I-Kingdom News No. 38 Izahanjiswa ngo-December!
1. Abantu bazibuza yiphi imibuzo ngabafileyo, futhi izaphendulwa njani ngo-December?
1 Ukufa kuyisitha sabantu bonke, kungelani lokuthi bakholwani. (1 Khor. 15:26) Abanengi bayazibuza ukuthi bangaphi abafileyo lokuthi bazaphinda bababone yini. Ngakho-ke, amabandla asemhlabeni wonke azahlanganyela okwenyanga yonke ekuhambiseni i-Kingdom News No 38 elesihloko esithi “Abafileyo Bangaphinda Baphile Yini?” Umkhankaso lo oqakathekileyo uzaqala ngo-December 1 kwelakithi eZimbabwe. Umkhankaso ungaphela, i-Kingdom News No. 38 izasetshenziswa ensimini njengamanye amaphetshana.
2. I-Kingdom News No. 38 ilungiswe njani?
2 Indlela Elungiswe Ngayo: I-Kingdom News No. 38 ilungiswe ngendlela yokuthi iyagoqeka ikhasi eliphandle litshengise umbuzo othinta inhliziyo kanye lamabala athi “Ubungaphendula usithi . . . ye? hatshi? engxenye?” Nxa obalayo angavula i-Kingdom News, uzathola lokho okutshiwo liBhayibhili nxa liphendula isihloko sephetshana leli kanye lendlela izithembiso zeBhayibhili ezingamnceda ngayo. Uzabona njalo lezizatho ezingenza ukuthi alithembe iBhayibhili. Ikhasi elingemuva libuza umbuzo omenza acabange futhi limnxusa ukuthi afunde okunengi.
3. Izahanjiswa njani i-Kingdom News No. 38?
3 Indlela Ezahanjiswa Ngayo: Umkhankaso lo uzenziwa ngendlela efananayo leminye imikhankaso enjengeyeSikhumbuzo kanye lezimemo zomhlangano wesigaba. Abadala bazanika iziqondiso zokuthi insimu izasetshenzwa njani, ngokuhambelana lencwadi eyabhalwa ngo-April 1, 2013. Amabandla alensimu encane angancedisa amabandla aseduzane alensimu enkulu. Nxa uthatha amakhophi e-Kingdom News No. 38 sicela uthathe lawo ozawasebenzisa okweviki elilodwa kuphela. Ngesikhathi somkhankaso, amakhophi angahanjiswa ngokutshumayela obala nxa insimu yendlu ngendlu isisetshenziwe yonke. Nxa amakhophi angaphela phakathi kwenyanga, lingahambisa okuyabe kuhanjiswa ngaleyo nyanga. NgoMgqibelo wokuqala, sizagxila kulowo mkhankaso oqakathekileyo kulokugxila ekuqaliseni izifundo zeBhayibhili. Ngezimpelaviki, kumele sihambise amamagazini nxa kuvuma ukwenza njalo. Kukhona yini okuhlelayo ukuthi wengezelele inkonzo yakho ngesikhathi kusenziwa umkhankaso lo?