November

Nxa ungumzali ncedisa abantwabakho ukuthi balungiselele izimpendulo zabo kusiya ngeminyaka yabo. Lanxa ngezinye izikhathi emihlanganweni yebandla kuxoxwa ngendaba ezimayelana lenhlupho zomtshado kumbe indaba zokuziphatha, kungaba lendima eyodwa kumbe ezimbili lapho umntanakho angaphendula khona. Khumbuza abantwabakho ukuthi kungenzakala bengaqanjwa lanxa bengabe bephakamisile. Lokhu kuzabanceda ukuthi bangadani nxa kuqanjwa abanye. (1 Thim. 6:18) Ngamunye wethu angalungiselela izimpendulo ezizakwenza ukuthi uJehova adunyiswe njalo zikhuthaze abafowethu labodadewethu. (Zaga. 25:11) Lanxa kungakubi ukuthi lapha lalaphayana sikhulume ngezinto ezake zenzakala empilweni yethu kumele sinanzelele singacini sesihlala sikhuluma ngathi. (Zaga. 27:2; 2 Khor. 10:18) Kumele sizimisele ukukhuluma kakhulu ngoJehova langeLizwi lakhe langabantu bakhe.—Isam. 4:11. w23.04 24-25 ¶17-18

Uthando luqakathekile ngoba luyasinceda ukuthi sihlale siphapheme futhi sisebenzisa kuhle izingqondo zethu. (Mat. 22:​37-39) Ukuthanda uNkulunkulu kungasinceda ukuthi siqhubeke sitshumayela lanxa sikwazi ukuthi ukwenza njalo kungasidalela uhlupho. (2 Thim. 1:​7, 8) Siqhubeka sitshumayela size sitshumayele ngamafoni langezincwadi ngenxa yokuthi siyabathanda abantu abangamkhonziyo uJehova. Sihlala sithemba ukuthi ngelinye ilanga omakhelwane bethu bazatshintsha baqalise ukwenza okulungileyo. (Hez. 18:​27, 28) Abanye omakhelwane bethu okumele sibathande ngamaKhristu esikhonza lawo. Sitshengisa ukuthi siyathandana ngokuqhubeka ‘sikhuthazana futhi sisakhana.’ (1 Thes. 5:11) Siyakhuthazana njengamasotsha ancedisanayo empini. Ngeke silimaze abafowethu labodadewethu ngabomo kumbe sibuyisele okubi ngokubi. (1 Thes. 5:​13, 15) Siphinda sitshengise ukuthi silothando ngokuhlonipha abazalwane abakhokhelayo ebandleni.—1 Thes. 5:12. w23.06 10 ¶6; 11 ¶10-11

Enye indlela esingaqinisa ngayo ukholo lwethu yikucabangisisa ngenhlawulo. Inhlawulo yenza siqiniseke ukuthi izithembiso zikaNkulunkulu zizagcwaliseka. Ukuzinika isikhathi sokucabangisisa ngokuthi kungani kwaba lenhlawulo lokuthi yabhadalwa njani kuyasinceda ukuthi siqhubeke sikholwa ukuthi isithembiso sikaNkulunkulu sempilo engapheliyo emhlabeni omutsha sizagcwaliseka loba sekutheni. Kungani sisitsho njalo? Inhlawulo yabhadalwa njani? UJehova wathuma izibulo lakhe ayelithanda kakhulu ukuthi lisuke ezulwini libuye emhlabeni beselizalwa lingumuntu ongelasono. UJesu wathi esesemhlabeni wahlangana lobunzima obutshiyeneyo. Ngemva kwalokho wahlupheka wasesifa kabuhlungu. UJehova wasihlawulela ngendlela enkulu kakhulu! Kambe ukuthi uNkulunkulu wethu osithandayo wayengavumela ukuthi iNdodana yakhe ihlupheke futhi ife nxa kuyikuthi wayefuna sikholise impilo okwesikhatshana nje kuphela? (Joh. 3:16; 1 Phet. 1:​18, 19) Phela uJehova walahlekelwa kakhulu ukuze asihlenge. Yikho uzakuba leqiniso lokuthi siyayithola impilo engapheliyo emhlabeni omutsha. w23.04 27 ¶8-9

UJehova uyafuna yini ukuvusa abafileyo? Asithandabuzi ukuthi uyafuna sibili ngoba waphefumulela abalobi beBhayibhili abanengi ukuthi babhale ngesithembiso sokuthi abafileyo bazavuswa. (Isaya. 26:19; Isam. 20:​11-13) Kanti njalo uJehova kayekeli ukugcwalisa loba yini ayithembisileyo. (Josh. 23:14) Ukulindele ngabomvu ukuvusa abafileyo. Akucabange ngamazwi kaJobe. UJobe wayeleqiniso lokuthi lanxa wayengafa uJehova wayefuna kumbe efisa sibili ukumbona futhi. (Jobe. 14:​14, 15) UJehova uyafuna sibili ukuphinda abone abangane bakhe abafayo. Uzimisele ukubavusa beqine saka futhi bethokoza. Manje kuzakwenzakalani ngamabhiliyoni abantu afa engatholanga ithuba lokufunda iqiniso ngoJehova? UNkulunkulu wethu olothando uyafuna ukubavusa. (Imiseb. 24:15) Ufuna bathole ithuba lokuba ngabangane bakhe besebephila phakade emhlabeni.—Joh. 3:16. w23.04 8 ¶5-6

