatsho yini ukuthi uyamthanda uJehova? Uyathandaza kuJehova yini? (Hubo. 116:1, 2) Uyakuthanda yini ukubala iBhayibhili? (Hubo. 119:97) Uhlala eyingena yini imihlangano yebandla? (Hubo. 22:22) Usetshintshile yini indlela abephila ngayo? Useqalisile yini ukuxoxela abangakibo labangane bakhe lokho akufundayo? (Hubo. 9:1) Okuqakatheke kakhulu, uyafuna yini ukuba nguFakazi kaJehova? (Hubo. 40:8) Nxa kungakhanyi ukuthi uyathuthuka, zama ukuzwisisa ukuthi kubangelwa yini ubusuxoxa laye ngomusa kodwa ungambhodi. w20.10 18 ¶14-15

UYise kaJesu osezulwini uhlala esenza izinqumo ezinhle futhi labazali bakhe basemhlabeni benza izinqumo ezinhle. Kodwa uJesu wathi esekhulile kwasekumele azenzele ezakhe izinqumo. (Gal. 6:5) Wayelenkululeko yokuzikhethela njengathi sonke. Wayengakhetha ukuzenzela akufunayo kulokuthi enze intando kaNkulunkulu. Kodwa wakhetha ukwenza izinto ezithokozisa uJehova. UJesu wathi esekwazi lokho uJehova ayefuna akwenze, wakhetha ukukwenza. (Joh. 6:38) Wayekwazi ukuthi abantu abanengi bazamzonda. Lanxa wayengafuni ukuthi bamzonde, wakhetha ukulalela uJehova. Wathi esebhabhathiziwe ngo-29 C.E., ayekuqakathekisa kakhulu yikwenza intando kaJehova. (Heb. 10:5-7) Langesikhathi esesifa esigodweni sokuhlutshwa, wayelokhu ezimisele ukwenza intando kaYise.—Joh. 19:30. w20.10 29 ¶12; 30 ¶15

Bakhona yini abafowethu labodadewethu ebandleni lenu abathwaliswe nzima yikugula kumbe ngobunye nje ubunzima loba abafelweyo? Nxa singabakwazi ukuthi ukhona odinga uncedo, singathandaza kuJehova simcela ukuthi asincedise simtshengise umusa ngamazwi langezenzo. Esikutshoyo lesikwenzayo kungamkhuthaza umfowethu loba udadewethu odinga uncedo. (1 Phet. 4:10) Silesibindi ngoba siyakwazi ukuthi uJehova ulathi. Uyasisiza esebenzisa uJesu lezingilosi. Kanti njalo angasisiza esebenzisa abantu abasezikhundleni nxa kuyintando yakhe. Angaphinda asebenzise umoya ongcwele ukuthi wenze abafowethu labodadewethu basisize, njengoba abanengi bethu bengakufakazela lokho. Yikho lathi njengomphostoli uPhawuli singatsho siqiniseka sithi: “UJehova ungumsizi wami; kangisoze ngesabe. Kambe umuntu angangenzani?”—Heb. 13:6. w20.11 17 ¶19-20

Abaphostoli babelobufakazi bokuthi uJehova ulabo ngoba wayebanike amandla okuthi benze izimangaliso. (ImiSeb. 5:12-16; 6:8) Thina kasiwaphiwanga lawomandla. Lanxa kunjalo, uJehova usebenzisa iLizwi lakhe ukusiqinisekisa ukuthi nxa sihlupheka ngenxa yokwenza okulungileyo uyathokoza ngathi lokuthi umoya wakhe ulathi. (1 Phet. 3:14; 4:14) Yikho akumelanga sikhathazeke ngokuthi sizakwenzani nxa sesihlukuluzwa kodwa kumele senze konke okusemandleni ethu ukuthi simthembe kakhulu uJehova ukuthi uzasisekela njalo asisindise. Kumele sisikholwe isithembiso sikaJesu esithi: ‘Ngizalipha amazwi lokuhlakanipha okokuthi bonke abaliphikisayo ngeke bamelane lani kumbe baliphikise. Nxa lingaqinisela lizalondoloza impilo zenu.’ (Luk. 21:12-19) Kanti njalo kumele sikhumbule ukuthi uJehova uyakwazi konke okumayelana lezinceku zakhe ezifa zithembekile kuye, yikho uzazivusa. w21.01 4 ¶12

