December

Isiphathamandla esingumTopiya sasesikulungele yini ukubhabhathizwa? Phela indoda engumTopiya “yayihambe yayakhonza eJerusalema.” (Imiseb. 8:27) Kutsho ukuthi indoda le yayisitshintshile yemukela ukholo lwesiJuda. Akuthandabuzwa ukuthi yayisifunde ngoJehova eMibhalweni yesiHebheru engcwele. Lanxa kunjalo yayizimisele ukufunda okunengi. UFiliphu wayithola ibala umbhalo womphrofethi u-Isaya. (Imiseb. 8:28) Yayizimisele ukuqhubeka ifunda okunengi. Yayithethe uhambo olude isuka eTopiya isiyakhonza uJehova khonale ethempelini eliseJerusalema. UFiliphu wafundisa indoda engumTopiya izinto eziqakathekileyo eyayingazazi. Ngokwesibonelo, wayichasisela ukuthi uJesu nguye owayenguMesiya. (Imiseb. 8:​34, 35) Yaqhubeka imthanda uJehova leNdodana yakhe uJesu futhi uthando lolo lwaqhubeka lukhula. Yahle yenza isinqumo esiqakathekileyo kakhulu esokubhabhathizwa ibe ngumlandeli kaJesu Khristu. UFiliphu wakubona ukuthi indoda le yayisikulungele ukubhabhathizwa yikho wahle wayibhabhathiza. w23.03 8-9 ¶3-6

Ngeke simthokozise uJehova nxa sikhuluma amanga. (Zaga. 6:16, 17) Lanxa abantu abanengi besithi akukubi ukukhuluma amanga, thina asiwaqambi ngenxa yokuthi uJehova uyawazonda. (Hubo. 15:1, 2) Asiwaqambi sibili amanga kodwa futhi asifihli okunye sisenzela ukuthi abantu bacabange okungayisikho. Kumele sixwaye lokunyeya. (Zaga. 25:23; 2 Thes. 3:11) Nxa ungananzelela ukuthi ingxoxo isisiya ekunyeyeni, yitshintshe ukhulume ngezinto ezikhuthazayo. Kumele sisebenze nzima ukuze sikhulume izinto ezithokozisa uJehova ngoba siphila emhlabeni ogcwele abantu abakhuluma amazwi angcolileyo. UJehova uzasibusisa nxa singakhuluma ngendlela ezakwenza ukuthi adunyiswe nxa sisekutshumayeleni, emihlanganweni yebandla lalapho sizixoxela nje labanye. Nxa esebhubhise umhlaba lo omubi kuzakuba lula ukuthi lokho esikukhulumayo kumdumise.—Jud. 15. w22.04 9 ¶18-20

Nxa sicabanga indlela uJehova loJesu abasithanda ngayo kuyasifuqa ukuthi lathi sibathande. (1 Joh. 4:10) Okuzakwenza ubathande kakhulu yikunanzelela ukuthi uJesu wafela wena ngokwakho. Umphostoli uPhawuli wayekwazi mhlophe lokho njalo watshengisa ukuthi uyabonga ngesikhathi ebhalela amaGalathiya esithi: ‘INdodana kaNkulunkulu yangithanda yazinikela ngenxa yami.’ (Gal. 2:20) UJehova ukudonsele kuye esebenzisa inhlawulo ukuze ube ngumngane wakhe. (Joh. 6:44) Uzwa njani ngokuthi uJehova wabona okuhle kuwe wasekuthenga ngentengo ephezulu kakhulu ukuze ube ngumngane wakhe? Kumele ukuthi lokhu kwenza umthande kakhulu uJehova loJesu. Kuhle ukuzibuza umbuzo lo, ‘Uthando lolu luzangifuqa ukuthi ngenzeni?’ Ukuthanda uNkulunkulu loKhristu kuzasifuqa ukuthi sithande abanye.—2 Khor. 5:​14, 15; 6:1, 2. w23.01 28 ¶6-7

IBhayibhili lisetshenziswa kakhulu nguNkulunkulu ukuze ancede labo abamkhonzayo ukuthi “bamkhonze bemanyene.” UJehova waphefumulela abalobi beBhayibhili ukuthi babhale ngendlela eyayizakwenza ukuthi lizwisiswe ngabantu abathobekileyo kuphela. (Luk. 10:21) Abantu abanengi bayalibala iBhayibhili. Kodwa ngabathobekileyo kuphela abalizwisisayo futhi abenza lokho elikutshoyo. (2 Khor. 3:​15, 16) IBhayibhili litshengisa ukuthi uJehova unguNkulunkulu olokuhlakanipha. UJehova usebenzisa iMibhalo ukuze asifundise siliqembu aphinde ayisebenzise ukuthi afundise futhi aduduze umuntu ngamunye. Nxa sibala iLizwi likaNkulunkulu, sonke siyakubona ukuthi ulendaba lathi. (Isaya. 30:21) Kukangaki ubala ivesi eyayingathi ibhalelwe wena sibili? Kuyamangalisa ukuthi iBhayibhili lilezinto ezingathi zibhalelwe wena kodwa lona libhalelwe ukuthi lizwisiswe ngamamiliyoni abantu. Lokhu kungenxa yokuthi iBhayibhili labhalwa nguMlobi olenhlakanipho emangalisayo.—2 Thim. 3:​16, 17. w23.02 4-5 ¶8-10

