June

UJehova wawabusisa amaKhristu okuqala ngenxa yokuthi avumelana lezimo. Ayeke ahlukuluzwe engalindelanga. Akucabange ngokwenzakala kuBhanabha lomphostoli uPhawuli ngesikhathi betshumayela eListra. Abantu beListra babeqale babemukela kuhle futhi babalalela ngesikhathi bebatshumayeza. Kodwa abanye ‘bayenga abantu’ njalo abanye abantu ababesexukwini lelo bakhanda uPhawuli ngamatshe baze bamtshiya becabanga ukuthi usefile. (Imiseb. 14:19) Kodwa uBhanabha loPhawuli basuka bayatshumayela kweyinye indawo. UJehova wababusisa yini? Ye, ngoba benza ‘abafundi abanengana’ basebeqinisa abanye ngababekutsho lababekwenza. (Imiseb. 14:​21, 22) Abanengi kwabaqinisa kakhulu ukubona uBhanabha loPhawuli bengakhalali lanxa babehlukuluzwa. Lathi uJehova uzasibusisa nxa singaqhubeka sisenza umsebenzi asiphe wona. w23.04 16-17 ¶13-14

INkosi uDavida yayihlala ihlaselwa yizitha futhi izikhathi ezinengi yayicela ukuthi uJehova ayincedise. UDavida wayeleqiniso lokuthi uJehova wayeyizwa futhi eyiphendula imithandazo yakhe. Lawe ungaba leqiniso lokuthi uJehova uyayizwa futhi ayiphendule imithandazo yakho. IBhayibhili lenza singathandabuzi ukuthi uJehova uyasinika ukuhlakanipha lamandla okuthi siqinisele. Angasincedisa esebenzisa abantu esikhonza labo kumbe abanye abantu abangamkhonziyo. Siyakwazi ukuthi uJehova uyayiphendula imithandazo yethu lanxa kwezinye izikhathi eyiphendula ngendlela esingayikhangelelanga. Uzasipha khona kanye esikudingayo ngesikhathi esiyabe sikudinga ngaso. Yikho qhubeka uthandaza ulokholo lokuthi uJehova uzakunakekela khathesi lokuthi ‘uzasuthisa izifiso zakho konke okuphilayo’ emhlabeni omutsha ozayo.—Hubo. 145:16. w23.05 8 ¶4; 13 ¶17-18

Cabanga ngezibusiso ozazithola nxa ungaphumelela ukwenza okuhlelileyo. Wena yiziphi izibusiso ongacabangisisa ngazo? Nxa uhlele ukuthuthukisa indlela obala ngayo iBhayibhili kumbe imithandazo yakho, cabangisisa ngokuthi lokho kuzakunceda njani ukuthi usondele kuJehova. (Hubo. 145:​18, 19) Nxa ufisa ukuba lobunye ubuntu obunjengobukaKhristu, cabangisisa ngokuthi ubuntu lobo buzakunceda njani ukuthi uphilisane kuhle labanye. (Kol. 3:14) Kungaba kuhle ukuthi ubhale izizatho ezenza ufise ukuphumelela kulokho okuhlelileyo. Hlala uzikhangela izinto lezo ozibhalileyo. Kanti njalo woba labangane abazakukhuthaza. (Zaga. 13:20) Iqiniso elikhona yikuthi kwezinye izikhathi siyabe sisizwa singelasifiso sokwenza lokho esikuhlelileyo. Manje lokho sekusitsho yini ukuthi sihlale phansi sigoqe izandla? Hatshi. Singasebenza nzima ukwenza lokho esiyabe sikuhlelile lanxa kwezinye izikhathi sisizwa kungatsho. Lanxa kwezinye izikhathi kuyabe kunzima, uzathokoza nxa ungaphumelela ukwenza lokho oyabe ukuhlelile. w23.05 27-28 ¶5-8

Ukukhumbula ukuthi kumele uthwale umthwalo wakho kuzakunceda ukuthi uvume izono zakho, ulungisise amaphutha akho futhi wenze konke okusemandleni akho ukuthi ungakuphindi lokho okwenzileyo. Ukwenza konke lokhu kuzasinceda ukuthi siqhubeke sigijima emncintiswaneni wokuphila. Nxa wenze isinqumo esibi kungaselalutho ongalwenza ngaso, kwamukele ukuthi osekwenzakele ngeke ukutshintshe. Ungadlalisi isikhathi lamandla uzama ukuzigeza loba uzisola kakhulu kumbe usola abanye. Vuma ukuthi uphambanisile njalo wenze konke ongakwenza ukuze ulungisise lokho ongenelisa ukukulungisa. Nxa uzisola ngento embi owayenzayo, zithobe futhi uthandaze kuJehova uvume isono sakho, umcele lokuthi akuthethelele. (Hubo. 25:11; 51:​3, 4) Xolisa ebantwini obaphambaniseleyo njalo nxa kudingeka cela ukuncediswa ngabadala. (Jak. 5:​14, 15) Funda emaphutheni akho njalo wenze konke okusemandleni akho ukuthi ungawaphindi. Nxa ungenza njalo qiniseka ukuthi uJehova uzakuba lesihawu kuwe njalo akusekele.—Hubo. 103:​8-13. w23.08 28-29 ¶8-9

