Isivande Esihle

KHANGELA indawo enhle elapha! Konke kuhle sibili! Khangela utshani lezihlahla kanye lamaluba lazo zonke izinyamazana. Uyazibona yini indlovu lezilwane?

Isivande lesi esihle saba khona njani? Ake sibone ukuthi uNkulunkulu wasilungisela njani umhlaba.

Okokuqala, uNkulunkulu wenza ukuthi utshani obuluhlaza bugcwale emhlabeni. Wasesenza ukuthi kuhlume izimila lezihlahla ezitshiyeneyo. Izinto lezi ezimilayo zenza umhlaba ube muhle. Kodwa kulokunye ezikwenzayo. Ezinengi zakhona zisinika ukudla okumnandi kakhulu.

Ngemva kwalokhu uNkulunkulu wenza ukuthi inhlanzi zihlale emanzini lokuthi izinyoni ziphaphe emoyeni. Wadala izinja, omangoye lamabhiza; inyamazana ezinkulu lezincane. Yiziphi izinyamazana ezihlala eduze langakini? Kumele simbonge uNkulunkulu ukuthi usenzele zonke lezizinto.

UNkulunkulu wacina ngokwenza enye ingxenye yomhlaba ukuthi ibe yindawo enhle kakhulu. Wabiza indawo le ngokuthi yisivande sase-Edeni. Sasisihle sibili. Konke okwakuphakathi kwaso kwakukuhle. UNkulunkulu wayefuna ukuthi umhlaba wonke ube njengesivande lesi esihle ayesenzile.

Kodwa khangela umfanekiso wesivande lesi futhi. Uyakwazi ukuthi kuyini uNkulunkulu abona kungekho? Ake sibone.