U-Isaka Uthola Umfazi Omuhle

UYAKWAZI ukuthi umfazi osemfanekisweni ngubani? Ibizo lakhe nguRabheka. Indoda ayihlangabezayo ngu-Isaka. URabheka uzakuba ngumfazi wakhe. Kwenzakala njani lokho?

Ubaba ka-Isaka, u-Abhrahama wayefuna ukutholela indodana yakhe umfazi omuhle. Wayengafuni ukuthi umntanakhe u-Isaka athathe omunye wabafazi beKhenani ngoba abantu laba babekhonza onkulunkulu bamanga. Yikho-ke u-Abhrahama wasebiza inceku yakhe wathi: ‘Hamba uye ezihlotsheni zami eHarani uzuzele indodana yami u-Isaka umfazi.’

Ngokuphangisa inceku ka-Abhrahama yathatha amakamela alitshumi yathatha uhambo olude. Isifikile endaweni lapho okwakuhlala khona izihlobo zika-Abhrahama, yama emthonjeni. Kwakusemini yantambama, ngesikhathi sokuthi abesifazana bedolobho bezokukha amanzi emthonjeni. Inceku ka-Abhrahama yakhuleka kuJehova yathi: ‘Kakuthi intombi ezakhela mina lamakamela amanzi kube yiyo ezakuba ngumfazi ka-Isaka.’

Ngesikhatshana kweza uRabheka ezokukha amanzi. Lapho inceku imcela amanzi okunatha, wayinathisa. Wasethatha amanye amanzi enela ukunathisa wonke amakamela ayewomile. Lokhu kwakungumsebenzi onzima ngoba amakamela anatha amanzi amanengi kakhulu.

URabheka eseqedile ukwenza lokhu, inceku ka-Abhrahama yambuza ibizo likayise. Yasicela lokuthi balale ngakibo. URabheka wathi: ‘Ubaba wami nguBethuweli, njalo lendawo yokulala ikhona.’ Inceku ka-Abhrahama yayikwazi ukuthi uBethuweli wayeyindodana kamnewabo ka-Abhrahama, uNahori. Waguqa wabonga uJehova ukuthi umkhokhelele ezihlotsheni zika-Abhrahama.

Ngabona lobobusuku inceku ka-Abhrahama yatshela uBethuweli lomnewabo kaRabheka, uLabani ukuthi yayilandeni. Bonke bavuma ukuthi uRabheka ahambe layo ayethathwa ngu-Isaka. URabheka wathini lapho ebuzwa? Wathi, ‘Ye,’ ngoba wayefuna ukuhamba. Yikho-ke ngosuku olulandelayo bagada amakamela abo baqalisa uhambo olude lokubuyela eKhenani.

Bafika sekuntambama. URabheka wabona indoda eyayihamba ensimini. Kwakungu-Isaka. U-Isaka wathokoza kakhulu lapho ebona uRabheka. Umama wakhe uSara wayeleminyaka emithathu efile njalo u-Isaka wayelokhu edaniswe yilokhu. Kodwa khathesi u-Isaka waqalisa ukuthanda uRabheka kakhulu, lokhu kwamenza wathokoza futhi.