UJehoyada wayinceda kakhulu iNkosi uJehowashi ukuthi yenze okulungileyo. Lokhu kwenza ukuthi inkosi le eyayisakhula ifune ukuthokozisa uJehova. Kodwa uJehoyada wathi esefile uJehowashi walalela abakhokheli ababehlamukele uJehova. (2 Imilan. 24:​4, 17, 18) UJehova wezwa ubuhlungu obukhulu, yikho ‘waqhubeka ethumela abaphrofethi kubo ukuze babancede babuyele kuye kodwa bona abazange balalele.’ Kabazange bamlalele loZakhariya indodana kaJehoyada owayengumphrofethi kaJehova, engumphristi njalo eyisihlobo sikaJehowashi. INkosi uJehowashi yathi uZakhariya abulawe. (2 Imilan. 22:11; 24:​19-22) UJehowashi wayengamesabi uJehova. UJehova wayethe: “Abangidelelayo bazayangiswa.” (1 Sam. 2:30) Ibutho leSiriya elalilincane lanqoba ibutho likaJehowashi “elalilikhulu kakhulu” njalo ‘lamtshiya elimele kakhulu.’ (2 Imilan. 24:​24, 25) UJehowashi wabulawa yizinceku zakhe ngoba wayebulele uZakhariya. w23.06 18-19 ¶16-17

Umphostoli uPhawuli wayeke wahlala e-Efesu etshumayela futhi efundisa izindaba ezinhle. (Imiseb. 19:​1, 8-10; 20:​20, 21) Wayebathanda kakhulu abafowabo futhi wayefuna ukubancedisa ukuthi bahlale bethembekile kuJehova. AmaKhristu ase-Efesu ayeke akholwa imfundiso ezinengi ezingamanga futhi elandela amasiko esidimoni. Abantu base-Efesu babeziphatha kubi kakhulu futhi babengelanhloni ngokuxhwala kwabo. Izikhathi ezinengi imidlalo eyayisenziwa edolobheni lelo kanye lemibuthano yokukhonza ababeyenza yayimayelana lezinto zemacansini. (Efe. 5:3) Abantu abanengi ababehlala e-Efesu ‘kwakungasathi thiki kubo nxa beziphatha kubi.’ (Efe. 4:​17-19) Ngesikhathi amaKhristu ase-Efesu engakafundi ukuthi yikuphi okulungileyo lokungalunganga, imizwangedwa yawo yayingawahluphi nxa ayesenza okubi. Yikho uPhawuli wathi ‘ingqondo zabo zasisemnyameni futhi babehlukanisiwe lokuphila okuvela kuNkulunkulu.’ Kodwa bakhona abanye abantu base-Efesu abasuka ebumnyameni. w24.03 20 ¶2, 4; 21 ¶5-6

UGidiyoni kwakumele asebenze nzima emsebenzini wakhe wokuba ngumahluleli. Ngesikhathi abakoMidiyani bebaleka kuliwa ebusuku, uGidiyoni wabaxotshanisa kusukela esigodini seJeziriyeli waze wayafika emfuleni uJodani. (Abahlu. 7:22) UGidiyoni wafika wabeka izikhali phansi yini emfuleni uJodani? Hatshi! Lanxa wayesediniwe, yena lamadoda ayelawo angu-300 bachapha umfula baqhubeka begijimisa abakoMidiyani. Bacina sebebabambile babanqoba. (Abahlu. 8:​4-12) UGidiyoni wayengathandabuzi ukuthi uJehova uzamqinisa. Lakanye uJehova wamnika amandla. (Abahlu. 6:​14, 34) UGidiyoni lamabutho akhe baxotshanisa amakhosi amabili amaMidiyani ngenyawo futhi kumele ukuthi amakhosi lawo ayegade amakamela. (Abahlu. 8:​12, 21) Kodwa uNkulunkulu wawancedisa ama-Israyeli ngenxa yokuzimisela kwawo, awanqoba amaMidiyani. Labadala kumele bathembe uJehova ngoba yena “kadinwa njalo kapheli amandla.” Kasoze ayekele ukubapha amandla ngesikhathi bewadinga.—Isaya. 40:​28, 29. w23.06 6 ¶14, 16

Singenelisa ukuhlala siqotho kungelani lokuthi sehlelwa yibuphi ubunzima. Yikho kumele sithembe uJehova. UBharakhi waphumelela empini ngoba wayethemba ukuthi lokho ayekutshelwa nguJehova kuzasebenza. Lanxa elizweni lako-Israyeli kwakungela ihawu loba umkhonto, uJehova wamtshela ukuthi ayekulwa lamabutho amaKhanani ayehlome aphelela, ayekhokhelwa yinduna uSisera. (Abahlu. 5:8) Umphrofethikazi uDibhora watshela uBharakhi ukuthi ehle ezintabeni ayekulwa loSisera owayelezinqola zempi ezingu-900. Amabutho kaSisera ayezakulwa lula emagcekeni ngoba izinqola zawo zaziyabe zigijima kuhle. Lanxa uBharakhi wayekwazi lokhu, walalela. Amasotsha kaBharakhi athi esehla entabeni iThabhori uJehova wenza kwana izulu elikhulu. Inqola zikaSisera zabanjelwa edakeni njalo uJehova wenza uBharakhi wanqoba. (Abahlu. 4:​1-7, 10, 13-16) Lathi uJehova uzakwenza ukuthi sinqobe nxa singamthemba futhi sithembe lokho asitshela khona esebenzisa abameli bakhe. w23.07 19 ¶17-18

