December

UJesu wafanisa ubudlelwano ayelabo labalandeli bakhe lobudlelwano obukhona phakathi kukamelusi lezimvu zakhe. (Joh. 10:14) Kwakuqondile ukuthi enze njalo ngoba izimvu ziyamazi umelusi wazo futhi ziyalilalela ilizwi lakhe. Enye indoda yakubona ngawayo lokho, yathi: “Mina labanye engangihamba labo sasifuna ukuthatha ezinye izimvu amapikitsha futhi sasizibiza ukuthi zisondele eduze. Kodwa azizange zibuye ngoba zazingawazi amazwi ethu. Kuthe kusenjalo kwafika umfanyana ozelusayo futhi wathi esanda nje ukuzibiza zahle zamlandela.” Okwabonwa yindoda le kusikhumbuza amazwi kaJesu amayelana lezimvu zakhe kumbe abafundi bakhe. Wathi: “Zizalilalela ilizwi lami.” Kodwa uJesu usezulwini. Pho singalizwa njani ilizwi lakhe? Silizwa nxa sitaditsha lokho asifundisa khona futhi sililalela ngokwenza izinto asifundisa zona.—Mat. 7:24, 25. w21.12 16 ¶1-2

Umphostoli uPhawuli wayewahlukuluza okuzwayo amaKhristu. Kodwa ngokuya kwesikhathi wananzelela ukuthi ayekwenza kwakungaqondanga wasezimisela ukutshintsha. (1 Tim. 1:12-16) UJehova wamncedisa ukuthi abe ngumelusi olothando, olozwelo lothobekileyo. Wayekholwa ukuthi uzamthethelela yikho kazange atshone ezihlupha ngayekuphambanisa. (Rom. 7:21-25) Wayengakhangelelanga ukuthi wayezahlala esenza okuqondileyo sonke isikhathi. Kodwa wasebenza nzima ukuze abe lobuntu obuhle njalo wathobeka, wathemba uJehova ukuthi amncedise awenze kuhle umsebenzi wakhe. (1 Khor. 9:27; Flp. 4:13) Abadala balesono futhi uJehova ukhangelele ukuthi bavume ukuthi balaso besebezama ukuthuthuka. (Efe. 4:23, 24) Umdala kumele azihlole esebenzisa iLizwi likaNkulunkulu abeselungisa lapho okudinga ukuthi alungise khona. Nxa angakwenza lokhu uJehova uzamncedisa ukuthi abe ngumdala omuhle futhi othokozayo.—Jak. 1:25. w22.03 29-30 ¶13-15

Kumele senzeni nxa singananzelela ukuthi sesahlulele umfowethu kumbe udadewethu? Kufanele sikhumbule ukuthi kumele sithande abafowethu labodadewethu. (Jak. 2:8) Kanti njalo kumele sithandaze kuJehova ngenhliziyo yonke simcela ukuthi asincedise siyekele ukwahlulela abanye. Ngemva kokuthandaza, singazinika isikhathi sokuba lomuntu lowo esiyabe simahlulele. Singamcela ukuthi ahambe lathi ekutshumayeleni kumbe simnxuse ukuthi azokudla lathi. Ngesikhathi sizama ukumazi kuhle umfowethu kumbe udadewethu kumele silingisele uJehova loJesu ngokudinga okuhle akwenzayo. Nxa singenza njalo siyabe silalela umlayo esiwuphiwa ngumelusi omuhle owokuthi siyekele ukwahlulela. Izimvu ziyalilalela ilizwi likamelusi wazo. Labalandeli bakaJesu bayalilalela ilizwi lakhe. Kungelani lokuthi ‘singabomhlambi omncane’ kumbe ‘singabezinye izimvu,’ asiqhubekeni silalela ilizwi likamelusi omuhle.—Luk. 12:32; Joh. 10:11, 14, 16. w21.12 19 ¶11; 21 ¶17-18

URehobhowami wathi esebekwe ukuthi abe yinkosi yako-Israyeli, abantu bamlanda besiyacela ukuthi abaphungulele umthwalo ababewetheswe nguyise uSolomoni. URehobhowami wenza kuhle, wacela abadala bako-Israyeli ukuthi bamcebise ngokuthi abaphendule esithini abantu. Abadala bamtshela ukuthi abantu babezahlala bemsekela nxa engenza lokho abakucelayo. (1 AmaKho. 12:3-7) Kukhanya kakuthandanga lokho, yikho wacela amadoda ayekhule lawo ukuthi amcebise. Amtshela ukuthi engeze umthwalo wabantu. (1 AmaKho. 12:9-11) URehobhowami kwasekumele akhuleke kuJehova emcela ukuthi amncedise akhethe icebo elihle. Kodwa yena walandela icebo ayelitshelwe ngamadoda ayekhule lawo. Lokhu kwabangela ukuthi izinto zingamhambeli kuhle uRehobhowami labantu bako-Israyeli. Lathi singaphiwa iseluleko esingasithandiyo. Kodwa nxa sisekelwe eLizwini likaNkulunkulu, kumele sisamukele. w22.02 9 ¶6

