April

UJesu watshengisa ukuthi uyasithanda kakhulu ngokuzinikela ukuthi asifele. (Joh. 15:13) Akulalutho esingalwenza ukuze sibhadale uJehova loJesu ngothando abasitshengisa lona. Kodwa singatshengisa ukuthi siyababonga ngendlela esiphila ngayo nsuku zonke. (Kol. 3:15) Abagcotshiweyo bayayiqakathekisa inhlawulo ngoba yiyo eyenza babe lethemba lokuyaphila ezulwini. (Mat. 20:28) UJehova ubabone belungile njalo ubenze baba ngabantwabakhe ngenxa yokholo abalalo enhlawulweni kaKhristu. (Rom. 5:1; 8:15-17, 23) Labezinye izimvu bayayiqakathekisa inhlawulo. Ukuba lokholo emhlatshelweni kaKhristu kwenza bamukelwe nguNkulunkulu njalo babe lethemba lokusinda “ekuhluphekeni okukhulu.” (Isam. 7:13-15) Abagcotshiweyo labezinye izimvu batshengisa ukuthi bayayiqakathekisa inhlawulo ngokuba khona eSikhumbuzweni minyaka yonke. w22.01 23 ¶14-15

Okwakukhathaza uJesu kakhulu licala ayemangalelwe ngalo. Wayemangalelwe ngokuthi uthuka uNkulunkulu, okutsho ukungamhloniphi kumbe ukungalihloniphi ibizo lakhe. (Mat. 26:64-66) Ukucabanga nje ngokuthi wayezamangalelwa ngalokhu kwamkhathaza kakhulu okokuthi wacela uYise ukuthi angayangiswa ngendlela le. (Mat. 26:38, 39, 42) UJesu kwakumele alengiswe esigodweni ukuze akhulule amaJuda esiqalekisweni. (Gal. 3:10) Ayethembise ukuthi azalalela uMthetho kaNkulunkulu kodwa kawazange enze njalo. AmaJuda vele kwakumele afe ngenxa yokuthi ayeyinzalo ka-Adamu. Kodwa isiqalekiso lesi ngesinye isizatho esenza afanela sibili ukufa. (Rom. 5:12) UMthetho uNkulunkulu ayewunike ama-Israyeli wawusithi nxa umuntu angenza icala elikhulu kufanele abulawe. Ngemva kwalokho isidumbu sakhe sasingalengiswa esigodweni, okwakutshengisa ukuthi uqalekiswe nguNkulunkulu. (Dute. 21:22, 23; 27:26) Yikho ukulengiswa kukaJesu esigodweni kwakusitsho ukuthi usethethe isiqalekiso samaJuda ukuze akhululwe kuso futhi umhlatshelo wakhe wawuzawanceda lanxa ayemphikile. w21.04 16 ¶5-6

Ake ucabange okwenzakala ngelanga uJesu abulawa ngalo. Uyavuma ukuthathwa ngamasotsha angamaRoma afika ambhaxabule. (Mat. 26:52-54; Joh. 18:3; 19:1) Asebenzisa umchilo odabula inyama yakhe. Ngemva kwalokho amthwalisa isigodo esisindayo emhlane osulemklezuklezu yemvimvinya. Uqalisa ukusihudula esiya endaweni azabethelwa kuyo, kodwa engakayi ngaphi enye indoda ibanjwa ngamandla ukuthi isithwale. (Mat. 27:32) Esefikile amasotsha abethela izandla lenyawo zakhe esigodweni. Uthi eselenga umzimba wakhe udonse lapho abethelwe khona amanxeba abe sevuleka. Abangane bakhe bayalila, unina ukhala ezimathonsi kodwa abakhokheli abangamaJuda bamenza inhlekisa. (Luk. 23:32-38; Joh. 19:25) UJesu uzwa ubuhlungu okwamahola amanengi. Indlela abethelwe ngayo ibangela ukuthi inhliziyo lamaphaphu akhe kusebenze nzima futhi uthwala nzima ukuphefumula. Uyakwazi ukuthi ubethembekile kuJehova njalo uthi engakafi athandaze okokucina. Ngemva kwalokho ukhothamisa ikhanda abesenikela ngokuphila kwakhe. (Mak. 15:37; Luk. 23:46; Joh. 10:18; 19:30) Ufa ngendlela ebuhlungu futhi eyangisayo. w21.04 16 ¶4

