May

UJesu wakhetha ukulalela abazali bakhe esesemncane. Kazange azitshele ukuthi wazi okunengi kulabo. Wayelizibulo yikho kwakulezinto ezinengi okwakukhangelelwe ukuthi azenze. Akuthandabuzwa ukuthi wenza konke okusemandleni akhe ukuthi azenze lezozinto. Wasebenza nzima ngesikhathi efundiswa ukubaza nguyise uJosefa ukuze ancedise ekunakekeleni imuli yangakibo ngalokho ekudingayo. Kungenzakala abazali bakaJesu bamtshela ngokuzalwa kwakhe okuyisimangaliso lalokho izithunywa zikaNkulunkulu ezazikutshilo ngaye. (Luk. 2:8-19, 25-38) Kodwa uJesu waphinda wataditsha iMibhalo eyedwa. Wayekukhuthalele lokhu ngoba eleminyaka engu-12 kuphela abafundisi eJerusalema “babelokhu bemangaliswa yikuzwisisa kwakhe lezimpendulo zakhe.” (Luk. 2:46, 47) Ngalesosikhathi wayevele esekwazi ukuthi uJehova nguYise.—Luk. 2:42, 43, 49. w20.10 29-30 ¶13-14

Nxa singakholwa ukuthi uJesu wavuswa sizaba lokholo lokuthi abanye labo bazavuswa. Ekuqaliseni kwendaba uPhawuli ayibhalayo mayelana lokuvuswa kwabafileyo, wakhuluma ngezinto ezintathu ezilandelayo: (1) “UKhristu wafela izono zethu.” (2) “Wangcwatshwa.” (3) ‘Wavuswa ngelanga lesithathu ngokuvumelana leMibhalo.’ (1 Khor. 15:3, 4) Ukufa, ukungcwatshwa lokuvuswa kukaJesu kusinceda njani? U-Isaya waphrofetha ukuthi uMesiya ‘wayezasuswa elizweni labaphilayo’ njalo ‘abelwe ingcwaba kanye lababi.’ Waphinda wathi uMesiya ‘wayezathwala izono zabanengi.’ UJesu wakwenza lokhu ngesikhathi enikela ngokuphila kwakhe ukuthi kube yinhlawulo. (Isaya. 53:8, 9, 12; Mat. 20:28; Rom. 5:8) Yikho ukufa lokungcwatshwa lokuvuswa kukaJesu kusenza sikholwe ukuthi sizakhululwa esonweni lasekufeni lokuthi sizaphinda sizibone izihlobo labangane bethu abafayo. w20.12 2-3 ¶4-6; 5 ¶11

Umphostoli uPhawuli wayejayele ukutshumayela emasinagogeni amaJuda. Ngokwesibonelo, esesinagogi yeThesalonika “okwamasabatha amathathu wayebonisana [lamaJuda] ngeMibhalo.” (ImiSeb. 17:1, 2) Kumele ukuthi wayezizwa ekhululekile nxa esesinagogi njengoba wayengumJuda. (ImiSeb. 26:4, 5) Wayewazwisisa amaJuda yikho kwakulula ukuthi awatshumayeze. (Flp. 3:5) Ngemva kokubalekela ukuhlukuluzwa eThesalonika laseBheriya, uPhawuli waya e-Athene. Lakhonale “waqalisa ukubonisana lamaJuda ayesesinagogeni kanye labanye ababekhonza uNkulunkulu.” (ImiSeb. 17:17) Kodwa esesemakethe wayesetshumayeza abantu ababengayisiwo maJuda. Kwababemlalele kwakulezinjulangqondo kanye labanye abeZizweni ababesithi umlayezo wakhe ‘yimfundiso entsha.’ Bathi kuye: “Usitshela izinto esingakaze sizizwe ngendlebe zethu.”—ImiSeb. 17:18-20. w20.04 9 ¶5-6

Ungaziboni uyisehluleki nxa ulomkhuba omubi olwisana lawo. Phela sonke siyawudinga umusa omkhulu kaNkulunkulu asitshengisa wona ngenhlawulo ngenxa yokuthi sonke siyawenza amaphutha. (Efe. 1:7; 1 Joh. 4:10) Kanti njalo abafowethu labodadewethu ebandleni bazasikhuthaza. Bazasilalela nxa sifuna ukukhuluma labo futhi basitshele amazwi azasikhuthaza. (Zaga. 12:25; 1 Thes. 5:14) Udade ohlala eNigeria okuthiwa nguJoy oyake adane kakhulu uthi: “Ngabe ngingaphi aluba angincediswa ngabafowethu labodadewethu? Bayangikhuthaza futhi khonokho kuyibufakazi bokuthi uJehova uyayiphendula imithandazo yami. Sengifunde kubo ukuthi ngingabakhuthaza njani abantu abadanileyo.” Kodwa kumele sikhumbule ukuthi ngezinye izikhathi abafowethu labodadewethu bayabe bengakwazi ukuthi sidinga ukukhuthazwa. Yikho kungadinga ukuthi silande umfowethu kumbe udadewethu oqinileyo ekukhonzeni simtshele ukuthi sidinga uncedo. w20.12 23-24 ¶7-8

