February

UJehova ufuna zonke izinceku zakhe zithokoze. Useduze komunye lomunye wethu futhi uyabona nxa sidanile. (Hubo. 145:18, 19) Cabanga ngendlela atshengisa ngayo ukuthi ulendaba lomphrofethi u-Elija. Umphrofethi lo othembekileyo waphila ngesikhathi esinzima ko-Israyeli. Izinceku zikaJehova zazihlukuluzwa ngabantu ababesezikhundleni eziphezulu ko-Israyeli futhi ababefuna ngabomvu ukumbulala ngu-Elija. (1 AmaKho. 19:1, 2) Okunye okwakungabe kukhathaza u-Elija yikucabanga ukuthi nguye yedwa umphrofethi owayesele ekhonza uJehova. (1 AmaKho. 19:10) UJehova kazange apholise amaseko, wahle wathumela ingilosi ukuthi imqinisekise ukuthi wayengayedwa. Manengi ama-Israyeli ayelokhu ethembekile kuJehova. (1 AmaKho. 19:5, 18) UJesu waqinisekisa abafundi bakhe ukuthi babezathola imuli enkulu yabantu abakhonza uJehova. (Mak. 10:29, 30) Kanti njalo uJehova, oyinhloko yemuli le uthembisa ukuthi uzabasekela labo abafuna ukumkhonza.—Hubo. 9:10. w21.06 8-9 ¶3-4

Abanengi kabasamukeli ngenxa yokuthi sisebenzisa iBhayibhili ukutshengisa abantu ukuthi ezinye imfundiso zingamanga. Abakhokheli bamasonto bafundisa ukuthi uNkulunkulu ujezisa abantu abenza izinto ezimbi esihogweni. Basebenzisa imfundiso le ukuze abantu benze intando yabo. Kodwa thina izinceku zikaJehova, uNkulunkulu oluthando sincedisa abantu bazwisise ukuthi imfundiso le ingamanga. Abafundisi baphinda bathi umphefumulo kawufi. Aluba imfundiso le ibiliqiniso, bekungasoze kube lesidingo sokuthi abantu bavuswe njengoba bekuzabe kungelamuntu ofileyo. Siveza egcekeni ukuthi imfundiso le kayikho eBhayibhilini. Kanti njalo lanxa amatshetshi amanengi efundisa ukuthi konke esikwenzayo sekwahlelwa nguNkulunkulu kumbe ngamandla athile, thina sifundisa ukuthi umuntu ulenkululeko yokukhetha lokho afuna ukukwenza njalo angakhetha ukukhonza uNkulunkulu. Abafundisi bezwa njani nxa siveza egcekeni ukuthi bafundisa amanga? Izikhathi ezinengi bazonda bafe! Nxa silithanda iqiniso, kumele samukele amazwi kaNkulunkulu. (Joh. 8:45, 46) Kasisoze silitshiye iqiniso njengoSathane uDeveli ongazange ame aqine kulo. Kasenzi loba yini engavumelani lalokho esikukholwayo. (Joh. 8:44) UNkulunkulu ufuna abantu bakhe balingisele uJesu ‘ngokwenyanya okubi langokubambelela kokuhle.’—Rom. 12:9; Heb. 1:9. w21.05 10 ¶10-11

Kuthiwani nxa singananzelela ukuthi sesibanjwe ngumjibila wokuzigqaja kumbe owobuhwaba? Singaphunyuka. Umphostoli uPhawuli wathi labo ‘ababanjwe bephila’ nguSathane bangaphunyuka emjibileni wakhe. (2 Tim. 2:26) Akumelanga sikhohlwe ukuthi uJehova ulamandla ukwedlula uSathane. Yikho nxa singavuma ukuthi asincedise, singaphunyuka kuloba yiwuphi umjibila uSathane asifakela wona. Kungcono ukuthi sixwaye ukuzigqaja lobuhwaba kulokuthi siphunyuke emijibileni le kaSathane. Asingeke sikwenze lokhu singancediswanga nguNkulunkulu. Yikho ncenga uJehova nsuku zonke ukuthi akusize ubone langabe ubuntu lobu obubi sebuqalise ukuphambanisa indlela ocabanga lowenza ngayo. (Hubo. 139:23, 24) Yenza konke okusemandleni akho ukuthi imijibila le ingakubambi. Sekulenkulungwane zeminyaka uSathane engumzingeli, kodwa akusensuku ngaki ukuthi abotshwe futhi ngemva kwesikhathi atshabalaliswe. (Isam. 20:1-3, 10) Sililindele ngabomvu lelolanga. Kodwa lize lifike, hlala uphapheme ukuze imijibila kaSathane ingakubambi. Sebenza nzima ukuze ungabi ngumuntu ozigqajayo kumbe oyisihwaba. Zimisele ‘ukumelana loDeveli, yena uzakubalekela.’ w21.06 19 ¶15-17

