Ukuvalelwa Ejele Akuzange Kungehlukanise LoJehova

Sabuyela e-Ukraine ngo-1966. Ngikhumbula ngelinye ilanga size sivakatshele ukhulu ejele ngileminyaka emine. Mina lomama sahamba umango omude ngesitimela sisuka eKryvyi Rih, e-Ukraine, sisiya ejele eyayiseRussia edolobheni leMordovia. Saphiwa imvumo yokubonana laye okwama-awa amabili kuphela sikhangelwe ngabalindi njalo bavuma ukuthi ukhulu angiphathe.

Ukuthemba UJehova Ngisesikolo

Ngisesengumntwana ngihlala e-Ukraine ngehlelwa yibunzima obenza kwakhanya ukuthi ngiyamthemba yini uJehova. Ngokwesibonelo, nxa abantwana bengena isikolo kwakumele bagqoke iyunifomu elebheji elomfanekiso wombusi uLenin esesengumntwana.a Ngemva kweminyaka ethile kwakumele bathandele isikhava esibomvu entanyeni betshengisa ukuthi basekela imicabango kaLenin. Angizange ngivume ukugqoka izinto lezi ngoba ngangikwazi ukuthi kumele sizinikele kuJehova kuphela.

Abazali bami banginceda ukuthi ngilithande iqiniso ngoba babengichasisela kuhle kuhle indaba ezitshiyeneyo ezigoqela lokungangeni kwezombusazwe. Bangikhuthaza lokuthi ngibambe ziqine esikolo ngoba lokho kwakuzakwenza uJehova adunyiswe.

Ngelinye ilanga kwabuya intathelizindaba esikolo yemagazini okwakuthiwa yi-Nauka i religiia (eyayikhuluma ngezesayensi lenkolo). Yayizama ukutshotshozela abantu ukuthi bangakholwa ukuthi kuloNkulunkulu. Ababalisi bangihlalisa phambili ngesikhathi intatheli le ikhuluma izinto ezazisenza kukhanye angani uNkulunkulu kakho.

Umuntu lo wathi eqeda ukukhuluma bahamba lami ngemva kwesiteji bamcela ukuthi akhulume lami. Wangibuza ukuthi ngingena yiphi isonto, mina ngamphendula ngingathikazi ngathi, “NginguFakazi kaJehova.” Kazange atsho lutho ngakho kodwa wangibonga ngokuthi bengilalele ngesikhathi ekhuluma. Lokhu kwabacaphula kakhulu ababalisi bami.

Ukuthemba UJehova Siyimuli

Imuli yangakithi yayithemba uJehova ngesikhathi isenza umsebenzi wokuphrinta amabhuku asekelwe eBhayibhilini ngekhaya njalo iwahambisa ebantwini. Ubaba wayengumbonisi wesiqinti e-Ukraine, evakatshela amabandla lamaqembu.

Ngelinye ilanga kusemini ngoFebruary 1978, ngathi ngivela esikolo ngathola yonke into endlini igcwele yonke indawo. Amapholisa ayefike asetsha indlu yangakithi athatha wonke amabhuku. Umnawami oyisicino uPavlik wazalwa ngemva kwensuku ezimbili kwenzakele lokhu.

Ngemva kokusetshwa kwendlu yangakithi samangala sibona ababalisi belokhu besikhangela lomnawami ongumfana uMykhailo ngoba babecabanga ukuthi singabantwana benhloli zelizwe le-America. Kodwa ngokuhamba kwesikhathi ababalisi abanengi bananzelela ukuthi ababekucabanga kwakungayisikho futhi abanye engangifunda labo bacina sebengoFakazi.

Indlu yangakithi yaphinda yasetshwa ngamapholisa ngo-1981. Ngabizwa ewofisini yomtshutshisi ndawonye lobaba lokhulu lanxa ngangingakabi leminyaka engu-18. Owayephethe indaba yakhona wazama ukungethusela ngokuthi ngizavalelwa ejele kodwa enye indoda eyayingagqokanga iyunifomu yona yangithembisa ukuthi izinto zizangihambela kuhle nxa ngingabambisana labo. Kwakungathi omunye uyangethusela ngapha omunye engincenga. Bazama lokungiyenga ngokungikhumbuza ukuthi ubaba, ukhulu ozala umama, omalume labafowabo bakababa basebeke bavalelwa ejele. Amapholisa la ayengakwazi ukuthi ayengitshela khona kwakungenza ngingathandabuzi ukuthi lami ngingakubekezelela ukuba sejele ngincediswa nguJehova.—KwabaseFiliphi 4:13.

Ukuqhubeka Ngithemba UJehova Ngisejele

Ngathi ngisanda kufikisa iminyaka engu-18, ngamukela umbiko wokuthi kwasekumele ngingene esisotsheni. Angizange ngivume yikho ngavalelwa esitokisini ngilindele ukuthethwa kwecala lami. Isitokisi engavalelwa kuso sasisikhulu silamadoda angaba ngu-85 ayetshintshana ukulala emibhedeni engu-34. Sasivunyelwa ukugeza kanye kuphela ngeviki.