Nxa ufuna ukuba ngumngane oseduze lomuntu othile kufanele uzinike isikhathi sokuba laye. Ukuxoxelana elikucabangayo lendlela elizizwa ngayo kuzakwenza libe ngabangane. Kodwa ukuba ngumngane kaJesu khona akulula ngezinye izikhathi. Obunye ubunzima yikuthi kasikaze simbone uJesu. AmaKhristu amanengi aphila ngesikhathi sabaphostoli lawo kawazange ambone. Loba kunjalo umphostoli uPhetro wathi: “Lanxa lingazange limbone liyamthanda. Lakhathesi kalimboni, kodwa litshengisa ukuthi lilokholo kuye.” (1 Phet. 1:8) Yikho kuyenzakala sibili ukuthi sibe ngabangane bakaJesu lanxa singakaze simbone. Kanti njalo kasenelisi ukukhuluma loJesu. Phela nxa sikhuleka siyabe sikhuluma loJehova. Kuliqiniso sibili ukuthi sikhuleka ngebizo likaJesu kodwa lokhu akutsho ukuthi siyabe sikhuluma laye. Vele uJesu kafuni sikhuleke kuye. Ngenxa yani? Ukuthandaza yindlela yokukhonza futhi uJehova nguye yedwa okumele akhonzwe. (Mat. 4:10) Lanxa kunjalo singenelisa ukutshengisa ukuthi siyamthanda uJesu. w20.04 20 ¶1-3

Ababegijima emncintiswaneni yamaGrikhi babeqinisela lanxa babedinwa futhi besizwa ubuhlungu. Babencedwa yikuqeqetshwa ababekuthola lamandla abo nje kuphela. Lathi siyaqeqetshwa ukuze siwugijime umncintiswano wokuphila. Kodwa thina singcono kulabantu laba ngoba singathola amandla kuJehova njalo yena kaphelelwa ngamandla okusinceda kuloba yisiphi isimo esikuso. Nxa singamthemba uzasiqeqetsha aphinde asinike amandla. Umphostoli uPhawuli wehlelwa zinhlupho ezinengi. Wayethethiswa, ehlukuluzwa njalo kwezinye izikhathi wayephela amandla futhi ekhathazwa yilokho akubiza ngokuthi ‘ngameva enyameni.’ (2 Khor. 12:7) Kulokuthi akhalale ukukhonza uJehova wabona inhlupho lezo njengethuba lokumthemba. (2 Khor. 12:9, 10) Lokhu kwenza uJehova wamnika amandla okuqinisela kuloba yiluphi uhlupho olwalumehlela. w20.04 29 ¶13-14

Igugu esilalo esingaliboniyo ‘yikusebenza’ loJehova, loJesu lezingilosi. (2 Khor. 6:1) Sisebenza labo loba nini nxa sisemsebenzini wokwenza abafundi. UPhawuli wakhuluma ngaye lalabo abenza umsebenzi lo wathi: “Thina sisebenza loNkulunkulu.” (1 Khor. 3:9) Siphinda sisebenze loJesu nxa sisekutshumayeleni. Khumbula ukuthi esetshele abalandeli bakhe ukuthi ‘benze abantu bezizwe zonke babe ngabafundi’ wathi: “Ngizabe ngilani.” (Mat. 28:19, 20) Izingilosi zona ke? Kuyisibusiso sibili ukuthi ziyasiqondisa nxa simemezela ‘izindaba ezinhle zaphakade kulabo abahlala emhlabeni.’ (Isam. 14:6) Eyinye inhlanyelo esiyihlanyelayo iwela enhliziyweni zabantu abalalelayo futhi ikhule. (Mat. 13:18, 23) Ngubani owenza inhlanyelo le ikhule njalo ithele? UJesu uyakuchasisa lokhu embhalweni walamuhla. w20.05 30 ¶14-15

Abazali abanengi bayadivosa. Ngitsho lezimuli ezihlala ndawonye zingabe zingelabudlelwano obuseduze. Enye indoda eyeluleka izimuli ithi: “Ubaba lomama labantwana kabakhulumisani batshona besemafonini, kuma-tablet lakumakhompiyutha kumbe bedlala imidlalo yamavidiyo. Lanxa behlala bonke bayabe bengani abazani.” Asifuni ukufanana labantu bomhlaba lo abangelathando. Kumele sibathande kakhulu abangakithi siphinde sithande labazalwane bethu ngenhliziyo yonke. (Rom. 12:10) Kufanele sithande abafowethu labodadewethu ngendlela esithanda ngayo abangakithi esizwanana labo. Nxa singabathanda ngale indlela, sizathokoza ukukhonza uJehova sindawonye.—Mik. 2:12. w21.01 20 ¶1-2

