May

UJehova watshengisa ukuthi uyasithanda ngokufaka amaVangeli amane eLizwini lakhe ukuze siyazi iNdodana yakhe. AmaVangeli la asitshela ngempilo lenkonzo kaJesu. Asitshela ngalokho akutshoyo layekwenza njalo aveza lendlela ayezizwa ngayo. Asinceda lokuthi ‘sicabangisise’ ngesibonelo sakhe. Singathi amumethe amanyathelo uJesu awatshiyayo, yikho ukutaditsha amaVangeli kusinceda simazi ngcono uJesu. Nxa singakwenza lokho, sizawalandela eduze amanyathelo akhe. Nxa sifuna ukufunda okunengi emaVangelini, kakumelanga siphonguwabala nje, kumele siwataditshe okuzwayo njalo sicabangisise ngalokho esikubalayo. (Khangela uJoshuwa 1:8.) Kubone ngelihlo lengqondo obala ngakho. Zama ukubona okwakusenzakala, uzwe lemisindo yakhona, uzame lokuzwisisa ukuthi kwakungabe kunjani. Chwayisisa emabhukwini esiwanikwa yinhlanganiso kaJehova. w21.04 4-5 ¶11-13

Kusasele amakhulu eminyaka ukuthi uJesu abuye emhlabeni, uJehova watsho eLizwini lakhe ukuthi uMesiya wayezathengiswa ngenhlamvu zesiliva ezingu-30. (Zek. 11:12, 13) Lowo owayezamthengisa wayezabe engumngane wakhe osekhwapheni. (Hubo. 41:9) Umphrofethi uZekhariya laye wabhala wathi: “Tshaya umalusi, izimvu zizahlakazeka.” (Zek. 13:7) Abantu abaqotho babengasoze bakhubeke ngoJesu bebona izinto lezi zisenzakala. Ukholo lwabo lwaluzaqina nxa babebona iziphrofetho lezi zigcwaliseka. Into efananayo iyenzakala yini lamuhla? Ye. Ngezinsuku zalamuhla, oFakazi abalutshwana abaziwayo batshiye iqiniso baba ngabahlamuki basebezama ukuphambula abanye. Basakaze izindaba ezimbi, ezidukisayo futhi ezingamanga mayelana laboFakazi bakaJehova kumaphephandaba, kurediyo, ku-TV laku-inthanethi. Kodwa labo abaqotho kabakhubeki. Bayakwazi ukuthi iBhayibhili latsho ukuthi izinto lezi zizakwenzakala.—Mat. 24:24; 2 Phet. 2:18-22. w21.05 11 ¶12; 12-13 ¶18-19

IMibhalo ikwenza kucace ukuthi indlela abantu abazwisisa ngayo iqiniso iqhubeka ithuthuka ngokuhamba kwesikhathi. (Kol. 1:9, 10) UJehova uveza iqiniso kancane kancane, yikho kumele sizimisele ukubekezela njengoba ukukhanya kweqiniso kuqhubeka kukhula. Nxa iQula Elikhokhelayo lingananzelela ukuthi kumele sitshintshe indlela esizwisisa ngayo kumbe esenza ngayo okuthile, lihle liphangise lenze njalo. Lamuhla amasonto amanengi atshintsha izimfundiso zawo ngenxa yokuthi afuna ukuthabisa amalunga awo kumbe abantu bomhlaba. Kodwa oFakazi bakaJehova bona benza utshintsho ngenxa yokuthi bafuna ukusondela kuNkulunkulu futhi bamkhonze ngendlela abayitshengiswa nguJesu. (Jak. 4:4) Nxa sisenza utshintsho ayisikho ukuthi siyabe silandela imibono yabantu bomhlaba esitshintshile kodwa siyabe sesilizwisisa ngcono iBhayibhili. Siyalithanda sibili iqiniso!—1 Thes. 2:3, 4. w21.10 22 ¶12

Ungenzani nxa ulesizungu? Cabangisisa ngendlela uJehova akuncedisa ngayo. (Hubo. 55:22) Lokhu kuzakunceda ubone ukuthi kawuwedwa. Cabanga langendlela uJehova ancedisa ngayo abafowethu labodadewethu abalenhlupho. (1 Phet. 5:9, 10) Umfowethu okuthiwa nguHiroshi osekuleminyaka enguye yedwa uFakazi emulini yangakibo uthi: “Ukwazi ukuthi sonke senza okusemandleni ethu ekukhonzeni uJehova kungasikhuthaza thina okuyithi sodwa oFakazi emulini zethu.” Kanti njalo hlala uthandaza, ubala iBhayibhili futhi ungena imihlangano yebandla. Nxa uthandaza tshela uJehova yona kanye indlela ozizwa ngayo. Kuqakathekile ukubala iLizwi likaNkulunkulu nsuku zonke futhi ucabangisise ngendaba ezikulo ezitshengisa ukuthi uJehova uyakuthanda. Amanye amaKhristu abamba ngekhanda amavesi aduduzayo njengeHubo 27:10 lo-Isaya 41:10. Abanye balalela okurekhodiweyo ngesikhathi belungiselela imihlangano yebandla kumbe bebala iBhayibhili. Bathi lokhu kwenza bangabi lesizungu kangako. w21.06 9-10 ¶5-8

