January

UThimothi wasetshenziswa nguJehova ngenxa yokuthi wayelobuntu obumthokozisayo. (Flp. 2:​19-22) Umphostoli uPhawuli wathi uThimothi wayethobekile, ethembekile njalo ekhuthele. Wayelendaba labafowabo labodadewabo. Lokhu yikho okwenza uPhawuli wamthanda njalo wamnika imisebenzi eqakathekileyo. Lathi nxa silobuntu obuthokozisa uJehova, uzasithanda njalo sizanceda abafowethu labodadewethu ebandleni. (Hubo. 25:9; 138:6) Yikho thandaza njalo ucabangisise ngokuthi kungaphi lapho odinga ukuthuthukisa khona. Khetha ubuntu ongafuna ukubuthuthukisa. Ungenelisa yini ukuthuthuka ekubeni lozwelo? Ungakhetha ukuthuthuka ekwenzeni ukuthi kube lokuthula lasekuthetheleleni abanye. Okunye ongakwenza yikucela umngane wakho ukuthi akutshele lapho okumele uthuthukise khona.—Zaga. 27:6. w22.04 23 ¶4-5

UJehova ufuna sithokoze. Siyakwazi lokho ngoba ukuthokoza ngesinye sezithelo zomoya ongcwele. (Gal. 5:22) Ukupha kuyathokozisa ukwedlula ukwamukela, yikho siyathokoza kakhulu nxa sisebenza nzima ekutshumayeleni futhi sincedisa abafowethu labodadewethu ngendlela ezitshiyeneyo. (ImiSeb. 20:35) Embhalweni walamuhla umphostoli uPhawuli uqamba izinto ezimbili ezingasinceda ukuthi siqhubeke sithokoza. Okokuqala, kumele sizimisele ukwenzela uJehova konke okusemandleni ethu. Singenza njalo sizathokoza. (Mat. 22:​36-38) Okwesibili, akumelanga siziqathanise labanye. Kumele simbonge uJehova ngalokho esenelisa ukumenzela khona kusiya ngempilakahle yethu, ulwazi esilalo loba iziphiwo zethu. Kanti njalo nxa kulokunye abanye abakwenza ngcono kulathi enkonzweni, kumele sithokoze ukuthi basebenzisa iziphiwo zabo ukudumisa uJehova. w22.04 10 ¶1-2

IBhabhiloni Enkulu izabhujiswa ingalindelanga. (Isam. 18:​8-10) Ukubhujiswa kwayo kuzethusa abantu njalo kungabangela inhlupho kodwa kulezinto ezimbili ezizathokozisa abantu bakaNkulunkulu. Inkolo yamanga osekulesikhathi eside iyisitha sikaJehova uNkulunkulu iyabe ingasekho njalo ukukhululwa kwethu emhlabeni lo omubi kuyabe sekuseduze. UDanyeli wathi ulwazi lweqiniso ‘lwaluzakwanda’ futhi lokhu kwenzakele sibili. Sesizizwisisa iziphrofetho ezimayelana lesikhathi sethu. (Dan. 12:​4, 9, 10) Ukugcwaliseka kweziphrofetho lezi kwenza simthembe kakhulu uJehova kanye leLizwi lakhe eliphefumulelweyo. (Isaya. 46:10; 55:11) Yikho qhubeka uqinisa ukholo lwakho ngokuhlala utaditsha iBhayibhili njalo uncedisa abanye ukuthi babe ngabangane bakaJehova. Uzabavikela labo abathembela kuye njalo uzabanika ‘ukuthula okupheleleyo.’—Isaya. 26:3. w22.07 6-7 ¶16-17

Ibhuku leSambulo lisitshela ukuthi uMbuso kaNkulunkulu usubusa ezulwini lokuthi uSathane waxotshwa khona. (Isam. 12:​1-9) Lokhu kwenza kwaba lokuthula ezulwini kodwa kwabangela inhlupho ebantwini ngoba uSathane uzondile njalo uhlasela izinceku zikaNkulunkulu ezithembekileyo emhlabeni. (Isam. 12:​12, 15, 17) Kuyini okuzasinceda ukuthi sihlale sithembekile lanxa uSathane esihlasela? (Isam. 13:10) Okunye okuzasinceda yikwazi lokho okuzakwenzakala esikhathini esizayo. Ngokwesibonelo, ebhukwini leSambulo umphostoli uJohane usitshela ngezinye izibusiso osekuseduze ukuthi sizithole. Esinye isibusiso yikutshabalaliswa kwezitha zikaNkulunkulu. Evesini yokuqala yebhuku leSambulo sihle sitshelwe ukuthi esizakubala kuzachasiswa kusetshenziswa “izibonakaliso.”—Isam. 1:1. w22.05 8 ¶1-3