Umuntu othobekileyo lozehlisayo kazihluphi ngalokho abasesebatsha abangakwaziyo kodwa uqakathekisa abenelisa ukukwenza. Kababoni njengabantu abancintisana laye kodwa ubabona njengabantu asebenza labo. Asebekhulile babona abatsha beyizipho ezivela kuJehova njalo bayabonga ngalokho abakwenzayo. Bona abaselamandla kodwa bayabonga ngokuba labasesebatsha abalamandla, abazimiseleyo njalo abenelisa ukwenza imisebenzi ebandleni lokulincedisa. UNawomi okukhulunywa ngaye eBhayibhilini ngomunye osekhulile owavuma ukuncediswa ngosesemutsha. UNawomi watshela umalukazana wakhe uRuthe owayesefelwe ngumkakhe ukuthi abuyele kibo. Kodwa uRuthe wala ukumtshiya njalo wahamba laye eBhethilehema. Lokhu kwamthokozisa uNawomi futhi walwamukela uncedo ayeluphiwa nguRuthe. (Ruthe. 1:7, 8, 18) Bobabili bancedakala kakhulu! (Ruthe. 4:13-16) Asebekhulile abathobekileyo bayamlingisela uNawomi. w21.09 10-11 ¶9-11

UBaba wethu osezulwini kakhangelelanga ukuthi senze izinto ezifananayo. Mhlawumbe wena uyenelisa ukwenza okunengi ukwedlula abanye ebandleni. Kumbe ungabe ungenelisi ukwenza okunengi njengabanye ngenxa yokuguga, ukugula loba lokho okhangelelwe ukuthi ukwenze emulini. Nxa ungenelisi ukwenza okunengi ungadani. (Gal. 6:4) UJehova kasoze awukhohlwe umsebenzi wakho. Nxa usenza konke okusemandleni akho futhi ukwenza ngesizatho esiyiso uJehova uyathokoza. UJehova uyazazi lezifiso zakho. Ufuna uthokoze futhi usuthiseke ngalokho owenelisa ukumenzela khona. Sihlalisekile ngoba siyakwazi ukuthi uJehova uyabancedisa labo abamkhonzayo nxa besebunzimeni. (Isaya. 41:9, 10) Silezizatho zokuthokoza sibili njengoba sikhonza uBaba wethu olothando ofanele “ukwamukela inkazimulo lodumo” oluvela kukho konke akudalileyo.—Isam. 4:11. w22.03 24 ¶16; 25 ¶18

Siyafuna ukulingisela uJesu, kodwa akumelanga sidane nxa singehluleka ukumlingisela ngokupheleleyo. (Jak. 3:2) Umuntu ofundela ukudweba ngeke adwebe njengalowo omfundisayo oyingcitshi ekudwebeni. Kodwa uzaqhubeka ethuthuka nxa angafunda emaphutheni akhe futhi azame ngazo zonke indlela ukuthi alingisele lowo omfundisayo. Lathi nxa singakusebenzisa lokho esikufunda eBhayibhilini futhi siqhubeke sizama ukulungisa lapho okumele silungisise khona sizenelisa ukuwalandela eduze amanyathelo kaJesu. (Hubo. 119:59) Siphila emhlabeni ogcwele abantu abaqakathekisa okufunwa yibo kuphela. Kodwa abantu bakaJehova bona abanjalo. Sizimisele ukulingisela uJesu owayeqakathekisa okufunwa ngabanye kulalokho yena ayekufuna. (1 Phet. 2:21) Nxa singenza konke esingakwenza ukuthi silingisele uJesu sizathokoza ngoba sizabe sijabulisa uJehova. w22.02 24 ¶16; 25 ¶18

Okunye uJehova akusebenzisayo ukuthi akhokhele abantu bakhe liLizwi lakhe iBhayibhili. Nxa singazinika isikhathi sokucabangisisa ngalokho uJehova asifundisa khona, kuzabalula ukuthi silalele lokho asitshela khona njalo siwenze kuhle umsebenzi wokutshumayela. (1 Tim. 4:15, 16) UJehova uphinda asikhokhele esebenzisa ‘inceku ethembekileyo lehlakaniphileyo.’ (Mat. 24:45) Ngezinye izikhathi inceku le ingasitshela izinto esingazizwisisiyo. Ngokwesibonelo, singaphiwa iziqondiso zokuthi singazivikela njani nxa kungaba lomonakalo wemvelo. Kodwa singacabanga ukuthi umonakalo lo ngeke wenzakale endaweni esihlala kuyo. Kumele senzeni nxa sicabanga ukuthi iziqondiso esiziphiweyo azisebenzi kithi? Cabanga ngezinye indaba esizibala eBhayibhilini. Ngezinye izikhathi abantu bakaNkulunkulu babephiwa iziqondiso ezazikhanya zingasebenzi kodwa zasindisa ukuphila kwabantu.—Abahlu. 7:7; 8:10. w22.03 18-19 ¶15-16