Siyamthanda sibili uJehova. Yikho sifuna ukwenza konke okusemandleni ethu ekumkhonzeni. Kodwa ukuze sithuthuke kumele sihlele lokho esifuna ukukwenza. Singahlela ukuba lobuntu amaKhristu okumele abe labo, ukufunda ukwenza ezinye izinto lokudinga indlela esingancedisa ngazo abanye. Kungani kumele sizimisele ukuthuthuka? Isizatho esiqakathekileyo yikuthi sifuna ukuthokozisa uBaba wethu osezulwini. UJehova uyathokoza nxa sizisebenzisa ngokugcweleyo iziphiwo zethu ekumkhonzeni. Okunye okwenza sithuthuke ekukhonzeni yikuthi sifuna ukuncedisa abafowethu labodadewethu. (1 Thes. 4:​9, 10) Sonke singathuthuka ekukhonzeni kungelani lokuthi sesilesikhathi esinganani singoFakazi. w22.04 22 ¶1-2

Abezombusazwe bazayihlamukela iBhabhiloni Enkulu, emela umbuso womhlaba wonke wenkolo yamanga. Lokhu kuzabe kuyikuqala kokuhlupheka okukhulu. Kambe abantu abanengi bazathi bebona lokhu baqalise ukukhonza uJehova? Hatshi. ISambulo isahluko 6 sithi ngalesosikhathi labo abangakhonzi uNkulunkulu bazakuyacatsha ezintabeni ezimela abezombusazwe labezamabhizimusi. UJehova uzababona beyizitha zakhe njengoba bayabe bengawusekeli uMbuso wakhe. (Luk. 11:23; Isam. 6:​15-17) Ngesikhathi lesi esinzima, kuzazicacela ukuthi abantu bakaJehova abathembekileyo batshiyene labanye. Yibo bodwa abazabe bekhonza uJehova uNkulunkulu njalo besala ukusekela ‘isilo.’—Isam. 13:​14-17. w22.05 16-17 ¶8-9

‘Izindaba ezinhle zoMbuso’ ayisizo zodwa abantu bakaNkulunkulu okumele bazimemezele. (Mat. 24:14) Kumele basekele lomsebenzi owenziwa zingilosi okukhulunywa ngazo kuSambulo isahluko 8 kusiya ku-10. Ingilosi lezi zimemezela inhlupheko ezizakwehlela abantu abangamukeli uMbuso kaNkulunkulu. Yikho oFakazi bakaJehova bamemezela amazwi esahlulelo afaniswa “lesiqhotho lomlilo” atshengisa okuzakwehlela inhlangothi ezitshiyeneyo zomhlaba omubi kaSathane. (Isam. 8:​7, 13) Abantu kumele bakwazi ukuthi ukuphela sekuseduze ukuze batshintshe impilo zabo njalo basinde ngosuku lwentukuthelo kaJehova. (Zef. 2:​2, 3) Kodwa abantu abafuni ukukuzwa lokho. Kumele sibe lesibindi ukuze sibatshele ngakho. Ngesikhathi sokuhlupheka okukhulu, isimemezelo sokucina sesahlulelo sizabe silamandla kulalesi.—Isam. 16:21. w22.05 7 ¶18-19

Labo abasanda kuba ngabazali bangabe bezwa inkulumo ezinengi ezikhuluma ngokukhulisa abantwana kodwa khathesi sekumele bakuqakathekise kakhulu okwakhulunywa enkulumeni lezo njengoba labo sebelowabo umntwana. Sekumele basebenze nzima. Yikho nxa izimo zitshintsha sicina siyiqakathekisa kakhulu eminye imibhalo. Lokhu ngokunye okwenza inceku zikaJehova zibale iBhayibhili “zonke izinsuku” zokuphila kwazo njengalokho amakhosi ako-Israyeli atshelwa ukuthi akwenze njalo zicabangisise ngezikubalayo. (Dute. 17:19) Bazali lilesibusiso esikhulu sokufundisa abantwabenu ngoJehova. Kodwa akumelanga liphongubafundisa ngaye. Kumele libancedise lokuthi bamthande ngenhliziyo yonke. w22.05 26 ¶2-3

