January

UJesu watshengisa isibindi ngokusola abakhokheli benkolo ngoba babengafundisi abantu ukukhonza uNkulunkulu ngendlela eqondileyo. Ngokwesibonelo, waveza ukuthi abaFarisi bangabazenzisi ngoba babeqakathekisa indlela izandla ezigezwa ngayo kulokunakekela abazali. (Mat. 15:1-11) UJesu kazange ayekele ukukhuluma iqiniso lanxa abakhokheli benkolo babemzondele ngezinto ayezikhulumile. UJesu waphinda wachaya egcekeni imfundiso zamanga. Kazange athi zonke imfundiso ziyamukeleka kuNkulunkulu. Wathi abantu abanengi babezahamba endleleni ebanzi eyisa ekubhujisweni, besekusithi abalutshwana babe sendleleni encinyane eyisa ekuphileni. (Mat. 7:13, 14) Wakwenza kwacaca ukuthi abanye babezenza angani bayamkhonza uNkulunkulu kodwa bona bengamkhonzi. Waxwayisa wathi: “Qaphelani abaphrofethi bamanga abeza kini bezigqokise isikhumba semvu kodwa ngaphakathi bezimpisi ezifuna ukulidlithiza. Lizabazi ngezithelo zabo.”—Mat. 7:15-20. w21.05 9 ¶7-8

UHana wayethethwe ngumLevi okuthiwa ngu-Elikhana owayengamthontisi. Kodwa uElikhana wayelomunye umfazi okuthiwa nguPhenina. U-Elikhana wayethanda kakhulu uHana ukwedlula uPhenina. Lanxa kunjalo, “uPhenina wayelabantwana, kodwa uHana engelabo.” Lokhu kwenza ukuthi uPhenina ‘ahlale emgolomba ukuze amcaphule.’ UHana wezwa ubuhlungu obukhulu. ‘Wayeze akhale njalo ehluleke lokudla.’ Kodwa iBhayibhili kalitsho ukuthi uHana wake wazama ukuphindisela. Akwenzayo yikuthandaza kuJehova ngenhliziyo yakhe yonke njalo wamthemba ukuthi uzalungisa izinto. (1 Sam. 1:2, 6, 7, 10) Sifundani kuHana? Nxa umuntu engazama ukuncintisana lawe, akulasidingo sokumtshengisa ukuthi wena ungcono kulaye. Zama ukwenza ukuthi kube lokuthula phakathi kwakho lomuntu lowo esikhundleni sokuthi ubuyisele okubi ngokubi. (Rom. 12:17-21) Lanxa engasoze atshintshe, wena uzahlaliseka futhi uthokoze. w21.07 17 ¶13-14

Ubuhwaba babangela ukuthi uJudasi Iskariyothi athengise uJesu. Kodwa kaqalisanga eyisihwaba. (Luk. 6:13, 16) Phela uJesu wayemthemba yikho wayegciniswe ibhokisi lemali. Kodwa ngokuhamba kwesikhathi, uJudasi waqalisa ukutshontsha lanxa wayezwe uJesu exwayisa kanengi ngobuhwaba. (Mak. 7:22, 23; Luk. 11:39) Ubuhwaba bukaJudasi bakhanya kokunye okwenzakala uJesu esezabulawa. UJesu labafundi bakhe kanye loMariya lodadewabo uMatha babenxusiwe emzini kaSimoni owayeke waba lobulephero. Ngesikhathi besidla, uMariya wasukuma wathela ekhanda likaJesu amafutha anukelelayo ayedula okumangalisayo. UJudasi labanye abafundi bacaphuka kakhulu. Abanye abafundi babengabe becabanga ukuthi amafutha lawo angathengiswa imali yakhona ibisisetshenziswa ukuncedisa abayanga. Kodwa uJudasi yena kayisikho ayekucaphukele. “Wayelisela” yikho wayefuna ukutshontsha imali ebhokisini.—Joh. 12:2-6; Mat. 26:6-16; Luk. 22:3-6. w21.06 18 ¶12-13

Uyake ubone angani ulemisebenzi eminengi kakhulu okumele uyenze lokuthi kunzima ukuthi uyenze yonke? Nxa kunjalo uzamzwisisa uPhawuli. Wayekhathazekile, hatshi ngebandla elilodwa kuphela, kodwa “ngawo wonke amabandla.” (2 Khor. 11:23-28) Ulomkhuhlane ophila lawo yini okuqedela intokozo? UPhawuli wayethwaliswe nzima ‘ngameva enyameni’ okungenzakala ukuthi kwakuyikugula ayefisa kuphele. (2 Khor. 12:7-10) Uyake udaniswe yini ngamaphutha owenzayo? UPhawuli laye ayeke amdanise. Wathi ‘uyahawula’ ngenxa yokuthi kwakumele ahlale elwisa ukwenza okulungileyo. (Rom. 7:21-24) UPhawuli waqhubeka ekhonza uJehova lanxa wehlelwa yibunzima bonke lobu. Wawathatha ngaphi amandla okwenza njalo? Wayelokholo oluqinileyo enhlawulweni lanxa wayesazi mhlophe ukuthi uyawenza amaphutha. w21.04 22 ¶7-8

