Bancedise Bakhethe Ukukhonza UJehova

1-2. (a) Kungani abanye bethikaza ukukhetha ukukhonza uJehova? (b) Sizaxoxa ngani esihlokweni lesi?

KULEZINTO ezazikwenza uthikaze ukuba nguFakazi kaJehova yini? Wawusesaba yini ukuthi mhlawumbe abangakini, abangane bakho, labanye osebenza labo bazakusola kumbe bakuchothoze ngenxa yesinqumo sakho? Kumbe wawuzitshela ukuthi awusoze wenelise ukulandela imithetho kaNkulunkulu? Nxa lokhu kwake kwenzakala kuwe, mhlawumbe uyabazwisisa abantu abafunda iBhayibhili abathikazayo ukuba ngoFakazi.

² UJesu wayekwazi ukuthi izinto ezinjengalezi zingenza umuntu acine engamkhonzi uJehova. (Mat. 13:​20-22) Kodwa kazange ahle abakhalale labo ababethikaza ukuba ngabalandeli bakhe, wayezimisele ukubancedisa. Wancedisa abalandeli bakhe ukuthi (1) babone okwakumele bakwenze ukuze bathuthuke, (2) bamthande kakhulu uJehova, (3) batshintshe izinto abaziqakathekisayo empilweni, futhi (4) banqobe ubunzima ababezahlangana labo. Singamlingisela njani uJesu ukuze sincedise labo esifunda labo iBhayibhili ukuthi bakhethe ukukhonza uJehova sisebenzisa ibhuku elithi Ungathokoza Kuze Kube Nini Lanini!?

NCEDISA OFUNDA LAYE IBHAYIBHILI ABONE OKUMENZA ANGATHUTHUKI

3. Kuyini okungabe kwenza kwaba nzima ukuthi uNikhodemu abe ngumfundi kaJesu?

³ UNikhodemu wayengumbusi wamaJuda owayehlonitshwa kakhulu kodwa kukhona okwakumvimbela ukuthi abe ngumfundi kaJesu. Kwathi kusanda kudlula inyanga eziyisithupha nje uJesu eqalise inkonzo yakhe, uNikhodemu wakunanzelela ukuthi uJesu wayethunywe nguNkulunkulu. (Joh. 3:​1, 2) Lanxa kunjalo, uNikhodemu wakhetha ukuyabona uJesu engabonwa ngabantu ‘ngoba esesaba amaJuda.’ (Joh. 7:13; 12:42) Mhlawumbe wayezitshela ukuthi uzalahlekelwa ludumo ayelalo nxa engakhetha ukuba ngumfundi kaJesu.a

4. UJesu wamncedisa njani uNikhodemu?

⁴ UNikhodemu wayewazi engawuphumputhi uMthetho kodwa kwakumele ancediswe ukuze azwisise ukuthi uJehova wayekhangeleleni kuye. Manje uJesu wamncedisa njani? Wayezimisele ukusebenzisa isikhathi sakhe ukuze ancedise uNikhodemu, lokhu ekwenza ngitsho lasebusuku. Kukhanya uJesu watshela uNikhodemu lokho okwakumele akwenze ukuze abe ngumfundi wakhe: Kwakumele aphenduke ezonweni zakhe, abhabhathizwe, abesetshengisa ukuthi ulokholo eNdodaneni kaNkulunkulu.—Joh. 3:​5, 14-21.

5. Ungamncedisa njani umuntu ofunda laye iBhayibhili ukuthi athuthuke?

⁵ Lanxa umuntu esifunda laye iBhayibhili engakhanya eyizwisisa iMibhalo, angadinga ukuncediswa abone okumenza angathuthuki. Kungenzakala yini ukuthi umsebenzi wokuziphilisa kumbe ukuphikiswa ngabemuli yikho okumbisela emuva. Lawe zinike isikhathi sokuncedisa ofunda laye njengalokho okwakusenziwa nguJesu. Mhlawumbe ungamnxusa ukuthi like lizikwejisele ukuze umenze akhululeke ukukhuluma ngobunzima angabe ehlangana labo. Mncedise abone izinto okumele azitshintshe ukuze athokozise uJehova. Uphinde umkhumbuze ukuthi lokho kakwenzeli ukuthokozisa wena kodwa ukwenzela ukuthi amukelwe nguJehova.

