April

Uphakathi kobunzima yini? Engxenye omunye ebandleni ukuzwise ubuhlungu. (Jak. 3:2) Mhlawumbe osebenza labo loba ofunda labo bakhuluma kubi ngawe ngenxa yokuthi unguFakazi kaJehova. (1 Phet. 4:3, 4) Kumbe abangakini bazama ukukuvimba ukuthi uye emihlanganweni yebandla loba ukuthi utshumayele. (Mat. 10:35, 36) Nxa uphakathi kobunzima obunje ungabona kungcono ukuthi utshiye ukukhonza uJehova. Kodwa akumelanga uthandabuze ukuthi uzakunika ukuhlakanipha ukuze wenze izinqumo ezinhle lamandla owadingayo ukuze uqinisele kungelani lobunzima ophakathi kwabo. ELizwini likaNkulunkulu sifunda ngendlela abantu abalesono abaqinisela ngayo ngesikhathi bephakathi kobunzima. Kungani uJehova waba leqiniso lokuthi izindaba ezinjalo ziyabhalwa? Ukuze sifunde kuzo. Lokhu yikho aphefumulela umphostoli uPhawuli ukuthi akubhale. Ukuzibala kungasiduduza futhi kusenze sibe lethemba. Kodwa akumelanga siphonguzibala. Kumele sivumele iMibhalo ukuthi itshintshe indlela esicabanga ngayo lesizizwa ngayo. w21.03 14 ¶1-2

Ubona abantu obatshumayezayo benjengezilimo esezilindele ukuvunwa yini? Nxa ubabona njalo, nanzi izinto ezintathu ozazenza. Okokuqala, uzakhuthala ekutshumayeleni. Phela akuvunwa umnyaka wonke yikho akulasikhathi sokudlala. Okwesibili, uzathokoza nxa ubona abantu belalela izindaba ezinhle. IBhayibhili lithi: ‘Abantu bayathokoza ekuvuneni.’ (Isaya. 9:3) Okwesithathu, uzakuba lethemba lokuthi loba ngubani angaba ngumfundi kaKhristu. Lokhu kuzakwenza utshintshe intshumayelo yakho ukuze ihambelane lalokho akuthandayo. Abanye abalandeli bakaJesu bangabe babecabanga ukuthi amaSamariya ayengeke abe ngabafundi bakhe kodwa yena kazange ababone ngaleyondlela. Wayelethemba lokuthi bangaba ngabafundi bakhe. Lathi kumele sibe lethemba lokuthi abantu abasensimini yethu bangaba ngabafundi bakaKhristu. Umphostoli uPhawuli uyisibonelo esihle esingasilingisela. Wayekwazi okuthile okwakukholwa ngabantu ayebatshumayeza, wayezwisisa izinto ababezithanda njalo wayelethemba lokuthi bangaba ngabafundi bakaJesu. w20.04 8-9 ¶3-4

Zama ngamandla wonke ukuzwisisa ukuthi omunye uzizwa njani kulokuthi umahlulele ngalokho ombona ekwenza. UJehova nguye yedwa osizwisisa kuhle. Yikho mcele akuncedise ubone abanye ngendlela yena ababona ngayo njalo ubone ukuthi ungabatshengisa njani uzwelo. Akumelanga ukhethe ukuthi yibaphi abafowethu loba odadewethu ozakuba lozwelo kubo. Bonke behlelwa zinhlupho, ezinengi zakhona zinjengalezo ezehlela uJona, u-Elija, uHagari loLothi. Izikhathi ezinengi bayabe bevuna impumela yalokho abakwenzayo. Kodwa iqiniso yikuthi kulezikhathi lapho sonke esake sazilethela khona inhlupho. Yikho kuqondile sibili ukuthi uJehova asicele ukuthi sibe lesisa esikhulu kwabanye. (1 Phet. 3:8) Nxa singalalela uJehova sizamanyana kakhulu lemuli yethu emangalisayo esemhlabeni wonke ebunjwa ngabantu abayimihlobo etshiyeneyo. Yikho kasizimiseleni ukulingisela uJehova endleleni esiphatha ngayo abafowethu labodadewethu. w20.04 18-19 ¶15-17

UJesu uyisibonelo esihle sokulalela uJehova. Ngakho enye indlela eqakathekileyo esilalela ngayo uJehova yikulandela eduze amanyathelo kaJesu. (Joh. 8:29) Nxa sifuna ukuqhubeka sihamba eqinisweni kumele singathandabuzi ukuthi uJehova unguNkulunkulu weqiniso lokuthi konke asitshela khona eLizwini lakhe kuliqiniso. Kumele singathandabuzi lokuthi uJesu unguMesiya. Abantu abanengi lamuhla bayathandabuza ukuthi uJesu wagcotshwa ukuthi abe yiNkosi yoMbuso kaNkulunkulu. UJohane waxwayisa ukuthi ‘kulamaqili amanengi’ ayezadukisa labo ababethandabuza iqiniso elimayelana loJehova loJesu. (2 Joh. 7-11) Wabhala wathi: “Oqamba amanga akusilowo ophika ukuthi uJesu unguKhristu yini?” (1 Joh. 2:22) Ukutaditsha iLizwi likaNkulunkulu yikho kuphela okungenza ukuthi singaqilwa. Nxa singalitaditsha sizabamazi uJehova loJesu. (Joh. 17:3) Kanti njalo kasisoze sithandabuze lakancane ukuthi siseqinisweni. w20.07 21 ¶4-5

