July

Kukho konke uJesu ayekukhuluma layekwenza okuhlanganisa lezimangaliso azenzayo wayelingisela indlela uYise ayecabanga ngayo layezizwa ngayo. (Joh. 14:9) Sifundani ezimangalisweni ezenziwa nguJesu? Sifunda ukuthi uJesu loYise bayasithanda kakhulu. Ngesikhathi uJesu esemhlabeni watshengisa ukuthi uyabathanda kakhulu abantu ngokwenza izimangaliso ezaziqeda ukuhlupheka kwabo. Ngelinye ilanga amadoda amabili ayiziphofu acela uncedo kuJesu. (Mat. 20:​30-34) Nanzelela ukuthi uJesu “wawazwela usizi” wasewasilisa. Ibala lesiGrikhi elihunyutshwe ngokuthi “wawazwela usizi” litsho uzwelo olukhulu oluqubuka ngaphakathi. Uzwelo lolo olufuqwa luthando yilo olwenza uJesu wanika ababelambile ukudla njalo welapha lendoda eyayilobulephero. (Mat. 15:32; Mak. 1:41) Asithandabuzi ukuthi uJehova uNkulunkulu “olozwelo olukhulu” leNdodana yakhe bayasithanda kakhulu futhi bazwa ubuhlungu nxa besibona sihlupheka. (Luk. 1:78; 1 Phet. 5:7) Kumele ukuthi bakulindele ngabomvu ukuqeda zonke izinto ezithwalise abantu amagabha avuzayo! w23.04 3 ¶4-5

Kumele sibalekele izinto ezingenza ukuthi izingqondo zethu zigcwale imicabango emibi ejayelekileyo emhlabeni lo kaSathane. Ukubala lokutaditsha iBhayibhili kuzakwenza ukuthi sihlale sicabanga ngezinto ezisincedayo. Okunye okuzasinceda ukuthi sihlale sicabanga izinto eziqondileyo yikuya emihlanganweni yebandla lokutshumayela. Singenza njalo asithandabuzi ukuthi uJehova kasoze avume ukuthi silingwe ngalokho esingeke senelise ukukubekezelela. (1 Khor. 10:​12, 13) Ngamunye wethu kumele ahlale ethandaza kuJehova ukuze aqhubeke ethembekile ezinsukwini lezi zokucina okunzima ukuphila kuzo. UJehova ufuna ‘simtshele konke okusezinhliziyweni zethu.’ (Hubo. 62:8) Mdumise futhi umbonge ngakho konke akwenzela khona. Mcele ukuthi akunike isibindi sokutshumayela. Mcele ukuthi akuncedise nxa ulenhlupho lokuthi akunike amandla okunqoba izilingo. Ungavumeli loba yini kumbe loba ngubani akwenze ukuthi ungahlali uthandaza kuJehova. w23.05 7 ¶17-18

Kungani sisiya emihlanganweni yebandla? Isizatho esiqakathekileyo esenza sihambe emihlanganweni le yikuthi sifuna ukudumisa uJehova. (Hubo. 26:12; 111:1) Esinye isizatho ngesokuthi sifuna ukukhuthazana njengoba siphila ezikhathini ezinzima. (1 Thes. 5:11) Izinto lezi singenelisa ukuzenza ngokuphendula emihlanganweni yebandla. Kodwa kwezinye izikhathi kungaba nzima nxa sifuna ukuphendula ngenxa yokuthi singabe sisesaba kumbe sifuna ukuphendula kanengi kodwa singaqanjwa. Manje kuyini okungasinceda? Umphostoli uPhawuli wagcizelela ukuthi kumele ‘sikhuthazane.’ Asisoze sesabe kakhulu ukuphendula nxa singakhumbula ukuthi izimpendulo zethu lanxa zizimfitshane ziyabakhuthaza abanye futhi ziluqinise ukholo lwabo. Lanxa singaqanjwanga kanengi ngendlela ebesifisa ngayo kungasithokozisa ukuthi sinike abanye ithuba lokuthi baphendule.—1 Phet. 3:8. w23.04 20 ¶1-3

AmaJuda ayethunjwe eBhabhiloni okweminyaka engaba ngu-70 ayesekhululekile ukubuyela elizweni lawo lako-Israyeli njengoba inkosi yayisiwakhululile! (Ezra. 1:​2-4) Akula omunye umuntu owayengakwenza lokho ngaphandle kukaJehova. Phela iBhabhiloni yayingajayelanga ukukhulula abantu eyayibathumbile. (Isaya. 14:​4, 17) Kodwa khathesi yayisinqotshiwe futhi umbusi omutsha watshela amaJuda ukuthi ayesengabuyela kibo. AmaJuda, ikakhulu izinhloko zemuli kwasekumele akhethe ukuthi azasuka yini eBhabhiloni kumbe azaqhubeka ehlala khona. Kumele ukuthi kwakunzima sibili ukwenza isinqumo leso. Kwabanye kwakungaba nzima ukuthi bathathe uhambo lolu olude ngenxa yokuthi basebegugile. Amanye amaJuda ayezalelwe eBhabhiloni ayengakaze ayehlala kwezinye indawo. Phela kubo ilizwe lako-Israyeli kwakuyilizwe labokhokho babo nje. Kukhanya amanye amaJuda ayephumelela kakhulu eBhabhiloni yikho kwakungaba nzima ukuthi atshiye izindlu zawo ezinhle kumbe amabhizimusi awo esiyahlala endaweni angayijayelanga. w23.05 14 ¶1-2

