Sifundani Kulokho Okwenziwa NguJesu Emalangeni Akhe Angu-40 Okucina Esemhlabeni?

1-2. Kwenzakalani ngesikhathi abafundi bakaJesu ababili besiya e-Emawusi?

NGUNISANI 16 ngo-33 C.E. Abafundi bakaJesu basosizini futhi bayesaba kakhulu. Ababili babo bayasuka eJerusalema baye esigabeni okuthiwa yi-Emawusi. Isigaba lesi singaba ngamakhilomitha angu-11 usuka eJerusalema. Badanile ngoba uJesu, indoda abakade beyilandela, usanda kubulawa. Konke abakade bekhangelele ukuthi uMesiya uzabenzela khona bakubona sekuphelele emoyeni. Kuthi kusenjalo kwenzakale into ebatshiya betshe amathe.

² Kuthutsha umuntu abangamaziyo aqalise ukuhamba labo, abafundi besebemxoxela ngalokho okwenzakale kuJesu okubatshiye bedanile. Umuntu lo ubatshela izinto abangasoze bafa bazikhohlwa. ‘Uqalisa kuMosi lakubo bonke abaPhrofethi’ ebachasisela ukuthi kungani bekumele uMesiya ahlupheke futhi afe. Amadoda la athi efika e-Emawusi umuntu ahamba laye awavezele ukuthi ungubani. Uyabatshela ukuthi unguJesu osevusiwe. Ubona angani abafundi laba bezwa njani besibakwazi ukuthi uMesiya usevusiwe? Kumele ukuthi bathokoza kakhulu!—Luk. 24:​13-35.

3-4. Kwenzakalani kubafundi bakaJesu futhi kuyini esizaxoxa ngakho esihlokweni lesi? (ImiSebenzi 1:3)

³ UJesu wabonakala kanengi kubafundi bakhe phakathi kwensuku zakhe zokucina ezingu-40 esemhlabeni. (Bala imiSebenzi 1:3.) Abafundi bakaJesu babekade besosizini futhi besesaba. Kodwa uJesu wathi esebakhuthazile bathokoza futhi baba lesibindi sokutshumayela lokufundisa izindaba ezinhle zoMbuso.a

⁴ Ukufunda ngalokho okwenziwa nguJesu ngalesosikhathi kungasinceda. Esihlokweni lesi sizabona ukuthi uJesu wasisebenzisa njani isikhathi leso ukuthi akhuthaze abafundi bakhe, abancedise ukuthi bayizwisise iMibhalo lokuthi abaqeqetshe ukuze bayenze kuhle imisebenzi ababezayiphiwa esikhathini esizayo. Sizabona lokuthi singamlingisela njani ezintweni lezi ezintathu.

KHUTHAZA ABANYE

5. Kungani kwakumele abafundi bakaJesu bakhuthazwe?

⁵ Abafundi bakaJesu kwakumele bakhuthazwe sibili. Ngenxa yani? Abanye babetshiye imizi yabo, lezimuli zabo lamabhizimusi abo ukuthi balandele uJesu. (Mat. 19:27) Abanye basebephathwa kubi ngenxa yokuthi basebekhethe ukuba ngabalandeli bakhe. (Joh. 9:22) Bazidela benza konke lokhu ngoba babekholwa ukuthi uJesu wayenguMesiya owayethenjisiwe. (Mat. 16:16) Kodwa uJesu wathi esebulewe, baphelelwa lithemba badana.

6. UJesu wenzani esevusiwe?

⁶ UJesu wathi ebona abafundi bakhe bedanile kazange acabange ukuthi kabaselakholo. Wayekwazi ukuthi okwakubenza badane yikufa kwakhe. Ngelanga avuswa ngalo wahle waqalisa ukubakhuthaza abangane bakhe. Ngokwesibonelo, wabonakala kuMariya Magadalena owayekhala duzane lethuna lakhe. (Joh. 20:​11, 16) Waphinda wabonakala kubafundi ababili esixoxe ngabo endimeni zakuqala, wasebonakala lakumphostoli uPhetro. (Luk. 24:34) Sifundani kulokho okwenziwa nguJesu? Kasixoxeni ngalokho okwenzakala ngesikhathi ebonakala kuMariya Magadalena.