Ungenzani ukuze uqinise ithemba lakho? Ngokwesibonelo, nxa ulethemba lokuphila phakade khonapha emhlabeni, bala amavesi aseBhayibhilini akhuluma ngePharadayisi njalo ucabangisise ngawo. (Isaya. 25:8; 32:​16-18) Cabanga ngokuthi impilo izabe isinjani emhlabeni omutsha, uzibone usukuwo. Nxa singahlala sicabanga ngethemba lokuphila emhlabeni omutsha, inhlupho zethu zizakuba ‘ngezesikhatshana futhi zingatsho lutho.’ (2 Khor. 4:17) Ithemba olinikwe nguJehova lizakwenza ube lamandla. UJehova usesinike konke esikudingayo ukuze sibe lamandla. Yikho nxa udinga amandla okwenza umsebenzi owuphiweyo loba awokumelana lobunzima kumbe ufuna ukuhlala uthokoza, khuleka kuJehova ngenhliziyo yonke njalo utaditshe uwedwa ukuze akuncedise. Vuma ukukhuthazwa ngabafowenu labodadewenu abangamaKhristu. Hlala ucabanga ngethemba olalo ukuze lingafiphali. Nxa ungenza njalo ‘uzaqiniswa ngamandla wonke avela emandleni [kaJehova] akhazimulayo ukuze uqinisele kukho konke, ubekezela futhi uthokoza.’—Kol. 1:11. w23.10 17 ¶19-20

Kunengi esingakubonga kuJehova nxa sithandaza. Singambonga ngazo zonke izinto ezinhle esilazo. Phela zonke izipho ezinhle zivela kuye. (Jak. 1:17) Ngokwesibonelo, singambonga ngokuthi wasinika umhlaba omuhle kanye lezinye izinto azidalayo ezinhle okwamagama. Kumele simbonge ngesipho sokuphila, izimuli zethu, abangane esilabo kanye lethemba esilalo. Kanti njalo okunye esimbonga ngakho yikuthi usivumele ukuthi sibe ngabangane bakhe. Kumele usebenze ngamandla ukuze unanzelele izinto uJehova akwenzela zona ubusumbonga. Umhlaba esiphila kuwo ugcwele abantu abangabongiyo. Abantu abanengi bagijimisa okwabo lalokho abangakuthola kulokuthi babonge ngalokho abalakho. Nxa lathi singananzeleli, imithandazo yethu ingacina isingeyokucela nje kuphela. Yikho nxa singafuni imithandazo yethu ibe njalo kumele siqhubeke simbonga uJehova ngakho konke asenzela khona.—Luk. 6:45. w23.05 4 ¶8-9

UJehova nguBaba wethu osithandayo futhi kafuni ukusibona sisizwa ubuhlungu. (Isaya. 63:9) Lanxa kunjalo akasivikeli kubo bonke ubunzima obungasehlela. Ubunzima lobo singabufanisa lemifula lamalangabi. (Isaya. 43:2) UJehova usithembisa ukuthi uzasincedisa ‘sidabule’ kumbe sidlule ebunzimeni. Kasoze avumele ukuthi ubunzima obusehlelayo busenze sicine sisehluleka ukumkhonza. Kanti njalo uJehova uyasinika umoya wakhe ongcwele osinceda ukuthi siqinisele. (Luk. 11:13; Flp. 4:13) Ngakho asithandabuzi ukuthi uzasinika konke esikudingayo ukuze senelise ukuqinisela njalo sihlale sithembekile kuye. UJehova ukhangelele ukuthi simthembe. (Heb. 11:6) Kwezinye izikhathi inhlupho zethu zingakhanya zingaphezu kwamandla ethu. Zingasenza sithandabuze ukuthi uJehova angasincedisa. Kodwa iBhayibhili lisiqinisekisa ukuthi ngamandla kaNkulunkulu ‘singakhwela umduli.’ (Hubo. 18:29) Kulokuthi sizitshele ukuthi uNkulunkulu kasoze ayiphendule imithandazo yethu, kumele sithandaze silokholo njalo sithemba ukuthi uzayizwa futhi ayiphendule.—Jak. 1:​6, 7. w23.11 22 ¶8-9