Umphostoli uPhawuli wayengayisuye wokuqala ukukhuluma ngokuthi abafileyo bazavuswa. UJobe laye wayeke wakhuluma ngakho. Wayengathandabuzi ukuthi uNkulunkulu uzamkhumbula abesemvusa. (Jobe. 14:7-10, 12-15) ‘Ukuvuswa kwabafileyo’ kuyingxenye ‘yesisekelo’ kumbe ‘yemfundiso yokuqala’ yawo wonke amaKhristu. (Heb. 6:1, 2) UPhawuli ukhuluma kakhulu ngendaba yokuvuswa kwabafileyo ku-1 Khorinte isahluko 15. Kumele ukuthi akubhalayo kwawakhuthaza amaKhristu akuqala. Kungelani lokuthi usulesikhathi eside kanganani ukholwa ukuthi abafileyo bazavuswa, isahluko lesi sizakukhuthaza njalo sikuqinise. Ukuvuswa kukaJesu Khristu kwenza singathandabuzi ukuthi izihlobo zethu labangane abafayo bazavuswa. Ukuvuswa kwakhe kwakungezinye ‘izindaba ezinhle’ uPhawuli azitshumayela ebantwini baseKhorinte. (1 Khor. 15:1, 2) UPhawuli wathi nxa umKhristu engakholwa ukuthi uJesu wavuswa, ukholo lwakhe aluncedi.—1 Khor. 15:17. w20.12 2 ¶2-4

Kuyini okwanceda umphostoli uPhetro? Wakhumbula ukuthi uJesu wayeke wamthandazela encenga ukuthi ukholo lwakhe lungapheli. UJehova wawuphendula umthandazo lo. UJesu esevusiwe wabonakala kuPhetro ukuze amkhuthaze. (Luk. 22:32; 24:33, 34; 1 Khor. 15:5) Ngemva kokuthi abaphostoli beqede ubusuku bonke bengabambanga nhlanzi elwandle uJesu wabonakala kubo. Wasenika uPhetro ithuba lokuthi atsho ukuthi umthanda kangakanani. UJesu wayesemxolele umngane wakhe amthandayo futhi wamnika omunye umsebenzi. (Joh. 21:15-17) Indlela uJesu aphatha ngayo uPhetro itshengisa ukuthi ulozwelo olukhulu njengoYise. Yikho nxa singenza iphutha akumelanga sicabange ukuthi uJehova kasoze asithethelele ngoba lokho yikho kanye uSathane afuna sikucabange. Kodwa kumele sikhumbule ukuthi uJehova uyasithanda, uyabazi ukuthakathaka bethu lokuthi uyafuna ukusithethelela. Kanti njalo kumele simlingisele ngokuthethelela abanye nxa besiphambanisele.—Hubo. 103:13, 14. w20.12 20-21 ¶17-19

Singafunda ezibonelweni zalabo abangazange baqhubeke behlalisekile futhi bethemba uJehova. Ukufunda ngabo kuzasinceda ukuthi singenzi amaphutha abawenzayo. Ngokwesibonelo, ngesikhathi u-Asa eqalisa ukubusa, wayethembela kuJehova nxa engaba lohlupho. Kodwa ngokuhamba kwesikhathi wayengasakwenzi lokho, esebona kungcono ukuthi azibonele. (2 ImiLan. 16:1-3, 12) Ukucela kuka-Asa uncedo kwabaseSiriya kwakukhanya kukuhle, kodwa kakuzange kumncede okwesikhathi eside. UJehova wasebenzisa umphrofethi ukuthi amtshele amazwi la: “Ngenxa yokuthi wethembele enkosini yase-Aramu [yaseSiriya] wadela ukwethembela kuJehova uNkulunkulu wakho, ibutho lenkosi yase-Aramu [yaseSiriya] seliphunyukile esandleni sakho.” (2 ImiLan. 16:7) Akumelanga sizithembe size sicabange ukuthi singazilungisela inhlupho zethu singazange sibale iBhayibhili ukuze sincediswe nguJehova. Lanxa sekumele senze isinqumo masinyane, kufanele sihlaliseke sithembe uJehova futhi yena uzasincedisa ukuthi senze isinqumo esiqondileyo. w21.01 6 ¶13-15

Khathesi abanye abantu bakaJehova bayalamba ngenxa yokuthi kabalamali eyeneleyo yokuthenga ukudla kumbe ngenxa yobunzima obubangelwa yizimpi. Abanye babotshiwe ngenxa yokholo lwabo. Lanxa kunjalo bayathokoza kakhulu ngoba bayakwazi ukuthi ngemva kokutshabalaliswa komumo lo wezinto omubi bazathola ukudla okunengi okwakha umzimba lokubaqinisa ukholo. Ngesikhathi uJehova esebhubhisa umumo lo kaSathane omubi, uzavikela ixuku elikhulu elakeni lwakhe ‘olunjengokutshisa okuvuthayo.’ Ukuhlupheka okukhulu sekuphelile, uJesu uzakhokhela labo abazabe besindile ebasa ‘emanzini okuphila’ okungapheliyo. (Isam. 7:17) Ixuku elikhulu lilethemba elimangalisayo sibili! Phakathi kwamabhiliyoni abantu ake aphila, kungenzeka abexuku leli abasoze bafe. (Joh. 11:26) Abezinye izimvu bayambonga uJehova loJesu ngenxa yethemba elimangalisayo abalalo. w21.01 16-17 ¶11-12