Kulula ukuthi iqembu elibambeneyo linqobe kulalelo elingabambananga. Inhliziyo yakho ingaba njengeqembu leli nxa okucabangayo lokufisayo lendlela ozizwa ngayo kubambene futhi kuvumelana lemithetho kaJehova. Khumbula ukuthi uSathane ufuna ukwehlukanisa inhliziyo yakho. Ufuna ukuthi okucabangayo lokufisayo kanye lendlela ozwa ngayo kuphikisane lemithetho kaJehova. Kodwa ukuze ukhonze uJehova kumele ube lenhliziyo epheleleyo. (Mat. 22:36-38) Ungaqali ukuvumela uSathane ehlukanise inhliziyo yakho! Thandaza kuJehova njengoDavida owathi: “Ngipha inhliziyo engaxamalazanga, ukuze ngilesabe ibizo lakho.” Yenza konke ongakwenza ukuze indlela ophila ngayo ihambelane lomthandazo lo. Zimisele nsuku zonke ukwenza izinqumo ezitshengisa ukuthi uyalihlonipha kakhulu ibizo likaJehova elingcwele, kungelani lokuthi ngezinganani. Nxa ungenza njalo, uzakwenza ibizo likaJehova lingcweliswe njengoba unguFakazi wakhe. (Zaga. 27:11) Kanti njalo sonke sizakutsho amazwi akhulunywa ngumphrofethi uMikha athi: “Sizahamba ebizweni likaJehova uNkulunkulu wethu kuze kube laphakade.”—Mik. 4:5. w20.06 13 ¶17-18

Ngesikhathi inkosi yasenyakatho labanye ohulumende behlasela abantu bakaNkulunkulu, uSomandla uzazonda kakhulu futhi lokhu kuzakwenza ukuthi impi ye-Amagedoni iqale. (Isam. 16:14, 16) Ngalesosikhathi inkosi yasenyakatho izatshabalaliswa kanye lezizwe ezibumba uGogi waseMagogi futhi uyabe “engasekho ongayisiza.” (Dan. 11:45) Ivesi elandelayo esiphrofethweni sikaDanyeli isitshela okunye mayelana lokuthi inkosi yasenyakatho labangane bayo bazatshabalaliswa njani lokuthi thina sizasindiswa njani. (Dan. 12:1) UMikhayeli ngelinye ibizo leNkosi yethu ebusayo uKhristu uJesu. ‘Ubelinda’ abantu bakaNkulunkulu kusukela ngo-1914 lapho esiba yiNkosi yoMbuso kaNkulunkulu ezulwini. Sekuseduze ukuthi ‘avele’ kumbe atshabalalise izitha zakhe empini ye-Amagedoni. Impi leyo yisenzakalo sokucina esikhathini uDanyeli athi ‘ngesokuhlukumezeka’ okungakaze kube khona.—Isam. 6:2; 7:14. w20.05 15-16 ¶15-17

Ngesikhathi uJosefa eyisigqili langesikhathi esesejele kwakungelanto angayenza ukutshintsha isimo ayekuso. Manje kuyini okwamncedayo? Wenza imisebenzi ayeyiphiwe ngamandla akhe wonke kulokuthi azihluphe ngezinto ayengeke azitshintshe. Waqakathekisa ukwenza izinto ezazithokozisa uJehova. Lokhu kwenza uJehova wabusisa konke ayekwenza. (Gen. 39:21-23) Okwenzakala kuJosefa kusifundisa ukuthi abantu bomhlaba lo balesihluku lokuthi bangasiphatha kubi. Ngezinye izikhathi abangasiphatha kubi ngabafowethu labodadewethu. Kodwa nxa singabona uJehova eliDwala lethu kumbe iSiphephelo sethu asisoze sidane kakhulu futhi asisoze siyekele ukumkhonza. (Hubo. 62:6, 7; 1 Phet. 5:10) Khumbula ukuthi uJosefa wayeleminyaka engaba ngu-17 ngesikhathi esiba lamaphupho avela kuJehova. Lokhu kutshengisa ukuthi uJehova uyazithemba izinceku zakhe ezisakhulayo. Lamuhla banengi abasakhulayo abalokholo olunjengolukaJosefa. Abanye babo baze babotshwa ngenxa yokuthembeka kuNkulunkulu.—Hubo. 110:3, NWT. w20.12 16 ¶3; 17 ¶5, 7

Umphostoli uPhetro kanye loJohane babekubona kuyisibusiso ukuhlukuluzwa ngenxa yokulandela uJesu langokufundisa abanye ngaye. (ImiSeb. 4:18-21; 5:27-29, 41, 42) Kwakungabayangisi ukuba ngabafundi bakaJesu. Lanxa abantu emphakathini babengawahloniphi amaKhristu, wona anceda kakhulu abanye ukwedlula lokho okwakusenziwa ngabaphikisi. Ngokwesibonelo, amabhuku eBhayibhili abhalwa ngamanye amaKhristu alokhu enceda futhi enika amamiliyoni abantu ithemba. Kanti njalo uMbuso ayetshumayela ngawo usubusa ezulwini futhi sekuseduze ukuthi ubuse bonke abantu. (Mat. 24:14) Kodwa uhulumende wamaRoma owawulamandla njalo uhlukuluza amaKhristu awuzange uhlale isikhathi eside. AmaKhristu lawo aqotho asengamakhosi ezulwini. Kodwa labo ababewaphikisa sebafa futhi nxa kungenzakala ukuthi bavuswe bayabe bezabuswa nguMbuso owawutshunyayelwa ngamaKhristu ababewazonda.—Isam. 5:10. w20.07 15 ¶4

