March

“Izimvu” uJesu akhuluma ngazo kuMathewu 25:31-36 zimela abantu abalungileyo ngesikhathi sokuphela abalethemba lokuphila emhlabeni. Basekela abafowabo bakaKhristu abasesemhlabeni ngenhliziyo yonke bebancedisa emsebenzini wokutshumayela lowokwenza abafundi emhlabeni wonke. (Mat. 24:14; 28:19, 20) Minyaka yonke nxa sekuzafika iSikhumbuzo abezinye izimvu basekela abafowabo bakaKhristu ngokwenza umkhankaso emhlabeni wonke wokunxusa abantu embuthanweni lo. Baphinda babe leqiniso lokuthi wonke amalungiselelo eSikhumbuzo ayenziwa. Abezinye izimvu bayathokoza ukusekela abafowabo bakaKhristu ngalindlela. Bayakwazi ukuthi uJesu ubona lokho abakwenzela abafowabo abagcotshiweyo kuyikuncedisa yena ngokwakhe.—Mat. 25:37-40. w22.01 22 ¶11-12

Kufanele silingisele ubuntu bukaJesu lendlela ayephatha ngayo abanye. Ngokwesibonelo, wayizwela usizi indoda eyayilobulephero, wazwela owesifazana owayelomkhuhlane omubi njalo waba lesihawu kwababefelwe. Nxa silingisela uJesu, siyabe silingisela loJehova. (Mak. 1:40, 41; 5:25-34; Joh. 11:33-35) Sizasondela kakhulu kuJehova nxa singaqhubeka simlingisela. Ukulandela amanyathelo kaJesu kusinceda ukuthi singaphanjaniswa ngumhlaba lo omubi. Ngobusuku bokucina uJesu engakabulawa wathi: “Mina ngiwunqobile umhlaba.” (Joh. 16:33) Wayesitsho ukuthi kazange avumele ukucabanga kwabantu bomhlaba, inhloso zabo kanye lezenzo zabo kumphambanise. Kazange akhohlwe ukuthi isizatho sakhe sokubuya emhlabeni sasingesokulwela ubukhosi bukaJehova. Thina ke? Emhlabeni lo zinengi izinto ezingasiphambanisa. Kodwa nxa singalingisela uJesu ngokuqakathekisa ukwenza intando kaJehova, lathi ‘sizawunqoba’ umhlaba.—1 Joh. 5:5. w21.04 3-4 ¶7-8

Umphostoli uPhawuli wayesazi isithembiso sikaJesu esokuthi ‘wonke umuntu otshengisa ukuthi ulokholo kuJesu angathola ukuphila okungapheliyo.’ (Joh. 3:16; Rom. 6:23) UPhawuli wayengomunye walabo ababetshengisa ukuthi balokholo enhlawulweni. Wayengathandabuzi ukuthi uJehova uzimisele ukuthethelela lalabo abenze izono ezinkulu nxa bangaphenduka. (Hubo. 86:5) Okunye okwenza uPhawuli waqhubeka ekhonza uJehova yikuthi wayekholwa ukuthi uyamthanda kakhulu. Wayeqiniseka ngalokho ngenxa yokuthi uNkulunkulu wayethumele uJesu ukuthi azomfela. Nanzelela amazwi uPhawuli awatshoyo kuGalathiya 2:20, wathi: ‘INdodana kaNkulunkulu yangithanda futhi yazinikela ngenxa yami.’ Kazange azibone emubi kakhulu okokuthi uNkulunkulu ngeke amthande. Ngamanye amazwi kazange athi, ‘Ngiyazwisisa ukuthi kungani uJehova engathanda abafowethu labodadewethu, kodwa mina ngeke angithande.’ Wakhumbuza amaKhristu eRoma wathi: “UKhristu wasifela siseseyizoni.” (Rom. 5:8) Akulalutho olungenza uNkulunkulu angasithandi. UPhawuli wayekwazi ukuthi uthando lukaNkulunkulu lulamandla amakhulu. Wayekwazi ukuthi uNkulunkulu wawabekezelela ama-Israyeli. w21.04 22 ¶8-10

Nxa ufundisa, ncedisa umfundi wakho ukuthi athande uJehova. Ungakwenza njani lokhu? Dinga amathuba okuncedisa umfundi wakho ukuthi afunde okunengi ngobuntu bukaJehova. Msize abone ukuthi uJehova unguNkulunkulu othokozayo osekela labo abamthandayo. (1 Tim. 1:11; Heb. 11:6) Mtshele umfundi ukuthi kuzamnceda ukusebenzisa lokho akufundayo ubusumchasisela ukuthi indlela okuzamnceda ngayo itshengisa ukuthi uJehova uyamthanda. (Isaya. 48:17, 18) Nxa umfundi wakho engamthanda kakhulu uJehova, uzazimisela ukwenza utshintsho okumele alwenze empilweni yakhe. Umfundi kumele alahlekelwe ngezinye izinto ukuze athuthuke aze abhabhathizwe. Abanye kungadingeka ukuthi balahlekelwe yimpahla yabo. Kwabanengi kungadingeka ukuthi batshiyane labangane abangamthandiyo uJehova. Abanye bona bangalahlelwa iganga ngamalunga emuli angabathandiyo oFakazi bakaJehova. UJesu wathembisa labo abamlandelayo ukuthi abasoze badane ngoba uJehova uzababusisa ngokubanika imuli yabantu bakhe ebathandayo.—Mak. 10:29, 30. w21.06 4 ¶8-9