Ukwala kwezinceku zikaJehova ezithembekileyo ukusekela isilo kuzakwenza ukuthi izitha zikaNkulunkulu zibazondele kakhulu, besekubangela ukuthi izizwe zimanyane zibahlasela. IBhayibhili lithi lokhu yikuhlasela kukaGogi waseMagogi. (Hez. 38:​14, 15) UJehova uzakwenzani nxa abantu bakhe sebehlaselwa? Uthi: “Ulaka lwami oluvuthayo luzavuka.” (Hez. 38:​18, 21-23) ISambulo isahluko 19 siyasitshela okuzakwenzakala ngemva kwalokho. UJehova uzathumela iNdodana yakhe ukuthi ivikele abantu bakhe njalo inqobe izitha zakhe. UJesu uzabe ‘elamabutho asezulwini’ okutsho izingilosi ezithembekileyo kanye labangu-144 000. (Isam. 17:14; 19:​11-15) Kuzahamba njani empini le? Bonke abantu abaphikisana loJehova bazatshabalaliswa. Lenhlanganiso zonke eziphikisana laye zizatshabalaliswa.—Isam. 19:​19-21. w22.05 17 ¶9-10

U-Adamu lo-Eva bathi besanda ukona uJehova wakhuluma isiphrofetho esiqakathekileyo esasizanika izizukulwane zabo ithemba. Isiphrofetho lesi sitholakala kuGenesisi 3:15 othi: “Ngizakwenza ukuthi kube lokuzondana phakathi kwakho lowesifazana, laphakathi kwenzalo yakho lenzalo yowesifazana. Izacobodisa ikhanda lakho njalo wena uzayilimaza isithende.” Isiphrofetho lesi sitholakala ebhukwini lokuqala leBhayibhili kodwa okutshiwo ngamabhuku wonke eBhayibhili kuyangenelana laso. Isiphrofetho lesi sinjenge-glue ebambanisa amakhasi ebhuku ndawonye. Amazwi akuGenesisi 3:15 abambanisa konke okukhulunywa ngamabhuku eBhayibhili ukuze kuphume umlayezo owodwa wokuthi kwakuzaba loMkhululi owayezathunywa ukuthi atshabalalise uDeveli labo bonke abalandeli bakhe ababi. Lezi zindaba ezinhle sibili kulabo abathanda uJehova. Ukutaditsha iBhayibhili kuzasinceda sibone ukuthi isiphrofetho lesi sigcwaliseka njani lokuthi sisinceda njani. w22.07 14 ¶1-3

Cela uJehova akunike ukuhlakanipha ukuze uncedise abantwabakho bamthande. (Jak. 1:5) Akula ongakucebisa njengaye futhi kulezizatho ezinengi ezenza sitsho njalo. Nanzi ezimbili: Esokuqala, uJehova uselesikhathi eside engumzali. (Hubo. 36:9) Esesibili, amacebo asinika wona ahlala esinceda. (Isaya. 48:17) UJehova usebenzisa iLizwi lakhe lenhlanganiso yakhe ukuthi ancedise abazali bafundise abantwababo ukuthi bamthande. (Mat. 24:45) Ngokwesibonelo ungathola amacebo ancedayo ezihlokweni ezithi “Okunceda Imuli” ezazihlala ziphuma ku-Vukani! khathesi eseziphuma kuwebhusayithi yethu i-jw.org. Kanti njalo kuwebhusayithi le kulamavidiyo amanengi anganceda abazali ukuthi basebenzise amacebo abawaphiwa nguJehova nxa bekhulisa abantwababo.—Zaga. 2:​4, 5. w22.05 27 ¶4-5

Akulamuntu othethelela njengoJehova. Okokuqala, uhlala ezimisele ukusithethelela. Okwesibili, usazi mhlophe. Akulalutho angalwaziyo ngathi njalo nguye owenelisa ukubona ukuthi sesiphendukile yini okweqiniso. Okwesithathu, nxa uJehova angasithethelela uyakhohlwa ngokubi esikwenzileyo kube angathi vele asizange sone. Lokhu kwenza sibe lomzwangedwa ongasithonisisiyo njalo sibe ngabangane bakhe. Sizahlala siphambanisa njengoba silesono. Kodwa singaduduzwa ngamazwi akukhasi 771 ku-Insight on the Scriptures Volume 2 athi: “Izinceku zikaJehova akumelanga zihlale zizithonisisa ngamaphutha eziwenzayo abangelwa yisono ngoba uJehova ulesihawu njalo uyakwazi ukuthi zilesono. (Hu 103:​8-14; 130:3) Zizathokoza nxa zingenza konke ezingakwenza ukuthi zilandele imithetho kaNkulunkulu. (Flp 4:​4-6; 1Jo 3:​19-22).” w22.06 7 ¶18-19