Ngesikhathi uJesu ekhuluma amazwi asembhalweni walamuhla, wayekwazi ukuthi ikusasa lakhe lisezandleni zikaJehova, njalo wayengakuthandabuzi ukuthi uYise uzamkhumbula. Sifundani emazwini kaJesu? Zimisele ukufaka ukuphila kwakho ezandleni zikaJehova, okutsho ukuhlala uthembekile kuye lanxa ukuphila kwakho sekusengozini. Kumele ‘uthembe uJehova ngenhliziyo yakho yonke’ ukuze wenelise ukwenza njalo. (Zaga. 3:5) Cabanga ngokwenzakala komunye uFakazi owayeleminyaka engu-15 okuthiwa nguJoshua owayelomkhuhlane omubi. Wala ukwelatshwa ngendlela eyayisephula umthetho kaNkulunkulu. Wathi esezakufa watshela unina wathi: ‘Mama, ngisezandleni zikaJehova. Nanku engingakutshela khona ngingathandabuzi: Ngiyakwazi ukuthi uJehova uzangivusa loba sekutheni. Uyakwazi engikucabangayo lendlela engizizwa ngayo, futhi ngiyamthanda sibili.’ Ngamunye wethu kumele azibuze umbuzo lo, ‘Ngizaqhubeka ngithembekile yini kuJehova nxa ukholo lwami lunyikinywa ngokunye okungenza ngicine ngifile?’ w21.04 12-13 ¶15-16

UJehova usiqinisa esebenzisa umsebenzi wokutshumayela. Siyathokoza nxa sitshumayela kungelani lokuthi abantu bayasilalela kumbe abasilaleli. Abanye bangabona angani abenelisi ukwenza okunengi ekutshumayeleni ngenxa yezimo abaphakathi kwazo. Nxa kuyikuthi lawe uzizwa njalo, khumbula ukuthi uJehova uyathokoza nxa usenza konke okusemandleni akho. UJehova uyasibona futhi uyasiqakathekisa isifiso esilaso sokutshumayela lanxa singenelisi ukuphuma endlini. Yikho angasincedisa ukuthi sitshumayeze abantu abasinakekelayo kumbe odokotela labonesi. Nxa singaqathanisa lokho esikwenza khathesi lalokho esasikwenza singadana. Kodwa nxa singananzelela indlela uJehova asincedisa ngayo khathesi sizakwenelisa ukuqinisela sithokoza kungelani lobunzima esihlangana labo. Kasikwazi ukuthi yiphi inhlanyelo yeqiniso esiyihlanyelayo ezamila ikhule.—UmTshu. 11:6, TBS. w21.05 24-25 ¶14-17

Ubuhwaba babangela ukuthi iNkosi uDavida ikhohlwe konke uJehova ayeyinike khona okugoqela inotho, ubukhosi lokuyincedisa ukuthi inqobe izitha zayo ezinengi. UDavida wavuma sibili ukuthi izipho uJehova ayemnike zona “zinengi ngokweqileyo ukuzibalisa.” (Hubo. 40:5) Kodwa wake wakhohlwa lokho uJehova ayemenzele khona. Lanxa wayelabafazi abanengi, waqalisa ukuhawukela umfazi wenye indoda, into uJehova ayethe ingenziwa. Owesifazana lo kwakunguBhathisheba futhi umkakhe kungu-Uriya umHithi. UDavida wayefuna ukusuthisa isifiso sakhe yikho walala loBhathisheba wasezithwala. Lokho uDavida ayekwenzile kwakukubi kodwa wenza okwedlula lapho ngokubulalisa u-Uriya. (2 Sam. 11:2-15) Wayesengenwe kuyini uDavida? Kambe wayecabanga ukuthi uJehova kasoze akubone akwenzayo? Lanxa uDavida wayesekhonze uJehova okweminyaka eminengi ethembekile, waba yisihwaba futhi lokho kwamlethela inhlupho ezinengi. Kodwa okuthokozisayo yikuthi ngokuhamba kwesikhathi wavuma izono zakhe wasephenduka. Wambonga sibili uJehova ngokumthethelela.—2 Sam. 12:7-13. w21.06 17 ¶10

Singabona angani kasenelisi ukuqhuba isifundo seBhayibhili. Mhlawumbe sicabanga ukuthi ukuze sifunde lomuntu iBhayibhili kumele siqale sibe lolwazi olunengi kumbe sibe zingcitshi zokufundisa. Nxa uzizwa njalo, nanzi izinto ezintathu ezingakunceda ubone ukuthi ungenelisa sibili ukufundisa umuntu. Okokuqala, uJehova ukubona ufanele ukuthi ufundise abantu. Okwesibili, uJesu ‘olamandla wonke ezulwini lasemhlabeni’ ukulaye ukuthi ufundise. Lokhu kutshengisa ukuthi uyakuthemba. (Mat. 28:18) Okwesithathu, themba ukuthi abanye bazakuncedisa. UJesu wathembela kulokho uYise ayemfundise ukuthi akutsho, lawe ungenza okufananayo. (Joh. 8:28; 12:49) Kanti njalo ungacela umbonisi weqembu lenu kumbe iphayona loba ummemezeli oyingcitshi ukuthi akuncedise uqalise futhi uqhube isifundo seBhayibhili. Okunye okungakunceda ukuthi uthuthukise indlela ofundisa ngayo yikujoyina omunye wabamemezeli laba nxa eqhuba izifundo zakhe. w21.07 6 ¶12