UJesu watshela abaphostoli bakhe abangu-11 abathembekileyo ngezivumelwano ezimbili, isivumelwano esitsha lesivumelwano soMbuso. (Luk. 22:20, 28-30) Izivumelwano lezo zazizakwenza ukuthi abaphostoli labo kanye labanye abalutshwana babe ngamakhosi kanye labaphristi ezulwini. (Isam. 5:10; 14:1) Okumele badle isinkwa banathe lewayini eSikhumbuzweni ngabagcotshiweyo abaseselapha emhlabeni, abasezivumelwaneni lezi ezimbili. UJehova ubanike ithemba elimangalisayo lokuyaphila ezulwini bengasafi, bebusa loJesu Khristu okhazimulayo kanye labanye abe-144 000. Kanti njalo bazakuba lesibusiso esikhulu sokubona uJehova uNkulunkulu ngokwakhe! (1 Khor. 15:51-53; 1 Joh. 3:2) Abagcotshiweyo bayakwazi ukuthi kumele bahlale bethembekile baze bafe.—2 Tim. 4:7, 8. w22.01 21 ¶4-5

Kwakulezigebenga ezimbili ezazibethelwe ziphahle uJesu. (Luk. 23:40, 41) Esinye sazo sathi kuJesu: “Ungikhumbule nxa ufika eMbusweni wakho.” (Luk. 23:42) UJesu wakhuluma amazwi ayenika isigebenga lesi esasesizakufa ithemba ngoba wayekwazi ukuthi uYise ulesihawu. (Hubo. 103:8; Heb. 1:3) UJehova uzimisele sibili ukusithethelela lokusitshengisa isihawu, kodwa ukuze enze njalo kumele sizisole ngezono esazenzayo futhi sitshengise ukuthi silokholo emhlatshelweni kaJesu Khristu. (1 Joh. 1:7) Abanye kubathwalisa nzima ukukholwa ukuthi uJehova angazithethelela izono abazenza kudala. Nxa ungomunye wabo, cabanga ngalokhu: UJesu wathi esezakufa, watshengisa indoda eyayiyisigebenga isihawu lanxa yayisanda kuqalisa ukuba lokholo kuye. Pho kuthiwani ngezinceku zikaJehova ezithembekileyo? Akuthandabuzwa ukuthi uJehova uzazitshengisa isihawu.—Hubo. 51:1; 1 Joh. 2:1, 2. w21.04 9 ¶5-6

Zinengi izinto uJesu azenzayo ngokuhlala ethembekile kuze kube sekufeni. Okokuqala, watshengisa ukuthi uSathane ungusomangase. Watshengisa ukuthi umuntu ongelasono angaqhubeka ethembekile kungelani lokuthi uSathane wenzani. Okwesibili, uJesu wanikela ngokuphila kwakhe ukuze kube yinhlawulo. Ukunikela ngokuphila kwakhe kwenza abantu abalesono babe ngabangane bakaNkulunkulu futhi babe lethemba lokuthola ukuphila okungapheliyo. Okwesithathu, uJesu watshengisa ukuthi uJehova nguMbusi olungileyo futhi wangcwelisa ibizo likaYise. Kasiphileni usuku ngalunye angathi lilanga lethu lokucina lokutshengisa ukuthi sithembekile. Singenza njalo, lanxa sesikhangelane lokufa singenelisa ukuthi, “Jehova, ngenze konke okusemandleni ami ukuthi ngihlale ngithembekile, ngatshengisa ukuthi uSathane ungusomangase futhi ngalwela ibizo lakho kanye lobukhosi bakho!” w21.04 12 ¶13-14

UJesu umangalelwa ngento angayenzanga abesedliwa licala. Ngemva kwalokho wenziwa inhlekisa ahlukuluzwe kabuhlungu, abesebethelwa izandla lenyawo esigodweni. Ukuphefumula lokuvula nje umlomo ekhuluma kumzwisa ubuhlungu obukhulu. Kodwa kumele akhulume ngoba kukhona okuqakathekileyo okufanele akutsho. Amazwi uJesu awatsho esezakufa alezifundo eziqakathekileyo sibili! Asikhumbuza ukuthi kufanele sithethelele abanye, njalo sithembe ukuthi uJehova uzasithethelela. Sibusisiwe ngokuba labafowethu labodadewethu abazimisele ukusincedisa, kodwa kumele silucele uncedo lolo ukuze siluthole. Siyakwazi ukuthi uJehova uzasincedisa siqinisele kungelani lobunzima obusehlelayo. Kanti njalo sifunde ukuthi kuqakathekile ukuphila usuku ngalunye angathi lilanga lethu lokucina lokutshengisa ukuthi sithembekile, siqiniseka ukuthi ukuphila kwethu kuvikelekile ezandleni zikaJehova. w21.04 8 ¶1; 13 ¶17

