Ngiyathokoza Ukuthi Ngakhetha Kuhle Umsebenzi

Ngakhulela e-Australia futhi sasihlala emakhaya. Umama lobaba kanye labazali babo bafunda iqiniso ngabo-1950 ngingakazalwa. Ngaqalisa ukutshumayela ngileminyaka engu-6 ngabhabhathizwa sengilengu-13. Ngangisiba liphayona elisizayo ngesikhathi izikolo zivaliwe. Ngangimthanda uJehova ngifuna ukuhlala ngimkhonza.

Ngathi sengileminyaka engu-15, labo ababengiqeqetsha bananzelela ukuthi ngangisenza kuhle kakhulu kwezemidlalo. Ngakho abameli beqembu lomdlalo we-rugby banginika ithuba lokuthi ngijoyine iqembu labo ukuze ngithuthukise ubungcitshi bami emdlalweni lo. Kwangichaza ukuthi ngizabe sengiyintshantshu, kodwa okukhona yikuthi ngasengizinikele kuJehova. Ubaba wangitshela ukuthi ngiqale ngicabangisise ngokuzinikela kwami kuJehova ngingakakhethi ukuqhubekela phambili kwezemidlalo. Ngenza khona kanye ubaba ayengitshele khona ngasenginanzelela ukuthi ngeke ngikwenze kokubili, ukukhonza uJehova lokuba yintshantshu kwezemidlalo. Yikho angizange ngivume. Ngemva kwenyanga ezithile, enye inhlanganiso ebona ngezemidlalo layo yanginika elinye ithuba lokuthi ngiqeqetshwe ukugijima imango emide ukuze ngibe ngummeli we-Australia emincintiswaneni yama-Olympics. Kodwa ngaphinda ngayala ngoba ngangilokhu ngizimisele ukugcwalisa isithembiso sami sokuzinikela kuNkulunkulu engimthandayo.

Ngathi ngiqeda isikolo ngahle ngaqalisa ukuphayona, okuyikho engangivele ngihlele ukukwenza. Kodwa imali yathi isihlupha ngekhaya ngama ukuphayona ngaqalisa ukusebenza. Ngangiseselijaha futhi sengihlala ngedwa. Lanxa ngangilokhu ngimkhonza uJehova, kodwa sengiphongukwenzela umthetho nje. Ubungane bami loJehova babungasaqinanga kangako. Ngacina sengilabangane abanatha kakhulu njalo abangaziphathanga futhi ngasengilingeka ukwenza njengabo. Ngasengifuna ukwenza izinto ezazizangilethela intokozo yesikhatshana, ngingaselandaba lobungane bami loJehova.

Ngabona kungcono ukuthi ngithuthele kwelinye idolobho, khatshana labangane engasengilabo ukuze ngikhonze kuhle. Lokhu kwanginceda ukuthi ngiphinde ngibe seduze loJehova futhi ngihlele ukuba liphayona. Ngathi sengiphayona ngahlangana lodadewethu owayelenhloni owayekhulele emakhaya okuthiwa nguLeann McSharry njalo. Wayeselesikhathi ephayona yikho sajayelana sacina sisiba ngabangane. Saxoxa ngezinto esasifisa ukuzenza njalo okunye esasikufuna yikuba ngamamishinari. Satshada ngo-1993. Sobabili sasizimisele ukwenza okufunwa nguJehova.

Ukwenza Lokho Esasikuhlelile

Ngalowomnyaka, lami ngaba liphayona lesikhathi sonke njengoLeann. Sasingafuni ukuzihlupha ngezinto ezinenginengi futhi singafuni lokuba lezikwelede yikho sathenga i-caravan eyayisindala esasihlala kuyo. Okweminyaka engu-6 eyalandelayo, sasisiya loba ngaphi lapho inhlanganiso kaJehova eyayifuna siye khona futhi sasingakhethi imisebenzi ukuze sithole okokuziphilisa. Sasijayele ukutshumayela lamabandla amancane ezindaweni ezisemakhaya ezikhatshana kakhulu ledolobho. Sasifika sihlale endaweni ekhatshana labantu futhi singena imihlangano egangeni kumbe emawolu omphakathi. Lanxa sasithokoza sasizibuza ukuthi, ‘Kukhona yini okunye esingakwenzela uJehova?’ Masinyane nje sayithola impendulo yombuzo lo.