Ukuzisola ngesono esisenzileyo akwenelanga. Kumele sizimisele lokwenza okuthile. Okuqakathekileyo uJehova akukhangelayo nxa ekhetha ukusithethelela yikuthi sesiguqukile yini. Lokhu kutsho ukuthi umuntu kumele atshiye izinto ezimbi akade ezenza aqalise ukuphila ngendlela uJehova afuna aphile ngayo. (Isaya. 55:7) Kumele atshintshe indlela acabanga ngayo, acabange ngendlela uJehova acabanga ngayo. (Rom. 12:2; Efe. 4:23) Kumele azimisele ukutshiya izinto ezimbi abezicabanga labezenza. (Kol. 3:​7-9) Ukholo emhlatshelweni kaKhristu yilo olwenza uJehova asithethelele njalo asihlambulule esonweni. UJehova uzasithethelela esebenzisa umhlatshelo lo nxa ebona ukuthi sizimisele ukutshintsha.—1 Joh. 1:7. w22.06 6 ¶16-17

Kusukela kudala abantu bebehlala belimazana. (UmTshu. 8:9, NWT) Ngokwesibonelo, abasezikhundleni bawasebenzisa kubi amandla abo. Izigebenga zihlasela abantu. Abanye abantwana bathethisa abanye esikolo futhi bayabethusela. Kanti njalo abanye abantu baphatha kubi imuli zabo. Yikho abantu bemesaba umuntu. Manje uSathane ukusebenzisa njani ukwesaba lokhu? USathane usebenzisa ukwesaba abantu ukuze asenze siyekele ukutshumayela lokwenza okunye uNkulunkulu athi sikwenze. Usebenzisa ohulumende ukuthi bavimbe umsebenzi wethu njalo basihlukuluze. (Luk. 21:12) Abantu abanengi emhlabeni kaSathane bakhuluma amanga ngaboFakazi bakaJehova, bekhohlisa abanye. Abantu abakholwa amanga la bangakhuluma kubi ngathi kumbe basilimaze. (Mat. 10:36) Okwenziwa nguSathane akusimangalisi ngoba wayevele esekwenza ngesikhathi samaKhristu akuqala.—ImiSeb. 5:​27, 28, 40. w22.06 16 ¶10-11

“Abanengi” abazancediswa ukuthi babe ngabalungileyo yilabo abazavuswa lalabo abazasinda e-Amagedoni kanye labantwana abazazalwa emhlabeni omutsha. Ekupheleni kweminyaka eyinkulungwane bonke abazabe bephila emhlabeni bazabe bengaselasono. Ukuthi umuntu kalasono akutsho ukuthi uzathola ukuphila okungapheliyo. Phela u-Adamu lo-Eva labo babengelasono. Kodwa kwakumele balalele uJehova uNkulunkulu ukuze bathole ukuphila okungapheliyo. Okudanisayo yikuthi abazange bamlalele. (Rom. 5:12) Ekupheleni kweminyaka eyinkulungwane bonke abantu emhlabeni bazabe bengaselasono. Kodwa yibo bonke yini abazaqhubeka besekela ubukhosi bukaJehova kumbe bakhona abazakwenza njengo-Adamu lo-Eva abangazange bamlalele lanxa babengelasono? w22.09 22-23 ¶12-14

Nxa ukhangele okubi okwenzakala emhlabeni ubona angani izinto zizafa zatshintsha yini? Abantu emulini abasazwanani. Abantu sebelodlakela, abaselandaba labanye njalo balolaka. Abanengi abasazithembi iziphathamandla. Kodwa lokho okwenzakalayo kungenza sibe lethemba lokuthi izinto zizakuba ngcono. Kungani sisitsho njalo? Ngoba abantu sebesenza khona kanye iBhayibhili elathi bazabe sebekwenza “ezinsukwini zokucina.” (2 Tim. 3:​1-5) Akulamuntu oyihlolisisayo indaba le ongakuphika ukuthi isiphrofetho lesi siyagcwaliseka. Kanti njalo ukugcwaliseka kwaso kutshengisa ukuthi uJesu Khristu useyiNkosi yoMbuso kaNkulunkulu. Isiphrofetho lesi esesikhulume ngaso ngesinye seziphrofetho ezinengi ezikhuluma ngoMbuso. Zonke iziphrofetho lezi ziyangenelana njengeziqephu ezihlanganiswayo ukuze kubunjwe umfanekiso owodwa, okuzasinceda sibone ukuthi siphila kusiphi isikhathi. w22.07 2 ¶1-2