Ukulandela amanyathelo kaJesu kuyisa ekuphileni okungapheliyo. Ngesikhathi ijaha elinothileyo libuza uJesu ukuthi lingenzani ukuze lithole ukuphila okungapheliyo, waliphendula wathi: ‘Buya uzokuba ngumlandeli wami.’ (Mat. 19:16-21) Watshela amanye amaJuda ayengakholwa ukuthi unguKhristu wathi: ‘Izimvu zami ziyangilandela. Ngizinika ukuphila okungapheliyo.’ (Joh. 10:24-29) Sitshengisa ukuthi silokholo kuJesu ngokusebenzisa lokho akutshoyo langokulingisela akwenzayo. Nxa singakwenza lokho, sizahlala sisendleleni eyisa ekuphileni okungapheliyo. (Mat. 7:14) Kumele siqale simazi uJesu ukuze silandele amanyathelo akhe eduze. ‘Ukumazi’ ngeke kwenzakale ngelanga elilodwa, kumele siqhubeke sisiba mazi. Kufanele siqhubeke sifunda ngobuntu bakhe, ngendlela ayecabanga ngayo layeziphatha ngayo. Kungelani lokuthi silesikhathi esinganani singoFakazi bakaJehova, kufanele siqhubeke sisiba mazi uJehova leNdodana yakhe. w21.04 4 ¶9-10

Kumele ukuthi kulezikhathi lapho umphostoli uPhawuli ayezisola khona ngezinto ayezenze engakabi ngumKhristu. Yikho akumangalisi ukuthi wayezibona eyisoni ‘esibi kulazo zonke.’ (1 Tim. 1:15) Wayehlukuluza amaKhristu emadolobheni atshiyeneyo, efaka amanye emajele futhi evotela ukuthi amanye abulawe. (ImiSeb. 26:10, 11) Akuthandabuzwa ukuthi wayephatheka kubi nxa wayehlangana lamaKhristu asakhulayo ayelabazali ababulalisayo. Wayezisola sibili ngamaphutha ayewenzile kodwa wayekwazi ukuthi akulalutho ayengalwenza ukuthi atshintshe okwakwenzakele. Phela ayesechithekile engasabutheki. Wayekholwa ukuthi uKhristu wamfela yikho wabhala wathi: “Ngiyilokho engiyikho khona ngenxa yomusa omkhulu kaNkulunkulu.” (1 Khor. 15:3, 10) Sifundani? Akumelanga uthandabuze ukuthi uKhristu wakufela lokuthi wakuvulela indlela yokuthi ube ngumngane oseduze kaJehova. (ImiSeb. 3:19) Okuqakathekileyo kuNkulunkulu yilokho esimenzela khona khathesi lesizamenzela khona esikhathini esizayo, hatshi amaphutha esawenza kudala.—Isaya. 1:18. w21.04 23 ¶11

Lanxa amaJuda amanengi ayengakhangelelanga ukuthi uMesiya afe, nanku iMibhalo eyayikutshilo: “Wanikela ukuphila kwakhe ekufeni, wabalwa ndawonye lezoni; ngoba wathwala izono zabanengi, wancengela izoni.” (Isaya. 53:12) Yikho amaJuda kwakungamelanga akhubeke ngesikhathi uJesu ebulawa njengesoni. Lamuhla kumele sibe lazi iqiniso ukuze singakhubeki. ENtshumayelweni yaseNtabeni uJesu waxwayisa ababemlalele ukuthi abantu babezakhuluma ngabo “yonke imihlobo yezinto ezimbi futhi ezingamanga.” (Mat. 5:11) Amanga la avela kuSathane. Usebenzisa abaphikisi ukuthi bafafaze amanga ayingozi ngalabo abathanda iqiniso. (Isam. 12:9, 10) Akumelanga siwalalele amanga la. Kanti njalo akumelanga siwavumele ukuthi asenze sesabe ukukhonza uNkulunkulu kumbe ukuthi axegise ukholo lwethu. w21.05 11 ¶14; 12 ¶16

Ncedisa umfundi wakho ukuthi athembe uJehova. UJesu waqinisekisa abafundi bakhe ukuthi uJehova wayezabancedisa ngenxa yokuthi wayebathanda. (Mat. 10:19, 20, 29, 30) Tshela umfundi wakho ukuthi uJehova uzamncedisa laye. Ungamsiza ukuthi athembele kuJehova ngokuthandaza laye mayelana lalokho afuna ukukwenza. UFranciszek ohlala ePoland uthi: “Owayengifundisa wayejayele ukuqamba lokho engangifuna ukukwenza nxa ethandaza. Ngathi ngibona uJehova ephendula imithandazo yakhe, lami ngahle ngaqalisa ukuthandaza. Ngabona indlela uJehova angincedisa ngayo ngesikhathi kumele ngicele amalanga emsebenzini wami omutsha ukuze ngiye emihlanganweni yebandla lasemhlanganweni wesabelo.” UJehova ulendaba labantu esibafundisa iBhayibhili. Uyakwazi ukuthi ababafundisayo basebenza nzima ukuze babancede basondele kuye futhi lokhu kwenza abathande. (Isaya. 52:7) Lanxa khathesi ungelasifundo seBhayibhili osiqhubayo, ungenelisa ukuncedisa abafunda iBhayibhili ukuthi bathuthuke baze babhabhathizwe ngokuhamba labanye abamemezeli nxa besiyabafundisa. w21.06 7 ¶17-18