Ukwesaba ukuhlukuluzwa yiziphathamandla ayisiso sodwa isikhali uSathane asisebenzisayo. Abanye besaba ukuthi izihlobo zabo zizabaphatha njani nxa bengaba ngoFakazi ukwedlula ukutshaywa kumbe ukuphathwa kubi ngohulumende. Bayazithanda kakhulu izihlobo zabo njalo bafisa ukuthi lazo zifunde ngoJehova, zimkhonze. Kubazwisa ubuhlungu ukuzwa izihlobo zabo zikhuluma kubi ngoNkulunkulu weqiniso langezinceku zakhe. Ezinye izihlobo ezaziphikisa oFakazi zacina sezilamukele iqiniso. Kodwa sizakwenzani nxa izihlobo zethu zisilahla ngoba sesingoFakazi? Amazwi akuHubo 27:10 angasiduduza. Ukuhlala sikhumbula ukuthi uJehova uyasithanda kuzasinceda singakhathazeki nxa izihlobo zethu zisilahla. Kanti njalo kasithandabuzi ukuthi uzasinika umvuzo nxa singaqinisela. UJehova uzasinika okokuziphilisa njalo uzasinceda sihlaliseke, sithokoze futhi sihlale singabangane bakhe. w22.06 16-17 ¶11-13

Ngesikhathi uJesu esenza inkonzo yakhe emhlabeni waqanjelwa amanga kwathiwa uyisidakwa, uyisihwaba, uyisithunywa sikaDeveli, wephula umthetho weSabatha futhi uthuka uNkulunkulu. (Mat. 11:19; 26:65; Luk. 11:15; Joh. 9:16) Lanxa kunjalo kazange abaphendule ngolaka. Lathi kumele simlingisele, singaphindiseli lanxa abanye bekhuluma amazwi asicaphulayo. (1 Phet. 2:​22, 23) Kodwa iqiniso yikuthi akulula ukuzibamba nxa abanye bangakhuluma kubi. (Jak. 3:2) Manje kuyini okungasinceda? Zama ukuthi ungazondi nxa umninimuzi angakhuluma kubi ekutshumayeleni. Umfowethu okuthiwa nguSam uthi, “Ngiyazama ukucabanga ukuthi umninimuzi kumele azwe ngoJehova lokuthi usengatshintsha.” Kwezinye izikhathi umninimuzi angasicaphukela ngenxa yokuthi siyabe sifike ngesikhathi esingayisiso. Nxa singahlangana lomuntu ozondileyo singenza umthandazo omfitshane sicela ukuthi uJehova asincedise singazondi ukuze singamphenduli kubi. w22.04 6 ¶8-9

Indlela eqakathekileyo abazali abangayisebenzisa ukuze bancedise abantwababo basondele kuJehova yikufunda labo iBhayibhili. (2 Thim. 3:​14-17) Kodwa iBhayibhili liphinda lisitshele eyinye indlela abantwana abangafunda ngayo ngoJehova. Ebhukwini leZaga kulamavesi akhuluma ngobaba okhanya ekhumbuza indodana yakhe ukuthi ingakhohlwa ubuntu bukaJehova obuvezwa yizinto azidalileyo. (Zaga. 3:​19-21) Abazali abanengi bayakukholisa ukuvakatsha labantwababo betshaywa ngumoya nje. Bazali, sebenzisani leso sikhathi ukuthi lifundise abantwabenu ukuthi ‘lezozinto ezadalwa’ nguJehova zisifundisani ngobuntu bakhe obuhle. (Rom. 1:20) UJesu wasebenzisa izinto ezidaliweyo ukuze afundise abantu izifundo eziqakathekileyo. Ngelinye ilanga wacela abafundi bakhe ukuthi bacabange ngamawabayi lamaluba eganga. (Luk. 12:​24, 27-30) Wafundisa abafundi bakhe isifundo esiqakathekileyo sokuthi uBaba wethu osezulwini uyaphana futhi ulomusa. Basala bengathandabuzi ukuthi uJehova uzanika izinceku zakhe ezithembekileyo okokudla lokokugqoka njengoba nje enakekela amawabayi lamaluba eganga. w23.03 20-21 ¶1-4

Siyambonga uJehova ngokuthi siyenelisa ukuthandaza kuye ngebizo leNdodana yakhe. UJehova usebenzisa uJesu ukuze asinike lokho esikucelayo. UJehova uyayilalela futhi ayiphendule imithandazo esiyenza sisebenzisa ibizo likaJesu njalo uyasithethelela izono zethu ngenxa yomhlatshelo kaJesu. (Rom. 5:1) IBhayibhili lithi uJesu ‘ungumphristi omkhulu ohlezi ngakwesokudla kwesihlalo sobukhosi sikaNkulunkulu Omkhulu osemazulwini.’ (Heb. 8:1) UJesu ‘ungumsizi wethu kuBaba.’ (1 Joh. 2:1) Simbonga singaqedi uJehova ngokusinika uMphristi Omkhulu ozwisisa ubuthakathaka bethu futhi ‘osincengelayo.’ (Rom. 8:34; Heb. 4:15) Besingeke senelise ukuthandaza kuJehova aluba besingelamhlatshelo kaJesu. Sizahlala simbonga uJehova ngokusinika isipho seNdodana yakhe ayithandayo. w22.07 23 ¶10-12