UJehova uyathokoza nxa umuntu esamukela iqiniso eliseBhayibhilini abeselitshela abanye. (Zaga. 23:15, 16) Kumele ukuthi uyathokoza okuzwayo nxa ebona abantu bakhe betshiseka emsebenzini wokutshumayela lowokufundisa. Ngokwesibonelo, lanxa bekulomkhuhlane obuhlasele umhlaba wonke, ngomnyaka wenkonzo ka-2020 siqhube izifundo ezingu-7 705 765 futhi sancedisa abantu abangu-241 994 ukuthi bazinikele kuJehova futhi babhabhathizwe. Abafundi laba abatsha labo bazaqhuba izifundo zeBhayibhili benze abanye abafundi. (Luk. 6:40) Akuthandabuzwa ukuthi uJehova uyathokoza kakhulu nxa esibona sisenza umsebenzi wokwenza abafundi. Ukwenza abafundi ngumsebenzi onzima, kodwa uJehova uzasincedisa ukuthi sifundise abantu ukuthi bamthande. Ungazama yini ukuba lesifundo seBhayibhili? Kuzakumangalisa okungenzakala nxa ungasebenzisa loba yiliphi ithuba ukuthi ucele abantu ohlangana labo ukuthi ufunde labo iBhayibhili. w21.07 6-7 ¶14-16

INkosi uDavida yasekela umsebenzi wokwakhiwa kwethempeli ngokunikela ngemali enengi langezinye izinto eziligugu. (1 ImiLan. 22:11-16) Nxa singaselamandla okuncedisa emisebenzini yokwakha eyenziwa yinhlanganiso singaqhubeka sisekela imisebenzi le ngokunikela ngemali kusiya ngalokho esikwenelisayo. Kanti njalo singancedisa abasesebatsha ngolwazi esilutholileyo. Cabanga ngalokho okwenziwa ngumphostoli uPhawuli. Wacela uThimothi ukuthi ahambe laye emsebenzini wobunali njalo wafundisa ijaha leli indlela ayetshumayela layefundisa ngayo. (ImiSeb. 16:1-3) Lokho kwenza uThimothi waphumelela emsebenzini wokutshumayela izindaba ezinhle lowokufundisa. (1 Khor. 4:17) UThimothi wasebenzisa lokho ayekufundiswe nguPhawuli ukuthi laye aqeqetshe abanye. w21.09 12 ¶14-15

Sifundani kumfundi u-Apholo lomphostoli uPhawuli? Bobabili babeyazi kuhle iMibhalo futhi babesaziwa njalo bezingcitshi ekufundiseni. Kanti njalo babencedise ekwenzeni abafundi abanengi. Kodwa akula owayencintisana lomunye. (ImiSeb. 18:24) Phela ngemva kwesikhathi u-Apholo esukile eKhorinte, uPhawuli wamkhuthaza ukuthi abuyele ebandleni lelo. (1 Khor. 16:12) U-Apholo wazisebenzisa kuhle iziphiwo zakhe, ememezela izindaba ezinhle njalo eqinisa abazalwane. Kanti njalo asithandabuzi ukuthi wayeyindoda ethobekileyo. Ngokwesibonelo, akulandawo eBhayibhilini eveza ukuthi wacaphuka lapho u-Akhwila loPrisila ‘bemchasisela indlela kaNkulunkulu ukuze imcacele kuhle.’ (ImiSeb. 18:24-28) Umphostoli uPhawuli wayeyazi imisebenzi emihle eyayisenziwa ngu-Apholo. Kodwa kazange akhathazeke ngokuthi abantu bazabona u-Apholo engcono kulaye. Nxa sibona lokho akubhalela ibandla laseKhorinte siyananzelela ukuthi wayeyindoda ethobekileyo, ekwaziyo ukuthi kulezinye izinto engenelisi ukuzenza njalo ezehlisayo.—1 Khor. 3:4-6. w21.07 18-19 ¶15-17

U-Adamu lo-Eva bakhetha ngabomo ukungamlaleli uNkulunkulu yikho kwakufanele baxotshwe sibili emulini yakhe. Kodwa kwakuzahamba njani ngabantwababo? UJehova uyabathanda abantu yikho wavula indlela yokuthi labo abamlalelayo babe ngamalunga emuli yakhe. Wakwenza lokhu ngokunikela ngeNdodana yakhe ezelwe yodwa ukuthi ibe ngumhlatshelo. (Joh. 3:16) UNkulunkulu wakhetha abantu abathembekileyo abangu-144 000 ukuthi babe ngamadodana akhe ngenxa yomhlatshelo kaJesu. (Rom. 8:15-17; Isam. 14:1) Kulabanye abathembekileyo abangamamiliyoni abenza intando kaNkulunkulu. Balethemba lokuba ngamalunga emuli yakhe ngemva kokulingwa kokucina ekupheleni kweminyaka eyinkulungwane yokubusa kukaKhristu. (Hubo. 25:14; Rom. 8:20, 21) Lakhathesi babiza uJehova uMdali wabo ngokuthi “Baba.” (Mat. 6:9) Abazavuswa labo bazaphiwa ithuba lokufunda ngalokho uJehova akhangelele ukuthi bakwenze. Labo abazamlalela bazacina sebengamalunga emuli yakhe. w21.08 5 ¶10-11