6. Kuyini okunye okumele ukwenze ukuze uncedise ofunda laye iBhayibhili? (1 Khorinte 16:13)

⁶ Nxa umuntu ofunda laye iBhayibhili engathandabuzi ukuthi uJehova uzamncedisa, uzaba lesibindi sokusebenzisa lokho akufundayo. (Bala u-1 Khorinte 16:13.) Umsebenzi wakho singawufanisa lalowo owenziwa ngumbalisi esikolo. Usamkhumbula yini umbalisi owawumthanda ngensuku usafunda? Kungenzakala ukuthi ngulowana owayetshona ekukhuthaza ukuthi ungazikhangeleli phansi kodwa uzithembe. Yikho kanye lawe okumele ukwenze. Umsebenzi wakho awusiwo wokufundisa umuntu lokho okuseBhayibhilini kuphela kodwa kumele umkhuthaze futhi umncedise abone lapho okumele athuthukise khona. Manje ungakwenza njani lokho?

MNCEDISE ATHANDE UJEHOVA

7. UJesu wabancedisa njani labo ababemlalele ukuthi bamthande kakhulu uJehova?

⁷ UJesu wayekwazi ukuthi nxa abafundi bakhe bengathanda uNkulunkulu kuzabalula ukuthi basebenzise lokho abakufundayo. Wayehlala ebafundisa izinto ezazizabanceda ukuthi bamthande kakhulu uYise osezulwini. Ngokwesibonelo, wafanisa uJehova lobaba onika abantwabakhe izipho ezinhle. (Mat. 7:​9-11) Kungenzeka ukuthi abanye babantu ababemlalele babengakhuliswanga ngobaba abalothando. Akucabange ukuthi bezwa njani ngesikhathi uJesu ebaxoxela indaba kababa owamukela kuhle indodana yakhe eyayihambe yayakwenza izinto ezimbi. Kufanele ukuthi basala bengathandabuzi ukuthi uJehova uyabathanda.—Luk. 15:​20-24.

8. Ungamncedisa njani umuntu ofunda laye ukuthi amthande kakhulu uJehova?

⁸ Lawe nxa ufunda lomuntu iBhayibhili mncedise abone ukuthi uJehova muhle kangakanani. Lokho kuzakwenza ukuthi amthande kakhulu. Ngesikhathi lifunda, zama ukumncedisa abone ukuthi lokho akufundayo kutshengisa njani ukuthi uJehova uyamthanda. Ake sithi lifunda ngenhlawulo, zama ukumncedisa abone ukuthi imnceda njani futhi itshengisa njani ukuthi uJehova uyamthanda. (Rom. 5:8; 1 Joh. 4:10) Kuzabalula ukuthi umuntu omfundisayo amthande kakhulu uJehova nxa ungamcacisela ukuthi uJehova ngokwakhe uyamthanda lokuthi ulendaba laye.—Gal. 2:20.

9. Kuyini okwanceda uMichael ukuthi atshintshe indlela ayephila ngayo?

⁹ Kulendoda okuthiwa nguMichael ehlala e-Indonesia. Indoda le yake yafunda iBhayibhili kudala kodwa kayizange ibhabhathizwe. Yathi isileminyaka engu-18 yasuka yayadinga umsebenzi emazweni. Yafika yaba ngumtshayeli wamagonyethi. Ngokuhamba kwesikhathi uMichael waba lemuli kodwa wayitshiya e-Indonesia yena wasebuyela emazweni. Ngalesosikhathi, umkakhe lendodakazi yakhe baqalisa ukufunda iBhayibhili futhi babekhanya bethuthuka. Unina watshona yikho uMichael wabona kungcono ukuthi abuyele e-Indonessia ayekhangela uyise futhi waqalisa ukufunda iBhayibhili. Bathi behlola ingxenye ethi: “Gebha Ujule” esifundweni 27 sebhuku elithi Ungathokoza! uMichael wasala etshe amathe. Ngesikhathi ecabangisisa ngokuthi uJehova wayengabe esizwa njani lapho ebona iNdodana yakhe ihlukuluzwa, zehla zodwa. Kusukela khonapho wahle wafunda ukuyiqakathekisa inhlawulo njalo watshintsha indlela ayephila ngayo wasebhabhathizwa.