Okunye esingakwenza ukuze ‘singakhubi’ abanye yikuvuma ukuthi izinto zenziwe ngendlela yabo nxa kuvuma kulokufuna ukuthi zihlale zisenziwa ngendlela yethu. (Rom. 14:19-21; 1 Khor. 8:9, 13) Lokhu ngokunye okwenza singafanani lomuntu osemncintiswaneni wokugijima olwisa ukuthi kube nguye othola umvuzo. Labo abagijimayo baqakathekisa kakhulu okufunwa yibo, yikho bangazama ukufuqela abanye eceleni ukuze bona baye phambili. Kodwa thina kasincintisani. (Gal. 5:26; 6:4) Sifuna ukunceda abantu abanengi ukuthi labo batshaye intambo futhi bathole umvuzo wokuphila. Ngakho siyazama ukulalela iseluleko esiphefumulelweyo esithi: “Lingaqakathekisi lokho okufunwa yini kuphela kodwa liqakathekise lalokho okufunwa ngabanye.” (Flp. 2:4) Emncintiswaneni esikuwo uJehova usithembise umvuzo esingathandabuziyo ukuthi uzawunika labo abazagijima baze bayefika ekucineni. Umvuzo lo yikuphila kuze kube nini lanini ezulwini loba emhlabeni olipharadayisi. w20.04 28 ¶10; 29 ¶12

Amamiliyoni amaKhristu azasinda aphile emhlabeni omutsha. AmaKhristu la azabona ukufa kunqotshwa lapho kuvuswa amabhiliyoni abantu abafa kudala. Sizathokoza kakhulu lapho sibona abafileyo bevuswa! (ImiSeb. 24:15) Bonke labo abathembekileyo kuJehova bazanqoba ukufa abakuthola njengelifa ku-Adamu. Bazaphila kuze kube nini lanini. Wonke amaKhristu kumele aduduzwe yilokho uPhawuli akubhalela abaseKhorinte mayelana lokuvuswa kwabafileyo. Kumele sizimisele ukulalela lokho akutshoyo senze okunengi “emsebenzini weNkosi.” (1 Khor. 15:58) Nxa singawenza ngamandla ethu wonke umsebenzi lo, sizaphila impilo ethokozisayo esikhathini esizayo. Impilo esizayiphila iyabe imnandi ukwedlula loba yini esingayicabanga khathesi. Izatshengisa ukuthi umsebenzi wethu eNkosini kawuzange uphelele emoyeni. w20.12 13 ¶16-17

Kukhanya angani isiphrofetho esikuHezekheli 38:10-23; kuDanyeli 2:43-45; 11:44–12:1 lakuSambulo 16:13-16, 21 sikhuluma ngezinto ezifananayo. Nxa kunjalo, nanku esicabanga ukuthi kuzakwenzakala. Ngemva kwesikhathi esithile kuqale ukuhlupheka okukhulu ‘amakhosi omhlaba wonke’ azabumba izizwe ezimanyeneyo. (Isam. 16:13, 14) IBhayibhili libiza izizwe lezi ngokuthi ‘nguGogi waselizweni laseMagogi.’ (Hez. 38:2) Zizahlasela bonke abantu bakaNkulunkulu futhi zizazama ukubatshabalalisa baphele du. Ekhuluma ngokuzakwenzakala ngalesosikhathi, umphostoli uJohane wathi amatshe amakhulu esiqhotho azawela izitha zikaNkulunkulu. Isiqhotho leso singatsho umlayezo olamandla omenyezelwa ngabantu bakaJehova oyiwo owenza uGogi waselizweni laseMagogi ahlasele abantu bakaNkulunkulu ezama ukubathanyela bonke.—Isam. 16:21. w20.05 15 ¶13-14