U-Abrahama wayelokholo oluqinileyo ezithembisweni zikaNkulunkulu okokuthi kwakungani uyambona oGcotshiweyo kumbe uMesiya owayezakuba yiNkosi yoMbuso kaNkulunkulu. Lokhu yikho okwenza uJesu watshela amaJuda wathi: “Uyihlo u-Abrahama wathokoza kakhulu ekhangelele ukubona usuku lwami, lakanye walubona wajabula.” (Joh. 8:56) Kuyacaca-ke ukuthi u-Abrahama wayekwazi ukuthi enye inzalo yakhe yayizakuba ngamakhosi eMbusweni owawuzabunjwa nguNkulunkulu futhi wayezimisele ukulindela ukuthi uJehova agcwalise isithembiso leso. Kungani sisithi u-Abrahama wayelindele idolobho kumbe uMbuso ocandwe nguNkulunkulu? Kazange abe yisizalwane saloba yiwuphi umbuso womhlaba. Wahamba ehlala endaweni ezitshiyeneyo kulokuthi ahlale endaweni eyodwa abesesekela inkosi engumuntu. Kanti njalo kazange azame ukuzicandela owakhe umbuso kodwa waqhubeka elalela uJehova elindele ukuthi agcwalise izithembiso zakhe. Ngokwenza njalo, u-Abrahama watshengisa ukuthi ulokholo oluqine okumangalisayo. w20.08 3 ¶4-5

UJehova uthembisa ukuthi ngesikhathi sokubusa kukaKhristu kakho ozakuthi: “Mina ngiyagula.” (Isaya. 33:24) Yikho labo abazavuswa bazabe belemizimba eqine saka. Kodwa kabasoze bahle babe ngabapheleleyo ngoba nxa kungaba njalo izihlobo labangane babo abasoze babebazi. Kukhanya angani isono sizakhitshwa ebantwini bonke kancane kancane ngesikhathi sokubusa kukaKhristu kweminyaka eyinkulungwane. UJesu uzabuyisela uMbuso kuYise ngemva kweminyaka le eyinkulungwane. Ngalesosikhathi uMbuso uzabe usenze konke uJehova afuna ukwenze okugoqela ukukhipha isono ebantwini. (1 Khor. 15:24-28; Isam. 20:1-3) Akucabange ukuthi kuzabe kunjani ukuphinda ubone izihlobo labangane bakho abafayo. Uzathokoza uze uhleke yini kumbe zizehla ezenjabulo? Uzathokoza kakhulu yini uze uhlabele izingoma zokudumisa uJehova? Akuthandabuzwa ukuthi uzamthanda kakhulu uYihlo olomusa kanye leNdodana yakhe elothando ngenxa yokuvusa kwabo abafileyo. w20.08 16-17 ¶9-10

Umphostoli uPhawuli wakhuthaza amaKhristu ukuthi acabange ngokukhonza uJehova engatshadanga. (1 Khor. 7:8, 9) Kusegcekeni ukuthi uPhawuli kazange awakhangelele phansi amaKhristu angatshadanga. Phela wakhetha uThimothi umzalwane osakhulayo njalo ongatshadanga ukuthi enze imisebenzi eqakathekileyo. (Flp. 2:19-22) Kuyacaca-ke ukuthi akuqondanga ukucabanga ukuthi ukutshada loba ukungatshadi yikho okwenza umzalwane afanele ukwenza umsebenzi othile kumbe angafaneli. (1 Khor. 7:32-35, 38) UJesu loPhawuli kabazange bafundise ukuthi amaKhristu kumele atshade kumbe ahlale engatshadanga. Pho sithini ngendaba yokutshada lokungatshadi? INqabayokulinda ka-October 1 2012 yayichasisa kuhle indaba le yathi: ‘Ukutshada lokungatshadi yizipho ezivela kuNkulunkulu. UJehova kaboni ukungatshadi njengento eyangisayo kumbe edanisayo.’ Yikho kumele sihloniphe abafowethu labodadewethu abangatshadanga abasebandleni. w20.08 28 ¶8-9