Amavesi la aluchasisa kuhle uthando lweqiniso. Aqinisekisa abantu abatshadileyo ukuthi uthando lwabo lungahlala luvutha lungapheli. Abatshadileyo kungumsebenzi wabo ukuthi bagcine uthando lwabo luvutha. Ngokwesibonelo, nxa umlilo ukhwezelwa uyaqhubeka ubhebha kodwa nxa ungasakhwezelwa ucina usucitshile. Lothando lwendoda lomfazi lungahlala luvutha nxa besenza izinto eziluqinisayo. Kwezinye izikhathi abatshadileyo bangabona angathi uthando lwabo soluphela, ikakhulu nxa belenhlupho zemali, ezempilakahle kumbe bethwala nzima ukukhulisa abantwababo. Indoda lomkayo kumele basebenze nzima, baqinise ubudlelwano babo loJehova ukuze “ilangabi likaJah” lihlale livutha. w23.05 20-21 ¶1-3

Kumele senzeni ukuze sibe lesibindi? Abazali bethu bangasikhuthaza ukuthi sibe lesibindi. Kodwa isibindi kasisitholi kubo angathi sithola ilifa abasitshiyela lona. Nxa umuntu efuna ukuba lesibindi kumele enze lokho okwenziwa ngumuntu ofundela umsebenzi. Umuntu ofundela umsebenzi uyakhangelisisa okwenziwa ngumuntu omfundisayo abesezama ukumlingisela. Ngendlela efananayo lathi siba lesibindi nxa singakhangelisisa okwenziwa ngabantu abalaso besesibalingisela. Kumele sibelazi kuhle iLizwi likaNkulunkulu njengoDanyeli. Okunye okumele sikwenze yikuhlala sithandaza kuJehova simtshela konke okusezinhliziyweni zethu ukuze sibe ngabangane bakhe abakhulu. Kanti njalo kumele simthembe uJehova siqiniseke ukuthi uyasisekela. Nxa singakwenza konke lokhu sizakuba lesibindi sokumelana lezilingo ezingasehlela. Abantu abalesibindi bajayele ukuhlonitshwa ngabanye futhi banganceda abantu abalenhliziyo eziqotho ukuthi bafune ukufunda ngoJehova. Kuyacaca ukuthi kuyanceda kakhulu ukuthi sibe lesibindi. w23.08 2 ¶2; 4 ¶8-9

Ibala lesiGrikhi elihunyutshwe ngokuthi “hlolisisani” lalisetshenziswa nxa kukhulunywa ngokuhlola amatshe aligugu. Ngakho lathi kumele sihlole esikuzwayo lesikubalayo ukuze sibone ukuthi kuliqiniso yini. Kuqakatheke kakhulu ukuthi sikwenze lokhu njengoba ukuhlupheka okukhulu kusondela. Akumelanga sikholwe konke esikuzwayo. Kodwa kumele sisebenzise izingqondo zethu ukuze sibone ukuthi esikubalayo lesikuzwayo kuyahambelana yini lokubhalwe eBhayibhilini kanye lalokho okutshiwo yinhlanganiso kaJehova. Nxa singenza njalo asisoze sithatheke ngaloba yiwaphi amazwi avela emadimonini. (Zaga. 14:15; 1 Thim. 4:1) Siyakwazi ukuthi abantu bakaNkulunkulu bazasinda ekuhluphekeni okukhulu kodwa asikwazi okungehlela umKhristu ngamunye esikhathini esizayo. (Jak. 4:14) Kungelani ukuthi sizaqhubeka siphila size sisinde ekuhluphekeni okukhulu kumbe ukuthi sizakufa kungakaqalisi, sizaphiwa umvuzo wokuphila okungapheliyo nxa singahlala sithembekile. Kwangathi sonke singahlala sicabanga ngethemba lethu leli elihle futhi sihlale sikulungele ukufika kosuku lukaJehova. w23.06 13 ¶15-16

Asikwazi ukuthi ezinye iziphrofetho eziseBhayibhilini zizagcwaliseka njani. (Dan. 12:​8, 9) Kodwa ukuthi asizwisisi ukuthi ezinye iziphrofetho zizagcwaliseka njani akutsho ukuthi azisoze zigcwaliseke. Asithandabuzi ukuthi uJehova uzasivezela ngesikhathi esiyiso lokho okumele sibekwazi njengoba wayesenza kudala. Kuzakuba lesimemezelo ‘sokuthula lokuvikeleka.’ (1 Thes. 5:3) Ngemva kwalokho imibuso yomhlaba izahlamukela inkolo yamanga ibisiyibhubhisa. (Isam. 17:​16, 17) Imibuso le izathi isibhubhise inkolo yamanga, ibisihlasela abantu bakaNkulunkulu. (Hez. 38:​18, 19) Lokhu yikho okuzakwenza ukuthi kube lempi yokucina i-Amagedoni. (Isam. 16:​14, 16) Sileqiniso lokuthi sekuseduze ukuthi izinto zonke lezi zenzakale. Kodwa zingakenzakali asiqhubekeni sitaditsha iziphrofetho eziseBhayibhilini futhi sincedise abanye benze njalo ukuze sitshengise ukuthi siyambonga uBaba wethu osezulwini osithandayo. w23.08 13 ¶19-20