Ufelwe ngumuntu omthandayo yini? Bala izindaba eziseBhayibhilini zalabo abavuswayo ukuze ukholwe sibili ukuthi abafileyo bazavuswa. Uzwa ubuhlungu yini ngokususwa kwelunga lemuli ebandleni? Taditsha ukuze ungathandabuzi ukuthi indlela uJehova alaya ngayo ihlala inceda kakhulu. Bona loba yiluphi uhlupho olukwehlelayo njengethuba lokuqinisa ukholo lwakho. Thululela uJehova isifuba sakho. Ungazehlukanisi labanye kodwa hlala useduze labafowenu labodadewenu. (Zaga. 18:1, NWT) Yenza izinto ezizakunceda uqinisele lanxa ukucabanga ngalokho okukwehleleyo kukwenza ukhale. (Hubo. 126:5, 6) Qhubeka ungena imihlangano yebandla, utshumayela njalo ubala iBhayibhili. Kanti njalo hlala ucabanga ngezibusiso ezimangalisayo uJehova azakunika zona esikhathini esizayo. Ukholo lwakho luzaqhubeka luqina nxa ubona indlela uJehova akuncedisa ngayo. w21.11 23 ¶11; 24 ¶17

Abafundi bakaJesu ‘banjengabancinyane’ ngayiphi indlela? Kanti ngobani umhlaba obabona beqakathekile? Ngabanothileyo, abadumileyo labalamandla. Kodwa abafundi bakaJesu bona kabanjalo. Yikho abantu bomhlaba lo bababona ‘bengabancinyane’ abangaqakathekanga. (1 Khor. 1:26-29) Kodwa uJehova kababoni njalo. Kuyini okwenza uJesu wakhuluma ‘ngalaba abancinyane’? Abafundi bakhe babembuze umbuzo lo: “Ngubani sibili omkhulu kulabo bonke eMbusweni wamazulu?” (Mat. 18:1) AmaJuda amanengi ngalesosikhathi ayeqakathekisa izikhundla lokuthi abantu bawabone eqakathekile. Esinye isikhwicamfundo sithi: “Amadoda amanengi ayeqakathekisa ukuhlonitshwa lokuba ngabantu abadumileyo ukwedlula loba yini.” UJesu wayekwazi ukuthi amaJuda amanengi ayezama ukuba ngcono kulabanye, yikho abafundi kwakufanele basebenze nzima ukuze batshintshe indlela ababecabanga ngayo. w21.06 20 ¶2; 21 ¶6, 8; 22 ¶9

Umphostoli uPhawuli uyisibonelo esihle kubadala. Ngokwesibonelo, kazange ayekele ukunika abazalwane baseThesalonika iseluleko ngesikhathi besidinga. Kodwa encwadini ababhalela zona waqala wabancoma ngomsebenzi abawenza ngenxa yokholo lothando lwabo langokuqinisela kwabo. Watshengisa ukuthi uyazwisisa izimo ababekuzo. Watsho ukuthi babethwele nzima lokuthi babeqinisela lanxa babehlukuluzwa. (1 Thes. 1:3; 2 Thes. 1:4) Waphinda wabatshela ukuthi babeyisibonelo esihle kwamanye amaKhristu. (1 Thes. 1:8, 9) Akuthandabuzwa ukuthi bathokoza sibili besizwa uPhawuli ebancoma ngale indlela. Kwakuzicacela ukuthi uPhawuli uyabathanda okwamagama. Lokhu yikho okwamenza wenelisa ukubanika iseluleko esincedayo kuzo zombili incwadi ababhalela zona.—1 Thes. 4:1, 3-5, 11; 2 Thes. 3:11, 12. w22.02 15 ¶6

USathane usebenzisa abafundisi benkolo zamanga ukuthi athi uJehova ulolunya lokuthi nguye obangela ukuthi abantu bahlupheke. Abanye baze bathi nxa abantwana besifa, uNkulunkulu nguye oyabe ebathethe ngoba efuna ezinye izingilosi ezulwini. Lokhu yikuthuka uNkulunkulu sibili! Thina siyakwazi ukuthi uJehova unguBaba olothando. Nxa singabanjwa umkhuhlane omubi kumbe sifelwe ngumuntu esimthandayo, kasiqali ukusola uNkulunkulu. Kodwa silokholo lokuthi ngelinye ilanga uzasilisa abagulayo, avuse labafileyo. Singatshela loba ngubani ofuna ukulalela, ukuthi uJehova unguNkulunkulu olothando. Lokhu kwenza amphendule lowo omeyisayo. (Zaga. 27:11) UJehova nguNkulunkulu olesihawu. Uyadana kakhulu nxa esibona sihlupheka mhlawumbe ngenxa yokuhlukuluzwa, ukugula loba amaphutha esiwenzayo. (Hubo. 22:23, 24) UJehova uzwa ubuhlungu nxa lathi siphakathi kobuhlungu futhi uyafuna ukubuqeda, lakanye uzakwenza lokho.—Khangela u-Eksodusi 3:7, 8 lo-Isaya 63:9. w21.07 9-10 ¶9-10

