OFakazi BakaJehova Bayavuma Yini Ukuhlatshwa Ukuze Bazivikele Emikhuhlaneni?
Ye, oFakazi bakaJehova bayavuma ukuhlatshwa ukuze bazivikele emikhuhlaneni. Kodwa uFakazi ngamunye uyazikhethela ukuthi uzahlatshwa yini loba hatshi. OFakazi bakaJehova abanengi bakubona kungcono ukuthi bahlatshwe.
Siyafisa ukwelatshwa ngendlela ezingcono kakhulu futhi siyababonga abezesayensi ngokwenza okusemandleni abo ukuze banciphise ukumemetheka kwemikhuhlane. Siyababonga kakhulu labezokwelapha ngokusebenza kwabo nzima langokusincedisa ikakhulu nxa kulomkhuhlane oyingozi.
OFakazi bakaJehova bayabambisana labezempilakahle. Ngokwesibonelo, selokhu kwaqalisa umkhuhlane weCOVID, oFakazi bakaJehova bebelokhu bexwayisa abantu ngawo besebenzisa iwebhusayithi yabo i-jw.org etholakala ngezindimi ezinengi. Inhlanganiso yethu ihlala ikhumbuza abantu ukuthi balalele abakutshelwa yiziphathamandla ukuze bazivikele. Lokhu kuhlanganisa ukuqhelelana labanye abantu, ukungabi lemibuthano emikhulu, ukuzehlukanisa labanye nxa usubanjwe iCOVID, ukugeza izandla zikhathi zonke lokugqoka ama-mask.—KwabaseRoma 13:1, 2.
Sekuleminyaka eminengi oFakazi bakaJehova bebhala okulandelayo emabhukwini abo:
Umuntu ngamunye uyazikhethela ukuthi ufuna ukwelatshwa njani.—KwabaseGalathiya 6:5.
“[Imagazini le] kayitsheli bantu ukuthi belatshwe njani kumbe ukuthi basebenzise yiphi imithi. Kodwa inhloso yayo ngeyokunika abantu ulwazi nje kuphela, bona besebezikhethela ukuthi bazakwenzani.”—Vukani!, February 8, 1987.
“Umuntu ngamunye kumele azikhethele ukuthi yena lemuli yakhe bazahlatshwa yini ukuze bazivikele emikhuhlaneni.”—Vukani!, August 22, 1965.
Okwenza sidinge uncedo kwabezempilakahle yikuthi siyayiqakathekisa impilo.—ImiSebenzi 17:28.
“OFakazi bayahamba kwabezempilakahle ukuze babancedise nxa begula. Bayayiqakathekisa impilo yikho besenza konke abakwenelisayo ukuze baphile isikhathi eside futhi bakhetha ukwelatshwa ngendlela evumelana leMibhalo.”—INqabayokulinda, July 1, 1975.
“OFakazi bakaJehova bayavuma ukwelatshwa futhi bayayisebenzisa lemithi abayiphiwa ngabezempilakahle. Bayafuna sibili ukuba lempilakahle lokuphila isikhathi eside. Abanye oFakazi bakaJehova bangodokotela njengoLukha owaphila ngesikhathi samaKhristu akuqala. . . . Siyababonga kakhulu abezempilakahle ngokuzinikela kwabo ukuze basinakekele njalo baselaphe nxa sigula.”—INqabayokulinda, February 1, 2011.