Kwamanye amazwe abantu abanengi bayalalela nxa sibatshela izindaba ezinhle zoMbuso ngoba yizo kanye abayabe befuna ukuzizwa. Kodwa kwamanye abantu abalandaba loNkulunkulu langalokho okutshiwo liBhayibhili. Lapho ohlala khona ke? Kungelani lokuthi bayalalela kumbe kabalaleli uJehova ukhangelele ukuthi siqhubeke sitshumayela aze athi sekwanele. UJehova uselibekile ilanga lapho umsebenzi wokutshumayela ozakuma khona, ngemva kwalokho ‘kuzafika ukuphela.’ (Mat. 24:14) UJesu watshela abafundi bakhe ngezinto ezazizakwenzakala ngezinsuku zokucina ezazingabangela ukuthi bacine bengasawuqakathekisi kakhulu umsebenzi wokutshumayela. Yikho wabatshela ukuthi ‘bahlale belindile.’ (Mat. 24:42) Ngensuku zikaNowa kulezinto ezinengi ezazibangela abantu ukuthi bangalaleli isixwayiso sakhe. Izinto lezo zingasiphambanisa lathi. (Mat. 24:37-39; 2 Phet. 2:5) Ngakho sifuna ukuhlala siqakathekisa umsebenzi uJehova asinike wona ukwedlula loba yini. w20.09 8 ¶1-2, 4

USathane ‘uthukuthele kakhulu’ futhi siyabe siziqila nxa sizitshela ukuthi singayibalekela intukuthelo yakhe. (Isam. 12:12) Esikhathini esizayo sonke sizahlangana lobunzima obuzanyikinya ukholo lwethu. Sekuseduze ukuthi kube “lokuhlupheka okukhulu okungakaze kube khona kusukela ekuqaleni komhlaba kuze kube khathesi.” (Mat. 24:21) Ngalesosikhathi abangakithi bangasihlamukela futhi umsebenzi wethu ungavinjelwa. (Mat. 10:35, 36) Ngamunye wethu uzalingisela iNkosi u-Asa yini athembele kuJehova ukuthi uzamncedisa futhi amvikele? (2 ImiLan. 14:11) UJehova ubesincedisa ukuthi siqinise ukholo lwethu. Usebenzisa ‘inceku ethembekileyo lehlakaniphileyo’ ukuthi ‘isinike ukudla ngesikhathi esifaneleyo’ okuzasinceda ukuthi sihlale siqinile ekukhonzeni. (Mat. 24:45) Kodwa ngamunye wethu kumele asebenze nzima ukuze abe lokholo oluqinileyo kuJehova.—Heb. 10:38, 39. w20.09 18 ¶16-18

UJehova angasebenzisa umoya wakhe ongcwele ukuze abantu abasezikhundleni benze lokho akufunayo. Abantu bangagebha umgelo ukuze baphambule amanzi agelezele lapho abafuna khona. UJehova laye angasebenzisa umoya wakhe ukutshintsha indlela ababusi abacabanga ngayo ukuze benze intando yakhe. Nxa angakwenza lokho, abasezikhundleni bazazimisela ukwenza izinqumo ezinceda abantu bakhe. (Khangela u-Ezra 7:21, 25, 26) Kuyini esingakwenza? Singathandazela ‘amakhosi labo bonke abasezikhundleni eziphezulu’ nxa kumele benze izinqumo eziphathelane lokukhonza kwethu. (1 Tim. 2:1, 2; Neh. 1:11) Kumele silingisele amaKhristu akuqala ngokubathandazela ngenhliziyo yonke abafowethu labodadewethu abasemajele.—ImiSeb. 12:5; Heb. 13:3. w20.11 15 ¶13-14

Nxa kunguwe ofundise umfundi omutsha kumele ukuthi uyathokoza kakhulu ukumbona ebhabhathizwa. (1 Thes. 2:19, 20) Abafundi abasanda kubhabhathizwa ‘bazincwadi zokuncoma’ ibandla lonke hatshi labo abafunde labo kuphela. (2 Khor. 3:1-3) Kuyathokozisa ukuthi okweminyaka emine bekubikwa izifundo zeBhayibhili ezingaba ngu-10 000 000 inyanga ngayinye emhlabeni wonke. Kanti njalo eminyakeni leyo abantu abangaba ngu-280000 bebebhabhathizwa umnyaka ngamunye besiba ngoFakazi bakaJehova labafundi abatsha bakaJesu Khristu. Singawancedisa njani amamiliyoni abantu afunda iBhayibhili ukuthi lawo abhabhathizwe? Kumele senze konke okusemandleni ethu ukuthi siwancedise athuthuke aze abhabhathizwe ngoba uJehova ulokhu enika abantu ithuba lokuthi babe ngoFakazi bakhe. Phela isikhathi sesidliwe ngumangoye!—1 Khor. 7:29a; 1 Phet. 4:7. w20.10 6 ¶1-2

INkosi uSawuli kayizange ilalele uJehova. Kanti njalo ngesikhathi umphrofethi uSamuyeli emtshela uSawuli ngokungalaleli kwakhe, kazange avume ukuthi uphambanisile. Wazama ukucatsha ngomunwe esithi ayekwenzile akukubi kangako futhi wesulela icala kwabanye. (1 Sam. 15:13-24) USawuli wayengaqalisi ukwenza njalo. (1 Sam. 13:10-14) Kuyadanisa ukuthi wavumela inhliziyo yakhe ukuthi izigqaje. Kazange atshintshe indlela ayecabanga ngayo futhi uJehova wamsola wasemlahla. Kasifuni ukuba njengoSawuli yikho kumele sizibuze imibuzo le: ‘Ngiyadinga yini izizatho zokungalaleli iseluleko engisibala eLizwini likaNkulunkulu? Ngicabanga ukuthi engikwenzayo akukubi kangako yini? Nxa ngenze iphutha, ngesulela icala kwabanye yini?’ Nxa ukhona umbuzo esiwuphendule ngo-ye, kumele silungisise indlela esicabanga ngayo. Singayekela ukulungisisa singazigqaja futhi lokhu kungenza uJehova asilahle singasabi ngabangane bakhe. w20.11 20 ¶4-5