7. UJesu wabona uMariya esenzani futhi wenzani ukuze amkhuthaze? (UJohane 20:​11-16) (Khangela lomfanekiso.)

⁷ Bala uJohane 20:​11-16. NgoNisani 16, abanye abesifazana bavuka ekuseni baya lapho uJesu ayebekwe khona. (Luk. 24:​1, 10) Ake sixoxe ngokunye okwenziwa ngomunye wabo, uMariya Magadalena. Wathi efika ethuneni likaJesu wafica kungelalutho. Wagijima wayatshela uPhetro loJohane, bona bagijima baya ethuneni befuna ukuyazibonela ngawabo ukuthi yikho yini. UMariya wabalandela emuva. Amadoda la afica kungelalutho sibili ethuneni asezibuyelela endlini. UMariya yena kazange ahambe, wasala ethuneni ekhala, kodwa uJesu wayemkhangele. Wazibona inyembezi zowesifazana lo owayethembekile njalo wayefuna ukumduduza. Ngakho wabonakala kuye wasesenza into eyayikhanya incane kodwa eyamkhuthaza kakhulu. Wakhuluma laye wasemnika umsebenzi oqakathekileyo wokuyatshela abafundi bakhe ukuthi usevusiwe.—Joh. 20:​17, 18.

8. Singamlingisela njani uJesu?

⁸ Singamlingisela njani uJesu? Okunye esingakwenza ukuze sikhuthaze abafowethu labodadewethu ukuthi bakhonze uJehova yikwazi lokho okubahluphayo, lokuzama ukuzwisisa ukuthi bazwa njani besesibaduduza. Ngokwesibonelo, omunye udadewethu okuthiwa nguJocelyn wafelwa ngudadewabo kwenye ingozi eyayizwisa ubuhlungu. Uthi: “Kwadlula izinyanga ezinengi ngilokhu ngidabukile.” Kodwa omunye umfowethu lomkakhe bamnxusa emzini wabo, bamlalelisisa ebatshela indlela ayezizwa ngayo futhi bamqinisekisa ukuthi uNkulunkulu uyamqakathekisa kakhulu. UJocelyn uthi: “Ngangisizwa angathi ngigalula phakathi laphakathi kolwandle ngapha kulesiphepho esilolaka. Kodwa uJehova wabasebenzisa ukuthi bangikhiphe phakathi kwaso. Bangivuselela banginceda ukuthi ngiqhubeke ngimkhonza.” Lathi singakhuthaza abanye ngokubalalelisisa nxa besitshela okusezinhliziyweni zabo, sizame ukuzwisisa ukuthi bezwa njani. Singenza njalo sizabaqinisa, baqhubeke bekhonza uNkulunkulu.—Rom. 12:15.

NCEDISA ABANYE UKUTHI BAZWISISE IMIBHALO

9. Abafundi bakaJesu babekhathazeke ngani njalo uJesu wabancedisa njani?

⁹ Abafundi bakaJesu balamukela iLizwi likaNkulunkulu futhi benza konke okusemandleni abo ukuthi bakwenze lokho ababekufunda. (Joh. 17:6) Kodwa babelokhu bengazwisisi ukuthi kungani uJesu wayebulewe ngendlela ebuhlungu kangaka futhi waphathwa njengesigebenga. UJesu wabona ukuthi okwakusenza bakhathazeke yikuthi babengayizwisisi iMibhalo, hatshi ukuthi babengaselakholo. (Luk. 9:​44, 45; Joh. 20:9) Yikho wabancedisa ukuthi bayizwisise kuhle. Ake sibone ukuthi wakwenza njani lokhu ngesikhathi ebonakala kubafundi ababili ababesiya e-Emawusi.

10. UJesu wabanceda njani abafundi ukuthi bazwisise ukuthi kwakunguye uMesiya owayethenjisiwe? (ULukha 24:​18-27)

¹⁰ Bala uLukha 24:​18-27. Nanzelela ukuthi uJesu kazange ahle atshele amadoda la ukuthi wayengubani, kodwa wawabuza imibuzo. Ngenxa yani? Kungenzakala wayefuna atsho okwakusezingqondweni zawo lezinhliziyweni zawo. Lokho yikho kanye akwenzayo. Amtshela ukuthi ayekhangelele ukuthi uJesu akhulule abako-Israyeli ekucindezelweni ngamaRoma. Athi esemtshelile lokho okwakuwakhathaza, uJesu wasebenzisa iMibhalo ukuze awancede azwisise lokho okwakwenzakele.b Ngalelolanga ntambama, wabonakala lakwabanye abafundi futhi wabachasisela okwakutshiwo yiziphrofetho. (Luk. 24:​33-48) Sifundani endabeni le?

11-12. (a) Sifundani endleleni uJesu ayencedisa ngayo abanye ukuthi bazwisise iBhayibhili? (Khangela lemifanekiso.) (b) Owayefundisa uNortey iBhayibhili wamncedisa njani?