Ukona kuka-Adamu, indoda epheleleyo kwabangela ukuthi yena lezizukulwane zakhe bangatholi ukuphila okungapheliyo. U-Adamu wayengeke azame ukuzigeza ngoba wayewone ngabomo. Kodwa izizukulwane zakhe zona ke? Phela zona kazonanga lutho. (Rom. 5:12, 14) U-Adamu kwakumele afe ngenxa yalokho ayekwenzile. Kodwa kukhona yini uJehova ayengakwenza ukuze izizukulwane zika-Adamu ziphile kuze kube nini lanini? Ye. Ngemva kokona kuka-Adamu, uJehova wahle waqalisa ukuveza indlela ayezakhulula ngayo abantu esonweni lasekufeni. (Gen. 3:15) Inhlawulo yenza senelise ukuba ngabangane bakaJehova abaseduze lanxa silesono. Izakwenza ukuthi imisebenzi kaDeveli ibhidlike. (1 Joh. 3:8) Izakwenza lokuthi inhloso kaNkulunkulu ngomhlaba igcwaliseke. Umhlaba wonke uzakuba lipharadayisi. w21.04 14 ¶1; 19 ¶17

Ixuku elikhulu lamadoda labesifazana elalivela emazweni amanengi futhi likhuluma indimi ezitshiyeneyo lalibuthene eJerusalema njalo kwenzakala isimanga ngelanga lelo. Amanye amaJuda aqalisa ukukhuluma indimi zexuku lelo. Lokhu kwalimangalisa kodwa okwalimangalisa kakhulu yilokho amaJuda la lomphostoli uPhetro abakutshoyo kulo. Latshelwa ukuthi lingasindiswa nxa lingatshengisa ukuthi lilokholo kuJesu Khristu. Amazwi la athophela ezinhliziyweni zalo okokuthi labuza lathi: “Kumele senzeni?” UPhetro waliphendula wathi: ‘Ngamunye wenu kabhabhathizwe.’ (ImiSeb. 2:37, 38) Okwenzakala ngemva kwalokhu kwakumangalisa. Kwabhabhathizwa abantu abangaba ngu-3 000 baba ngabafundi bakaKhristu. Lokhu kwakuyikuqala komsebenzi omkhulu wokwenza abafundi uJesu ayetshele abalandeli bakhe ukuthi bawenze. Umsebenzi lo ulokhu usenziwa lalamuhla. w21.06 2 ¶1-2

Singabe sitshumayela endaweni okunzima ukuthola izifundo zeBhayibhili. Abantu bangabe bengafuni ukusilalela kumbe besiphikisa. Kuyini okungasinceda sibe lethemba lokuthi ngelinye ilanga bazalalela? Yikukhumbula ukuthi emhlabeni lo omi manzonzo, impilo zabantu zingaphongutshintsha. Labo ababengalaleli bangacina sebenanzelela ukuthi kumele bakhokhelwe nguNkulunkulu. (Mat. 5:3) Abanye ababengafuni ukuthatha amabhuku ethu bacina sebevuma ukufunda iBhayibhili. Siyakwazi lokuthi uJehova uyiNkosi yokuvuna. (Mat. 9:38) Ufuna siqhubeke sihlanyela futhi sithelela kodwa nguye okhulisayo. Kanti njalo kuyasikhuthaza ukukhumbula ukuthi lanxa kungelasifundo seBhayibhili esisiqhubayo khathesi, uJehova usinika umvuzo ngenxa yokuthi sisebenze nzima, hatshi ngenxa yokuthi sihambise amabhuku amanengi kumbe ukuthi siqhuba izifundo zeBhayibhili. w21.07 6 ¶14

UJehova unike abantu isibusiso sokuba labantwana kanye lomsebenzi wokubafundisa ukuthi bamthande futhi bamkhonze. Lanxa uJehova ezibusise kakhulu izingilosi, kaziphanga isibusiso sokuba labantwana. Yikho nxa ungumzali kumele usiqakathekise isibusiso olaso sokukhulisa abantwana. Abazali baphiwe umsebenzi oqakathekileyo wokukhulisa abantwababo “ngokulaya langokuxwayisa okuvela kuJehova.” (Efe. 6:4; Dute. 6:5-7) Inhlanganiso kaNkulunkulu inceda abazali ngokubanika izinto ezinengi ezisekelwe eBhayibhilini ezinjengamabhuku, amavidiyo, izingoma lezihloko ezitholakala kuwebhusayithi. Kusegcekeni ukuthi uBaba wethu osezulwini leNdodana yakhe bayabathanda abantwana. (Luk. 18:15-17) UJehova uyathokoza nxa abazali bethembela kuye futhi besenza konke abangakwenza ukuze bondle abantwababo abaligugu. Abazali abenza lokhu banceda labantwababo ukuthi babe lethemba lokuba ngamalunga emuli kaJehova kuze kube nini lanini. w21.08 5 ¶9

