May

AmaKhristu akuqala lawo athwala nzima kuze kube lendlala enkulu “emhlabeni wonke.” Abazali bangabe babekhathazeka ngokuthi bazazondla ngani izimuli zabo. Pho kwabaphatha njani lokhu abasakhulayo ababecabanga ukwenza okunengi emsebenzini wokutshumayela? Mhlawumbe basuka bacabanga ukuthi bake bame indlala ize idlule. Kodwa amaKhristu la avumelana lezimo, aqhubeka esenza akwenelisayo emsebenzini wokutshumayela futhi ayesabelana izinto ayelazo labazalwane abaseJudiya. (Imiseb. 11:​29, 30) Azibonela ukuthi uJehova wayewasekela ngoba athola uncedo. (Mat. 6:​31-33) Kumele ukuthi abathanda kakhulu abazalwane laba ababewancedisile. Kanti njalo labo abawancedisa ngezinto ezitshiyeneyo bathokoza ngoba babesipha abanye.—Imiseb. 20:35. w23.04 16 ¶12-13

Ngezinye izikhathi uJehova angaphendula imithandazo yabantu bakhe esebenzisa abantu abangamkhonziyo. Ngokwesibonelo, wenza ukuthi iNkosi u-Athakisekisi iphe uNehemiya imvumo yokuthi aye eJerusalema ukuze ayencedisa emsebenzini wokwakha kutsha imiduli yedolobho lelo. (Neh. 2:​3-6) Lalamuhla uJehova angasebenzisa abantu abangamkhonziyo ukuze basincede nxa sidinga usizo. Izikhathi ezinengi imithandazo yethu ayiphendulwa ngendlela esiyikhangeleleyo. Kodwa indlela esiphendulwa ngayo iyasinceda ukuthi sihlale siqotho kuBaba wethu osezulwini. Ngakho woba lelihlo elibukhali ukuze ubone indlela uJehova aphendula ngayo imithandazo yakho. Kuhle ukuthi uhlale uzinika isikhathi sokucabangisisa ngendlela uJehova aphendula ngayo imithandazo yakho. (Hubo. 66:​19, 20) Kumele sitshengise ukuthi silokholo kuJehova ngokuthandaza kuye kodwa akupheleli lapho. Kuyabe kumele samukele lendlela aphendula ngayo imithandazo yethu.—Heb. 11:6. w23.05 11 ¶13; 12 ¶15-16

Sathi sizinikela kuJehova safunga ukuthi sizamkhonza futhi senze intando yakhe. Kumele sikwenze lokho esakufungayo. Ukwenza lokho esafunga ukukwenza akusiwo mthwalo onzima. Phela uJehova wasidalela ukuthi senze intando yakhe. (Isam. 4:11) Wasidala silesifiso sokumazi lesokumkhonza futhi wasenza ngomfanekiso wakhe. Lokho kwenza senelise ukusondela kuye futhi sithokoziswe yikwenza intando yakhe. Phezu kwalokho nxa singenza intando kaNkulunkulu futhi silingisele iNdodana yakhe ‘sizathola ukuphumula.’ (Mat. 11:​28-30) Ngakho yenza izinto ezizakwenza umthande kakhulu uJehova. Lokhu ungakwenza ngokucabangisisa ngezinto ezinhle akwenzele zona kanye lezibusiso azakunika zona esikhathini esizayo. Nxa usumthanda kakhulu uNkulunkulu kuzakuba lula ukuthi umlalele. (1 Joh. 5:3) UJesu waphumelela ukwenza intando kaNkulunkulu ngoba wayehlala ekhuleka ecela ukuthi amncedise njalo wayehlala ecabangisisa ngomvuzo ayezawuphiwa. (Heb. 5:7; 12:2) Lawe ungalingisela uJesu ngokuhlala uthandaza kuJehova ucela amandla njalo ucabangisisa ngethemba olalo lokuthola ukuphila okungapheliyo. w23.08 27-28 ¶4-5

Sonke siyabathanda abantu ababekezelayo. Kungani kunjalo? Siyabahlonipha labo abenelisa ukulinda bengakhononi. Siyabathanda labo abasibekezelelayo nxa siphambanisile. Kanti njalo siyababonga labo abasifundisa iBhayibhili ngoba babesibekezelela ngesikhathi sithwala nzima ukuzwisisa okufundiswa liBhayibhili, lokukwamukela kanye lokukusebenzisa ezimpilweni zethu. Phezu kwalokho siyambonga kakhulu uJehova uNkulunkulu wethu ngoba uyasibekezelela. Lanxa sibathanda abantu ababekezelayo, kwezinye izikhathi thina ngokwethu singakuthola kunzima ukuthi sibekezele. Ngokwesibonelo nxa umi elayinini ende njalo ekhanya ingatshovi futhi kulento oyijahileyo, kungaba nzima ukuthi ubekezele. Singehluleka ukuzibamba sivuke ngolaka nxa abanye bengasicaphula. Kanti njalo kungaba nzima ukuthi siqhubeke sibekezela silindele umhlaba omutsha esiwuthenjiswe nguJehova. Lanxa kunjalo, kumele sibe ngabantu ababekezelayo. w23.08 20 ¶1-2

