Ukuphela Kobubi Bonke

UBONANI lapha? Ye, libutho eligade amabhiza amhlophe. Kodwa khangela ukuthi avela ngaphi. Amabhiza la ehla evela ezulwini! Kodwa kulamabhiza yini ezulwini?

Hatshi, la akusiwo mabhiza eqiniso. Siyakwazi lokhu ngoba amabhiza ngeke agijime phezu kwamayezi. Angagijima yini? Kodwa iBhayibhili likhuluma ngamabhiza asezulwini. Uyakwazi yini ukuthi kungani likhuluma ngawo?

Kungenxa yokuthi kulesikhathi lapho amabhiza ayesetshenziswa kakhulu empini. Kodwa iBhayibhili likhuluma ngabantu abagade amabhiza besehla bevela ezulwini ukuze litshengise ukuthi uNkulunkulu ulempi azayilwa labantu emhlabeni. Uyakwazi ukuthi indawo yempi le kuthiwa yikuyini? Ithiwa yi-Amagedoni. Impi leyo izaqeda ububi bonke obusemhlabeni.

UJesu nguye ozakhokhela ekulweni impi le e-Amagedoni. Khumbula ukuthi uJesu nguye owakhethwa nguJehova ukuthi abe yinkosi kahulumende wakhe. Yikho uJesu egqoke umqhele ogqokwa zinkosi. Inkemba ayiphetheyo itshengisa ukuthi uzabulala zonke izitha zikaNkulunkulu. Kumele kusimangalise yini ukuthi uNkulunkulu uzabhubhisa abantu bonke ababi?

Buyela emuva ukhangele iNdaba 10. Ubonani endabeni leyo? Ye, nguZamcolo omkhulu owabhubhisa abantu ababi. Ngubani owenza kwaba loZamcolo? NguJehova uNkulunkulu. Khathesi khangela iNdaba 15. Kwenzakalani lapho? ISodoma leGomora kubhujiswa ngomlilo olethwe nguJehova.

Khangela iNdaba 33. Khangela ukuthi kwenzakalani emabhizeni lasezinqoleni zempi zamaGibhithe. Ngubani owenze bavalwa ngamanzi? NguJehova. Wenza lokhu ukuze avikele abantu bakhe. Khangela iNdaba 76. Endabeni leyo, uzabona ukuthi uJehova wavumela ukuthi abantu bakhe, ama-Israyeli, babhujiswe ngenxa yezinto ezimbi ababezenza.

Ngakho akumelanga simangale ukuthi uJehova uzathuma amabutho akhe asezulwini ukuthi azokhipha bonke ububi obusemhlabeni. Kodwa cabanga ukuthi lokho kuyabe kusitshoni! Kasivule ekhasini elilandelayo sibone.