ILizwi likaNkulunkulu lisikhuthaza ukuthi siqhubeke sisebenza nzima ukuthi sibe ngabantu abaqiniselayo, abalozwelo labalothando. ULukha 21:19 uthi: “Nxa lingaqinisela lizalondoloza impilo zenu.” UKholose 3:12 uthi: “Gqokani uzwelo.” U-1 Thesalonika 4:​9, 10 yena uthi: ‘Lina ngokwenu lifundiswa nguNkulunkulu ukuthi lithandane. Loba kunjalo, siyalincenga bafowethu ukuthi liqhubeke likwenza kakhulu lokho.’ Amavesi la ayebhalelwe abafundi ababevele sebetshengisile ukuthi bayaqinisela, balozwelo lokuthi balothando. Kodwa kwakungamelanga basuthiseke ngalokho ababekwenza, kwakumele baqhubeke bethuthuka. Lathi kumele senze njalo. Ukuze uncedakale hlola ukuthi amaKhristu akuqala ayetshengisa njani ukuthi ayaqinisela, alozwelo futhi alothando. Ngemva kwalokho zama ukubona ukuthi ungawalingisela njani ukuze ukulungele ukuhlupheka okukhulu. Nxa ukuhlupheka okukhulu sekuqalisa uyabe usukufundile ukuqinisela futhi uzazimisela ukuqhubeka usenza njalo. w23.07 3 ¶4, 8

Sonke kumele siqhubeke sihamba ‘eNdleleni yobuNgcwele’ kungelani lokuthi singabagcotshiweyo kumbe ‘singabezinye izimvu.’ (Joh. 10:16) Indlela le izasincedisa ukuthi siqhubeke sikhonza uJehova iphinde isincede sithole izibusiso ezizalethwa nguMbuso esikhathini esizayo. Kusukela ngo-1919, abantu abanengi, amadoda labesifazana labantwana, sebetshiye iBhabhiloni Enkulu, umbuso womhlaba wonke wenkolo yamanga baqalisa ukuhamba emgwaqweni lo ongcwele. UJehova waba leqiniso lokuthi akulalutho olwaluzaphambanisa amaJuda ayesuka eBhabhiloni ngesikhathi esendleleni. (Isaya. 57:14) Lamuhla ‘iNdlela yobuNgcwele’ ilungiswa njani? Kungakafiki u-1919 uJehova wayesebenzisa abantu ababemthanda ukuthi balungise indlela yabantu bakhe ukuthi baphume eBhabhiloni Enkulu. (Khangela lo-Isaya 40:3.) Abantu laba basebenza nzima belungisa indlela eyayizanceda abantu abaqotho ukuthi basuke eBhabhiloni Enkulu besebengena endleleni eyayibasa eqinisweni. w23.05 15-16 ¶8-9

UJehova ufuna simkhonze ngenhliziyo yonke sithokoza. (2 Khor. 9:7) Manje lokho kutsho ukuthi siyekele yini ukwenza lokho esikuhlelileyo nxa sisizwa kungatsho? Cabanga ngalokho okwenziwa ngumphostoli uPhawuli. Wathi: “Ngiyawulaya umzimba wami ngiwenze ube yisigqili.” (1 Khor. 9:​25-27, amabala angaphansi) Kwezinye izikhathi uPhawuli wayesizwa kungatsho ukuthi enze okulungileyo kodwa wayezibamba ngamandla ukuthi akwenze. UJehova wathokoza ngaye yini? Ye, futhi waze wambusisa ngenxa yemizamo yakhe. (2 Thim. 4:​7, 8) UJehova uyathokoza nxa lathi sisenza konke okusemandleni ethu ukuze senze esikuhlelileyo lanxa kuyabe kungatsho. Okumthokozisayo yikuthi lanxa kwezinye izikhathi siyabe singakuthandi lokho esikwenzayo, uyakwazi ukuthi sikwenza ngenxa yokuthi siyamthanda. Imizamo esiyenzayo izakwenza ukuthi uJehova asibusise ngendlela abusisa ngayo uPhawuli. (Hubo. 126:5) Nxa singabona indlela uJehova asibusisa ngayo, siyaba ledlabuzane lokwenza lokho esikuhlelileyo. w23.05 29 ¶9-10

Umphostoli uPhawuli wafanisa labo abangasoze basinde ngosuku lukaJehova labantu abaleleyo. Kabakwazi ukuthi kwenzakalani njalo kabakunanzeleli lokuthi isikhathi siyahamba. Nxa kusenzakala izinto eziqakathekileyo kababoni ukuthi zitshoni futhi kabenzi lutho ngazo. Abantu abanengi lamuhla balele, kababoni ukuthi okwenzakalayo kutshoni ngempilo yabo. (Rom. 11:8) Lanxa kulobufakazi obunengi obutshengisa ukuthi siphila “ezinsukwini zokucina” lokuthi ukuhlupheka okukhulu sekuzaqalisa, bona kabazihluphi ngakho. (2 Phet. 3:​3, 4) Kodwa thina siyananzelela ukuthi kuqakathekile ukuthi sihlale siphapheme ngoba usuku ngalunye oludlulayo lusisondeza duze losuku lukaJehova. (1 Thes. 5:6) Yikho kumele sihlaliseke singawalazeli. Kungani kumele senze njalo? Ukwenza njalo kuyasinceda ukuthi singangeni kwezombusazwe lasezindabeni zomphakathi. Njengoba usuku lukaJehova luqhubeka lusondela kuzakwenzakala izinto ezinengi ezingenza sicine silingeka ukungena ezintweni lezi. Kodwa akumelanga sikhathazeke ngokuthi sizakwenzani ngalesosikhathi. Umoya kaNkulunkulu uzasinceda ukuthi sihlaliseke futhi senze lezinqumo ezinhle.—Luk. 12:​11, 12. w23.06 10 ¶6-7