Umphostoli uPhawuli wafanisa umsebenzi wokwenza abafundi lowokulima, etshengisa ukuthi akumelanga siphelele ekuhlanyeleni kuphela. Watshela abaseKhorinte wathi: ‘Mina ngahlanyela, u-Apholo wathelela. Lina liyinsimu kaNkulunkulu elinywayo.’ (1 Khor. 3:6-9) Njengoba siyizisebenzi ‘ensimini kaNkulunkulu,’ siyahlanyela, sithelele besesiqhubeka sikhangela ukuthi kukhula kuhle yini. Lanxa kunjalo, siyakwazi ukuthi uNkulunkulu nguye okhulisayo. Silesibusiso esimangalisayo sibili sokutshumayeza abantu lesokubafundisa iqiniso. Umsebenzi lo wenza sithokoze okwamagama. Umphostoli uPhawuli owanceda abanengi eThesalonika ukuthi babe ngabafundi waveza indlela ayezizwa ngayo lapho esithi: “Ngobani abalithemba lethu kumbe injabulo yethu loba umqhele wethu wokuthokoza phambi kweNkosi yethu uJesu ngesikhathi sokuba khona kwayo? Kayisini yini? Yini sibili eliyinkazimulo yethu lenjabulo yethu.”—1 Thes. 2:19, 20; ImiSeb. 17:1-4. w21.07 3 ¶5; 7 ¶17

UJehova udonsele ngamunye wethu kuye. (Joh. 6:44) Lokhu kutsho ukuthi wathi ehlola amabhiliyoni abantu asemhlabeni, wabona into eligugu kuwe, inhliziyo eqotho engenelisa ukumthanda. (1 ImiLan. 28:9) UJehova uyakwazi, uyakuzwisisa futhi uyakuthanda. Lokhu kuyaduduza sibili. UJehova ulendaba lawe futhi ulendaba labafowenu labodadewenu. UJesu wafanisa uJehova lomelusi ukuze aveze indlela uJehova alendaba ngayo lathi. Nxa imvu eyodwa kwezingu-100 ingalahleka, wenzani umelusi? ‘Uyatshiya ezingu-99 ezintabeni abesesiyadinga leyo elahlekileyo.’ Nxa angayithola, kayicaphukeli kodwa uyathokoza. Sifundani? Imvu ngayinye iqakathekile kuJehova. UJesu wathi: ‘UBaba osezulwini kafisi ukuthi kutshabalale ngitsho loyedwa kulaba abancinyane.’—Mat. 18:12-14. w21.06 20 ¶1-2

Ukucabangisisa ngothando olukhulu uNkulunkulu asitshengise lona kwenza simthande kakhulu njalo kuqinisa ubungane bethu laye. (Rom. 8:38, 39) Kusenza sizimisele ukulingisela uJesu. (1 Phet. 2:21) Nxa sekusele amalanga amalutshwana ukuthi iSikhumbuzo sifike, sijayele ukubala ngendaba eziseBhayibhilini ezimayelana leviki yokucina kaJesu esasemhlabeni, ukubulawa kanye lokuvuswa kwakhe. Inkulumo eyenziwa eSikhumbuzweni isikhumbuza indlela uJesu asithanda ngayo. (Efe. 5:2; 1 Joh. 3:16) Ukubala lokucabangisisa ngendlela uJesu azidela ngayo kuyasinceda ukuthi sizimisele ‘ukuqhubeka sihamba ngendlela yena ayehamba ngayo.’ (1 Joh. 2:6) Kwenza sizimisele kakhulu ukuhlala sisethandweni lukaNkulunkulu. (Jud. 20, 21) Sizahlala sisethandweni lukaNkulunkulu nxa singenza konke okusemandleni ethu ukuthi simlalele, singcwelise ibizo lakhe njalo simthokozise. (Zaga. 27:11; Mat. 6:9; 1 Joh. 5:3) Ukuba khona eSikhumbuzweni kwenza sizimisele ukuphila usuku ngalunye angani sitshela uJehova ukuthi, ‘Ngifuna ukuhlala ngisethandweni lwakho kuze kube nini lanini!’ w22.01 23 ¶17; 25 ¶18-19