UJehova watshela uGidiyoni ukuthi ehlise inani lamabutho akhe futhi uGidiyoni walehlisa wasala lamalutshwana nje. Mhlawumbe wazibuza wathi, ‘Kanti vele ngiwehliselani? Pho sizaphumelela?’ Kodwa uGidiyoni kazange ayekele ukulalela. Lamuhla abadala balingisela uGidiyoni ngokwenza lokho inhlanganiso ebatshela ukuthi bakwenze lanxa kusitsho ukuthi batshintshe. (Heb. 13:17) UGidiyoni waqhubeka elalela uJehova lanxa wayesesaba futhi ephiwe umsebenzi ofaka impilo yakhe engozini. (Abahlu. 9:17) UJehova wathi esemkhuthazile wayengasathandabuzi ukuthi wayezamsekela ngesikhathi esenza umsebenzi ovikela abantu bakhe. Abadala abahlala ezindaweni lapho umsebenzi wethu ongavunyelwa khona bayamlingisela uGidiyoni. Batshengisa ukuthi balesibindi ngokukhokhela emihlanganweni yebandla lasemsebenzini wokutshumayela lanxa besengozini yokubotshwa lokuthonisiswa, kumbe bengaphelelwa yimisebenzi kumbe batshaywe. Ngesikhathi sokuhlupheka okukhulu, abadala kuzamele babe lesibindi sokwenza lokho abayabe bekutshelwa lanxa kungafaka ukuphila kwabo engozini. w23.06 5-6 ¶12-13

UJehova wenza ukuthi okuhle okwenziwa nguMphristi Omkhulu uJehoyada kubhalwe ukuze sikufunde. (Rom. 15:4) UJehoyada wathi esefile wahlonitshwa kakhulu, wangcwatshwa “edolobheni likaDavida emangcwabeni amakhosi ngoba wenza okuhle ko-Israyeli, ekwenzela uNkulunkulu weqiniso lendlu yakhe.” (2 Imilan. 24:​15, 16) Indaba kaJehoyada ingasinceda sonke ukuthi simesabe uNkulunkulu. Abadala abangamaKhristu bangalingisela uJehoyada ngokuhlala bephapheme njalo beqotho, bedinga izindlela zokuvikela umhlambi kaNkulunkulu. (Imiseb. 20:28) Asebekhulile bangafunda ukuthi nxa bemesaba uJehova futhi beqhubeka beqotho kuye njengoJehoyada angabasebenzisa ukuthi baqhubeke besenza intando yakhe. Indlela uJehova aphatha ngayo uJehoyada ingaba yisifundo kwabasakhulayo. Bangamlingisela ngokuphatha kuhle asebekhulile abaqotho langokubahlonipha, ikakhulu labo asebelesikhathi eside bekhonza uJehova bethembekile. (Zaga. 16:31) Kumele singayekeli ukusekela “abakhokhelayo” futhi sibalalele zikhathi zonke.—Heb. 13:17. w23.06 17 ¶14-15

Nxa sisemihlanganweni yebandla kumele sinanzelele ukuthi sikhetha ukusiphakamisa kangaki isandla sethu. Singamthwalisa nzima oqhubayo nxa isandla sethu singahlala siphezulu ngoba uyabe esezaqamba thina khona kulabanye abayabe bengakaphenduli. Lokhu kungabenza bacine bekhalala ukuphakamisa. (Umtshu. 3:7) Nxa abantu abanengi bangaphakamisa izandla befuna ukuphendula singacina singaphendulanga kanengi ngendlela ebesifisa ngayo. Kungenzakala ukuthi ngesinye isikhathi oqhubayo angasiqambi futhi lokho kungasidanisa. Kodwa akumelanga sizonde sicabange ukuthi umuntu lowo usiqophile. (Umtshu. 7:9) Nxa ungaqanjwanga kanengi ngendlela obufisa ngayo, lalelisisa ngesikhathi abanye bephendula ukuze ubancome nxa isifundo sesiphelile. Abafowethu labodadewethu bazakhuthazwa ngamazwi akho okubancoma njengoba nje bebengakhuthazwa zimpendulo zakho. w23.04 23-24 ¶14-16

Taditsha iLizwi likaNkulunkulu ucabangisise ngalo. Okwenza isihlahla sime siqine yikuba lempande ezitshonayo. Lathi singama siqine nxa silokholo oluqinileyo kuJehova. Nxa isihlahla sikhula, impande zaso ziqhubeka zitshona futhi zinaba. Nxa sitaditsha njalo sicabangisisa siyabe siqinisa ukholo lwethu, futhi lokhu kwenza singathandabuzi ukuthi okutshiwo nguNkulunkulu yikho okusincedayo. (Kol. 2:​6, 7) Cabanga ngokuthi izinceku zikaJehova zakudala zazincedakala njani nxa zazisenza lokho ayezitshela khona njalo zivuma ukuthi azikhokhele futhi azivikele. Ngokwesibonelo uHezekheli wakhangelisisa ngesikhathi ingilosi ilinganisa ithempeli ayelibona embonweni. Umbono lo wamqinisa uHezekheli futhi lathi usinika izifundo ezinhle ezisinceda ukuthi silandele izimiso zikaJehova ezimayelana lokukhonza kweqiniso. (Hez. 40:​1-4; 43:​10-12) Lathi siyancedakala nxa singazinika isikhathi sokutaditsha lokucabangisisa ngezinto ezijulileyo eziseLizwini likaNkulunkulu. Singaba layo inhliziyo eqotho sithembe uJehova kukho konke.—Hubo. 112:7. w23.07 18 ¶15-16

