Ukuthuthukisa Indlela Esitshumayela Ngayo—Ngokuba Lendaba Lomuntu Ngamunye
Kungani Kuqakathekile? UJesu wayelendaba lomuntu munye ngamunye. Ngokwesibonelo, wathi eselapha indoda eyayiyisacuthe wananzelela ukuthi yayilenhloni ngesimo sayo ngakho wasesuka layo ebantwini wayelapha bebodwa. (Mak. 7:31-35) UJesu wayengabagqibi ngolwazi olunengi abafundi bakhe ngoba wayelendaba labo. (Joh. 16:12) UJesu ulokhu elendaba labantu lanxa esezulwini. (2 Tim. 4:17) Njengoba singabalandeli bakhe kumele simlingisele. (1 Phet. 2:21; 1 Joh. 3:16, 18) Ukuze siphumelele enkonzweni yethu, kumele sibe lendaba lomuntu esimtshumayezayo ngokunanzelela izimo zakhe kanye lalokho akuthandayo. Kuzakuba lula ukuthi lowomuntu asilalele nxa engananzelela ukuthi asilandanga ukuzomtshiyela amabhuku kuphela kodwa silendaba laye.
Indlela Yokukwenza:
• Lungiselela kuhle. Khululeka, umomotheke njalo ube lomusa.
• Kumele unanzelele. Kukhona yini okutshengisa ukuthi ulabantwana? Ulesivande kumbe ufuyile yini? Ulikholwa na? Mhlawumbe ungantshintsha intshumayelo yakho ukuze ihambelane lezimo zalowo muntu.
• Mcele aveze umbono wakhe ngendaba ethile njalo ungambambi umlomo nxa esakhuluma. Mkhangele nxa ekhuluma ukuze abone ukuthi umlalele. Mncome futhi ungamphikisi.
• Hambelana lezimo. Nxa kusenza ntshintsha intshumayelo yakho ukuze ukhulume ngalokho okumkhathazayo. Lokhu kakunzima ngoba amabhuku, amamagazini, lamaphetshana ethu alezindaba ezitshiyatshiyeneyo. Nxa ungamfica ebambekile, wothi fahlafahla ungathathi isikhathi eside.
Zama Ukwenza Okulandelayo Kulinyanga:
• Ngesikhathi sokukhonza kwemuli kumbe nxa lisekutshumayeleni, phurakithizani ukuthi lingantshintsha njani ingxoxo ukuze likhulume ngalokho okukhathaza umninimuzi.
• Emihlanganweni eliba layo lingakayi enkonzweni, umzalwane oqhubayo angaxoxa labamemezeli kumbe enze isiboniso sokuthi singatshengisa njani ukuthi silendaba labanye.