Abanye abantu bacabanga ukuthi ukuba lokholo kutsho ukuqiniseka ngento ongelabufakazi ngayo. Kodwa iBhayibhili lithi lolo kayisilokholo lweqiniso. Liveza ukuthi ukuba lokholo kutsho ukuqiniseka ngento olobufakazi ngayo. Ngakho lanxa singamboni uJehova loJesu silobufakazi obusuthisayo bokuthi bakhona sibili. Kanti njalo silobufakazi obusuthisayo bokuthi uMbuso osezulwini ukhona sibili lanxa singawuboni. (Heb. 11:3) Omunye owezesayensi owaba nguFakazi uthi: “Silobufakazi balokho esikukholwayo futhi siyavumelana leqiniso elitshiwo yisayensi.” Nxa kulobufakazi obusuthisayo bokuthi uNkulunkulu nguye owadala zonke izinto, kungani abantu abanengi bengakukholwa lokho? Abanye abakaze bahlole lobobufakazi. URobert osenguFakazi kaJehova uthi: “Esikolo akuzange kuke kukhulunywe ngokuthi izinto zadalwa yikho ngazitshela ukuthi akulanto enjalo. Kodwa ngathi sengileminyaka engu-22 ngezwa ubufakazi obulengqondo njalo obusuthisayo obuseBhayibhilini bokuthi izinto zadalwa.” w21.08 15 ¶4-5

Singafunda ngobuhle bukaJehova ngokubala iBhayibhili langokuzwa abanye bekhuluma ngezibusiso abazinikiweyo. Kodwa ukuze sizwisise kuhle ukuthi uJehova muhle kangakanani, kumele ‘sizinambithele. Ngokwesibonelo, ake sithi ufuna ukuba senkonzweni yesikhathi sonke. Kodwa ukuze ukwenze lokho kumele utshiye ezinye izinto. Siyasazi isithembiso sikaJesu sokuthi nxa singafuna kuqala uMbuso, uJehova uzasinika esikudingayo. Lanxa kunjalo kawukaze usibone sigcwaliseka kuwe. (Mat. 6:33) Kodwa ngenxa yokuthi uyasikholwa isithembiso sikaJesu, uyazama ukuphungula izindleko, unciphise isikhathi osiqeda emsebenzini wokuziphilisa njalo wenze konke okusemandleni akho emsebenzini wokutshumayela. Nxa usenza njalo, uyazibonela sibili ukuthi uJehova uyakunika lokho okudingayo. Uyabe ‘usuzinambithela’ ubuhle bakhe. w21.08 26 ¶2

Into efananayo iyenzakala yini lamuhla? Ye. Abafundisi abanengi bayathokoza nxa abantu abadumileyo, abanothileyo labahlakaniphileyo ngokubona kwabantu bomhlaba lo bebuya emasontweni abo. Bayabamukela lanxa beziphatha ngendlela ezondwa nguNkulunkulu. Kodwa babakhangelela phansi abantu bakaJehova abatshisekayo futhi abaziphatha kuhle ngenxa yokuthi kabadumanga ngokubona kwabantu bomhlaba lo. UNkulunkulu ukhetha labo ‘abakhangelelwa phansi’ njengoba nje uPhawuli watsho. (1 Khor. 1:26-29) Lanxa kunjalo, uJehova uyabaqakathekisa bonke abantu bakhe abathembekileyo. Singenzani ukuze singathatheki ngendlela abantu bomhlaba lo abacabanga ngayo? (Mat. 11:25, 26) Ungavumeli indlela ababona ngayo abantu bakaNkulunkulu ikuphambanise. Khumbula ukuthi uJehova usebenzisa abantu abathobekileyo ukuthi benze intando yakhe. (Hubo. 138:6) Kanti njalo cabanga ngezinto asezenzile esebenzisa abantu umhlaba obabona bengahlakaniphanga kumbe bengafundanga. w21.05 8 ¶1; 9 ¶5-6

Umphostoli uPhawuli wayebonga abazalwane ngoncedo ababemnika lona. Wathobeka wavuma ukuncediswa ngabafowabo labodadewabo. (Flp. 2:19-22) Lina eselikhulile lingatshengisa ngendlela ezitshiyeneyo ukuthi liyabonga ngalokho elikwenzelwa ngabasesebatsha abasemabandleni enu. Vumani nxa befuna ukulincedisa ngokulithwala ngemota, ngokulithengela izinto kumbe ngokulincedisa ngokunye elikudingayo. Khumbulani ukuthi lokho abalenzela khona ngeyinye indlela uJehova atshengisa ngayo ukuthi uyalithanda. Lingacina selingabangane abaseduze kakhulu lalabo abalincedisayo. Hlalani lizama ukuncedisa abangane benu abasesebatsha ukuthi basondele kuJehova. Batsheleni ukuthi kulithokozisa kangakanani ukubabona besenza okunengi ebandleni. Zinikeni isikhathi sokuba labo njalo libaxoxele lokho elihlangane lakho empilweni. Nxa lingenza njalo liyabe litshengisa uJehova “ukuthi lingabantu ababongayo” ngenxa yabatsha abadonsele ebandleni.—Kol. 3:15; Joh. 6:44; 1 Thes. 5:18. w21.09 11-12 ¶12-13