Sitshengisa ukuthi siyasiqakathekisa isibusiso sokuba leLizwi likaNkulunkulu ngokulibala nsuku zonke. Kumele sibe lesikhathi esihleliweyo sokutaditsha iBhayibhili, kungabi yisivukampunzane. Nxa singalitaditsha nsuku zonke ukholo lwethu luzahlala luqinile. Thina asifanani labantu “abahlakaniphileyo labafundileyo” bomhlaba lo ngoba olwethu ukholo lusekelwe eLizwini likaNkulunkulu. (Mat. 11:25, 26) Ukubala iBhayibhili kusincede sakwazi ukuthi kungani izinto emhlabeni ziqhubeka zisiba zimbi lokuthi uJehova uzakwenzani ngakho. Yikho asizimiseleni ukuqinisa ukholo lwethu lokuncedisa abantu abanengi ukuthi bakholwe kuMdali wethu. (1 Tim. 2:3, 4) Kanti njalo asiqhubekeni silindele isikhathi lapho bonke abantu emhlabeni bezadumisa uJehova ngamazwi akuSambulo 4:11 athi: ‘Ufanele Jehova Nkulunkulu wethu ukwamukela inkazimulo ngoba wadala zonke izinto.’ w21.08 19 ¶18-20

Abadala bangabelusi futhi balomsebenzi wokunika abanye iseluleko nxa kudingeka. Kumele banike abanye iseluleko esincedayo lesikhuthazayo ‘lesiletha intokozo enhliziyweni.’ (Zaga. 27:9) Abadala bayabathanda abafowabo labodadewabo. Ngezinye izikhathi batshengisa ukuthi bayabathanda ngokweluleka lowo osephambuka. (Gal. 6:1) Kodwa umdala engakakhulumi lalowomuntu kuhle ukuthi acabangisise ngalokho uPhawuli akutshoyo mayelana lothando. Wathi: ‘Uthando luyabekezela njalo lulomusa. Lubekezelela zonke izinto, lukholwa zonke izinto, luthemba zonke izinto, luqinisela ezintweni zonke.’ (1 Khor. 13:4, 7) Ukucabangisisa ngamavesi la kuzanceda umdala ukuthi ahlolisise izizatho ezenza afune ukunika iseluleko lokuthi asinike ngendlela elothando. Kubalula ukuthi lowo ophiwa iseluleko asamukele nxa enanzelela ukuthi umdala ulendaba laye. w22.02 14 ¶3; 15 ¶5

UJehova wadala izingilosi labantwabakhe emhlabeni bephelele, bengela ngitsho isici. Kodwa enye ingilosi eyaba nguSathane (okutsho “uMphikisi”) yamhlamukela futhi yabangela ukuthi abantu abapheleleyo, u-Adamu lo-Eva labo bamhlamukele. Lezinye izingilosi labanye abantu labo bahlamuka. (Jud. 6) Bamdanisa sibili uJehova. Lanxa kunjalo, wabekezela futhi uzaqhubeka esenza njalo kuze kufike isikhathi lapho azabatshabalalisa khona bonke abahlamuki. Ngemva kwalokho yena lalabo abaqotho kuye bazathokoza ngoba kuyabe kungaselasizatho sokuthi baqhubeke bebekezelela ububi obusemhlabeni lo. USathane wasola uJobe lazo zonke izinceku zikaJehova ezithembekileyo esithi zikhonza uJehova ngoba kulokuthile ezikufuna kuye. (Jobe. 1:8-11; 2:3-5) UDeveli ulokhu emangalela abantu lalamuhla. (Isam. 12:10) Singancedisa ekutshengiseni ukuthi uSathane ulamanga ngokuqinisela nxa siphakathi kobunzima langokuqhubeka siqotho kuJehova ngoba simthanda. w21.07 9 ¶7-8

Umphostoli uPhawuli wasebenzisa umzekeliso olamandla ukuze atshengise ukuthi kuqakatheke kangakanani ukutshintsha indlela esenza ngayo. Wathi kumele sibethele ubuntu bethu obudala “esigodweni.” (Rom. 6:6) UJesu wayezimisele ukubethelwa esigodweni ukuze athokozise uJehova. Lathi kumele sizimisele ukutshiya loba yiphi imicabango lemikhuba uJehova ayizondayo. Asingeke sibe lomzwangedwa ohlanzekileyo lethemba lokuthola ukuphila okungapheliyo nxa singakwenzanga lokhu. (Joh. 17:3; 1 Phet. 3:21) UJehova kasoze atshintshe izimiso zakhe ukuze zihambelane lalokho thina esikufunayo. Yithi okumele sitshintshe ubuntu bethu ukuze buhambelane lalokho yena akufunayo. (Isaya. 1:17, 18; 55:9) Lanxa usubhabhathiziwe kumele uqhubeke ulwisana lezifiso ezimbi. Thandaza ucele uJehova akuncedise njalo ungazithembi kodwa uthembe umoya wakhe ongcwele. (Gal. 5:22; Flp. 4:6) Kumele sisebenze nzima nxa sifuna ukuhlubula ubuntu obudala futhi singabubuyeleli. w22.03 6 ¶15-17