Ukuphela komumo lo wezinto sekuseduze. Yikho kumele siyithembe indlela uJehova enza ngayo izinto ukwedlula loba nini. Kungani kumele senze njalo? Ngesikhathi sokuhlupheka okukhulu singatshelwa izinto ezingakhanya zingazwisiseki kumbe zingasebenzi. UJehova kasoze akhulume lathi mathupha. Kumele ukuthi uzasebenzisa abazalwane abakhokhelayo ukuthi basitshele okumele sikwenze ngalesosikhathi. Leso kuyabe kungayisiso sikhathi sokuthi sithandabuze lokho esikutshelwayo loba esokuzibuza ukuthi kuvela kuJehova yini kumbe abazalwane abakhokhelayo bakhuluma abazicabangela khona. Uzakwenzani ngalesosikhathi? Nxa ukuthemba lokho esikutshelwayo khathesi njalo uzimisele ukukulalela, kumele ukuthi uzakwenza njalo langesikhathi sokuhlupheka okukhulu. w22.02 6 ¶15

UJehova wayencedise uGidiyoni lamadoda angu-300 ayelaye ukuthi banqobe empini futhi lokhu kwakungenza ukuthi bazigqaje. Amadoda esizwana sako-Efrayimi ahlangana loGidiyoni kodwa kulokuthi amncome, amsola ngoba kawabizanga ekuqaliseni ukuthi baye empini. (Abahlu. 8:1) UGidiyoni wawakhumbuza indlela uJehova ayewabusise ngayo. Lokhu kwenza ukuthi ‘ukuthukuthela kwawo kudede.’ (Abahlu. 8:3) UGidiyoni wazehlisa ukuze agcine ukuthula phakathi kwabantu bakaNkulunkulu. Kumadoda ako-Efrayimi sifunda ukuthi kuqakatheke kakhulu ukuthi sinike uJehova udumo kulokuthi thina sidunyiswe. Thina inhloko zezimuli labadala bebandla singafunda okuthile kuGidiyoni. Nxa umuntu ecatshulwe yilokho esikwenzileyo kumele sizame ukuzwisisa ukuthi kungani ecaphukile. Singamncoma ngokuhle akwenzileyo. Kodwa kumele sithobeke ukuze sikwenze lokho. Ukwenza ukuthi kube lokuthula phakathi kwethu labafowethu labodadewethu yikho okuqakatheke kakhulu ukwedlula ukutshengisa ukuthi kasiphambanisanga. w21.07 16-17 ¶10-12

UJehova watshengisa ukuthi uyasiqakathekisa ngokusidala ngomfanekiso wakhe. Lokhu kwenza senelise ukuba lobuntu obunjengobakhe obugoqela uthando, uzwelo, ubuqotho kanye lokulunga. (Hubo. 86:15; 145:17) Nxa singaba lobuntu lobu siyabe sidumisa uJehova futhi sitshengisa ukuthi siyambonga ngalokho asenzele khona. (1 Phet. 1:14-16) Nxa singenza lokho okufunwa nguBaba wethu osezulwini sizathokoza. Siyenelisa lokuba ngabantu uJehova abafunayo emulini yakhe ngenxa yokuthi wasidala safanana laye. UJehova wasenzela ikhaya elihle okwamagama. Walungisela abantu umhlaba kusasele isikhathi eside ukuthi adale umuntu wokuqala. (Jobe. 38:4-6; Jer. 10:12) Wadala izinto ezinengi ezinhle ukuze sikholise ukuphila ngenxa yokuthi ulendaba lathi futhi uyaphana. (Hubo. 104:14, 15, 24) Ngezinye izikhathi wayesima akhangele umsebenzi awenzileyo njalo ‘wayebona ukuthi wawumuhle.’—Gen. 1:10, 12, 31. w21.08 3 ¶5-6

Sonke siphiwe umsebenzi wokutshumayela lokwenza abafundi. (Mat. 28:19, 20; Rom. 10:14) Uyafuna yini ukuba yingcitshi emsebenzini lo wokwenza abafundi? Taditsha ibhukwana elithi Khuthalela Ukubala Lokufundisa ubusuhlela ongakwenza okungakunceda ukuthi ukusebenzise okufundayo. Akumelanga sikhohlwe ukuthi okunye okuqakatheke kakhulu esingakwenza yikuba lobuntu obuthokozisa uNkulunkulu. (Kol. 3:12; 2 Phet. 1:5-8) Akuthandabuzwa ukuthi sonke sifisa ukuthi ngabe senzela uJehova okunengi kulalokho esimenzela khona khathesi. Emhlabeni omutsha sizenelisa ukumkhonza ngendlela epheleleyo. Asenzeni konke okusemandleni ethu kulokho esenelisa ukukwenza. Nxa singenza njalo kasisoze sidane kakhulu kodwa sizathokoza. Okuqakathekileyo yikuthi sizadumisa ‘uNkulunkulu wethu othokozayo’ uJehova. (1 Tim. 1:11) Ngakho asithokozeni emsebenzini wenkonzo esiwenzayo khathesi. w21.08 25 ¶18-20