UJehova uyabathanda abafowethu labodadewethu. Kodwa kwezinye izikhathi kungaba nzima kithi ukuthi sibathande njalo sikutshengise lokho. Phela silamasiko angafananiyo futhi sakhuliswa ngendlela ezitshiyeneyo. Kanti njalo sonke siyawenza amaphutha angacaphula njalo adanise abanye. Lanxa kunjalo, singazama ukwenza konke okusemandleni ethu ukuthi kube lothando emulini yabantu bakaJehova. Singakwenza njani lokhu? Ngokulingisela uBaba wethu, sitshengise ukuthi siyabathanda abafowethu labodadewethu. (Efe. 5:1, 2; 1 Joh. 4:19) Umuntu olozwelo uyadinga izindlela zokuthi ancedise abanye futhi abaduduze. Indlela uJesu ayephatha ngayo abantu itshengisa uzwelo lukaJehova. (Joh. 5:19) Wathi ebona ixuku labantu ‘walizwela usizi ngoba lalihlukuluzekile futhi lilahlelwe iganga njengezimvu ezingelamelusi.’ (Mat. 9:36) UJesu wayengabazweli kuphela abantu kodwa wayesenza okuthile ukuze abancede. Welapha abagulayo njalo waphumuza labo ‘ababekhathele njalo besindwa.’—Mat. 11:28-30; 14:14. w21.09 22 ¶10-11

UJehova uyakuthanda ukutshengisa isihawu. Umphostoli uPhawuli wabhala wathi uNkulunkulu “ulesihawu esikhulu.” Ngesikhathi uPhawuli ebhala amazwi lawa wayekhuluma ngesihawu uNkulunkulu ayesitshengise izinceku zakhe ezigcotshiweyo ngokuzinika ithemba lokuyaphila ezulwini lanxa zilesono. (Efe. 2:4-7) Kodwa uJehova katshengisi ukuthi ulesihawu ezincekwini zakhe ezigcotshiweyo kuphela. Umhubi uDavida wabhala wathi: “UJehova ulungile kubo bonke; ulesihawu kukho konke akwenzayo.” (Hubo. 145:9) UJehova uyabathanda abantu, yikho ehlala ebaphatha ngendlela etshengisa ukuthi ulesihawu nxa ebona kulesizatho sokwenza njalo. Akulamuntu okuzwisisa njengoJesu ukuthi uJehova ukuthanda kangakanani ukutshengisa ukuthi ulesihawu. Phela uJehova loJesu babebonke ezulwini okwesikhathi eside uJesu engakabuyi emhlabeni. (Zaga. 8:30, 31) Izikhathi ezinengi uJesu wabona uYise esiba lesihawu ebantwini abalesono. (Hubo. 78:37-42) Ngesikhathi efundisa wakhuluma kanengi ngesihawu sikaYise. w21.10 8-9 ¶4-5

UJehova ngokwakhe wawuphendula umthandazo lo ngelizwi elikhulu livela ezulwini ethembisa ukuthi uzalikhazimulisa ibizo lakhe. Ngesikhathi esenza inkonzo yakhe, uJesu walikhazimulisa ibizo likaYise. (Joh. 17:26) Yikho amaKhristu eqiniso ekubona kuyisibusiso ukusebenzisa ibizo likaNkulunkulu lokutshela abanye ngalo. Ngesikhathi sabaphostoli kusanda kubunjwa ibandla lamaKhristu, uJehova ‘wanaka abezizweni ukuze athathe abantu bebizo lakhe phakathi kwabo.’ (ImiSeb. 15:14) AmaKhristu la ayekuthanda ukusebenzisa ibizo likaNkulunkulu lokutshela abantu ngalo. Ayelisebenzisa kanenginengi nxa etshumayela lalapho ebhala amabhuku eBhayibhili. Ngokwenza njalo, atshengisa ukuthi ayalihlonipha ibizo likaNkulunkulu. (ImiSeb. 2:14, 21) LaboFakazi bakaJehova lamuhla batshengisa ukuthi bayalihlonipha ibizo likaNkulunkulu. w21.10 20-21 ¶8-10

Uthando lukaNkulunkulu oluqotho luzahlala kuze kube nini lanini. Ku-Nguqulo Yomhlaba Omutsha YeMibhalo Engcwele umutsho lo utholakala izikhathi ezingu-26 kuHubo 136. Ivesi yokuqala ithi: “Mbongeni uJehova ngoba muhle, uthando lwakhe oluqotho luzahlala kuze kube nini lanini.” (Hubo. 136:1, NWT) Kusukela kuvesi 2 kusiya ku-26, kuphindwa umutsho othi “ngoba uthando lwakhe oluqotho luzahlala kuze kube nini lanini.” Nxa sibala amavesi lawo sisala simangaliswe zindlela ezinengi uJehova atshengisa ngazo uthando oluqotho kokuphela. Ukuphindwaphindwa komutsho othi “ngoba uthando lwakhe oluqotho luzahlala kuze kube nini lanini” kwenza singathandabuzi ukuthi indlela uNkulunkulu athanda ngayo abantu bakhe ayitshintshi. Kuyasikhuthaza sibili ukuthi uJehova kazilahli izinceku zakhe loba sekutheni! Uyanamathela kulabo abamkhonzayo njalo kabatshiyi, ikakhulu nxa besebunzimeni. Ukwazi ukuthi uJehova kasitshiyi kusinika intokozo lamandla esiwadingayo ukuze siqinisele nxa sisebunzimeni futhi siqhubeke sihamba endleleni eya ekuphileni.—Hubo. 31:7, NWT. w21.11 4 ¶9-10