Abafowethu abasakhulayo bangalingisela izibonelo ezinengi eziseBhayibhilini ezamadoda ayesenza kuhle. Amadoda lawo ayemthanda uNkulunkulu futhi enza imisebenzi eminengi ukuze ancedise abantu bakhe. Lalamuhla akhona amanye amadoda ayenza kuhle ongawalingisela. Ungawathola emulini yangakini lasebandleni. (Heb. 13:7) Kanti njalo omunye umuntu owayesenza kuhle kakhulu ongamlingisela nguJesu Khristu. (1 Phet. 2:21) Ngesikhathi ufunda ngabantu laba njalo uhlola indlela ababephila ngayo, cabangisisa ngobuntu babo obuhle. (Heb. 12:​1, 2) Ngemva kwalokho uzame ukubona ukuthi ungabalingisela njani. Indoda esebenzisa kuhle ingqondo kayenzi izinto ngamawala kodwa iqala icabangisise ibisikhetha kuhle ezakwenza. Ngakho sebenza nzima ukuze lawe wenelise ukusebenzisa kuhle ingqondo. Ongakwenza yikuhlola izimiso eziseBhayibhilini ubusucabangisisa ngokuthi zingakunceda njani. Ngemva kwalokho sebenzisa izimiso lezo nxa usenza izinqumo ukuze ukhethe lokho okuzathokozisa uJehova. (Hubo. 119:9) Ukwenza njalo kuzakunceda ukuthi uthuthuke.—Zaga. 2:​11, 12; Heb. 5:14. w23.12 24-25 ¶4-5

Abazali kumele bafundise abantwababo ukuphendula kuhle nxa kulomunye ophikisa lokho abakukholwayo. (Jak. 3:13) Abanye abazali bayaphrakthiza labantwababo ngesikhathi sokukhonza kwemuli. Bayadinga imibuzo engavuka esikolo besebexoxa ngayo, baphrakthize ukuthi abantwababo bangayiphendula njani. Ngemva kwalokho bayabafundisa ukuthi babe mnene bakhulume ngendlela ezakwenza ukuthi abanye babalalele. Ukuphrakthiza kunganceda ukuthi amaKhristu aqiniseke ngalokho akutshoyo futhi angathandabuzi ukuthi akukholwayo kuliqiniso. Izihloko ezithi “Imibuzo Ebuzwa Ngabasakhulayo” ezitholakala kuwebhusayithi yethu i-jw.org zilengxenye ethi okungenziwa ngabasakhulayo. Ingxenye le yenzelwe ukuncedisa abasakhulayo ukuthi bangakuthandabuzi lokho abakukholwayo futhi benelise ukuphendula imibuzo abayibuzwayo ngamazwi abo. Nxa lingakhangela izihloko lezi liyimuli, lonke lingafunda ukuba mnene lokuphendula ngendlela ezakwenza ukuthi lowo oliphikisayo alilalele. w23.09 17 ¶10; 18 ¶15-16

Kukhona yini owake wahlela ukukwenza ukuze wenzele uJehova okunengi kodwa kwehlula ukuthi uphumelele ukukwenza? Nxa kukhona, ayisuwe wedwa. Omunye umzalwane okuthiwa nguPhilip wayefisa ukuthi imithandazo yakhe ibe lohlonzi lokuthi athandaze kanengi, kodwa kwakunzima ukuthi athole isikhathi sokuthi athandaze. U-Erika yena wayefisa ukuthi aphangise emihlanganweni yokuya ekutshumayeleni kodwa wayehlala ephuzile. Nxa kuyikuthi kukhona owawuhlele ukukwenza kodwa akukaphumeleli, ungacabangi ukuthi vele uyazehlulekela. Phela kudinga isikhathi ukuthi usebenze nzima ukuze uphumelele ukwenza lokho oyabe ukuhlelile lanxa kuyabe kukuncane. Khonokho ukuthi uyazama ukwenza okuhlelileyo kutshengisa ukuthi uyabuqakathekisa ubungane bakho loJehova lokuthi uyafisa ukumnika okungcono kakhulu olakho. UJehova uyakuqakathekisa kakhulu okwenzayo. Kakhangelelanga ukuthi umenzele lokho ongeke wenelise ukukwenza. (Hubo. 103:14; Mik. 6:8) Nxa uhlela ofuna ukukwenza, khetha lokho ongakwenelisa kusiya ngezimo zakho. w23.05 26 ¶1-2