Bantwana kumele likhethe ukuthi lizakhonza bani. Kumele umazi kuhle uJehova, uyazi intando yakhe njalo uyenze. (Rom. 12:2) Ungenza njalo, uzakwenza isinqumo esiqakatheke kulazo zonke sokukhonza uJehova. (Josh. 24:15) Nxa ungabala iBhayibhili nsuku zonke futhi ulitaditshe, uzamthanda kakhulu uJehova njalo ukholo lwakho luzaqina. Qakathekisa ukwenza intando kaJehova ukwedlula loba yini. Umhlaba kaSathane uthembisa ukuthi uzathokoza nxa ungasebenzisa iziphiwo zakho ukuze uqakathekise okufunayo. Kodwa iqiniso yikuthi labo abagijimisa inotho bazigwaza “yonke indawo ngezinhlungu ezinengi.” (1 Tim. 6:9, 10) Nxa ungalalela uJehova uqakathekise ukwenza intando yakhe ukwedlula loba yini uzathokoza njalo “uzaphumelela.”—Josh. 1:8. w20.10 30-31 ¶17-18

Ngesikhathi samaKhristu akuqala, uJesu wayetshumayela umlayezo owawunika bonke abantu ithemba. Watshela abalandeli bakhe ukuthi baqhubeke ngomsebenzi ayewuqalisile, bafakaze “kuze kuyefika emaphethelweni omhlaba.” (ImiSeb. 1:8) Kodwa babengeke bawenze ngamandla abo umsebenzi lo. UJesu wayebathembise ukuthi uzabanika “umsizi,” okutsho umoya ongcwele. (Joh. 14:26; Zek. 4:6) Abalandeli bakaJesu bemukela umoya ongcwele ngePhentekhosti ka-33 C.E. Umoya lo wabancedisa ukuthi bahle batshumayele futhi kungakayi ngaphi izinkulungwane zasezilalele izindaba ezinhle. (ImiSeb. 2:41; 4:4) Bathi sebehlukuluzwa kabazange bayekele ukutshumayela kodwa bacela uJehova ukuthi abancedise. Bathandaza bathi: ‘Nika izinceku zakho amandla okuthi ziqhubeke zikhuluma ilizwi lakho ngesibindi esikhulu.’ Bathe sebethandazile bagcwala umoya ongcwele baqhubeka ‘bekhuluma ilizwi likaNkulunkulu ngesibindi.’—ImiSeb. 4:18-20, 29, 31. w20.10 21 ¶4-5

Kuyini okungenza singathandabuzi ukuthi uJehova wamvusa uJesu? Banengi ababona uJesu esevusiwe basebetshela abanye ngalokho. (1 Khor. 15:5-7) Umphostoli uPhawuli uqala ngokuqamba umphostoli uPhetro (uKhefasi). Abafundi labo bathi uPhetro wambona uJesu esevusiwe. (Luk. 24:33, 34) Uphinda athi ‘abaliTshumi Lambili’ okutsho abaphostoli labo bambona esevusiwe. Ngemva kwalokho “wabonakala kubafowethu abedlula 500 ngasikhathi sinye.” Kungenzakala kwakusemhlanganweni owawuseGalile okukhulunywa ngawo kuMathewu 28:16-20. UJesu ‘wabonakala lakuJakhobe,’ umfowabo owayekade engelakholo lokuthi unguMesiya. (Joh. 7:5) Esebone uJesu owayesevusiwe, uJakhobe wayengasathandabuzi ukuthi unguMesiya. Kungenzeka kwakungu-55 C.E., ngesikhathi uPhawuli ebhala incwadi yokuqala eya kwabaseKhorinte. Ngalesosikhathi abanengi ababona uJesu esevusiwe babesaphila, yikho loba ngubani owayengabe ethandabuza ukuthi uJesu wayevusiwe wayengabuza ofakazi abambona ngawabo. w20.12 3 ¶5, 7-8

