Izingoma Ezisisondeza KuNkulunkulu

Umculo yisipho esiqakathekileyo esisiphiwe nguJehova. Uyenelisa ukusikhuthaza kanye lokutshintsha indlela esicabanga ngayo lesizizwa ngayo. Yikho kanye okwenzakalayo nxa singalalela izingoma ze-Broadcasting. Izingoma lezi zingenza lokuthi sisondele kuJehova.

Kusukela ngo-2014 sekwenziwe ezedlula 70 futhi ezinye izingoma lezo sezitholakala ngezindimi ezedlula 500! Mhlawumbe ungazibuza ukuthi ‘Ngobani abenza izingoma lezo lokuthi zenziwa njani?’

Ake Sibone Ukuthi Zenziwa Njani

Izingoma ze-Broadcasting zenziwa liqembu labafowethu labodadewethu abasehlangothini lwe-Audio/Video oluqondiswa yiKhomithi Yokufundisa yeQula Elikhokhelayo. Iqembu leli lilabantu abangu-13 abancedisa ukubhala izingoma, ukuzihlanganisa lokuhlela yonke imisebenzi ephathelane lokuphuma kwazo. IKhomithi Yokufundisa isinike imvumo yokuthi labo abancedisa eBhetheli besezindlini bancedise emsebenzini lo, kungaba yikubhala izingoma, ukutshaya iziginci kumbe ukuhlabela. Abafowethu labodadewethu laba basebenzisa iziphiwo zabo kodwa lokhu abakwenzeli ukubukwa kumbe ukuthi badunyiswe.

Yenziwa njani ingoma ye-Broadcasting? Okokuqala, iKhomithi Yokufundisa iyakhetha ukuthi ingoma leyo kumele isekelwe kuwuphi uMbhalo lokuthi kumele yenze labo abazayilalela bazwe njani. Ngemva kwalokho iqembu le-Audio/Video lenza uhlelo lokuthi kwenziwe umculo wengoma leyo njalo kubhalwe lamazwi engoma. Ingoma le iyarekhodwa, iKhomithi Yokufundisa ibisiyihlola itsho ukuthi ingalungiswa ngaphi. Iqembu le-Audio/Video liyayilungisa beselirekhoda ingoma eyiyo ezaphuma ku-Broadcasting. Izingoma lezi zirekhodelwa ezindaweni ezitshiyeneyo okugoqela egatsheni lasezindlini zabafowethu labodadewethu.

Abafowethu basebenzisa inhlelo zekhompiyutha ezitshiyeneyo ukuze benze izingoma ze-Broadcasting futhi bazirekhode. Kusetshenziswa lezinto ezifanana leziginci, izinto zokuhlanganisa umculo, ama-amplifier, izipikha lamamayikhi. Imayikhi eyodwa ingaba yi-$100 kusiya ku-$1 000 (U.S.). Ngo-2020 sisebenzise imali engange-$116 000 (U.S) sithenga imitshina yokurekhoda.

Kuyini okwenziweyo ukuze senelise ukonga iminikelo? Kulokuthi kube leqembu elikhulu labafowethu labodadewethu eBhetheli, kusetshenziswe kakhulu abancedisa eBhetheli besezindlini. Akuzange kubuthaniswe abafowethu labodadewethu abatshiyeneyo ukuthi bazotshaya iziginci kodwa kusetshenziswe inhlelo zekhompiyutha ukuze kwenziwe umculo.

“Zenza Ukholo Lwami Luhlale Luqinile”

Abafowethu labodadewethu bayakuthanda ukulalela izingoma ze-Broadcasting. UTara ohlala eGermany uthi: “Izingoma lezi zinginceda ukuthi ngihlaliseke nxa ngikhathazekile. Nxa ngizilalele ngolimi lwami, kuyabe kungathi uJehova ungigonile.” UDmitry ohlala eKazakhstan uthi: “Kumnandi ukulalela izingoma ngingakhathazekanga ukuthi zingaba lokunye okungahambisani lezimiso zeBhayibhili. Izingoma lezi zinginceda lokuthi ngihlale ngicabanga ngobuhlobo bami loJehova.”

UDelia ohlala eSouth Africa uyasitshela ukuthi ingoma lezi zenza azwe njani. Uthi: “Zenza ukholo lwami luhlale luqinile. Nxa ngidanile kumbe ngilohlupho oluthile, angiyisweli ingoma ehambelana lesimo engiyabe ngikuso. Izikhathi ezinengi, itshuni nje yengoma ihle ingenze ngizwe ngcono.”

Kulengoma abanye abazithandayo. ULerato laye ohlala eSouth Africa uthi: “Ingoma ethi ‘Sekuseduze’ lethi ‘Emhlabeni Omutsha’ zenza ngizibone sengihlangabeza umama esevusiwe. Sonke isikhathi ngingalalela ingoma lezo, ngibona umama engigijimela evule izandla.”

Enye ingoma yamnceda kakhulu omunye udade oleminyaka engu-16 ohlala eSri Lanka. Uthi: “Umbalisi wami wesayensi wakhuluma izinto ezimbi ngami phambi kwabanye abantwana ekilasini ngenxa yokuthi nginguFakazi kaJehova. Ngesaba ngaswela lokuthi ngithini. Ngathi ngifika ngekhaya umama wangikhuthaza ukuthi ngilalele ingoma ethi ‘Taditsha Uqine.’ Ingoma le yanginceda ngabona ukuthi kumele ngichwayisise ukuze ngithole indlela yokuphendula umbalisi wami. Ngelanga elilandelayo ngakhuluma laye. Wangilalela wasesitsho ukuthi khathesi wayesekuzwisisa lokho okukholwa ngoFakazi bakaJehova. Ngiyayibonga inhlanganiso kaJehova ngokusinika izingoma ezinceda kangaka.”

Ivela ngaphi imali yokwenza izingoma lezi? Ivela eminikelweni eyenzelwa umsebenzi womhlaba wonke futhi iminikelo eminengi yenziwa kusetshenziswa izindlela ezitholakala ku-donate.jw.org. Siyalibonga kakhulu ngeminikelo yenu.