Umuntu othembekileyo uyazama ukugcwalisa zonke izithembiso zakhe futhi ukhuluma iqiniso. (Hubo. 15:4) Abantu bayakwazi ukuthi ngeke abalahlise. Siyafuna ukuthi abafowethu labodadewethu basithembe. Kumele sisebenze nzima ukuze abanye basithembe ngoba ngeke sibabambe ngamandla ukuthi benze njalo. Abanye bathi ukuthenjwa kufanana lemali. Kunzima ukuthi ukuthole kodwa kulula ukuthi kukuphelele. Kunengi okwenziwe nguJehova okutshengisa ukuthi singamthemba. “Uthembekile kukho konke akwenzayo.” (Hubo. 33:4) Kanti njalo ukhangelele ukuthi simlingisele. (Efe. 5:1) Siyambonga uJehova ngenxa yokuthi siyingxenye yemuli yakhe yabantu abathandanayo futhi abathembekileyo. Sonke kumele senze konke esingakwenza ukuze abafowethu labodadewethu basithembe. Nxa sonke singaba lothando, sizithobe, sibe lokuqedisisa, sikhulume iqiniso njalo sizikhuze sizathembana ebandleni. Asiqhubekeni silingisela uJehova uNkulunkulu wethu ukuze abanye basithembe. w22.09 8 ¶1-2; 13 ¶17

Lanxa singabe sisebandleni elilabantu abanengi, kungaba lezikhathi lapho esiyabe sibona angani sisodwa njalo singadana kumbe sihlulukelwe besesibona angani kumele silwisane lobuhlungu esibuzwayo sisodwa. UJehova kafuni sicabange njalo. Ake sibone ukuthi wamncedisa njani u-Elija. UJehova wamkhuthaza ukuthi amtshele okusenhliziyweni yakhe. Wambuza kabili wathi: “Wenzani khonapha?” (1 AmaKho. 19:​9, 13) UJehova wamlalela ngesikhathi ekhuluma lokho okusenhliziyweni yakhe. Wamtshela lokuthi kwakulabantu abanengi ababelokhu bekhonza uJehova. (1 AmaKho. 19:11, 12, 18) Akuthandabuzwa ukuthi u-Elija wezwa esehlalisekile ngemva kokutshela uJehova lokho okwakusenhliziyweni yakhe lokuzwa impendulo yakhe. UJehova waphinda wamnika eminye imisebenzi eqakathekileyo. Wamtshela ukuthi agcobe uHazayeli ukuthi abe yinkosi yaseSiriya lokuthi agcobe uJehu ukuthi abe yinkosi yako-Israyeli, abesegcoba u-Elisha ukuthi abe ngumphrofethi. (1 AmaKho. 19:​15, 16) UJehova wanika u-Elija imisebenzi le ukuze amncede angacabangi kakhulu ngobunzima ayephakathi kwabo. Waphinda wamnika lomngane owayezamncedisa, u-Elisha. w22.08 8 ¶3; 9 ¶5

Ibandla lenu selake lakha kumbe lalungisa iWolu yoMbuso yini? Kumele ukuthi usalikhumbula ilanga owaqala ngalo ukungena imihlangano eWolu le. Mhlawumbe wathaba waze wehluleka lokuhlabela ingoma yokuqala futhi wambonga kakhulu uJehova. AmaWolu ethu oMbuso akhiwe kuhle futhi enza uJehova adunyiswe. Kodwa kulomunye umsebenzi wokwakha esingawenza ongasisiza ukuthi simdumise kakhulu uJehova. Umsebenzi lo ngowokwakha abafowethu labodadewethu labanye abantu abasivakatshelayo endaweni zethu zokukhonzela njalo uqakatheke ukwedlula ukwakha izakhiwo. Umphostoli uPhawuli wayekhuluma ngomsebenzi lo ngesikhathi ebhala amazwi asembhalweni walamuhla. Wayeyisibonelo esihle endabeni yokukhuthaza abanye. Wayebazwela abazalwane ayekhonza labo. Singenelisa ukulingisela umphostoli uPhawuli ukuze lathi sakhe abafowethu labodadewethu.—1 Khor. 11:1. w22.08 20 ¶1-2

UmKhristu ofuna ukwenza okulungileyo phambi kukaJehova kumele athembeke ezindabeni zamabhizinesi. Umuntu olungileyo uyakuzonda ukubona abanye abantu bephathwa kubi. Kanti njalo uyacabanga ngokuthi uJehova uzibona njani izinqumo azenzayo ukuze ‘amthokozise kukho konke.’ IBhayibhili liveza ukuthi uJehova ungumthombo wokulunga. Lithi ‘ulikhaya lokulunga.’ (Jer. 50:​7, TBS) UJehova nguye yedwa olelungelo lokutsho ukuthi yikuphi okuqondileyo lokungaqondanga ngoba unguMdali. Ukwazi mhlophe okulungileyo lokungalunganga. (Zaga. 14:12; Isaya. 55:​8, 9) Lanxa kunjalo siyenelisa ukwenza lokho athi kulungile ngenxa yokuthi senziwe ngomfanekiso wakhe. (Gen. 1:27) Siyakuthanda ukwenza okulungileyo njalo siyamthanda uBaba wethu yikho sizama ngamandla wonke ukuthi simlingisele.—Efe. 5:1. w22.08 27 ¶5-6