Ngesikhathi umphostoli uPhawuli ekhuluma ngokholo lethemba lothando, wathi “okukhulu kulakho konke luthando.” (1 Khor. 13:13) Kungani uPhawuli watsho njalo? Ngesikhathi esizayo kuzabe kungasadingeki ukuthi sibe lokholo ezithembisweni zikaNkulunkulu zomhlaba omutsha kumbe ukuthi sibe lethemba lokuthi zizagcwaliseka ngoba ziyabe sezigcwalisekile. Kodwa kuzamele sihlale simthanda uJehova kanye labantu. Sizabe silokhu singezelela indlela esimthanda ngayo kanye lendlela esithanda ngayo abantu kuze kube nini lanini. Kanti njalo nxa sithandana sitshengisa ukuthi singamaKhristu eqiniso. UJesu watshela abafundi bakhe wathi: “Nxa lithandana, abantu bonke bazakwazi ukuthi lingabafundi bami.” (Joh. 13:35) Kanti njalo nxa sithandana sizahlala simanyene. UPhawuli wathi uthando ‘lwenza simanyane ngokupheleleyo.’ (Kol. 3:14) Umphostoli uJohane wabhalela amaKhristu ayekhonza lawo wathi: “Loba ngubani othanda uNkulunkulu kufanele athande lomfowabo.” (1 Joh. 4:21) Nxa sibathanda abanye siyabe sitshengisa ukuthi siyamthanda uNkulunkulu. w23.11 8 ¶1, 3

IBhayibhili lifanisa impilo yamaKhristu lomncintiswano wokugijima. Labo abagijima baze bayefika ekucineni bayitshaye intambo bazaphiwa umvuzo wokuphila okungapheliyo. (2 Thim. 4:​7, 8) Kumele senze konke okusemandleni ethu ukuthi siqhubeke sigijima njengoba sekuseduze ukuthi siyitshaye intambo. Umphostoli uPhawuli wasitshela lokho okungasinceda ukuze lathi sinqobe emncintiswaneni lo. Wathi kumele ‘silahle konke okusindayo njalo siwugijime siqinisela umncintiswano ofakwe phambi kwethu.’ UPhawuli wayesitsho ukuthi akusela yini umthwalo okumele siwuthwale? Hatshi ayekutsho yikuthi kumele silahle konke okungamelanga sikuthwale. Izinto lezi zingasenza sidinwe masinyane besesisehlisa ijubane lethu. Okuzasinceda ukuthi siqhubeke sigijima yikuphangisa ukunanzelela nxa sekulento esisindayo besesiyilahla masinyane. Kodwa asifuni ukucina sesilahla lemithwalo okumele siyithwale ngoba singenza njalo singacina siphuma umncintiswano ungakapheli.—2 Thim. 2:5. w23.08 26 ¶1-2

Ukuba ngabantu abazwisisayo kuyasinceda ukuthi sihloniphe imibono yabanye. Abanye odadewethu bathanda ukuzicomba kodwa abanye abakuthandi lokho. Amanye amaKhristu akhululekile ukunatha utshwala kodwa amanye akhetha ukungabuthinti. Wonke amaKhristu ayakufuna ukuba lempilakahle kodwa akhetha ukwelatshwa ngendlela ezitshiyeneyo. Nxa singabona angathi eyethu imibono yiyo eqondileyo besesizama ukutshotshozela ibandla lonke ukuthi lilandele thina, singakhuba abanye futhi sidale ukwehlukana. (1 Khor. 8:9; 10:​23, 24) UJehova kasitsheli ukuthi sigqoke lokhu kumbe lokhuyana kodwa usinika izimiso okumele sizisebenzise. Kumele sigqoke ngendlela ezayenza kukhanye ukuthi sikhonza uNkulunkulu wethu uJehova, sitshengise ukuthi singabantu abazwisisayo, abangadlulisi amalawulo futhi ‘abazisebenzisa kuhle ingqondo zabo.’ (1 Thim. 2:​9, 10) Asifuni kugqoka ngendlela ezakwenza abantu basimangale. Izimiso eziseBhayibhilini zizanceda labadala ukuthi bangazibekeli imithetho yabo mayelana lezindlela zokugqoka kanye lokulungisa ikhanda. w23.07 23-24 ¶13-14

UJehova usincede sabona ukuthi kumele senzeni ukuze sithokoze empilweni. Labo abavuma ukuya endlini yowesifazana oliphakaphaka futhi oyisiwula bacabanga ngokukholisa ukuziphatha okubi becatshile. Isiphetho sabo yikuya ‘engcwabeni elitshonayo.’ (Zaga. 9:​13, 17, 18) Kodwa labo abavuma ukuya endlini ‘yokuhlakanipha kweqiniso’ bazathola ikusasa elihle. (Zaga. 9:1) Siyafundiswa ukuthanda izinto ezithandwa nguJehova lokuzonda izinto azizondayo. (Hubo. 97:10) Kanti njalo kuyasithokozisa lokunxusa abanye ukuthi baye endlini ‘yokuhlakanipha kweqiniso’ besebencedakala. Kuyabe kungathi ‘simemeza sisezindaweni eziphezulu zedolobho sisithi: “Loba ngubani ongelalwazi kabuye ngapha.”’ Izibusiso ezitholwa yithi lezitholwa yilabo abavuma ukuthi sibanxuse azipheleli esikhathini lesi esiphila kuso. Zihlala kuze kube nini lanini ngoba zenza ‘siphile’ phakade njengoba ‘sihamba sisiya phambili endleleni yokuzwisisa.’—Zaga. 9:​3, 4, 6. w23.06 24 ¶17-18