Inhlanganiso kaJehova yasicela ukuthi sibe ngamamishinari kwelinye ilizwe. Kodwa sasisesaba futhi sizibona singafanelanga. Sasizibuza ukuthi sizakukwanisa yini ukuba ngamamishinari singazange siyeqeqetshwa eSikolo seGiliyadi. Sasiyithanda sibili inkonzo kodwa sasizibona singayisizo ngcitshi ekufundiseni iBhayibhili ngenxa yokuthi sasingelazifundo ezinengi lapho esasitshumayela khona.

Saxoxa ngendaba le lomfowethu uMax Lloyd owayelilunga leKhomithi yeGatsha, samtshela indlela esasizizwa ngayo.a Wasiqinisekisa ukuthi uJehova wayezasincedisa kuloba yiwuphi umsebenzi lanxa sasiyabe sibona angathi asenelisi ukuwenza. Wathi esesikhuthazile savuma ukuyakwenza umsebenzi esasiwuphiwe eSri Lanka.

Umsebenzi Owawungalula

Safika eSri Lanka ngo-1999, safikela esigodlweni sakhona okuthiwa yiColombo. Kwakulempi yombango, kugcwele abayanga kanye labantu abahlala becela uncedo, izindlu zabantu ziminyene njalo lendimi ezazikhulunywa khonapho zazinzima kakhulu. Impilo esasesiyiphila yayisitshiyene kakhulu lempilo esasiyiphila emaphandleni e-Australia ngoba khona kwakuthule. Kodwa kukhona okuhle esakuthola eSri Lanka, sathola abafowethu labodadewethu abalothando kanye labantu abanengi ababelesifiso sokufunda ngoJehova.

Sacelwa ukuthi siye edolobheni leKandy elisemaqaqeni njalo eligonjolozelwe ligusu. Indawo le iphinda ibe lamasimu amanengi lapho okulinywa khona amahlamvu etiye. Idolobho leli lidume ngokuba lamathempeli amanengi enkolo yesiBhuda. Balutshwana abantu bakuleyondawo ababemazi uMdali wabo olothando. Ebandleni sasingena labafowethu labodadewethu ababekhuluma isiSinhala lababekhuluma isiTamil, njalo imihlangano yayiqhutshwa ngazo zombili indimi lezi. Kwakunzima kakhulu ukufunda isiSinhala, kodwa abafowethu labodadewethu kanye lalabo esasifunda labo iBhayibhili babeyibonga imizamo esasiyenza lanxa kwezinye izikhathi sasisenza amaphutha ahlekisayo!

Kodwa ukufundela ulimi kwakungasohlupho olutheni. Saqalisa ukuthwaliswa amagabha avuzayo ngenxa yokuba ngoFakazi. Kwakungokokuqala ukuthi sibe sebunzimeni obunje. Ngelinye ilanga sahlangana lexuku lamadoda ayezondile lasigombolozela. Abanye batshisa amabhuku ethu, abanye basitshaya njalo basikhahlela mina lomfowethu engangilaye. Kusenzakala lokhu sathandaza kuJehova simcela ukuthi asincede sihlaliseke njalo asikhumbule nxa kwakungenzakala sife. Amadoda la acina esukile ahamba. Lanxa sasuka endaweni leyo sisesaba, sambonga kakhulu uJehova ngokusivikela kwakhe.

Sacina sesiyijayele iSri Lanka sekungani kungakithi sibili. Lanxa kwakulempi eyayisehlukanisa abantu, kwakusithokozisa ukubona indlela uJehova ayeletha ngayo abantu abafuna ukwazi iqiniso emulini yakhe emanyeneyo. Kunengi okuhle esikukhumbulayo okwenzakala sisesihlengeni lesi. Kodwa ngemva kweminyaka emibili, iziphathamandla zavuma ukuyengwa ngabakhokheli benkolo, yikho amamishinari amanengi acina esuka elizweni leli.

Okwamaviki alandelayo sasiphithene amakhanda njalo sidanile. Phela sasingasakwazi ukuthi sizaqonda ngaphi. IQula Elikhokhelayo lasicela ukuthi siye ePapua New Guinea. Safikela esigodlweni selizwe leli, ePort Moresby ngoSeptember 2001.