UJehova usinike inkululeko yokuzikhethela lokho esifuna ukukwenza. Siyazikhethela lokho esifuna ukukwenza empilweni. UNkulunkulu wethu osithandayo uyathokoza nxa sikhetha ukumkhonza. (Hubo. 84:11; Zaga. 27:11) Singayisebenzisa kuhle inkululeko yethu yokuzikhethela nxa sisenza lezinye izinqumo empilweni. Singalingisela uJesu ngokukhetha ukwenza lokho okufunwa ngabanye kulalokho thina esifuna ukukwenza. Ngelinye ilanga uJesu labaphostoli bakhe basebedinwe befile yikho baya endaweni ethuleyo ukuze baphumule kancane. Kodwa kabazange besaphumula ngoba bafica kulexuku elalifuna ukufundiswa nguJesu. UJesu kazange alicaphukele kodwa walizwela usizi “waseqalisa ukulifundisa izinto ezinengi.” (Mak. 6:30-34) Nxa singamlingisela uJesu ngokusebenzisa isikhathi sethu lamandla ethu sinceda abanye, siyabe sisenza ukuthi uBaba wethu osezulwini akhazinyuliswe.—Mat. 5:14-16. w21.08 3 ¶7-8

UJehova kathandi ukuthi izinto zonke zifanane kumbe ukuthi abantu bonke bafanane. Siyakwazi lokhu ngoba wadala imihlobo etshiyeneyo yezimila, yezinyamazana ngitsho leyabantu. Umuntu ngamunye udalwe ngendlela etshiyene leyomunye. Yikho uJehova kasoze akuqathanise labanye loba sekutheni. Uhlola inhliziyo yakho, umuntu onguye ngaphakathi. (1 Sam. 16:7) Uyakwazi lalokho owenelisa ukukwenza kuhle, ongenelisi ukukwenza kanye lendlela owakhuliswa ngayo. Kanti njalo kakuceli ukuthi wenze into engaphezu kwamandla akho. Kumele silingisele uJehova ngokuzibona ngendlela yena asibona ngayo. Singenza njalo siyabe sitshengisa ukuthi ‘sizisebenzisa kuhle ingqondo zethu,’ siyabe singaziboni singcono kulalokho esiyikho khona kumbe sizikhangelela phansi. (Rom. 12:3) Singalingisela okuhle okwenziwa ngabanye. Ngokwesibonelo, kungabe kulomfowethu kumbe udadewethu esimaziyo ophumelelayo emsebenzini wokutshumayela. (Heb. 13:7) Singafunda kuye ukuthi singathuthuka njani endleleni esitshumayela ngayo. (Flp. 3:17) Kodwa kulomehluko phakathi kokulingisela okuhle okwenziwa ngomunye lokuziqathanisa laye. w21.07 20 ¶1-2

Ukuhlolisisa izinyamazana, izimila lezinkanyezi kuzakunceda ukuthi ube lokholo lokuthi kuloMdali. (Hubo. 19:1) Ungaqhubeka ufunda ngezinto ezinjengalezi, uzaqiniseka kakhulu ukuthi uJehova nguye uMdali. Ngesikhathi uhlola izinto ezidaliweyo nanzelela ukuthi zikufundisani ngoMdali wethu. (Rom. 1:20) Ngokwesibonelo, ilanga likhipha ukutshisa lokukhanya okwenza izinto ziphile emhlabeni. Kodwa eminye imisebe yalo ingaba yingozi. Sidinga ukuvikelwa emisebeni le. Pho kuyini okusivikelayo? Emkhathini kulegasi okuthiwa yi-ozone esivikelayo emisebeni le eyingozi. Nxa imisebe le evela elangeni ilokhu isiba lamandla, i-ozone layo ibanengi. Lokho akutshengisi yini ukuthi kulomuntu owenza izinto lezi lokuthi umuntu lowo unguMdali olothando njalo okhaliphileyo? w21.08 17 ¶9-10

Nxa umfundi esebhabhathiziwe kufanele siqhubeke simthanda futhi simhlonipha. (1 Joh. 4:20) Singakwenza njani lokho? Okunye esingakwenza yikumthemba. Ngokwesibonelo, lanxa singazwisisi ukuthi kungani enze ulutho oluthile kasisoze sicabange ukuthi ulwenze ehlose okubi. Kodwa sizatshengisa ukuthi siyamhlonipha umfowethu loba udadewethu, simbone engcono kulathi. (Rom. 12:10; Flp. 2:3) Phela kumele sibe lesihawu lomusa kubo bonke abantu. Nxa sifuna ukuba ngamalunga emuli kaJehova kuze kube nini lanini kumele sisebenzise lokho okutshiwo liLizwi lakhe ezimpilweni zethu. Ngokwesibonelo, uJesu wasifundisa ukuthi kumele sibe lesihawu lomusa kubo bonke abantu ngitsho lasezitheni zethu. (Luk. 6:32-36) Ngezinye izikhathi kungaba nzima ukuthi sikwenze lokhu. Nxa sekunjalo, okungasinceda yikulingisela indlela uJesu ayecabanga layesenza ngayo. Nxa sisenza konke okusemandleni ethu ukuthi silalele uJehova futhi silingisele uJesu, siyabe sitshengisa uBaba wethu osezulwini ukuthi siyafuna ukuba ngamalunga emuli yakhe kuze kube nini lanini. w21.08 6 ¶14-15