Sokuseduze ukuthi abantu abalalelayo babe lesibusiso esedlula zonke sokuthanda uJehova lokumkhonza kuze kube nini lanini. UJesu uzalungisa umonakalo owabangelwa ngu-Adamu lo-Eva ngesikhathi bekhetha ukutshiya imuli kaNkulunkulu. UJehova uzavusa amamiliyoni abantu njalo abanike ithuba lokuthola ukuphila okungapheliyo belempilakahle emhlabeni olipharadayisi. (Luk. 23:42, 43) Nxa abantu abakhonza uJehova sebengaselasono, bonke bazaba ‘lenkazimulo’ uDavida abhala ngayo. Nxa ‘ungowexuku elikhulu’ ulethemba elimangalisayo. (Isam. 7:9) UNkulunkulu uyakuthanda futhi ufuna ube lilunga lemuli yakhe. Yikho yenza konke ongakwenza ukuze umthokozise. Hlala ucabanga ngezithembiso zakhe. Siqakathekise isibusiso sokukhonza uBaba wethu osezulwini osithandayo lesokumdumisa kuze kube nini lanini. w21.08 7 ¶18-19

Okweminyaka edlula 40, umphrofethi uJeremiya watshumayeza abantu ababengelandaba lalokho ayekutsho lababemphikisa. ‘Izithuko lensolo’ zabantu ababemphikisa zamdanisa okokuthi waze wacabanga ukukhalala umsebenzi wakhe. (Jer. 20:8, 9) Kodwa kasakwenzanga lokho. Kuyini okwamnceda ukuthi aqhubeke ewenza futhi ethokoza kuwo? Yikucabanga ngezinto ezimbili eziqakathekileyo. Okokuqala, lokho uJehova ayemthume ukuthi akutshele abantu kwakuzabanika “ithemba kanye lesikhathi esizayo.” (Jer. 29:11) Okwesibili, uJehova wayekhethe yena uJeremiya ukuthi atshele abantu lokho ayefuna bakuzwe. (Jer. 15:16) Lathi sitshumayela izindaba ezinhle ezinika abantu ithemba futhi uJehova ukhethe thina oFakazi bakhe ukuthi senze umsebenzi lowo. Nxa singahlala sicabanga ngalokho, sizathokoza kungelani lokuthi abantu bayalalela loba hatshi. Yikho ungadani kumbe ukhalale nxa umuntu ofunda laye iBhayibhili engathuthuki ngendlela okhangelele ukuthi athuthuke ngayo. Nxa sisenza umsebenzi wokwenza abafundi kumele sifunde ukubekezela.—Jak. 5:7, 8. w21.10 27 ¶12-13

Kumele siqhubeke siqinisa ukholo lwethu kungelani lokuthi silesikhathi esinganani sikhonza uJehova. Singekela ukwenza njalo ukholo lwethu luzaxega. Khumbula ukuthi ukholo lugoqela ubufakazi bokuthi okungabonakaliyo kukhona sibili. Kulula ukuthi sikhohlwe ngento esingayiboniyo. Yikho uPhawuli wathi ukuba lokholo oluxegayo lokungabi lokholo ‘yisono esisithandela lula.’ Manje singenzani ukuze siqhubeke silokholo oluqinileyo? (2 Thes. 1:3) Okokuqala, hlala ucela uJehova ukuthi akunike umoya ongcwele. Kumele senze njalo ngoba ukholo ngesinye sezithelo zomoya ongcwele. (Gal. 5:22, 23) Asingeke sibe lokholo kuMdali wethu njalo sihlale silalo nxa engasinikanga umoya wakhe ongcwele. Uzasinika wona nxa singaqhubeka siwucela. (Luk. 11:13) Singakhuleka sisithi: “Sincedise ukuthi sibe lokholo oluqinileyo.” (Luk. 17:5) Okwesibili, hlala utaditsha iLizwi likaNkulunkulu.—Hubo. 1:2, 3. w21.08 18-19 ¶16-18

Kunengi okungenziwa ngasebekhulile enhlanganisweni kaJehova. Lanxa bengabe bengasaqinanga emzimbeni njengakudala kunengi abakubonileyo empilweni okunganceda abanye. UJehova uzaqhubeka ebasebenzisa ngendlela ezitshiyeneyo. IBhayibhili lisitshela ngalabo ababethembekile abaqhubeka besebenzela uJehova lanxa basebekhulile. Ngokwesibonelo, uMosi wayeseleminyaka engaba ngu-80 ngesikhathi esiba ngumphrofethi kaJehova futhi ekhethwa ukuthi akhokhele isizwe sako-Israyeli. UDanyeli wayelokhu engumphrofethi kaJehova eseleminyaka edlula 90. Umphostoli uJohane laye wayengabe eseleminyaka edlula 90 ngesikhathi ephefumulelwa ukuthi abhale ibhuku leSambulo. IBhayibhili alisitsheli okunengi ngendoda “eyayilungile njalo eyayizinikele kuNkulunkulu” okuthiwa nguSimiyoni kodwa uJehova wayeyazi futhi wayinika isibusiso sokubona usane olunguJesu lesokuphrofetha ngalo langonina.—Luk. 2:22, 25-35. w21.09 3-4 ¶5-7