EPapua New Guinea—Ilizwe Elihle Kakhulu

IPapua New Guinea ingumakhelwane we-Australia. Lanxa kunjalo amasiko lendlela abantu abaphila ngayo kutshiyene kakhulu lalokho esasikubona e-Australia. Yikho kwakumele sitshintshe ezinye izinto ukuze sijayele. Elizweni leli kukhulunywa izindimi ezedlula 800 kodwa ulimi esalufundelayo yisiTok Pisin esiyiso esikhulunywa ngabantu abanengi.

Ngemva kweminyaka emithathu sisedolobheni lePopondetta, sacelwa ukuthi senze umsebenzi wokuhambela. Sasingakaze sikucabange ukuthi uJehova angasisebenzisa ngalindlela! Ngangiluqakathekisa kakhulu ulwazi lwababonisi beziqinti lendlela ababesifundisa ngayo lababesincedisa ngayo, kodwa ngangikubona kungangifanelanga ukuba ngumbonisi wesiqinti. Mina ngangivele ngifuna ukuba limishinari. Ngangingakaze ngiziphuphe ngingumhambeli. Lakhathesi lokhu ngimangele ukuthi uJehova wanginika umsebenzi omkhulu kangaka.

Emadolobheni esasiwahambela sasijayele ukuthola kulamagetsi, lamanzi kanye lendlu elombheda. Kodwa emaphandleni sasingajayelanga ukuzithola izinto lezi. Sasilala ezindlini ezincane, siphekela phandle emlilweni, sigezela emifuleni, kodwa nxa ingwenya zaziseduze sasithatha amanzi ngamabhakede siyegezela endlini.

Umsebenzi lo wawudinga ukuthi sibe ngabantu abaqinileyo sibili. Kodwa sasingathandabuzi ukuthi ‘singahamba ngamandla esilawo,’ uJehova uzasenza siphumelele. (ABahluleli 6:14) Kwakunzima ukufika emabandleni amanengi lasemaqenjini esasiwahambela ngoba ayekhatshana lakhatshana, amanye esemaguswini, emaxhaphozini lasezintabeni. Sasihamba ngezimota, ngezikepe, ngendizamtshina, njalo kwesinye isikhathi sasihamba ngenyawo ukuze siyefika lapho okwakulabafowethu labodadewethu khona.b

Sasihamba amakhilomitha adlula 350 ngemota emigwaqweni eyayimibi kakhulu ukuze sifike ebandleni elaliseduze lebhoda ye-Indonesia. Sahamba izikhathi ezedlula 200 emigwaqweni leyo, sichapha imifula futhi eminengi yakhona yayingela mabhiriji okuchapha. Sasiqeda isikhathi esinengi sisemangweni sizama ukukhipha imota isibhajile edakeni ukuze senelise ukuyafika kubafowethu labodadewethu. Sasibathola besilindele ngabomvu, bethokoza futhi sebesilungisele lokudla okumnandi.

Nxa sasisiya emizini ephezulu kakhulu ezintabeni sasihamba ngokuyindizamtshina okuncane. Kwakumele ukuthi umtshayeli esesephezulu abe leqiniso lokuthi udinga indawo enhle ayezayehlisa khona kuhle indizamtshina. Wayethi nxa engayithola ayehle kancane ukuze abone ukuthi akulabantwana kumbe izinyamazana yini. Ngesikhathi indizamtshina isisiyahlala phansi kwakufiwa ngoba indawo eyayifika ihambe kuyo yayimbi kakhulu, igcwele udaka futhi iphezulu khonale ngamamitha angu-2 100. Kwezinye izikhathi sasisithi nxa sesisuka indizamtshina isukele endaweni eseduze kakhulu leliwa lentaba.c

Ngezinye izikhathi sasihamba ngenyawo siqansa izintaba, sihamba ezindaweni ezingamaxhaphozi, kutshisa bhe ngapha sisindwa yizikhwama ezilamabhuku lezinye izinto esasizisebenzisa. Lanxa kunjalo uhambo lolo lwalusiba mnandi ngoba sasiyabe silabafowethu labodadewethu abathembekileyo sikhuthazana njalo sizikholisela.