Funda ukuthembela kuJehova. Uthembisa ukuthi uzasithululela izibusiso nxa singamthemba futhi senze konke okusemandleni ethu ekumkhonzeni. IBhayibhili lilezibonelo ezinengi zabantu abasebenza nzima ekukhonzeni uJehova. Izikhathi ezinengi wazibusisa izinceku lezi ngemva kokuba sezenze okuthile okutshengisa ukuthi ziyamthemba. Ngokwesibonelo, uJehova wabusisa u-Abrahama ngemva kokuba esetshiye umuzi wakhe “lanxa wayengakwazi ukuthi uya ngaphi.” (Heb. 11:8) UJakhobe laye wabusiswa ngemva kokulwisana lengilosi. (Gen. 32:24-30) Ngesikhathi isizwe sako-Israyeli sesizangena eLizweni Lesithembiso, abantu benelisa ukuchapha uMfula uJodani ngemva kokuba inyawo zabaphristi sezithinte amanzi omfula. (Josh. 3:14-16) Singafunda okunengi lakuboFakazi abathembela kuJehova njalo benza okunengi ekumkhonzeni. w21.08 29-30 ¶12-14

Lina bafowethu labodadewethu eselikhulile liyakwazi ukuthi izinto zazisenziwa njani kudala kodwa liyabona ukuthi kumele lijayele indlela ezintsha zokwenza izinto. Lani eselikhulile elisanda kubhabhathizwa linganceda abanye ngendlela ezinengi. Abasesebatsha bazakholisa ukuzwa ngalokho okwenzakale ezimpilweni zenu lalokho elikufundileyo. Nxa ‘lingahlala lisipha abanye’ ulwazi elilalo uJehova uzalibusisa kakhulu. (Luk. 6:38) Nxa lina eselikhulile lingaba ngabangane labasesebatsha lizasekelana. (Rom. 1:12) Izandla ziyagezana. Asebekhulile balenhlakanipho lolwazi abaluthole eminyakeni eminengi bekhonza uJehova. Abatsha bona balamandla. Nxa abatsha lasebekhulile besebenza ndawonye bemanyene benza uBaba wethu osezulwini adunyiswe njalo bayisibusiso kubo bonke ebandleni. w21.09 8 ¶3; 13 ¶17-18

Kungani indlela uJesu abulawa ngayo yabangela ukuthi amaJuda akhubeke? Ayebona angani ukubethelwa esigodweni sokuhlutshwa kwakusitsho ukuthi uyisigebenga lesoni, hatshi uMesiya. (Dute. 21:22, 23) AmaJuda akhubeka ngoJesu ayengafuni ukukholwa ukuthi kalacala lokuthi wayemangalelwe ngezinto angazenzanga kanye lokuthi wayengahlulelwanga kuhle. Labo abamthonisisayo kabazange balandele imithetho yokwahlulela. Umthethwandaba omkhulu wamaJuda wahlangana isiphangephange ukuze umthonisise, futhi kawuzange umahlulele kuhle. (Luk. 22:54; Joh. 18:24) Abahluleli kabazange bazihluphe ngokudinga ukuthi lokho uJesu ayemangalelwa ngakho lobufakazi babantu kwakuliqiniso yini. Baze badinga “ubufakazi bamanga ukuze babulale uJesu.” (Mat. 26:59; Mak. 14:55-64) Lalapho uJesu esevusiwe, abahluleli laba abangalunganga babhadala amasotsha angamaRoma ayelinde ithuna lakhe “inhlamvu zesiliva ezinengi” ukuze akhulume amanga ngokuthi kungani ithuna lalingaselalutho.—Mat. 28:11-15. w21.05 11 ¶12-13

UJehova angaqeda umumo lo wezinto omubi loba nini. Kodwa ukubekezela kwakhe kuyasinceda kakhulu. Zonke izizukulwane zika-Adamu lo-Eva zizalwa zilesono. Lanxa kunjalo, uJehova uyazithanda futhi uyazinakekela njalo uthembise ukuthi uzawuqeda umumo lo wezinto omubi. (1 Joh. 4:19) Uselibekile ilanga lapho azaqeda khona konke ukuhlupheka kwabantu. Indlela asithanda ngayo kumele isifuqe ukuthi sibekezele kanye laye ingqe nje kusadingeka senze njalo. UJehova usibekela isibonelo esipheleleyo sokubekezela. UJesu wenelisa ukulingisela uYise endabeni yokubekezela. Esasemhlabeni, waqinisela ngesikhathi ephikiswa, eyangiswa langesikhathi ebethelwa esigodweni sokuhlutshwa ngenxa yethu. (Heb. 12:2, 3) Akuthandabuzwa ukuthi isibonelo sikaJehova sanika uJesu amandla okuthi aqinisele. Lathi singasinceda. w21.07 12-13 ¶15-17