Kuyini okufika engqondweni yakho nxa usizwa ibizo elithi Samsoni? Engxenye uhle ucabange ngendoda elamandla kakhulu. USamsoni wayelawo sibili amandla. Kodwa wake wenza isinqumo esibi esamthela emanyaleni. Lanxa kunjalo uJehova kazange akukhohlwe okuhle okwakwenziwe nguSamsoni. Isibonelo sendoda le eyayithembekile wasifaka eBhayibhilini ukuze sisincede. UJehova wasebenzisa uSamsoni ukuthi enze izinto ezimangalisayo ukuze ancede abantu bakhe bako-Israyeli. Ngemva kweminyaka eminengi uSamsoni efile, uJehova waphefumulela umphostoli uPhawuli ukuthi abhale ngamadoda ayelokholo kugoqele loSamsoni. (Heb. 11:​32-34) Okwenziwa nguSamsoni kungasikhuthaza. Wathembela kuJehova langezikhathi ephakathi kobunzima. Indaba kaSamsoni ingasikhuthaza njalo kukhona esingakufunda kuye okungasinceda. w23.09 2 ¶1-2

Okungasinceda ukuthi siqinisele yikuhlala sithandaza kuJehova ngenhliziyo yonke simtshela konke okusihluphayo. (1 Thes. 5:17) Kungenzakala ukuthi khathesi akulanto enkulu ekuhluphayo. Lanxa kunjalo uyamtshela yini uJehova nxa kulento ekucaphulileyo, kumbe obona angathi ingaphezu kwamandla akho, loba nxa ungakwazi ukuthi wenzeni ngohlupho oluthile? Nxa uhlala ucela uJehova ukuthi akuncedise ngenhlupho ohlangana lazo nsuku zonke, awusoze uthikaze ukwenza njalo nxa usuhlangana lenhlupho ezinkulu ngesikhathi esizayo. Lokhu kuzakwenza ungathandabuzi ukuthi uJehova uyasazi isikhathi esifaneleyo sokukuncedisa lalokho okumele akwenze ukuze akuncedise. (Hubo. 27:​1, 3) Nxa singaqinisela sihlale sithembekile khathesi, sizenelisa ukuqinisela ngesikhathi sokuhlupheka okukhulu. (Rom. 5:3) Kungani sisitsho njalo? Abafowethu labodadewethu bayakubona ukuthi bayenelisa ukuqinisela ebunzimeni obuvukayo nxa sebeke baqinisela ebunzimeni abayabe beke bahlangana labo. Nxa umuntu eseke waqinisela ebunzimeni, kuyamnceda kakhulu ngoba kwenza abe lokholo oluqinileyo lokuthi uJehova ukulungele futhi uzimisele ukumncedisa. Ukholo lwakhe lona lumnceda ukuthi abekezelele ubunzima obulandelayo.—Jak. 1:​2-4. w23.07 3 ¶7-8

Okwenza uJehova abe nguNkulunkulu ozwisisayo yikuthi uthobekile njalo ulozwelo. Ngokwesibonelo kwakhanya ukuthi uJehova uthobekile ngesikhathi esezabhubhisa abantu beSodoma ababesenza okubi. UJehova wathuma izingilosi zakhe ukuthi zitshele uLothi ukuthi abalekele ezintabeni kodwa uLothi wayesesaba ukuya khona. Yikho wacela ukuthi yena lemuli wakhe baye eZowari, idolobho elincane elalizabhujiswa lalo. UJehova wayengatshela uLothi ukuthi enze khona kanye amtshele khona angaphikisani laye. Kodwa wamvumela ukuthi aye edolobheni leZowari futhi wacina engasalibhubhisanga. (Gen. 19:​18-22) Kanti njalo ngemva kweminyaka eminengi, uJehova wazwela abantu beNiniva. Wathuma umphrofethi uJona ukuthi ayebatshela ukuthi idolobho lelo laselizabhujiswa kuphinde kubhujiswe labantu balo ababesenza okubi. Kodwa abantu beNiniva bathi sebephendukile, uJehova wabazwela wayekela ukubhubhisa idolobho labo.—Jona. 3:​1, 10; 4:​10, 11. w23.07 21 ¶5