Ngesikhathi somkhuhlane we-COVID-19 sanikwa iziqondiso ezimayelana lokungena imihlangano lokutshumayela. Kungakayi ngaphi saqalisa ukungena imihlangano yebandla lemihlangano emikhulu sisebenzisa ezempucuko. Saqalisa lokutshumayela ngefoni langencwadi. UJehova ukubusisile konke ebesikwenza. Amagatsha amanengi abike ukuthi abamemezeli bande kakhulu ngesikhathi lesi. Kunengi okukhuthazayo okwenzakeleyo. Abanye bangabe babecabanga ukuthi iziqondiso esasiziphiwa yinhlanganiso mayelana le-COVID-19 zazingadingeki kodwa zikhathi zonke babecina bezibonela ukuthi iziqondiso lezi zazisivikela. Nxa singacabangisisa ngendlela uJesu akhokhela kuhle ngayo abantu bakhe asisoze sithandabuze ukuthi uJehova leNdodana yakhe bazahlala belathi loba kungaze kwenzakaleni.—Heb. 13:​5, 6. w22.07 13 ¶15-16

Ngaphandle kokudumisa uJehova emithandazweni yethu, siphinda simbonge ngenxa yazo zonke izinto asinika zona. Ngokwesibonelo singambonga ngenxa yamaluba alemibala emihle etshiyeneyo langenxa yokudla okumnandi okuyimihlobo etshiyeneyo kanye labangane abasithandayo. UBaba wethu olothando usinika zonke izinto lezi kanye lezinye ezinengi ukuze sithokoze. (Hubo. 104:​12-15, 24) Okuqakatheke kakhulu esimbonga ngakho kakhulu uJehova yikusincedisa ukuthi sihlale silokholo oluqinileyo futhi siyambonga langethemba lesikhathi esizayo asinike lona. Kulula ukukhohlwa ukumbonga uJehova ngakho konke asenzela khona. Manje kuyini okungasinceda ukuthi sikhumbule? Ungabhala phansi izinto ezitshiyeneyo ozithandazeleyo ubusuzama ukubona ukuthi uJehova uyiphendule njani imithandazo yakho. Ngemva kwalokho usungathandaza umbonga ngendlela akuncedise ngayo.—Kol. 3:15. w22.07 22 ¶8-9

Kukhona okunye okumele sikwenze ngaphandle nje kokufunda iqiniso. Kumele sikusebenzise esikufundayo. Sizathokoza nxa singakwenza lokhu. (Jak. 1:25) Singenzani ukuze sibone ukuthi siyakusebenzisa yini lokho esikufundayo? Omunye umfowethu uthi kumele sizihlole ukuze sibone lapho esenza kuhle khona lalapho esidinga ukulungisisa khona. Umphostoli uPhawuli yena wathi: “Njengoba sesithuthukile safika kulelibanga, kasiqhubekeni sihamba ngokuhleleka endleleni yonale.” (Flp. 3:16) Siyancedakala sibili nxa sisenza konke esingakwenza ukuze ‘siqhubeke sihamba eqinisweni.’ Siphila impilo ethokozisayo njalo senza uJehova labafowethu labodadewethu bathokoze. (Zaga. 27:11; 3 Joh. 4) Lezi yizizatho eziqakatheke kakhulu ezenza silithande iqiniso njalo senze lokho elikutshoyo. w22.08 18-19 ¶16-18

Abadala bangatshengisa njani ukuthi bayamthanda uJehova loJesu? Indlela eqakathekileyo abangakwenza ngayo lokhu yikuba lendaba lezimvu zikaJesu. (1 Phet. 5:​1, 2) UJesu wakucacisa lokhu kumphostoli uPhetro. Wathi esephike uJesu kathathu kumele ukuthi wayezimisele kakhulu ukutshengisa ukuthi uyamthanda. UJesu wathi esevusiwe wabuza uPhetro wathi: “Simoni ndodana kaJohane, uyangithanda yini?” Asithandabuzi ukuthi uPhetro wayengenza loba yini ukuthi atshengise iNkosi yakhe ukuthi uyayithanda. UJesu watshela uPhetro wathi: “Yelusa amazinyane ezimvu zami.” (Joh. 21:15-17) Lakanye okwempilo yakhe yonke uPhetro watshengisa ukuthi wayeziphethe kuhle kakhulu izimvu zikaJesu, etshengisa ukuthi wayemthanda. Badala, lingatshengisa njani ukuthi liyakwenza lokho uJesu akutshela uPhetro? Lingatshengisa ukuthi liyamthanda uJehova loJesu ngokwelusa izimvu zakhe njalo lisenza konke elingakwenza ukuze lincede abangasafezi inkonzo ukuthi babuyele kuJehova.—Hez. 34:​11, 12. w23.01 29 ¶10-11