Nxa sikhathazekile loba sidanile singafisa ukwenza into ezakwenza sikhohlwe inhlupho zethu. Lokhu kuyazwisiseka kodwa kumele sinanzelele ukuthi singenzi izinto uJehova azizondayo. (Efe. 5:​10-12, 15, 16) Encwadini umphostoli uPhawuli ayibhalela abaseFiliphi wabakhuthaza ukuthi bacabange ngakho konke ‘okulungileyo, konke okumsulwa, konke okuthandekayo, langakho konke okuhle.’ (Flp. 4:8) Lanxa uPhawuli wayengakhulumi ngokuzilibazisa, lokho akutshoyo kungasinceda nxa sikhetha okokuzilibazisa. Ngokwesibonelo, lapho okulebala elithi “konke” evesini le, cabanga ngengoma ozilalelayo, amafilimu owabukelayo, amabhuku owabalayo lemidlalo yamavidiyo oyithandayo. Ukwenza lokhu kungakunceda ukwazi lokho uJehova akwamukelayo lalokho angakwamukeliyo. Sifuna indlela esiphila ngayo ihambelane lemithetho kaJehova ephakemeyo.—Hubo. 119:​1-3. w22.10 9 ¶11-12

Kungenzakala ukuthi abanye ‘abangalunganga’ babesenza izinto ezimbi futhi ezenyanyekayo. Yikho kuzamele bafundiswe imithetho kaJehova ukuze bayilandele. UMbuso kaNkulunkulu uzakwenza uhlelo olumangalisayo lokufundisa abantu laba abazavuswa. Manje ngobani abazafundisa abangalunganga? Ngabexuku elikhulu kanye labalungileyo abayabe sebevusiwe. Abangalunganga kuzamele baqale babe ngabangane bakaJehova futhi bazinikele kuye ukuze amabizo abo abhalwe ebhukwini lokuphila. UJesu Khristu lalabo abazakwahlulela laye bazabe bebakhangele abantu laba ukuze babone ukuthi bayatshintsha yini. (Isam. 20:4) Loba ngubani ongafuni ukutshintsha uzabhujiswa lanxa eleminyaka engu-100. (Isaya. 65:20) UJehova loJesu bayenelisa ukubona okusezinhliziyweni zabantu futhi bazakuba leqiniso lokuthi akulamuntu ophambanisa abanye emhlabeni omutsha.—Isaya. 11:9; 60:18; 65:25. w22.09 17 ¶11-12

Evesini le ibala elithi ‘iziphathamandla’ litsho ababusi abalamandla phezu kwabanye abantu. AmaKhristu kumele abahloniphe ababusi laba. Benza kube lokuthula, baba leqiniso lokuthi abantu bayawulandela umthetho futhi ngezinye izikhathi bayabavikela abantu bakaJehova. (Isam. 12:16) Yikho kufanele sibhadale imithelo, sibesabe njalo sibanike lenhlonipho abayifunayo. (Rom. 13:7) Kodwa ohulumende laba balamandla ngenxa nje yokuthi uJehova ubavumele ukuthi babe lawo. UJesu wakwenza kwacaca lokho ngesikhathi ephendula umbusi weRoma uPhontiyu Philathu. Lapho uPhilathu emtshela ukuthi wayelamandla okuthi avikele impilo yakhe loba ambulale, yena wathi kuye, “Ubungeke ube lamandla phezu kwami ngabe ubungawaphiwanga evela phezulu.” (Joh. 19:11) Amandla ababusi labezombusazwe abakhona lamuhla alalapho aphelela khona njengakaPhilathu. w22.10 14 ¶6

INkosi uDavida yaphefumulelwa ukuthi ibhale ukuthi impilo izabe isinjani nxa sekubusa inkosi ehlakaniphileyo njalo ethembekileyo. (Hubo. 37:​10, 11, 29) Sijayele ukusebenzisa iHubo 37:11 nxa sixoxa labantu ngePharadayisi. Lokho kuqondile sibili ngoba uJesu wakhuluma amazwi lawo entshumayelweni yakhe yasentabeni, etshengisa ukuthi azagcwaliseka esikhathini esizayo. (Mat. 5:5) Kodwa amazwi kaDavida ayetshengisa lokuthi impilo yayizabe isinjani nxa sekubusa uSolomoni. Ngesikhathi kubusa uSolomoni ko-Israyeli, kwakulokuthula phakathi kwabantu bakaNkulunkulu njalo babeselizweni “eligeleza uchago loluju.” UNkulunkulu wayethe: ‘Nxa lingaqhubeka lilandela imilayo yami ngizakwenza kube lokuthula elizweni, lizalala kungabi lomuntu ozalenza lesabe.’ (Levi. 20:24; 26:​3, 6) Izithembiso lezo zagcwaliseka ngesikhathi kubusa uSolomoni. (1 Imilan. 22:9; 29:​26-28) Amazwi akuHubo 37:​10, 11, 29 agcwaliseka kudala futhi azagcwaliseka esikhathini esizayo. w22.12 10 ¶8