¹¹ Singamlingisela njani uJesu? Nxa ufundisa umuntu iBhayibhili kumele umbuze imibuzo ezamenza akhululeke ukuveza imibono yakhe lokutsho indlela azizwa ngayo. (Zaga. 20:5) Nxa usuyizwisisa indlela azizwa ngayo, mtshengise iMibhalo ehambelana lalokho okumhluphayo. Ungaqali ukumtshela ukuthi kumele enzeni, kodwa mncedise ayizwisise iMibhalo abesebona ukuthi angayisebenzisa njani empilweni yakhe. Ake sixoxe ngalokho okwenzakala komunye umfowethu okuthiwa nguNortey ohlala eGhana.

¹² UNortey waqalisa ukufunda iBhayibhili eleminyaka engu-16. Kungakayi ngaphi, abangakibo bahle baqalisa ukumthwalisa nzima. Manje kuyini okwamnceda ukuthi angayekeli ukuqhubeka efunda iBhayibhili? Umuntu owayemfundisa wayeke waxoxa laye ngoMathewu isahluko 10 emchasisela ukuthi amaKhristu azahlukuluzwa. UNortey uthi: “Abangekhaya bathi beqalisa ukungihlupha, ngahle ngabona ukuthi sengilitholile iqiniso.” Owayemfundisa wamncedisa ukuthi acabangisise ngoMathewu 10:16 ukuze abekwazi ukuthi angaxoxa njani ngendaba zokukhonza labangakibo ngendlela elenhlonipho njalo engasoze ivuse ingxabano. UNortey wathi esebhabhathiziwe wayefuna ukuphayona, kodwa uyise wayefuna aye eyunivesithi. Kulokuthi amtshele okokwenza, lowo owayemfundisa wambuza imibuzo eyayizamnceda ukuthi acabangisise ngamavesi ayezamsiza ukuthi enze isinqumo esihle. Kwaphetha ngani? Wakhetha ukuphayona, uyise wasemxotsha ngakibo. UNortey uthini ngalokho okwenzakala kuye? Uthi: “Angizange ngithandabuze ukuthi ngangikhethe kuhle.” Lathi nxa singazinika isikhathi sokuncedisa abanye ukuthi bacabangisise ngeMibhalo, singabanceda ukuthi babe lokholo oluqinileyo futhi baqhubeke bekhonza uJehova.—Efe. 3:​16-19.

NCEDISA ABAFOWETHU UKUTHI BABE ‘YIZIPHO EZINGABANTU’

13. Kuyini okwenziwa nguJesu ukuze abe leqiniso lokuthi umsebenzi kaYise uzasala uqhubekela phambili lanxa yena esebuyele ezulwini? (U-Efesu 4:8)

¹³ Ngesikhathi uJesu esemhlabeni, wawenza kuhle umsebenzi uYise ayemthume ukuthi awenze. (Joh. 17:4) Kodwa kazange azitshele ukuthi nxa ufuna into iphume kuhle kumele uzenzele wena. Wenza umsebenzi wakhe okweminyaka emithathu lengxenye futhi okwesikhathi sonke leso wayefundisa abanye ukuthi labo bawenze kuhle. Engakayi ezulwini, wanika abafundi bakhe umsebenzi wokunakekela izimvu zikaJehova eziligugu lokukhokhela emsebenzini wokutshumayela lokufundisa. Abanye babo babeleminyaka engaba kubo-20. (Bala u-Efesu 4:8.) Amadoda la ayeqotho, ekhuthele futhi esebenza nzima ukuthi abe ‘yizipho ezingabantu?’ Manje uJesu wawasebenzisa njani amalanga akhe okucina angu-40 esemhlabeni ukuthi awancedise?—Khangela umcijo wokutaditsha ku-Efesu 4:8 ku-Nguqulo Yomhlaba Omutsha yesiNgisi okuthiwa yi-Study Bible.

14. UJesu wabafundisani abafundi bakhe ngamalanga akhe okucina angu-40 esemhlabeni? (Khangela lomfanekiso.)

¹⁴ UJesu wayengababhodi abafundi bakhe nxa wayefuna ukubakhuza. Kodwa wayekhuluma labo kuhle. Ngokwesibonelo, wananzelela ukuthi abanye babelomkhuba wokuthandabuza, wasebakhuza. (Luk. 24:​25-27; Joh. 20:27) Wabafundisa ukuthi bawuqakathekise kakhulu umsebenzi wokwelusa izimvu zikaNkulunkulu ukwedlula amabhizimusi abo. (Joh. 21:15) Wabakhumbuza ukuthi bangakhathazeki kakhulu nxa bebona abanye bephiwa imisebenzi yenkonzo abangelayo. (Joh. 21:​20-22) Kanti njalo waqondisa imicabango engaqondanga ababelayo ngoMbuso, wasebancedisa ukuthi bacabange kakhulu ngezindaba ezinhle okwakumele zitshunyayelwe. (Imiseb. 1:​6-8) Abadala bafundani kuJesu?

