December

UJehova ulawo yini amandla okuvusa abantu abafileyo? Ye ulawo sibili! Phela ‘unguSomandla.’ (Isam. 1:8) Lokhu kutsho ukuthi ulamandla okunqoba loba yisiphi isitha, ngitsho lokufa. (1 Khor. 15:26) Okunye okwenza sikholwe ukuthi uNkulunkulu uyenelisa ukubavusa abafileyo yikuthi ingqondo yakhe ibanzi, uyenelisa ukukhumbula yonke into. Ubiza inkanyezi ngayinye ngebizo layo. (Isaya. 40:26) Ngakho uyabakhumbula bonke abantu abafayo. (Jobe. 14:13; Luk. 20:38) Akumthwalisi nzima ukukhumbula konke okumayelana labantu azabavusa ngoba ukwazi konke ngabo. Uyakwazi ukuthi babenjani, uyabazi ubuntu babo, lokwenzakala ezimpilweni zabo kanye lakho konke okwakusezingqondweni zabo. Kulengqondo ukukholwa ukuthi uJehova uzabavusa abantu abafileyo ngoba ulesifiso sokubavusa futhi ulawo amandla okukwenza. Esinye isizatho esenza sikukholwe ukuthi uNkulunkulu uzabavusa abantu abafileyo yikuthi sewake wakwenza lokho. Wake wanika amanye amadoda ayethembekile amandla okuthi avuse abantu abafileyo. Omunye wabo kwakunguJesu. w23.04 9-10 ¶7-9

Nxa singaba mnene sikhulume kuhle labantu, bangazimisela ukulalela besesiqhubeka ngengxoxo. Lanxa kunjalo akumelanga sizihluphe ngokuphendula umuntu ophungusiphikisa nje loba ochothoza lokho esikukholwayo. (Zaga. 26:4) Kodwa kukalutshwana ukuhlangana lomuntu onjalo, izikhathi ezinengi abantu bayalalela. Kuyacaca ukuthi kuqakatheke kakhulu ukuthi sifunde ukuba ngabantu abamnene. Khuleka kuJehova ucela ukuthi akuncedise ube mnene nxa uphendula imibuzo enzima kumbe uphendula umuntu ochothoza lokho esikukholwayo. Khumbula ukuthi ukuba mnene kungakunceda ukuthi uqhubeke ukhuluma kuhle lomunye umuntu lanxa lilemibono etshiyeneyo. Kanti njalo nxa ungaba mnene futhi uphendule kuhle, umuntu oxoxa laye angacina esekuhlonipha futhi esefuna ukufunda iBhayibhili. Kumele ‘sihlale sikulungele ukuvikela’ lokho esikukholwayo ‘kodwa sikwenze ngobumnene langenhlonipho enkulu.’ (1 Phet. 3:15) Kasizimiseleni ukuba mnene ngaso sonke isikhathi! w23.09 19 ¶18-19

Ake sixoxe ngezinto ezine esingazenza ukuze kukhanye ukuthi siyabekezela. Okokuqala, umuntu obekezelayo uyaphuza ukuthukuthela. Nxa angaqalwa kavuki ngolaka futhi kaphindiseli. Kanti njalo nxa kulento emkhathazayo kaphathi abanye kubi. (Eks. 34:6) Okwesibili, umuntu obekezelayo uyenelisa ukulinda ehlalisekile. Nxa kuyikuthi into abeyilindele isiphuzile, katatazeli njalo kacaphuki. (Mat. 18:​26, 27) Okwesithathu, umuntu obekezelayo kalamawala. Nxa kulomsebenzi oqakathekileyo okumele wenziwe, umuntu obekezelayo kabi lamawala ahle awudumele futhi kawenzi egijima. Uyazinika isikhathi sokuhlela ukuthi uzawenza njani futhi abesezinika isikhathi eseneleyo sokuwenza. Okwesine, nxa umuntu obekezelayo angehlelwa yibunzima uyaqinisela engakhononi. Wenza konke okusemandleni akhe ukuthi aqhubeke eqinisela njalo engalahli ithemba. (Kol. 1:11) AmaKhristu kumele azenze izinto lezi ezine ukuze kukhanye ukuthi ayabekezela. w23.08 20-21 ¶3-6

Isizatho esiqakathekileyo esenza sivikele izinhliziyo zethu ngesokuthi uJehova uyayihlola inhliziyo. Nxa abantu besikhangele bangasibona simsulwa, kodwa uJehova nguye okwaziyo ukuthi sinjani sibili ngaphakathi. Uzasithanda nxa singagcwalisa izingqondo zethu ngokuhlakanipha kwakhe okuzasinceda ukuthi siphile kuze kube nini lanini. (Joh. 4:14) Lokhu kuzasinceda ukuthi singaphanjaniswa nguSathane lomhlaba wakhe sicine sesiziphatha kubi. (1 Joh. 5:​18, 19) Nxa singasondela eduze loJehova sizamthanda futhi simhloniphe kakhulu. Sizazonda loba yiwuphi umcabango wokuthi senze isono ngoba siyabe singafuni ukuzwisa uBaba wethu ubuhlungu. Omunye udade waseCroatia okuthiwa nguMarta wayeselingeka ukuthi aziphathe kubi. Wabhala wathi: “Kwakunzima ukuthi ngicabange kuhle kumbe ukuthi ngilwisane lesifiso sokwenza isono ngikholise okwesikhatshana. Kodwa ukwesaba uJehova kwangivikela.” Kwamvikela njani? UMarta uthi wacabangisisa ngokuthi nxa wayengaziphatha kubi wayezazithela emanyaleni. Lathi singenza njengaye. w23.06 20-21 ¶3-4