Uyake ukhathazeke yini nxa ucabanga ngezinto esezizakwenzakala, njengokubhujiswa kwenkolo yamanga, ukuhlasela kukaGogi waseMagogi kanye lempi ye-Amagedoni? Uyake uzibuze yini ukuthi uzahlala uthembekile zize zidlule izehlakalo lezi ezesabekayo? Nxa kunjalo, amazwi kaJesu asembhalweni walamuhla azakunceda sibili. UJesu watshela abafundi bakhe, wathi: “Izinhliziyo zenu kazingakhathazeki. Tshengisani ukuthi lilokholo.” Ukholo oluqinileyo luzasinceda sibe lesibindi kungelani lokuthi kwenzakalani esikhathini esizayo. Nxa singacabangisisa ngokuthi sijayele ukwenzani nxa sihlangana lezilingo ezingaxegisa ukholo lwethu sizakwazi okumele sikwenze ukuze siluqinise. Sizananzelela lapho ukholo lwethu oluxega khona besesilungisisa. Sonke isikhathi nxa sinqoba isilingo, ukholo lwethu luyaqina. Lokhu kuzasinceda ukuthi siqinisele nxa sesihlangana lezilingo esikhathini esizayo. w21.11 20 ¶1-2

Umphostoli uPhawuli wakhuthaza uThimothi ukuthi ayenze ngokupheleleyo inkonzo yakhe futhi lokho amtshela khona kuyasebenza lakithi. (2 Tim. 4:5) Kodwa ngezinye izikhathi akulula ukukwenza lokhu. Ngokwesibonelo, cabanga ngabazalwane abahlala emazweni lapho eminye imisebenzi yethu engavunyelwa khona kumbe evinjelwe ngokupheleleyo. Abantu bakaJehova balenhlupho ezinengi ezingabenza badane. Ngokwesibonelo, abanye basebenza amahola amanengi ukuze banakekele izimuli zabo ngalokho ezikudingayo. Bayafuna ukwenza okunengi ekutshumayeleni, kodwa ekupheleni kweviki bayabe bediniwe. Abanye abenelisi ukwenza okunengi ngenxa yemikhuhlane abaphila layo kumbe ukuguga. Abanye bangabe bengenelisi lokuphuma endlini. Abanye bona bazibona bengaqakathekanga kuJehova. UJehova angasinika amandla okuthi senze konke esingakwenza ekukhonzeni kungelani lenhlupho esihlangana lazo. w21.05 20 ¶1-3

Kwezinye izikhathi abanye abantu bangazama ukusibamba ngamandla ukuthi senze izinto ezingasiphambanisa ekukhonzeni. Nxa sekunjalo, kuyabe sekumele sikhethe ukuthi sizakwenzani. Cabanga ngesimiso esikuLevi 19:19. Amanye amazwi asevesini le athi: “Lingavunuli izigqoko ezenziwe ngemihlobo yamalembu amabili atshiyeneyo.” Umthetho lo wawunceda ama-Israyeli ukuthi angafanani lezizwe ezazingomakhelwane. Lamuhla asisekho ngaphansi koMthetho kaMosi yikho akukubi ukuthi umKhristu agqoke izigqoko ezenziwe ngezinto ezitshiyeneyo njengewulu ehlanganiswe le-cotton, kumbe i-nylon ehlanganiswe le-polyester. Kodwa asifuni ukufanana labantu abakholwa kumbe abenza izinto ezingavumelani lalokho okutshiwo liBhayibhili. Siyazithanda izihlobo zethu labomakhelwane kodwa indlela esikhetha ukuphila ngayo kumele itshengise ukuthi silalela uJehova lanxa lokhu kusenza singafanani labanye abantu. Lokhu kuqakathekile nxa sifuna ukuba ngcwele.—2 Khor. 6:14-16; 1 Phet. 4:3, 4. w21.12 5 ¶14; 6 ¶16