Sifundani kuJehowashi? UJehowashi wayenjengesihlahla esilempande ezingatshoniyo esijekwe ngesigodo. Umuntu owayenjengesigodo esijeke uJehowashi wathi esefile, uJehowashi waqalisa ukulalela abahlamuki wasesiwa. Lokhu kutshengisa ukuthi akumelanga sesabe uNkulunkulu ngenxa nje yokuthi sijekwe ngamaKhristu aqinileyo ekukhonzeni lamalunga ezimuli zethu. Kodwa umuntu ngamunye kumele aqinise ubungane bakhe loJehova ngokutaditsha zikhathi zonke, langokucabangisisa lokuthandaza. Izinto lezi zizakwenza ukuthi sihlale simesaba futhi sizinikele kuye. (Jer. 17:​7, 8; Kol. 2:​6, 7) UJehova kakhangelelanga okunengi kakhulu kithi. Lokho akufunayo kufinqwe kuhle kumTshumayeli 12:13 othi: “Mesabe uNkulunkulu weqiniso ugcine imithetho yakhe ngoba lo yiwo wonke umlandu womuntu.” Nxa simesaba uNkulunkulu sizenelisa ukulwisana lezilingo ezizasehlela, siqhubeke siqotho. Akulalutho oluzaphambanisa ubungane bethu loJehova. w23.06 19 ¶17-19

Uvesi 5 uqalisa ngamazwi athi: “Lowo owayehlezi esihlalweni sobukhosi wathi.” (Isam. 21:5a) Amazwi la aqakathekile ngoba atshengisa ukuthi uJehova nguye ngokwakhe owayezakhuluma. Wakhuluma kathathu kuphela ebhukwini leSambulo. Amazwi la aveza ukuthi okusemavesini la akukhulunywanga yingilosi kumbe nguJesu owayesevusiwe kodwa kwakhulunywa nguJehova ngokwakhe. Lokho kwenza sikuthembe kakhulu okwatshiwo nguJehova. Ngenxa yani? Ngenxa yokuthi uJehova ‘ngeke aqambe amanga.’ (Tit. 1:2) Ngakho amazwi la asekuqaliseni kukavesi 5 enza sikuthembe lokho okukuSambulo 21:​5, 6. Asixoxeni ngebala elithi “Khangela!” Ibala lesiGrikhi elihunyutshwe ngokuthi “khangela!” lisetshenziswa kanengi ebhukwini leSambulo. Nanzelela ukuthi yiwaphi amazwi alandela ibala leli. Ngamazwi kaNkulunkulu athi: “Ngenza izinto zonke zibe zintsha.” UJehova uzakwenza izinto zibe zintsha esikhathini esizayo. Kodwa evesini le ukhuluma angathi usezenza zibe zintsha ngoba kathandabuzi ukuthi uzakwenza lokho akuthembisileyo loba sekutheni.—Isaya. 46:10. w23.11 3-4 ¶7-8

Umphostoli uPhetro wayephambanisa. Ngokwesibonelo, uJesu wathi echasisa ukuthi wayezahlupheka njani futhi afe ukuze kugcwaliseke isiphrofetho, uPhetro wamkhuza. (Mak. 8:​31-33) Yena labanye abaphostoli babehlala bephikisana ngokuthi ngubani owayemkhulu phakathi kwabo. (Mak. 9:​33, 34) Ngobusuku uJesu abotshwa ngabo, uPhetro waqabuka esequme indlebe yenye indoda. (Joh. 18:10) Ngalobobusuku uPhetro wakhulelwa yikwesaba wasephika umngane wakhe uJesu kathathu. (Mak. 14:​66-72) Ngemva kwalokho wakhala kabuhlungu. UJesu kazange amkhalale umphostoli wakhe owayesebona angathi sekuphelile ngaye. UJesu wathi esevusiwe wanika uPhetro ithuba lokuthi atshengise ukuthi wayelokhu emthanda. Wamnika umsebenzi wokuthi eluse izimvu zakhe. (Joh. 21:​15-17) UPhetro wavuma ukwenza umsebenzi lo. Kanti njalo wayeseJerusalema ngelanga lePhentekhosti futhi waba ngomunye walabo ababa ngabokuqala ukugcotshwa ngomoya ongcwele. w23.09 22 ¶6-7

Umphostoli uPhetro wakhuthaza abadala wathi: “Yelusani umhlambi kaNkulunkulu.” (1 Phet. 5:​1-4) Nxa ungumdala siyakwazi ukuthi uyabathanda abafowenu labodadewenu futhi uyafuna ukubelusa. Kodwa kwezinye izikhathi ungabona angani ulemisebenzi eminengi kakhulu kumbe uzwe udiniwe okokuthi ngeke wenelise ukwenza umsebenzi lo. Manje ungenzani? Tshela uJehova indlela ozizwa ngayo. UPhetro wathi: “Onceda abanye kakwenze lokho angathi uthembele emandleni avela kuNkulunkulu.” (1 Phet. 4:11) Abafowethu labodadewethu bangabe belenhlupho ezingeke zilunge emhlabeni lo. Kodwa khumbula ukuthi “umelusi omkhulu” uJesu Khristu angabancedisa ukwedlula lokho wena ongenelisa ukukwenza. Angabancedisa khathesi lasemhlabeni omutsha. Lokho uJehova akufunayo ebadaleni yikuthi bathande abazalwane, babeluse futhi babe “yizibonelo emhlambini.” w23.09 29-30 ¶13-14