UJesu wayekwazi ukuthi inhloso kaJehova yayingeyokuthi angcwelise ibizo lakhe, abe leqiniso lokuthi wonke amanga akhulunywa ngoJehova ayavezwa egcekeni. Yikho wafundisa abalandeli bakhe ukuthi bathandaze bathi: “Baba wethu osezulwini, kalingcweliswe ibizo lakho.” (Mat. 6:9) UJesu wayekuzwisisa ukuthi indaba yokungcweliswa kwebizo likaJehova yiyo eqakatheke ukwedlula zonke ezulwini lasemhlabeni. UJesu wenze umsebenzi omkhulu kakhulu wokungcwelisa ibizo likaJehova ukwedlula loba ngubani ezulwini lasemhlabeni. Kodwa wathi esebotshiwe izitha zakhe zammangalela ngokuthi uthuka uNkulunkulu. UJesu wayekwazi mhlophe ukuthi ukungcolisa ibizo likaYise elingcwele lokukhuluma kubi ngaye kwakuyisono esikhulu kakhulu. Yikho engakabotshwa kwakumkhathaza kakhulu ukuthi wayezamangalelwa ngokuthi uthuke ibizo likaNkulunkulu. Lokhu yikho okungabe kwenza uJesu ‘wezwa ubuhlungu obukhulu’ ngesikhathi esezabotshwa.—Luk. 22:​41-44. w24.02 11 ¶11

Emncintiswaneni wokuphila esikuwo kumele sithande uJehova loJesu ukwedlula izihlobo zethu. (Mat. 10:37) Kodwa lokho akutsho ukuthi sekumele siyekele ukwenza izinto okumele sizenzele imuli zethu sisithi ziyasiphambanisa ukuthi sithokozise uNkulunkulu loKhristu. Nxa sifuna ukubathokozisa akumelanga sibalekele imithwalo esilayo emulini. (1 Thim. 5:​4, 8) Nxa singenza njalo sizathokoza kakhulu. UJehova uyakwazi ukuthi okwenza imuli zithokoze yikuthi indoda lomkayo bathandane futhi bahloniphane, abazali babathande abantwababo futhi babakhulise kuhle kanye lokuthi abantwana babahloniphe abazali babo. (Efe. 5:33; 6:​1, 4) Kungelani lokuthi ungubaba, ungumama kumbe ungumntwana, themba lokho okutshiwo liBhayibhili kulokuthi wenze lokho okubona angathi kuqondile. Kanti njalo ungalandeli amasiko lalokho okutshiwo yizazi zomhlaba lo. Bala amabhuku ethu asekelwe eBhayibhilini futhi ukusebenzise lokho okubala kuwo. Azakunceda ubone ukuthi ungazisebenzisa njani izimiso eziseBhayibhilini. w23.08 28 ¶6-7

Owesifazana ongumKhristu kumele afunde ukwenza izinto kanye lemisebenzi ezamnceda empilweni. Ezinye izinto umntwana oyinkazana azifunda esasemncane zingamnceda okwempilo yakhe yonke. Ngokwesibonelo, funda ukubhala lokubala. Kwezinye indawo bathi akuqakathekanga ukuthi abantu besifazana bafunde ukubhala lokubala. Kodwa kuqakathekile ukuthi wonke amaKhristu abekwazi ukubhala lokubala. (1 Thim. 4:13) Lanxa kungaba nzima, ungavumeli lutho lukuyekelise ukufunda ukubhala lokubala. Kuzakunceda ngani? Ukufunda izinto lezi kungakunceda ukuthi uthole umsebenzi. Kuzakunceda lokuthi wenelise ukubala iBhayibhili kanye lokulifundisa abanye. Okuhle kakhulu yikuthi ukubala iLizwi likaNkulunkulu lokucabangisisa ngalo kuzakunceda ukuthi usondele kakhulu kuye.—1 Thim. 4:15. w23.12 20 ¶10-11

Cela ukuthi uJehova akuncedise unqobe izilingo. Kumele sihlale silwisa ukuthi singenzi izinto ezimbi ngoba singabantu abalesono. USathane laye usebenza nzima ukuthi asilinge. Usebenzisa indlela zokuzilibazisa ezingcolileyo ukuze aphambanise indlela esicabanga ngayo. Ukuzilibazisa okunjalo kwenza ukuthi sihlale sicabanga izinto ezingcolileyo ezingenza ukuthi sibe ngabangcolileyo phambi kukaNkulunkulu, mhlawumbe size senze lesono esikhulu. (Mak. 7:​21-23; Jak. 1:​14, 15) Nxa sifuna ukunqoba isilingo sokwenza okungalunganga kumele sicele ukuthi uJehova asincedise. Yikho loJesu waze wathi nxa sithandaza sithi: “Ungasingenisi ekulingweni kodwa usikhulule komubi.” (Mat. 6:13) UJehova uyafuna sibili ukuthi asincedise kodwa kumele simcele. Kanti njalo kumele senze lokho esiyabe sikuthandazele. w23.05 6-7 ¶15-17