Njengoba singamaKhristu eqiniso, kumele silandele iziqondiso esiziphiwa yinhlanganiso. IBhayibhili lisicebisa lisithi: “Impi yakho uzayilwa usebenzisa amacebo alobungcitshi, njalo kuba lokunqoba nxa kulabacebisi abanengi.” (Zaga. 24:6) Amazwi la asinceda njani ukuthi siphumelele emsebenzini wethu wokutshumayela lokufundisa? Nxa sitshumayela siyazama ukulandela iziqondiso esiziphiweyo kulokuthi sitshumayele njalo sifundise ngendlela esiyifunayo thina. Emihlanganweni yethu sithola iziqondiso ezilokuhlakanipha ngoba kulapho esingafunda khona kwabanye abafundisa kuhle besebenzisa iBhayibhili. Kanti njalo inhlanganiso kaJehova isinika amabhuku lamavidiyo esingawasebenzisa ukuze sincedise abanye balizwisise iBhayibhili. Siyathokoza sibili ngamacebo ancedayo esiwathola eBhayibhilini! Kambe besingaba yini singelalo iBhayibhili? Asizimiseleni ukusebenzisa amacebo la esiwanikwa nguJehova.—Zaga. 3:​13-17. w22.10 23 ¶18-19

Nxa singabala njalo sicabangisise ngeLizwi likaNkulunkulu ukholo lwethu luzaqina njengoba nje lokudla kuyiqinisa imizimba yethu. UJehova ufuna silizwisise iLizwi lakhe. Lokho singakwenza ngokukhuleka, ngokulibala lokucabangisisa ngalokho elikutshoyo. Siqala ngokukhuleka ukuze silungiselele inhliziyo zethu ukuthi zamukele imicabango kaJehova. Ngemva kwalokho siyabala indaba eseBhayibhilini besesisima ukuze sicabangisise ngesiyabe sikubalile. Kusinceda njani lokhu? Nxa siqhubeka sicabangisisa sizalizwisisa sibili iLizwi likaNkulunkulu njalo ukholo lwethu luzaqina. Kungani kuqakathekile ukubala lokucabangisisa ngeLizwi likaNkulunkulu? Kusinika amandla okutshumayela ngoMbuso khathesi lokumemezela isahlulelo esilamandla okungenzeka sisimemezele esikhathini esiseduze esizayo. Kanti njalo nxa sicabangisisa ngobuntu obuhle bukaJehova siba ngabangane bakhe abaseduze. w22.11 6-7 ¶16-17

UJesu wakwenza kwacaca ukuthi abalandeli bakhe beqiniso ayisibo bodwa ababezabona ukuthi bayathandana kodwa labanye abantu abangekho ebandleni kwakumele babone ukuthi abafundi bakhe bathandana ngenhliziyo yonke. Indlela oFakazi bakaJehova abathandana ngayo iyamangalisa. Kodwa labo ngabantu abalesono. (1 Joh. 1:8) Yikho nxa siqhubeka sisibabazi abantu abasebandleni sizananzelela lezinto abaziphambanisayo. (Rom. 3:23) Kuyadanisa ukuthi abanye bacina bekhalala ukukhonza uJehova ngenxa yokuphanjaniswa ngabanye ebandleni. UJesu watshengisa njani ukuthi wayebathanda abaphostoli bakhe? Kungenzakala yini ukuthi abantu balingisele uJesu namuhla? Kuhle ukuthi oFakazi bakaJehova bacabangisise ngezimpendulo zemibuzo le. Ukwenza njalo kuzasinceda ukuthi siqhubeke sithandana lanxa siyake siphambaniselane.—Efe. 5:2. w23.03 26-27 ¶2-4

Zisazokubakhona inhlupho ebandleni njengoba umumo lo wezinto ususiya komlindi uyacina. Inhlupho lezi zingenza kubenzima ukuthi sibe qotho kuJehova. Yikho kumele sisebenzise kuhle ingqondo zethu. Ungahlali uzondile nxa omunye umKhristu angakuzwisa ubuhlungu. Nxa ungalaywa ungazihluphi kakhulu ngokuthi abantu bazakuthini, vuma ukulaywa njalo ulungisise lapho okumele ulungise khona. Nxa kungaba lotshintsho enhlanganisweni kaJehova, lwamukele ngenhliziyo yonke njalo ulandele loba yini eyabe itshiwo. Hlala umthemba uJehova kanye lenhlanganiso yakhe lanxa kungenzakala izinto ezenza kubenzima ukuthi ube qotho. Hlaliseka, ucabange kuhle futhi ubone izinto ngendlela kaJehova. Thandaza kuJehova umcela ukuthi akuncedise. Ungaqali ukuzehlukanisa lebandla. Nxa ungakwenza konke lokhu uSathane kasoze wafa wakwehlukanisa loJehova lenhlanganiso yakhe.—Jak. 4:7. w22.11 24-25 ¶14-16