Kumele sixwaye imibono yabantu bomhlaba lo. Nxa singacabanga njengabantu bomhlaba lo lathi singacina singaselandaba loJehova kanye lemithetho yakhe. (1 Khor. 3:19) Izikhathi ezinengi “ukuhlakanipha komhlaba lo” kwenza abantu baqakathekise kakhulu izinkanuko zabo. Amanye amaKhristu ayehlala ePhegamu leThiyathira ayeseyengwa ngabantu ababehlala emadolobheni lawo ukuthi akhonze izithombe njalo afebe. UJesu wabanika iseluleko esilamandla abantu ababesemabandleni la ngoba basebebona angani ukufeba akukubi kangako. (Isam. 2:​14, 20) Lalamuhla abantu bangasiyenga ukuthi samukele imibono engaqondanga. Abanye emulini kumbe labo esibajayeleyo bangabona angathi siyaziwomisela besebezama ukusiyenga ukuthi sephule imithetho kaJehova. Ngokwesibonelo, abanye bangathi okuqakatheke kakhulu yikulandela okufunwa yinhliziyo yakho, baphinde bathi imithetho eseBhayibhilini emayelana lokuziphatha ayisasebenzi khathesi. Kwezinye izikhathi singabona angathi lokho esikutshelwa nguJehova akwenelanga, mhlawumbe size silingeke ukuthi ‘seqele ngale kwalokho okubhaliweyo.’—1 Khor. 4:6. w23.07 16 ¶10-11

UMariya unina kaJesu wayewadinga sibili amandla ukuze enze umsebenzi ayewuphiwe nguJehova. Phela wayesezazithwala yena engatshadanga. Wayengakaze ondle umntwana kodwa kwasekumele akhulise umntwana owayezakuba nguMesiya. Kungenzeka wayezibuza lokuthi wayezamtshela njani uJosefa ayethandana laye ukuthi uzithwele yena engakaze alale lomuntu. (Luk. 1:​26-33) Manje uMariya wawathola ngaphi amandla? Wadinga uncedo kwabanye. Ngokwesibonelo, wacela uGabriyeli ukuthi amchasisele okunengi ngomsebenzi lowo. (Luk. 1:34) Ngemva kwalokho uMariya wangena indlela wayavakatshela isihlobo sakhe okwakuthiwa ngu-Elizabethi esasihlala “edolobheni lakoJuda elalisezintabeni.” U-Elizabethi wamncoma uMariya njalo uJehova wenza ukuthi akhulume isiphrofetho esamkhuthazayo uMariya esasimayelana lendodana yakhe eyayisesiswini. (Luk. 1:​39-45) UMariya wathi konke uJehova “ukwenze ngengalo yakhe elamandla.” (Luk. 1:​46-51) UJehova wasebenzisa uGabriyeli lo-Elizabethi ukuze aqinise uMariya. w23.10 14-15 ¶10-12

Abafundi bakaKhristu abalutshwana bagcotshwa ngomoya besebethola isibusiso esiqakathekileyo sokuba ngabantwana bakaNkulunkulu. Abafundi laba abangu-144 000 bazakuba ngabaphristi ndawonye loJesu ezulwini. (Isam. 14:1) INdawo Engcwele yethabanikeli imela isibusiso abagcotshiweyo abalaso esokuba ngamadodana kaNkulunkulu besesemhlabeni. (Rom. 8:​15-17) INgcwelengcwele yethabanikeli imela izulu lapho uJehova ahlala khona. ‘Ikhetheni’ elalisehlukanisa iNdawo Engcwele leNgcwelengcwele limela umzimba kaJesu wenyama ngoba wawumvimbela ukuthi angene ezulwini enguMphristi Omkhulu kakhulu ethempelini likaJehova. UJesu wathi esenikele ngomzimba wakhe wenyama ukuthi ube ngumhlatshelo wabantu, wavula indlela yokuthi wonke amaKhristu agcotshiweyo athole ithuba lokuyaphila ezulwini. Lawo kumele atshiye imizimba yawo yenyama ukuze athole umvuzo wokuyaphila ezulwini.—Heb. 10:​19, 20; 1 Khor. 15:50. w23.10 28 ¶13

Ngesikhathi abako-Efrayimi bechothoza uGidiyoni wabaphendula kuhle. (Abahlu. 8:​1-3) Kazange avuke ngolaka. Watshengisa ukuthi uthobekile ngokulalela bemtshela okwakubahlupha wasekhuluma labo kuhle ukuze behlise umoya. Abadala abahlakaniphileyo balingisela uGidiyoni ngokulalelisisa langokuphendula kuhle nxa abanye bebasola. (Jak. 3:13) Nxa bangenza njalo kuzakuba lokuthula ebandleni. Ngesikhathi abantu bedumisa uGidiyoni ngokuthi wanqoba abakoMidiyani, yena wahambisa udumo lonke kuJehova. (Abahlu. 8:​22, 23) Amadoda abekiweyo angamlingisela njani uGidiyoni? Kumele adumise uJehova nxa angaphumelela ukwenza okuthile. (1 Khor. 4:​6, 7) Ngokwesibonelo, nxa abantu bangancoma umdala ngokuthi ufundisa kuhle kakhulu, angabatshela ukuthi lokho abekukhuluma kuvela eLizwini likaNkulunkulu kumbe abatshele ngendlela inhlanganiso kaJehova esifundisa ngayo. Abadala kumele bahlalahlale bacabangisise ngokuthi indlela abafundisa ngayo idumisa uJehova yini kumbe sebefundisela ukuthi babukwe ngabantu. w23.06 4 ¶7-8

