UNkulunkulu Uthi Umhlaba Awusoze Utshabalale

Lokhu yikho okwananzelelwa zingcitshi ezitshiyeneyo ezihlola ngokutshintsha komkhathi. Nxa kuyikuthi uyakholwa ukuthi kuloMdali olendaba labantu kumele ukuthi lokho okwatshiwo ngabezesayensi kukukhumbuza indlela emangalisayo uNkulunkulu adala ngayo umhlaba.

Kodwa nxa sikhangela umonakalo obangelwe ngabantu kusegcekeni ukuthi kunengi okumele kwenziwe ukuze umhlaba ungatshabalali. Kuyini okungenza singathandabuzi ukuthi kukhona uNkulunkulu azakwenza?

Amavesi asebhokisini asinceda sibone ukuthi umhlaba awusoze utshabalale lokuthi uzaphinda ube muhle kakhulu.

• Umhlaba wadalwa nguNkulunkulu. “Ekuqaleni uNkulunkulu wadala amazulu lomhlaba.”—UGenesisi 1:1

• UNkulunkulu ngumnikazi womhlaba. “Umhlaba lakho konke okukuwo ngokukaJehovaa.”—IHubo 24:1

• UNkulunkulu wadala umhlaba ehlose ukuthi uhlale ukhona. “Ubeke umhlaba phezu kwezisekelo zawo, awusoze ususwe endaweni yawo kuze kube nini lanini.” —IHubo 104:5

• UNkulunkulu uthembisa ukuthi emhlabeni kuzahlala kulezinto eziphilayo. ‘UNkulunkulu weqiniso, lowo owabumba umhlaba, kawudalelanga ukuthi ungabi lalutho kodwa wawubumba ukuze kuhlalwe kuwo.’—U-Isaya 45:18

• UNkulunkulu uthembisa ukuthi abantu bazaphila emhlabeni kuze kube nini lanini. “Abalungileyo bazakudla ilifa lomhlaba, bahlale kuwo kuze kube nini lanini.” —IHubo 37:29

UNkulunkulu wadala umhlaba usenelisa ukusekela ukuphila nxa abantu bewusebenzisa kuhle. IBhayibhili lisitshela ukuthi ngesikhathi sakhe esifaneleyo uJehova uNkulunkulu uzabajezisa abantu abatshabalalisa umhlaba. —ISambulo 11:18

Ngalesosikhathi uNkulunkulu uzakwenza ukuthi umhlaba ube lipharadayisi elihle, abesevula isandla sakhe ‘asuthise izifiso zakho konke okuphilayo.’—IHubo 145:16