Umphostoli uPhawuli wayephathiswe inkonzo njalo wayeyiqakathekisa kakhulu. Wayetshumayela “obala lasendlini ngendlu.” (ImiSeb. 20:20) Wayetshumayela loba ngaphi, loba nini. Ngokwesibonelo, ngesikhathi emelele abanye bakhe e-Athene watshumayeza iqembu labantu ababedumile futhi abanye babo balalela. (ImiSeb. 17:16, 17, 34) Wayetshumayela lanxa ‘ebotshiwe.’ (Flp. 1:13, 14; ImiSeb. 28:16-24) UPhawuli wasisebenzisa kuhle isikhathi sakhe. Wayejayele ukucela abanye ukuthi bahambe laye ekutshumayeleni. Ngokwesibonelo, ohambweni lwakhe lokuqala etshumayela wahamba loMakho, kolwesibili wahamba loThimothi. (ImiSeb. 12:25; 16:1-4) Akuthandabuzwa ukuthi uPhawuli wabafundisa ukwenza imisebenzi yebandla lokwelusa abazalwane kanye lokuba zingcitshi ekufundiseni.—1 Khor. 4:17. w22.03 27 ¶5-6

Abanye kabakholwa ukuthi kuloMdali ngenxa yokuthi bathi bakholwa lokho abakubonayo kuphela. Kodwa iqiniso yikuthi bayakholwa ukuthi izinto abangaziboniyo zikhona, ngokwesibonelo, umoya ovunguzayo, ngenxa yokuthi balobufakazi bokuthi ukhona. Ukholo okukhulunywa ngalo eBhayibhilini lugoqela ubufakazi bokuthi lokunye “okungabonakaliyo kukhona sibili.” (Heb. 11:1) Kudinga isikhathi lokuzimisela ukuthi sihlole sisodwa ubufakazi bakhona kodwa abantu abanengi abazimiselanga ukwenza njalo. Umuntu ongafuniyo ukuhlola ubufakazi angaphetha ngokuthi akulaNkulunkulu. Abanye abezesayensi bathi sebehlole ubufakazi bacina bekholwa ukuthi uNkulunkulu wadala zonke izinto. Bangabe babezitshela ukuthi akulaMdali ngenxa yokuthi eyunivesithi abazange bake bafundiswe ukuthi izinto zadalwa. Kodwa sebemazi futhi sebemthanda uJehova. Sonke kumele siqinise ukholo lwethu kuNkulunkulu kungelani lalokho esakufundiswa esikolo. w21.08 14 ¶1; 15-16 ¶6-7

UJesu wasebenzisa umzekeliso wendodana yolahleko ukuze asincede sizwisise ukuthi uJehova ukuthanda kangakanani ukutshengisa ukuthi ulesihawu. Indodana leyo yayisuke ngakibo ‘yayachitha yonke impahla yayo ngokuphila impilo yokuxhwala.’ (Luk. 15:13) Ngemva kwesikhathi yatshiya indlela embi eyayisiphila ngayo, yazithoba yasibuyela ngakibo. Uyise wayamukela njani? UJesu wathi: “Ithe [indodana] isesekhatshana, uyise wathi mehlo suka wayibona wayizwela, wasegijima wafika wayigona njalo wayiqabuza.” Uyise kazange ayiyangise indodana yakhe kodwa wayizwela isihawu, wayithethelela futhi wayamukela ngazo zombili. Lanxa indodana leyo yayiphambanise kakhulu uyise wayixolela ngenxa yokuthi yayisiphendukile esonweni sayo. UJehova ufana lobaba lo olesihawu osemzekelisweni. UJesu walandisa umzekeliso lo ukuze atshengise ukuthi uYise uzimisele kangakanani ukuthethelela izoni eziphenduka okweqiniso.—Luk. 15:17-24. w21.10 8 ¶4; 9 ¶6