Nxa wakhuliswa ngoFakazi bakaJehova, kumele ukuthi wafunda ngoJehova usesemncane. Wafundiswa ukuthi unguMdali, ukuthi ulobuntu obuhle lokuthi ufuna ukwenza umhlaba ube lipharadayisi. (Gen. 1:1; ImiSeb. 17:24-27) Abantu abanengi abakholwa ukuthi uNkulunkulu ukhona kumbe ukuthi nguye owadala zonke izinto. Kodwa bakholwa ukuthi izinto eziphilayo zazenzakalela njalo zatshintsha kancane kancane zaze zaba yizinto ezimangalisayo esizibona lamuhla. Abanye abantu abakholwa lokhu bafundile okuzwayo. Bangathi isayensi iyatshengisa ukuthi lokho okutshiwo liBhayibhili kungamanga lokuthi labo abakholwa ukuthi kuloMdali ngabantu abangafundanga, abangakhaliphanga kumbe abaqileka lula. Sonke kumele siqhubeke siqinisa ukholo lwethu kungelani lokuthi silesikhathi esinganani singoFakazi bakaJehova. Nxa singenza njalo, kasisoze sikhohliswe ‘yikuhlakanipha komhlaba lo langobuqili obuyize’ obufundiswa ngabantu abaphikisana leLizwi likaNkulunkulu.—Kol. 2:8; w21.08 14 ¶1-3

U-Abela, loNowa, lo-Abhrahama loJobe batshengisa ukuthi bayamhlonipha futhi bayamthanda uJehova. Babemlalela, belokholo kuye njalo besenza imihlatshelo. Kusegcekeni ukuthi benza konke okusemandleni abo ukuthi bamdumise uJehova njalo wakwamukela ukukhonza kwabo. Ngokuhamba kwesikhathi uJehova wanika izizukulwane zika-Abhrahama uMthetho esebenzisa uMosi. UMthetho kaMosi wawucacisa konke okwakumele bakwenze ukuze amukele ukukhonza kwabo. Ngemva kokufa lokuvuswa kukaJesu, uJehova wayengasakhangelelanga ukuthi abantu balandele uMthetho kaMosi. (Rom. 10:4) AmaKhristu kwasekumele alandele umthetho omutsha okuthiwa ‘ngumthetho kaKhristu.’ (Gal. 6:2) Kulokuthi atshone elandela imithetho eminenginengi, ayengalandela “umthetho” lo ngokulalela lokho okwafundiswa nguJesu langokumlingisela. Lalamuhla amaKhristu enza konke okusemandleni awo ukuthi alandele uKhristu ukuze athokozise uJehova njalo ‘athole ukuphumula.’—Mat. 11:29. w22.03 20-21 ¶4-5

UJehova uyabalalela abantwabakhe. Wayizwa imithandazo eminengi eyenziwa yiNdodana yakhe ngesikhathi isemhlabeni. Wayemuzwa uJesu nxa wayethandaza engakenzi izinqumo eziqakathekileyo, njengalapho ekhetha abaphostoli bakhe abangu-12. (Luk. 6:12, 13) Waphinda wamuzwa ngesikhathi ekhuleka ekhathazekile. Esezathengiswa, uJesu wakhuleka kuYise ngenhliziyo yonke ngobunzima ayesezahlangana labo. UJehova kazange awuzwe kuphela umthandazo kaJesu kodwa wathumela ingilosi ukuthi iqinise iNdodana yakhe ayithandayo. (Luk. 22:41-44) Lalamuhla uJehova uyayilalela imithandazo yethu futhi uyiphendula ngesikhathi esifaneleyo langendlela engcono kulazo zonke. (Hubo. 116:1, 2) Udadewethu ose-India wakubona lokhu. Wayelomkhuhlane wokukhathazeka kakhulu njalo wayethandaza ngenhliziyo yonke etshela uJehova ngalokho. Wabhala wathi: “Uhlelo lwe-JW Broadcasting^® lukaMay 2019 olwalukhuluma ngokuthi singenzani nxa sikhathazekile lwafika ngesikhathi sibili. UJehova wayiphendula imithandazo yami.” w21.09 21-22 ¶6-7