Ukubekezela kuqakatheke kakhulu ngoba yikho okuzakwenza sisindiswe. Kumele sibekezele njengezinceku zikaJehova zakudala ezazithembekile, silindele ukuthi uNkulunkulu agcwalise izithembiso zakhe. (Heb. 6:​11, 12) IBhayibhili lifanisa amaKhristu lomlimi. (Jak. 5:​7, 8) Umlimi usebenza nzima ehlanyela futhi ethelela izilimo zakhe kodwa uyabe engakwazi ukuthi zizathela nini. Lanxa kunjalo uyabekezela alinde ekwazi ukuthi ngelinye ilanga uzavuna. Njengomlimi lathi siqhubeka sisenza okunengi emsebenzini weNkosi lanxa ‘singakwazi ukuthi iNkosi yethu izakuza ngaliphi ilanga.’ (Mat. 24:42) Siyabekezela silinde, singathandabuzi ukuthi ngesikhathi esifaneleyo uJehova uzakwenza konke asithembise khona. Kodwa nxa singaphelelwa yisineke sehluleke ukuqhubeka silindile, singaqalisa ukutshiya uJehova kancane kancane. Kanti njalo singaqalisa ukugijimisa ukwenza izinto esiyabe sicabanga ukuthi zingasenza sithokoze khathesi. Kodwa nxa sibekezela sizenelisa ukuqinisela kuze kube sekucineni besesisindiswa.—Mik. 7:7. w23.08 22 ¶7

Nxa siqathanisa isiphrofetho esikuDanyeli 2:​41-43 lezinye ezisebhukwini likaDanyeli leleSambulo siyabona ukuthi inyawo zesithombe lesi zimela umbuso we-United States leBritain, umbuso olamandla kakhulu lamuhla. UDanyeli wathi ewuchasisa wathi: “Umbuso lo uzakuba lamandla nganxanye, ube buthakathaka nganxanye.” Kungani kuthiwa uzakuba buthakathaka nganxanye? Isizatho yikuthi abantu bayawuvimbela ukuthi ungenelisi ukusebenzisa amandla awo anjengawensimbi. Abantu laba yibo abamelwa libumba elibuthakathaka. Sithola izifundo ezinengi kulokho okwabhalwa nguDanyeli echasisa isithombe esaphutshwa yiNkosi uNebhukhadinezari. Okokuqala, umbuso we-United States leBritain utshengisile ukuthi ulamandla. Ngokwesibonelo amazwe la ayephakathi kwamazwe anqobayo eMpini Yomhlaba yokuqala leyesibili. Lanxa kunjalo umbuso lo usubuthakathaka futhi uqhubeka usiba buthakathaka ngoba abantu bawo baqhubeka besilwa bodwa futhi belwisana lohulumende. Okwesibili, umbuso lo yiwo ozabe ulokhu ubusa ngesikhathi uMbuso kaNkulunkulu ubuya uzokhipha yonke imibuso yabantu. w23.08 10-11 ¶12-13

Ngezinye izikhathi uDavida wayekhathazeka ngenxa yenhlupho lezilingo ayehlangana lazo. (Hubo. 18:​4, 5) Kodwa indlela uJehova ayetshengisa ngayo ukuthi uyamthanda lokuthi ulendaba laye yayimvuselela. UJehova wakhokhela uDavida, umngane wakhe owayedanile wamusa “emadlelweni aluhlaza” ‘lasezindaweni zokuphumula ezilamanzi amanengi.’ Lokhu kwenza uDavida waba lamandla futhi waqhubeka ekhonza uJehova ethokoza. (Hubo. 18:​28-32; 23:2) Lalamuhla uthando lukaJehova oluqotho yilo olwenza siqinisele nxa sihlangana lobunzima kanye lezilingo. (Izili. 3:22; Kol. 1:11) Impilo kaDavida yayihlala isengozini njalo wayelezitha ezinengi ezilamandla. Kodwa wayezizwa evikelekile futhi ehlalisekile ngenxa yokuthi wayebona ukuthi uJehova uyamthanda. UDavida wayekubona ukuthi uJehova wayelaye kukho konke ayedlula kukho futhi lokho kwakumduduza. Yikho wahlabela wathi: ‘[UJehova] wangikhulula kukho konke engangikwesaba.’ (Hubo. 34:4) Zikhona sibili izinto uDavida ayezesaba kodwa uthando lukaJehova lwalulukhulu kulazo. w24.01 30 ¶15-17