Umoya ongcwele yisipho okumele sisiqakathekise. Singengezelela indlela esiwuqakathekisa ngayo ngokucabangisisa ngalokho okwenzayo lamuhla. UJesu engakabuyeli ezulwini, watshela abafundi bakhe wathi: ‘Lizakwamukela amandla nxa umoya ongcwele ufika kini, njalo lizakuba ngofakazi bami kuze kuyefika emaphethelweni omhlaba.’ (ImiSeb. 1:8) Umoya ongcwele uncedise ekuqoqeni abantu abedlula 8,6 miliyoni emhlabeni wonke ukuthi babe zinceku zikaJehova. Kanti njalo simanyene futhi silokuthula ngoba umoya ongcwele uyasinceda ukuthi sibe lothando, ukuthokoza, ukuthula, ukubekezela, umusa, ubuhle, ukholo, ubumnene kanye lokuzibamba. Ubuntu bonke lobu bubumba “izithelo zomoya.” (Gal. 5:22, 23) Umoya ongcwele uyisipho esilugugu sibili! w20.05 28 ¶10; 29 ¶13

Kulezizatho ezinengi ezenza sicabangele ukuthi abazakwamukela abavusiweyo bazenelisa ukuzazi izihlobo labangane babo. Ngokwesibonelo, abantu abake bavuswa nguJehova kudala bavuka bengatshintshanga indlela ababeyiyo bengakafi. Babelokhu bebukeka ngendlela ababeyiyo yona, bekhuluma njalo becabanga ngendlela efananayo. Kukhanya yikho lokho uJehova azakwenza nxa esevusa abantu esikhathini esizayo. Khumbula ukuthi uJesu wafanisa ukufa lokulala njalo wafanisa ukuvuswa komuntu ofileyo lokuvuswa komuntu oleleyo. (Mat. 9:18, 24; Joh. 11:11-13) Nxa abantu bevuka ebuthongweni bayabe bengatshintshanga indlela ababukeka labakhuluma ngayo kanye lezinto ezisengqondweni zabo. Khumbula lokho okwenzakala kuLazaro. Wayeselensuku ezine efile yikho wayeseqalisa ukubola. Kodwa uJesu wathi esemvusile odadewabo bahle bamazi futhi akuthandabuzwa ukuthi uLazaro laye wabakhumbula.—Joh. 11:38-44; 12:1, 2. w20.08 14 ¶3; 16 ¶8

UJehova uthanda abagcotshiweyo labezinye izimvu ngendlela efananayo. Phela bonke wabathenga ngegazi leNdodana yakhe ayithandayo. Amaqembu la atshiyene ngenxa nje yokuthi abanye bazaphila ezulwini abanye emhlabeni, kodwa wonke kumele ahlale eqotho kuNkulunkulu loKhristu. (Hubo. 31:23) Kumele akhumbule lokuthi uNkulunkulu unika umuntu ngamunye umoya ongcwele awudingayo kungelani lokuthi ngogcotshiweyo kumbe ngowezinye izimvu. UJehova unike ngayinye yezinceku zakhe ithemba lekusasa elihle. (Jer. 29:11) ISikhumbuzo sokufa kukaKhristu sisinika ithuba lokudumisa uNkulunkulu loKhristu ngalokho abasenzele khona ukuze sithole impilo engapheliyo. ISikhumbuzo ngumbuthano oqakatheke kulayo yonke esiba layo umnyaka ngamunye. w21.01 18 ¶16; 19 ¶19

Abantu abanengi ababaseSikhumbuzweni balethemba lokuphila emhlabeni. Manje kungani besibakhona? Isizatho esenza babekhona siyafanana lesizatho esenza abantu baye emitshadweni yabangane babo, bayabe betshengisa ukuthi bayabathanda futhi bayabasekela. Yikho labezinye izimvu babakhona eSikhumbuzweni ngenxa yokuthi bayamthanda futhi bayamsekela uKhristu labagcotshiweyo. Esinye isizatho yikuthi bafuna ukutshengisa ukuthi bayawubonga umhlatshelo kaJesu owenza benelise ukuthola ukuphila okungapheliyo emhlabeni. Esinye isizatho esiqakathekileyo esenza abezinye izimvu babekhona eSikhumbuzweni yikuthi bafuna ukulalela umlayo kaJesu. Wathi esungula iSidlo SeNkosi Sakusihlwa elabaphostoli bakhe abathembekileyo wabatshela wathi: “Qhubekani likwenza lokhu lingikhumbula.” (1 Khor. 11:23-26) Yikho abezinye izimvu bazaqhubeka besibakhona eSikhumbuzweni ingqe nje abanye abagcotshiweyo besasemhlabeni. w21.01 17-18 ¶13-14

Nxa simthanda sibili umuntu, kumele sitshengise ngezenzo. (Khangela uJakhobe 2:17, 26.) Ngokwesibonelo, uJehova uyasithanda futhi uyasitshela lokho esebenzisa iLizwi lakhe iBhayibhili. (1 Joh. 4:19; Hubo. 25:10; Rom. 8:38, 39) Kodwa okwenza siqiniseke ukuthi uyasithanda yilokho akwenzayo hatshi lokho asitshela khona kuphela. UJehova wavumela iNdodana yakhe ayithandayo ukuthi ihlupheke futhi ibulawe ngenxa yethu. (Joh. 3:16) Lokhu kwenza singathandabuzi ukuthi uyasithanda. Sitshengisa ukuthi siyamthanda uJehova loJesu ngokubalalela. (Joh. 14:15; 1 Joh. 5:3) UJesu wasinika umlayo wokuthi sithandane. (Joh. 13:34, 35) Yikho kumele sibatshele abafowethu labodadewethu ukuthi siyabathanda. Kodwa akumelanga kuphelele ekukhulumeni kuphela, kufanele sikutshengise langezenzo.—1 Joh. 3:18. w21.01 9 ¶6; 10 ¶8