Nxa abatshadileyo bemthanda uJehova kuzakuba lula ukuthi benze lokho akutshoyo. Nxa bangenza njalo kuzabanceda ukuthi balwisane lenhlupho ezingenza ukuthi uthando lwabo luphele. Abangane bakaJehova benza okusemandleni abo ukuthi bamlingisele. Ngokwesibonelo, bayazama ukuba ngabantu abalomusa, ababekezelayo futhi abathethelelayo. (Efe. 4:32–5:1) Nxa abatshadileyo belobuntu lobu kubalula ukuthi uthando lwabo luqhubeke luvutha. Udadewethu okuthiwa nguLena oseleminyaka edlula 25 etshadile uthi, “Nxa umuntu emthanda uJehova kulula ukuthi umhloniphe futhi umthande.” Ake sixoxe ngabanye ababetshadile okukhulunywa ngabo eBhayibhilini. Kungani uJehova wakhetha uJosefa loMariya phakathi kwabo bonke abosendo lukaDavida ukuthi kube yibo abazali bakaMesiya? Ngamunye wabo wayelobudlelwano obuqinileyo loJehova futhi uJehova wayekwazi ukuthi nxa sebetshadile babezaqakathekisa ukumkhonza ukwedlula loba yini. w23.05 21 ¶3-4

UMkhokheli wethu uJesu kalasono kodwa abazalwane abakhethileyo ukuthi bakhokhele ebandleni bona balaso. Ngakho kungaba nzima ukuthi sibalalele ikakhulu nxa lokho abasitshela khona sisizwa kungatsho ukuthi sikulalele. Umphostoli uPhetro laye kwake kwamthwalisa nzima ukulalela. Ingilosi yathi imtshela ukuthi adle inyama yezinyamazana okwakuthiwa zingcolile eMthethweni kaMosi wala, hatshi kanye kodwa kathathu. (Imiseb. 10:​9-16) Wayalelani? Lokho ayekutshelwa wayengakuzwisisi. Kodwa umphostoli uPhawuli yena walalela amadoda amadala ayeseJerusalema athi athathe amadoda amane aye lawo ethempelini bayezihlambulula belandela lokho okwakutshiwo nguMthetho kaMosi ukuze atshengise ukuthi laye wayesawulalela uMthetho. UPhawuli wayekwazi ukuthi amaKhristu ayengasekho ngaphansi koMthetho futhi wayengenzanga lutho olubi. Lanxa kunjalo uPhawuli ‘wathatha amadoda lawo ngelanga elilandelayo, wazihlambulula ngokoMthetho kaMosi kanye lawo.’ (Imiseb. 21:​23, 24, 26) Ukulalela kukaPhawuli kwenza ukuthi kube lokumanyana ebandleni.—Rom. 14:​19, 21. w23.10 10 ¶15-16

Ngeke ucabange ukuthi kumele umesabe umngane wakho ukuze libe lobudlelwano obuhle. Kodwa labo abafuna ukuba ngabangane abakhulu bakaJehova kumele ‘bamesabe.’ Kungelani lokuthi silesikhathi esinganani sikhonza uJehova, sonke kumele simesabe. Kodwa kutshoni ukwesaba uNkulunkulu? Umuntu oyesaba uNkulunkulu uyamthanda futhi kafuni ukwenza loba yini engaphambanisa ubungane bakhe laye. Leyo yiyo indlela uJesu ‘ayemesaba ngayo uNkulunkulu.’ (Heb. 5:7) Wayengamesabi okokuthuthumela uJehova. (Isaya. 11:​2, 3) Kodwa wayemthanda kakhulu futhi ezimisele ukumlalela. (Joh. 14:​21, 31) Lathi siyamhlonipha kakhulu uJehova njengoJesu ngoba ulothando, uhlakaniphile, wahlulela kuhle futhi ulamandla. Siyakwazi lokuthi uJehova uyasithanda lokuthi ulendaba lokuthi senzani ngalokho asifundisa khona. Nxa singamlalela uyathokoza ngathi kodwa nxa singamlaleli uyezwa ubuhlungu.—Hubo. 78:41; Zaga. 27:11. w23.06 14 ¶1-2; 15 ¶5

INkosi u-Uziya yathi isilamandla yakhohlwa ukuthi uJehova nguye owayeyenze yaphumelela futhi yaba lamandla. Sifundani? Kumele sihlale sikhumbula ukuthi uJehova nguye osiphe izinto zonke ezinhle esilazo kanye lemisebenzi yenkonzo esingabe siyenza. Ngakho akumelanga sizitshaye isifuba ngalokho esiyabe senelise ukukwenza kodwa kumele sidumise uJehova. (1 Khor. 4:7) Kumele sizithobe sivume ukuthi silesono njalo sivume ukuqondiswa. Omunye umfowethu oleminyaka engaba ngu-60 wathi: “Sengafunda ukungazondi nxa abanye bengitshengisa amaphutha ami. Nxa ngingaphiwa iseluleko ngamaphutha engiyabe ngiwenzile, ngiyazama ukulungisisa besengiqhubeka ngikhonza uJehova ngenhliziyo yonke.” Iqiniso yikuthi izinto zizasihambela kuhle empilweni nxa singamesaba uJehova njalo sihlale sithobekile.—Zaga. 22:4. w23.09 10 ¶10-11