Kwezinye izikhathi abantu abalesibindi bayatshaywa luvalo, kodwa kabavumi ukuthi lokho kubenze bayekele ukwenza okuqondileyo. UDanyeli wayelijaha elilesibindi. Wataditsha imibhalo eyayibhalwe ngabaphrofethi bakaNkulunkulu kugoqela leziphrofetho zikaJeremiya. Ngokuhamba kwesikhathi lokho ayekufunda kwenza wazwisisa ukuthi amaJuda ayesezakhululwa ekuthunjweni eBhabhiloni. (Dan. 9:2) Kumele ukuthi uDanyeli wamthemba kakhulu uJehova ngesikhathi ebona iziphrofetho eziseBhayibhilini zigcwaliseka. Labo abamthemba ngenhliziyo yonke uNkulunkulu bangaba lesibindi kungelani lokuthi kwenzakalani. (Khangela uRoma 8:​32, 37-39.) Okuqakatheke kakhulu okwanceda uDanyeli yikuthi wayehlala ethandaza kuYise osezulwini. (Dan. 6:10) Wavuma izono zakhe kuJehova wamtshela lokuthi wayesizwa njani futhi wacela lokuthi amncedise. (Dan. 9:​4, 5, 19) UDanyeli wayengumuntu njengathi sonke. Kazalwanga elesibindi. Isibindi wasithola ngokutaditsha lokuthandaza langokuthemba uJehova. w23.08 3 ¶4; 4 ¶7

Ukulalela iziphathamandla kuyasinceda kuphinde kuncede labanye. Njani? Kuyasivikela ukuthi singajeziswa yiziphathamandla njengoba zijayele ukubajezisa labo abephula umthetho. (Rom. 13:​1, 4) Kanti njalo kwenza iziphathamandla zibone ukuthi oFakazi bakaJehova ngabantu abalalelayo. Ngokwesibonelo eminyakeni eminengi eyadlulayo amasotsha angena kweyinye iWolu yoMbuso eNigeria ngesikhathi kulomhlangano webandla edinga abantu ababetshengisela, ababengafuni ukubhadala imithelo. Kodwa owayekhokhela amasotsha la wawatshela ukuthi aphume eWolu yoMbuso wathi: “OFakazi bakaJehova bayayibhadala yonke imithelo.” Ngakho sonke isikhathi nxa ulalela uyabe usenza ukuthi oFakazi bakaJehova bahlale belebizo elihle, njalo lokhu kungavikela abafowethu labodadewethu esikhathini esizayo. w23.10 9 ¶13

Ezinye izinceku zikaJehova sezilesikhathi eside zilindele ukuphela komumo lo wezinto. Ngokubona kwabantu, isithembiso sikaNkulunkulu singakhanya siphuza ukugcwaliseka. Kodwa kulamazwi aqinisayo uJehova awatshela umphrofethi uHabakhukhi athi: “Umbono uzagcwaliseka ngesikhathi sawo esibekiweyo, njalo lesosikhathi silokhu sisondela ngokuphangisa, sizafika loba sekutheni. Lanxa singaphuza, hlala usilindele! Ngoba umbono uzagcwaliseka loba sekutheni. Kawusoze uphuze!” (Hab. 2:3) UNkulunkulu wakhuluma amazwi la ukuze ancede uHabakhukhi kuphela yini? Kambe ukuthi ayasinceda yini lathi lamuhla? Umphostoli uPhawuli waphefumulelwa ukuthi atshele amaKhristu alindele umhlaba omutsha amazwi ayetshelwe uHabakhukhi. (Heb. 10:37) Lanxa kungakhanya angathi izithembiso zikaNkulunkulu ziyaphuza singaba leqiniso lokuthi ‘zizagcwaliseka loba sekutheni. Kazisoze ziphuze!’ w23.04 28 ¶16

Lanxa kwakulobufakazi obunengi obabutshengisa ukuthi uJehova wayesebenzisa uMosi ukuthi abe ngummeli wakhe, ama-Israyeli amanengi kawazange akwamukele lokho. (Nani. 14:​10, 11) Izikhathi ezinengi ayengavumi ukuthi uJehova wayesebenzisa uMosi ukuthi awakhokhele. Ngenxa yalokho uJehova kazange awavumele ama-Israyeli lawo ukuthi angene eLizweni Lesithembiso. (Nani. 14:30) Kulamanye ama-Israyeli ayevuma ukukhokhelwa nguJehova. Ngokwesibonelo, uJehova wathi: ‘UKhalebhi ubelokhu engilandela ngenhliziyo yonke.’ (Nani. 14:24) UNkulunkulu wamnika umvuzo uKhalebhi waze wamvumela ukuthi azikhethele lapho ayefuna ukuhlala khona eLizweni Lesithembiso. (Josh. 14:​12-14) Isizukulwane sama-Israyeli esalandelayo laso sasivuma ukukhokhelwa nguJehova. UJoshuwa wathi esebekiwe ukuthi akhokhele, ama-Israyeli ‘amhlonipha kakhulu okwempilo yakhe yonke.’ (Josh. 4:14) Ngenxa yalokho uJehova wawabusisa ngokuwavumela ukuthi angene elizweni ayewathembise lona.—Josh. 21:​43, 44. w24.02 21 ¶6-7