Nxa singasakutholanga ebesikuthandazela singazibuza, ‘Ngithandazela into eyiyo yini?’ Izikhathi ezinengi siyabe sizitshela ukuthi siyakwazi okuzasinceda. Kodwa kwezinye izikhathi esikuthandazelayo kungabe kungayisikho okuzasinceda. Phela nxa sithandazela uhlupho oluthile, uJehova angabe elendlela engcono yokululungisa lolohlupho ukwedlula leyo thina ebesiyithandazele. Kanti njalo kwezinye izikhathi esikuthandazelayo kungabe kungahambelani lentando kaNkulunkulu. (1 Joh. 5:14) Ngokwesibonelo, cabanga ngabazali abakhuleka kuJehova becela ukuthi umntanabo angatshiyi ukukhonza. Leso kuzwakala kuyisicelo esiqondileyo sibili, kodwa uJehova akasibambi ngamandla ukuthi simkhonze. Ufuna ukuthi sonke, okugoqela labantwabethu, sizikhethele ukumkhonza. (Dute. 10:​12, 13; 30:​19, 20) Yikho abazali laba babengathandaza becela ukuthi uJehova abancedise bafundise umntanabo ngendlela ezamthinta inhliziyo imenze amthande uJehova futhi abe ngumngane wakhe.—Zaga. 22:6; Efe. 6:4. w23.11 21 ¶5; 23 ¶12

Kungani ukududuza abanye kuyindlela eqakathekileyo yokutshengisa ukuthi siyabathanda? Elinye ibhuku elichasisa iBhayibhili lithi ibala elasetshenziswa nguPhawuli elihunyutshwa ngokuthi ‘ukududuza’ litsho “ukuma eceleni komuntu umkhuthaze ngesikhathi ephakathi kobunzima.” Nxa siduduza umuntu esikhonza laye osebunzimeni siyabe simncedisa ukuthi aqine njalo aqhubeke ehamba endleleni yokuphila. Ngaso sonke isikhathi nxa siduduza abafowethu labodadewethu siyabe sitshengisa ukuthi siyabathanda. (2 Khor. 7:​6, 7, 13) Izikhathi ezinengi umuntu oduduza abanye ngumuntu olozwelo. Kungani sisitsho njalo? Uzwelo yilo olufuqa umuntu ukuthi aduduze abanye njalo adinge indlela zokubancedisa nxa besebunzimeni. Nxa sifuna ukududuza abanye kumele sibe ngabantu abalozwelo. UPhawuli wakuveza ukuthi okwenza uJehova aduduze abanye yikuthi ulozwelo. Wathi uJehova ‘nguYise wesihawu esikhulu loNkulunkulu wenduduzo yonke.’—2 Khor. 1:3. w23.11 9-10 ¶8-10

Bonke nje abalandeli bakaKhristu kumele bakhangelele ukuhlangana lenhlupho. Asixoxeni ngamazwi kamphostoli uPhawuli. Watshela abaseThesalonika wathi: “Siseselani sasihlala silitshela ukuthi sizahlupheka. Lakanye yikho osekwenzakele.” (1 Thes. 3:4) Wabhalela labaseKhorinte wathi: ‘Sifuna lizazi bafowethu inhlupho ezasehlelayo. Sasingasela qiniso lokuthi sizaqhubeka siphila yini.’ (2 Khor. 1:8; 11:​23-27) Lalamuhla amaKhristu angakhangelela ukuthi azahlupheka. (2 Thim. 3:12) Kungenzeka izihlobo labangane bakuphatha ngolunya ngenxa yokuthi ukholwa kuJesu futhi uyamlandela. Wake wahlutshwa yini emsebenzini ngenxa yokuthi uzimisele ukuthembeka kukho konke? (Heb. 13:18) Sewake wahlukuluzwa nguhulumende yini ngenxa yokuthi utshela abanye ngethemba olalo? Kungelani lohlupho ongabe ulalo uPhawuli uthi kumele uthokoze. w23.12 10-11 ¶9-10

UJakhobe wayelenhlupho ezinengi. Amadodana akhe uSimiyoni loLevi enza ihlazo elenza imuli yabo yathwala nzima futhi bangcolisa lebizo likaJehova. Esathi ukubonile lokhu waphinda wafelwa ngumkakhe ayemthanda kakhulu uRasheli ngesikhathi ebeletha indodana yabo yesibili. Kanti njalo, lanxa uJakhobe wayeselixhegu kwasekumele athuthele eGibhithe ngenxa yokuthi indlala yayisibhahile eKhenani. (Gen. 35:​16-19; 37:28; 45:​9-11, 28) Lanxa uJakhobe wehlelwa zinhlupho zonke lezi wayelokhe emthemba uJehova futhi ekholwa ukuthi uzazigcwalisa izithembiso zakhe. UJehova watshengisa ukuthi wayelokhu emthanda uJakhobe. Ngokwesibonelo, uJehova waqhubeka embusisa. Akucabange ukuthi uJakhobe wambonga njani uJehova ngesikhathi ephinda ebona uJosefa indodana yakhe ayesecabanga ukuthi kudala yafa! Okwanceda uJakhobe ukuthi aphumelele ukulwisana lezilingo zonke lezi yikuthi wayelobungane obuqinileyo loJehova. (Gen. 30:43; 32:​9, 10; 46:​28-30) Nxa lathi singahlala singabangane bakaJehova sizaphumelela ukulwisana lenhlupho ezisehlela singalindelanga. w23.04 15 ¶6-7