AmaKhristu akuqala kwakumele aqinisele. Phezu kwenhlupho ezehlela bonke nje abantu, wona ayelezinye inhlupho ngenxa yokuba ngamaKhristu. Amanengi ayehlukuluzwa ngabakhokheli benkolo abangamaJuda, leziphathamandla ezingamaRoma, aphinde ahlukuluzwe zimuli zawo. (Mat. 10:21) Kanti njalo kwezinye izikhathi ebandleni ayesebenza nzima ukuze angacini esethatheka ngabahlamuki kanye lemfundiso zawo ezazisehlukanisa ibandla. (Imiseb. 20:​29, 30) Kodwa amaKhristu la aqinisela. (Isam. 2:3) Kuyini okwawancedayo? Acabangisisa ngabanye abantu okukhulunywa ngabo eBhayibhilini abaqiniselayo, ngokwesibonelo uJobe. (Jak. 5:​10, 11) Bathandaza becela ukuthi uJehova abanike amandla. (Imiseb. 4:​29-31) Kanti njalo ababecabanga ngakho kakhulu ngumvuzo ababezawunikwa nguJehova nxa bangaqhubeka beqinisela. (Imiseb. 5:41) Lathi singafunda ukuqinisela nxa singahlala sibala ngabantu abaqiniselayo okukhulunywa ngabo eBhayibhilini lasemabhukwini ethu besesicabangisisa ngabo. w23.07 3 ¶5-6

UJehova loJesu kabasoze basikhalale. Umphostoli uPhetro wathi esephike uKhristu, waba phakathi kobunzima ngoba kwasekumele enze isinqumo esiqakathekileyo. Wayezakhalala yini kumbe wayezaphikelela aqhubeke engumlandeli kaKhristu? UJesu wayethandaze kuJehova encenga ukuthi ukholo lukaPhetro lungapheli. Watshela uPhetro ukuthi wayemthandazele futhi wayengathandabuzi ukuthi uPhetro wayezawenza kuhle umsebenzi wokuqinisa abafowabo. (Luk. 22:​31, 32) Kumele ukuthi kwamqinisa kakhulu uPhetro ukukhumbula amazwi kaJesu. Nxa lathi sekumele senze isinqumo esiqakathekileyo empilweni, uJehova angasebenzisa abelusi abalothando ukuthi basikhuthaze siqhubeke sithembekile. (Efe. 4:​8, 11) UJehova uzasinika lokho esikudingayo nxa singaqakathekisa inkonzo ukwedlula zonke izinto, njengoba nje wanika uPhetro labanye abaphostoli lokho ababekudinga. w23.09 24-25 ¶14-15

UJehova uyakunanzelela konke okuhle esikwenzela abanye lanxa kungakhanya angathi kuncane futhi ukubona kungumnikelo oqakathekileyo lanjengesikwelede okuyabe sekumele asibhadale. Nxa wake waba yinceku ekhonzayo kumbe umdala, uJehova uyawukhumbula umsebenzi owamenzela wona njalo uyakwazi lokuthi wawuwenza ngoba umthanda. (1 Khor. 15:58) Uyakubona lokuthi khathesi ulokhu ulothando. UJehova ufuna ukuthi uthando lwethu luqhubeke lukhula. Ufuna simthande kakhulu futhi sibathande kakhulu labanye. Okuzasinceda ukuthi siqhubeke simthanda kakhulu uJehova yikubala iLizwi lakhe langokucabangisisa ngalo langokuthandaza kuye zikhathi zonke. Singatshengisa ukuthi siyabathanda kakhulu abafowethu labodadewethu ngokudinga izindlela esingabancedisa ngazo. Nxa uthando lwethu luqhubeka lukhula, sizasondela kakhulu kuJehova lakubafowethu labodadewethu njalo ubungane lobo buzahlala kuze kube nini lanini! w23.07 10 ¶11; 11 ¶13; 13 ¶18

UmKhristu ngamunye kumele azikhethele indlela afuna ukwelatshwa ngayo. Nxa umKhristu ekhetha indlela azakwelatshwa ngayo, kulemithetho emilutshwana eseBhayibhilini okumele ayilandele. Ngokwesibonelo kulomthetho wokuthi akumelanga afakwe igazi lokuthi akumelanga azingenise esidimonini. (Imiseb. 15:20; Gal. 5:​19, 20) Kodwa kwezinye izinto ezinenginengi umuntu uyazikhethela ukuthi uzakwelatshwa njani. Lanxa kulendlela yokwelatshwa esibona angathi yiyo eqondileyo, kumele sikwazi ukuthi abafowethu labodadewethu balelungelo lokuzikhethela indlela abelatshwa ngayo futhi kumele sihloniphe lokho abakukhethayo. Ngakho nanku okumele sihlale sikukhumbula: (1) UMbuso kaNkulunkulu yiwo kuphela ozasusa yonke imikhuhlane usenze sibe lempilakahle. (Isaya. 33:24) (2) UmKhristu ngamunye kumele ‘aqiniseke’ ukuthi lokho akukhethayo yikho okuzamnceda. (Rom. 14:5) (3) Akumelanga sahlulele abanye kumbe senze izinto ezizakwenza bakhubeke. (Rom. 14:13) (4) AmaKhristu kumele abe lothando futhi angenzi ukuthi lokho akukhethayo kucine kusenza ukuthi kube lokwehlukana ebandleni.—Rom. 14:​15, 19, 20. w23.07 24 ¶15