Njengoba udokotela esenelisa ukubona ukuthi inhliziyo yethu injani ngokuhlola isandla, lathi singenelisa ukubona ukuthi simthanda kangakanani uNkulunkulu ngokuhlola indlela esibathanda ngayo abanye. Nxa singananzelela ukuthi kasisabathandi kangako abafowethu labodadewethu, lokho kungabe kutshengisa ukuthi asisamthandi kangako loNkulunkulu. Kodwa nxa sihlala sitshengisa ukuthi siyabathanda abazalwane siyabe sitshengisa ukuthi siyamthanda kakhulu uNkulunkulu. Nxa singananzelela ukuthi asisabathandi kangako abafowethu labodadewethu akumelanga siphonguhlala sigoqe izandla ngoba kukhona okuyabe kungasahambi kuhle. Izikhathi ezinengi lokho kuyabe kutshengisa ukuthi ubungane bethu loJehova abusaqinanga. Umphostoli uJohane wakucacisa lokhu ngesikhathi esithi: “Lowo ongamthandiyo umfowabo ambonayo ngeke amthande uNkulunkulu angakaze ambone.” (1 Joh. 4:20) Sifundani? UJehova uyathokoza ngathi kuphela nxa ‘sithandana.’—1 Joh. 4:​7-9, 11. w23.11 8 ¶3; 9 ¶5-6

INkosi uJehowashi yenza izinqumo ezinhle ngesikhathi isakhula. UJehowashi wakhula engelayise kodwa wayelalela lokho ayekufundiswa nguMphristi Omkhulu uJehoyada. Umphristi lo wamkhulisa njengendodana yakhe futhi wamfundisa okunengi ngoJehova. Lokhu kwenza uJehowashi wakhetha ukukhonza uJehova njalo wancedisa labantu ukuthi bakhonze uJehova ngendlela ayifunayo. UJehowashi waze wahlela lokuthi ithempeli likaJehova lilungisiswe. (2 Imilan. 24:​1, 2, 4, 13, 14) Kungenzakala ukuthi abazali bakho kumbe omunye umuntu ukufundisa ukuthanda uJehova lokulandela imithetho yakhe. Lowo okufundisa iBhayibhili ukunika isipho esiligugu kakhulu. (Zaga. 2:​1, 10-12) Abazali bakho bangakufundisa ngendlela ezitshiyeneyo. Bazathokoza nxa bangabona usenza lokho abakutshela khona okusekelwe eBhayibhilini. Okuhle kakhulu yikuthi uzathokozisa uNkulunkulu, uhlale ungumngane wakhe. (Zaga. 22:6; 23:​15, 24) Lezi yizizatho ezinhle ezingenza ulingisele lokho okwenziwa nguJehowashi esasemncane. w23.09 8-9 ¶3-5

UJehova uthembisa ukuthi uzalalela imithandazo yethu. UNkulunkulu wethu uyasithanda ngoba simkhonza sithembekile, yikho ngeke ayekele ukulalela imithandazo yethu. (Hubo. 10:17; 37:28) Lanxa kunjalo, lokho akutsho ukuthi uzasinika konke esikucelayo. Ezinye izinto esizicelayo kungadingeka silinde kuze kufike umhlaba omutsha ukuze sizithole. UJehova uyakhangela ukuthi izicelo zethu zihambelana njani lenhloso yakhe. (Isaya. 55:​8, 9) Okunye akuhlosileyo yikuthi emhlabeni kugcwale amadoda labesifazana abamanyeneyo labathokozayo futhi bonke bebuswa nguye. Kodwa uSathane uthi abantu bangathokoza kakhulu nxa bengazibusa. (Gen. 3:​1-5) Ngakho uJehova uvumele ukuthi abantu bazibuse ukuze kukhanye ukuthi uSathane uDeveli ulamanga. Kodwa inhlupho ezinengi esilazo lamuhla zibangelwa yikuthi abantu bayazibusa. (Umtshu. 8:9) Siyakwazi ukuthi uJehova kasoze ahle aziqede zonke inhlupho zethu khathesi. w23.11 21 ¶4-5

UJehova wathembisa u-Abrahama ukuthi izizwe ezinengi zazizabusiswa ngenxa yakhe. Lanxa kunjalo wafikisa iminyaka engu-100, loSara engu-90 bengakayitholi indodana ababeyithenjisiwe. Kwakukhanya kungasayenzi ukuthi u-Abrahama loSara bangaba lomntwana. Kwasekudinga ukuthi u-Abrahama abe lokholo oluqinileyo sibili. IBhayibhili lithi: “Ithemba lamenza wakholwa ukuthi wayezakuba nguyise wezizwe ezinengi.” (Rom. 4:​18, 19) Lakanye u-Abrahama wacina eyitholile indodana ayeselesikhathi eside eyilindele. Lokho ayekuthenjisiwe kwagcwaliseka. (Rom. 4:​20-22) Lathi singenelisa ukumthokozisa uNkulunkulu ukuze athi silungile futhi asenze sibe ngabangane bakhe njengo-Abrahama. UPhawuli wakhuluma ngalokho, wabhala wathi: “Amazwi athi ‘kwathiwa ulungile’ awabhalelwanga yena kuphela [u-Abrahama], kodwa abhalelwa lathi okuzathiwa silungile ngenxa yokuthi siyakholwa kuNkulunkulu owavusa iNkosi yethu uJesu.” (Rom. 4:​23, 24) Njengo-Abrahama, lathi kumele sibe lokholo, senze imisebenzi emihle futhi sihlale silethemba. w23.12 7 ¶16-17