Indlela eya ekuphileni iyatholakala. UJesu wathi: “Nxa lingahlala liselizwini lami, liyabe lingabafundi bami sibili, futhi lizalazi iqiniso, njalo iqiniso lizalikhulula.” (Joh. 8:31, 32) Siyakuncoma ngokuthi awuzange wenze okwenziwa ngabanengi kodwa walidinga iqiniso. Walitaditsha okuzwayo iLizwi likaNkulunkulu ukuze ufunde ngalokho akhangelele ukuthi sikwenze njalo walalela lokho uJesu akufundisayo. Wakufunda ukuthi uJehova kafuni sikholwe lokho okufundiswa enkolweni zamanga lokuthi ufuna siyekele ukunanza imikhosi lamaholideyi okwaqaliswa ngamahedeni. Wafunda lokuthi ukwenza lokho uJehova afuna sikwenze lokutshiya izinto angazithandiyo kungaba nzima. (Mat. 10:34-36) Kungenzeka kwakungalula ukutshintsha indlela owawuphila ngayo kodwa waphikelela ngoba uyamthanda uYihlo osezulwini. Kumele ukuthi uJehova uyazigqaja sibili ngawe!—Zaga. 27:11. w21.12 22 ¶3; 23 ¶5

UMosi wathi esenze iphutha elikhulu wavuma ukuqondiswa. Ngelinye ilanga, wazonda waze wehluleka ukunika uJehova udumo. Lokhu kwabangela ukuthi uJehova angamvumeli ukuthi angene eLizweni Lesithembiso. (Nani. 20:1-13) UMosi wancenga uJehova ukuthi amvumele angene kulelolizwe, kodwa uJehova wathi kuye: “Ungabe usakhuluma kimi futhi ngalindaba.” (Dute. 3:23-27) UMosi kazange amzondele uJehova kodwa wasamukela isinqumo sakhe njalo uJehova waqhubeka emsebenzisa ukuthi akhokhele abako-Israyeli. (Dute. 4:1) UMosi wamukela iseluleko futhi kumele simlingisele. Watshengisa ukuthi uyasamukela iseluleko esivela kuJehova ngokuqhubeka ethembekile lanxa wayengasavunyelwa ukungena eLizweni Lesithembiso okuyinto ayeyilindele ngabomvu. Ukulingisela okwenziwa ngamadoda athembekileyo anjengoMosi kuyasinceda. (Zaga. 4:11-13) Abafowethu labodadewethu abanengi bakwenzile lokhu. w22.02 11 ¶9-10

Ebusika ngo-32 C.E., umngane kaJesu uLazaro wagula wafa. (Joh. 11:3, 14) ULazaro wayelabodadewabo ababili uMariya loMatha futhi uJesu wayeyithanda kakhulu imuli le. UMatha uthe esizwa ukuthi uJesu usendleleni wahle wagijima wayamhlangabeza. Akucabange ukuthi wayedane kangakanani lapho esithi kuJesu: “Nkosi, aluba ubukhona ngabe umfowethu kafanga.” (Joh. 11:21, 32, 33) Okwakhalisa uJesu yikubona indlela uMariya loMatha abathinteka ngayo ngenxa yokufelwa ngumfowabo. Nxa wake wafelwa ngumuntu omthandayo uJehova uyayizwisisa indlela ozwa ngayo. UJesu ‘ungumfanekiso kaYise uqobo.’ (Heb. 1:3) Ukukhala kukaJesu kwatshengisa ukuthi uYise uzwa njani nxa singafelwa ngumuntu esimthandayo. (Joh. 14:9) Nxa ungafelwa ngumuntu omthandayo ungaqiniseka ukuthi uJehova uyabazi ubuhlungu obuzwayo futhi uyakuzwela kakhulu. Uzimisele ukuthoba inhliziyo yakho edabukileyo.—Hubo. 34:18; 147:3. w22.01 15 ¶5-7

Nxa ungazinika isikhathi sokukhuluma loJehova lesokumlalela kanye lesokucabangisisa ngaye, kuzakuhambela kuhle. Okokuqala, uzakwenza izinqumo ezinhle. IBhayibhili lisitshela ukuthi “ohamba lezihlakaniphi uyahlakanipha.” (Zaga. 13:20) Okwesibili, uzafundisa kuhle. Nxa sifunda lomuntu iBhayibhili, inhloso yethu enkulu yikumncedisa ukuthi asondele kuJehova. Nxa singahlala sikhuleka kuJehova futhi sifunda ngaye sizamthanda kakhulu njalo sizenelisa ukuncedisa esifunda laye iBhayibhili ukuthi laye amthande. Lokho yikho okwenziwa nguJesu. Indlela ayekhuluma ngayo ngoYise yanceda abafundi bakhe babona ukuthi uJehova ulomusa futhi ulothando. Lokhu kwenza ukuthi labo bamthande uJehova. (Joh. 17:25, 26) Okwesithathu, ukholo lwakho luzaqina kakhulu. Sonke isikhathi nxa ungacela uNkulunkulu ukuthi akukhokhele, akududuze kumbe akusekele futhi ubone eyiphendula imithandazo yakho, ukholo lwakho luyaqina.—1 Joh. 5:15. w22.01 30 ¶15-17