Badala, ncedani abafowenu labodadewenu bawulungele umonakalo. Wobani leqiniso lokuthi bonke ebandleni bayakwazi okumele bakwenze ukuze bahlale bevikelekile njalo bathintane lani. Wena ungenzani? Nxa kungaba lomonakalo duzane lalapho ohlala khona buza abadala ukuthi ungancedisa njani. Mhlawumbe ungacela ukuthi labo abatshiya amakhaya abo kumbe labo abancedisa abehlelwe ngumonakalo bazehlala emzini wakho okwesikhathi esithile. Ungaphathela abamemezeli ukudla lokunye abakudingayo. Kodwa kukhona yini ongakwenza nxa umonakalo ungaba sendaweni ekhatshana? Ye. Ungakhulekela labo obahlaseleyo. (2 Khor. 1:​8-11) Kanti njalo ungancedisa abahlelwe ngumonakalo ngokunikela emsebenzini womhlaba wonke. (2 Khor. 8:2-5) Nxa usenelisa ukuya endaweni leyo, buza abadala ukuthi ungenzani ukuze uyencedisa. Nxa ungabizwa kumele ukuthi uzafundiswa ukuthi uwenze njani umsebenzi wokuncedisa ukuze usetshenziswe ngesikhathi lasendaweni lapho odingakala khona kakhulu. w22.12 24 ¶8; 25 ¶11-12

Amazwi la ayebhalelwe amaKhristu aseKhorinte awesilisa lawesifazana. Abanye babeke baba yizifebe, izitabane lezidakwa. (1 Khor. 6:​9-11) Kambe ubona angani izifiso lezi zahle zanyamalala sebebhabhathiziwe? Hatshi. Bonke babengamaKhristu agcotshiweyo sibili kodwa babelokhu belesono. Akuthandabuzwa ukuthi ngezinye izikhathi labo babelwisana lezifiso ezimbi. Lokhu kuyasiduduza ngoba kutshengisa ukuthi ukulwisana lezifiso ezimbi akuqali ngathi. Singaqhubeka ‘siqinile ekukholweni, sisazi ukuthi inhlupho esiphakathi kwazo zehlela bonke abazalwane bethu abasemhlabeni.’—1 Phet. 5:9. w23.01 12 ¶15

UJesu wacela ukuthi uYise abakhangele abafundi bakhe. (Joh. 17:11) Isicelo sakhe senza sibe lesibindi ngoba uJehova ulamandla ukwedlula loba yisiphi isitha sethu. (1 Joh. 4:4) Kanti njalo uJehova ubona konke okwenzakalayo. Asithandabuzi ukuthi nxa singathembela kuye sizanqoba loba yikuphi ukwesaba, sibe lesibindi. Uyake ube lenhloni zokutsho ukuthi unguFakazi kaJehova nxa usesikolo loba emsebenzini? Uyathikaza yini ukuba ngummemezeli loba ukubhabhathizwa ngenxa yokuthi uyesaba ukuthi abantu bazathini ngawe? Ungakuvumeli lokho kukuvimbele ukuthi wenze into eqondileyo. Thandaza kuJehova ngenhliziyo yonke. Mcele akunike isibindi sokuthi wenze intando yakhe. Nxa ungabona indlela uJehova aphendula ngayo imithandazo yakho uzaqina ube lesibindi.—Isaya. 41:​10, 13. w23.01 29 ¶12; 30 ¶14

UJesu wabuza umbuzo othi “Kanti alikaze likubale yini?” ukuze atshengise ukuthi abaFarisi babelombono ongayisiwo ngalokho ababekubala eMibhalweni. (Mat. 12:​1-7) Ngalesosikhathi abaFarisi babesithi abafundi bakaJesu bephule umthetho weSabatha. UJesu wathi ebaphendula wabatshela izibonelo ezimbili eziseMibhalweni, wasebatshela lamazwi asembhalweni kaHosiya ukuze abatshengise ukuthi babengazwisisi ukuthi umthetho weSabatha usebenza njani lokuthi kabazange babe lesihawu. Kungani amadoda la engabunjwanga liLizwi likaNkulunkulu ngesikhathi elibala? Ngenxa yokuthi babethanda ukubala bechothoza futhi babezikhukhumeza. Lokhu kwenza behluleka ukuzwisisa ukuthi abakubalayo kutshoni. (Mat. 23:23; Joh. 5:​39, 40) Nanzelela loMathewu 19:​4-6, lapho uJesu abuza khona abaFarisi umbuzo onjengalowo wathi: “Alikaze likubale yini?” Lanxa babebale imibhalo emayelana lokudalwa kwabantu kabazange bazwisise ukuthi ibafundisani ngokuthi uNkulunkulu uthini ngabatshadileyo. Amazwi kaJesu asifundisa ukuthi nxa sibala iBhayibhili akumelanga sibe ngabantu abazikhukhumezayo futhi abachothozayo njengabaFarisi. Kodwa kumele sithobeke futhi sizimisele ukufunda kulo. w23.02 12 ¶12-13

