Kunengi Esikufundiswe NguMfundisi Wethu Omkhulu

ABAZALI BAMI BABEYITHANDA INKONZO

Kwathi sekusiyaphela u-1950, abazali bami basuka e-Italy baya eKindersley, idolobho elisesabelweni seSaskatchewan, eCanada. Bathi befika khonale baqalisa ukufunda iBhayibhili futhi sonke njengemuli sahle saqalisa ukukhonza. Ngikhumbula ngisasengumntwana sasitshona ekutshumayeleni, yikho kwezinye izikhathi ngiyake ngithi: “Phela mina ngaqalisa ukuphayona ngileminyaka engu-8!”

Abazali bami babengabayanga kodwa basifundisa ukuthi sizinikele ekukhonzeni uJehova. Ngo-1963 bathengisa impahla yabo enengi ukuze bathole imali yokuya emhlanganweni wezizwe owawuzakuba sePasadena, eCalifornia. Ngo-1972 sathuthela eTrail, eBritish Columbia, eseCanada ukuze siyetshumayeza abantu abakhuluma isi-Italian. Indawo le ingamakhilomitha angaba ngu-1 000 usuka lapho esasesihlala khona. Ubaba wayesenza omunye umsebenzi owawungelamali etheni futhi wayengavumi eminye imisebenzi ngenxa yokuthi yayingacina isimthathela isikhathi esinengi sokukhonza.

Ngiyababonga kakhulu abazali bami ngalokho abasifundisa khona mina lomnewethu kanye labodadewethu ababili. Abangifundisa khona angikakukhohlwa lalamuhla. Ngiyakwazi ukuthi nxa ngingafaka uMbuso kuqala, uJehova uzanginakekela.—Mat. 6:33.

SIQALISA INKONZO YESIKHATHI SONKE

Ngo-1980 ngatshada letshatshazi lami uDebbie, intombi ethanda uJehova. Sonke sasikufuna ukuba senkonzweni yesikhathi sonke, yikho uDebbie wahle waqalisa ukuphayona silezinyanga ezintathu sitshadile. Sathi sesilomnyaka sitshadile sathutha sayangena lebandla elalilabamemezeli abalutshwane futhi lami ngahle ngaqalisa ukuphayona.

Ngokuhamba kwesikhathi, sasingasakholisi endaweni le yikho sasesibona kungcono ukuthi sizihambele. Kodwa saqala sakhuluma lombonisi wesiqinti. Kazange atshaye inja efihla umphini, wahle wasitshela wathi: “Uhlupho yikuthi likhangela izinto okungamelanga lizikhangele. Aluba belikhangela izinto ezinhle belizathokoza.” Sananzelela ukuthi asitshela khona yikho kanye okwakumele sikwenze. (Hubo. 141:5) Sathi sesikhangela sabona ukuthi kwakukunengi okuhle okwakusenzakala. Abanye ebandleni babezimisele sibili ukukhonza uJehova kugoqela abasakhulayo lalabo ababelabomkabo abangakhonziyo. Wasifundisa into eqakatheke kakhulu umbonisi wesiqinti. Safunda ukuthi kumele sikhangele okuhle besesilindela ukuthi uJehova alungise uhlupho oluyabe lukhona. (Mik. 7:7) Sasesikhonza uJehova sithokoza futhi izinto zatshintsha kakhulu zabangcono.

Ababalisi ababesifundisa esikolo samaphayona babeke bakhonza kwamanye amazwe. Basitshengisa imifanekiso basitshela ngobunzima kanye lezibusiso ababezithole bekhonza bekwamanye amazwe. Lokhu kwenza lathi safisa ukuyatshumayela kwamanye amazwe. Yikho safila amafomu.