Labo abagcotshwe ngomoya ongcwele balethemba lokuba loJesu kuze kube nini lanini bebusa laye eMbusweni kaNkulunkulu. Bazambona njalo bakhulume laye. (Joh. 14:2, 3) UJesu uzatshengisa lalabo abalethemba lokuphila emhlabeni ukuthi uyabathanda. Lanxa bengasoze bambone, ubungane babo laye buzaqina kakhulu ngesikhathi bekholisa ukuphila abakulungiselelwe nguJehova loJesu. (Isaya. 9:6, 7) Sithola izibusiso ezinengi nxa sivuma ukuba ngabangane bakaJesu. Ngokwesibonelo, uyasithanda futhi uyasisekela njalo silethemba lokuphila kuze kube nini lanini. Kanti njalo okuqakatheke kakhulu yikuthi ukuba ngabangane bakaJesu kuzakwenza sibe lobungane obuligugu kulabo bonke, ubungane loYise uJehova. Kuyisibusiso sibili ukubizwa ngokuthi singabangane bakaJesu. w20.04 25 ¶15-16

Njengoba incwadi yabaseKhorinte yayibhalelwe amaKhristu ayehlala edolobheni lelo ayezavuswa ayephila ezulwini, lawo agoqelwe kubo ‘bonke abazakwenziwa baphile.’ AmaKhristu lawo ‘ayengcweliswe aba munye loKhristu uJesu futhi abizelwa ukuthi abe ngabangcwele.’ Umphostoli uPhawuli waphinda wabhala ‘ngalabo abafa bemanyene loKhristu.’ (1 Khor. 1:2; 15:18; 2 Khor. 5:17) Kwenye incwadi yeBhayibhili ephefumulelweyo, wabhala wathi labo ‘abamunye [loJesu] ngokufa njengaye, bazakuba munye laye ngoba bazavuswa njengaye.’ (Rom. 6:3-5) UJesu wavuswa eyisidalwa somoya futhi waya ezulwini. Lokhu yikho okuzakwenzakala kulabo ‘abamanyene loKhristu,’ okutsho amaKhristu agcotshiweyo. UPhawuli wabhala wathi uKhristu wavuswa ‘eyizithelo zokuqala zalabo asebafayo.’ (1 Khor. 15:20) UJesu wayengowokuqala ukuvuswa eyisidalwa somoya njalo engowokuqala ukuthola ukuphila okungapheliyo. w20.12 5-6 ¶15-16

AmaKhristu agcotshiweyo afa khathesi ahle avuswe ukuthi ayephila ezulwini. Umphostoli uPhawuli wakutsho lokho emazwini akhe abhalwe ku-1 Khorinte 15:51, 52. Abafowabo bakaKhristu bazathokoza kakhulu sebevusiwe. IBhayibhili liyasitshela umsebenzi ozakwenziwa yilabo abazatshintshwa “ngokucwayiza kwelihlo” nxa sebesezulwini. UJesu uthi kubo: “Lowo onqobayo alandele izenzo zami kuze kube sekucineni ngizamupha amandla phezu kwezizwe njalo uzakwelusa abantu ngentonga yensimbi, baphahlazwe babe yizicucu njengesitsha sobumba, njengoba nje ngamukela amandla kuBaba.”—Isam. 2:26, 27. w20.12 12 ¶14-15

Amazwi omphostoli uPhawuli athi uJesu ‘wayeyizithelo zokuqala’ aveza ukuthi bakhona abanye ababezavuswa ukuthi bayephila ezulwini. Ngokuhamba kwesikhathi abaphostoli kanye labanye ‘ababemanyene loKhristu’ babezavuswa balandele uJesu ezulwini. (1 Khor. 15:18) Ukuvuka kwalabo ‘abamanyene loKhristu’ ukuthi bayephila ezulwini kwakungakaqalisi ngesikhathi uPhawuli ebhala incwadi eya kwabaseKhorinte. Watshengisa ukuthi lokho kuzakwenzakala esikhathini esizayo, wathi: “Ngamunye ngethuba lakhe elifaneleyo: Owokuqala nguKhristu oyizithelo zokuqala, besekulandela abangabakaKhristu ngesikhathi sokuba khona kwakhe.” (1 Khor. 15:23; 1 Thes. 4:15, 16) Lamuhla siphila esikhathini “sokuba khona” kukaKhristu. Ngakho abaphostoli kanye lamanye amaKhristu agcotshiweyo kwakumele balinde kuze kube yisikhathi sokuba khona kukaKhristu ukuze bathole umvuzo wabo wokuya ezulwini lokuthi ‘babemunye loJesu njengoba babezavuswa njengaye.’—Rom. 6:5. w20.12 5 ¶12; 6 ¶16-17