Uzwa njani nxa ofunda laye kumbe osebenza laye ekubuza ngalokho okukholwayo? Abanengi bethu sitshaywa luvalo. Ukubuzwa ngalokho okukholwayo kungakunceda uzwisise ukuthi umuntu ucabangani lokuthi ukholwani, besekukunika ithuba lokuthi umtshele izindaba ezinhle. Kodwa kwezinye izikhathi umuntu angabuza umbuzo ehlose ukusiphikisa. Lokho akumelanga kusimangalise ngoba abanye kungenzeka ukuthi batshelwa izinto ezingayisizo ngalokho esikukholwayo. (Imiseb. 28:22) Kanti njalo siphila “ezinsukwini zokucina” lapho okugcwele khona abantu ‘abangafuni isivumelwano, labalolaka.’ (2 Thim. 3:​1, 3) Uyake uzibuze yini ukuthi ungenzani ukuze ube lesineke futhi uphendule ngomusa nxa omunye ephikisa lokho okukholwayo? Nxa uyake uzibuze kuyini okungakunceda? Ngamafitshane nje yikuba mnene. Umuntu omnene kazondi masinya kodwa uyazibamba nxa abantu bengamhlasela kumbe nxa engelaqiniso lokuthi kumele aphendule njani. w23.09 14 ¶1-2

Kwezinye izikhathi siyake sicetshiswe ukuthi sinanzelele ukuthi singacini sithanda izinto zomhlaba. Siyake sixwayiswe lokuthi singenzi izinto ezingenza sicine sephule umthetho kaNkulunkulu. Siyancedakala kakhulu nxa silandela lokho esikutshelwa nguJehova. (Isaya. 48:​17, 18; 1 Thim. 6:​9, 10) Asithandabuzi ukuthi uJehova uzaqhubeka esebenzisa abantu ukuze asikhokhele ngesikhathi sokuhlupheka okukhulu langesikhathi sokubusa kukaJesu kweminyaka eyinkulungwane. Sizaqhubeka silalela yini esikutshelwayo? Lokho kuzakuya ngokuthi siyavuma yini ukukhokhelwa nguJehova khathesi. Yikho asihlaleni sivuma ukukhokhelwa nguJehova okugoqela ukulalela lokho esikutshelwa ngamadoda akhethwe ukuthi asilinde. (Isaya. 32:​1, 2; Heb. 13:17) Kanti njalo silezizatho zokumthemba uMkhokheli wethu uJehova osisusa ezintweni ezingaphambanisa ubungane bethu laye asise endleleni eya ekuphileni okungapheliyo emhlabeni omutsha. w24.02 25 ¶17-18

Umphostoli uPhawuli wayekukholisa ukukhonza uJehova kodwa izinto zazingatsheleli sonke isikhathi. Wayejayele ukuhamba imango emide njalo ngezikhathi lezo kwakungalula ukuhamba imango emide. Kwezinye izikhathi ekuhambeni kwakhe wayesiba ‘sezingozini emifuleni, lasezingozini zokuhlaselwa yizigebenga.’ Lezitha zakhe zazike zimtshaye. (2 Khor. 11:​23-27) Kanti njalo kwezinye izikhathi abazalwane babetshengisa ukuthi kabalandaba lemizamo yonke ayeyenza ukuze abancedise. (2 Khor. 10:10; Flp. 4:15) Kuyini okwanceda uPhawuli ukuthi aqhubeke emsebenzela uJehova? UPhawuli wafunda okunengi ngoJehova eMibhalweni lakulokho okwenzakala kuye. Lokhu kwamenza waqiniseka ukuthi uJehova uNkulunkulu wayemthanda kakhulu. (Rom. 8:​38, 39; Efe. 2:​4, 5) Laye wamthanda kakhulu uJehova. UPhawuli watshengisa ukuthi uyamthanda uJehova ‘ngokusiza abangcwele langokuqhubeka ebasiza.’—Heb. 6:10. w23.07 9 ¶5-6