UJehova usikhuthaza ukuthi sitshiye imicabango lemikhuba emibi ngoba uyasithanda kakhulu futhi ufuna sikukholise ukuphila. (Isaya. 48:17, 18) Uyakwazi ukuthi labo abangalwisani lezifiso ezimbi bayazilimaza bona kanye labanye. Kumzwisa ubuhlungu ukusibona sizilimaza futhi silimaza labanye. Abanye abangane bethu lezihlobo zethu bangasihleka ekuqaliseni nxa besibona sizama ukutshintsha ubuntu bethu. (1 Phet. 4:3, 4) Bangasitshela ukuthi silelungelo lokwenza loba yini esiyifunayo futhi akulamuntu okumele asitshele okokwenza. Kodwa labo abangafuni ukuphila ngemithetho kaJehova abalayo inkululeko ngoba bavumela umhlaba lo obuswa nguSathane ukuthi ubabumbe. (Rom. 12:1, 2) Sonke kumele sikhethe ukuthi sizagcina ubuntu obudala obuhambisana lesono kanye lomhlaba kaSathane kumbe sizavumela uJehova ukuthi asiguqule sibe ngabantu abangcono khathesi.—Isaya. 64:8. w22.03 3 ¶6-7

Nxa singabala iLizwi likaNkulunkulu asisoze sikhathazeke kakhulu ngenhlupho esiphakathi kwazo. Ake sibone ukuthi iBhayibhili lamnceda njani omunye umfelokazi. Umdala webandla othile wamkhuthaza ukuthi abale ibhuku likaJobe ukuze athole izifundo ezizamnceda. Wathi eselibala wayesola uJobe ngendlela engaqondanga ayecabanga ngayo. Engqondweni yakhe wayesithi: “Jobe, ungacabangi ngenhlupho zakho kuphela.” Kodwa laye wananzelela ukuthi indlela ayecabanga ngayo yayinjengekaJobe. Lokhu kwamnceda ukuthi atshintshe futhi kwamnika amandla okuthi alwisane lobuhlungu bokufelwa ngumkakhe. UJehova uphinda asiqinise esebenzisa abafowethu labodadewethu. UPhawuli wathi wayefisa ukuba labafowabo labodadewabo ukuze ‘bakhuthazane.’—Rom. 1:11, 12. w21.05 22 ¶10-11; 24 ¶12

UJehova walaya ama-Israyeli wathi: “Kathathu ngomnyaka, wonke amadoda kumele aziveze phambi kukaJehova uNkulunkulu wenu endaweni azayikhetha.” (Dute. 16:16) Kwakumele atshiye imizi yawo kanye lamasimu awo kungelamuntu owalindileyo. Kodwa uJehova wawathembisa wathi: “Kakho ozahawukela ilizwe lenu ngesikhathi lisiyabonakala phambi kukaJehova uNkulunkulu wenu.” (Eks. 34:24) Ama-Israyeli ayehamba emikhosini yaminyaka yonke ngoba ayemthemba uJehova. Lokhu kwenza athola izibusiso ezinengi ezigoqela ukuzwisisa ngcono uMthetho kaNkulunkulu, ithuba lokucabangisisa ngobuhle bakhe kanye lokukholisa ubudlelwano labanye ababesemikhosini le. Lathi nxa singatshiya ezinye izinto ukuze singene imihlangano yebandla, uJehova uzasibusisa ngendlela efananayo. Kanti njalo kumele ukuthi uyathokoza kakhulu nxa singahamba emihlanganweni yebandla silungiselele izimpendulo ezimfitshane futhi ezizanceda abanye. w22.03 22 ¶9

UJehova wayeqeqetsha uJesu ukuthi awenze kuhle umsebenzi wakhe wokuba nguMphristi Omkhulu eyezawenza esikhathini esizayo. UJesu uyakwazi ukuthi kunzima njani ukulalela uNkulunkulu nxa usebunzimeni obukhulu. Wakhathazeka kakhulu okokuthi wathandaza kuNkulunkulu “ngokukhala okukhulu langezinyembezi” emcela ukuthi amncedise. Njengoba wahlupheka kangaka, uyakwazi esikudingayo futhi ‘uyenelisa ukusinceda nxa silingwa.’ Siyambonga sibili uJehova ngokubeka uMphristi Omkhulu olesihawu ‘osizwelayo ebuthakathakeni bethu.’ (Heb. 2:17; 4:14-16; 5:7-10) UJehova wavumela ukuthi uJesu ahlupheke ukuze kuphendulwe umbuzo lo oqakathekileyo: Abantu bangaqhubeka bethembekile yini kuNkulunkulu nxa besebunzimeni obukhulu? USathane uthi ngeke! Uthi okwenza abantu bakhonze uNkulunkulu yikuthi kukhona abakufunayo kuye njalo kabamthandi. (Jobe. 1:9-11; 2:4, 5) UJesu waqhubeka ethembekile futhi watshengisa ukuthi uSathane ungusomangase. w21.04 16-17 ¶7-8