Umphostoli uPhawuli wayekhuluma ngomuntu ovuswa elomzimba wasezulwini okutsho ‘owomoya.’ (1 Khor. 15:43, 44) Ngesikhathi uJesu esemhlabeni wayelomzimba wenyama kodwa esevusiwe “waba ngumoya onika ukuphila” wasebuyela ezulwini. AmaKhristu agcotshiweyo lawo azavuswa elemizimba yomoya. UPhawuli wathi: “Njengoba sinjengalowo owenziwa ngothuli, sizaphinda sibe njengaye yena owezulwini.” (1 Khor. 15:45-49) Khumbula ukuthi uJesu kavuswanga elomzimba wenyama. UPhawuli wathi esegoqa indaba yakhe wachasisa ukuthi kungani lapho esithi: “Inyama legazi ngeke kulithole ilifa loMbuso kaNkulunkulu” ezulwini. (1 Khor. 15:50) Abaphostoli labanye abagcotshiweyo babengasoze bavuswe ukuthi bayephila ezulwini belemizimba yenyama legazi ebolayo. w20.12 10-11 ¶10-12

UNkulunkulu waphefumulela abanye abafundi bakaJesu ngesikhathi samaKhristu akuqala ukuthi babhale ngokuvuswa kwamaKhristu agcotshiweyo azaphila ezulwini. Umphostoli uJohane wathi: “Khathesi sesingabantwana bakaNkulunkulu, kodwa akukavezwa ukuthi sizabe sinjani. Esikwaziyo yikuthi nxa esebonakaliswa sizakuba njengaye.” (1 Joh. 3:2) Yikho amaKhristu agcotshiweyo awakwazi ukuthi kuzabe kunjani ukuphila eyizidalwa zomoya ezulwini. Kodwa nxa esetholile umvuzo wawo, azambona uJehova. IBhayibhili lisitshela okunye mayelana lokuvuswa lokhu. AmaKhristu agcotshiweyo azabe eloKhristu ngesikhathi ‘esetshabalalisa bonke ohulumende kanye lalabo abalamandla’ futhi esetshabalalisa ‘ukufa okuyisitha sokucina.’ Ngemva kwalokho uJesu lalabo azabusa labo bazazibeka ngaphansi kukaJehova futhi bazabeka zonke izinto ngaphansi kwakhe. (1 Khor. 15:24-28) Leso kuzabe kuyisikhathi esithokozisayo sibili! w20.12 8 ¶2

AmaKhristu aqotho angelathemba lokuyaphila loKhristu ezulwini lawo alethemba lokuthi azavuswa. IBhayibhili lithi umphostoli uPhawuli labanye abazakuya ezulwini bathola “ukuvuswa kwabafileyo kwakuqala.” (Flp. 3:11) Amazwi la atshengisa ukuthi kulokunye ukuvuswa okuzakuba khona. Lokhu kuhambelana lalokho uJobe ayekholwa ukuthi kuzakwenzakala kuye esikhathini esizayo. (Jobe. 14:15) Labo “abangabakaKhristu ngesikhathi sokuba khona kwakhe” bazabe sebesezulwini loJesu lapho esetshabalalisa bonke ohulumende kanye lalabo abalamandla. “Lokufa okuyisitha sokucina” kuzatshabalaliswa. Bonke abayabe bevuswe ukuthi bayephila ezulwini kabasoze baphinde bafe loba sekutheni. (1 Khor. 15:23-26) Labo abangasoze baye ezulwini balethemba uPhawuli akhuluma ngalo embhalweni walamuhla. Siyakwazi ukuthi akulabantu abangalunganga abazakuya ezulwini, yikho amazwi la akhuluma ngokuvuswa kwalabo abazaphila emhlabeni. w20.12 6-7 ¶18-19