Sikubona nsuku zonke ukuthi uBaba wethu osezulwini ulesihawu. (Hubo. 103:10-14) Abalandeli bakaJesu babelesono kodwa uJesu wayebatshengisa isihawu futhi ebathethelela. Wazimisela lokunikela ngokuphila kwakhe ukuze sithethelelwe izono zethu. (1 Joh. 2:1, 2) Nxa ‘sibathethelela ngenhliziyo yonke’ abafowethu labodadewethu, siyabe siqinisa uthando olusemulini yabantu bakaNkulunkulu. (Efe. 4:32) Ukuthethelela abanye kungaba nzima kakhulu ngezinye izikhathi yikho kumele sizame ngamandla ukukwenza lokho. Omunye udade wabala isihloko esiku-Nqabayokulinda esithi “Thethelelanani Ngokukhululekile” esamnceda ukuthi athethelele abanye ngenhliziyo yonke. Wabhala wathi: “[Isihloko lesi] sachasisa ukuthi ukuthethelela abanye akutsho ukuthi uvumelana labakwenzileyo kumbe ukuthi abakwenzileyo akuzange kukuzwise ubuhlungu. Kodwa kutsho ukuthi uyabe ungasabazondelanga njalo lokhu kwenza uhlaliseke.” Nxa sibathethelela ngenhliziyo yonke abafowethu labodadewethu siyabe sitshengisa ukuthi siyabathanda lokuthi silingisela uBaba wethu uJehova. w21.09 23-24 ¶15-16

UJesu wayelithanda iqiniso elimayelana loNkulunkulu lalokho ahlose ukukwenza. Indlela ayephila ngayo itshengisa ukuthi wayelazi iqiniso futhi watshela abanye ngalo. (Joh. 18:37) Abalandeli bakhe labo babelithanda kakhulu iqiniso. (Joh. 4:23) Yikho umphostoli uPhetro wathi ekhuluma ngokukhonza kwamaKhristu wathi ‘kuyindlela yeqiniso.’ (2 Phet. 2:2) AmaKhristu akuqala ayelithanda kakhulu iqiniso. Lokhu kwenza angamukeli izimfundiso zenkolo, amasiko kanye lemibono yabantu okwakuphikisana leqiniso. (Kol. 2:8) Lalamuhla amaKhristu eqiniso azimisele ‘ukuqhubeka ehamba eqinisweni’ ngokusekela konke akukholwayo eLizwini likaNkulunkulu langokuphila ngendlela evumelana lalo. (3 Joh. 3, 4) OFakazi bakaJehova bayavuma ukuthi abahlali bezwisisa konke okuseBhayibhilini. Kwezinye izikhathi bayaphambanisa endleleni abachasisa ngayo lokho okutshiwo liBhayibhili kumbe ekuhleleni indlela izinto ezenziwa ngayo enhlanganisweni. Kodwa nxa indaba isibakhanyela kuhle, bayenza utshintsho oludingakalayo. w21.10 21-22 ¶11-12

Kudala, imiduli eyayigombolozele idolobho yayivikela izakhamizi ezitheni. Uthando lukaJehova oluqotho lalo lunjengomduli osivikela kuloba yini engaphambanisa ubungane bethu laye. Kanti njalo lwenza asivikele ngokusisondeza kuye. (Jer. 31:3, NWT) Umhubi uDavida waphinda wakucacisa ngenye indlela ukuthi uNkulunkulu ubavikela njani abantu bakhe. Wathi: “Wena, O Nkulunkulu uyinqaba yami, uNkulunkulu wami olothando [“oluqotho,” NWT].” Waphinda wathi ngoJehova: ‘[“Uluthando lwami oluqotho,” NWT] lenqaba yami, inqaba yami lomkhululi wami, isihlangu sami engiphephela kuso.’ (Hubo. 59:17; 144:2) Kuyini okwenza uDavida wafanisa uthando lukaJehova oluqotho lenqaba kumbe isiphephelo? Kungelani lokuthi sihlala ngaphi, nxa siyizinceku zikaJehova, uzasivikela kuloba yini engaphambanisa ubungane bethu laye obuligugu. w21.11 6 ¶14-15

Ngesikhathi uJesu labafundi bakhe besesikepeni kwaqubuka isiphepho esikhulu elwandle. Lokhu kwapha uJesu ithuba lokubatshela ukuthi kwakudingeka baqinise ukholo lwabo. (Mat. 8:23-26) Isiphepho leso sasilamandla okokuthi amanzi ayesegcwala esikepeni. Abafundi besaba, basebevusa uJesu owayezilalele becela ukuthi abasindise. INkosi yababuza yathi: “Kungani lisesaba kangaka lina elilokholo oluncane?” Uphakathi kobunzima yini? Mhlawumbe ubunzima lobo bubangelwe ngumonakalo wemvelo kumbe ngumkhuhlane omubi okwenza udane futhi uswele lokuthi wenzeni. Kwezinye izikhathi ungakhathazeka kodwa ungakuvumeli lokho kukwenze ungasamthembi uJehova. Thandaza kuye ngenhliziyo yonke. Qinisa ukholo lwakho ngokucabangisisa ngezikhathi uJehova akuncedise ngazo. (Hubo. 77:11) Nxa ungenza njalo, uzaqiniseka ukuthi uJehova kasoze akutshiye loba sekutheni. w21.11 22 ¶7, 10