Ukubona kuligugu yini ukuthi ungumngane kaJehova? Akuthandabuzwa ukuthi uyabuqakathekisa ubungane bakho laye! Kusukela kudala banengi abantu ababekuqakathekisa ukuba ngabangane bakaJehova. (Hubo. 104:​33, 34) Abanengi badela ezinye izinto ukuze bakhonze uJehova. Lokhu yikho okwakusenziwa ko-Israyeli wasendulo ngabantu okwakuthiwa ngamaNaziri kumbe abehlukaniswe kwabanye. AmaNaziri kwakungama-Israyeli akhutheleyo ayezidela ukuze akhonze uJehova ngendlela ehlukene leyabanye. UMthetho kaMosi wawuvumela ukuthi amadoda kumbe abesifazana benze isifungo esiqakathekileyo esokuba ngamaNaziri okwesikhathi esithile. (Nani. 6:​1, 2) Um-Israyeli owayesenza isifungo leso kwakumele alandele eminye imithetho eyayitshiyene laleyo eyayilandelwa ngamanye ama-Israyeli. Manje kuyini okwakungenza um-Israyeli akhethe ukuba ngumNaziri? Kumele ukuthi wayeyabe efuqwa yikuthanda uJehova futhi efuna ukutshengisa ukuthi uyambonga ngezibusiso ezinengi amupha zona.—Dute. 6:5; 16:17. w24.02 14 ¶1-2

Ibala lesiHebheru elihunyutshwe ngokuthi “ukuba qotho” kumbe “uthando oluqotho” eBhayibhilini litsho ukunamathela emuntwini omthandayo ungamtshiyi loba sekutheni. Lijayele ukusetshenziswa nxa kukhulunywa ngendlela uJehova athanda ngayo izinceku zakhe. Ibala lelo liphinda lisetshenziswe nxa kukhulunywa langendlela izinceku zikaNkulunkulu ezithandana ngayo. (2 Sam. 9:​6, 7) Ngokuhamba kwesikhathi siyabe silokhu sithuthukisa indlela esitshengisa ngayo ukuthi siqotho. Ake sibone ukuthi uDanyeli wakwenza njani lokho. UDanyeli wahlangana lezilingo ezinengi ezazidinga ukuthi atshengise ukuthi uqotho kuJehova. Kodwa isilingo esikhulu kakhulu samehlela esedlule iminyaka engu-90. Iziphathamandla ezazisebenza esigodlweni zazingamthandi uDanyeli futhi zazingamhloniphi loNkulunkulu ayemkhonza. Ngakho zabumba icebo elalizakwenza ukuthi uDanyeli abulawe. Zenza inkosi yafaka umthetho owawuzatshengisa ukuthi uDanyeli wayezaqhubeka eqotho kuNkulunkulu wakhe yini kumbe wayezakuba qotho enkosini. Kwakumele uDanyeli ayekele ukuthandaza kuJehova okwamalanga angu-30 ukuze kukhanye ukuthi uqotho enkosini. UDanyeli kazange akwenze lokho.—Dan. 6:​12-15, 20-22. w23.08 5 ¶10-12

UJehova ufuna singakhalali ukubathanda abafowethu labodadewethu. Nxa omunye angehluleka ukutshengisa obunye ubuntu obuhle obunjengobukaKhristu singakuthatha ngokuthi ubefuna sibili ukulandela izimiso eziseBhayibhilini kodwa wasuka wakhutha ugatsha. (Zaga. 12:18) UNkulunkulu uyazithanda izinceku zakhe ezithembekileyo lanxa ziphambanisa kwezinye izikhathi. Uyaqhubeka engumngane wethu futhi kahlali esizondele lanxa siphambanisa. (Hubo. 103:9) Kuqakatheke kakhulu ukuthi lathi simlingisele uBaba wethu osezulwini othethelelayo. (Efe. 4:32–5:1) Khumbula lokuthi kuzamele sihlale siseduze labafowethu labodadewethu njengoba ukuphela sekusondele. Sikhangelele ukuthi sizahlukuluzwa kakhulu. Singazithola sesisejele sibotshelwe ukukhonza uJehova. Nxa lokhu kungenzakala siyabe sesikudinga kakhulu ukuncediswa ngabafowethu labodadewethu.—Zaga. 17:17. w24.03 15-16 ¶6-7