Abanye bangazibuza ukuthi kuyini okungenza baqiniseke ukuthi uJehova angabathethelela. Nxa uzibuza lokho, kutshengisa ukuthi uJehova angakuthethelela. Enye iNqabayokulinda yakudala yathi: ‘Ngezinye izikhathi singabe silokhu sisenza iphutha elifananayo kanenginengi. Kungenzeka kasikenelisi ukutshiya umkhuba esasilawo singakakhonzi uNkulunkulu. Ungacabangi ukuthi wenze isono uJehova angeke asithethelele ngoba lokhu yikho uSathane afuna ukucabange. Khona nje ukuthi uzwa ubuhlungu futhi ukhathazeke nxa wenze iphutha lelo kutshengisa ukuthi kawusomuntu omubi lokuthi uJehova angakuthethelela. Hlala uthobekile njalo uthandaze kuNkulunkulu umcela ukuthi akuthethelele, akuncedise ube lomzwangedwa omsulwa njalo wenelise ukuyekela ukwenza iphutha lelo.’ Umphostoli uPhawuli engakabi ngumKhristu wenza izono ezinengi ezinkulu. Kazange azikhohlwe izono ayezenzile. (1 Tim. 1:12-15) Kodwa wayekholwa ukuthi inhlawulo yisipho asinikwe nguNkulunkulu. Lokhu kwamnceda ukuthi angahlali ezisola lokuthi akhonze uJehova ngenhliziyo yonke. w20.11 27 ¶14; 29 ¶17

USathane usebenzisa ezinye indlela ezinengi ukuthi asilinge. Kulula ukucabanga ukuthi izinto lezi kazizimbi kangako. Ngokwesibonelo, singazitshela ukuthi kasisoze sisuswe ebandleni nxa singazenza izinto lezi, besesibona kungakubi kangako ukuzenza. Ukucabanga okunje akulunganga ngitsho. Kuhle ukuthi sizibuze imibuzo enjengale: ‘USathane uzama ukusebenzisa isilingo lesi ukuthi ehlukanise inhliziyo yami yini? Kangisoze ngilingcolise yini ibizo likaJehova nxa ngingavuma ukukhulelwa yizifiso ezimbi? Ukuvumela izifiso lezi kuzangisondeza yini kuNkulunkulu wami kumbe kuzangenza ngibe khatshana laye?’ Cabangisisa ngemibuzo enjengale. Thandaza ucela ukuhlakanipha ukuze ungazikhohlisi nxa uphendula imibuzo le. Ukwenza njalo kuzakuvikela sibili. Kuzakunceda ukuthi wale ukulingwa njengoJesu owathi: “Suka Sathane!” (Mat. 4:10) Khumbula, akuncedi ukuba lenhliziyo eyehlukeneyo. w20.06 12-13 ¶16-17

Siyazithoba silalele uJehova ngoba siyananzelela ukuthi uhlala esazi okusincedayo. (Efe. 4:22-24) Nxa sithobekile sizabona okufunwa nguJehova kuqakatheke kakhulu kulalokho esikufunayo futhi sizabona abanye bengcono kulathi. Lokho kuzakwenza sibe ngabangane bakaJehova njalo sibe lobudlelwano obuhle labafowethu labodadewethu. (Flp. 2:3) Nxa singayekela ukunanzelela singacina sesifanana labantu bomhlaba lo abazigqajayo labangelandaba labanye. Kukhanya ayekhona amaKhristu anjalo ngesikhathi sabaphostoli ngoba umphostoli uPhawuli wabhalela amaKhristu aseRoma wathi: “Ngitshela wonke umuntu phakathi kwenu ukuthi angacabangi ukuthi ungcono kulalokho ayikho khona, kodwa acabange ngendlela etshengisa ukuthi usebenzisa kuhle ingqondo.” UPhawuli waveza ukuthi kumele sicabange okuthile ngathi. Kodwa nxa sithobekile asisoze sizibone singcono kulalokho esiyikho khona. w20.07 2 ¶1-2

Isikhathi sokuthula esasikhona ngensuku zika-Asa sacina siphelile. Kwatheleka ibutho elikhulu futhi elalilamandla elalilamasotsha edlula 1 miliyoni livela eTopiya. Umlawuli webutho lelo uZera wayezitshela ukuthi uzalinqoba ibutho lakoJuda kodwa u-Asa wathembela kuJehova. Wakhuleka wathi: “Sisize, O Jehova Nkulunkulu wethu, ngoba thina sithembele kuwe, ngebizo lakho siphumile ukuba silwe lalelibutho lempi elikhulu kangaka.” (2 ImiLan. 14:11) Ibutho laseTopiya laliphosa liliphinde kabili ibutho lika-Asa, kodwa u-Asa wayekwazi ukuthi uJehova ulamandla amakhulu futhi uzabancedisa abantu bakhe. Lakanye uJehova wabancedisa abantu bakhe, ibutho laseTopiya lanqotshwa. (2 ImiLan. 14:8-13) Kasikwazi ukuthi kuyini okuzakwehlela ngamunye wethu esikhathini esizayo, kodwa esikwaziyo yikuthi isikhathi sokuthula abantu bakaNkulunkulu abangabe belaso sizaphela. Khumbula ukuthi uJesu wathi ezinsukwini zokucina abafundi bakhe ‘bazazondwa yizizwe zonke.’—Mat. 24:9. w20.09 17-18 ¶14-16

