UMdali Wethu Olothando Ulendaba Lathi

1. UMDALI WETHU WENZA ILANGA LIPHUME

Akulalutho obelungaphila emhlabeni aluba ilanga kalikho. Ilanga lenza ukuthi izihlahla zihlume, zibe lamaluba, izithelo kanye lentanga. Lenza lokuthi izihlahla zimunye amanzi ngempande, amanzi lawa ayaqansa aye emahlamvini abesesiya emkhathini.

2. UMDALI WETHU WENZA IZULU LINE

Izulu yisipho esiligugu esivela kuNkulunkulu futhi lenza ukuthi sithole ukudla. UNkulunkulu usinika izulu kanye lezikhathi zenala, asisuthise ngokudla njalo agcwalise izinhliziyo zethu ngentokozo.

3. UMDALI WETHU USINIKA UKUDLA LOKOKUGQOKA

Obaba abanengi bayakhathazeka ngokuthi izimuli zabo bazazondla ngani. Zwana ukuthi iMibhalo ithini: “Khangelisisani izinyoni zezulu; kazihlanyeli, kazivuni futhi kazibutheli kudla eziphaleni, kodwa uYihlo osezulwini uyazinika ukudla. Kanti lina kaliqakathekanga kakhulu kulazo na?”—UMathewu 6:25, 26.

“Fundani endleleni amaluba eganga akhula ngayo . . . ; kodwa ngilitshela ukuthi ngitsho loSolomoni enkazimulweni yakhe yonke kazange acece njengelilodwa lawo. Manje nxa uNkulunkulu ezigqokisa njalo izinto ezimila egangeni . . . , ngeke yini azimisele kakhulu ukuligqokisa lina elilokholo oluncane?”—UMathewu 6:28-30.

Njengoba uNkulunkulu esenelisa ukusinika ukudla lokokugqoka, kambe ukuthi angehluleka ukusinika ezinye izinto eziqakathekileyo empilweni? Nxa singazimisela ukwenza intando kaNkulunkulu, uzasincedisa. Ngokwesibonelo, nxa singalima uzakhulisa izilimo zethu besesithola ukudla, nxa sidinga umsebenzi uzasincedisa ukuthi siwuthole besesizuza imali yokuthenga esiyabe sikudinga.—UMathewu 6:32, 33.

Esesikufundile ngelanga, ngezulu, ngezinyoni langamaluba kusenza simthande uNkulunkulu. Esihlokweni esilandelayo sizaxoxa ngokuthi uMdali wethu ukhuluma njani lathi.