Izingoma Ezintsha Zokusebenzisa Ekukhonzeni!
1 Emhlanganweni owenziwa minyaka yonke, owe-Watch Tower Bible and Tract Society of Pennsylvania osanda kwedlula owenziwe ngo-October 4, 2014, kwaziswe abantu ngohlelo lokwenziwa kutsha kwesihlabelelo sethu. Lezo kwakuzindaba ezivusa usinga sibili! Bonke ababelapho bakhunjuzwa ukuthi izingoma zethu ziqakatheke kakhulu ekukhonzeni.—Hubo. 96:2.
2 Ungazibuza ukuthi, ‘Kanti vele kungani isihlabelelo sethu sesisenziwa kutsha?’ Kulezizatho ezithile ezenza lokho kwenziwe. Esokuqala ngesokuthi indlela esizwisisa ngayo iMibhalo iqhubeka ithuthuka, futhi lokho kungenza kube lesidingo sokuntshintsha amazwi ezingoma zethu. (Zaga. 4:18) Esinye isizathu sokwenza lokhu yikuthi amabala kanye lemitsho okusetshenziswe esihlabelelweni esilaso khathesi kuthethwe ku-New World Translation endala. Ngakho amazwi ezingoma lezo kumele antshintshwe ahambelane le-New World Translation entsha. Njengoba kuzakuba ngumsebenzi omkhulu ukuntshintsha amazwi ezingoma, kwenziwe isinqumo sokuthi kwengezelelwe ezinye izingoma ezintsha ezilutshwana esihlabelelweni sethu.
3 Kumele silindele ukuthi kuze kubuye isihlabelelo esitsha yini ukuze siqalise ukuhlabela izingoma ezintsha? Hatshi. Siyathokoza ukulazisa ukuthi izingoma ezintsha zizabe sezikhona kuWebhusayithi yethu i-jw.org ezinyangeni ezizayo. Nxa ingoma ethile entsha ingafakwa kuwebhusayithi, kuzahlelwa ukuthi ihlatshelwe ekucineni koMhlangano Wenkonzo futhi iyabe ibhalwe ukuthi “ingoma entsha.”
4 Singazifunda Njani Izingoma Ezintsha? Kungaba nzima ukufunda ingoma entsha. Lanxa kunjalo sifuna ukulingisela umhubi ngokuhlabela emhlanganweni yebandla futhi ‘singathuli.’ (Hubo. 30:12) Yenza lokhu okulandelayo nxa ufuna ukufunda ingoma entsha.
Phindaphinda ukulalela umculo orekhodiweyo wengoma entsha ozafakwa kuWebhusayithi yethu. Kuzaba lula ukuthi uyikhumbule ingoma le nxa ulokhu uqhubeka ulalela umculo lo.
Khangelisisa amazwi engoma futhi uzame ukuwabamba ngekhanda.
Hlabela amazwi ayo ulandela umculo. Qhubeka usenza njalo uze ube yazi.
Nxa lisenza ukuKhonza kweMuli, phurakithizani izingoma ezintsha kanengana kuze kube yilapho selizazi.
5 Ezinyangeni ezizayo nxa kulengoma entsha ezaphetha uMhlangano Wenkonzo, ibandla lizaqala lilalele umculo kanye lingakayihlabeli. Abalaleli bazayihlabela ingoma leyo belandela umculo orekhodiweyo njengoba nje sisenza ngezinye izingoma.
6 Ukuhlabela emihlanganweni yethu kwenza sidumise uJehova simanyene lesikhonza labo. Ngakho kakumelanga sibe lomkhuba wokuphonguphuma phandle nxa sekumele sihlabele emihlanganweni yethu yobuKhristu.
7 Ikhona enye indlela esingatshengisa ngayo ukuthi siyaziqakathekisa izingoma zethu ezingcwele. Kuba lomculo odlalwayo emihlanganweni yethu emikhulu ihlandla ngalinye lingakaqalisi. Kabili ngomnyaka, abafowethu labodadewethu abasuka ezindaweni ezehlukeneyo zomhlaba baya ePatterson, eNew York ngezimali zabo ukuze bayerekhoda umculo omuhle kakhulu owokusebenzisa ekukhonzeni kwethu. Ngakho kumele silalele nxa umgcinisihlalo esicela ukuthi sihlale phansi silalele umculo. Ukwenza njalo kuzasinceda ukuthi izinhliziyo zethu zikulungele ukwamukela lokho esiyabe sizakufunda.—Ezra. 7:10.
8 Lamuhla sizaphetha umhlangano wethu ngokuhlabela ingoma entsha ethi “The Kingdom Is in Place—Let It Come!” Ingoma le ike yahlatshelwa emhlanganweni owenziwa minyaka yonke futhi yenzelwe ukunanza iminyaka elikhulu yokubusa koMbuso.
9 Izingoma lezi ezintsha ‘ziyizinto ezinhle’ ezivela kuJehova. (Mat. 12:35a) Kasizimiseleni ukufunda izingoma lezi ezintsha futhi sizihlabele ngenhliziyo yonke, sidumisa uNkulunkulu wethu.—Hubo. 147:1.