MNCEDISE AQAKATHEKISE UKUKHONZA UJEHOVA

10. UJesu wabancedisa njani abafundi ukuthi baqakathekise umsebenzi wokutshumayela? (ULukha 5:​5-11) (Khangela lomfanekiso.)

¹⁰ Abafundi bakaJesu bahle bananzelela ukuthi uJesu nguye uMesiya owayethenjisiwe kodwa babengakakuzwisisi ukuthi umsebenzi wokutshumayela uqakatheke kanganani. UPhetro lo-Andreya babevele sebengabafundi ngesikhathi uJesu ebabiza ukuthi babe ngabalandeli bakhe okwesikhathi sonke. (Mat. 4:​18, 19) Babelebhizinesi yabo yenhlanzi eyayihamba futhi kukhanya babesebenza loJohane loJakhobe. (Mak. 1:​16-20) Kufanele ukuthi ngesikhathi uPhetro lo-Andreya betshiya ibhizinesi yabo basebehlelile ukuthi izimuli zabo bazazondla njani. Kuyini okwenza baqakathekisa ukutshumayela ukwedlula ukugola inhlanzi? KuLukha 5:​5-11 (Bala) sitshelwa ngesimangaliso esenziwa nguJesu esanceda abafundi ukuthi bangathandabuzi ukuthi uJehova kasoze abalahle.

11. Kuyini okunye esingakwenza ukuze sincedise abantu esibafundisayo?

¹¹ Angeke senelise ukwenza izimangaliso njengoJesu kodwa singenelisa ukuxoxela abanye indlela uJehova ancedisa ngayo labo abaqakathekisa ukumkhonza. Ngokwesibonelo, usakhumbula yini ukuthi uJehova wakuncedisa njani ngesikhathi uqala ukungena imihlangano? Mhlawumbe kwasekumele uchasisele umqhatshi wakho ukuthi akusavumi ukuthi uphuze ukutshayisa ngoba kuyabe kumele uye emihlanganweni. Chasisela umuntu omfundisayo ukuthi ukubona indlela uJehova akuncedisa ngayo ngesikhathi leso kwaluqinisa njani ukholo lwakho.

12. (a) Kungani kumele uhambe labantu abatshiyeneyo nxa usiyabona umuntu ofunda laye iBhayibhili? (b) Ungawasebenzisa njani amavidiyo ukuze ancedise umfundi wakho? Nika isibonelo.

¹² Okunye okunganceda abantu esifunda labo iBhayibhili yikuzizwela okwenzakala ezimpilweni zabafowethu labodadewethu abatshiyeneyo abakhetha ukukhonza uJehova. Yikho nxa kulomuntu ofunda laye iBhayibhili zama ukuhamba labantu abatshiyeneyo nxa usiyafunda laye. Bacele baxoxele umfundi wakho ukuthi kuyini okwenza babangoFakazi lokuthi benzani ukuze baqakathekise ukukhonza uJehova. Kanti njalo, zinike isikhathi sokumbukelisa amavidiyo asengxenyeni ethi “Gebha Ujule” loba ethi “Thola Okunengi” ebhukwini elithi Ungathokoza Kuze Kube Nini Lanini! Ngokwesibonelo, nxa selifike kusifundo 37, lingaxoxa ngemicijo etholakala kuvidiyo ethi UJehova Uzasinika Esikudingayo.