IMibhalo isitshela ngabasakhulayo abasondela kuJehova, baba ngabangane bakhe futhi izinto zabahambela kuhle. Omunye wabo nguDavida. Esasemncane wahle wakhetha ukuba ngumngane kaNkulunkulu futhi ngokuhamba kwesikhathi waba yinkosi ethembekileyo. (1 Amakho. 3:6; 9:​4, 5; 14:8) Ukubala ngoDavida uhlola impilo yakhe kungakunceda ukuthi lawe ukhonze uJehova uthembekile. Okunye ongakwenza yikufunda ngempilo kaMakho kumbe ekaThimothi. Baqalisa ukukhonza uJehova bebancane futhi baqhubeka bengabangane bakhe. Lokhu kwenza uJehova wathokoza futhi izinto zabahambela kuhle sibili. Ukuthi izinto zizakuhambela njani esikhathini esizayo kuzakuya ngokuthi wenzani khathesi usesemutsha. Nxa ungathembela kuJehova kulokuthi uzithembe wena, yena uzakuncedisa ukuthi wenze izinqumo ezinhle. Uzathokoza empilweni futhi uphumelele. Hlala ukhumbula ukuthi uJehova uyakuqakathekisa lokho omenzela khona. Kambe ikhona yini into engcono ongayenza ngaphandle kokukhonza uJehova uBaba wethu olothando? w23.09 13 ¶18-19

Umphostoli uPhawuli wayekwazi ukuthi abafowabo labodadewabo abangamaKhristu bazelwe belesono. Ngokwesibonelo, wathi esanda kuba ngumKhristu abanye ebandleni leJerusalema babengakholwa ukuthi usengumfundi. (Imiseb. 9:26) Ngokuhamba kwesikhathi kwaba labanye ababekhuluma kubi ngaye besenzela ukungcolisa ibizo lakhe. (2 Khor. 10:10) UPhawuli wake wabona omunye umzalwane owayekhokhela esenza into engalunganga eyayingakhuba abanye. (Gal. 2:​11, 12) Kanti njalo omunye umngane wakhe okuthiwa nguMakho wenza into eyamdanisayo. (Imiseb. 15:​37, 38) UPhawuli wayengabaninela khatshana abantu bonke laba ababesenza izinto ezazimdanisa. Kodwa kazange abazondele abafowabo labodadewabo futhi kazange akhalale ukukhonza uJehova. Kuyini okwamnceda ukuthi angakhalali? UPhawuli wayebathanda abafowabo labodadewabo. Lokhu kwamnceda ukuthi angakhangeli amaphutha ababewenza kodwa akhangele ubuntu obuhle ababelabo. Uthando uPhawuli ayelalo lwamnceda ukuthi enze lokho okutshiwo embhalweni walamuhla. w24.03 15 ¶4-5

IBhayibhili likhuluma ngabantu abanengi ababemnene futhi lokho kutshengisa ukuthi ukuba mnene kuqakathekile. Omunye wabo ngu-Isaka. Wathi esehlala eGerari elizweni lamaFilisti, omakhelwane bakhe abalomona bagqibela yonke imithombo eyayigejwe yizisebenzi zikayise kodwa u-Isaka kazange atshone elwela imithombo le. Yena lemuli yakhe basuka kuleyondawo futhi bafika bagebha eminye imithombo lapho abayakhona. (Gen. 26:​12-18) Kodwa amaFilisti athi imithombo leyo layo yayingeyawo. Lanxa kunjalo u-Isaka kazange alwisane lawo. (Gen. 26:​19-25) Kuyini okwamnceda ukuthi ahlale emnene lanxa abanye babezimisele ukuqhubeka belwisana laye? Kumele ukuthi wafunda kulokho okwakusenziwa ngabazali bakhe. Ngokwesibonelo u-Abrahama wayekuthanda ukuthula njalo uSara ‘wayelokuthula lomoya omnene.’—1 Phet. 3:​4-6; Gen. 21:​22-34. w23.09 15 ¶4

UJehova wathuma iNdodana yakhe ayithandayo ukuthi ibuye emhlabeni izofundisa abantu ngoMbuso wakhe njalo isikhulule esonweni lasekufeni. UJesu wavuswa wabuyela ezulwini wayakuba yiNkosi yoMbuso kaNkulunkulu. Umlayezo oqakathekileyo oseBhayibhilini ngowokungcweliswa kwebizo likaJehova kanye lokuthi uzayigcwalisa njani inhloso yakhe ngomhlaba. Lokho uNkulunkulu akuhlosileyo akutshintshi. Uthembise ukuthi akukhulumileyo kuzagcwaliseka. (Isaya. 46:10; Heb. 6:​17, 18) Sekuseduze ukuthi umhlaba utshintshwe ube lipharadayisi lapho okuzahlala khona abantu abangelasono ‘bekholisa impilo kuze kube nini lanini.’ (Hubo. 22:26) Kulokunye futhi uJehova azakwenza. Uzakwenza ukuthi kube lokumanyana phakathi kwezinceku zakhe ezisemhlabeni lezisezulwini. Lokhu kuzakwenza ukuthi bonke bazithobe ngaphansi kokubusa kwakhe. (Efe. 1:​8-11) Indlela uJehova agcwalisa ngayo inhloso yakhe ayikuthinti kwamancane yini? w23.10 20 ¶7-8