Sazizwa ngendlela umphostoli uPhawuli ayezizwa ngayo aze abhale amazwi aku-1 Thesalonika 2:8 athi: ‘Njengoba salithanda kakhulu, sasizimisele ukulinika lokuphila kwethu ngoba sasilithanda kakhulu.’ Sabona lokuthi abafowethu labodadewethu labo babezimisele ukukwenza lokhu, babezimisele lokusifela ukuze basivikele ebantwini abayizigebenga. Ngelinye ilanga uLeann waphosa wahlaselwa yindoda eyayithwele ibhemba. Ngangingenelisi ukumnceda ngoba ngangikweyinye indawo. Omunye umfowethu weqa masinyane wama phakathi laphakathi kukaLeann lendoda le. Abanye ababelapho bagijima bayibamba indoda le, umfowethu wasala elimele kancane nje. Udlakela lwalulokhu lusanda elizweni leli kodwa uJehova wayesincedisa nsuku zonke ukuze senelise ukuqinisa abafowethu labodadewethu.

EPapua New Guinea zazizilutshwana indawo zokwelatshwa, yikho kwakusiba nzima ngezinye izikhathi. Ngo-2010 uLeann wagula waphosa wafa sacina sisiya e-Australia ngendizamtshina ukuze athole uncedo masinyane. UJehova wasincedisa ukuthi sihlaliseke njalo labodokotela bacina benelisile ukumelapha. Omunye udokotela wathi: “Belilokhu lisebenzela uNkulunkulu. Khathesi nguye oselisebenzela.” Ngemva kwezinyanga ezinengana, sabuyela ePapua New Guinea.

Ukubuyela E-Australia

Okomnyaka owalandelayo uLeann kwakumele abelokhu ebuyela e-Australia esiyakwelatshwa. Ngo-2012, igatsha labona kungcono ukuthi siyehlala e-Australia ukuze silulame. Njengoba sasesileminyaka eminengi sasuka e-Australia, okwasekusihlupha kakhulu yikuphinda siyijayele indawo le lokuthi sihlaliseke. Sezwa ubuhlungu sekumele sitshiye umsebenzi wethu ePapua New Guinea kanye labafowethu labodadewethu esasingabathontisi. Sasesizibona singabantu abazehlulekelayo nje, sesicabanga lokuthi asiselancedo kuJehova. Sasesihlale isikhathi eside singekho e-Australia okokuthi kwasekungani singabantu bemzini elizweni lakithi. Sasikudinga sibili ukuthi abafowethu labodadewethu basiqinise.

ULeann wathi esengcono saba ngamaphayona aqakathekileyo eWollongong, eningizimu yeSydney, eNew South Wales. Ngemva komnyaka, sathokoza kakhulu lapho sicelwa ukuthi siye eSikolo SeBhayibhili SamaKhristu Atshadileyo (esesibizwa ngokuthi yiSikolo Sabavangeli BoMbuso). Igatsha le-Australasia lasicela ukuthi senze umsebenzi wokuhambela. Sesileminyaka sivakatshela amabandla lamaqembu asemadolobheni amakhulu lakwamanye akhatshana lakwezinye indawo lapho okulabantu abanengi abaphila ngokuthiya inhlanzi. Khathesi sihambela ezinye indawo ezise-Australia kanye layo yonke iTimor-Leste.

Umkami uyamthanda kakhulu uJehova futhi ubehlala engisekela kuzo zonke izinto. Uyisipho esiligugu engasiphiwa nguJehova. ULeann kakaze ayale loba yiwuphi umsebenzi esiwuphiwayo lanxa ungaze ube nzima njani. Nxa uLeann ebuzwa ukuthi kuyini okumnceda ukuthi alwisane lobunzima ujayele ukuthi: “Ngimtshela konke uJehova.” Okunye okumncedayo yikuthi angabala iLizwi likaNkulunkulu uyalivumela ukuthi limqondise endleleni acabanga ngayo, azizwa ngayo lakukho konke akwenzayo.

Angikaze ngizisole ngokuthi ngakhetha ukusebenzela uJehova kulokuthi ngijimise ezemidlalo. Ngizibonele ngawami ukuthi uJehova angasifundisa ukwenza loba yini nxa singazimisela ukwamukela loba yiwuphi umsebenzi asipha wona. Sengafunda ukuthi nxa ngilenhlupho kumbe ngifuna ukwenza izinqumo, kumele ngicele uJehova anginike ukuhlakanipha lomoya wakhe ongcwele nsuku zonke. Besithokoza futhi sithola izibusiso ezinengi ezivela kuBaba wethu olothando uJehova. Sikulindele ngabomvu ukubona okunengi azakwenza esebenzisa ‘imbiza zebumba’ ezinjengathi.—2 KwabaseKhorinte 4:7.