Kwasekusithi ngo-1984, sathuthela eQuebec lapho okukhulunywa khona isiFrench futhi indawo le iqhelelane le British Columbia ngamakhilomitha adlula 4 000. Kwasekumele sifunde amasiko amatsha lolimi olutsha. Ngapha sasihlala sijombile. Ukuze sithole okokudla, sasidobha amagwili ayesele emapulazini ngemva kokuvuna. Umkami wayeselendlela ezitshiyeneyo zokupheka amagwili. Sasisenza konke esikwenelisayo ukuze siqhubeke sibekezela ngapha sithokoza futhi sazibonela ukuthi uJehova wayesibusisa.—Hubo. 64:10.

Ngelinye ilanga abafowethu basifonela besicela ukuthi sibuye sizosebenza eBhetheli yeCanada. Sasesingasakwazi ukuthi senzeni ngoba sasesithumele amafomu okuya eGiliyadi. Yikho sasizibuza ukuthi sivume ukuyasebenza eBhetheli yini kumbe simelele ukuya eGiliyadi. Sacina sihambile eBhetheli. Safika sabuza umfowethu uKenneth Little, owayelilunga leKhomithi Yegatsha sathi “Manje kuzahamba njani ngamafomu ethu okuya eGiliyadi?” Yena waphendula wathi, “Lingazikhathazi ngalokho sizakubona isikhathi singafika.”

Sathi sileviki siseBhetheli, sanxuswa ukuthi siyengena iSikolo seGiliyadi. Kwasokumele sikhethe ukuthi sizihlalele eBhetheli kumbe siye eGiliyadi. Umfowethu uLittle wathi: “Likhululekile ukukhetha loba yikuphi, kodwa khumbulani ukuthi ngelinye ilanga lizafisa ukuthi aluba lahamba eGiliyadi kumbe aluba laqhubeka liseBhetheli. Kodwa uJehova uzalibusisa kungelani lokuthi likhetheni.” Sacina sihambile eGiliyadi futhi njengoba iminyaka iqhubeka itshova sizibonele ukuthi umfowethu uLittle wayekhuluma iqiniso. Sijayele ukuwasebenzisa amazwi akhe ukuze sikhuthaze abanye abayabe bengakwazi ukuthi bakhethe wuphi umsebenzi wenkonzo.

UKUBA NGAMAMISHINARI

Sangena iklasi yesi-83 yeGiliyadi futhi sasingu-24 eklasini. Kwakungo-April 1987 eBrooklyn, eNew York. Ababalisi bethu kwakungu-Ulysses Glass loJack Redford. Asibonanga lokuthi inyanga ezinhlanu zadlula njani. Saphiwa izicoco zethu mhlaka 6 September 1987. Sacelwa ukuthi siyesebenzela eHaiti, siloJohn loMarie Goode.

Elizweni leHaiti kwakungasela mamishinari ayevela eGiliyadi ngoba awokucina ukusebenza lapho ayexotswe ngo-1962. Ngemva kwamaviki amathathu nje siqede isikolo seGiliyadi, sasesiseHaiti ebandleni elithe qekele lodwa elilabamemezeli abangu-35. Sasisasebancane ngapha kulokunengi okumele sikufunde. Sasihlala sodwa endlini yamamishinari. Abantu endaweni le babezidubekela futhi abanengi bengenelisi ukubala. Izinto zazingamanga kuhle kwezombusazwe, abanye babefuna ukuhluthunela uhulumende amandla, kuleziphithiphithi leziphepho ezilamandla.

Kunengi kakhulu esakufunda kubafowethu labodadewethu beHaiti ngoba babeqinisela njalo bethokoza. Abanengi babo babethwele qatha sibili kodwa babemthanda uJehova futhi bekhuthele ekutshumayeleni. Omunye udadewethu owayesekhulile wayengenelisi ukubala kodwa esazi amavesi adlula 150 ngekhanda. Esasikubona nsuku zonke kwenza sazimisela kakhulu ukutshela abantu ngoMbuso kaNkulunkulu ngoba yiwo kuphela ozaqeda ukuhlupheka kwabantu. Kuyasithokozisa kakhulu ukubona ukuthi abanye abantu esaqalisa ukufunda labo iBhayibhili bacina sebengamaphayona esikhathi sonke, amaphayona aqakathekileyo ikanti abanye sebengabadala bamabandla.