15-16. (a) Chasisa ukuthi abadala bangamlingisela njani uJesu. (b) Iseluleko uPatrick asitholayo samnceda njani?

¹⁵ Abadala bangamlingisela njani uJesu? Kumele baqeqetshe futhi bancedise amadoda, kugoqela lalabo abasakhulayo ukuze bathuthuke, benelise ukwenza imisebenzi eminengi enhlanganisweni.c Akumelanga bakhangelele ukuthi labo ababaqeqetshayo bangenzi amaphutha. Kumele babalaye ngendlela elothando abasakhulayo ukuze babe lolwazi futhi babone ukuqakatheka kokuthobeka, bathembeke futhi bazimisele ukuncedisa abanye.—1 Thim. 3:1; 2 Thim. 2:2; 1 Phet. 5:5.

¹⁶ Kulomunye umfowethu okuthiwa nguPatrick owancediswa ngabadala ukuthi athuthuke. Esakhula, wayengakhulumi kuhle labanye futhi wayebaphatha kubi, kugoqela labodadewethu ebandleni. Omunye umdala webandla wakunanzelela okwakusenziwa nguPatrick, wasemeluleka kuhle kodwa engambhodi. UPatrick uthi: “Ngiyambonga ngokuthi wakwenza lokho ngoba ngangidana nxa ngibona abanye abafowethu bethola imisebenzi yenkonzo mina ngingayitholi. Umdala lo wanginceda ngabona ukuthi kuqakathekile ukuthi ngithobeke, ngincedise abafowethu labodadewethu kulokuthi ngiqakathekise ukuphiwa imisebenzi yenkonzo ebandleni.” Lokhu kwamnceda uPatrick ngoba wabekwa ukuthi abe ngumdala eleminyaka engu-23.—Zaga. 27:9.

17. UJesu watshengisa njani ukuthi wayebathemba abafundi bakhe?

¹⁷ Omunye umsebenzi uJesu awunika abafundi bakhe ngaphandle kokutshumayela wawungowokufundisa abanye. (Khangela umcijo wokutaditsha othi “teaching them” ku-Nguqulo Yomhlaba Omutsha yesiNgisi okuthiwa yi-Study Bible kuMathewu 28:20.) Kungenzakala ukuthi abafundi babengabona angathi ngeke benelise ukuwenza umsebenzi lo. Kodwa uJesu wayeqiniseka ukuthi babezawenza futhi wabatshela lokho. Watshengisa ukuthi uyabathemba ngoba wathi kubo: “Ngiyalithuma njengoba loBaba wangithuma.”—Joh. 20:21.

18. Abadala bangamlingisela njani uJesu?

¹⁸ Abadala bangamlingisela njani uJesu? Abadala abawenza kuhle umsebenzi wabo bayanika abanye imisebenzi yokwenza. (Flp. 2:​19-22) Ngokwesibonelo, abadala bangavumela ukuthi abasakhulayo bancedise nxa kuklinwa iWolu yoMbuso lanxa ilungisiswa. Nxa benika umuntu othile umsebenzi, kumele bamfundise ukuthi wenziwa njani njalo bathembe ukuthi uzawenza kuhle. Omunye umfowethu okuthiwa nguMatthew osanda kuba ngumdala uthi uyathokoza kakhulu nxa abadala abalolwazi bemqeqetsha ukuthi ayenze kuhle imisebenzi abamupha yona, besebethemba ukuthi uzayenza kuhle. Uthi: “Kuyanginceda kakhulu ukuthi nxa ngingaphambanisa bazitshele ukuthi ngisafunda besebengincedisa ukuthi ngithuthuke.”d

19. Kumele sizimisele ukwenzani?

¹⁹ UJesu wasebenzisa izinsuku zakhe zokucina ezingu-40 esemhlabeni ukuze akhuthaze abanye, abafundise njalo abaqeqetshe. Kungaba kuhle ukuthi sizimisele ukumlingisela ezintweni zonke lezi azenzayo. (1 Phet. 2:21) Uzasincedisa ngoba wasithembisa wathi: “Ngizabe ngilani kuze kube yisiphetho somumo lo wezinto.”—Mat. 28:20.