Lamuhla abakhokheli benkolo abanengi bazama ngazo zonke izindlela ukuthi bafihlele abantu iqiniso lokuthi uNkulunkulu ulebizo. Bayalikhipha ibizo likaNkulunkulu nxa behumutsha amaBhayibhili abo futhi kwamanye amasonto bayala ukuthi kusetshenziswe ibizo likaNkulunkulu ezinkonzweni zabo. OFakazi bakaJehova bona benza abantu babelazi ibizo likaNkulunkulu yini? Ye. Nampu ubufakazi. Senza konke okusemandleni ethu ukuthi senze khona kanye okutshiwo libizo lethu, ukufakaza ngoJehova. (Isaya. 43:10-12) Sesiphrinte amaBhayibhili adlula 240 miliyoni e-Nguqulo Yomhlaba Omutsha, elebizo likaNkulunkulu ezindaweni lapho elakhitshwa khona ngabanye abahumutshi beBhayibhili. Kanti njalo sesiphrinte amabhuku asekelwe eBhayibhilini ngezindimi ezedlula 1 000 futhi emabhukwini la ibizo likaNkulunkulu litholakala kanengi. Kusegcekeni ukuthi oFakazi bakaJehova yibo kuphela abatshengisa ukuthi bayalihlonipha kakhulu ibizo likaNkulunkulu. Akula enye inkolo etshela abantu ngebizo likaNkulunkulu ukwedlula thina. w21.10 20-21 ¶9-10

Siyabe sikhonza uJehova nxa sisiza amaKhristu adinga uncedo. UJehova wathembisa ukuthi uzawabusisa ama-Israyeli ayenceda abayanga. (Dute. 15:10) Sonke isikhathi nxa sincedisa omunye esikhonza laye uJehova ukubona njengesipho esiphiwa yena. (Zaga. 19:17) Ngokwesibonelo, amaKhristu eFiliphi athumela uPhawuli isipho ngesikhathi ebotshiwe futhi uPhawuli wathi ‘singumhlatshelo owamukelekayo, omthokozisa kakhulu uNkulunkulu.’ (Flp. 4:18) Cabanga ngabantu abasebandleni okulo ubusuzibuza ukuthi ukhona yini ongamncedisa. UJehova uyathokoza nxa esibona sisebenzisa isikhathi sethu lamandla esilawo leziphiwo zethu kanye lempahla esilayo ukuze sincede abanye. Lokhu ukubona kuyindlela yokumkhonza. (Jak. 1:27) Ukukhonza kweqiniso kudinga ukuthi sisebenzise isikhathi sethu lamandla ethu, kodwa akunzima. (1 Joh. 5:3) Okwenza kungabi nzima yikuthi siyamthanda uJehova labafowethu labodadewethu. w22.03 24 ¶14-15

Sizakwenelisa ukutshengisa abafowethu labodadewethu uzwelo nxa singabazazi inhlupho abaphakathi kwazo. Ngokwesibonelo, udadewethu angabe ethwaliswe nzima ngumkhuhlane othile kodwa ungasoze umuzwe ekhala ngawo. Lanxa kunjalo, angathokoza kakhulu nxa omunye angamncedisa ngokuthile. Singenelisa yini ukumncedisa ngokumphekela kumbe ngokumklinela indlu? Umfowethu angabe ephelelwe ngumsebenzi. Singamnika yini imali ezamncedisa aze athole omunye umsebenzi? Lokhu singakwenza singazange simtshele ukuthi ivela kithi. Akumelanga silindele ukuthi abafowethu labodadewethu baze basicele ukuze sitshengise uzwelo. Kumele silingisele uJehova sibancedise bengazange basicele. Wenza ilanga liphume nsuku zonke singazange silicele. Kanti njalo ilanga linceda bonke abantu, hatshi labo abatshengisa ukuthi bayabonga kuphela. Kuyacaca-ke ukuthi uJehova utshengisa ukuthi uyaphana ngokusipha konke esikudingayo. Siyamthanda kakhulu uJehova ngoba ulomusa futhi uyaphana. w21.09 22-23 ¶12-13

Uthando oluqotho lwenza uNkulunkulu athethelele. Nxa uJehova enanzelela ukuthi umuntu owonileyo uyaphenduka futhi usekutshiyile abekwenza, uyamthethelela ngenxa yokuthi ulothando oluqotho. Umhubi uDavida wathi ngoJehova: “Kasiphathi ngokufanele izono zethu kumbe asijezise ngokulingene iziphambeko zethu.” (Hubo. 103:8-11) UDavida wayebazi kuhle ubuhlungu bokuthonisiswa ngumzwangedwa kodwa wafunda ukuthi uJehova uzimisele ‘ukuthethelela.’ Kuyini okumenza athethelele? Impendulo siyithola emthandazweni kaDavida osembhalweni walamuhla. Wathi uJehova uyathethelela ngoba ugcwele uthando oluqotho kulabo abakhuleka kuye. Kuqondile futhi kuyanceda ukuzisola nxa sonile. Kungenza siphenduke njalo sitshiye okubi ebesikwenza. w21.11 5 ¶11-12