MNCEDISE ANQOBE UBUNZIMA ANGAHLANGANA LABO

13. UJesu wabatshelani abafundi bakhe?

¹³ UJesu watshela abafundi bakhe kanengi ukuthi babezaphikiswa kwezinye izikhathi. Babengaphikiswa ngabantu nje kumbe yizihlobo zabo. (Mat. 5:11; 10:​22, 36) Wathi esezakufa watshela abafundi bakhe ukuthi labo babengabulawa ngenxa yokuthi bakhonza uJehova. (Mat. 24:9; Joh. 15:20; 16:2) Wabakhuthaza ukuthi bahlale bevuse amehlo nxa besekutshumayeleni. Wabatshela lokuthi bangahluphani lalabo ababaphikisayo kodwa bananzelele lokho abakutshoyo labakwenzayo ukuze benelise ukuqhubeka betshumayela.

14. Singamncedisa njani esifunda laye iBhayibhili ukuthi akulindele ukuphikiswa? (2 KuThimothi 3:12)

¹⁴ Lathi singancedisa esifunda labo iBhayibhili ukuthi bakulindele ukuphikiswa. Bangaphikiswa ngabasebenza labo, abangane kumbe izihlobo zabo. (Bala u-2 Thimothi 3:12.) Abanye emsebenzini bangabahleka ngenxa yokuthi sebeqalise ukufunda iBhayibhili. Izihlobo zabo zingaqala ukubaphikisa kumbe zikhulume kubi ngalokho asebekukholwa. Yikho ungaphozisi amaseko kodwa wohle umfundise ukuthi angamelana njani lobunzima.

15. Kuyini okunganceda umfundi nxa ephikiswa yizihlobo?

¹⁵ Nxa ofunda laye ephikiswa yizihlobo zakhe, mncedise acabangisise ngokuthi kuyini okungabe kubangela lokhu. Mhlawumbe zingabe zicabanga ukuthi senguthathekile kumbe ziyabe zitshelwe amanga ngalokho esikukholwayo. Angithi lezinye izihlobo zikaJesu zake zacabanga ukuthi usephambene. (Mak. 3:21; Joh. 7:5) Mfundise ukuthi abekezele futhi akhulume kuhle labanye, okugoqela lezihlobo zakhe.

16. Singamncedisa njani umfundi ukuthi abe lonanzelelo nxa exoxela izihlobo zakhe lokho akufundileyo?

¹⁶ Lanxa ezinye izihlobo zingakhanya angathi zifuna ukuzwa okunengi, umfundi akumelanga ahle azitshele konke akwaziyo okuseBhayibhilini. Ngoba angenza njalo angacina esebadaka. Ngakho mkhuthaze ukuthi nxa exoxela abanye lokho akufundileyo angahle akhothe kodwa atshiyele lakusasa. (Kol. 4:6) Okunye angakwenza yikucela izihlobo zakhe ukuthi zikhangele okunengi ku-jw.org. Lokhu kuzazinceda ukuthi zifunde okunengi mayelana laboFakazi bakaJehova kungelamuntu ozitshumayezayo.

17. Ungamncedisa njani umfundi ukuthi enelise ukuchasisela abantu lokho akukholwayo? (Khangela lomfanekiso.)

¹⁷ Ungasebenzisa lengxenye eku-jw.org ethi “Imibuzo Ejayele Ukubuzwa Ngabantu Mayelana LaboFakazi BakaJehova” ukuze uncedise umfundi wakho athole indlela angaphendula ngayo izihlobo zakhe kumbe labo asebenza labo. (2 Thim. 2:​24, 25) Nxa seliphetha isifundo, lingekeli ukuxoxa ngengxenye leyana ethi “Abanye Bathi” esebhukwini elithi Ungathokoza Kuze Kube Nini Lanini! Mkhuthaze ukuthi ahlale elungiselele ukuthi uzabachasisela njani abanye lokho akukholwayo futhi akubeke ngamazwi akhe. Nxa kuvuma mnike amacebo angamnceda ukuthi achasise akukholwayo. Lokho kuzamnceda abelesibindi futhi ahlale ekwazi ukuthi uzabaphendula njani abantu.