Abantu abanengi bayavuma ukuthi siyabadinga ohulumende njalo bathi kumele silalele eminye imithetho efakwe ‘yiziphathamandla.’ Kodwa bangadonda ukulalela imithetho abangayithandiyo loba leyo ababona angani iyabacindezela. IBhayibhili liyakuvuma ukuthi ohulumende basemhlabeni lo bangaphansi kukaSathane lokuthi benza abantu bahlupheke. Kanti njalo lithi sekuseduze ukuthi babhujiswe. (Hubo. 110:​5, 6; Umtshu. 8:9; Luk. 4:​5, 6) Kodwa liphinda lithi: “Loba ngubani ophikisana leziphathamandla uphikisana lalokho okuhlelwe nguNkulunkulu.” Okwakhathesi uJehova ubavumele ohulumende ukuthi babe khona ukuze kube lokuhleleka emhlabeni njalo ukhangelele ukuthi sibalalele. Ngakho kumele ‘sibanike bonke okubafaneleyo’ okuhlanganisa imithelo, inhlonipho kanye lokubalalela. (Rom. 13:​1-7) Eminye imithetho singabona angani iyasicindezela kumbe inzima ukuyilalela. Kanti njalo eminye imithelo ingabe idura. Lanxa kunjalo siyazilalela iziphathamandla lezi ngoba uJehova ufuna sizilalele. Kodwa kasizilaleli nxa sezifuna seqe imithetho esiyiphiwa nguJehova.—Imiseb. 5:29. w23.10 8 ¶9-10

Ngesikhathi uSamsoni ezalwa, abako-Israyeli babebuswa ngamaFilisti futhi ayebathwalise nzima. (Abahlu. 13:1) Ayelesihluku futhi ethwalise ama-Israyeli amagabha avuzayo, yikho uJehova wakhetha uSamsoni ukuthi ‘akhokhele ekusindiseni abantu bako-Israyeli esandleni samaFilisti.’ (Abahlu. 13:5) USamsoni kwakumele athembele kuJehova ukuze aphumelele ukuwenza. Ngelinye ilanga amabutho amaFilisti abuya eLehi ezothumba uSamsoni njalo kukhanya iLehi yayikoJuda. Amadoda akoJuda esaba kakhulu yikho acabanga ukuthi abambe uSamsoni amnikele esitheni. Ngakho amadoda la akibo ambopha ngentambo ezimbili ezintsha asemusa kumaFilisti. (Abahlu. 15:​9-13) Kodwa ‘umoya kaJehova wehlela kuye waba lamandla’ waqamula intambo ayebotshwe ngazo, “wasebona ithambo lomhlathi kababhemi elalingakawomi” walidobha wabulala ngalo amasotsha amaFilisti angu-1 000!—Abahlu. 15:​14-16. w23.09 2 ¶3-4

UJehova uqhubeka esivezela ‘injongo yakhe yaphakade’ esebenzisa iBhayibhili. Usebenzisa indlela ezitshiyeneyo “ukuze agcwalise injongo yakhe.” (Zaga. 16:4) Konke uJehova akwenzayo kuzahlala kuze kube nini lanini. Iyini inhloso kaJehova futhi yiziphi indlela azisebenzisileyo ukuze ayigcwalise? UNkulunkulu watshela u-Adamu lo-Eva ukuthi wayehloseni ngabo. Wayefuna ‘bazale bande bagcwalise umhlaba bawubuse njalo babuse phezu kwazo zonke izidalwa eziphilayo ezihamba’ emhlabeni. (Gen. 1:28) U-Adamu lo-Eva bahlamuka futhi lokho kwabangela ukuthi abantu bonke babe lesono. Lanxa kunjalo lokho akuzange kwenze uJehova ehluleke ukwenza lokho ayekuhlosile. Watshintsha indlela ayesezagcwalisa ngayo inhloso yakhe. Wabeka uMbuso ezulwini ozagcwalisa inhloso yakhe ngabantu langomhlaba.—Mat. 25:34. w23.10 20 ¶6-7

UJehova angasincedisa ukuthi siphikelele singakhalali. Kwezinye izikhathi kungaba nzima ukuthi siphikelele, ikakhulu nxa kulomkhuba omubi esesilesikhathi eside silwisana lawo. Ngezinye izikhathi lokho esilwisana lakho kungakhanya kunzima kakhulu ukwedlula lokho umphostoli uPhetro ayelwisana lakho. Lanxa kunjalo uJehova angasinika amandla okuthi siqhubeke siphikelela singakhalali. (Hubo. 94:​18, 19) Ngokwesibonelo, omunye umzalwane wayeyisitabane okweminyaka eminengi engakafundi iBhayibhili kodwa watshintsha impilo yakhe wasetshiyana lomkhuba lo. Lanxa kunjalo izifiso ezimbi zazike zimthwalise nzima. Kuyini okwamnceda ukuthi angakhalali? Wathi: “UJehova uyasiqinisa.” Waqhubeka wathi: ‘Sengifunde ukuthi nxa uJehova esinika umoya wakhe singenelisa ukuphila ngendlela ayifunayo. UJehova uqhubeka engisebenzisa futhi engiqinisa lanxa ngilokhu ngiwenza amaphutha.’ w23.09 23 ¶12

