Imali Esetshenziswe Ukuthenga Izikhali Zempi Isisedlula $2 Trillion—IBhayibhili Lithini?

Ngo-2022 kusetshenziswe imali engange-2,24 triliyoni eyamadola eMelika kuthengwa izikhali zempi. Lokhu kubangelwe kakhulu yimpi ekhona phakathi kweRussia le-Ukraine. Ngo-April 2023 inhlanganiso ebizwa ngokuthi yiStockholm International Peace Research Institute (SIPRI), yethula umbiko othi:

• Imali esetshenziswe empini ngo-2022 kwele-Europe “ikhwele ngamaphesenti angu-13 futhi inani lemali leyo belilikhulu ukwedlula inani lemali eyake yasetshenziswa empini kusukela ngo-1991.”

• ‘IRussia yengezelele imali eyisebenzisa empini ngamaphesenti angaba ngu-9.2 njalo lokhu kwenze yasuka ekubeni lilizwe lesihlanu elisebenzisa imali enengi empini, yaba ngelesithathu emhlabeni wonke.’

• I-United States ilokhu isebenzisa imali enengi empini ukwedlula wonke amazwe asemhlabeni. Emalini esetshenziswa ngamazwe wonke empini, i-United States isebenzisa amaphesenti angu-39.”

Isikhwicamfundo okuthiwa nguNan Tian, ongomunye wababhala umbiko we-SIPRI uthi: “Izimali ezinengi ezilokhu zisetshenziswa ezimpini emhlabeni wonke zitshengisa ukuthi siphila emhlabeni ongavikelekanga.”

IBhayibhili lavele lasitshela ukuthi amazwe alamandla ayezaqhubeka elwisana futhi liphinda lisitshele ukuthi kuyini okuzakwenza kube lokuthula emhlabeni.

IBhayibhili lakhuluma ngokulwisana kwamazwe

• IBhayibhili lithi siphila ‘esikhathini sokucina.’—UDanyeli 8:19.

• Ibhuku likaDanyeli lathi ngalesosikhathi kwakuzakuba lemibuso elamandla emhlabeni ezabe incintisana. Imibuso le ‘yayizafuqana,’ okutsho ukuthi yayizalwisana ngenxa yokuthi ngamunye ufuna kube yiwo olamandla kulemibuso yonke emhlabeni. Ekulwisaneni kwabo basebenzisa ‘amagugu’ kumbe imali enengi.—UDanyeli 11:40, 42, 43.

Ukuze ufunde okunengi ngesiphrofetho lesi esiseBhayibhilini bukela ividiyo ethi, Isiphrofetho Esagcwalisekayo—UDanyeli Isahluko 11.

Kuyini okuzaletha ukuthula?

• IBhayibhili lithi uNkulunkulu uzasusa ohulumende babantu. “Uzabeka umbuso ongasoze utshabalaliswe. Umbuso lowo awusoze udluliselwe kwabanye abantu. Uzayibhidliza yonke imibuso le uyiqede du njalo yiwo wodwa ozakuma kuze kube nini lanini.”—UDanyeli 2:44.

• Sekuseduze ukuthi uJehovaa uNkulunkulu enze lokho abantu abehluleka ukukwenza, uzaletha ukuthula kweqiniso okungapheliyo. Uzakwenza njani lokho? UMbuso wakhe osezulwini uzazitshabalalisa zonke izikhali zempi kanye lodlakela.—IHubo 46:8, 9.

Ukuze ufunde okunengi ngalokho okuzakwenziwa nguMbuso kaNkulunkulu bala isihloko esithi “Ngaphansi KoMbuso KaNkulunkulu ‘Ukuthula Kuzakwanda.’”