Kungaba nzima ukuthi sicabange izinto ezinhle nxa sigula, ikakhulu nxa sesigule isikhathi eside. Ngakho kumele sivumele uJehova asisekele. Lanxa engeke asisilise ngendlela eyisimanga uyasiduduza futhi uyasinika amandla esiwadingayo ukuze siqinisele. (Hubo. 94:19) Ngokwesibonelo, angasebenzisa abafowethu labodadewethu ukuthi basincedise ngemisebenzi yendlini loba ukuthi bathandaze lathi. Bangasikhumbuza amavesi aduduzayo akhuluma ngomhlaba omutsha oyabe ungela kugula lobuhlungu. (Rom. 15:4) Kodwa singadaniswa yikuthi asisenelisi ukutshumayela ngendlela esifisa ngayo. Udade okuthiwa nguLaurel wahlala iminyaka engu-37 esemtshineni owawumncedisa ukuphefumula. Waphinda wabanjwa imvukuzane, wa-opharethwa kanengi futhi waba lemikhuhlane yesikhumba. Kodwa waqhubeka etshumayela. Wayetshumayeza onesi labanye ababebuya ukuzomnakekela njalo wancedisa abantu abangu-17 ukuthi babe ngoFakazi bakaJehova. w20.12 24 ¶9; 25 ¶12

Kungenzakala ukuthi kwakungumnyaka ka-56 C.E., lapho ixuku lihudulela umphostoli uPhawuli phandle kwethempeli eJerusalema futhi lizama ukumbulala. Ngelanga elilandelayo eselethwe phambi kweSanihedrini izitha zakhe zaphosa zamdabudabula. Yikho uPhawuli wayeludinga sibili uncedo. (ImiSeb. 21:30-32; 22:30; 23:6-10) Ngalesosikhathi kumele ukuthi wayezibuza ukuthi uzenelisa yini ukuqhubeka eqinisela. UJesu wamsiza njani uPhawuli? Ngobusuku obalandela ukubotshwa kukaPhawuli, “iNkosi” uJesu yema eceleni kwakhe yathi: “Woba lesibindi! Njengoba nje ubufakaza ngami ngokugcweleyo eJerusalema, kumele uyefakaza laseRoma.” (ImiSeb. 23:11) Lokhu kwamkhuthaza sibili uPhawuli. UJesu wamncoma ngokufakaza ayekwenze eJerusalema wasemthembisa ukuthi uzafika kuhle eRoma, lapho ayezaphinda afakaze khona. Kumele ukuthi isithembiso leso senza uPhawuli wazizwa evikelekile njengomntwana ophethwe nguyise. w20.11 12 ¶1, 3; 13 ¶4

Ithemba esilalo “liyisikhonkwane semiphefumulo yethu” ngoba lisenza sihlaliseke nxa sisehlelwa yibunzima kumbe nxa sikhathazekile. Cabanga ngekusasa elihle uJehova asithembisa lona. Ngalesosikhathi akula ngitsho lokukodwa okuzasikhathaza. (Isaya. 65:17) Zibone ususemhlabeni omutsha olokuthula, sekungasela zinto ezimbi ezenzakalayo khathesi. (Mik. 4:4) Okunye okuzakwenza ukuthi ithemba lakho lihlale livutha yikutshela abanye ngalo. Tshiseka emsebenzini wokutshumayela lokwenza abafundi. Ungenza njalo, kawusoze ‘ulithandabuze lakancane ithemba lakho kuze kube sekucineni.’ (Heb. 6:11) Zinengi izinto ezizabangela ukuthi sikhathazeke njengoba ukuphela komumo lo sekuseduze. Sizathemba uJehova ukuthi asincedise silwisane lenhlupho lezo njalo siqhubeke sihlalisekile. Kasitshengiseni ukuthi siyasikholwa isithembiso sikaJehova esithi: “Amandla enu asekuthuleni lekwethembeni.”—Isaya. 30:15. w21.01 7 ¶17-18

U-Eksodusi 34:6 uphinda asitshele ngesihawu, obunye ubuntu bukaJehova obenza sifune ukuba ngabangane bakhe. (Jak. 5:11) Enye indlela uJehova atshengisa ngayo ukuthi ulesihawu yikusithethelela nxa siphambanisile. (Hubo. 51:1) Kodwa ukuba lesihawu akupheleli lapho. IBhayibhili liveza ukuthi umuntu olesihawu ngothi nxa engabona omunye esebunzimeni amzwele abesezimisela ukumnceda. Indlela uJehova azimisele ngayo ukusinceda yedlula indlela umama azimisele ngayo ukunceda umntanakhe. (Isaya. 49:15) Isihawu sakhe simfuqa ukuthi asincede nxa sisebunzimeni. (Hubo. 37:39; 1 Khor. 10:13) Lathi singatshengisa abafowethu labodadewethu isihawu ngokubaxolela langokungababambeli isikhwili nxa besicaphulile. (Efe. 4:32) Kodwa enye indlela eqakathekileyo esingabatshengisa ngayo isihawu yikubancedisa nxa besebunzimeni. Nxa sisenza njalo, siyabe silingisela uJehova olothando ukwedlula loba ngubani.—Efe. 5:1. w21.01 21 ¶5