Kumele ukuthi kwakunzima kakhulu ukuthi amaKhristu lawo aphila ngesikhathi sabaphostoli atshiye phose konke ayelakho ayeqalisa impilo entsha endaweni entsha. Kwakumele abe lokholo ukuze athembe uJehova ukuthi uzawancedisa athole lokho akudingayo. Kodwa kukhona okwakuzawanceda. Kusasele iminyaka emihlanu ukuthi amaRoma agombolozele iJerusalema, umphostoli uPhawuli wacebisa amaKhristu angamaHebheru wathi: “Indlela eliphila ngayo kayingabi ngeyokuthanda imali, kodwa suthisekani ngalokho elilakho, ngoba yena uthe: ‘Kangisoze ngikutshiye loba sekutheni, njalo kangisoze ngikulahle loba sekutheni.’ Ngakho siba lesibindi esikhulu sithi: ‘UJehova ungumsizi wami; kangisoze ngesabe. Kambe umuntu angangenzani?’” (Heb. 13:5, 6) Akuthandabuzwa ukuthi kwaba lula kulabo abalalela okwatshiwo nguPhawuli iJerusalema ingakagonjolozelwa ukuthi basuthiseke ngezinto ezilutshwana endaweni entsha. Babeqiniseka ukuthi uJehova uzabanakekela. w22.01 4 ¶7, 9

Umuntu olesihawu ulomusa, ulenhliziyo enhle, ulozwelo njalo uyaphana. Singahle sicabange umzekeliso kaJesu womSamariya olomusa. Indoda le eyayingasomJuda ‘yenzela isihawu’ umJuda owayehlaselwe yizigebenga. Yathi imbona ‘yamzwela usizi’ umJuda owayelimele, yasimnakekela kuhle. (Luk. 10:29-37) Umzekeliso lo utshengisa obunye ubuntu obuhle bukaNkulunkulu, isihawu. UNkulunkulu ulesihawu ngoba uyasithanda futhi usitshengisa isihawu ngendlela ezitshiyeneyo nsuku zonke. Enye indlela umuntu angatshengisa ngayo ukuthi ulesihawu yikukhetha ukungajezisi umuntu okufanele ajeziswe. Lokhu yikho kanye uJehova akwenzileyo kithi. Umhubi wathi: “Kasiphathi ngokufanele izono zethu.” (Hubo. 103:10) Kodwa ngezinye izikhathi uJehova angamlaya ngendlela elamandla umuntu owenze isono. w21.10 8 ¶1-2

UJehova utshengisa uthando oluqotho ezincekwini zakhe kuphela, abangane bakhe abaseduze. Lokho kukhanya emazwini atshiwo yiNkosi uDavida lomphrofethi uDanyeli. Ngokwesibonelo, uDavida wathi: “Qhubeka ngothando lwakho [“oluqotho,” NWT] kulabo abakwaziyo.” “Kusukela phakade kusiya phakade uthando lukaJehova [“oluqotho,” NWT] lukulabo abamesabayo.” UDanyeli yena wathi: ‘O Jehova Nkulunkulu omkhulu, olothando [“oluqotho,” NWT] ngalabo bonke abamthandayo, abagcina imilayo yakhe.’ (Hubo. 36:10; 103:17; Dan. 9:4) Amavesi la aveza ukuthi uJehova utshengisa uthando oluqotho ezincekwini zakhe ngenxa yokuthi ziyamazi, ziyamesaba, ziyamthanda njalo zigcina imilayo yakhe. Uthando lwakhe oluqotho ulugcinela abantu bakhe kuphela, labo abamkhonza ngendlela ayamukelayo. Singakaqalisi ukukhonza uJehova, wayesithanda ngendlela athanda ngayo abantu bonke nje. (Hubo. 104:14) Kodwa khathesi njengoba sesimkhonza, usesitshengisa lothando lwakhe oluqotho futhi luyasinceda. w21.11 4 ¶8-9

Kumnyama kubomvu sizimisele ukulalela amazwi kaJesu asembhalweni walamuhla. Abantu abanengi lamuhla bathanda ukulandela abafundisi abadumileyo. Babathanda kakhulu okokuthi sekungani bayabakhonza. Abantu bagcwala phamu emasontweni abo, bathenge lamabhuku abo njalo babanika imali enengi kumbe banikele ukuze basekele izinhlanganiso zabafundisi laba. Abanye bayakukholwa konke abakutshelwa ngabafundisi babo. Bayabaqakathekisa kakhulu okokuthi kuyabe kungani babona uJesu ngokwakhe. Kodwa labo abakhonza uJehova ngeqiniso abalabo abafundisi. Lanxa sibahlonipha labo abakhokhelayo ebandleni siyalalela amazwi kaJesu athi: “Lina lonke lingabafowabo bomunye lomunye.” (Mat. 23:8-10) Thina asikhonzi abantu, kungaba ngabafundisi benkolo kumbe abakhokheli bezombusazwe. Asibasekeli abafundisi kumbe abakhokheli bezombusazwe. Kodwa senza konke okusemandleni ethu ukuthi singazingeni ezomhlaba. Konke lokhu kwenza sitshiyane kakhulu lamanye amasonto azithi ngawesiKhristu.—Joh. 18:36. w21.10 20 ¶6-7