Akula loyedwa wethu ofuna ukuthethiswa. Kodwa nxa izitha zethu zingasithethisa besesikhathazeka kakhulu ngokuthi zitheni, singaphela amandla. (Zaga. 24:10, NWT) Pho kumele senzeni? Kumele senze njengomphostoli uPhawuli ‘sijabule nxa sithethiswa.’ Phela ukuthethiswa lokuphikiswa kutshengisa ukuthi singabafundi bakaJesu beqiniso. (1 Phet. 4:14) UJesu wathi abafundi bakhe babezahlukuluzwa. (Joh. 15:18-20) Lokhu kwenzakala ngesikhathi sabaphostoli. Ngalezonsuku labo ababelandela amasiko amaGrikhi babebona amaKhristu engafundanga futhi engasibantu balutho. Kanti njalo amaJuda amanengi ayesithi amaKhristu ‘ayengafundanga futhi engabantu makhaza.’ (ImiSeb. 4:13) Abantu abanengi babecabanga ukuthi amaKhristu abuthakathaka njalo awenelisi ukuzivikela. Ayengangeni kwezombusazwe yikho kwakungelalutho ayengalutsho kuhulumende. Kanti njalo ayengangeni esisotsheni ngakho ayengelamandla okulwa izimpi kumbe okuzivikela. AmaKhristu la avumela yini ukuthi izinto ezazikhulunywa ngabaphikisi ziwaqede amandla? Hatshi. w20.07 14-15 ¶3-4

Umphostoli uJohane wayebathanda kakhulu abafowabo labodadewabo futhi wayefuna babe lokholo oluqinileyo. Lokho abatshela khona ezincwadini zakhe ezintathu kutshengisa ukuthi wayebathanda lokuthi wayelendaba labo sibili. Kuyasikhuthaza kakhulu ukwazi ukuthi amadoda labesifazana abanjengaye bagcotshiwe ukuthi babuse loKhristu. (1 Joh. 2:27) Kwangathi singasilalela iseluleko uJohane asipha sona. Kasizimiseleni ukuhamba eqinisweni ngokulalela uJehova kukho konke esikwenzayo. Taditsha iLizwi lakhe njalo ulithembe. Woba lokholo oluqinileyo kuJesu. Xwaya izimfundiso zabantu lezabahlamuki. Ungaqali ukwenza angani ukhonza uJehova ngapha usenza izinto ezimbi futhi ungavumi ukuyengwa ukuthi wenze isono. Phila ngendlela uNkulunkulu ayifunayo. Kanti njalo kasithetheleleni abafowethu labodadewethu nxa besiphambanisele futhi sibasize nxa bedinga uncedo ukuze bangadani kumbe baphele amandla. Nxa singakwenza lokhu sizaqhubeka sihamba eqinisweni kungelani lobunzima esihlangana labo. w20.07 24-25 ¶15-17

UJehova utshengise uthando ngokuvumela ngayinye yezinceku zakhe ezithembekileyo ukuthi ibe sebandleni lakhe. Lanxa silemisebenzi etshiyeneyo ebandleni, sonke siqakathekile njalo siyabadinga abafowethu labodadewethu. Umphostoli uPhawuli wakwenza kwacaca ukuthi akula phakathi kwethu okumele atshele enye inceku kaJehova ukuthi ‘kayidingi.’ (1 Khor. 12:21) Kumele sihloniphane futhi sisebenze ndawonye nxa sifuna kube lokuthula ebandleni. (Efe. 4:16) Nxa singasebenza sibambene, sonke sizathokoza njalo ibandla lizakwakhiwa ethandweni. Bonke abadala abasebandleni bakhethwe ngomoya ongcwele kaJehova. Lanxa kunjalo baleziphiwo ezitshiyeneyo. (1 Khor. 12:17) Abanye bangabe bengelasikhathi eside bengabadala yikho bayabe bengelalwazi olunengi njengabanye. Abanye bangabe bengenelisi ukwenza okunengi ngenxa yokuguga kumbe ukugula. Kodwa akula mdala webandla okumele azitshele ukuthi omunye umdala ‘kadingakali.’ Ngamunye kumele alalele iseluleko sikaPhawuli esikuRoma 12:10. w20.08 26 ¶1-2; 27 ¶4

UJehova usikhokhela endleleni eya ekuphileni esebenzisa ingxenye esemhlabeni yenhlanganiso yakhe. Akuthandabuzwa ukuthi siyalalela nxa inhlanganiso itshintsha lokho ebesikukholwa kumbe isitshela okumele sikwenze endabeni zokuziphatha. Kodwa kuthiwani nxa isenza utshintsho oluphathelane lendlela ebesisenza ngayo izinto, njengokuthengisa iWolu yoMbuso esingenela? Sizahlala sithokoza nxa singakhumbula ukuthi konke esikwenzayo sikwenzela uJehova lokuthi nguye okhokhela inhlanganiso yakhe. (Kol. 3:23, 24.) Ngesikhathi iNkosi uDavida inikela ukuthi kwakhiwe ithempeli yakunanzelela ukuthi konke ekwenzayo ikwenzela uJehova. Yathi: ‘Mina ngiyini, bayini abantu bami, ukuthi sinikele ngenhliziyo yonke na? Konke kuvela kuwe, thina sikunike lokho okuvela esandleni sakho.’ (1 ImiLan. 29:14) Lathi nxa sinikela siyabe sinika uJehova lokho okuvela esandleni sakhe. Lanxa kunjalo uyathokoza nxa esibona sisebenzisa isikhathi, lamandla lemali yethu ukuthi sisekele umsebenzi afuna wenziwe.—2 Khor. 9:7. w20.11 22-23 ¶14-16

