Ukudla Okutsha

UYAKWAZI yini ukuthi abantu badobhani phansi? Badobha ukudla. Ukudla lokhu kumhlophe nke njalo kusamvuthu.

Sekudlule inyanga eyodwa ama-Israyeli esuke eGibhithe. Asegangeni. Egangeni kumila ukudla okulutshwana yikho abantu bayatshinga besithi: ‘Ngabe uJehova wasibulala siseseGibhithe. Kwakungcono ngoba sasizitholela konke ukudla esasikufuna.’

UJehova uthi: ‘Ngizalehlisela isinkwa sivela ezulwini.’ UJehova wenza njalo. Ngelanga elilandelayo ekuseni, ama-Israyeli abona izinto ezimhlophe phansi besebebuzana besithi: ‘Kuyini lokhu?’

UMosi uyabaphendula esithi: ‘Yisinkwa elisiphiwe nguJehova ukuthi lidle.’ Abantu basibiza ngokuthi yiMANA. Simnandi njengamakhekhe enziwe ngoluju.

UMosi utshela abantu ukuthi: ‘Kumele lithathe iMANA elenelayo kuphela.’ Ngakho abantu benza njalo nsuku zonke ekuseni. Nxa ilanga selitshisa, imana eyabe isele phansi iyancibilika.

UMosi ubatshela lokuthi: ‘Akumelanga kube lomuntu ozagcina imana kuze kube lilanga elilandelayo.’ Kodwa abanye kabalaleli. Uyakwazi ukuthi kwenzakalani? Ngelanga elilandelayo ekuseni, imana abayigcinileyo igcwala impethu ibisinuka phu!

Kodwa kulelanga elilodwa ngeviki lapho uJehova atshela abantu ukuthi babuthe imana enengi. Leli lilanga lesithupha. UJehova ubatshela ukuthi eyinye bayigcinele ilanga elilandelayo ngoba kasoze enze ukuthi imana yehle ngelanga lesikhombisa. Bayayigcina imana kuze kufike ilanga lesikhombisa kodwa ayigcwali mpethu njalo kayiboli! Lesi ngesinye isimangaliso!

UJehova unika ama-Israyeli imana iminyaka yonke besegangeni.