18. Ungenzani ukuze ukhuthaze umfundi ukuthi aqalise ukutshumayela? (UMathewu 10:27)

¹⁸ UJesu watshela abalandeli bakhe ukuthi kumele batshumayele izindaba ezinhle ebantwini. (Bala uMathewu 10:27.) Umfundi angavele aqale ukuxoxela abanye lokho akukholwayo, kubalula ukuthi athembe uJehova. Ungamncedisa njani umfundi ukuthi aqalise ukutshumayela? Nxa kuzakuba lomkhankaso endaweni elikuyo, khuthaza umfundi wakho acabangisise ngokuthi kuyini angakwenza ukuze abe ngummemezeli. Mchasisele ukuthi ukutshumayela kulula kakhulu nxa kungumkhankaso. Okunye okungamnceda yikubhalisa ukwenza izinkulumo emihlanganweni yaphakathi kweviki. Lokho kuzamnceda ukuthi enelise ukuchasisa ngcono lokho akukholwayo.

MTHEMBE

19. UJesu watshengisa njani ukuthi wayebathemba abafundi bakhe futhi thina singamlingisela njani?

¹⁹ UJesu wathi engakabuyeli ezulwini watshela abafundi bakhe ukuthi uzaphinda abelabo ngelinye ilanga. Abazange bazwisise ukuthi uJesu wayesithi bazahlangana ezulwini. Lanxa wananzelela ukuthi abakuzwisisanga ayekutsho, kazange abasole ngoba wayebona ukuthi bayafuna ukukhonza uJehova. (Joh. 14:​1-5, 8) Wayekwazi ukuthi kwakuzathatha isikhathi ukuthi bazwisise ezinye izinto. (Joh. 16:12) Lathi kumele sibathembe abantu esibafundisayo singathandabuzi ukuthi bayafisa ukukhonza uJehova.

20. Udadewethu ohlala eMalawi watshengisa njani ukuthi uyamthemba umuntu ayefunda laye iBhayibhili?

²⁰ Ake sixoxe ngokwenzakala komunye udadewethu ohlala eMalawi okuthiwa nguChifundo. UChifundo waqalisa ukufunda iBhayibhili lomama okuthiwa ngu-Alinafe owayengena iRoma. Bathi sebekusifundo-14 sebhuku elithi Ungathokoza Kuze Kube Nini Lanini! uChifundo wabuza umama lo ukuthi uthini ngokukhonza izithombe. Umama lo wazonda wasesithi, “Umuntu uyazikhethela akufunayo!” Udadewethu wayesezibuza ukuthi pho umama lo kasoze akhalale yini ukufunda iBhayibhili. Lanxa kunjalo wambekezelela, waqhubeka efunda laye elethemba lokuthi ngokuhamba kwesikhathi uzakuzwisisa ukuthi akuqondanga ukukhonza izithombe. Bathi sebekusifundo 34 udadewethu wambuza umbuzo lowana othi: “Ukufunda okunengi ngoJehova uNkulunkulu weqiniso sekukuncede njani?” Udadewethu uthi umama lo, “walandisa izinto ezinengi ayesezifundile njalo waphinda watsho lokuthi oFakazi abenzi loba yini iBhayibhili elithi kayiqondanga.” Ngemva kwalokho u-Alinafe watshiya ukukhonza izithombe wasebhabhathizwa.

21. Singamncedisa njani umfundi ukuthi abelesibindi sokukhonza uJehova?

²¹ Lanxa kunguJehova “okhulisayo,” lathi silomsebenzi wokuncedisa abantu esibafundisa iBhayibhili ukuthi bathuthuke. (1 Khor. 3:7) Asibafundiseli ukuqeda ibhuku nje kodwa siyabancedisa ukuthi bamthande kakhulu uJehova. Siyabakhuthaza lokuthi baqakathekise ukukhonza uJehova ukwedlula loba yini. Okunye esikwenzayo yikubafundisa ukuthi bathembe uJehova nxa behlangana lenhlupho. Nxa singatshengisa ukuthi siyabathemba, labo bazaba lesibindi sokukhonza uJehova.