UJehova uthembisa ukuthi uzasinika ukudla, izigqoko lendawo yokuhlala nxa sifuna kuqala uMbuso wakhe futhi silandela lokho akutshoyo. (Mat. 6:33) Nxa sisikholwa isithembiso lesi kasisoze sicabange ukuthi izinto ezisemhlabeni lo zizasivikela njalo zisenze sithokoze. Siyakwazi ukuthi ukwenza lokho okufunwa nguJehova yikho kuphela okuzakwenza sibe lokuthula. (Flp. 4:6, 7) Lanxa silayo imali yokuthenga izinto ezinengi kumele sizibuze ukuthi silaso yini isikhathi lamandla okuthi sizisebenzise futhi sizigcine zisesimeni esihle. Kasisoze sicine sesizithanda kakhulu yini izinto lezi? Khumbula ukuthi uNkulunkulu usinike umsebenzi wokwenza. Yikho akumelanga sivumele loba yini isiphambanise. Kasifuni ngitsho ukwenza njengejaha elingazange lilandele uJesu ngenxa yokuthi lalizithanda kakhulu izinto elalilazo. Lokho kwenza lalahlekelwa yisibusiso sokukhonza uJehova lesokuba ngenye yamadodana akhe.—Mak. 10:17-22. w21.08 6 ¶17

Nxa ungataditsha iBhayibhili uzafunda ngobuntu bukaJehova obuhle futhi ubuntu lobo buyafanana lowafunda ngabo ngesikhathi uhlola izinto ezidaliweyo. Ukufunda ngobuntu bakhe kwenza sikholwe ukuthi ukhona sibili. (Eks. 34:6, 7; Hubo. 145:8, 9) Nxa ungaqhubeka usibamazi kuhle uJehova, ukholo lwakho luzaqina, umthande kakhulu njalo ube ngumngane wakhe oseduze. Tshela abanye ngoNkulunkulu. Kodwa kuthiwani nxa ungakwazi ukuthi umphendule njani umuntu othandabuzayo ukuthi uNkulunkulu ukhona? Zama ukudinga ukuthi amabhuku ethu ayichasisa njani indaba le ubusuxoxa laye ngakho. Ungacela omunye umfowethu kumbe udadewethu akuncedise. Ukuchwayisisa kuzakunceda kungelani lokuthi umuntu omtshumayezayo uyakwamukela lokho okutshiwo liBhayibhili loba hatshi. Kuzaqinisa ukholo lwakho. w21.08 18 ¶14-15

Akudingeki ukuthi size sitshiye zonke izinto esizithandayo ukuze sithokozise uJehova. (UmTshu. 5:19, 20) Kodwa nxa singayekela ukwenza okunengi ekukhonzeni ngenxa yokuthi asifuni ukutshiya ezinye izinto esizithandayo, singacina sesifanana lendoda esemzekelisweni kaJesu. Yasebenza nzima ukuze ibe lezinto ezinengi ezinhle kodwa kayizange izihluphe ngoNkulunkulu. (Luk. 12:16-21) Nxa sisebunzimeni siyathandaza sicela ukuthi uJehova asincedise besesicabangisisa ngokuthi singenzani. (Zaga. 3:21) UJehova usibusisa ngezindlela ezinengi. Sitshengisa ukuthi siyambonga ngezibusiso lezi ngokwenza konke esingakwenza ukuthi simdumise. (Heb. 13:15) Lokhu kuhlanganisa ukwenza izinto ezitshiyeneyo ekumkhonzeni. Nxa singazenza sizathola ezinye izibusiso. Nsuku zonke, asidingeni izindlela ‘esinganambitha ngazo sibone ukuthi uJehova muhle.’ (Hubo. 34:8) Nxa sisenza njalo siyabe silingisela uJesu owathi: “Ukudla kwami yikwenza intando yalowo ongithumileyo lokuqeda umsebenzi wakhe.”—Joh. 4:34. w21.08 30-31 ¶16-19