Bafowethu abasakhulayo akusoze kuzenzakalele ukuthi lithuthuke, kumele lisebenze nzima. Kumele likhethe abantu abenza okuhle elingabalingisela, lisebenzise kuhle ingqondo, libe ngabantu abathenjwayo, lifundele imisebenzi engalinceda empilweni futhi lilungiselele imisebenzi elingaba layo esikhathini esizayo. Kwezinye izikhathi ungazizwa uphela amandla nxa ucabanga ngomsebenzi okumele uwenze. Lanxa kunjalo ungaphumelela. Khumbula ukuthi uJehova uzimisele ukukuncedisa. (Isaya. 41:​10, 13) Abafowethu labodadewethu labo bazakuncedisa. Nxa ungasebenza nzima ukuthi uthuthuke uzayikholisa impilo futhi uzasuthiseka. Siyalithanda lonke bafowethu abasakhulayo! Kwangathi uJehova angalibusisa kakhulu njengoba lisebenza nzima ukuthi lithuthuke. w23.12 29 ¶19-20

Ake sithi libuthene labafowenu labodadewenu lizikwejisele nje. Liyazikholisela sibili njalo lithathe ipikitsha. Alithathi eyodwa kodwa lithatha lamanye amabili ukwenzela ukuthi likhethe enhle phakathi kwawo. Uthi usuwakhangela womathathu unanzelele ukuthi kwenye kulomfowethu obengabobotheki. Uhle uyidilithe ngenxa yokuthi ulamanye amabili aphume kuhle njalo lomfowethu lo uphume ebobotheka kuwo. Sihlala sizikhumbula izikhathi ezinhle esaba lazo labafowethu labodadewethu. Kodwa kungenzeka ukuthi ngesinye isikhathi umfowethu kumbe udadewethu wenza into eyakucaphulayo kumbe wakhuluma into eyakuzwisa ubuhlungu. Kumele ukugcine engqondweni yini lokho? Hatshi, kumele uzame ukukucitsha engqondweni ngendlela ongadilitha ngayo ipikitsha engaphumanga kuhle. (Efe. 4:32) Ungenelisa ukukhohlwa ngalokho okwenziwe ngomunye ngenxa yokuthi kunengi okuhle oyabe ukukhumbula ngaye. Izinto ezinhle ezenziwa ngabafowethu labodadewethu yizo kuphela esifuna ukuhlala sizikhumbula. w23.11 12-13 ¶16-17

Amabala esiGrikhi asetshenziswa lapha aveza ukuthi abesifazana abangamaKhristu kumele bagqoke ngendlela ehloniphekayo. Kumele itshengise lokuthi balendaba lokuthi abanye baphatheka njani lokuthi bathini ngendlela abagqoka ngayo. Siyaziqhenya ngani lonke bodadewethu eligqoka ngendlela elesithunzi. Okunye okuqakathekileyo odadewethu abangamaKhristu okumele babe lakho ukuze bathuthuke yikuqedisisa. Kuyini ukuqedisisa? Yikwenelisa ukwehlukanisa phakathi kokulungileyo lokungalunganga ubusukhetha ukwenza okulungileyo. Cabanga ngesibonelo sika-Abhigeli. Umkakhe wenza isinqumo esibi esasingabulalisa bonke ababesemzini wakhe. U-Abhigeli wasukumela phezulu walungisa izinto. Ukuqedisisa kwakhe kwasindisa impilo zabanengi. (1 Sam. 25:​14-23, 32-35) Ukuqedisisa kuphinda kusincede sazi isikhathi sokukhuluma lesokuthula. Kuyasinceda lokuthi sibe lendaba labanye kodwa singabatshiyi bengahlalisekanga.—1 Thes. 4:11. w23.12 20 ¶8-9

Umphostoli uPhawuli wabhalela ibandla laseRoma amazwi la. Abazalwane bebandla lelo babefunde ngoJehova loJesu baba lokholo basebesiba ngamaKhristu. UNkulunkulu ‘wathi balungile ngenxa yokholo’ wasebagcoba ngomoya ongcwele. (Rom. 5:1) Khathesi basebelethemba elikhazimulayo sibili njalo basebeqiniseka ukuthi bazawuthola umvuzo wabo. Ngemva kwesikhathi uPhawuli wabhalela amaKhristu agcotshiweyo e-Efesu ngethemba ayebizelwe kulo. Ayezathola ‘ilifa eligcinelwe abangcwele.’ (Efe. 1:18) Wabhalela lamaKhristu eKholose ewatshela ngokuthi umvuzo wawo ayezawamukela ngaphi. Wathi ‘ayelethemba lokwamukela akugcinelweyo ezulwini.’ (Kol. 1:​4, 5) Ngakho amaKhristu agcotshiweyo alethemba lokuvuka ayephila ezulwini kuze kube nini lanini ebusa loKhristu.—1 Thes. 4:​13-17; Isam. 20:6. w23.12 9 ¶4-5