Ungacabangi ukuthi akulamuntu ongazwisisa isilingo olwisana laso ngoba lokhu kungaba yingozi. Kungenza ucabange ukuthi akulanto ongayenza ukuze ulwisane lesifiso leso esibi. Kodwa iBhayibhili lithi: “Nxa selilingwa uzakwenza ukuthi kube lendlela yokuphunyuka ukuze lenelise ukuqinisela.” Lokhu kutshengisa ukuthi singenelisa ukulwisana lesifiso esibi kungelani lokuthi isifiso leso silamandla angakanani. UJehova uzasinika amandla okuthi singacini sesenze into embi. Hlala ukhumbula ukuthi izifiso ezimbi zizahlala zisivakatshela njengoba singabantu abalesono. Kodwa nxa zingathutsha singenelisa ukuthi sihle sizixotshe njengoJosefa ongazange athikaze ukubalekela umkaPhothifa. (Gen. 39:12) Akulasizatho sokuthi sicine silandele izifiso zethu ezimbi. w23.01 12-13 ¶16-17

UJehova nguNkulunkulu owahlulela kuhle futhi olokulunga. (Dute. 32:4) Izikhathi ezinengi nxa umuntu esahlulela kuhle uyabe engabandlululi, uJehova laye kabandlululi. (Imiseb. 10:​34, 35) Siyakubona ukuthi uNkulunkulu kabandlululi nxa sikhangela izindimi ezasetshenziswa ukubhala iBhayibhili. UJehova wathembisa ukuthi ngesikhathi sokucina “ulwazi lweqiniso” olutholakala eBhayibhilini “luzakuba lunengi.” Abantu abanengi babezaluzwisisa. (Dan. 12:4) Eyinye indlela ulwazi lolu oluba lunengi ngayo yikuhunyutshwa kwamaBhayibhili lamabhuku alichasisayo, ephrintwa njalo enikwa abantu. Abantu bakaJehova sebehumutshe iBhayibhili kusukela kuGenesisi kusiya kuSambulo kumbe iMibhalo yamaKhristu yesiGrikhi ngezindimi ezedlula 240 njalo loba ngubani angalithola iBhayibhili leli mahala. Lokho sekwenze abantu bezizwe zonke bathola ‘izindaba ezinhle zoMbuso’ ukuphela kungakafiki. (Mat. 24:14) UNkulunkulu wethu owahlulela kuhle ufuna ukunika abantu abanengi ithuba lokuthi babale iLizwi lakhe ukuze bamazi. Lokhu kungenxa yokuthi uyasithanda kakhulu sonke. w23.02 5 ¶11-12

Akuthandabuzwa ukuthi uyakuthanda ukwenza okulungileyo. Kodwa sonke silesono yikho nxa singananzeleli singacina sesilandela lokho umhlaba lo othi kulungile. (Isaya. 5:20) Abantu abanengi bacabanga ukuthi umuntu olungileyo ngozigqajayo, othanda ukusola abanye futhi ozibona engcono kulabanye. Kodwa uNkulunkulu kamthandi umuntu onjalo. Ngesikhathi uJesu esemhlabeni wabasola kakhulu abakhokheli benkolo ababezifakela eyabo imithetho yokuthi kuyini okulungileyo lokungalunganga. (UmTshu. 7:16; Luk. 16:15) Umuntu owenza lokho uJehova athi kulungile kaziboni engcono kulabanye abantu. Umuntu olungileyo ngowenza lokho uJehova uNkulunkulu athi kuqondile. EBhayibhilini ukulunga kutsho ukulandela imithetho kaJehova ephakemeyo. w22.08 27 ¶3-5

UJesu wayebathemba abafundi bakhe lanxa babewenza amaphutha. (Joh. 15:16) Ngesikhathi uJakhobe loJohane becela izikhundla eMbusweni uJesu kazange asole inhloso zabo zokukhonza uJehova futhi baqhubeka bengabaphostoli bakhe. (Mak. 10:​35-40) Ngokuhamba kwesikhathi abafundi bakhe bonke bamtshiya ngobusuku abotshwa ngabo. (Mat. 26:56) Kodwa uJesu waqhubeka ebathemba. Wayewazi kuhle amaphutha abo kodwa “waqhubeka ebathanda kwaze kwaba sekucineni.” (Joh. 13:1) Esevusiwe uJesu wanika abafundi bakhe abangu-11 umsebenzi omkhulu wokukhokhela emsebenzini wokwenza abafundi lowokunakekela izimvu zakhe. (Mat. 28:​19, 20; Joh. 21:​15-17) Kwakuqondile sibili ukuthi awathembe amadoda la ayelesono. Phela aqhubeka ethembekile kuJehova aze aqeda inkonzo yawo yasemhlabeni. UJesu watshengisa ukuthi singabathemba abantu abalesono. w22.09 6 ¶12