Umuntu wayengazitshela ukuthi uyawulandela umlayo lo nxa engathathi lutho lomunye. Kodwa wayengabe eseba kumbe etshontsha ngezinye izindlela. Ngokwesibonelo, umuntu othengisayo owayesebenzisa izikali zokulinganisa eziqilibezelayo nxa ethengisela abanye kwakufanana lokuthi uyabatshontshela. ULevi 19:13 uthi: “Lingaqilibezeli umakhelwane wenu.” Yikho nxa umuntu engathembekanga endabeni zamabhizimusi, uyabe elisela. Umlayo wesitshiyagalombili wawusithi ukutshontsha kubi. Kodwa okunye okutshiwo ebhukwini likaLevi kuyasinceda sizwisise ukuthi singasisebenzisa njani isimiso okusekelwe kuso umlayo lo. Ukucabangisisa ngendlela uJehova abona ngayo ukungathembeki lokutshontsha kuzasinceda. Ungazibuza ukuthi, ‘Nxa ngicabangisisa ngalokho okutshiwo kuLevi 19:11-13, kukhona yini okumele ngikulungisise, ikakhulu endleleni engenza ngayo ibhizimusi kumbe emsebenzini?’ w21.12 9-10 ¶6-8

Emithandazweni oyenza nsuku zonke ntambama, tshela uJehova izinto oziphambanisileyo ubusumcela ukuthi akuthethelele. Kodwa nxa wenze isono esikhulu kumele ucele labadala bebandla ukuthi bakuncedise. Bazakulalela futhi bakunike iseluleko esiseLizwini likaNkulunkulu. Bazathandaza lawe becela uJehova ukuthi akuthethelele esebenzisa umhlatshelo kaJesu ukuze ‘usile.’ (Jak. 5:14-16) Kanti njalo kuzakunceda ukuthi ucabangisise ngenhlawulo. Engxenye kukuzwisa ubuhlungu ukucabanga ngendlela iNdodana kaNkulunkulu eyahlupheka ngayo. Kodwa nxa ungaqhubeka ucabangisisa ngomhlatshelo kaJesu uzamthanda kakhulu yena loYise. Singangezelela indlela esiyiqakathekisa ngayo inhlawulo ngokubakhona eSikhumbuzweni sokufa kukaJesu minyaka yonke langokukhuthala ekunxuseni abanye ukuthi babekhona kuso. UJehova usibusisile sibili ngokusipha umsebenzi wokufundisa abantu ngeNdodana yakhe! w21.04 18-19 ¶13-16

Cabanga ngalokho okwenziwa nguJesu ixuku elikhulu labantu lize liye kuye entabeni. Wayethandaze ubusuku bonke yikho kumele ukuthi wayedinwe efile. Kodwa wathi ebona ixuku labantu wabazwela usizi ababengabayanga lababegula ababephakathi kwalo. Kazange abelaphe kuphela kodwa wenza leyinye yezinkulumo ezilamandla kulazo zonke ezake zenziwa ebizwa ngokuthi yiNtshumayelo Yasentabeni. (Luk. 6:12-20) Kanti njalo uJesu wayetshiya ayefuna ukukwenza ukuze ancede abanye. Akucabange ukuthi uJesu wezwa njani esizwa ukuthi umngane wakhe uJohane uMbhabhathizi wayesebulewe. IBhayibhili lithi: “UJesu uthe esizwa [ngokufa kukaJohane] wasuka lapho ngesikepe waya endaweni engelabantu ukuze abe yedwa.” (Mat. 14:10-13) Kodwa ixuku elikhulu labantu lamqalela ukufika endaweni ethuleyo ayesiya kuyo. (Mak. 6:31-33) Wananzelela ukuthi lalidinga ukuncediswa lokududuzwa nguNkulunkulu yikho wahle waqala ukulincedisa.—Luk. 9:10, 11. w22.02 21 ¶4, 6

Kumele senzeni nxa singananzelela ukuthi sicaphule omunye esikhonza laye? Kumele sithandaze ngenhliziyo yonke sicele uJehova ukuthi asincedise senze kube lokuthula phakathi kwethu lomfowethu. Okunye okumele sikwenze yikuzihlola. Singazibuza imibuzo le: ‘Ngiyavuma yini ukuthi ngiphambanisile, ngixolise futhi ngenze ukuthi kube lokuthula? UJehova loJesu bazezwa njani nxa kungaba yimi engiqalayo ukwenza ukuthi kube lokuthula phakathi kwami lomfowethu kumbe lodadewethu?’ Indlela esizaphendula ngayo imibuzo le izasinceda ukuthi silalele uJesu lokuthi sithobeke, sikhulume lomfowethu kumbe udadewethu ukuze senze ukuthi kube lokuthula phakathi kwethu. Kumele sithobeke ngesikhathi sikhuluma lomfowethu esimcaphulileyo. (Efe. 4:2, 3) Kumele sikhulume laye ukuze sizame ukumnceda asibone ngendlela ayesibona ngayo kuqala. Khumbula ukuthi ukwenza kube lokuthula phakathi kwakho lomfowenu yikho okuqakatheke kakhulu kulokudinga ukuthi ngubani ophambanisileyo.—1 Khor. 6:7. w21.12 26 ¶13-16