Abazali kumele bananzelele ukuthi abaqathanisi omunye umntwana lomunye kumbe bakhangelele ukuthi enze okwedlula lokho angenelisa ukukwenza. Nxa abazali bangakwenza lokho umntanabo angadana. (Efe. 6:4) Udade okuthiwa nguSachiko uthi: “Umama wayefuna ngihlale ngitshaya zonke emihlolisweni yami kodwa lokho kwakungeke kwenzakale. Sekuleminyaka eminengi ngaqeda isikolo, kodwa kwezinye izikhathi ngiyake ngibone angani uJehova kathokozi ngami lanxa ngisenza konke okusemandleni ami.” INkosi uDavida yathi ‘kayizihluphi ngezindaba ezinkulu’ loba izinto eyayingenelisi ukuzenza. Ukuthobeka kwayo kwayinceda ukuthi isuthiseke futhi ihlaliseke. (Hubo. 131:2) Abazali bangafundani emazwini kaDavida? Ukuthobeka kuzanceda abazali ukuthi bangakhangeleli ukuthi benze abangenelisi ukukwenza lokuthi bangakhangeleli ukuthi umntanabo enze okungaphezu kwamandla akhe. Abazali bangancedisa umntanabo ukuthi angazikhangeleli phansi ngokunanzelela lokho ayenelisa ukukwenza kuhle lalokho angenelisi ukukwenza. Nxa bangenza njalo, kuzaba lula ukuthi bamncedise ahlele lokho ayenelisa ukukwenza. w21.07 21-22 ¶5-6

Kumele sikhumbule ukuthi uJehova unike ngamunye wethu inkululeko yokuzikhethela lokho azakwenza. Lokhu kutsho ukuthi siyazikhethela ukuthi sizamlalela yini loba hatshi. Abanye abantwana bakhuliswa ngabazali ababengasosibonelo esihle. Lanxa kunjalo, bakhetha ukukhonza uJehova lokuqhubeka bethembekile kuye. Abanye bakhuliswa ngabazali ababesebenza nzima bebafundisa ukuthi bathande uJehova kodwa bathe sebekhulile bamtshiya. Ngakho ngamunye wethu kumele azikhethele ukuthi uzamkhonza yini uJehova. (Josh. 24:15) Yikho nxa usizwa ubuhlungu ngokususwa komntanakho, ungacabangi ukuthi lokhu kubangelwe nguwe. Ngezinye izikhathi umzali uyatshiya uJehova aphinde adele lemuli yakhe. (Hubo. 27:10) Lokhu kungabalimaza kakhulu abantwana akade bemhlonipha umzali wabo njalo befuna ukumlingisela. Nxa ungumntwana olomzali osusiweyo, qiniseka ukuthi uJehova ubazi kuhle ubuhlungu obuzwayo. Uyakuthanda njalo kuyamthokozisa ukuthi uqhubeka umkhonza uthembekile. Khumbula lokuthi ayisuwe obangele ukuthi umzali wakho atshiye uJehova. w21.09 27 ¶5-7

Singafananisa umKhristu osusiweyo lemvu elomkhuhlane othelelwanayo. Okwenza sithi uyagula yikuthi ubudlelwano bakhe loJehova buyabe sebuphambanisekile. (Jak. 5:14) Njengomuntu olomkhuhlane othelelwanayo, umuntu oqhubeka esenza isono engaphenduki angaphambanisa abanye ebandleni. Yikho kwezinye izikhathi kumele umuntu onjalo asuswe. Ukulaywa ngale indlela kutshengisa ukuthi uJehova uyazithanda izinceku zakhe ezithembekileyo ezisebandleni futhi kunganceda lowo owonileyo ukuthi ananzelele ukuthi wenze isono esikhulu abesephenduka. Lanxa esesusiwe uyabe elokhu evunyelwa ukungena imihlangano yebandla ukuze aqinise ukholo lwakhe. Uyabe elokhu esenelisa ukuthola amabhuku ethu ukuze ataditshe eyedwa njalo uyabe esenelisa ukubukela i-JW Broadcasting^®. Kanti njalo nxa abadala bangabona ukuthi uyatshintsha bangamnika amacebo lapha lalapho ukuze aphinde abe lobudlelwano loJehova futhi abuyiselwe ebandleni. w21.10 10 ¶9, 11