Ungenzi amaphutha enziwa nguJehowashi. UMphristi Omkhulu uJehoyada wathi esefile uJehowashi wakhetha abangane ababesenza izinto ezimbi. (2 Imilan. 24:​17, 18) Walalela abakhokheli bakoJuda ababengamthandi uJehova. Ubona angani kwakuqondile yini ukuthi uJehowashi azisondeze ebantwini laba ababesenza okubi? Kuyadanisa ukuthi uJehowashi walalela lokho ayekutshelwa ngabangane bakhe. UZakhariya owayeyisihlobo sakhe wathi ezama ukumncedisa, uJehowashi wathi kabulawe. (2 Imilan. 24:​20, 21; Mat. 23:35) Wayeyisiphukuphuku sibili! UJehowashi wayeqalise kuhle kodwa wacina esehlamukile futhi esengumbulali. Izinceku zakhe zacina zimbulele. (2 Imilan. 24:​22-25) Aluba waqhubeka elalela uJehova kanye lalabo ababethanda uNkulunkulu wayengasoze abe semanyaleni wonke lawa. w23.09 9 ¶6

UJesu wayekwazi ukuthi umphostoli uPhetro wayengenelisa ukuqhubeka ethembekile. Ngakho wamkhuthaza wamtshela ukuthi ‘angesabi.’ UJesu watshengisa ukuthi uyamthemba uPhetro futhi lokho kwenza uPhetro watshintsha impilo yakhe. Ngokuhamba kwesikhathi uPhetro lomfowabo u-Andreya batshiya umsebenzi wabo wokugola inhlanzi baba ngabalandeli bakaMesiya. Lokho kwenza bathola izibusiso ezinengi. (Mak. 1:​16-18) Kunengi uPhetro akubonayo lakukholisayo ngesikhathi engumlandeli kaKhristu. Wabona uJesu esilisa abagulayo, ekhipha abantu amadimoni futhi evusa labafileyo. (Mat. 8:​14-17; Mak. 5:​37, 41, 42) UPhetro waphinda wabona umbono owawutshengisa inkazimulo uJesu ayezakuba layo eseyiNkosi yoMbuso kaNkulunkulu futhi lokho kazange akukhohlwe. (Mak. 9:​1-8; 2 Phet. 1:​16-18) Wabona izinto ezimangalisayo ayengasoze azibone aluba kazange abe ngumlandeli kaJesu. Kumele ukuthi kwamthokozisa kakhulu ukuthi kazange akhalale lanxa kwezinye izikhathi wayeke akhuthe ugatsha. Lokho kwamenza wathola izibusiso zonke lezi! w23.09 21 ¶4-5

Encwadini yakhe yokuqala, umphostoli uPhetro wasebenzisa amazwi athi “thandanani kakhulu.” Uthando olunjalo lusibekela “izono ezinengi” hatshi ezilutshwana nje kuphela. (1 Phet. 4:8) Mhlawumbe uPhetro wacabanga ngesifundo uJesu ayemfundise sona eminyakeni eyadlulayo esasimayelana lokuthethelela. Kumele ukuthi ngalesosikhathi uPhetro wayecabanga ukuthi wayeyabe elomusa kakhulu nxa ethethelela umfowabo “kasikhombisa.” Kodwa uJesu wafundisa ukuthi kumele sithethelele “kuze kube ka-77,” okutsho ukuthi kumele siqhubeke sithethelela sonke isikhathi. (Mat. 18:21) Ungadani nxa ukubona kunzima ukuthi ukwenze lokhu. Zonke izinceku zikaJehova ziyake zithwale nzima ukuthi zithethelele. Okuqakatheke kakhulu yikuthi wenze konke ongakwenza ukuthi uthethelele umfowenu lokuthi wenze kube lokuthula phakathi kwenu. w23.09 29 ¶12

Ngesikhathi uJona esesiswini senhlanzi wayeqiniseka ukuthi uJehova wayezamnceda futhi awuphendule umthandazo wakhe ngoba wayezisola ngalokho ayekwenzile. UJehova wamsindisa uJona futhi ngemva kwesikhathi wayesekulungele ukwenza umsebenzi uJehova ayemnike wona. (Jona. 2:10–3:4) Nxa uphakathi kobunzima, uyake ukhathazeke kakhulu yini kuze kube nzima lokukhuleka? Uyake uphele amandla uze wehluleke lokutaditsha? Khumbula ukuthi uJehova ubazi kuhle ubunzima ophakathi kwabo. Yikho lanxa ungaze wenze umthandazo omfitshane, qiniseka ukuthi uzakunika khona kanye okudingayo. (Efe. 3:20) Nxa kuyikuthi uyagula kakhulu, udiniwe kumbe ukhathazeke kakhulu okokuthi ngeke wenelise ukubala lokutaditsha, zama ukulalela iBhayibhili lamabhuku ethu arekhodiweyo. Okunye okungakunceda yikulalela ingoma zethu kumbe ukubukela ividiyo ku-jw.org. UJehova uzakunika amandla nxa ungathandaza kuye njalo udinge impendulo zemithandazo yakho ngokubala iBhayibhili kanye lokusebenzisa konke okunye asiphe khona. w23.10 13 ¶6; 14 ¶9