Ekungeneni kwami esitokisini amehlo wonke athi nhlo kimi. Amadoda ayehlezi kwelinye icele aqalisa ukungibuza ukuthi ngangibotshelweni. Lanxa ngangisesaba ngakhumbula indaba eseBhayibhilini emayelana loDanyeli owaphoselwa emgodini wezilwane zangamthinti. Indaba le yanginceda ukuthi ngimthembe uJehova njalo ngihlaliseke.—U-Isaya 30:15; UDanyeli 6:21, 22.

Sithe sesidlile ukudla kwantambama, esinye isibotshwa sangibuza imibuzo emayelana lengikukholwayo. Zonke izibotshwa ezazisesitokisini leso zaqalisa ukuthula zalalela ingxoxo yethu. Ngaxoxa labo ngalokho engikukholwayo okwama-awa angaba mahlanu. Ngambonga kakhulu uJehova ngoba wangincedisa.

Indaba yami ingakathethwa ngakhuleka ngincenga uJehova ukuthi anginike ukuhlakanipha lesibindi ukuze ngimele ukholo lwami. Abatshutshisi bama ngelokuthi ukukholwa kwami kuNkulunkulu kwakuyikuzama ukubalekela ukuthi ngingangeni esisotsheni. Ngazama ukuchasisela umthethwandaba ukuthi nxa ngingangena esisotsheni ngizazondisa umuntu olamandla kulabo bonke emhlabeni lasezulwini. Lanxa kunjalo, ngo-1982 umthethwandaba wathi ngilecala njalo wangigweba iminyaka emibili.

Kwangithokozisa kakhulu ukuhlangana labanye oFakazi abahlanu ejele engangikuyo. Sasihlala sixoxa ngevesi eseBhayibhilini nxa sibonana. Kodwa sasivunyelwa ukuxoxa okwesikhathi esifitshane kuphela, kwezinye izikhathi kube yimizuzu emilutshwane nje. SasingelaBhayibhili kodwa izihlobo labangane babejayele ukufaka amavesi encwadini ababesibhalela zona. Kwezinye izikhathi sasiwathola emabhukwini angayisiwo enhlanganiso.

Ukuthemba UJehova Ngesikhathi Ngigula

Ngathi ngisebenza ejele ngo-1983 kwenzakala ingozi. Inkalakatha zensimbi ezazithwelwe ngumtshina zangithuza ngemuva ngawela phansi zacobodisa unyawo lwami lwenxele.

Ngakhuleka kuJehova ngicela amandla okuthi ngiqinisele ngoba ngangisizwa ubuhlungu kakhulu. Umongikazi wejele wathi ngikhulume inhlamba ukuze ngizwe ngcono kodwa mina ngahlabela ingoma zoMbuso.

Ngahanjiswa esibhedlela ngeroli, ngesikepe lange-ambulensi. Umango wakhona wathatha ama-awa angu-6 futhi ngopha kakhulu endleleni. Ngangikwazi ukuthi kwakuzamele ngi-opharethwe yikho ngakhulekela ukuthi odokotela babe lokuhlakanipha lokuthi bahloniphe isinqumo sami sokuthi ngelatshwe ngingafakwanga igazi. Udokotela wayengafuni lakuzwa ngesikhathi ngimchasisela engikukholwayo kodwa ngamncenga ukuthi angizwisise. Ngamtshela ukuthi ngangingasoze ngisole muntu nxa ukwelatshwa kwami kwakungasoze kuhambe kuhle. Wacina evuma ukungi-opharetha engangifakanga igazi futhi ngezwa kusithi hu. Lanxa kunjalo ingxenye yonyawo lwami yaqunywa.

Ngangingelamandla ngitsho ngemva koku-opharethwa futhi okwamaviki amanengi alandelayo impilo yami yayilenga ngomnxeba. Ngelinye ilanga emini omunye umongikazi wangitshela ukuthi okwakuzanginceda ukuthi ngisile yikudla ukudla okwakha umzimba hatshi lokho esasikudla ejele. Ukudla lokho kwakuzagcinwa efrijini eyayiseduze khonapho. Kwakumele ngidle uluju, iqanda elingaphekwanga lebhata nsuku zonke. Abazali bami babengithengela izinto lezi sebezwe ukuthi ngangehlelwe yingozi. Kodwa usayijeni wavuma ukwamukela izinto lezi kanye kuphela.

Isandla sikaJehova kasisifitshane. (U-Isaya 59:1) Omongikazi babesithi bangaqeda ukungitshintsha amabhanditshi banginike ukudla kwabo. Efrijini babefaka lokudla lokhuya okwakumele ngikudle ukuze ngisile. Lokhu kwangikhumbuza indaba eseBhayibhilini yomfelokazi ongazange aphelelwe ngamafutha embizeni yakhe.—1 AmaKhosi 17:14-16.