UmKhristu ofuna ukuba ngcwele kumele abe leqiniso lokuthi akulamuntu kumbe ulutho aluqakathekisa ukwedlula ubungane bakhe loNkulunkulu. Kanti njalo singoFakazi bakaJehova yikho sizimisele ukungenzi loba yini engangcolisa ibizo lakhe elingcwele. (Levi. 19:12; Isaya. 57:15) Ama-Israyeli ayetshengisa ukuthi uJehova nguye uNkulunkulu wawo ngokulalela imithetho yakhe. ULevi 18:4 uthi: “Lalelani imithetho yami linanzelele lilandele izimiso zami. Mina nginguJehova uNkulunkulu wenu.” Kusahluko 19 kulezinye “izimiso” okwakumele zilandelwe ngama-Israyeli. Ngokwesibonelo, kuvesi 5 kusiya ku-8, lakuvesi 21 lo-22 kukhulunywa ngemihlatshelo yezinyamazana. Ama-Israyeli kwakumele enze imihlatshelo le ngendlela eyayingasoze ‘ingcolise lokho okungcwele kuJehova.’ Ukubala amavesi la kumele kusenze sizimisele ukuthokozisa uJehova lokwenza okutshiwo kuHebheru 13:15 osikhuthaza ukuthi sinikele kuye imihlatshelo yokudumisa ayamukelayo. w21.12 5-6 ¶14-15

Abasanda kutshada bangalingisela okwenziwa ngabanye abafunda ukuthemba uJehova. Abanye balabo abangabalingisela sebeleminyaka eminengi bengamaphayona. Baceleni ukuthi balicebise nxa lihlela elifuna ukukwenza. Lingakwenza lokhu liyabe litshengisa ukuthi liyamthemba uJehova. (Zaga. 22:17, 19) Ungakhohlwa ukuthi ukutshada yisipho esivela kuJehova. (Mat. 19:5, 6) Ufuna abatshadileyo basikholise isipho lesi. Lina elisanda kutshada, cabangisisani ngokuthi lenzani ngempilo yenu. Lenza konke elingakwenza yini ukuze litshengise ukuthi liyambonga sibili uJehova ngezipho alinike zona? Thandazani kuye. Taditshani iBhayibhili ukuze lithole amacebo angalinceda beselilandela amacebo la avela kuJehova. Lizathokoza futhi lisuthiseke empilweni nxa lingaqakathekisa ukukhonza uJehova ukwedlula loba yini. w21.11 19 ¶16, 18

UJakhobe kazange azibone engcono kulabanye. Kazange acabange ukuthi ungcono kulamanye amaKhristu ngenxa yokuba ngumfowabo kaJesu kumbe ngenxa yemisebenzi eqakathekileyo ayelayo. Wabiza amanye amaKhristu ngokuthi ‘angabafowabo abathandekayo.’ (Jak. 1:16, 19; 2:5) Kazange azame ukwenza ukuthi abanye bambone engumuntu ongaphambanisiyo. Sifundani? Khumbula ukuthi sonke siyaphambanisa. Akumelanga sizibone singcono kulalabo esibafundisayo. Phela nxa singenza umuntu esifunda laye acabange ukuthi kasiphambanisi, angacina ebona angani kasoze enelise ukwenza lokho uNkulunkulu akutshoyo. Kodwa nxa singamtshela ukuthi ngezinye izikhathi kwakunzima ukuthi silandele okutshiwo liBhayibhili njalo simchasisele ukuthi uJehova usincedise njani ukuthi sitshintshe, sizamnceda abone ukuthi laye angenelisa ukukhonza uJehova. w22.01 11-12 ¶13-14

Nxa singacabanga njengoJesu sizamlingisela kuhle njalo sizaphumelela ukuba lobuntu obunjengobakhe. (Heb. 1:3) Ungacabanga ukuthi ngeke wenelise ukumlingisela ngoba yena kalasono. Nxa kunjalo nanku okungamelanga ukukhohlwe. Okokuqala, wadalwa usenelisa ukuba njengoJehova loJesu. Yikho ungenelisa ukubalingisela lanxa ungeke ukwenze ngokupheleleyo lokho. (Gen. 1:26) Okwesibili, umoya ongcwele kaNkulunkulu ulamandla ukwedlula loba yini esemhlabeni njalo uzakuncedisa ukuthi wenze izinto obungeke uzenze ngawakho amandla. Okwesithathu, uJehova kalindelanga ukuthi uzitshengise ngokupheleleyo izithelo zomoya ongcwele khathesi. Phela kuzathatha iminyaka engu-1 000 ukuthi uBaba wethu osithandayo ancedise labo abazaphila emhlabeni ukuthi babe ngabantu abapheleleyo. (Isam. 20:1-3) Akufunayo khathesi yikuthi sizame ukwenza okusemandleni ethu njalo sithembele kuye ukuthi asincedise. w22.03 9 ¶5-6

