Ukuthuthukisa Indlela Esitshumayela Ngayo—Ukuphendula Umninimuzi Ocaphukileyo
Kungani Kuqakathekile? Abantu abanengi esibatshumayezayo balenhlonipho. Kodwa uJesu wathi abanye abantu babezasizonda. (Joh. 17:14) Ngakho-ke kakumelanga simangale nxa singahlangana lomninimuzi ongafuni ukusilalela. Nxa singahlangana lomninimuzi onjalo, sifuna ukuphendula ngendlela ezathokozisa uJehova okunguye esimmelayo. (Rom. 12:17-21; 1 Phet. 3:15, 16) Ukwenza lokhu kuzafanana lokubhula umlilo. Kuzakwenza ukuthi umninimuzi kanye lalabo abakhangeleyo bafune ukulalela ngesikhathi esizayo nxa oFakazi bakaJehova bebavakatshela.—2 Khor. 6:3.
Indlela Yokukwenza:
• Ungacaphuki kodwa qhubeka ulomusa. Lokhu kuzakwenza ingxoxo yenu ingalavuki ibe lilangabi lomlilo. Ungaboni angani umninimuzi uzondele wena. (UmTshu. 7:9) Kungenzakala ukuthi ufike ngesikhathi esingayisiso kumbe kulokuthile okumkhathazayo. Izikhathi ezinengi okwenza umuntu angakuthandi lokho esikutshoyo yikuthi angabe etshelwe amanga ngathi.—2 Khor. 4:4.
• Mphendule kuhle futhi ngamazwi athobileyo. (Zaga. 15:1) Umvuse ebuthongweni yini kumbe umphazamise esenza okuthile? Lanxa singeke saxolisa ukuthi siyatshumayela, kumele simxolise ukuthi sifike ngesikhathi esingayisiso. Ucatshulwe ngamanga athile awezwayo mayelana lathi yini? Nxa kunjalo, ungathi: “Ngiyazwisisa ukuthi kungani ucaphukile. Kodwa kukhanya angani lokho okuzwileyo mayelana lathi akusilo qiniso. Ngingakuchasisela yini?” Kulokuthile yini esikukholwayo angavumelani lakho, ngokwesibonelo indaba yokususwa kumbe eyegazi? Ungathi: “Ngiyakuzwisisa. Sesake sahlangana labanye abakhathazekileyo ngodaba lolu. Ngingakutshengisa yini eBhayibhilini ukuthi lokho sikuthatha ngaphi?”
• Nxa kuyikuthi ufice umninimuzi esidla amahabula, kungaba ngcono ukuthi usuke kulokuthi uzame ukumphendula. Nxa engathi singaphindi silugxobe emzini wakhe, singamqinisekisa ukuthi sizakwenza lokho akufunayo.
Zama Ukwenza Okulandelayo Kulinyanga:
• Ngesikhathi lisenza ukukhonza kwemuli, phurakithizani ukuthi lingamphendula njani umninimuzi ocaphukileyo.
• Nxa selisukile kumninimuzi obecaphukile, xoxa lohamba laye ukuthi ubungenzani ukuze uphendule ngendlela engcono.