Lathi lamuhla silokhu silandela indlela yokukhonza efanana laleyo eyayilandelwa ngamaKhristu akuqala. Ngokwesibonelo, indlela esihlelwe ngayo iyafanana leyamaKhristu lawo. Lathi silababonisi abahambelayo, abadala lezinceku ezikhonzayo. (Flp. 1:1; Tit. 1:5) NjengamaKhristu akuqala, siyayihlonipha imithetho kaJehova emayelana lokutshada, ukuya emacansini kanye legazi futhi siyalivikela ibandla kulabo abangafuni ukulandela imithetho kaNkulunkulu. (ImiSeb. 15:28, 29; 1 Khor. 5:11-13; 6:9, 10; Heb. 13:4) IBhayibhili liyakutsho ngokucacileyo ukuthi ‘kulokholo olulodwa’ olwamukelwa nguNkulunkulu. (Efe. 4:4-6) Kuyisibusiso esikhulu ukuba ngomunye wabantu bakaJehova lokulazi iqiniso ngaye langalokho ahlose ukukwenza. Sengathi singaqhubeka siligagadlele iqiniso futhi singakuthandabuzi lakancane lokho esikukholwayo! w21.10 22-23 ¶15-17

INkosi uJehoshafathi yaba phakathi kohlupho olukhulu. Ibutho elikhulu lama-Amoni labakoMowabi lamadoda ayehlala endaweni eyayilamaqaqa okwakuthiwa yiSeyiri lalifuna ukuhlasela yona lemuli yayo kanye labantu bonke. (2 ImiLan. 20:1, 2) Manje wenzani uJehoshafathi? Wacela ukuthi uJehova amncedise njalo amnike amandla. Umthandazo kaJehoshafathi oku-2 ImiLando 20:5-12 wenza kucace ukuthi wayemthemba sibili uYise osezulwini olothando. UJehova wathuma umLevi okuthiwa nguJehaziyeli ukuthi ayekhuluma loJehoshafathi amtshele amazwi asembhalweni walamuhla. UJehoshafathi wamthemba ngokupheleleyo uJehova yikho wenza konke ayemtshele khona. Kwathi yena lamadoda ayelawo sebesiyakulwa lesitha wafaka phambili abahlabeleli ababengahlomanga hatshi amasotsha azingwazi. UJehova kazange ambambise ilitshe. Walinqoba ibutho lesitha uJehoshafathi.—2 ImiLan. 20:18-23. w21.11 15-16 ¶6-7

Nxa sisebunzimeni singaqiniseka ukuthi uJehova uzasincedisa ukuthi sihlale siqotho kuye. (2 Khor. 4:7-9) Asithandabuzi ukuthi uzahlala esitshengisa uthando oluqotho ngoba umhubi wathi “amehlo kaJehova akulabo abamesabayo, kulabo othemba labo lisethandweni lwakhe olungapheliyo.” (Hubo. 33:18-22) Singakakhonzi uJehova, wayesithanda ngendlela athanda ngayo abantu bonke nje. Kodwa khathesi njengoba sesimkhonza, usesitshengisa lothando lwakhe oluqotho futhi luyasinceda. Uthando oluqotho lwenza asigone njalo asivikele ngengalo zakhe. Uzasigcina siseduze kwakhe futhi uzasinika izinto ezinhle asigcinele zona. Ufuna siphumelele sibili! (Hubo. 46:1, 2, 7) Yikho kungelani lobunzima esihlangana labo, uJehova uzasinika amandla esiwadingayo ukuze sihlale siqotho kuye. w21.11 7 ¶17-18

Abanengi bethu siyake sizwe ngomuntu obambela omunye isikhwili, kungaba ngumuntu asebenza laye, afunda laye, isihlobo kumbe ilunga lemuli. Kwezinye izikhathi angambambela isikhwili okweminyaka. Khumbula ukuthi abafowabo bakaJosefa abalitshumi bamzondela kakhulu futhi lokho kwabangela ukuthi bamenzele ulunya. (Gen. 37:2-8, 25-28) Kodwa uJosefa kazange abaphathe kubi. Wathi eselesikhundla, kazange aphindisele kodwa wabatshengisa isihawu. Kazange ababambele isikhwili kodwa wenza okutshiwo kuLevi 19:18. (Gen. 50:19-21) Ukuze athokozise uNkulunkulu, amaKhristu kumele alingisele uJosefa ongazange aphindisele kodwa owakhetha ukuthethelela abafowabo. UJesu wathi kumele sithethelele abanye nxa besiphambanisele. (Mat. 6:9, 12) Umphostoli uPhawuli laye watshela amaKhristu wathi: “Lingaziphindiseleli bathandekayo.”—Rom. 12:19. w21.12 11 ¶13-14