Ngemva kwesikhathi kwakhiwa amathempeli eJerusalema njalo indlela ayeyenziwe ngayo phakathi yayifanana lendlela ithabanikeli elalenziwe ngayo. Phakathi kwakulendawo yokuqala eyayibizwa ngokuthi “yiNdawo Engcwele” kuphinde kube lendawo yesibili eyayibizwa ngokuthi “yiNgcwelengcwele.” Indawo lezi ezimbili zazehlukaniswe ngekhetheni elalilemiceciso. (Heb. 9:​2-5; Eks. 26:​31-33) Phakathi kweNdawo Engcwele kwakuloluthi lwesibane olwenziwe ngegolide, le-alithare lokutshisela impepha kanye letafula yesinkwa sokubukiswa. ‘Abaphristi ababegcotshiwe’ yibo kuphela ababevunyelwa ukungena eNdaweni Engcwele ukuze benze imisebenzi yabo yobuphristi. (Nani. 3:​3, 7, 10) ENgcwelengcwele kwakulebhokisi lesivumelwano elenziwe ngegolide njalo ibhokisi leli lalimela ukuba khona kukaJehova. (Eks. 25:​21, 22) Umphristi omkhulu nguye kuphela owayevunyelwa ukudlula aye ngale kwekhetheni angene eNgcwelengcwele. Lokhu wayekwenza kanye ngomnyaka ngeLanga Lokuhlawulelwa. (Levi. 16:​2, 17) Wayengena legazi lezinyamazana ukuze ahlawulele izono zakhe lezesizwe sonke. Ngokuhamba kwesikhathi uJehova wacacisa ukuthi izinto lezi ezaziphakathi kwethabanikeli zazimelani.—Heb. 9:​6, 7. w23.10 27 ¶12

ELizwini likaNkulunkulu kulamavesi amanengi asikhuthaza ukuthi ‘sithandane.’ (Joh. 15:12; Rom. 13:8; 1 Thes. 4:9; 1 Phet. 1:22; 1 Joh. 4:11) Umuntu uthanda ngenhliziyo. Manje kungakhanya njani ukuthi silothando njengoba kungelamuntu oyenelisa ukubona okusenhliziyweni? Singatshengisa ngamazwi ethu langezenzo zethu. Kulendlela ezinengi esingatshengisa ngazo ukuthi siyabathanda abafowethu labodadewethu. Nanzi ezinye: “Khulumani iqiniso komunye lomunye.” (Zak. 8:16) “Liqhubeke lihlalisana ngokuthula.” (Mak. 9:50) “Khokhelani ekuhlonipheni abanye.” (Rom. 12:10) “Yamukelanani.” (Rom. 15:7) ‘Qhubekani lithethelelana.’ (Kol. 3:13) “Qhubekani lithwalisana imithwalo esindayo.” (Gal. 6:2) “Qhubekani liduduzana.” (1 Thes. 4:18) ‘Qhubekani lisakhana.’ (1 Thes. 5:11) “Lithandazelane.”—Jak. 5:16. w23.11 9 ¶7-8

Nsuku zonke zinengi izinqumo esingazenza ezidinga ukuthi sibe lokholo oluqinileyo. Ngokwesibonelo kulendaba yokukhetha abangane, ezokuzilibazisa, imfundo lomsebenzi. Kanti njalo kungadinga ukuthi senze izinqumo ezimayelana lomtshado labantwana. Kuqakathekile ukuthi sizibuze imibuzo le: ‘Engikukhethayo kuyatshengisa yini ukuthi ngikwazi mhlophe ukuthi umumo lo wezinto uyadlula lokuthi sekuseduze ukuthi uNkulunkulu alethe umhlaba omutsha? Engikukhethayo kuyafanana yini lokwenziwa ngabantu abakholwa ukuthi siphilela elalamuhla kuphela?’ (Mat. 6:​19, 20; Luk. 12:​16-21) Nxa singaqhubeka sikholwa ukuthi umhlaba omutsha ususeduze sizakwenza izinqumo ezinhle. Okunye okungadinga ukuthi sibe lokholo oluqinileyo yibunzima esingaba phakathi kwabo. Singahlukuluzwa, sihlaselwe ngumkhuhlane omubi kumbe kwenzakale okunye okungasiqeda amandla. Singaqalisa sizimisele sibili ukuqinisela ebunzimeni esiyabe sikubo. Kodwa ubunzima bujayele ukuthatha isikhathi eside. Yikho nxa isikhathi silokhu sitshova kungelalutho olutshintshayo kuyabe sekumele sibe lokholo oluqinileyo ukuze siqinisele njalo siqhubeke sikhonza uJehova sithokoza.—1 Phet. 1:​6, 7. w23.04 27 ¶4-5

UJehova ukhangelele ukuthi senze izinto ezihambelana lalokho esikuthandazeleyo. Ngokwesibonelo, umzalwane angathandaza kuJehova ecela ukuthi avunyelwe ukungayi emsebenzini ukuze ayengena umhlangano wesabelo. UJehova angawuphendula njani umthandazo wakhe? Anganika umzalwane lo isibindi ukuze enelise ukuyacela kumqhatshi wakhe. Kodwa lokho akutsho ukuthi nxa umzalwane esekhulekile usengazihlalela, kuyabe kumele amlande umqhatshi wakhe ayecela. Kungadingeka lokuthi acele kanengi. Okunye angakwenza yikucela ukuthi omunye asebenza laye ambambele kumbe angacela ukuthi umqhatshi angamholisi imali yamalanga ayabe engasebenzanga ngawo. UJehova ukhangelele ukuthi sihlale sithandaza simtshela okusihluphayo. Amazwi kaJesu atshengisa ukuthi ezinye izicelo zethu azisoze zihle zilungiswe khonapho khonapho. (Luk. 11:9) Ngakho ungakhalali! Qhubeka uthandaza ngenhliziyo yonke. (Luk. 18:​1-7) Nxa singaqhubeka sithandaza siyabe sitshengisa uJehova ukuthi lokho esikucelayo kuqakathekile kakhulu kithi. Kanti njalo siyabe sitshengisa ukuthi siyakholwa ukuthi uyenelisa ukusincedisa. w23.11 22 ¶10-11