Ukuphumelela kwethu emsebenzini wokutshumayela akuyi ngokuthi sincedise abantu abangaki ukuthi babuye enhlanganisweni kaNkulunkulu. (Luk. 8:11-15) UJehova usibona siphumelela nxa siqinisela emsebenzini wokutshumayela izindaba ezinhle lowokufundisa abanye. Okwenza asibone njalo yikuthi siyabe simlalela futhi silalela leNdodana yakhe. (Mak. 13:10; ImiSeb. 5:28, 29) Kuqakatheke kakhulu ukuthi sitshumayele khathesi ngoba sekuseduze ukuthi umumo lo uphele. Sekusele isikhathi esincane kakhulu sokuthi sitshumayele izindaba ezinhle ezisindisa ukuphila. Ungalindeli ukuthi konke kukulungele empilweni yakho ukuze uqalise ukwenza umsebenzi lo oqakathekileyo. Zimisele ukuwuthanda umsebenzi wokutshumayela, ukufunda okunengi ngalokho iBhayibhili elikutshoyo, ukuba lesibindi kanye lokusebenza ngamandla wonke. Sebenza labagoli babantu abedlula 8 miliyoni. Ungenza njalo, uzathola ukuthokoza okuvela kuJehova. (Neh. 8:10; Luk. 5:10) Zimisele ukwenza konke ongakwenza emsebenzini wokutshumayela futhi uqhubeke uwenza uJehova aze athi sekwanele. w20.09 7 ¶18-20

Akumelanga sibe lesifiso sokubuthelela izinto zomhlaba. ‘Inotho elamandla okuyenga’ ingenza sicine singasamthandi uJehova, singasaliqakathekisi iLizwi lakhe futhi singaselasifiso sokutshela abanye ngalo. (Mat. 13:22) Nxa sifuna ukuvikela lokho uJehova asiphathise khona kumele sibaleke masinyane singabona ingozi. Kumele sihlele ukuthi sizakwenzani nxa singathi siku-inthanethi loba sibukele i-TV kuthutshe abantu abaziphatha kubi, udlakela kumbe izinto zabahlamuki. Nxa singahlala sizilungiselele sizabalekela izinto ezingaphambanisa ubungane bethu loJehova futhi sihlale simsulwa emehlweni akhe. (Hubo. 101:3; 1 Tim. 4:12) Kumele sizivikele izinto eziligugu esiziphiwe nguJehova. Izinto lezi liqiniso eliligugu eliseBhayibhilini kanye lesibusiso sokutshela abanye ngalo. Nxa singavikela izinto lezi sizakuba lomzwangedwa omsulwa, siphile ukuphila koqobo njalo sithokoze ngoba siyabe sincedisa abanye ukuthi babemazi uJehova. w20.09 30 ¶16-19

Ngesikhathi ubhabhathizwa watshengisa abanye ukuthi ulokholo kuJehova lokuthi ufuna ukumkhonza. Indlela uJehova akhokhela ngayo inhlanganiso yakhe lamuhla iveza ubuntu bakhe, inhloso yakhe lendlela afuna siziphathe ngayo. Kasixoxeni ngezinto ezintathu esizifunda ngoJehova ezikhanya enhlanganisweni yakhe. Okokuqala, “uNkulunkulu kakhethi.” (ImiSeb. 10:34) UJehova wanikela ngeNdodana yakhe yaba ‘yinhlawulo yabantu bonke’ ngenxa yokuthi uyasithanda. (1 Tim. 2:6; Joh. 3:16) Usebenzisa abantu bakhe ukuthi batshumayele izindaba ezinhle kubo bonke abafuna ukulalela. Lokhu kunika abantu abanengi ithuba lokuthi bancedwe yinhlawulo. Okwesibili, uJehova nguNkulunkulu ohlelekileyo futhi owokuthula. (1 Khor. 14:33, 40) Yikho sikhangelele ukuthi izinceku zakhe zimkhonze zihlelekile futhi zilokuthula. Okwesithathu, uJehova ‘nguMfundisi Omkhulu.’ (Isaya. 30:21) Yikho inhlanganiso yakhe iqakathekisa kakhulu ukufundisa abanye iLizwi lakhe ebandleni lasekutshumayeleni. w20.10 20 ¶1-3