Sekuphakathi kobusuku ngoNisani 14 ngomnyaka ka-33 C.E., uJesu waya esivandeni seGetsemane. Wafika lapho wakhuleka etshela uJehova konke okwakusenhliziyweni yakhe. (Luk. 22:39-44) Kwakungalesosikhathi esinzima lapho uJesu ‘athandaza kanengi encenga ngokukhala okukhulu langezinyembezi.’ (Heb. 5:7) Kuyini uJesu akuthandazelayo ngalobobusuku bokucina engakabulawa? Wacela amandla okuthi ahlale eqotho kuJehova lokuthi enze intando yakhe. UJehova wayizwa iNdodana yakhe ithandaza ngenhliziyo yonke wasethuma ingilosi ukuthi iyeyiqinisa. UJesu wayekwazi ukuthi kwakuqakatheke kakhulu ukuthi ahlale eqotho lokuthi angcwelise ibizo likaYise. UJehova wayilalela imithandazo kaJesu ngoba uJesu wayekuqakathekisa kakhulu ukuhlala eqotho kuYise lokungcwelisa ibizo lakhe. Nxa lathi siqakathekisa kakhulu ukwenza njalo, uJehova uzasilalela lapho sithandaza sicela ukuthi asincedise.—Hubo. 145:18. w22.01 18 ¶15-17

Abanengi lamuhla bayakhubeka ngathi ngenxa yokuthi kasingeni kwezombusazwe. Bakhangelele ukuthi sivote nxa kusiba lokhetho. Kodwa thina siyakwazi ukuthi nxa sikhetha ukubuswa ngumuntu siyabe sisala uJehova. (1 Sam. 8:4-7) Abantu bangabe bekhangelele lokuthi sakhe izikolo lezibhedlela futhi senze lezinye izinto ezinceda umphakathi. Yikho kabasilaleli ngoba sikhuthele ekutshumayeleni kulokuthi sizame ukulungisa inhlupho zabantu. Singenzani ukuze singakhubeki? (Mat. 7:21-23) Okumele sikuqakathekise yikwenza umsebenzi uJesu asilaya ukuthi siwenze. Akumelanga sithatheke ngokuzama ukulungisa inhlupho zomhlaba lo. Siyabathanda sibili abantu futhi siyabazwela, kodwa siyakwazi ukuthi indlela engcono kulazo zonke yokubanceda yikubafundisa ngoMbuso kaNkulunkulu lokubancedisa ukuthi babe ngabangane bakaJehova. w21.05 7 ¶19-20

Lanxa lamuhla ababusi abanengi bezizwe besithi bayamkhonza uNkulunkulu, abafuni kusuka ezikhundleni zabo. Benza njengababusi bangesikhathi sikaJesu ngoba bamelana loGcotshiweyo kaJehova ngokuhlasela abalandeli bakhe abaqotho. (ImiSeb. 4:25-28) UJehova uthini? IHubo 2:10-12 lithi: “Ngakho-ke lina makhosi, limukani; liyaxwayiswa lina babusi bomhlaba. Mkhonzeni uJehova ngokumesaba, lithokoze lithuthumele. Ikhothameleni iNdodana, funa ithukuthele beselibhujiswa endleleni yenu, ngoba intukuthelo yakhe ingavutha ngesikhatshana. Babusisiwe bonke abaphephela kuye.” UJehova ulomusa futhi unika abaphikisi laba isikhathi sokuthi batshintshe. Sisesekhona isikhathi sokuthi benze njalo, futhi bakhethe ukwamukela uMbuso kaNkulunkulu. Lanxa kunjalo sesisincane. (Isaya. 61:2) Lesi yiso kanye isikhathi sokuthi abantu bafunde iBhayibhili njalo bakhethe ukukhonza uJehova. w21.09 15-16 ¶8-9

UPhawuli uthi kumele sisuthiseke ngalokho esilakho. (Flp. 4:12) Ubungane bethu loNkulunkulu buqakatheke ukwedlula loba yiphi impahla esilayo. (Hab. 3:17, 18) Cabanga ngalokho uMosi akutshela ama-Israyeli ngemva kweminyaka engu-40 esenkangala. Wathi: “UJehova uNkulunkulu wenu uyibusisile imisebenzi yezandla zenu. . . . Iminyaka engamatshumi amane uJehova wenu ubelani, alizange liswele lutho.” (Dute. 2:7) Eminyakeni yonke leyo engu-40 uJehova wayenike ama-Israyeli imana ukuthi adle. Zona kanye izigqoko asuka lazo eGibhithe azizange ziguge. (Dute. 8:3, 4) UJehova uzathokoza nxa singafunda ukusuthiseka. Ufuna sibonge lezinto ezincane asinika zona futhi sizwisise ukuthi ziyizipho ezivela kuye. w22.01 5 ¶10-11