Ibala elithi ‘ukulinda’ lalisetshenziswa esisotsheni nxa kukhulunywa ngamasotsha alinda idolobho futhi alivikele nxa selihlaselwa. Abantu ababehlala edolobheni elilindiweyo babezilalela ngokuthula ngoba bekwazi ukuthi kulamasotsha alindileyo emagedini. Ngendlela efananayo nxa ukuthula kukaNkulunkulu kulinde inhliziyo zethu lengqondo zethu siyahlaliseka ngoba siyabe sikwazi ukuthi sivikelekile. (Hubo. 4:8) Lanxa okusithwalise nzima kungeke kuphele masinyane nje, lathi singahlaliseka njengoHana. (1 Sam. 1:​16-18) Izikhathi ezinengi nxa sihlalisekile kuba lula ukuthi sicabange kuhle lokuthi senze izinqumo ezinhle. Manje kumele senzeni? Nxa kulento ekukhathazayo cela ukuthi uJehova akulinde. Njani? Khuleka uze ube lokuthula kukaNkulunkulu. (Luk. 11:9; 1 Thes. 5:17) Nxa uphakathi kobunzima phikelela ekuthandazeni njalo lokhu kuzakunceda ukuthi ube lokuthula kukaJehova okuzalinda inhliziyo yakho lengqondo yakho.—Rom. 12:12. w24.01 21 ¶5-6

UJesu wabekezelela ukuhlukuluzwa lokuthethiswa lokuqanjelwa amanga ngoba wayefuna ukungcwelisa ibizo likaYise. Wayekwazi ukuthi wayelalele uYise kukho konke lokuthi wayengenzanga lutho olungangcolisa ibizo likaYise. (Heb. 12:2) Wayekwazi lokuthi uSathane wayesethole ithuba lokuthi amhlasele ngesikhathi leso esasinzima. (Luk. 22:​2-4; 23:​33, 34) USathane wayefuna ukuthi uJesu angabi qotho kuNkulunkulu kodwa wehluleka. UJesu wakwenza kwacaca ukuthi uSathane ungusomangase lokuthi uJehova ulazo izinceku zakhe ezithembekileyo eziqhubeka ziqotho lanxa zisehlelwa yibunzima obukhulu. Uyafuna yini ukuthokozisa iNkosi yakho uJesu? Qhubeka udumisa ibizo likaJehova uncedise abantu ukuthi bamazi kuhle uNkulunkulu wethu. Nxa ungenza njalo uyabe uwalandela amanyathelo kaJesu. (1 Phet. 2:21) Uyabe uthokozisa uJehova futhi utshengisa ukuthi isitha sakhe uSathane silamanga aluhlaza tshoko! w24.02 11-12 ¶11-13

Eminyakeni emihlanu edlulileyo kubhabhathizwe abantu abedlula imiliyoni baba ngoFakazi bakaJehova. Nxa uzinikela kuJehova uyabe ukhetha ukuba ngumlandeli kaKhristu futhi uyabe uthembisa uNkulunkulu ukuthi uzaqakathekisa ukwenza intando yakhe ukwedlula loba yini empilweni yakho. Kutshoni lokho? UJesu wathi: “Loba ngubani ofuna ukungilandela kazidele.” (Mat. 16:24) Ibala lesiGrikhi elihunyutshwe ngokuthi “kazidele” lingahunyutshwa langokuthi “umuntu kangaphileli ukwenza intando yakhe.” Nxa usuzinikele kuJehova akumelanga wenze loba yini ephikisana lentando yakhe. (2 Khor. 5:​14, 15) Lokhu kugoqela ukuxwaya ukwenza “imisebenzi yenyama” enjengokufeba. (Gal. 5:​19-21; 1 Khor. 6:18) Ukulalela imithetho le kuzakwenza impilo yakho ibe nzima yini? Akusoze kukuthwalise nzima nxa umthanda uJehova futhi uqiniseka ukuthi imithetho yakhe iyakunceda.—Hubo. 119:97; Isaya. 48:​17, 18. w24.03 2 ¶1; 3 ¶4

UJehova uyabanika umoya ongcwele labo abamukelayo. (Mat. 12:18) Ungazibuza umbuzo lo, ‘Engikwenzayo kuyatshengisa yini ukuthi ngilezithelo zomoya kaNkulunkulu?’ Nxa uzihlola uyakubona yini ukuthi khathesi ususenelisa ukubekezelela abanye ukwedlula kuqala ungakafundi ngoJehova? Nxa ungaqhubeka utshengisa ngezenzo ukuthi ulezithelo zomoya kaNkulunkulu awusoze uthandabuze ukuthi uJehova uyathokoza ngawe lokuthi uyakwamukela. UJehova usebenzisa inhlawulo ukuze ancede labo abamukelayo. (1 Thim. 2:​5, 6) Manje singenzani nxa silokhu sicabanga ukuthi uJehova kasamukeli lanxa sibhabhathiziwe futhi sikholwa enhlawulweni? Kumele sikhumbule ukuthi ngeke sithembe imicabango yethu ngaso sonke isikhathi kodwa singamthemba uJehova. UJehova uthi labo abakholwa enhlawulweni balungile futhi uthembisa ukubabusisa.—Hubo. 5:12; Rom. 3:26. w24.03 30 ¶15; 31 ¶17