UJesu wayesizwa ubuhlungu ngoba wayekwazi ukuthi amaJuda amanengi ayengasoze alalele izindaba ezinhle zoMbuso ayezitshumayela. Lokhu kwakuzabangela ukuthi iJerusalema ibhujiswe lokuthi loba nguphi umJuda owayezasinda nxa isitshabalaliswa athunjwe. (Luk. 21:20-24) Okudanisayo yikuthi abantu abanengi abazange bamamukele njengoba wayevele etshilo. Abantu abanengi bayazilalela yini izindaba ezinhle zoMbuso lapho ohlala khona? Nxa kuyikuthi balutshwana abantu abakulalelayo nxa ubatshumayeza, ukukhala kukaJesu kungakufundisani? UJehova ulendaba labantu. Ukukhala kukaJesu kusikhumbuza ukuthi uJehova ulendaba labantu sibili. “Kafisi ukuthi loba ngubani abhujiswe kodwa ufisa ukuthi abantu bonke baphenduke.” (2 Phet. 3:9) Lamuhla sitshengisa ukuthi siyabathanda omakhelwane bethu ngokwenza konke okusemandleni ethu ukuthi sibancede bafunde izindaba ezinhle zoMbuso.—Mat. 22:39. w22.01 16 ¶10-12

Ukholo lwakho luzaqina nxa ungacabangisisa ngalokho uJehova akwenzele abantu bakhe kanye lalokho akwenzele khona wena ngokwakho. Okuqakatheke kulakho konke, yikuthi uzamthanda kakhulu uJehova. Uthando yilo oluzakunceda ukuthi uzimisele ukumlalela, wenze izinto ezimthokozisayo njalo uqinisele kuloba yibuphi ubunzima obungakwehlela. (Mat. 22:37-39; 1 Khor. 13:4, 7; 1 Joh. 5:3) Akulalutho oluqakatheke ukwedlula ukuba lobungane obuqinileyo loJehova. (Hubo. 63:1-7) Khumbula ukuthi ukuthandaza, ukutaditsha lokucabangisisa kuyingxenye yokukhonza kwethu. Lingisela uJesu uzinike isikhathi sokuba wedwa usenza izinto ezikusondeza kuJehova. Zama ukuthi kungabi lolutho olukuphambanisayo. Thandaza kuJehova ucele ukuthi akuncedise ugxilise ingqondo kulokho oyabe ukwenza. Nxa ungasisebenzisa kuhle kakhulu isikhathi sakho khathesi, uJehova uzakunika umvuzo wokuphila kuze kube nini lanini emhlabeni omutsha asithembisa wona.—Mak. 4:24. w22.01 31 ¶18-20

Kwezinye izikhathi sicina sisenza izinto ebesizicabanga. Yikho uJesu wasifundisa ukuthi kumele sixwaye imicabango engabangela ukuthi senze isono esikhulu. (Mat. 5:21, 22, 28, 29) Siyafuna sibili ukuthokozisa uBaba wethu osezulwini. Yikho kuqakathekile ukuthi sihle siyixotshele khatshana loba yiphi imicabango emibi efika engqondweni. UJesu wathi: “Izinto eziphuma emlonyeni zivela enhliziyweni.” (Mat. 15:18) Izinto esizikhulumayo ziyatshengisa ukuthi singabantu abanjani sibili. Yikho zibuze: ‘Ngizimisele yini ukungaqambi amanga lanxa ukukhuluma iqiniso kungangidalela uhlupho? Angizidlisi satshanyana yini emuntwini engingatshadanga laye? Ngenza konke engingakwenza yini ukuthi ngixwaye inkulumo eziphathelane lezemacansini? Ngimphendula kuhle yini umuntu ongicaphulileyo?’ Ukuzibuza imibuzo le kuzakunceda sibili. Nxa ungazimisela ukungakhulumi inhlamba lamanga lezinto eziphathelane lezemacansini kuzabalula ukuthi uhlubule ubuntu obudala. w22.03 5 ¶12-14

Labo abacela ukucetshiswa kulokulinda omunye umuntu aze abacebise bajayele ukwenza izinqumo ezinhle kulalabo abangaceli ukucetshiswa. Yikho cela ukucetshiswa. Kunini lapho esingacela khona ukucetshiswa ngabafowethu labodadewethu? Nanzi ezinye izimo: (1) Udade ucela ukuthi ummemezeli ofundisa kuhle amjoyine esifundweni sakhe, ngemva kokufunda uyacela ukuthi amcebise ukuze athuthuke ekufundiseni. (2) Udade ongatshadanga ufuna ukuthenga ibhulugwe yikho ubuza udade oqinileyo ekukhonzeni ukuthi uthini ngaselikhethile. (3) Umzalwane ophiwe inkulumo kazulu wonke yokuqala ucela umzalwane oselesikhathi eside esenza inkulumo ukuthi ayilalelisise abesemtshela lapho okumele athuthukise khona. Lomzalwane oseleminyaka eminengi esenza inkulumo angacela abazalwane abazingcitshi ekwenzeni inkulumo ukuthi bamcebise abesesebenzisa lokho abamtshela khona.—Zaga. 19:20. w22.02 13 ¶15-17