USathane ufuna sizigqaje. Uyakwazi ukuthi nxa singazigqaja sizakuba njengaye futhi singakutholi ukuphila okungapheliyo. Yikho umphostoli uPhawuli waxwayisa wathi umuntu ‘angazikhukhumeza abesethola ukwahlulelwa okunjengokukaDeveli.’ (1 Tim. 3:6, 7) Lokhu kungenzakala kuloba ngubani kungelani lokuthi ulesikhathi esinganani ekhonza uJehova. Abantu abazigqajayo abalandaba labanye. USathane uzama ukwenza ukuthi sicabange kakhulu ngathi ukwedlula indlela esicabanga ngayo ngoJehova, ikakhulu nxa silenhlupho. Ngokwesibonelo, uke waqanjelwa amanga ngento ethile yini kumbe waphathwa kubi? USathane angathaba nxa ungasola uJehova kumbe inhlanganiso yakhe. Kanti njalo ufuna ucabange ukuthi ukwenza lokho okufunwa nguwe kulokulalela lokho okutshiwo nguJehova eLizwini lakhe yiyo yodwa indlela yokulungisa uhlupho lwakho.—UmTshu. 7:16, 20. w21.06 15 ¶4-5

UJehova wanika umphrofethi uHagayi umsebenzi oqakathekileyo. Kumele ukuthi uHagayi wayephakathi kwamaJuda abuyela eJerusalema ngo-537 B.C.E. evela eBhabhiloni lapho ayethunjwe khona. Ngemva kwezinyanga ezithile izinceku zikaJehova lezi ezithembekileyo zifike eJerusalema, zabeka isisekelo sethempeli. (Ezra. 3:8, 10) Kodwa kungakayi ngaphi kwenzakala into edanisayo. Abantu bakaJehova baphela amandla njalo bama ukwakha ngenxa yokuphikiswa yizizwe ezazingomakhelwane babo. (Ezra. 4:4; Hag. 1:1, 2) Yikho ngo-520 B.C.E. uJehova wathuma uHagayi ukuthi abavuselele ukuze bakhuthale njalo baqedise ukwakha ithempeli. (Ezra. 6:14, 15) Amazwi uJehova athuma uHagayi ukuthi awatsho kumaJuda ayengawokuwanceda ukuthi aqinise ukholo lwawo. Kumele ukuthi umutsho othi “uJehova wamabutho” wawakhuthaza sibili. UJehova ungumlawuli webutho elikhulu lezingilosi yikho amaJuda kwakumele amthembe ukuze aphumelele. w21.09 15 ¶4-5

Lamuhla oFakazi bakaJehova emhlabeni wonke bayathandana futhi bamanyene. Sitshiyene kakhulu lamanye amasonto ngoba thina siyimuli lanxa sivela emazweni atshiyeneyo njalo silamasiko atshiyeneyo. Kuyakhanya ukuthi siyathandana sibili nxa sisemihlanganweni yethu yebandla, eyeziqinti leyezabelo futhi lokhu kwenza singathandabuzi ukuthi sikhonza uJehova ngendlela emthokozisayo. (Joh. 13:34) IMibhalo isikhuthaza ukuthi ‘sithandane kakhulu.’ (1 Phet. 4:8) Okunye esingakwenza ukuze sitshengise ukuthi siyabathanda abanye yikubathethelela lokubabekezelela nxa besiphambanisa. Kanti njalo siyazama ukuba ngabantu abaphanayo futhi abalomusa kubo bonke abasebandleni kuhlanganise lalabo abangabe besiphambanisile. (Kol. 3:12-14) Ukwenza njalo kuyatshengisa sibili ukuthi singamaKhristu eqiniso. w21.10 22 ¶13-14

Ukususwa kungasinceda yini isoni esingaphendukiyo ukuthi sitshintshe? Ye, kungasinceda. Abafowethu labodadewethu abanengi ababeqhubeka besenza isono ngabomo bathi ukususwa kwabo kwabanceda bananzelela ukuthi babephambanise kangakanani. Lokhu kwenza baphenduka futhi batshintsha indlela ababeziphatha ngayo basebebuyela kuJehova. (Heb. 12:5, 6) Cabanga ngomzekeliso olandelayo oveza ukuthi ukususwa komuntu yindlela kaJehova yokutshengisa abafowethu labodadewethu ebandleni isihawu. Umelusi unanzelela ukuthi enye yezimvu zakhe iyagula. Uyakwazi ukuthi ukuze ayelaphe umkhuhlane lo oyihlaseleyo kuyabe kumele ayisuse emhlambini. Kodwa izimvu zithanda ukuhlala zingumhlambi yikho nxa enye ingehlukaniswa lezinye ayihlaliseki. Kambe sesingathi umelusi lo ulolunya kumbe isihluku nxa angasusa imvu egulayo emhlambini? Hatshi, uyakwazi ukuthi imvu le ingathelela ezinye umkhuhlane nxa ingaqhubeka isemhlambini. Yikho ngokwehlukanisa egulayo kwezinye uyabe evikela umhlambi wonke. w21.10 10 ¶9-10