UMthetho uJehova awunika isizwe sako-Israyeli wawulezinto okwakumele bazenze ukuze bazivikele ezingozini ezazingabakhona ngekhaya kumbe emsebenzini. (Eks. 21:​28, 29; Dute. 22:8) Nxa kwakungaba lengozi embi besekusifa umuntu, odale ingozi leyo wayekubona okukhulu. (Dute. 19:​4, 5) UMthetho wawusithi nxa abantu babengadala ingozi ibisilimaza umntwana ongakazalwa kwakumele bajeziswe. (Eks. 21:​22, 23) IMibhalo yenza kucace ukuthi uJehova ufuna sizivikele ezingozini. Sitshengisa ukuthi siyasiqakathekisa isipho sokuphila esisinikwe nguNkulunkulu ngokuzivikela ezingozini nxa singekhaya loba sisemsebenzini. Asiphongulahla nje egcekeni ezinto ezingasika abanye, amakhemikhali ayingozi, loba imithi yesibhedlela futhi asizifaki endaweni lapho ezingafikelwa khona ngabantwana. Siyananzelela nxa sibasa umlilo, sibilisa amanzi, loba sisebenzisa imitshina esebenza ngegetsi njalo asiphonguzitshiya izinto lezi. Asitshayeli imota nxa sike sanatha imithi eyenza kube nzima ukuthi senze njalo kumbe sike sanatha utshwala loba silobuthongo. Kanti njalo asitshayeli ngapha sisebenzisa ifoni. w23.02 21-22 ¶7-9

UJehova unguMfundisi obekezelayo, olomusa futhi ozwisisayo njalo ukhangela okuhle okwenziwa yilabo abafundisayo. (Hubo. 130:3) Kakhangelelanga ukuthi senze okungaphezu kwamandla ethu. Khumbula ukuthi nguye owenza ingqondo olayo eyisipho esimangalisayo. (Hubo. 139:14) UMdali wethu ufuna sikholise ukufunda njalo siqhubeke sifunda kuze kube nini lanini. Yikho kumele siqalise khathesi ukuba “lesifiso esikhulu” sokufunda iqiniso eliseBhayibhilini. (1 Phet. 2:2) Hlela ukwenza izinto ezisemandleni akho njalo ube lohlelo lokubala lokutaditsha iLizwi likaNkulunkulu zikhathi zonke. (Josh. 1:8) UJehova uzakuncedisa ukuthi ukukholise ukubala lokuqhubeka ufunda okunengi ngaye. Ulwazi luyakunceda ukuthi ufunde okunengi ngoJehova, umthande futhi ube lokholo kuye. (1 Khor. 8:​1-3) Kodwa ukuthola ulwazi ayisikho kodwa okumele ukwenze. Nxa uqhubeka ufunda ungayekeli ukucela uJehova ukuthi akuncede ube lokholo oluqinileyo. (Luk. 17:5) Ungenza njalo uzayiphendula imithandazo yakho. w23.03 10 ¶11, 13

Abafundi bakaJesu kwakungamelanga bagoqe izandla besamelele isiphetho somumo wezinto. UJesu wabanika umsebenzi wathi batshumayele izindaba ezinhle “eJerusalema lakulo lonke elaseJudiya leSamariya kuze kuyefika emaphethelweni omhlaba.” (Imiseb. 1:​6-8) Lo wawungumsebenzi omkhulu sibili! Abalandeli bakaJesu basebenzisa kuhle isikhathi sabo ngokukhuthala emsebenzini lo. Okuzasinceda sinanzelele indlela esenza ngayo yikucabangisisa ngokuthi sisisebenzisa njani isikhathi sethu. Sonke singafikelwa ‘yizehlakalo ezisijuma silibele.’ (Umtshu. 9:11) Elokufa kalitsheli. Singasebenzisa kuhle isikhathi sethu ngokwenza intando kaJehova langokuqinisa ubungane bethu laye. (Joh. 14:21) Kumele ‘sime siqine singanyikinyeki, sihlale sisenza okunengi emsebenzini weNkosi.’ (1 Khor. 15:58) Nxa singakwenza lokhu asisoze sizisole nxa ukuphela sekufika, kungabe kuyikuphela kwempilo yethu kumbe okomumo lo wezinto omubi.—Mat. 24:13; Rom. 14:8. w23.02 18 ¶12-14