Nxa ungehlelwa yibunzima obukwenza wesabe, khumbula ukuthi uJehova uyabubona ubunzima lobo njalo uyabona lokuthi bukwenza uzizwe njani. Ngokwesibonelo, uJehova wayebona indlela ama-Israyeli ayehlukuluzwa ngayo eGibhithe futhi wayebubona ‘ubuhlungu ayebuzwa.’ (Eks. 3:7) Mhlawumbe uyazibuza ukuthi uJehova ukuncedisa njani ngesikhathi uphakathi kobunzima obukwenza wesabe. Nxa kunjalo, mcele akuncedise ubone indlela akusekela ngayo. (2 Amakho. 6:​15-17) Ngemva kwalokho, zibuze imibuzo elandelayo: Kulenkulumo kumbe impendulo engiyizwe emhlanganweni webandla engiqinisileyo yini? Kulebhuku kumbe ividiyo loba ingoma ye-Broadcasting engikhuthazileyo yini? Kulomuntu oke wangitshela umbhalo kumbe amazwi akhuthazayo yini? Abafowethu labodadewethu kanye leBhayibhili yizipho ezinhle ezivela kuJehova. Wena uyaziqakathekisa yini izipho lezi? (Isaya. 65:13; Mak. 10:​29, 30) Indlela uJehova ayisebenzisayo ukuze asikhuthaze itshengisa ukuthi ulendaba lathi. (Isaya. 49:​14-16) Iphinda itshengise lokuthi silezizatho zokumthemba. w24.01 4-5 ¶9-10

UJesu wathi esezabuyela ezulwini wakhumbuza abafundi bakhe ngomsebenzi ayebaphe wona. Umsebenzi lo wawungowokufakaza ngaye “eJerusalema lakulo lonke elaseJudiya leSamariya kuze kuyefika emaphethelweni omhlaba.” (Imiseb. 1:8; Luk. 24:​46-48) Kungakayi ngaphi abakhokheli bamaJuda babopha umphostoli uPhetro loJohane, basebebaletha phambi kweSanihedrini babatshela ukuthi bayekele ukutshumayela futhi babethusela. (Imiseb. 4:​18, 21) UPhetro loJohane bathi: “Yahlulelani lina ukuthi kuqondile yini phambi kukaNkulunkulu ukuthi silalele lina kulokuthi silalele uNkulunkulu. Kodwa thina kasisoze siyekele ukukhuluma ngezinto esizibonileyo lesizizwileyo.” (Imiseb. 4:​19, 20) UPhetro loJohane bathi sebekhululiwe bathandaza kuJehova bembonga ngokuthi wayebancedisile ukuthi benze intando yakhe. UJehova wawuphendula umthandazo wabo.—Imiseb. 4:31. w23.05 5 ¶11-12

Okweminyaka eminengi kakhulu uJehova leNdodana yakhe babendawonye. Lokhu kwenza bazwanana futhi bathandana kakhulu. Emazwini asembhalweni walamuhla uJehova wakwenza kwacaca ukuthi wayemthanda uJesu. Wayengathi, ‘Lo nguye engimamukelayo’ aphelele khonapho. Kodwa wayefuna sibekwazi ukuthi umthanda kangakanani uJesu, yikho wathi: “Le yiNdodana yami engiyithandayo.” UJehova wayezigqaja ngoJesu futhi wayeziqhenya kakhulu ngalokho ayesezakwenza. (Efe. 1:7) UJesu laye wayengathandabuzi ukuthi uYise uyamthanda. Uthando lukaJehova lwalucaca okokuthi loJesu wayekwazi ukuthi uYise kamthontisi. Wawakhuluma kanengi amazwi ayetshengisa ukuthi kathandabuzi ukuthi uYise uyamthanda.—Joh. 3:35; 10:17; 17:24. w24.01 28 ¶8

Ubungathini nxa ungezwa ukuthi umngane wakho ukhuluma kubi ngawe? Ufafaza amanga ngawe futhi abanye bayamkholwa. Labo bayawamemethekisa futhi abantu abanengi bayakukholwa abakutshoyo. Kumele ukuthi amanga la angakwenza udane kakhulu. Umzekeliso lo ungasinceda sizwisise ukuthi uJehova wezwa njani ngesikhathi ibizo lakhe lingcoliswa. Enye indodana yakhe eyayisezulwini yatshela owesifazana wokuqala u-Eva amanga ngaye. U-Eva wawakholwa amanga lawo njalo enza ukuthi abazali bethu bahlamukele uJehova. Lokhu kwenza kwaba lesono lokufa ebantwini. (Gen. 3:​1-6; Rom. 5:12) Konke okubi esikubonayo emhlabeni okugoqela ukufa, izimpi kanye lokuhlupheka kukhona ngenxa yamanga aqanjwa nguSathane. UJehova uzwa njani ngamanga la kanye lenhlupho eseziwalethile? Akuthandabuzwa ukuthi uzwa ubuhlungu kakhulu. Lanxa kunjalo uJehova kahlali ezondile kodwa uqhubeka ‘enguNkulunkulu othokozayo.’—1 Thim. 1:11. w24.02 8 ¶1-2