Madoda, lilomsebenzi wokunakekela izimuli zenu yikho lisebenza nzima ukuze lizivikele njalo lizinike ezikudingayo. Nxa ungaba lenhlupho, ungacabanga ukuthi ungazilungisela zona uwedwa. Kodwa ungazithembi. Khuleka kuJehova umcela ukuthi akuncedise. Kanti njalo, thandaza ngenhliziyo yakho yonke ulomkakho. Vumela uJehova akukhokhele ngokutaditsha iBhayibhili lamabhuku esiwaphiwa yinhlanganiso yakhe langokusebenzisa lokho okufundayo. Kungenzeka abanye bangavumelani lezinqumo ezisekelwe eBhayibhilini ozenzayo. Bangathi imali lenotho yikho okungenza imuli yakho iziphilele kuhle. Kodwa khumbula okwenziwa yiNkosi uJehoshafathi. (2 ImiLan. 20:1-30) UJehoshafathi wathembela kuJehova futhi lokho kwakhanya ngakwenzayo. UJehova kazange ayitshiye indoda leyo ethembekileyo futhi lawe kasoze akutshiye.—Hubo. 37:28; Heb. 13:5. w21.11 15 ¶6; 16 ¶8

UNkulunkulu wasenza ngomfanekiso wakhe, yikho siyafisa sibili ukuthi abantu baphathwe kuhle. (Gen. 1:26) Kodwa isono singenza sahlulele kubi lanxa sicabanga ukuthi siyayazi yonke indaba. Ngokwesibonelo, khumbula ukuthi uJona wazonda njani uJehova esekhethe ukuba lesihawu ebantwini baseNineve. (Jona. 3:10–4:1) Kodwa cabanga ngalokho okwenzakalayo uJehova esebatshengise isihawu. Abantu beNineve abedlula 120 000 ababephendukile basindiswa. Kwakhanya sibili ukuthi uJona nguye owayekhuthe ugatsha ekwahluleleni hatshi uJehova. Akudingeki ukuthi uJehova asichasisele ukuthi kungani esenza isinqumo esithile. Ngezinye izikhathi wayezivumela sibili izinceku zakhe zakudala ukuthi zitsho ezikucabangayo ngezinqumo ayesezenzile kumbe lezo ayesazozenza. (Gen. 18:25; Jona. 4:2, 3) Kanti njalo kwezinye izikhathi wayechasisa ukuthi kungani enze isinqumo esithile. (Jona. 4:10, 11) Lanxa kunjalo, kadingi imvumo yethu engakenzi isinqumo kumbe ukuthi sithini ngaso nxa esesenzile.—Isaya. 40:13, 14; 55:9. w22.02 3-4 ¶5-6

Sitshengisa ukuthi ‘singabancane’ nxa sibona abanye ‘bengcono kulathi.’ (Flp. 2:3) Nxa singazimisela ukukwenza lokhu kasisoze sihlale sikhuba abanye. Bonke abafowethu labodadewethu kulalapho abangcono khona kulathi. Lokhu akunzima ukukunanzelela nxa singagxila kokuhle abakwenzayo. Kumele silalele iseluleko umphostoli uPhawuli asinika amaKhristu eKhorinte, wathi: “Kuyini okwenza uzibone ungcono kulomunye umuntu? Kuyini olakho ongazange ukuphiwe? Manje nxa wakuphiwa, uzikhukhumezelani angathi kawuzange ukuphiwe?” (1 Khor. 4:7) Yikho kakumelanga sifune ukubukwa ngabantu kumbe ukuzibona singcono kulabanye. Ngokwesibonelo, nxa umzalwane esenelisa ukwenza inkulumo ezimnandi kumbe udadewethu ephumelela ekuqaliseni izifundo zeBhayibhili, kumele ngamunye wabo adumise uJehova ngalokho ayenelisa ukukwenza. w21.06 22 ¶9-10

Kulokhu kusiba nzima kakhulu ukuthi oFakazi abanengi bathole abantu ezindlini zabo. Abanye abamemezeli bahlala ezindaweni lapho okulezakhiwo ezinengi ezingangeneki lula. Kungabe kulomuntu olindayo ongavumeli ukuthi abantu bangene nxa kungelamuntu ohlala esakhiweni leso obabizileyo. Kwezinye indawo abamemezeli bathola abantu abalutshwana kumbe batshumayela endaweni ezilabantu abalutshwana. Bangahamba umango omude besiyadinga umuntu oyedwa ongabe engekho lasemzini wakhe. Akumelanga sikhalale lanxa sihlangana lobunzima obunjalo. Kumele sizame ukutshintsha isikhathi esitshumayela ngaso. Singathola abantu abanengi nxa singatshumayela ngezikhathi abatholakala ngazo. Phela wonke umuntu uyabuyela endlini yakhe eseqede izinto azenzayo. Abafowethu labodadewethu abanengi bakubona kungcono ukutshumayela emini kumbe ntambama ngoba yizo izikhathi abathola ngazo abantu abanengi. Kanti njalo abantu bangabe bekhululekile futhi befuna ukuxoxa ngalezozikhathi. w21.05 15 ¶5, 7

