Indoda Engesabiyo

UYABABONA yini abantu abahleka indoda le esakhulayo? Uyayazi yini? Ibizo layo nguJeremiya. Ungumphrofethi kaNkulunkulu oqakatheke kakhulu.

Ngemva nje kokubhidlizwa kwezithombe elizweni yiNkosi uJosiya, uJehova utshela uJeremiya ukuthi abe ngumphrofethi wakhe. Kodwa uJeremiya ucabanga ukuthi mncane kakhulu, kangeke abe ngumphrofethi. UJehova umtshela ukuthi uzamncedisa.

UJeremiya utshela ama-Israyeli ukuthi ayekele ukwenza izinto ezimbi. Uthi: ‘Izizwe zikhonza onkulunkulu bamanga.’ Kodwa ama-Israyeli amanengi akhetha ukukhonza izithombe kulokuthi akhonze uNkulunkulu weqiniso, uJehova. UJeremiya utshela abantu ukuthi uNkulunkulu uzabajezisa ngenxa yobubi babo, kodwa abantu laba bayamhleka.

Iminyaka iyadlula. UJosiya uyafa. Indodana yakhe uJehoyakhimi ibisiqalisa ukubusa ngemva kwezinyanga ezintathu. UJeremiya uqhubeka etshela abantu esithi: ‘IJerusalema lizabhujiswa nxa lingaqhubeka lisenza izinto zenu ezimbi.’ Abaphristi babamba uJeremiya besebememeza besithi: ‘Kumele ufele ukukhuluma lezizinto.’ Basuka bathi kuzikhulu zama-Israyeli: ‘UJeremiya kumele abulawe ngoba ukhuluma izinto ezimbi ngedolobho lethu.’

UJeremiya uzakwenzani? Kayesabi! Uthi kubo: ‘UJehova nguye ongithume ukuthi ngikhulume amazwi la kini. Nxa lingantshintshi indlela embi eliphila ngayo uJehova uzabhidliza iJerusalema. Kodwa okumele likwazi yilokhu, nxa lingangibulala liyabe libulala indoda engonanga lutho.’

Izikhulu kazimbulali uJeremiya kodwa ama-Israyeli kawayekeli ukwenza izinto ezimbi. Ngemva kwesikhathi, uNebhukhadinezari, inkosi yaseBhabhiloni ilwisa iJerusalema. Ekucineni, uNebhukhadinezari wenza ama-Israyeli abe yizinceku zakhe. Uthatha ama-Israyeli amanengi kakhulu awase eBhabhiloni. Ubungezwa njani nxa ubungathathwa ngakini ngabantu ongabaziyo bakuse elizweni ongalaziyo?