Ngangilokhu ngisila kancane kancane. Ngakhuthazwa kakhulu zincwadi ezingu-107 engazibhalelwa yizihlobo labangane futhi ngaziphendula zonke. Ngathola lesipho esasivela kubazalwane ababekweyinye ijele.

Ngenelisa ukugeza sekudlule inyanga ezimbili ezazinzima. Kodwa ngasengifuna ukubuyela ejele ukuze ngiphinde ngibonane labafowethu.

Ngesikhathi omunye udokotela elungisa amaphepha okuphuma kwami esibhedlela, wangibiza ewofisini yakhe wangibuza imibuzo eminengi emayelana lengikukholwayo. Ekupheleni kwengxoxo wathi ungifisela ukuthi ngiqhubeke ngikubambisisile engikukholwayo. Kwakumangalisa ukuzwa umuntu ogqoke iyunifomu yesisotsheni ekhuluma amazwi anjalo.

Ngo-April 1984 ngamiswa phambi kweziphathamandla ukuze kuhlolwe ukuthi ngasengifanele yini ukukhululwa ejele. Bangibuza ukuthi ngangizajoyina yini isisotsha mina ngathi umbuzo lo angisoze ngiwuphendule ngoba sengilonyawo olulodwa. Baphinda bangibuza bathi: “Ubuzangena yini esisotsheni aluba ubulenyawo ezimbili?” Ngabatshela ukuthi ngangingeke ngikwenze lokho ngoba ngangizimisele ukuqhubeka ngiqotho kuNkulunkulu wami. Bona bathi babengasoze bangiyekele ngikhululwa ngingakaqedi isigwebo sami. Lanxa kunjalo ngaphuma ejele kusasele inyanga ezimbili lensuku ezingu-12 ukuthi isigwebo sami siphele.

Ukuthemba UJehova Sengiphume Ejele

Ngemva komnyaka ngiphume ejele ngathola unyawo lokufakela. Kungithatha i-awa ukuthi ngilufake nsuku zonke ekuseni. Ngesikhathi somqando kunzima kakhulu ukulufaka unyawo lolu futhi kunzima ukuthi ingxenye yonyawo eyasalayo ikhudumale ngoba igazi alisagijimi kuhle. Ngacina ukugijima ngileminyaka engu-19 kodwa ngizibona sengigijima emhlabeni omutsha.—U-Isaya 35:6.

Kwakunzima ukuthola umsebenzi ngoba abantu abanengi babengafuni ukuqhatsha umuntu ogogekileyo. Kodwa lanxa ngilonyawo lokufakelwa angikaze ngisebenze lapho engitshona ngihlezi khona. Ngake ngaba ngumakanika ngilungisa imota ezitshiyeneyo. Ngokuhamba kwesikhathi ngasebenza ekwakheni.

Ngo-1986 ngatshada lodadewethu omuhle okuthiwa nguSvitlana. Umkami uvela emulini elezizukulwane ezintathu ezingoFakazi bakaJehova. Uhlala esithi kuyamthokozisa ukuthi sathi siqalisa ukuthandana savumelana ukuthi sizaqakathekisa uJehova ukwedlula loba yini emulini yethu.

Abantwabethu u-Olia loVolodia bafunda umsebenzi wokwakha ngesikhathi bengincedisa ukulungisa indlu yethu endala esasihlala kuyo. Bathi sebekhulile babekholisa ukuncedisa ekwakhiweni kwamaWolu oMbuso futhi baba ngamaphayona esikhathi sonke. Khathesi u-Olia uyancedisa ukwakha izakhiwo zenhlanganiso. UVolodia yena ungumdala ebandleni.

USvitlana ubengisekela kakhulu futhi lokhu kungincede ukuthi ngiyenze kuhle imisebenzi engilayo ebandleni. Ngeminyaka yabo-1990 amabandla amanengi e-Ukraine ayelabamemezeli abedlula 200 ibandla ngalinye, besekusiba lomdala oyedwa loba ababili kuphela. Ngangihambisa amabhuku kwamanye amabandla ase-Ukraine ngempelaviki kanye ngenyanga.

Ukuthemba UJehova Eminyakeni Esanda Kwedlula

Ngo-2022 mina lomkami sasuka lapho esasihlala khona eKryvyi Rih njalo khathesi sesisebandleni elise-Austria.

Ngisesemncane ngafunda kulokho okwenziwa yizihlobo zami ezingoFakazi ezazisuthiseka kungelani lobunzima ezazihlangana labo. IBhayibhili liyasinceda ukuthi simazi kuhle uMdali wethu lokuthi sisondele kuye. (UJakhobe 4:8) Lokhu kwenza sikwazi ukuthi siphilelani. Kuyangithokozisa ukuthi kubo bonke ubunzima esengike ngadlula kubo, ngenelisile ukunika uJehova udumo olumfaneleyo.