Isimemo Esiqakathekileyo

1. Uzaqalisa nini umkhankaso wokunxusela abantu emhlanganweni wesabelo?

¹ Ake sithi uphekele izihlobo labangane ukudla okumnandi njalo usebenze nzima ukuthi ukupheke ukudla lokho, akuthandabuzwa ukuthi uzakuba ledlabuzane lokubanxusa. Kwenziwe okufananayo ukuze kulungiselelwe umhlangano wesabelo ozayo. Kusasele amaviki amathathu ukuthi singene umhlangano lo, uJehova usinike isibusiso sokunxusa abantu ukuthi bazowungena lathi. Kuyini okuzasinceda ukuthi sibe ledlabuzane lokubanxusa?

2. Kuyini okuzasenza sibe ledlabuzane elikhulu lokunxusa abantu?

² Ukukhumbula ukuthi imfundo esiyithola emihlanganweni yethu yezabelo iyasinceda kuzakwenza sibe ledlabuzane elikhulu lokunxusa abantu. (Isaya. 65:13, 14) Kumele sikhumbule ukuthi imikhankaso yokunxusela abantu emihlanganweni yethu iba lempumela emihle kakhulu. (Khangela ibhokisi elithi “Imikhankaso Le Ilempumela Emihle.”) Abanye abantu esibanxusayo bazabuya kodwa abanye kabasoze babuye. Kungelani lokuthi bangaki abazabuya, kumele singakhohlwa ukuthi imizamo yethu yokunxusa abantu idumisa uJehova futhi itshengisa ukuthi ulomusa.—Hubo. 145:3, 7; Isam. 22:17.

3. Sizazihambisa njani izimemo?

³ Iqula labadala ngalinye kumele litsho ukuthi ibandla lizahambisa njani izimemo endimeni yonke lokuthi abamemezeli kumele batshiye yini izimemo ezindlini ezingelabantu kumbe ukuthi bazihambise yini nxa betshumayela obala. Nxa kufanele, lingahambisa lamamagazini ngesikhathi lihambisa izimemo ngezimpelasonto. Kuzasithokozisa kakhulu ukwazi ukuthi senze konke okusemandleni ethu ukuthi sinxusele abantu edilini leli elikhulu esililungiselelwe nguJehova.

Imikhankaso Le Ilempumela Emihle

Eminyakeni eyadlulayo, omunye udade wathi ehambisa izimemo wazibuza ukuthi kambe imizamo yakhe yayingafanani lokutshaya umoya yini. Wayezibuza ukuthi, ‘Vele abantu esibanxusayo bazabuya yini emhlanganweni?’ NgoMgqibelo ekuseni, wathi esemhlanganweni wananzelela indoda eyayihlezi eduze kwakhe eyayingena inkolo yama-Sikh waseyibingelela. Ekuxoxeni kwabo wananzelela ukuthi okwenza yabuya emhlanganweni yikuthi yayinxusiwe. Udade wenelisa ukuphendula imibuzo eminengi indoda le eyayilayo. Indoda le yatshela udade ukuthi yayilukholise kakhulu uhlelo lomhlangano njalo kwayithinta kwamancane ukubona indlela abantu ababegqoke futhi behleleke ngayo. Ngelanga elifananayo udade lo waqalisa ingxoxo lemuli eyayihlezi eduzane kwakhe. Imuli le layo yayinxusiwe emhlanganweni njalo yayize ngebhasi. Yakholisa kakhulu yaze yahlela ukuphenduka ngeSonto. Udade lo wakubona ukuthi ukunxusa abantu kuqakatheke kakhulu.
Komunye umhlangano osanda kwenziwa, indoda lomkayo abangamaphayona bazethula kwenye indoda lomkayo asebekhulile. Imuli le yathi kwakungokokuqala ukungena umhlangano. Amaphayona ababuza athi, “Ngubani olinxusileyo?” Bona baphendula bathi, “Sathi sifika endlini ngelinye ilanga safica kulesimemo sifakwe ngaphansi kwesivalo.” Basibala isimemo baze bagcwalisa lefomu elingemuva kwesimemo leso. Abanye ababesemhlanganweni badla lemuli le ngesikhathi sekhefu. Imuli le ithi yalujabulela kakhulu uhlelo lomhlangano lo yaze yahlela ukuphenduka ngelanga elilandelayo. Kwahlelwa ukuthi bavakatshelwe ukuze kufundwe labo iBhayibhili.