UJehova wathembisa umngane wakhe u-Abrahama ukuthi zonke izizwe zomhlaba zazizabusiswa ngenzalo yakhe. (Gen. 15:5; 22:18) U-Abrahama wayengathandabuzi ukuthi okuthenjiswa nguNkulunkulu kwakuzakwenzakala ngoba wayelokholo kuye. Lanxa kunjalo wafikisa iminyaka engu-100, lomkakhe engu-90 belokhu bengakabi lendodana. (Gen. 21:​1-7) IBhayibhili lithi: “Ithemba lamenza wakholwa ukuthi wayezakuba nguyise wezizwe ezinengi njengoba nje wayetsheliwe.” (Rom. 4:18) Siyakwazi ukuthi lokho u-Abrahama ayethemba ukuthi kuzakwenzakala kwenzakala sibili. Ekucineni wayithola indodana ayeyilindele okwesikhathi eside, u-Isaka. Kuyini okwenza u-Abrahama wahlala ethemba ukuthi uJehova wayezakwenza lokho ayemthembise khona? U-Abrahama “wayengathandabuzi ngitsho ukuthi uNkulunkulu wayesenelisa ukwenza lokho ayekuthembisile” ngoba wayemazi kuhle. (Rom. 4:21) UJehova wamamukela u-Abrahama futhi wathi ulungile ngenxa yokholo lwakhe.—Jak. 2:23. w23.12 8 ¶1-2

Kulula ukuthi abantu bathembe umfowethu osakhulayo oyenza kuhle yonke imisebenzi ayiphiwayo. Cabanga ngalokho okwenziwa nguJesu. Wayengayithathi lula imisebenzi ayeyiphiwa nguJehova kodwa wayeyenza ngenhliziyo yonke lanxa kwezinye izikhathi kwakunzima ukuthi ayenze. UJesu wayebathanda abantu ikakhulu abafundi bakhe, yikho waze wazimisela ukubafela. (Joh. 13:1) Lingisela uJesu ngokusebenza nzima kuyo yonke imisebenzi oyiphiwayo. Nxa ungakwazi ukuthi umsebenzi othile kumele uwenze njani, zithobe ucele ukuncediswa ngabazalwane abalolwazi. Woba ngumuntu okhutheleyo, ungenzi okulutshwana nje okukhangelelweyo. (Rom. 12:11) Kodwa wenze wonke umsebenzi owuphiweyo futhi uwenze kuhle ‘angathi usebenzela uJehova hatshi abantu.’ (Kol. 3:23) Ukunanzelela ukuthi ulesono kuzakunceda ukuthi uthobeke uvume nxa uphambanisile.—Zaga. 11:2. w23.12 26 ¶8

Ukubhabhathizwa lokuba ngamalunga emuli kaJehova kuyasithokozisa kakhulu. Labo abathola isibusiso sokuba semulini yakhe bangavumelana lomhubi uDavida owathi: “Uyathokoza umuntu omkhethayo umsondeze eduze kwakho, ukuze ahlale emagumeni akho.” (Hubo. 65:4) UJehova kaphonguletha loba ngubani emagumeni akhe. Usondela eduze kwalabo abatshengisa ukuthi bafisa ukuba ngabangane bakhe. (Jak. 4:8) Nxa ungazinikela kuJehova futhi ubhabhathizwe, ungaqiniseka ukuthi nxa usubhabhathizwe, uJehova ‘uzakuthululela izibusiso ezinengi uze uswele lokuthi uzifake ngaphi.’ (Mal. 3:10; Jer. 17:8) Nxa ubhabhathizwa uyabe uqala impilo yokukhonza uJehova. Kuyabe kumele wenze konke okusemandleni akho ukuthi ugcine isifungo sakho sokuzinikela kuJehova lanxa ulingwa kumbe uhlangana lobunzima. (Umtshu. 5:​4, 5) Njengoba uyabe usungumfundi kaJesu, kuyabe kumele usebenze nzima ukuthi ulingisele lokho ayekwenza njalo ulandele yonke imithetho yakhe.—Mat 28:​19, 20; 1 Phet. 2:21. w24.03 8 ¶1-3