UJehova uyasithanda futhi ulendaba lathi ngendlela ayethanda njalo enakekela ngayo uJesu ngesikhathi esemhlabeni. (Joh. 5:20) Wamncedisa ukuthi ahlale elokholo oluqinileyo, wamkhuthaza lapho ekhathazekile njalo wamnika lokho ayekudinga ukuze aqhubeke ephila. Kanti njalo wamtshela ukuthi uyamthanda lokuthi uyamamukela. (Mat. 3:16, 17) UJesu kazange azizwe elahliwe ngoba wayekwazi ukuthi uYise osezulwini omthandayo wayehlala elaye njalo emnceda. Lathi njengoJesu sesike sazibonela ngendlela ezinengi ukuthi uJehova uyasithanda. Cabanga ngalokhu: UJehova wasidonsela kuye njalo wasinika imuli yakhe elothando emanyeneyo esenza sithokoze futhi esincedisayo nxa sikhathazekile. (Joh. 6:44) Kanti njalo usinika konke esikudingayo ukuze sihlale silokholo oluqinileyo. Uphinda asincede ukuthi sithole esikudingayo ukuze siqhubeke siphila. (Mat. 6:31, 32) Nxa singaqhubeka sicabanga ngokuthi uJehova usithanda kangakanani sizamthanda kakhulu. w21.09 22 ¶8-9

Wawuphila impilo enjani ungakaqalisi ukufunda laboFakazi bakaJehova? Abanengi bethu abafuni ukucabanga langakho. Kungenzeka ubuntu bethu lendlela esasibona ngayo izinto kwakuhambelana lalokho umhlaba othi kulungile kumbe akulunganga. Ngalesosikhathi ‘sasiphila emhlabeni singelathemba njalo singelaye uNkulunkulu.’ (Efe. 2:12) Kodwa ngesikhathi usufunda iBhayibhili wananzelela ukuthi uloBaba osezulwini okuthanda kakhulu. Wananzelela lokuthi nxa ufuna ukumthokozisa lokuthi ube lilunga lemuli yakhe kwakumele utshintshe indlela owawuphila ngayo, owawubona ngayo izinto lowawucabanga ngayo. Kwasekumele ufunde ukulandela lokho uJehova athi kulungile ubusutshiya lokho athi akulunganga. (Efe. 5:3-5) UJehova nguMdali wethu njalo nguBaba wethu osezulwini, yikho elelungelo lokutsho ukuthi amalunga emuli yakhe kumele aziphathe njani. Kanti njalo ukhangelele ukuthi singakabhabhathizwa sizimisele ‘ukuhlubula ubuntu obudala lezenzo zabo.’ w22.03 2 ¶1-3

Abezinye izimvu bayathokoza ngokuba seSikhumbuzweni lanxa bengadli isinkwa njalo banathe iwayini njengabagcotshiweyo. Kubanika ithuba lokuthi bacabangisise ngethemba abalalo. Bayayikholisa inkulumo yeSikhumbuzo ngoba iyabe ichasisa lokho uKhristu labangu-144000 abazabusa laye abazakwenzela abantu abathembekileyo ngesikhathi sebebusa okweminyaka eyinkulungwane. Bekhokhelwa yiNkosi yabo uJesu Khristu, ababusi labo abasezulwini bazatshintsha umhlaba ube liPharadayisi njalo bakhiphe lesono ebantwini bonke abalalelayo. Akucabange ukuthi kubathokozisa njani abezinye izimvu ukuzibona ngelihlo lengqondo iziphrofetho eziseBhayibhilini zigcwaliseka, njengalezo ezitholakala ku-Isaya 35:5, 6; 65:21-23 lakuSambulo 21:3, 4. Ukuzibona sebesemhlabeni omutsha labathandekayo babo kuyaliqinisa ithemba labo njalo kubenza bazimisele ukuqhubeka bekhonza uJehova.—Mat. 24:13; Gal. 6:9. w22.01 21 ¶5-7

Kuyini inhlawulo? Yimbadalo uJesu ayibhadalayo ukuze abuyisele lokho okwakulahlwe ngu-Adamu. (1 Khor. 15:22) Kungani kwakumele uJesu ahlawule? Ngenxa yokuthi umthetho kaJehova ophathelane lokwahlulela kuhle owawuseMthethweni kaMosi wawusithi impilo kumele ikhwitshizwe ngempilo. (Eks. 21:23, 24) Ngesikhathi u-Adamu esona walahlekelwa yimpilo epheleleyo, yikho uJesu wanikela ngokuphila kwakhe okupheleleyo ukuze kuvumelane lokwahlulela kuhle kukaNkulunkulu. (Rom. 5:17) Lokhu kwamenza waba ‘nguBaba Waphakade’ wabo bonke abalokholo enhlawulweni yakhe. (Isaya. 9:6; Rom. 3:23, 24) UJesu wayezimisele ukunikela ngokuphila kwakhe ngenxa yokuthi uyasithanda kakhulu futhi uyamthanda okuzwayo uYise. (Joh. 14:31; 15:13) Uthando lolu lwamfuqa ukuthi ahlale ethembekile kuze kube sekufeni lokuthi enze intando kaYise. Okwenziwa nguJesu kuzenza ukuthi inhloso kaJehova ngabantu langomhlaba igcwaliseke. w21.04 14 ¶2-3