Ungamlingisela njani uJosefa ukuze lawe uhlale uthembekile nxa ulingwa? Cabanga khathesi ukuthi uzakwenzani nxa usulingwa. Zijayeze ukwala masinyane ukwenza izinto ezizondwa nguJehova futhi ungacabangi langazo. (Hubo. 97:10; 119:165) Kungenzakala ukuthi kulokunye okukubambayo ukuthi uzinikele kuJehova njalo ubhabhathizwe lanxa usulitholile iqiniso futhi ufisa ukumkhonza ngenhliziyo yonke. Ungalingisela iNkosi uDavida uncenge uJehova usithi: “Ngihlola awu Nkulunkulu uyazi inhliziyo yami. Ngihlola ukuze uyazi imicabango yami engikhathazayo. Ngikhangela ubone ukuthi kukhona yini kimi okungenza ngihambe endleleni embi, ungikhokhele endleleni ezahlala kuze kube phakade.” (Hubo. 139:​23, 24) UJehova uyababusisa labo “abamdinga ngeqiniso.” Nxa usenza konke okusemandleni akho ukuthi ukulungele ukuzinikela kuJehova lokubhabhathizwa uyabe umtshengisa ukuthi umdinga ngenhliziyo yonke.—Heb. 11:6. w24.03 6 ¶13-15

Umphristi omkhulu wayemela abantu phambi kukaNkulunkulu. U-Aroni nguye owaba ngumphristi omkhulu wakuqala ko-Israyeli njalo wabekwa nguJehova ngesikhathi ithabanikeli linikelwa. Lanxa kunjalo umphostoli uPhawuli wathi “abanengi kwakumele babe ngabaphristi belandelana ngoba ukufa kwakubavimbela ukuthi baqhubeke bengabaphristi.” (Heb. 7:​23-26) Kanti njalo labobaphristi abakhulu kwakumele banikele imihlatshelo yezono zabo ngoba labo babezelwe belesono. Lo ngumahluko omkhulu okhona phakathi kwabaphristi abakhulu bako-Israyeli loJesu Khristu uMphristi Omkhulu kakhulu. Njengoba uJesu enguMphristi Omkhulu ‘uyisikhonzi setende leqiniso elingamiswanga ngabantu kodwa elamiswa nguJehova.’ (Heb. 8:​1, 2) UPhawuli wathi ngoJesu: “Obakhe ubuphristi abutshiyelwana ngenxa yokuthi uzaqhubeka ephila kuze kube phakade.” Waphinda wathi uJesu nguMphristi Omkhulu “ongangcoliswanga, owehlukaniswe lezoni.” Kanti njalo uJesu utshiyene labanye abaphristi abakhulu ngoba “akudingakali ukuthi anikele imihlatshelo nsuku zonke” njengoba engelasono. w23.10 26 ¶8-9

“Izulu lakuqala” litsho ohulumende abangaphansi kukaSathane lamadimoni akhe. (Mat. 4:​8, 9; 1 Joh. 5:19) Kwamanye amavesi ibala elithi “umhlaba” litsho abantu. (Gen. 11:1; Hubo. 96:1) Ngakho ‘umhlaba wakuqala’ utsho abantu ababi abasemhlabeni khathesi. UJehova kasoze aphonguguqula kumbe alungise ‘izulu lomhlaba’ okukhona khathesi kodwa uzakubhubhisa kungasaphindi kube khona. Ngemva kwalokho uzaletha “izulu elitsha lomhlaba omutsha,” okutsho ukuthi kuzakuba lohulumende omutsha ozabe ubusa abantu abalungileyo. UJehova uzakwenza ukuthi umhlaba labantu kube kutsha ngokususa isono ebantwini langokwenza ukuthi umhlaba ube muhle. Njengoba u-Isaya watsho, umhlaba wonke uzakwenziwa ube muhle njengensimu yase-Edeni. Lathi sizavuselelwa senziwe sibe batsha. Abayizigoga labayiziphofu labayizacuthe bazasiliswa njalo abafileyo bazavuswa.—Isaya. 25:8; 35:​1-7. w23.11 4 ¶9-10

‘Ukuhlupheka okukhulu’ kuzafika abantu belibele. (Mat. 24:21) Kwezinye izikhathi abantu bafikelwa ngumonakalo belibele, kodwa thina siyakwazi ukuthi ukuhlupheka okukhulu kuyeza. Eminyakeni engaba ngu-2 000 eyadlulayo uJesu watshela abalandeli bakhe ukuthi balulungele lolosuku. Nxa siyabe silungiselele kuzakuba lula ukuthi siqinisele ngesikhathi leso esiyabe sinzima futhi sincedise labanye ukuthi benze njalo. (Luk. 21:36) Ngalesosikhathi kuzamele siqinisele, silalele uJehova futhi sithembe ukuthi uzasivikela. Sizakwenzani nxa abazalwane bangaqabuka bengaselazo izinto zokuziphilisa? (Hab. 3:​17, 18) Okuzakwenza sibancedise yikuba lozwelo. Sizathini nxa singahlaselwa yizizwe ezimanyeneyo besekudingeka ukuthi sihlale ndawonye labafowethu labodadewethu sibanengi? (Hez. 38:​10-12) Ukubathanda kakhulu yikho okuzasinceda ukuthi silwisane lobunzima esiyabe sikubo. w23.07 2 ¶2-3