Kuyisibusiso sibili ukuba semulini ethandanayo yabafowethu labodadewethu abasemhlabeni wonke. Sifuna abantu abanengi bazokhonza uNkulunkulu ndawonye lathi. Yikho akumelanga senze loba yini engabangela ukuthi abantu bakhulume kubi ngoJehova kumbe ngabantu bakhe. Kumele sizame ukuziphatha ngendlela ezakwenza abantu bafune ukuzwa izindaba ezinhle. Kwesinye isikhathi abanye bangaseyisa kumbe basihlukuluze ngenxa yokuthi silalela uBaba wethu osezulwini. Kuyini okungasinceda nxa sisesaba ukutshela abanye ngalokho esikukholwayo? Yikuqiniseka ukuthi uJehova leNdodana yakhe bazasincedisa. UJesu watshela abafundi bakhe ukuthi kwakungamelanga bakhathazeke ngokuthi bazawabeka njani amazwi abo loba ngokuthi bazakuthini. Kungani kwakungamelanga bakhathazeke? Wathi: “Elizakukhuluma lizakuphiwa ngalesosikhathi. Kayisini elizikhulumelayo, kodwa ngumoya kaYihlo okhuluma usebenzisa lina.”—Mat. 10:19, 20. w21.09 24 ¶17-18

UMosi laye wathi uJehova uyisiphephelo. (Hubo. 90:1, NWT) Kanti njalo esezakufa wakhuluma amazwi athinta inhliziyo. Wathi: “UNkulunkulu uyisiphephelo kusukela ezinsukwini zakudala, Ingalo zakhe zaphakade zingaphansi kwakho.” (Dute. 33:27, NWT) Umutsho othi “ingalo zakhe zaphakade zingaphansi kwakho” usitshelani ngoJehova? Asesabi lutho nxa uJehova eyiSiphephelo sethu. Kodwa ngezinye izikhathi siyadana futhi siswele amandla okuvuka. UJehova uzakwenzani ngezikhathi ezinje? (Hubo. 136:23) Uzafaka ingalo zakhe ngaphansi kwethu, asiphakamise kuhle kuhle njalo asincedise sime. (Hubo. 28:9; 94:18) Ukwazi ukuthi uJehova uzahlala esincedisa kwenza sikhumbule izinto ezimbili eziqakathekileyo. Okokuqala, uJehova uzahlala esivikela kungelani lokuthi sihlala ngaphi. Okwesibili, uBaba wethu osezulwini osithandayo ulendaba lathi sibili. w21.11 6 ¶15-16

UJesu wayekwazi ukuthi ukungahlulelwa kuhle kungaluxegisa ukholo lwabafundi. Yikho walandisa umzekeliso otholakala ebhukwini likaLukha ukuze abancedise baqinisele nxa besahlulelwa kubi. Wakhuluma ngomfelokazi owayelokhu encenga umahluleli ongalunganga ukuthi ayiphathe kuhle indaba yakhe. Umfelokazi lo wayengathandabuzi ukuthi nxa angaphikelela ecela uzaluthola uncedo aludingayo. Umahluleli wacina esesilalele isikhalazo sakhe. Sifundani? UJehova wahlulela kuhle, yikho uJesu wathi: “Manje uNkulunkulu ngeke yini abe leqiniso ukuthi abakhethiweyo bakhe abakhala kuye emini lebusuku bahlulelwa kuhle?” (Luk. 18:1-8) UJesu waqhubeka wathi: “Nxa iNdodana yomuntu ifika izaluthola yini ukholo olunje emhlabeni?” Nxa sahlulelwe kubi kumele sibekezele futhi siphikelele ekuthandazeni. Lokhu kuzatshengisa ukuthi silokholo oluqinileyo njengolomfelokazi osemzekelisweni kaJesu. Nxa silokholo olunje sizaqiniseka ukuthi uJehova uzasincedisa. Kanti njalo kumele sikholwe ukuthi umthandazo uyasebenza. w21.11 23 ¶12; 24 ¶14

Lina elisakhulayo, liyake libone angani ukulandela lokho uJehova akutshoyo kuyalicindezela? Lokho yikho kanye uSathane afuna likucabange. Ufuna lihawukele okwenziwa yilabo abahamba endleleni ebanzi abakhanya angani bayakholisa. Angasebenzisa okwenziwa ngabanye bakho esikolo kumbe lokho okubona ku-inthanethi ukuze akwenze ucabange ukuthi uyasalela. USathane ufuna ucabange ukuthi ukulandela lokho okutshiwo nguJehova kuyakuvimba ukuthi ukholise impilo. Kodwa khumbula ukuthi uSathane kafuni ukuthi labo abahamba endleleni yakhe bakwazi ukuthi ibasa ngaphi. (Mat. 7:13, 14) UJehova yena ukwenze kwacaca ukuthi uzatholani nxa ungaqhubeka usendleleni eya ekuphileni.—Hubo. 37:29; Isaya. 35:5, 6; 65:21-23. w21.12 23 ¶6-7