Nxa siqiniseka ukuthi uJehova uyasithanda lokuthi ulathi, sizenelisa ukumelana lamacebo kaSathane asenza sesabe. Umlobi weHubo 118 waba sezimeni ezinzima. Wayelezitha ezinengi njalo ezinye zazo zazilezikhundla eziphezulu (amavesi 9 lo-10). Ngezinye izikhathi wayekhathazeka kakhulu (ivesi 13). Kanti njalo uJehova wamnika iseluleko esilamandla (ivesi 18). Lanxa kunjalo umhubi lo wathi: “Angiyikwesaba.” Wayekwazi ukuthi lanxa uYise osezulwini wayemkhuzile wayelokhu emthanda. Wayekwazi lokuthi uzamncedisa kungelani lobunzima ayephakathi kwabo. (Hubo. 118:29) Kumele siqiniseke ukuthi uJehova uyasithanda. Lokhu kuzasinceda singesabi izinto ezintathu ezijayele ukwesatshwa ngabantu. Okokuqala yikwesaba ukuthi asisoze senelise ukondla imuli yethu. Okwesibili yikwesaba abantu. Okwesithathu yikwesaba ukufa. w22.06 15 ¶3-4

Kumele sibe leqiniso lokuthi siqakathekisa ukukhonza uJehova ukwedlula loba yini. Kufanele simkhonze uJehova njengoba enguMdali wethu. (Isam. 4:11; 14:​6, 7) Yikho okumele sikuqakathekise kakhulu yikumkhonza ngendlela yena ayifunayo, “ngomoya langeqiniso.” (Joh. 4:​23, 24) Sifuna umoya ongcwele kaNkulunkulu usiqondise ukuze indlela esimkhonza ngayo ihambelane leqiniso eliseLizwini lakhe. Kumele siqakathekise ukukhonza lanxa sihlala elizweni lapho umsebenzi wethu ongavunyelwa khona. Khathesi kulabafowethu labodadewethu abedlula 100 abasemajele ngenxa yokuthi bangoFakazi bakaJehova. Lanxa kunjalo bayathokoza ngoba benza loba yini abangayenza ukuze bathandaze, bataditshe futhi batshele abanye ngoNkulunkulu wethu langoMbuso wakhe. Lanxa singathethiswa loba sihlukuluzwe siyathokoza ngoba siyakwazi ukuthi uJehova ulathi njalo uzasibusisa.—1 Phet. 4:14. w22.10 9 ¶13

Ebhukwini leZaga uJehova usinika amacebo asincedayo empilweni. Asixoxeni ngezibonelo ezimbili. Esokuqala, suthiseka ngalokho olakho. IZaga 23:​4, 5 zisixwayisa zisithi: ‘Ungazibulali usebenza nzima udinga inotho. Ngoba izamila impiko njengokhozi, iphaphe iye emoyeni.’ Kodwa abantu abanengi lamuhla, abanothileyo labangabayanga baphilela ukudinga imali. Yikho bacina besenza izinto ezibenza bangasathenjwa njalo eziphambanisa ubudlelwano babo labanye kanye lempilakahle yabo. (Zaga. 28:20; 1 Thim. 6:9, 10) Okwesibili, qala ucabange ungakakhulumi. Nxa singakhuluma singacabanganga, amazwi ethu angabalimaza abanye abantu. IZaga 12:18 zithi: “Amazwi omuntu okhuluma engacabanganga agwaza njengenkemba, kodwa ulimi lwabahlakaniphileyo luyelapha.” Nxa singayekela ukuhamba sikhuluma ngamaphutha abanye siyabe sisenza kube lokuthula.—Zaga. 20:19. w22.10 21 ¶14; 22 ¶16-17

UHezekheli kwakumele awazwisise kuhle amazwi okwakumele awatshele amaJuda. Kwakumele awakholwe, abesegazini sibili ukuze azimisele ukuwatshela abantu. Okumangalisayo yikuthi uHezekheli wezwa incwadimgoqwa le ‘imnandi njengoluju.’ (Hez. 3:3) Wayizwa imnandi ngoba kuye ukumela uJehova kwakuyinto emnandi futhi ethokozisayo. (Hubo. 19:​8-11) Wayesiqakathekisa isibusiso uJehova ayemnike sona esokuba ngumphrofethi wakhe. UJehova waphinda wathi kuHezekheli: “Ngicela ulalele njalo uwagcine enhliziyweni yakho wonke amazwi engizakutshela wona.” (Hez. 3:10) Lapha uJehova wayetshela uHezekheli ukuthi angawakhohlwa amazwi ayesencwadinimgoqwa njalo acabangisise ngawo. Lokhu kwaluqinisa ukholo lukaHezekheli. Wayezatshela abantu amazwi alesisindo. (Hez. 3:11) Njengoba wayesewazwisisa futhi ewakhumbula amazwi kaJehova, wayesekulungele ukwenza umsebenzi ayewuphiwe. w22.11 6 ¶12-14