Abatshadileyo bangafunda okunengi ku-Akhwila loPrisila. Imuli le yayithandwa ngamaKhristu amanengi okuqala. (Rom. 16:​3, 4) Babesebenza ndawonye, betshumayela ndawonye futhi bencedisa abanye bendawonye. (Imiseb. 18:​2, 3, 24-26) Kanti njalo sonke isikhathi nxa iBhayibhili likhuluma ngo-Akhwila loPrisila libaqamba bendawonye. Abatshadileyo bangabalingisela njani? Cabangani ngemisebenzi okumele liyenze. Ikhona yini elingayenza ndawonye kulokuthi yenziwe ngumuntu oyedwa? U-Akhwila loPrisila babetshumayela ndawonye. Mhlawumbe lani lingahlela ukuhamba ndawonye ekutshumayeleni izikhathi ezinengana. U-Akhwila loPrisila babesebenza ndawonye. Lanxa wena lomkakho lingasebenzi ndawonye, kungavuma yini ukuthi lenze imisebenzi yendlini lonke? (Umtshu. 4:9) Nxa lingancedisana ukwenza umsebenzi othile, liyabambana futhi liyathola lethuba lokuxoxa. w23.05 22-23 ¶10-12

Sonke siyake sesabe. Ngokwesibonelo, iNkosi uSawuli yathi izingela uDavida ifuna ukumbulala, wabalekela edolobheni lamaFilisti okuthiwa yiGathi. Kodwa u-Akhishi inkosi yeGathi wezwa ukuthi uDavida yilo iqhawe abantu ababehlabela ngalo ezingomeni zabo besithi ubulele amaFilisti ‘angamatshumi ezinkulungwane.’ Ngenxa yalokho uDavida “wamesaba kakhulu u-Akhishi.” (1 Sam. 21:​10-12) Wayekhathazeke kakhulu ngalokho ayengamenza khona. Kuyini okwanceda uDavida ukuthi anqobe ukwesaba? KuHubo 56 uDavida wachasisa ukuthi wayezizwa njani ngesikhathi eseGathi. Esahlukweni leso wakubeka kwacaca ukuthi kungani wayesesaba lokuthi kuyini okwamncedayo ukuthi anqobe ukwesaba. UDavida wathemba uJehova ngesikhathi esesaba. (Hubo. 56:​1-3, 11) Lakanye uJehova kazange amlahlise. Wamncedisa ukuthi athole icebo elalizamnceda aphunyuke. Wazitshaya umuntu ogula ingqondo. UDavida wenelisa ukuphunyuka ngoba u-Akhishi wayesesithi abantu bamlethele uhlanya.—1 Sam. 21:13–22:1. w24.01 2 ¶1-3

Ngobani laba okukhulunywa ngabo embhalweni walamuhla? Ngabagcotshiweyo abazabe sebevusiwe. Ngakho nxa ukuhlupheka okukhulu sekuzaphela futhi abagcotshiweyo bokucina abasemhlabeni sebeye ezulwini, umsebenzi wokuqala abazawenza yikulwa. Bazathi sebevusiwe sebesezulwini bancedise uKhristu lezingilosi ezingcwele ukulwa lezitha zikaNkulunkulu empini yokucina. Amanye amaKhristu agcotshiweyo asesekhona emhlabeni asekhulile futhi awasaqinanga emzimbeni. Kodwa azathi esevusiwe ayaphila ezulwini azakuba yizidalwa zomoya ezilamandla futhi ezingafiyo njalo azaphiwa umsebenzi wokulwa ndawonye leNkosi eliqhawe, uJesu Khristu. Ngemva kokulwa empini ye-Amagedoni bazancedisa uJesu ukususa isono ebantwini. Akuthandabuzwa ukuthi sebesezulwini bazakwenzela abafowabo labodadewabo ababathandayo izinto ezinhle kakhulu ukwedlula lezo ababenzela zona besesemhlabeni. w24.02 6-7 ¶15-16

Abanye bayathikaza ukuzinikela lokubhabhathizwa lanxa bayabe sebekulungele. Bangabe besesaba ukuthi mhlawumbe ngemva kokubhabhathizwa bangenza isono esikhulu bacine sebesuswa. Nxa lawe usesaba qiniseka ukuthi uJehova uzakunika konke okuzakunceda ukuthi uqhubeke ‘uziphatha ngendlela efaneleyo phambi [kwakhe] ukuze umthokozise kukho konke.’ (Kol. 1:10) Uzakunika lamandla okuthi wenze okulungileyo. Kasoze ayekele ukukuncedisa ngoba banengi asebancedisile ukuthi bakwenze lokhu. (1 Khor. 10:13) Yikho bebalutshwana kakhulu abasuswayo ebandleni lobuKhristu. UJehova uyabancedisa sibili abantu bakhe ukuthi bahlale bethembekile. Sonke siyake silingeke ukwenza okubi ngoba sizelwe silesono. (Jak. 1:14) Lanxa kunjalo uyazikhethela ukuthi uzakwenzani nxa ulingwa. Iqiniso elikhona yikuthi nguwe ozikhethelayo ukuthi uzakwenzani ngempilo yakho. Abanye abantu bathi ngeke senelise ukuphikisana lemizwa yethu kodwa lokhu kungamanga. Ungenelisa ukufunda ukuzibamba. w24.03 5 ¶11-12