Into efananayo iyenzakala yini lamuhla? Ye. Abantu abanengi bayakhubeka nxa oFakazi bakaJehova bengahlanganyeli labo ekunanzeni imikhosi engavumelani lokutshiwo liBhayibhili, njengamalanga okuzalwa leKhisimusi. Abanye bona bayazonda nxa oFakazi bakaJehova bengananzi labo imikhosi yesizwe kumbe bengalandeli amasiko aphathelane lemingcwabo angavumelani lalokho okutshiwo liLizwi likaNkulunkulu. Labo abakhubekayo ngenxa yezizatho lezi bangabe becabanga ukuthi uNkulunkulu uyayamukela indlela bona abamkhonza ngayo. Kodwa ngeke bamthokozise nxa bekhetha ukulandela amasiko abantu kulezimfundiso ezicacileyo eziseBhayibhilini. (Mak. 7:8, 9) Singenzani ukuze singakhubeki? Kumele siyithande kakhulu imithetho kaJehova lezimiso zakhe. (Hubo. 119:97, 113, 163-165) Nxa simthanda uJehova kasisoze silandele amasiko angamthokozisiyo. Kanti njalo kasisoze sithande loba yini ukwedlula yena. w21.05 6 ¶15-16

Singawasebenzisa njani amazwi kamphostoli uPhawuli? Kufanele sigcine ukholo lwethu luqinile ngokuhlala sitaditsha, sithandaza futhi sikhuthele emsebenzini uJehova asinike wona. (2 Tim. 4:4) Nxa ukholo lwethu luqinile kasisoze siphele amandla nxa sisizwa imibiko emibi mayelana laboFakazi bakaJehova. (Isaya. 28:16) Nxa simthanda uJehova leLizwi lakhe kanye labafowethu labodadewethu, kasisoze sikhutshwe yilabo asebetshiye uJehova. Ngesikhathi uJesu esemhlabeni, banengi abantu abangazange bamamukele. Kodwa banengi futhi abamamukelayo. Bagoqela lendoda eyayililunga leSanihedrini, kanye ‘lexuku elikhulu labaphristi.’ (ImiSeb. 6:7; Mat. 27:57-60; Mak. 15:43) Lalamuhla abantu abanengi kabazange bakhubeke. Lokhu kungenxa yokuthi bayalazi iqiniso eliseBhayibhilini futhi bayalithanda. ILizwi likaNkulunkulu lithi: “Kukhulu ukuthula abalakho labo abathanda umthetho wakho, kakulalutho olungabakhubekisa.”—Hubo. 119:165. w21.05 13 ¶20-21

Umphostoli uPhawuli wayekwazi ukuthi konke ayekwenza enkonzweni kaJehova wayengakwenzi ngamandla akhe kodwa wayekwenza ngamandla kaJehova. UJehova wasebenzisa umoya ongcwele ukuze anike uPhawuli amandla okuthi ayenze ngokupheleleyo inkonzo yakhe kungelani lokuhlukuluzwa, ukubotshwa lobunye ubunzima obamehlelayo. UThimothi laye kwakumele athembele kuNkulunkulu ukuthi amnike amandla okwenza inkonzo yakhe. Wayehamba loPhawuli enhambweni zakhe ezinde engumnali. Kanti njalo uPhawuli wayemthuma ukuthi ayeqinisa amabandla. (1 Khor. 4:17) UThimothi wayengabe ezibona engafanelanga ukwenza imisebenzi le. Mhlawumbe lokhu yikho okwenza uPhawuli wamkhuthaza esithi: “Ungaqali ukuvumela loba ngubani ukuthi akhangelele phansi ubutsha bakho.” (1 Tim. 4:12) Kanti njalo ngesikhathi lesi uThimothi wayeselawakhe ameva enyameni, ‘ukuhlala egula.’ (1 Tim. 5:23) Kodwa wayekwazi ukuthi umoya ongcwele kaJehova uzamnika amandla okuthi aqhubeke etshumayela izindaba ezinhle futhi ancede abafowabo labodadewabo.—2 Tim. 1:7. w21.05 21 ¶6-7

Amazwi akuJakhobe 1:19 ayasebenza kulabo abanika abanye iseluleko. UJakhobe wabhala wathi: “Wonke umuntu kumele aphangise ukulalela, aphuze ukukhuluma, aphuze lokuzonda.” Umdala angazitshela ukuthi wazi konke okwenzakalayo, kodwa wazi konke yini sibili? IZaga 18:13 zithi: “Lowo ophendulayo engaqali alalele—lobo yibuwula bakhe lehlazo lakhe.” Kuhle ukuthi umdala abuze lowo afuna ukumnika iseluleko ukuthi izinto zihamba njani empilweni yakhe. Lokhu kutsho ukuthi kumele aqale alalele engakakhulumi. Umdala angabuza athi: “Izinto zikuhambela njani?” “Ngingakuncedisa njani?” Nxa abadala bangaqala bazwisise ukuthi kwenzakalani kubafowabo labodadewabo kuzabalula ukuthi babancedise njalo babakhuthaze. Ukunika umuntu iseluleko akutsho ukuphongumbalela amavesi kumbe ukumtshela angakwenza. Abafowethu labodadewethu kumele babone ukuthi silendaba labo, ukuthi siyabazwisisa lokuthi sifuna ukubanceda. w22.02 17 ¶14-15