KuHubo 23 uDavida watshengisa ukuthi uyaqiniseka ukuthi uJehova wayemthanda lokuthi wayemnakekela. Wachasisa ubungane ayelabo loMelusi wakhe uJehova. UDavida wayezizwa evikelekile nxa wayevumela ukuthi uJehova amkhokhele futhi wayethembela kuye ezintweni zonke. Wayekwazi ukuthi uthando lukaNkulunkulu lwaluzamlandela insuku zonke zokuphila kwakhe. Kuyini okwamenza wangakuthandabuzi lokho? UDavida wayekubona ukuthi uJehova wayemnakekela ngenxa yokuthi wayemnika konke ayekudinga. Wayekwazi lokuthi uJehova wayengumngane wakhe lokuthi wayethokoza ngaye. Lokhu kwamenza wangathandabuzi ukuthi lanxa kungaze kwenzakaleni empilweni yakhe uJehova wayezaqhubeka emnika konke akudingayo. UDavida wayekwazi ukuthi uJehova wayemthanda lokuthi wayelendaba laye. Lokhu kwamnceda ukuthi angakhathazeki kodwa athokoze kakhulu futhi asuthiseke.—Hubo. 16:11. w24.01 29 ¶12-13

Kusukela iMpi Yomhlaba Yesibili yaphela, emazweni amanengi kulokuthula njalo oFakazi bakhululekile ukwenza umsebenzi wokutshumayela. Umsebenzi lo uyaphumelela sibili ngoba banengi abantu asebefunde ngoJehova. Lamuhla abafowethu beQula Elikhokhelayo baqhubeka bezama ukulandela konke okutshiwo nguKhristu kukho konke abakwenzayo. Bafuna ukuthi konke abakutshela abazalwane kuvumelane lalokho okufunwa nguJehova loJesu. Basebenzisa ababonisi beziqinti labadala ukuze bakhokhele amabandla. Abadala abagcotshiweyo ‘basesandleni sokudla’ sikaKhristu. (Isam. 2:1) Abadala bayake baphambanise ngoba balesono. UMosi loJoshuwa babeke baphambanise ngezinye izikhathi njalo labaphostoli babeke bawenze amaphutha. (Nani. 20:12; Josh. 9:​14, 15; Rom. 3:23) Lanxa kunjalo uKhristu uyayikhokhela inceku ethembekileyo labadala ababekiweyo futhi uzaqhubeka elabo. Ngakho kumele sibathembe ngenhliziyo yonke labo uJehova ababekileyo ukuthi basikhokhele. w24.02 23-24 ¶13-14

Lathi lamuhla singathokozisa uJehova ngokukhuluma ngaye ngendlela etshengisa ukuthi siyambonga ngakho konke asenzela khona kanye langendlela etshengisa ukuthi siyamthanda kakhulu. Nxa sisekutshumayeleni kumele sihlale sikhumbula ukuthi esikufuna kakhulu yikuncedisa abantu ukuthi basondele kuJehova lokuthi bamthande ngendlela thina esimthanda ngayo. (Jak. 4:8) Kuyasithokozisa ukutshengisa abantu ukuthi uJehova unjani. Ngokwesibonelo ukuthi ulothando, wahlulela kuhle, uhlakaniphile, ulamandla kanye lobunye ubuntu bakhe obuhle. Kanti njalo sidumisa uJehova futhi simthokozise nxa sisenza konke okusemandleni ethu ukuthi simlingisele. Nxa singenza njalo siyabe sitshengisa ukuthi asifanani ngitsho labantu bomhlaba lo abenza okubi. Abantu bangawubona umehluko lo besebezibuza ukuthi kuyini okwenza singafanani labanye. (Mat. 5:​14-16) Nxa sihlangana labo singathola ithuba lokuthi sibachasisele ukuthi kuyini okwenza siziphathe ngendlela esiziphatha ngayo. Lokhu kwenza abantu abaqotho bafune ukusondela kuNkulunkulu wethu. Nxa sidumisa uJehova ngezindlela lezi siyabe sisenza ukuthi athokoze.—1 Thim. 2:​3, 4. w24.02 10 ¶7

Ukufunda imisebenzi ongayenza empilweni kuzakwenza uthuthuke. Lokho kuzakunceda ukuthi uyenze kuhle imisebenzi oyiphiwayo ebandleni lokuthi uthole umsebenzi ozakunceda uzinakekele wena kanye lemuli yakho. Kanti njalo kuzakunceda ube lobudlelwano obuhle labanye. Ngokwesibonelo, funda ukubala lokubhala. IBhayibhili lithi nxa indoda ifuna ukuthokoza lokuphumelela kumele izinike isikhathi sokubala iLizwi likaNkulunkulu njalo icabangisise ngekubalayo. (Hubo. 1:​1-3) Nxa ingabala iBhayibhili nsuku zonke izazwisisa ngcono indlela uJehova acabanga ngayo. Lokhu kuzayinceda ukuthi ikhaliphe futhi yenelise ukusebenzisa lokho ekufundayo empilweni yayo. (Zaga. 1:​3, 4) Abafowethu labodadewethu bayancedakala kakhulu nxa ebandleni kulamadoda enelisa ukufundisa kuhle futhi anika izeluleko ezivela eBhayibhilini. Nxa ukwazi ukubhala lokubala uzenelisa ukulungiselela izinkulumo lezimpendulo ezizanceda abanye njalo ziqinise ukholo lwabo. Uzenelisa lokubhala imicijo oyitholileyo ezakunceda ukuthi uqinise ukholo lwakho futhi ukhuthaze labanye. w23.12 26-27 ¶9-11