Inhloko yemuli kumele inakekele imuli yayo ngezinto ezidingayo. Kodwa akumelanga iphilele ukusebenza ngoba lokho kungenza iswele isikhathi sokuba lemuli yayo lesokuyincedisa ukuthi iqine ekukhonzeni. Kumele iyifundise njalo iyiqondise. UJehova uyasifundisa njalo asiqondise ngenxa yokuthi ufuna ukusinceda. (Heb. 12:7-9) NjengoYise, uJesu ufundisa njalo aqondise abalandeli bakhe ngendlela elothando. (Joh. 15:14, 15) Kagudli iguma nxa enika iseluleko kodwa ukwenza ngendlela elomusa. (Mat. 20:24-28) Uyazwisisa ukuthi silesono lokuthi siyaphambanisa kanengi. (Mat. 26:41) Inhloko yemuli elingisela uJehova loJesu iyakhumbula ukuthi umkayo labantwabayo bayaphambanisa. ‘Kayibathukutheleli kakhulu.’ (Kol. 3:19, amabala angaphansi) Kodwa yenza lokho okukuGalathiya 6:1, izama ukubaqondisa “ngomoya omnene” ikhumbula ukuthi layo iyaphambanisa. Iyananzelela ukuthi indlela engcono kakhulu yokubafundisa yikubabekela isibonelo esihle njengoJesu. w21.02 6-7 ¶16-18

UJehova wasebenzisa igazi leNdodana yakhe ukuze athenge umuntu ngamunye osebandleni laloba ngubani ozakuba lokholo kuyo. (Mak. 10:45; imiSeb. 20:28; 1 Khor. 15:21, 22) Yikho kuqondile ukuthi wabeka uJesu ukuthi abe yinhloko yebandla ngoba wanikela ngokuphila kwakhe ngenxa yethu. Lokhu kwenza abe lelungelo lokufakela umuntu ngamunye, izimuli lebandla imithetho lokuba leqiniso lokuthi iyalandelwa. (Gal. 6:2) UJesu kasifakeli imithetho nje kuphela kodwa uyasinakekela futhi uyasithanda. (Efe. 5:29) Odadewethu batshengisa ukuthi bayamhlonipha uKhristu ngokulandela lokho abakutshelwa ngamadoda awabeke ukuthi abanakekele. Abafowethu batshengisa ukuthi bayabuzwisisa ubunhloko ngokuhlonipha odadewethu. Nxa sonke ebandleni, sizwisisa futhi sihlonipha ubunhloko, kuzaba lokuthula ebandleni. Kodwa okuqakatheke kakhulu yikuthi sizadumisa uJehova uBaba wethu osezulwini osithandayo. w21.02 18-19 ¶14-17

Ngesikhathi esendaweni yamaFilisti ecatshele iNkosi uSawuli uDavida wasuka lamadoda ayelawo batshiya izimuli zabo baya empini. Ngalesosikhathi isitha safika sahlasela imizi yabo sathumba lezimuli zabo. UDavida kazange azitshele ukuthi njengoba wayeliqhawe lamaqhawe wayengeluka icebo elihle lokukhulula izimuli zabo. Kodwa wacela uJehova ukuthi amkhokhele. Wasembuza esithi: “Ngililandele yini lelixuku elihlaselayo?” UJehova wamtshela ukuthi alilandele wasemqinisekisa ukuthi uzaphumelela. (1 Sam. 30:7-10) Bafowethu abasakhulayo lifundani endabeni le? Cela abanye bakucebise ungakenzi izinqumo. Xoxa labazali bakho. Abadala labo bangakunika amacebo amahle. UJehova uyawathemba amadoda la awabekileyo njalo lawe kumele uwathembe. Uwabona ‘eyizipho’ emabandleni. (Efe. 4:8) Uzakwenza izinqumo ezinhle nxa ungalingisela ukholo lwawo njalo ulandele amacebo amahle akunika wona. w21.03 4-5 ¶10-11

UJesu wathi nxa singakusebenzisi lokho esikubalayo sifanana lendoda eyakha indlu yayo etshebetshebeni. Isebenza ilume owangaphansi kodwa isebenzela ize ngoba kungaba lesiphepho lesikhukhula, kuyayitshaya indlu yayo ithi wohlo phansi yonke ibhidlike. (Mat. 7:24-27) Lathi nxa singakusebenzisi esikubalayo, siyabe sisebenzele idonki efileyo. Nxa singaba phakathi kwenhlupho kumbe sihlukuluzwe, ukholo lwethu luzaxega. Kodwa singataditsha njalo sikusebenzise lokho esikubalayo, sizakwenza izinqumo ezinhle, sibe lokuthula futhi ukholo lwethu luqine. (Isaya. 48:17, 18) Kufanele sihlale sithandaza futhi sitaditsha iLizwi likaNkulunkulu ukuze sihlale siqotho kuye nxa siphakathi kobunzima. Kumele sikhumbule lokuthi okuqakatheke kakhulu esingakwenza yikukhazimulisa uJehova. Nxa singakwenza konke lokhu sizaqiniseka njengoPhawuli ukuthi uJehova kasoze asitshiye lokuthi kakulalutho umuntu angalwenza olungasehlukanisa lothando lwakhe.—Heb. 13:5, 6. w21.03 15 ¶6; 18 ¶20