AmaJuda ayesuke eBhabhiloni athi esanda kufika eJerusalema kwaba nzima ukuthi anakekele izimuli zawo. Kanti njalo kwaba leziphithiphithi zombusazwe futhi ayehlutshwa ngabantu bezinye izizwe. Yikho kwaba nzima kwamanye amaJuda ukuthi aqhubekele phambili ngokwakha ithempeli likaJehova. Yikho uJehova wathuma abaphrofethi bakhe ababili, uHagayi loZakhariya ukuthi bavuselele abantu ukuze baphinde bawukhuthalele umsebenzi wokwakha ithempeli. (Hag. 1:1; Zak. 1:1) Ngemva kweminyaka engaba ngu-50, amaJuda la aphinda adinwa. U-Ezra wasuka eBhabhiloni waya eJerusalema esiyakhuthaza abantu bakaNkulunkulu ukuthi baqakathekise ukukhonza kweqiniso. (Ezra. 7:​1, 6) Iziphrofetho ezakhulunywa nguHagayi loZakhariya zanceda abantu bakaNkulunkulu bakudala ukuthi baqhubeke bemthemba uJehova lanxa babehlukuluzwa. Lathi zingasinceda ukuthi sihlale silethemba lokuthi uJehova uzasincedisa ngezikhathi zobunzima.—Zaga. 22:19. w23.11 14-15 ¶2-3

Sitshengisa njani ukuthi siyabathanda abafowethu labodadewethu? Okunye esingakwenza yikubaduduza. ‘Sizaqhubeka siduduzana’ nxa sibazwela abanye. (1 Thes. 4:18) Kodwa kuyini okungasinceda ukuthi siqhubeke sithandana kakhulu? Yikwenza okusemandleni ethu ukuthi sihlale sibathethelela abazalwane nxa besiphambanisele. Khathesi kungani sekuqakatheke kakhulu ukutshengisa ukuthi siyabathanda abanye? Nansi isizatho esasiphiwa ngumphostoli uPhetro, wathi: ‘Ukuphela kwezinto zonke sekuseduze. Ngakho thandanani kakhulu.’ (1 Phet. 4:​7, 8) Njengoba umhlaba lo omubi ususiya ekucineni, kuyini esikukhangeleleyo? UJesu wakhuluma labalandeli bakhe wathi: “Lizazondwa yizizwe zonke ngenxa yebizo lami.” (Mat. 24:9) Nxa sifuna ukuqhubeka sithembekile kuJehova lanxa sizondwa, kumele sihlale simanyene. Nxa singenza njalo uSathane uzakwehluleka ukusehlukanisa ngoba siyabe simanyaniswe luthando.—Flp. 2:​1, 2. w23.11 13 ¶18-19

Iqiniso eliseLizwini likaNkulunkulu lilamandla kakhulu. Nxa sifundisa abantu ngoJehova futhi sibatshela ukuthi yena unjani kuba lempumela emihle kakhulu. Kancane kancane abantu bayawabona amanga kaSathane besebephuma ebumnyameni, baqalise ukubona uBaba wethu esimthandayo ngendlela esimbona ngayo. Bayamangala kakhulu nxa besizwa ngamandla akhe amakhulu. (Isaya. 40:26) Bayafunda ukumthemba ngoba bayabona ukuthi wahlulela kuhle futhi ulungile. (Dute. 32:4) Bafunda okunengi ngokuhlakanipha kwakhe okukhulu. (Isaya. 55:9; Rom. 11:33) Kanti njalo kuyabaduduza ukufunda ukuthi uNkulunkulu uluthando. (1 Joh. 4:8) Nxa beqhubeka besondela kuJehova basuka bangathandabuzi ukuthi bazaphila phakade futhi babe ngabantwana bakaNkulunkulu. Silesibusiso esikhulu sibili sokuncedisa abantu ukuthi basondele kuBaba wabo osezulwini. Nxa sisenza njalo siyabe “sisebenza loNkulunkulu.”—1 Khor. 3:5. w24.02 12 ¶15

Nxa kuyikuthi ufundiswa iBhayibhili kumbe ukhuliswa ngabazali abangoFakazi uyake ucabange ngokubhabhathizwa yini? Kuhle kakhulu nxa uyake ucabange ngakho. Kodwa kumele uqale uzinikele kuJehova ungakabhabhathizwa. Uzinikela njani kuJehova? Uyakhuleka kuye umthembisa ukuthi uzakhonza yena yedwa lokuthi uzaqakathekisa ukwenza intando yakhe ukwedlula loba yini empilweni yakho. Ngamanye amazwi uyabe uthembisa uJehova ukuthi uzaqhubeka umthanda “ngenhliziyo yakho yonke, langomphefumulo wakho wonke, langengqondo yakho yonke, langamandla akho wonke.” (Mak. 12:30) Ukuzinikela ukwenza ukhuluma loJehova uwedwa. Kodwa nxa usubhabhathizwa kuyabe kulabantu. Lokho yikho okwenza babone ukuthi usuzinikele kuJehova. Ukuzinikela yikwenza isifungo esiqakatheke kakhulu. UJehova ukhangelele ukuthi usigcine isifungo sakho futhi akuthandabuzwa ukuthi lawe uyafuna ukwenza lokho oyabe umthembise khona.—Umtshu. 5:4. w24.03 2 ¶2; 3 ¶5