Nxa ungezwa usesaba, cabangisisa ngalokho uJehova azakwenza esikhathini esizayo uSathane engasekho. Emhlanganweni wesabelo ka-2014 kwakulomboniso owasitshengisa ubaba owayexoxa lemuli yakhe ngokuthi amazwi aku-2 Thimothi 3:​1-5 nxa engabhalwa ekhuluma ngokuthi impilo izabe isinjani ePharadayisi angabekwa njani. Wathi: “Emhlabeni omutsha kuzakuba lezikhathi zentokozo ngoba abantu bazabe bethandana, bethanda ukukhonza, bezithoba, bezehlisa, bedumisa uNkulunkulu, belalela abazali, bebonga, beqotho, bezithanda kakhulu imuli zabo, befuna isivumelwano, bekhuluma kuhle ngabanye, bezikhuza, bemnene, bethanda okuhle, bethembekile, bengelankani, bengazikhukhumezi, bethanda uNkulunkulu ukwedlula injabulo futhi bezinikele kuye. Woba lobudlelwano labantu abanjalo.” Uyake uxoxe yini labangakini kumbe labanye okhonza labo ngokuthi impilo izabe isinjani emhlabeni omutsha? w24.01 6 ¶13-14

Kuyasikhuthaza kakhulu ukwazi ukuthi uJehova uyathokoza ngabo bonke abantu bakhe. Phela iBhayibhili lithi: “UJehova uyathokoza ngabantu bakhe.” (Hubo. 149:4) Kodwa ngezinye izikhathi nxa abanye bedanile bayathandabuza ukuthi uJehova uyathokoza ngabo. EBhayibhilini kukhulunywa ngabantu abanengi ababekhonza uJehova bethembekile ababeke bathandabuze ukuthi uJehova uyabathanda. (1 Sam. 1:​6-10; Jobe. 29:​2, 4; Hubo. 51:11) IBhayibhili likubeka kucace ukuthi abantu abalesono bangenelisa ukumthokozisa uJehova. Singakwenza njani lokho? Kumele sibe lokholo kuJesu uKhristu njalo sibhabhathizwe. (Joh. 3:16) Nxa sisenza njalo siyabe sitshengisa abanye ukuthi sesiphendukile ezonweni zethu lokuthi sesithembise uNkulunkulu ukuthi sizakwenza intando yakhe. (Imiseb. 2:38; 3:19) UJehova uyathokoza nxa sisenza lokhu ngoba kwenza sisondele kuye. Uzasamukela futhi asibone singabangane bakhe nxa singenza konke okusemandleni ethu ukuthi sigcine isifungo esasenzayo ngesikhathi sizinikela kuye.—Hubo. 25:14. w24.03 26 ¶1-2

Nxa iziphathamandla zingathi siyekele ukutshumayela, singalingisela abalandeli bakaJesu ngokuqhubeka sitshumayela. Asithandabuzi ukuthi uJehova uzasincedisa siqhubeke sitshumayela. Yikho thandaza kuye umcele akunike isibindi lokuhlakanipha njalo akuncedise nxa ulenhlupho. Ngobunengi bethu kulenhlupho esihlangana lazo. Abanye bayagula, abanye balezinto ezibakhathazayo, abanye bangabe bafelwe, abanye belenhlupho emulini futhi abanye bangabe behlukuluzwa. Kanti njalo okunye okwengezelela inhlupho zethu yizimpi kanye lemikhuhlane ememethekayo. Kuyini okungakunceda ukuthi ulwisane lenhlupho lezi? Tshela uJehova konke okusenhliziyweni yakho, mtshele konke okwenzakalayo ngendlela obungatshela ngayo umngane wakho omthembileyo futhi ungathandabuzi ukuthi “uzakusiza.” (Hubo. 37:​3, 5) Ukuhlala sithandaza kuzasinceda ukuthi ‘siqinisele ebunzimeni.’ (Rom. 12:12) UJehova uyakwazi konke okwenzakala ebantwini bakhe futhi “uyakuzwa ukukhala kwabo becela uncedo” kuye.—Hubo. 145:​18, 19. w23.05 5-6 ¶12-15

Nxa kulezinqumo eziqakathekileyo okumele sizenze kumele sidinge “lokho okuyintando kaJehova” ukuze senze izinqumo ezihambelana layo. (Efe. 5:17) Nxa singadinga izimiso eziseBhayibhilini singakenzi isinqumo siyabe sitshengisa ukuthi sifuna ukwenza izinto ezihambelana lendlela uJehova acabanga ngayo. Sizenelisa ukwenza izinqumo ezinhle nxa singasebenzisa izimiso zakhe. Isitha sethu uSathane obizwa langokuthi ‘ngomubi,’ ufuna sigijimisane lezinto zomhlaba ukuze sisale singaselasikhathi sokwenza izinto eziphathelane lokukhonza uNkulunkulu. (1 Joh. 5:19; amabala angaphansi) UmKhristu angaqalisa ukuqakathekisa imali, imfundo kumbe umsebenzi kulokuthi adinge izindlela angathuthukisa ngazo inkonzo yakhe. Nxa angenza njalo uyabe etshengisa ukuthi usecabanga njengabantu bomhlaba lo. Akulalutho olubi ngezinto lezi kodwa akumelanga siziqakathekise kakhulu ukwedlula ukukhonza uJehova. w24.03 24 ¶16-17