Amaphupho kaFaro

IMINYAKA emibili iyadlula uJosefa elokhe esejele. Umphathinkezo kamkhumbulanga. Ngelinye ilanga ebusuku, uFaro uba lamaphupho amabili abesezibuza ukuthi atshoni. Uyambona yini elele lapha? Ekuseni, uFaro ubiza amadoda akhe ayizihlakaniphi abesewatshela akuphuphileyo. Kodwa ayehluleka ukumtshela okutshiwo ngamaphupho akhe.

Khathesi, umphathinkezo uyamkhumbula uJosefa. Utshela uFaro ukuthi: ‘Ngisesejele kwakulendoda eyayisenelisa ukuchasisa amaphupho.’ UFaro ukhupha uJosefa ejele khonapho khonapho.

UFaro utshela uJosefa amaphupho akhe: ‘Ngabona inkomo eziyisikhombisa ezinonileyo, ezinhle. Ngasengibona inkomo eziyisikhombisa ezicakileyo njalo ezimbi kakhulu. Inkomo ezicakileyo zadla inkomo ezinonileyo.

‘Ephutsheni lami lesibili ngabona izikhwebu zamabele eziyisikhombisa zigcwele, njalo zizinhle zikhula ehlangeni lunye. Ngasengibona ezinye izikhwebu eziyisikhombisa, ziswabile njalo zicakile. Lezozikhwebu zamabele ezicakileyo zaginya leziyana eziyisikhombisa ezinhle.’

UJosefa uthi kuFaro: ‘Amaphupho la amabili atsho into eyodwa. Inkomo eziyisikhombisa ezinhle kanye lezikhwebu zamabele ezinhle zitsho iminyaka eyisikhombisa, inkomo ezicakileyo eziyisikhombisa lezikhwebu zamabele ezicakileyo zitsho eminye iminyaka eyisikhombisa. IGibhithe izakuba lokudla okunengi okweminyaka eyisikhombisa. Kodwa kuzalandela iminyaka eyikhombisa yendlala.’

Ngakho uJosefa utshela uFaro: ‘Khetha indoda ehlakaniphileyo ubusuyinika isikhundla sokubuthelela ukudla eminyakeni le eyisikhombisa lapho okuyabe kulokudla okunengi. Ungenzenjalo, abantu abasoze balambe ngeminyaka yendlala eyisikhombisa ezalandela.’

Icebo leli likhanya lilihle kuFaro. Ngakho ukhetha uJosefa ukuthi abuthelele ukudla, akugcine. Isikhundla sikaJosefa silandela esikaFaro, ngakho uJosefa uba yindoda eqakatheke kakhulu eGibhithe.

Ngemva kweminyaka engu-8, sekuyisikhathi sendlala, uJosefa ubona amadoda esiza. Uyakwazi ukuthi ngobani? Ngabanewabo abangu-10! Ubaba wabo uJakhobe ubathume eGibhithe ngoba kade kungasela kudla ngekhaya, eKhenani. UJosefa uyabona ukuthi yibo abanewabo kodwa bona kabamnanzeleli. Uyakwazi ukuthi kungani? Kungenxa yokuthi uJosefa usekhulile njalo ugqoke izigqoko abangazaziyo.

UJosefa uyakhumbula ukuthi esesemncane, wake waphupha ngabanewabo bemkhothamela. Usayikhumbula yini indaba yakhona? Ngakho uJosefa uyabona ukuthi nguNkulunkulu omenze wabuya eGibhithe njalo uNkulunkulu wayekwenze ngesizatho esihle. Ubona angani uJosefa uzakwenzani? Ake sibone.