Ungenzani nxa utshintsho olwenziwe enhlanganisweni lusenza kubenzima ukuthi uqhubeke uqotho? Sekela loba yiluphi utshintsho olwenziwayo enhlanganisweni. Ngesikhathi ama-Israyeli ehamba enkangala amaKhohathi ayehamba ethwele ibhokisi lesivumelwano phambi kwabo bonke abantu. (Nan. 3:​29, 31; 10:33; Josh. 3:​2-4) Lesi kwakuyisibusiso esikhulu sibili. Kodwa ama-Israyeli athi eseseLizweni Lesithembiso izinto zatshintsha. Kwakungasadingeki ukuthi ibhokisi lesivumelwano libe lithwalwa zikhathi zonke. Yikho amaKhohathi aphiwa eminye imisebenzi. (1 Imilan. 6:​31-33; 26:​1, 24) Akula lapho esithola khona kuthiwa amaKhohathi akhonona kumbe acela izikhundla eziphezulu ngenxa yomsebenzi ayewenza kuqala. Sifundani kulokhu? Sekela ngenhliziyo yonke loba yiluphi utshintsho olwenziwayo enhlanganisweni kaJehova lanxa kusitsho ukuthi umsebenzi obuwenza uyatshintsha. Thokoza kungelani lokuthi yiwuphi umsebenzi owenzayo. Khumbula ukuthi umsebenzi owenzayo ayisiwo owenza uqakatheke kuJehova. Akuqakathekisa kakhulu yikulalela kwakho ukwedlula loba yiwuphi umsebenzi ongabe uwenza. w22.11 23 ¶10-11

U-Onesiforu wamdinga umphostoli uPhawuli waze wamthola wasezama ukumncedisa ngalokho ayekudinga. Ngesikhathi esenza lokho u-Onesiforu wayefaka impilo yakhe engozini. Sifundani kuye? Akumelanga sesabe abantu besesiyekela ukusekela abafowethu abayabe behlukuluzwa. Kodwa kumele sibavikele senze konke esingakwenza ukuze sibancede. (Zaga. 17:17) Kuqakathekile ukuthi sibathande futhi sibasekele. Kuyini okwenziwa ngabafowethu labodadewethu eRussia nxa abazalwane babo bangabotshwa? Abanengi bayabuya ukuzobasekela nxa besemthethwandaba. Sifundani kulokho? Akumelanga sesabe nxa abazalwane abakhokhelayo beqanjelwa amanga, bebotshwa kumbe behlukuluzwa. Kodwa kumele sibathandazele, sincedise imuli zabo njalo sidinge ezinye indlela esingabasekela ngazo.—Imiseb. 12:5; 2 Khor. 1:​10, 11. w22.11 17 ¶11-12

Umsebenzi wabadala ugoqela ukukhuthaza abafowabo labodadewabo besebenzisa imibhalo lokuncedisa abayabe bekhathazekile. (1 Phet. 5:2) Okokuqala okumele bakwenze nxa kungaba lomonakalo yikuba leqiniso lokuthi abafowabo labodadewabo bavikelekile lokuthi balokudla lokokugqoka kanye lendawo yokuhlala. Kodwa ngezinyanga ezinengi ezilandelayo abafowabo labodadewabo bayabe belokhu bedinga ukukhuthazwa lokududuzwa. (Joh. 21:15) UHarold olilunga leKhomithi Yegatsha njalo osencedise abafowethu labodadewethu abanengi abahlaselwe ngumonakalo uthi: “Kuthatha isikhathi ukuthi abafowethu labodadewethu bazwe ngcono. Bangayijayela sibili impilo entsha kodwa bangabe belokhu becabanga ngomuntu abamthandayo owafayo lempahla ababeyithanda eyabalahlekelayo kumbe ngesimo esiyingozi ababa phakathi kwaso. Izinto ezinje zingabathunuka baqalise ukuzwa ubuhlungu futhi. Kodwa lokhu akutsho ukuthi abalakholo. Yikho vele esikhangelele ukuthi kwenzakale.” Abadala bayawalandela sibili amazwi okuthi ‘bakhale labakhalayo.’—Rom. 12:15. w22.12 22 ¶1; 24-25 ¶10-11

UJehova usincedisa ukuthi senze okulungileyo esebenzisa umoya wakhe ongcwele. Nxa sibala iLizwi likaNkulunkulu siyabe sivumela ukuthi umoya wakhe usikhokhele. Kanti njalo uJehova uyasinika umoya wakhe ongcwele nxa sisemihlanganweni. Emihlanganweni le kulabafowethu labodadewethu abazama ngamandla ukwenza okulungileyo futhi lokhu kuyasikhuthaza. (Heb. 10:​24, 25; 13:7) Nxa singakhuleka kuJehova ngenhliziyo yonke simcele ukuthi asincedise silwisane lomkhuba othile, uzasinika umoya wakhe ongcwele sithole amandla okuqhubeka silwisana lawo. Lanxa izinto lezi zingasoze zenze izifiso ezimbi ziphele zizasinceda ukuthi sihle sizilahle izifiso lezi zingakasiphambanisi. Nxa sesiqalisile ukwenza izinto ezizasisondeza kuJehova, kuqakathekile ukuthi siqhubeke sizenza futhi silwisane lezifiso ezingayisizo. w23.01 11 ¶13-14