UJehova uyalithanda ibizo lakhe futhi ufuna wonke umuntu alihloniphe. (Isaya. 42:8) Kodwa sekuleminyaka engaba ngu-6 000 ibizo lakhe lingcoliswa. (Hubo. 74:10, 18, 23) Lokhu kwaqalisa ngesikhathi uDeveli (okutsho “uMnyundeli”) esola uNkulunkulu ngokuthi uncitsha u-Adamu lo-Eva into ethile abayidingayo. (Gen. 3:1-5) Kusukela ngalesosikhathi, uJehova ubelokhu eqanjelwa amanga ngokuthi uncitsha abantu izinto eziqakathekileyo abazidingayo. UJesu wayekhathazekile ngokuthi ibizo likaYise lalingcoliswa. UJehova nguye yedwa olelungelo lokubusa ezulwini lasemhlabeni futhi indlela abusa ngayo ingcono ukwedlula ekaloba ngubani. (Isam. 4:11) Kodwa uDeveli wazama ukudukisa izingilosi labantu ngokubenza bacabange ukuthi uNkulunkulu kalalo ilungelo lokubusa. Sekuseduze ukuthi wonke umuntu angathandabuzi ukuthi uNkulunkulu nguye olelungelo lokubusa ezulwini lasemhlabeni. Bonke bazakwazi ukuthi indlela uJehova abusa ngayo ingcono kulazo zonke lokuthi uMbuso wakhe yiwo kuphela ozaletha ukuthula lokuvikeleka emhlabeni. w21.07 9 ¶5-6

Kungokwemvelo ukuthi inhloko yemuli izwe ilomlandu wokunakekela umkayo labantwabayo ngokudla lezigqoko lokuba leqiniso lokuthi balendawo yokuhlala. Uthwele nzima yini ngenxa yokuthi awulamali eyeneleyo yokuthenga izinto ozidingayo empilweni? Lanxa uphakathi kobunzima lobo ungasebenzisa isikhathi lesi ukuze uqinise ukholo lwakho. Khuleka kuJehova njalo ubale amazwi kaJesu akuMathewu 6:25-34 ubusucabangisisa ngawo. Kanti njalo cabanga ngezibonelo zabafowethu labodadewethu ezitshengisa ukuthi uJehova uyabanakekela labo abaqhubeka bekhuthele ekukhonzeni. (1 Khor. 15:58) Ukwenza njalo kuzakunceda ukholwe sibili ukuthi uJehova uzakusiza njengoba wenza kwabanye ababelenhlupho ezinjengezakho. Uyakwazi okudingayo futhi uyenelisa ukukunika khona. Nxa ubona indlela uJehova akuncedisa ngayo ukholo lwakho luzaqina futhi uzakwenelisa ukuqinisela nxa usuhlangana lobunzima obukhulu esikhathini esizayo. w21.11 20 ¶3; 21 ¶6

Imfundiso emayelana lenhlawulo iluqinisile ukholo lwamaKhristu amanengi lamuhla. Kanti njalo iwancede ukuthi aqhubeke etshumayela lanxa ephikiswa lokuthi ahlale ethembekile okwempilo yawo yonke kungelani lobunzima ahlangana labo. Ake sixoxe ngomphostoli uJohane. Kumele ukuthi wafundisa abantu iqiniso elimayelana loKhristu lenhlawulo okweminyaka edlula engu-60. Wathi esesiyabamba iminyaka engu-100, uhulumende wamaRoma wawumbona eyingozi okokuthi wambopha wamusa esihlengeni sasePhathimosi. Wayebotshelwani? ‘Ukukhuluma ngoNkulunkulu lokufakaza ngoJesu.’ (Isam. 1:9) UJohane uyisibonelo esihle kakhulu endabeni yokuba lokholo lokuqinisela. Emabhukwini uJohane awabhalayo waveza ukuthi uyamthanda kakhulu uJesu lokuthi uyayiqakathekisa inhlawulo. Ukhuluma okwezikhathi ezedlula 100 ngenhlawulo langendlela esinceda ngayo. (1 Joh. 2:2) Kuyazicacela ukuthi uJohane wayeyiqakathekisa inhlawulo. w21.04 17 ¶9-10