Umfundi kumele enze lokho okutshiwo liBhayibhili ukuze afanele ukubhabhathizwa. Nxa engakusebenzisa akufundayo uzafanana “lendoda ehlakaniphileyo” uJesu akhuluma ngayo emzekelisweni wakhe eyagebha yatshona ukuze yakhe indlu yayo edwaleni. (Mat. 7:24, 25; Luk. 6:47, 48) Nceda umfundi wakho atshintshe impilo yakhe. (Mak. 10:17-22) UJesu wayekwazi ukuthi kwakuzakuba nzima ukuthi indoda enothileyo ithengise zonke izinto eyayilazo. (Mak. 10:23) Kodwa wayitshela ukuthi ilwenze utshintsho lolu olukhulu ngenxa yokuthi wayeyithanda. Ngezinye izikhathi singayekela ukukhuthaza umfundi ukuthi asebenzise lokho akufundayo ngenxa yokuthi siyabe sizitshela ukuthi kakakulungeli ukwenza utshintsho oluthile. (Kol. 3:9, 10) Kodwa nxa singaxoxa masinyane ngotshintsho okumele alwenze, uzaphangisa ukuqalisa ukulwenza. Nxa sixoxa laye ngalokhu, siyabe sitshengisa ukuthi silendaba laye.—Hubo. 141:5; Zaga. 27:17. w21.06 3 ¶3, 5

Umphostoli uPhetro ukhuluma ngokuthi uJesu wasitshiyela isibonelo ngoba waqinisela ngesikhathi ehlutshwa. Kodwa kulendlela ezinengi esingamlingisela ngazo uJesu. (1 Phet. 2:18-25) Iqiniso yikuthi konke uJesu akutshoyo lakwenzayo kuyisibonelo okumele sisilandele. Kambe singenelisa yini ukulingisela isibonelo sikaJesu njengoba silesono? Ye singenelisa. Phela uPhetro kazange athi silandele amanyathelo kaJesu ngendlela epheleleyo, wathi ‘siwalandele eduze.’ Nxa singenza konke okusemandleni ethu ukuthi silandele amanyathelo kaJesu lanxa silesono, siyabe silalela amazwi omphostoli uJohane athi: ‘Qhubekani lihamba ngendlela uJesu ayehamba ngayo.’ (1 Joh. 2:6) Ukulandela amanyathelo kaJesu kuzasisondeza kuJehova. Kungani sisitsho njalo? UJesu wayephila ngendlela ethokozisa uNkulunkulu. (Joh. 8:29) Yikho nxa singalandela amanyathelo akhe, lathi sizathokozisa uJehova. Kanti njalo kasithandabuzi ukuthi uBaba wethu osezulwini uzasondela kulabo abazama ngamandla ukuthi babe ngabangane bakhe.—Jak. 4:8. w21.04 3 ¶4-6

UJehova uyabona ubuntu bethu obuhle kanye lokuhle esingakwenza futhi usidonsela kuye. Nxa singahlala sithembekile kuye, laye uzahlala eseduze lathi kuze kube nini lanini. (Joh. 6:44) Nxa siqiniseka ukuthi uJehova uyasithanda sizazimisela ukumkhonza ngenhliziyo yonke lanxa sisehlelwa yibunzima. Kodwa nxa sithandabuza ukuthi ulendaba lathi ‘amandla ethu azakuba mancinyane.’ (Zaga. 24:10) Kanti njalo nxa singadana besesicabanga ukuthi uNkulunkulu kasithandi, kasisoze senelise ukumelana loSathane. (Efe. 6:16) Abanye abafowethu labodadewethu sebethandabuza ukuthi uJehova uyabathanda lokuthi ulendaba labo futhi lokhu sekuxegise ukholo lwabo. Kumele senzeni nxa sesifikelwa yimicabango yokuthandabuza ukuthi uJehova uyasithanda? Kumele sihle siyikhiphe ezingqondweni zethu! Cela uJehova akuncedise ukhiphe imicabango ekukhathazayo abesekunika ‘ukuthula kwakhe okuzalinda inhliziyo lengqondo yakho.’ (Hubo. 139:23; Flp. 4:6, 7) Khumbula lokuthi kayisuwe wedwa olemicabango enjalo. w21.04 20 ¶1; 21 ¶4-6

Ungakabi nguFakazi kaJehova waqala wezwa “izindaba ezinhle” ebazalini bakho loba kosebenza laye kumbe kofunda laye, loba kuboFakazi abakuvakatshela ngesikhathi betshumayela. (Mak. 13:10) Ngemva kwalokho kwaba lomuntu owasebenzisa isikhathi esinengi lamandla efunda lawe iBhayibhili. Usufunda waqalisa ukumthanda uJehova njalo wananzelela ukuthi laye uyakuthanda. UJehova wakudonsela eqinisweni futhi khathesi usulethemba lokuphila kuze kube nini lanini njengoba usungumfundi kaJesu Khristu. (Joh. 6:44) Akuthandabuzwa ukuthi uyambonga kakhulu uJehova ngokuthi wasebenzisa omunye umuntu ukuthi akufundise iqiniso lokuthi wakwamukela ukuthi ube ngomunye wezinceku zakhe. Khathesi njengoba sesilazi iqiniso silesibusiso sokuncedisa abanye ukuthi labo bahambe endleleni eya ekuphileni. Kungaba lula ukuthi sitshumayeze abantu endlini ngendlu kodwa kube nzima ukucela ukuthi sifunde labo kumbe ukuqhuba isifundo seBhayibhili. w21.07 2 ¶1-2