Ngobusuku bokucina uJesu engakabulawa, wayecabanga ngobunzima obuzakwehlela abafundi bakhe. Wayebathanda, yikho wacela uYise ukuthi ‘abakhangele ngenxa yomubi.’ (Joh. 17:14, 15) Wayekwazi ukuthi esebuyele ezulwini, uSathane uDeveli wayezaqhubeka esilwa laloba ngubani ofuna ukukhonza uJehova. Lokhu kuhle kuveze ukuthi abantu bakaJehova babezadinga ukuvikelwa. Sidinga ukuvikelwa nguJehova khathesi ukwedlula loba yisiphi isikhathi. Phela uSathane sowaxotshwa ezulwini futhi ‘uthukuthele kakhulu.’ (Isam. 12:12) Sebangele ukuthi abanye abantu bacabange ukuthi bayabe besenza “inkonzo engcwele kuNkulunkulu” nxa besihlukuluza. (Joh. 16:2) Abanye abangakholwayo kuNkulunkulu bayasihlukuluza ngenxa yokuthi kasenzi njengabantu bomhlaba lo. Kungelani lokuthi kuyini okwenza basihlukuluze, kasesabi ngoba amazwi asembhalweni walamuhla ayasiqinisa. w21.03 26 ¶1, 3

Konke uJehova akwenzayo ukwenza efuqwa luthando. Uyasinakekela ngezinto zonke esizidingayo. Waphinda watshengisa ukuthi uyasithanda ngokuthumela iNdodana yakhe ukuthi izosifela. UJesu laye watshengisa ukuthi uyasithanda ngokunikela ngokuphila kwakhe ngenxa yethu. (Joh. 3:16; 15:13) Akulalutho oluzasehlukanisa lothando lukaJehova loJesu nxa singahlala siqotho kubo. (Joh. 13:1; Rom. 8:35) Inhloko yemuli layo kumele ifuqwe luthando kukho konke ekwenzayo. Kungani lokhu kuqakathekile? Umphostoli uJohane wathi: “Lowo ongamthandiyo umfowabo [kumbe imuli] ambonileyo ngeke amthande uNkulunkulu angakaze ambone.” (1 Joh. 4:11, 20) Indoda ethanda imuli yayo futhi ezimisele ukulingisela uJehova loJesu izayincedisa ukuthi iqinise ubungane bayo loJehova, izakuba lendaba layo njalo iyinakekele ngalokho ekudingayo. (1 Tim. 5:8) Izafundisa njalo iqondise abantwabayo. Kanti njalo izaqhubeka isebenza nzima isenza izinqumo ezithokozisa uJehova lezinceda imuli yayo. w21.02 5 ¶12-13.

UBaba wethu osezulwini uyakwazi ukuthi izinto ezake zenzakala kithi zingabangela ukuthi sizikhangelele phansi. Uyabona lobuntu obuhle esilabo lanxa thina singabuboni. (1 Joh. 3:19, 20) Omunye umuntu angabe ezama ukutshiya umkhuba omubi kodwa abe elokhu ewubuyelela futhi lokhu kungabangela ukuthi adane. Khona vele sijayele ukuzisola nxa singenza isono. (2 Khor. 7:10) Kodwa akumelanga sizisole kakhulu size sicabange ukuthi siyizehluleki lokuthi uJehova ngeke asixolele. Ukucabanga ngaleyondlela akuqondanga futhi kungenza sicine siyekela ukukhonza uJehova. Yikho lungisa izinto loJehova ngokuthandaza kuye umcela ukuthi akuthethelele. (Isaya. 1:18) Nxa angabona ukuthi uyazisola sibili lokuthi uyalwisa ukutshintsha uzakuthethelela. Landa labadala bebandla, bazakuncedisa ukuthi uphinde uqine ekukhonzeni.—Jak. 5:14, 15. w20.12 23 ¶5-6

UJesu wayebahlonipha abesifazana. Wayengenzi njengabaFarisi ababebakhangelela phansi. Phela babengaxoxi labo ebantwini futhi babengaxoxi labo ngeMibhalo. UJesu yena wayengababandlululi, wayexoxa labo ngezinto ezijulileyo zikaNkulunkulu bendawonye labanye abafundi besilisa. (Luk. 10:38, 39, 42) Wayehamba labo ngesikhathi etshumayela. (Luk. 8:1-3) Kanti njalo wanika abesifazana isibusiso sokuthi bayetshela abaphostoli ukuthi usevusiwe. (Joh. 20:16-18) Umphostoli uPhawuli wakhumbuza uThimothi ukuthi ahloniphe abesifazana. UPhawuli wavuma ukuthi unina kaThimothi logogo wakhe yibo abaqalisa ukumfundisa “imibhalo engcwele.” (2 Tim. 1:5; 3:14, 15) Ngesikhathi ebhala incwadi eyayisiya kwabaseRoma, wabaqamba ngamabizo odadewethu lapho ebabingelela. Wayeyinanzelela imisebenzi eyayisenziwa ngodadewethu labo futhi eyiqakathekisa.—Rom. 16:1-4, 6, 12; Flp. 4:3. w21.02 15 ¶5-6