Akulamuzi ongathunqi intuthu. IBhayibhili likubeka kucace ukuthi abantu abatshadileyo “bazakuba lenhlupho.” (1 Khor. 7:28) Kungani besiba lenhlupho? Umtshado uhlanganisa abantu ababili abazelwe belesono, abalobuntu obutshiyeneyo njalo abathanda izinto ezitshiyeneyo. Indlela abayabe bekhuliswe ngayo iyabe itshiyene futhi bangabe belamasiko ehlukeneyo. Ngokuhamba kwesikhathi omunye angananzelela ezinye izinto angazange azibone besathandana. Konke lokhu kungenza bangazwanani. Bangaqalisa ukukhombana ngeminwe ngenxa yenhlupho abayabe sebelazo kulokuthi ngamunye wabo azame ukubona lokho yena akuphambanisayo abesekulungisisa. Bangakubona sekungcono ukuthi behlukane kumbe badivose. Kodwa bazathokoza yini nxa bangenza njalo? Hatshi. UJehova ufuna ukuthi umuntu otshadileyo aqhubeke ehlala lomkakhe lanxa kunzima ukuphila laye. w24.03 16 ¶8; 17 ¶11

Wathi usuzinikele kuJehova wabhabhathizwa, waqhubeka ufunda okunengi kakhulu ngaye futhi wamthanda. Lokhu kwenza ukuthi ithemba lakho lokuphila kuze kube nini lanini ePharadayisi liqhubeke liqina. (Heb. 5:13–6:1) Engxenye okukhulunywa kuRoma 5:​2-4 kwenzakala lakuwe. Kungenzeka ukuthi wahlangana lobunzima obunengi futhi waqhubeka ubekezela njalo wakubona ukuthi uNkulunkulu uyakwamukela. Njengoba ungakuthandabuzi ukuthi uNkulunkulu uyakuthanda, khathesi usukulindele ngabomvu ukubona izinto asithembise zona zigcwaliseka. Ithemba lakho seliqine kakhulu ukwedlula kuqala. Seligxile kakhulu enhliziyweni yakho njalo liyakuqinisa njengoba lawe kulezinto ozikhangelele ngabomvu. Yilo eseliqondisa konke okwenzayo empilweni njalo selitshintshe lendlela ophatha ngayo abanye emulini lendlela oyenza ngayo izinqumo kanye lendlela osebenzisa ngayo isikhathi sakho. Umphostoli uPhawuli uphinda asitshele omunye umcijo oqakathekileyo mayelana lethemba oba lalo nxa ungemukelwa nguNkulunkulu. Uyakuqinisekisa ukuthi ithemba lakho lizagcwaliseka.—Rom. 15:13. w23.12 12-13 ¶16-19

Nxa siphakathi kobunzima, indlela esizizwa ngayo lemicabango yethu kanye lalokho esikwenzayo kungatshintsha. Indlela esizizwa ngayo ingatshintshatshintsha njengomkhumbi ophoselwa le lale ngamagagasi. UJehova usincedisa njani nxa sithwele nzima? Uthembisa ukuthi uzasenza sihlaliseke. Nxa kungaba lesiphepho elwandle, umkhumbi ungaqalisa ukunyikinyeka usiyale lale. Okuncedayo yikuthi imikhumbi eminengi ilezinto ezisemaceleni eziyibambayo ukuthi inganyikinyeki kakhulu. Lokhu kwenza abantu abasemkhunjini bavikeleke futhi bahlaliseke. Lanxa kunjalo izinto lezo ezibamba umkhumbi zisebenza kuhle nxa umkhumbi uhamba. Ngendlela efananayo uJehova uzasenza sihlaliseke nxa singaqhubeka sithembekile ngezikhathi zobunzima. w24.01 22 ¶7-8

Nxa ungezwa usesaba, zibuze, ‘Kuyini uJehova asekwenzile?’ Cabangisisa ngezinto azidalileyo. Ngokwesibonelo, ‘khangelisisa’ indlela uJehova anakekela ngayo amaluba lenyoni lanxa kungadalwanga ngomfanekiso wakhe futhi kungenelisi ukumkhonza. Ukucabangisisa ngendlela uJehova anakekela ngayo izinto lezi, kuzasinceda singathandabuzi ukuthi lathi uzasinakekela. (Mat. 6:​25-32) Cabanga langezinto uJehova azenzele abantu abamkhonzayo. Ungabala ngomunye umuntu okukhulunywa ngaye eBhayibhilini owatshengisa ukuthi ulokholo oluqinileyo, kumbe ubale indaba yomunye umuntu okhonza uJehova khathesi. Kanti njalo cabangisisa ngendlela uJehova akunakekele ngayo. Wakuncedisa njani ukuthi umazi lokuthi umkhonze? (Joh. 6:44) Uyiphendule njani imithandazo yakho? (1 Joh. 5:14) Umhlatshelo weNdodana yakhe ukunceda njani nsuku zonke?—Efe. 1:7; Heb. 4:​14-16. w24.01 4 ¶6; 7 ¶17