UDina Uba Lohlupho

UYAWAZI yini amankazana la avakatshelwa nguDina? Ngamankazana ahlala eKhenani. Ubaba wakhe uJakhobe uyakuthanda yini lokhu? Ukuze siphendule umbuzo lo, zama ukukhumbula ukuthi u-Abhrahama lo-Isaka babesithini ngabafazi beKhenani.

U-Abhrahama wayekufuna yini ukuthi indodana yakhe u-Isaka itshade lenkazana yaseKhenani? Wayengafuni. U-Isaka loRabheka babekufuna yini ukuthi indodana yabo uJakhobe itshade lenkazana yaseKhenani? Babengafuni. Uyakwazi ukuthi kungani babengafuni?

Kwakungenxa yokuthi abantu baseKhenani babekhonza onkulunkulu bamanga. Babengayisibo bantu abahle bokutshada labo njalo babengayisibo bantu abahle bokwenza ubungane labo. Lokhu kutshengisa ukuthi uJakhobe wayengeke athabe nxa indodakazi yakhe isenza ubungane lamankazana aseKhenani.

Lakanye, uDina waba lohlupho. Uyawubona yini umfanekiso wendoda engumKhenani ekhangele uDina? Ibizo layo nguShekemu. Ngelinye ilanga uDina evakatshile, uShekemu wamthatha waselala laye ngenkani. Lokhu kwakukubi ngoba abantu abatshadileyo yibo kuphela okumele balale bonke. Into le embi uShekemu ayenza kuDina yabangela olunye uhlupho.

Lapho abanewabo bakaDina besizwa ngokwakwenzakele bazonda kakhulu. USimeyoni loLevi bona bazonda kakhulu basebethatha inkemba bahamba edolobheni lelo babahlasela besalibele. Bona labanye abanewabo babulala uShekemu lamadoda wonke. UJakhobe wazonda kakhulu ngalokhu.

Kuyini okwabangela uhlupho lonke lolu? KwakunguDina owenza ubungane labantu abangalaleli imithetho kaNkulunkulu. Akumelanga sibe labangane abanjalo.