Ukuzondana Kuzaphela Kungaphindi Kube Khona
Lanxa singayikhipha ezinhliziyweni zethu inzondo, ngeke senelise ukwenza ukuthi abanye bangabi layo. Abanye abantu bayazondwa lanxa bengenzanga lutho. Manje ngubani ozakuqeda ukuzondana?
UJehova uNkulunkulu nguye kuphela ongakuqeda ukuzondana. Yikho kanye iBhayibhili elithi uzakwenza.—IZaga 20:22.
UNKULUNKULU UZAQEDA LOKHO OKUBANGELA UKUZONDANA
1. USATHANE UDEVELI. Ingilosi eyahlamukayo uSathane yiyo ebangela ukuzondana konke esikubonayo lamuhla. UNkulunkulu uzabhubhisa uSathane labo bonke abazonda abanye.—IHubo 37:38; KwabaseRoma 16:20.
2. UMHLABA KASATHANE. UNkulunkulu uzakhipha bonke ababangela ububi emhlabeni okugoqela abakhokheli bezombusazwe abalobugwelegwele kanye labakhokheli bamasonto abenza kube lokuzondana. UNkulunkulu uzaphinda akhiphe labo bonke osomabhizimusi abayizihwaba, abalobugwelegwele futhi abacindezela abantu.—2 UPhetro 3:13.
3. ISONO. IBhayibhili lithi bonke abantu balesono, okutsho ukuthi baba lemicabango emibi, izifiso ezimbi njalo benze lezinto ezingaqondanga. (KwabaseRoma 5:12) Okunye esikwenzayo ngenxa yokuthi silesono yikuzonda abanye kanye lokubaphatha kubi. UNkulunkulu uzasincedisa ukuthi sinqobe konke lokhu ukuze ukuzondana kungaphindi kube khona.—U-Isaya 54:13.
IBHAYIBHILI LISITHEMBISA UMHLABA OYABE UNGASELA KUZONDANA
1. KUYABE KUNGASELA MUNTU OPHATHA KUBI ABANYE. Umhlaba uyabe usubuswa nguMbuso kaNkulunkulu. UMbuso lo uzabusa usezulwini futhi wenze ukuthi kube lokulunga emhlabeni kuze kube nini lanini. (UDanyeli 2:44) Ubandlululo luyabe lungasekho. UNkulunkulu uzakwenza ukuthi wonke umuntu ahlulelwe kuhle.—ULukha 18:7.
2. WONKE UMUNTU UZABE ESELOKUTHULA. Akulamuntu ozahlupheka ngenxa yodlakela kumbe izimpi. (IHubo 46:9) Umhlaba uzakuba yindawo evikelekileyo ngoba kuyabe sekugcwele ukuthula.—IHubo 72:7.
3. WONKE UMUNTU UZAPHILA PHAKADE KUNGASELA KUZONDANA. Bonke abantu bayabe sebethandana. (UMathewu 22:39) Akulamuntu ozakhathazwa yimicabango kumbe yizinto ezadlula kudala. (U-Isaya 65:17) Nxa kungasela kuzondana bonke abantu ‘bazakholisa ukuthula okukhulu.’—IHubo 37:11.
Uyafuna yini ukuphila emhlabeni onjalo? Khathesi banengi abantu abenza lokho okutshiwo liBhayibhili ukuze banqobe inzondo. (IHubo 37:8) Lokhu yikho kanye okwenziwa ngoFakazi bakaJehova emhlabeni wonke. Lanxa belamasiko atshiyeneyo futhi bekhuliswe ngendlela ezitshiyeneyo, bamanyene futhi bayathandana.—U-Isaya 2:2-4.
OFakazi bakaJehova bangakuthanda ukukutshela lokho abakufundileyo mayelana lokunqoba ukuphathwa kubi lobandlululo. Ozakufunda kuzakunceda ukuthi utshiye inzondo futhi ufunde ukuthanda abanye. Lawe ungakuthola okungakunceda ukuthi uphathe abanye kuhle lanxa belenzondo futhi bengabantu abangabongiyo. Lokhu kuzakwenza ukuthi uthokoze khathesi futhi ube labangane abanengi. Okuqakatheke kakhulu yikuthi uzafunda ukuthi ungenzani ukuze uphile emhlabeni oyabe usubuswa nguNkulunkulu futhi oyabe ungasela kuzondana.—IHubo 37:29.