UJehova wayekhangelele ukuthi abantu bakhe babe lomusa ebantwini abayizacuthe labayiziphofu. Ngokwesibonelo, wabatshela ukuthi bangathuki isacuthe. Lokho kwakungahlanganisa ukusethusela kumbe ukusitshela amazwi abuhlungu. Isihluku esingaka! Sasiyabe singezwa lokho okuyabe kutshiwo yikho sasingeke siziphendulele. ULevi 19:14 uphinda asitshele ukuthi abantu bakaNkulunkulu kwakungamelanga ‘baphosele isikhubekiso phambi koyisiphofu.’ Elinye ibhuku lichasisa indlela abantu abakhubazekileyo ababephathwa ngayo endaweni lapho ama-Israyeli ayehlala khona lisithi “babejayele ukungaphathwa kuhle futhi bephathwa ngesihluku.” Umuntu wayengafaka ulutho oluthile phambi kwesiphofu ukuze silimale kumbe ukuze asihleke. Wayeyabe elolunya sibili! Umthetho okuvesi 14 wawunceda abantu bakaJehova babone ukuthi kwakumele batshengise uzwelo kwabayizacuthe labayiziphofu. w21.12 8-9 ¶3-4

UJakhobe wayekhathazekile ngokuthi umnewabo wayengabe elokhu embambele isikhwili. Yikho waqala wathandaza ngenhliziyo yonke ngendaba le wasethumela isipho esikhulu ku-Esawu. (Gen. 32:9-15) Kanti njalo wathi embona waqala yena ukutshengisa inhlonipho ngokukhothama phambi kwakhe, hatshi kanye kumbe kabili kuphela kodwa kasikhombisa. UJakhobe wenelisa ukwenza ukuthi kube lokuthula phakathi kwakhe lomnewabo ngenxa yokuthi wazithoba kuye njalo wamhlonipha. (Gen. 33:3, 4) Kukhona esikufundayo kulokho uJakhobe akwenzayo ngesikhathi elungiselela ukuyahlangana lomnewabo langesikhathi behlangana. UJakhobe wazithoba wacela ukuthi uJehova amncedise. Esekhulekile wenza konke ayengakwenza ukuthi kube lokuthula phakathi kwakhe lomnewabo. Ngesikhathi behlangana kazange aphikisane laye ngokuthi ngubani owayephambanisile phakathi kwabo. Ayekufuna yikwenza ukuthi kube lokuthula phakathi kwakhe lomnewabo. Ungamlingisela njani uJakhobe?—Mat. 5:23, 24. w21.12 25 ¶11-12

Nxa ucabanga ngokuthi uJesu wafela izono zakho, ungabona angani isipho lesi esiligugu asikufanelanga. Kuyini okungenza ucabange njalo? Inhliziyo yethu ingasikhohlisa isenze sibone angani asisibantu balutho kumbe ukuthi uJehova ngeke asithande. (1 Joh. 3:19) Nxa sesiqalisa ukuba lemicabango enjalo kumele sikhumbule ukuthi “uNkulunkulu mkhulu kulezinhliziyo zethu.” Kumele siqiniseke ukuthi uBaba wethu osezulwini uyasithanda kakhulu lokuthi uzimisele ukusithethelela. Ukuze sizwisise indlela uJehova asibona ngayo kumele sihlale sitaditsha iLizwi lakhe, sithandaze kokuphela futhi sizinike isikhathi sokuba labantu bakhe. Kungani kuqakathekile ukuthi sikwenze lokhu? Kuzakunceda ukuthi ubuzwisise ngcono ubuntu bukaJehova. Ungenza njalo uzabona ukuthi ukuthanda kangakanani. Ukucabangisisa nsuku zonke ngalokho okubala eLizwini likaNkulunkulu kuzakunceda ukuthi ‘uqondise izinto’ engqondweni lasenhliziyweni yakho.—2 Tim. 3:16. w21.04 23-24 ¶12-13

Ukuze siqinise ukholo lwethu akumelanga siphongubala nje. Kumele sicabangisise ngalokho esikufundayo. Ake sixoxe ngokwenziwa ngumlobi weHubo 77. Wayekhathazekile ngoba wayecabanga ukuthi yena kanye lamanye ama-Israyeli ayengasemukelwa nguJehova. Ukukhathazeka lokhu kwasekumenza angasabuquthi. (Uvesi 2-8) Manje wenzani? Watshela uJehova wathi: “Ngizacabanga ngayo yonke imisebenzi yakho nginakane ngazo zonke izenzo zakho ezinkulu.” (Uvesi 12) Umhubi wayezazi mhlophe izinto uJehova ayezenzele abantu bakhe kudala. Kodwa indoda le eyayikhathazekile yayizibuza isithi: “Kanti uNkulunkulu usekhohliwe ukuba lesihawu na? Usethe ngokuzonda wagodla uzwelo lwakhe na?” (Uvesi 9) Umhubi wacabangisisa ngemisebenzi kaJehova lokuthi uNkulunkulu wayetshengise abantu bakhe kudala isihawu lozwelo. (Uvesi 11) Kwamnceda njani ukwenza njalo? Kwamenza waqiniseka ukuthi uJehova kasoze abatshiye abantu bakhe. (Uvesi 15) w22.01 30-31 ¶17-18