Lingenzani nxa kuyikuthi wena lomkakho alikukholisi ukuba ndawonye? Cabanga ngomzekeliso womlilo. Umlilo lo awuphongulavuka uqalisa ukubaswa. Uyabe ulokhu ufakwa inkuni eziqatha kancane kancane. Lani lingaqala ngokuzinika isikhathi esincane nje sokuba ndawonye nsuku zonke. Ngesikhathi leso yenzani izinto elizikholisayo lobabili. (Jak. 3:18) Nxa lingaqala ngokwenza izinto lezi ezincane lingaluvuselela uthando lwenu. Ukuhloniphana kuqakathekile ebantwini abatshadileyo. Ukuhloniphana kunjengomoya oyenza umlilo uqhubeke ubhebha. Phela nxa umoya ungaswelakala umlilo uyacitsha masinyane nje. Labatshadileyo bangayekela ukuhloniphana uthando lwabo luyaphela masinyane nje. Kodwa nxa besenza okusemandleni abo ukuthi bahloniphane bayabe besenza ukuthi uthando lwabo luqhubeke luvutha. Kodwa khumbula ukuthi indaba ayikho ekuthini wena uthi uyamhlonipha umkakho kodwa isekuthini umkakho uyakubona yini ukuthi uyamhlonipha. w23.05 22 ¶9; 24 ¶14-15

EBhayibhilini kulezinceku zikaJehova ezazithembekile ezakhuluma ngendlela ezazikhathazeke ngayo lendlela ezazisesaba ngayo ngenxa yezitha zazo kumbe okunye okwakuzithwalise nzima. (Hubo. 18:4; 55:​1, 5) Lathi singabe sithwaliswe nzima ngabanye esikolo, emsebenzini, emulini loba sihlukuluzwa ngohulumende. Ukuphila kwethu kungabe kusengozini ngenxa yomkhuhlane esilawo. Ezikhathini lezo ezinzima singazibona sinjengomntwana omncane, kungelalutho esingazinceda ngalo. Manje uJehova usincedisa njani? Uyasiduduza asenze sizizwe ngcono. Yikho hlala uzinika isikhathi sokukhuluma loJehova ngokuthandaza kuye langokubala iLizwi lakhe. (Hubo. 77:​1, 12-14) Nxa ungenza njalo into yokuqala ozayicabanga nxa ungaba lohlupho yikuthandaza kuYihlo osezulwini. Tshela uJehova lokho okwesabayo lalokho okukuhluphayo. Mvumele ukuthi akhulume lawe futhi akududuze ngeMibhalo.—Hubo. 119:28. w24.01 24-25 ¶14-16

Kuqakatheke kakhulu ukuthi ube lesifiso esikhulu sokwenza lokho okuhlelileyo. Nxa ulesifiso esikhulu, uzasebenza nzima ukuthi ukwenze. Kanti njalo nxa silesifiso esikhulu kuzaba lula ukuthi siphumelele ukwenza lokho esikuhlelileyo. Manje ungenzani ukuze ube lesifiso esikhulu? Thandaza ukuze ube lesifiso esikhulu. UJehova angasebenzisa umoya wakhe ongcwele ukuze akwenze ube lesifiso sokwenza okuhlelileyo. Kwesinye isikhathi siyahlela esifuna ukukwenza ngoba sikwazi ukuthi yikho okumele sikwenze futhi lokho kuhle. Lanxa kunjalo singabe singelaso isifiso sokuthi sikwenze. Cabangisisa ngalokho uJehova akwenzele khona. (Hubo. 143:5) Umphostoli uPhawuli wacabangisisa ngomusa omkhulu ayewenzelwe nguJehova njalo lokho kwenza wafuna ukumsebenzela nzima. (1 Khor. 15:​9, 10; 1 Thim. 1:​12-14) Lawe nxa ungacabangisisa ngalokho uJehova akwenzele khona, uzaba lesifiso esikhulu sokwenza lokho okuhlelileyo.—Hubo. 116:12. w23.05 27 ¶3-5

UBaba wethu osezulwini uyathokoza nxa sidumisa ibizo lakhe. (Hubo. 69:​30, 31) Manje lokhu sekusitsho ukuthi uNkulunkulu uSomandla ufanana labantu abalesono yini abafuna ukunconywa ngoba kubenza bathokoze? Hatshi. Nxa sidumisa uBaba wethu osezulwini siyabe sincedisa ukutshengisa ukuthi okwakhulunywa nguSathane mayelana lathi kungamanga. USathane wathi akulamuntu ongahlala eqotho futhi evikela ibizo likaJehova sonke isikhathi. Uthi nxa singehlelwa yizilingo ngeke siqhubeke sithembekile kuNkulunkulu. Uphinda athi sonke singamtshiya uNkulunkulu nxa singabona kulenye into esingayithola ngokwenza njalo. (Jobe. 1:​9-11; 2:4) Kodwa uJobe waqhubeka ethembekile watshengisa ukuthi uSathane ulamanga. Wena uzaqhubeka uthembekile yini? Sonke silesibusiso sokutshengisa ukuthi siqotho ngokulwela ibizo likaBaba wethu futhi simthokozise ngokuqhubeka sithembekile. (Zaga. 27:11) Kuyisibusiso esikhulu ukwenza lokhu. w24.02 8-9 ¶3-5