Siyakwazi ukuthi kumele sithethelele abanye, yikho okuqondileyo okumele sikwenze. Kodwa kwezinye izikhathi kungasithwalisa nzima. Umphostoli uPhetro laye wayengabe ezizwa njalo ngezinye izikhathi. (Mat. 18:21, 22) Pho kuyini okungasinceda? Okokuqala yikucabangisisa ngendlela uJehova akuthethelele ngayo. (Mat. 18:32, 33) Lanxa singafanelanga ukuthi asithethelele, usithethelela ngenhliziyo yonke. (Hubo. 103:8-10) Kanti njalo “silomlandu wokuthi sithandane.” Yikho kasizikhetheli ukuthi siyafuna yini ukuthethelela loba hatshi, silomlandu wokuthi senze njalo. (1 Joh. 4:11) Okwesibili, cabangisisa ngokuzakwenzakala nxa ungathethelela. Singanceda umuntu oyabe esiphambanisele, senze kube lokumanyana ebandleni, sivikele ubungane bethu loJehova njalo sethule umthwalo osindayo emahlombe ethu. (2 Khor. 2:7; Kol. 3:14) Okwesithathu, thandaza kuJehova onguye ositshela ukuthi sithethelele. Ungavumeli uSathane aphambanise ubudlelwano olabo labafowenu labodadewenu. (Efe. 4:26, 27) Sidinga ukuncediswa nguJehova ukuze singabanjwa ngumjibila lo kaSathane. w21.06 22 ¶11; 23 ¶14

UDavida wayezulelwa ngamanqe. USawuli inkosi yako-Israyeli elamandla, yayifuna ukumbulala. Ngesikhathi uDavida ebaleka waphelelwa yikudla wasesiya edolobheni leNobi wafika wacela izinkwa ezinhlanu kuphela. (1 Sam. 21:1, 3) Ngokuhamba kwesikhathi yena lamadoda ayehamba lawo bacatsha ebhalwini. (1 Sam. 22:1) Kuyini okwabangela ukuthi uDavida abe sesimeni lesi? USawuli wayelomhawu ngoDavida ngoba wayethandwa ngabantu abanengi futhi enqoba ezimpini ezinengi. USawuli wayekwazi ukuthi uJehova wayesekhethe uDavida ukuthi abe yinkosi esikhathini esizayo. (1 Sam. 23:16, 17) USawuli wayelokhu eyinkosi yako-Israyeli futhi wayelebutho elikhulu labasekeli abanengi. Yikho uDavida kwakumele abaleke ukuze angabulawa. Kambe uSawuli wayecabanga ukuthi wayengavimba inhloso kaJehova yokuthi uDavida abe yinkosi? (Isaya. 55:11) IBhayibhili alisitsheli lutho ngakho. Kodwa nanku esikwaziyo: USawuli wayezidonsela amanzi ngomsele. Phela labo abalwisana loJehova abakaze baphumelele! w22.01 2 ¶1-2

UJesu wayekhuthele ekutshumayeleni. Watshengisa ukuthi uyabathanda abantu ngokuqhubeka ebafundisa loba nini lapho ayethola khona ithuba. (Luk. 19:47, 48) Kuyini okwakumenza enze njalo? Wayebazwela abantu. Kwezinye izikhathi babesiba banengi abantu ababefuna ukumuzwa efundisa okokuthi yena labafundi bakhe babeze ‘baswele lethuba lokudla.’ (Mak. 3:20) Kanti njalo watshumayeza enye indoda ebusuku ngoba yiso isikhathi eyayifuna ukuxoxa ngaso. Abantu abanengi abaqala belalela uJesu abazange babe ngabafundi bakhe kodwa bonke ababemuzwa babesala befundisiwe sibili. Lamuhla lathi sifuna ukunika wonke umuntu ithuba lokuzwa izindaba ezinhle. (ImiSeb. 10:42) Kulokuthi sitshumayele ngesikhathi esisifunayo, kumele sizimisele ukutshintsha isikhathi esitshumayela ngaso ukuze senelise ukuthola abantu abanengi. Nxa singenza njalo uJehova uzathokoza. w22.01 17 ¶13-14

Lamuhla abantu abanengi ababathembi labo abasezikhundleni. Sebenanzelele ukuthi ohulumende kanye labezomthetho bavikela abanothileyo labalamandla kodwa kababancedi kangako abangabayanga. Kanti njalo abanye abafundisi benza izinto ezimbi. Lokhu sekubangele ukuthi abanye abantu bangasamthembi uNkulunkulu. Yikho nxa sifunda lomuntu iBhayibhili silomsebenzi wokumncedisa ukuthi athembe uJehova kanye lalabo ababekileyo ukuthi basikhokhele. Kodwa esifunda labo iBhayibhili ayisibo bodwa okumele bathembe uJehova kanye lenhlanganiso yakhe. Lalabo asebelesikhathi eside bekhonza uJehova akumelanga bathandabuze ukuthi indlela enza ngayo izinto ihlala ingcono kulazo zonke. Ngezinye izikhathi kungaba lezimo ezingenza singamthembi. w22.02 2 ¶1-2