Ukuthandaza ayisikho kodwa ongakwenza ukuze uqinise ubungane bakho loJehova. Okunye okungakunceda yikutaditsha iLizwi likaNkulunkulu lokuba semihlanganweni yebandla. Kukhona yini ongakwenza ukuze usisebenzise kuhle kakhulu isikhathi sakho nxa utaditsha lalapho usemihlanganweni yebandla? Zibuze, ‘Kuyini okujayele ukungiphambanisa nxa ngisemihlanganweni yebandla loba nxa ngitaditsha?’ Engxenye ujayele ukufonelwa kumbe ukuthunyelwa amameseji efonini kumbe ku-tablet kumbe kukhompiyutha. Nxa ungananzelela ukuthi usucabanga ezinye izinto ngesikhathi utaditsha kumbe usemihlanganweni yebandla, cela uJehova akuncedise ugxilise ingqondo kulokho okwenzayo. Kungaba nzima ukuthi ufake ingqondo kulokho okwenzayo kodwa kuqakathekile ukuthi ukwenze lokho. Thandaza ucele ukuthula okuzalinda inhliziyo yakho ‘lengqondo yakho.’—Flp. 4:6, 7. w22.01 29-30 ¶12-14

INkosi u-Uziya ayisamukelanga iseluleko. Yangena endaweni esethempelini likaJehova lapho okwakungavunyelwa khona abanye abantu ngaphandle kwabaphristi, ifuna ukutshisa impepha. Abaphristi bakaJehova bathi kuyo: “Akulunganga ukuthi wena, Uziya, utshisele uJehova impepha. Lokho ngokwabaphristi.” Manje wenzani u-Uziya? Aluba wazithoba wamukela iseluleko njalo wahle wasuka ethempelini, uJehova wayengamthethelela. Kodwa ‘u-Uziya wathukuthela.’ Kuyini okwenza ukuthi angasamukeli iseluleko? Kungenzeka wazitshela ukuthi njengoba wayeyinkosi, wayelelungelo lokwenza loba yini ayifunayo. Kodwa le ayisiyo indlela uJehova ayebona ngayo izinto. U-Uziya wenza into ayengelamvumo yokuyenza, yikho uJehova wamtshaya ngobulephero njalo ‘waba lobulephero kwaze kwaba lilanga afa ngalo.’ (2 ImiLan. 26:16-21) Okwenzakala ku-Uziya kusifundisa ukuthi nxa singalaleli iseluleko seBhayibhili esisiphiwayo, uJehova kasoze asamukele kungelani lokuthi singobani. w22.02 9 ¶7

Umuntu obuswa ‘yibuntu obudala’ ucabanga futhi enze lokho okufunwa yinyama yakhe. (Kol. 3:9) Engabe eqakathekisa lokho yena akufunayo, ephangisa ukuzonda, engabongi futhi ezigqaja. Angabe ekukholisa ukubona iphonografi lokubukela amafilimu alodlakela lokuziphatha kubi. Umuntu onjalo angabe elabo ubuntu obuhle sibili njalo ezisola ngezinto ezimbi azikhulumayo kumbe azenzayo kodwa uyabe engazimiselanga kangako ukutshintsha indlela acabanga ngayo laziphatha ngayo. (Gal. 5:19-21; 2 Tim. 3:2-5) Silesono yikho ngeke siyikhiphe yonke imicabango emibi kanye lezifiso ezimbi enhliziyweni lasengqondweni zethu. Kwezinye izikhathi singenza kumbe sikhulume ulutho esingacina sizisola ngalo. (Jer. 17:9; Jak. 3:2) Lanxa kunjalo izifiso kanye lemikhuba emibi ngeke kusasibusa nxa sesihlubule ubuntu obudala. Siyabe sesitshintshile sibili.—Isaya. 55:7. w22.03 3 ¶4-5

Badala, dingani okuhle okwenziwa ngabafowenu labodadewenu. Bonke balesono. Lanxa kunjalo ngamunye wabo ulokuhle akwenzayo. Ngezinye izikhathi kungadingeka ukuthi abadala beluleke umKhristu osephambuka. Ngesikhathi bemeluleka kumele balingisele umphostoli uPhawuli ngokuzama sibili ukungazihluphi kakhulu ngezenzo zakhe lamazwi akhe acaphulayo. Kumele bakhumbule ukuthi uyamthanda uJehova, ukuthi uzimisele ukumkhonza lokuthi uyafuna ukwenza okuhle. Abadala abakhangela okuhle okwenziwa ngabanye benza abafowabo labodadewabo babone ukuthi bayathandwa ebandleni. Lingakhohlwa ukuthi uJehova kakhangelelanga ukuthi lingenzi amaphutha kodwa ufuna lithembeke. (1 Khor. 4:2) Lawe ungathandabuzi ukuthi uNkulunkulu uyakuqakathekisa omenzela khona. Kasoze “awukhohlwe umsebenzi wenu lothando elalutshengisa ebizweni lakhe lapho lisiza abangcwele njalo liqhubeka libasiza.”—Heb. 6:10. w22.03 31 ¶19, 21