UJehova uzwa njani ngamadoda labesifazana abathembekileyo asebafayo? Uyafisa kakhulu ukuphinda ababone! (Jobe. 14:15) Akucabange ukuthi uJehova ukufisa njani ukuphinda abone umngane wakhe u-Abrahama. (Jak. 2:23) Kumbe uMosi lowo ayekhuluma laye “ubuso ngobuso.” (Eks. 33:11) Kumele ukuthi ukhangelele phambili ukuphinda azwe uDavida labanye abahubi behlabela ingoma ezimnandi zokumdumisa! (Hubo. 104:33) UJehova kabakhohlwanga abangane bakhe laba lanxa sebafa. (Isaya. 49:15) Uyakukhumbula konke okumayelana labo. Ngelinye ilanga uzabavusa futhi uzaphinda azwe imithandazo yabo esuka enhliziyweni, amukele lokukhonza kwabo. Sengathi lokhu kungakududuza nxa ufelwe yisihlobo kumbe ngumngane. Ngesikhathi kusiba lokuhlamuka esivandeni se-Edeni, uJehova wayekwazi ukuthi izinto zizaqala zibe zimbi kakhulu zingakalungi. Uyabuzonda ububi, ukungaphathwa kuhle kwabantu lodlakela okugcwele emhlabeni lamuhla. w21.07 10 ¶11; 12 ¶12

Nxa sibathanda abafowethu labodadewethu siyabe sitshengisa ukuthi siyayibonga inhlawulo. Kungani sisitsho njalo? Ngenxa yokuthi uJesu wabafela. Lokhu kutshengisa ukuthi uyabathanda kakhulu. (1 Joh. 3:16-18) Sitshengisa ukuthi siyabathanda abafowethu labodadewethu ngendlela esibaphatha ngayo. (Efe. 4:29, 31–5:2) Ngokwesibonelo, siyabancedisa nxa begula kumbe behlelwe ngumonakalo wemvelo loba nxa bephakathi kobunye ubunzima. Kodwa kumele senzeni nxa umfowethu kumbe udadewethu angakhuluma loba enze into esicaphulayo? Kukuthwalisa nzima yini ukumxolela? (Levi. 19:18) Nxa kunjalo, landela iseluleko lesi: “Qhubekani libekezelelana futhi lithethelelana ngenhliziyo yonke lanxa umuntu engabe elesizatho sokusola omunye. Njengoba nje uJehova alithethelela ngenhliziyo yonke, lani kufanele lenze njalo.” (Kol. 3:13) Nxa sixolela abafowethu labodadewethu siyabe sitshengisa uBaba wethu osezulwini ukuthi siyayibonga sibili inhlawulo. w21.04 18 ¶12-13

Lanxa singakhuthala sisebenzela uJehova njalo sincedisa abantu abanengi ukuthi bathuthuke baze babhabhathizwe, siyananzelela ukuthi akula okunye okwenza siphumelele ngaphandle kwesibusiso sikaJehova. Ku-Apholo lomphostoli uPhawuli sifunda lokuthi nxa silemisebenzi eminengi esiyenza ebandleni, kunengi esingakwenza ukuze senze ukuthi kube lokuthula. Siyathokoza okwamagama nxa abadala lezinceku ezikhonzayo besenza ukuthi kube lokuthula lokumanyana ebandleni. Lokhu bakwenza ngokunika iseluleko esisekelwe eLizwini likaNkulunkulu langokungazenzi abangcono kulabanye. Kodwa bancedisa bonke ebandleni ukuthi balalele uJesu futhi balandele isibonelo sakhe. (1 Khor. 4:6, 7) Ngamunye wethu ulesiphiwo asiphiwe nguNkulunkulu. Singacabanga ukuthi esikwenzayo kuncane kakhulu njalo akuqakathekanga. Kodwa kumele sikhumbule ukuthi izititshi zohali ezincane yizo ezenza isigqoko esihle sibambane. Yikho loba yini oyenelisa ukuyenza inceda ukuthi kube lokumanyana ebandleni lonke. Sengathi sonke singasebenza nzima ukuthi sikhiphe loba yini ebangela ukuthi sincintisane labanye. Kasizimiseleni ukwenza konke okusemandleni ethu ukuthi kube lokuthula lokumanyana ebandleni.—Efe. 4:3. w21.07 19 ¶18-19