Ngemva kwensuku zikaMosi loJoshuwa, uJehova waqalisa ukubeka abahluleli ukuthi bakhokhele abantu bakhe. Kwathi sekulamakhosi ayebusa ko-Israyeli, uJehova wayebeka abaphrofethi ukuthi bakhokhele abantu bakhe. Amakhosi ayethembekile ayebalalela abaphrofethi. Ngokwesibonelo, iNkosi uDavida yazithoba yavuma ukuqondiswa ngumphrofethi uNathani. (2 Sam. 12:​7, 13; 1 Imilan. 17:​3, 4) INkosi uJehoshafathi yakulalela lokho okwakukhulunywa ngumphrofethi uJahaziyeli yasikhuthaza abantu bakoJuda ukuthi ‘babe lokholo kubaphrofethi [bakaNkulunkulu].’ (2 Imilan. 20:​14, 15) INkosi uHezekhiya yathi ikhathazekile yacela uncedo kumphrofethi u-Isaya. (Isaya. 37:​1-6) Nxa amakhosi ayelalela ayekutshelwa nguJehova ayebusiswa njalo lesizwe sasivikelwa. (2 Imilan. 20:​29, 30; 32:22) Kwakucaca ebantwini bonke ukuthi uJehova wayesebenzisa abaphrofethi bakhe ukuthi akhokhele abantu bakhe. w24.02 21 ¶8

USathane ufuna sijayelane labantu abazakwenza ukuthi kube nzima ukuthi silandele imithetho kaJehova. Kumele sikhumbule ukuthi abantu esijayelana labo ayisibo esibabona nsuku zonke kuphela kodwa kugoqela lalabo esingajayelana labo kwezempucuko (i-social media). Kumele sihlale silwisana lomcabango womhlaba lo owokuthi ukuziphatha okubi kwamukelekile. Sikwazi mhlophe ukuthi akuqondanga. (Efe. 4:​19, 20) Kuhle ukuthi sizibuze imibuzo le, ‘Ngenza konke yini ukuthi ngingazihlanganisi lengisebenza labo, lengifunda labo kumbe abanye abantu abangalandeli imithetho kaJehova emayelana lokuthi kuyini okulungileyo lokungalunganga? Ngilaso yini isibindi sokuqhubeka nginamathele emthethweni kaJehova lanxa abanye bengabona angani ngizenza umuntu ongcono?’ U-2 Thimothi 2:​20-22 utshengisa ukuthi kumele sinanzelele labangane esibakhethayo ebandleni. Kumele sikhumbule ukuthi abanye ngeke basincedise ukuthi siqhubeke sikhonza uJehova sithembekile. w24.03 22-23 ¶11-12

Sewake wazama ukucabanga ukuthi uJehova unjani? Lanxa singeke senelise ukumbona, iBhayibhili limchaza ngendlela ezitshiyeneyo. UJehova ubizwa ngokuthi “ulilanga futhi ulihawu” lokuthi “ungumlilo otshabalalisayo.” (Hubo. 84:11; Heb. 12:29) Omunye umlobi weBhayibhili wathi echasisa umbono awubonayo wathi uJehova unjengelitshe lesafire, lensimbi ecazimulayo njalo wathi lapho ayekhona kwakuyibunkanyankanya angathi ngumchilowamakhosikazi. (Hez. 1:​26-28) Ngeke simbone uJehova. Yikho kungaba nzima ukukholwa ukuthi uyasithanda. Abanye bacabanga ukuthi uJehova ngeke abathande ngenxa yezinto ezimbi ezenzakala empilweni zabo. UJehova uyayizwisisa indlela esizizwa ngayo kanye lezinto ezenza kube nzima ukuthi sisondele kuye. Kodwa kasitshiyi sinjalo, eLizwini lakhe iBhayibhili uyasivezela ubuntu bakhe obuhle ukuze asincede. Ibala elilodwa elimchaza kuhle uJehova ngelithi uthando. IBhayibhili lithi uNkulunkulu “uluthando.” (1 Joh. 4:8) Konke akwenzayo ukwenza ngenxa yothando. Uthando lukaNkulunkulu lukhulu kakhulu futhi lulamandla okokuthi kathandi labo abamthandayo kuphela kodwa uthanda lalabo abangamthandiyo.—Mat. 5:​44, 45. w24.01 26 ¶1-3

UJehova wabeka uMosi ukuthi akhokhele ama-Israyeli ngesikhathi ephuma eGibhithe. Kwakusiba lensika yeyezi emini, kuthi ebusuku kube lensika yomlilo. (Eks. 13:21) UMosi wayelandela insika leyo njalo yabakhokhela yabasa eLwandle Olubomvu. Abantu bethuka becabanga ukuthi bazatshabalala njengoba phambili kwakulolwandle, emuva kulebutho labaseGibhithe elalibaxotshanisa. Kodwa uMosi wayengalukhuthanga ugatsha, uJehova nguye owayeyenze ukuthi uMosi abakhokhele ebasa eLwandle Olubomvu. (Eks. 14:2) UNkulunkulu wabasindisa ngendlela emangalisayo. (Eks. 14:​26-28) Okweminyaka engu-40 eyalandelayo, uMosi wayelokhu elandela insika yeyezi ukuthi akhokhele abantu bakaNkulunkulu enkangala. (Eks. 33:​7, 9, 10) UJehova wayekhuluma loMosi esensikeni yeyezi, uMosi abesesiyatshela abantu amazwi kaJehova. Ama-Israyeli ayelobufakazi obucacileyo bokuthi uJehova wayesebenzisa uMosi ukuze abakhokhele. w24.02 21 ¶4-5