IBhayibhili alisilobhuku lezempilakahle njalo alisitsheli ukuthi kumele sidleni. Lanxa kunjalo liyasitshela ukuthi uJehova uzibona njani lezozinto. Ngokwesibonelo, usitshela ukuthi ‘sibalekele izinto’ ezingalimaza imizimba yethu. (Umtshu. 11:10) IBhayibhili alikuvumi ukuthi abantu badakwe, kumbe badle badlulise amalawulo. Kanti njalo izinto lezi zingafaka ukuphila komuntu engozini. (Zaga. 23:20) UJehova ukhangelele ukuthi sibe ngabazikhuzayo nxa sikhetha ukuthi sizadlani lokuthi sizanathani njalo ukhangelele ukuthi singadlulisi amalawulo. (1 Khor. 9:25) Singenza izinqumo ezitshengisa ukuthi siyasiqakathekisa isipho esisinikwe nguNkulunkulu ngokukhetha kuhle kumbe ngokuqedisisa. (Hubo. 119:​99, 100; Zaga. 2:11) Ngokwesibonelo akumelanga siphongudla loba yini. Nxa kulokudla esikuthandayo okusigulisayo sizaba leqiniso lokuthi asikudli. Nxa siqakathekisa ukuphila sizaqiniseka ukuthi silala amahola eneleyo, siyaqeqetsha umzimba futhi siyageza njalo sigcina izindlu zethu zihlanzekile. w23.02 21 ¶6-7

Nxa ubala iBhayibhili ungawathola njani amagugu akulo? Khangela ukuthi u-2 Thimothi 3:​16, 17 uthini. Nanzelela ukuthi ‘yonke iMibhalo iyasiza’ (1) ekufundiseni, (2) ekukhuzeni, (3) lasekuqondiseni izinto (4) lasekulayeni. Izinto lezi ezine ungazithola lasemabhukwini eBhayibhili ongajayelanga ukuwasebenzisa. Hlola ukuthi indaba oyibalayo ikufundisani ngoJehova, ngenhloso yakhe loba ngezimiso zikaNkulunkulu. Hlola ukuthi isiza njani ekukhuzeni. Lokhu ungakwenza ngokunanzelela ukuthi amavesi owabalayo akunceda njani ukuthi ubone okuyimikhutshana kumbe imicabango emibi ongabe ulayo ubusuyilahla, lokuthi akunceda njani ukuthi uqhubeke uthembekile. Hlola ukuthi indaba oyibalayo ingasetshenziswa njani ukuthi iqondise kumbe ilungise umbono ongayisiwo mhlawumbe owuzwe ukhulunywa ekutshumayeleni. Dinga lamavesi angakulaya ukuze indlela ocabanga ngayo ihambelane lekaJehova. Nxa ungenza izinto lezi ezine uzathola amagugu azakunceda ukuthi uthole okunengi nxa ubala iBhayibhili. w23.02 11 ¶11

Isiphrofetho esisebhukwini likaDanyeli sathi uJesu wayezaqalisa ukubusa ekupheleni kwezikhathi eziyisikhombisa. Manje singabakwazi njani ukuthi uJesu waqalisa nini ukubusa? (Dan. 4:​10-17) “Izikhathi eziyisikhombisa” zimela iminyaka engu-2 520. Izikhathi lezo zaqalisa ngo-607 B.C.E., lapho abaseBhabhiloni bekhipha inkosi yokucina eyayibekwe nguJehova esihlalweni sayo eJerusalema. Zaphela ngo-1914 C.E., lapho uJehova ebeka uJesu onguye olelungelo lokuba yiNkosi yoMbuso kaNkulunkulu. (Hez. 21:25-27) Isiphrofetho lesi sisinceda njani? Ukuzwisisa isiphrofetho esimayelana ‘lezikhathi eziyisikhombisa’ kusiqinisekisa ukuthi uJehova uyazigcwalisa izithembiso zakhe ngesikhathi esifaneleyo. UJehova wabeka uJesu ukuthi abe yiNkosi ngesikhathi ayesimisile yikho siyaqiniseka ukuthi uzagcwalisa zonke ezinye iziphrofetho ngesikhathi asikhethileyo. Usuku lukaJehova ‘kaluyikuphuza.’—Hab. 2:3. w22.07 3 ¶3-5