Qiniseka ukuthi uzaphinda ubabone abantu obathandayo abafayo. Ukukhala kukaJesu ngesikhathi eduduza abangane bakhe ababedabukile ngenxa yokufelwa kusitshengisa ukuthi uyakufuna sibili ukuvusa abantu abafileyo! (Joh. 11:35) Ungabancedisa labo abafelweyo. UJesu kazange akhale loMatha loMariya kuphela kodwa wabalalela futhi wabaduduza. (Joh. 11:25-27) Lathi singenza njalo kulabo abafelweyo. Umdala webandla okuthiwa nguDan ohlala e-Australia uthi: “Ngathi sengifelwe ngumkami ngangiludinga sibili uncedo. Banengi abafowethu labomkabo ababezimisele ukungilalela. Ngangikhala phambi kwabo kodwa babengayangeki nxa bengibona ngikhala. Babephinda bangincedise ngendlela ezitshiyeneyo. Babengigezisela imota, bengithengela ukudla futhi bengiphekela nxa ngangingenelisi ukuzenzela izinto lezi. Babehlala bethandaza lami. Batshengisa ukuthi bangabangane beqiniso sibili lokuthi bangabazalwane ‘abazalelwe izikhathi zenhlupheko.’”—Zaga. 17:17. w22.01 16 ¶8-9

UJehova usifisela okuhle. (Zaga. 4:20-22) Nxa uJehova eseluleka esebenzisa iLizwi lakhe, amabhuku ethu kumbe umKhristu oqinileyo ekukhonzeni, uyabe etshengisa ukuthi uyasithanda. (Heb. 12:9, 10) Lalela iseluleko ungabi lendaba lokuthi usiphiwe njani. Ngezinye izikhathi singabona angani iseluleko asisiphiwanga ngendlela efaneleyo. Kuliqiniso ukuthi loba ngubani onika iseluleko kumele azame ukusinika ngendlela ezakwenza kube lula ukuthi samukeleke. (Gal. 6:1) Kodwa nxa kuyithi esinikwa iseluleko kumele sigxile kulokho okutshiwoyo kulasendleleni esisinikwe ngayo. Nanku esingazibuza khona: ‘Lanxa ngingayithandi indlela engiphiwe ngayo iseluleko, kukhona yini engingakufunda kuso? Akungcono yini ukulalela lokho engikutshelwa ngumuntu onginika iseluleko kulokukhangela kakhulu amaphutha akhe?’ Siyabe sihlakaniphile nxa singazama ukusebenzisa loba yisiphi iseluleko esisiphiwayo. w22.02 12 ¶13-14

UJehova uyakwazi ukuthi kuthatha isikhathi njalo kumele sisebenze nzima ukuze silahle imicabango lemikhuba emibi. (Hubo. 103:13, 14) Yikho usebenzisa iLizwi lakhe, umoya wakhe kanye lenhlanganiso yakhe ukuthi asinike ukuhlakanipha lamandla njalo asisekele ukuze sitshintshe ubuntu bethu. Sebenzisa iBhayibhili ukuthi uzihlole. ILizwi likaNkulunkulu linjengesibuko. Lingakunceda ukuthi uhlole indlela ocabanga ngayo, okhuluma ngayo lowenza ngayo. (Jak. 1:22-25) Kanti njalo uJehova uhlala ezimisele ukukuncedisa. Nguye ongakuncedisa ngoba uyakwazi okusenhliziyweni yakho. (Zaga. 14:10; 15:11) Ngakho hlala uthandaza kuye futhi ubala iLizwi lakhe nsuku zonke. Ungathandabuzi ukuthi izimiso zikaJehova ziyanceda. Konke uJehova asicela ukuthi sikwenze kuyasinceda. Labo abalandela izimiso zakhe baba lesithunzi, bayasuthiseka empilweni njalo bayathokoza.—Hubo. 19:8-11. w22.03 4 ¶8-10

Siyabe sikhonza uJehova nxa sisakha futhi sigcina izindawo esikhonzela kuzo zisesimeni esihle. UJehova wayebona umsebenzi wokwakha ithabanikeli lowokwenza impahla yalo ungcwele. (Eks. 36:1, 4) Lalamuhla uJehova ubona umsebenzi wokwakha izakhiwo zenhlanganiso kanye lokuzinakekela uyinkonzo engcwele. Abanye abafowethu labodadewethu baqeda isikhathi esinengi besenza umsebenzi lo. Siyawuqakathekisa sibili umsebenzi lo abawenzayo besekela uMbuso. Kodwa bayawenza lomsebenzi wokutshumayela futhi abanye babo bangabe befuna ukuba ngamaphayona. Abadala bebandla batshengisa ukuthi bayawusekela umsebenzi wokwakha ngokuvumela abafowethu labodadewethu laba abakhutheleyo ukuthi babe ngamaphayona nxa befanela. Sonke singancedisa ukugcina izakhiwo zethu zihlanzekile futhi zisesimeni esihle kungelani lokuthi sizingcitshi emsebenzini wokwakha loba hatshi. w22.03 22 ¶11-12