Ngesikhathi siseHaiti ngabona ijaha elisakhulayo okuthiwa nguTrevor elalingumnali weyinye isonto futhi saxoxaxoxa ngeBhayibhili. Ngemva kweminyaka ethile ngathola incwadi eyayivela kuTrevor. Wayebhale wathi: “Ngithe ngikutshele ukuthi ngiyabhabhathizwa emhlanganweni wesiqinti olandelayo! Ngifuna ukubuyela eHaiti ngiyetshumayela sengiliphayona eliqakathekileyo endaweni engangitshumayela kuzo ngisasengummishinari waleyana sonto.” Lakanye yikho akwenzayo elenkosikazi yakhe okweminyaka eminengi.

UMSEBENZI WOKUTSHUMAYELA E-EUROPE LASE-AFRICA

Sacelwa ukuthi siyetshumayela e-Europe, yikho sacelwa ukuthi siyekhona. Ngo-1992 saya edolobheni le-Ljubljana, eliseSlovenia duze lalapho abazali bami ababekhona bengakathutheli e-Italy. Impi yayilokhe isidla ubhedu eYugoslavia. Umsebenzi wokutshumayela endaweni lezi wawukhangelwa ligatsha le-Austria elisedolobheni leVienna, labafowethu abasemawofisini aseZagreb eCroatia, lasedolobheni leBelgrade eSerbia. Kodwa khathesi kwasekumele ilizwe ngalinye libe legatsha lalo.

Kwasokumele sifundele olunye ulimi lamanye amasiko amatsha. Abantu beSlovenia babejayele ukuthi, “Jezik je težek,” okutsho ukuthi “Ulimi lolu lunzima.” Lakanye lwalunzima okuzwayo! Sasibathanda kakhulu abafowethu labodadewethu laba ngoba babevumelana lotshintsho olwalusenziwa yinhlanganiso futhi sathokoza sibona indlela uJehova ayebabusisa ngayo. Kwakuzicacela sibili ukuthi uJehova uyabathanda abantu bakhe ngoba walungisa izinto ngesikhathi sakhe. Kunengi kakhulu esakufunda ngesikhathi siseSlovenia futhi lezinto esasizifunde singakafiki elizweni leli zasinceda ukuthi siqinisele.

Kodwa impilo yethu yayisazoqhubeka itshintsha. Ngo-2000 sacelwa ukuthi siye eCôte d’Ivoire, eWest Africa. Kodwa ngoNovember 2002 kwaba lempi yombango, yikho sasuka saya eSierra Leone. Lakho kwakusanda kuphela impi eyayisitshudule okweminyaka engu-11. Kwakungalula ukuphongusuka eCôte d’Ivoire ngoba sasingakuhlelanga. Kodwa esakufunda ngesikhathi sikhonale kwasinceda ukuthi siqhubeke sithokoza.

Sasikukholisa kakhulu ukuxoxa labantu abatshiyeneyo ababefuna ukufunda iqiniso. Kwakusithokozisa lokuqinisa ubungane bethu labafowethu labodadewethu ababeqinisele okweminyaka eminengi ngesikhathi sempi. Abafowethu labodadewethu laba babengelazinto ezinengi kodwa babezimisele ukwabelana labanye khonokho okulutshwana ababelakho. Omunye udadewethu wayefuna ukunika uDebbie izigqoko. Kodwa uDebbie wayethikaza ukuzithatha. Udadewethu lo wasesithi: “Abafowethu labodadewethu babesincedisa ngesikhathi sempi. Khathesi sokulithuba lethu lokuthi sibancedise.” Sazimisela ukubalingisela.

Sacina sibuyelile eCôte d’Ivoire kodwa kwakulokhe kuleziphithiphithi kwezombusazwe. Yikho ngoNovember 2004, sathathwa nge-helicopter, umuntu ngamunye ethwele okuyisikhwama okukodwa okwakungamelanga kudlule amakhilogramu angu-10. Salala phansi enkambeni yamasotsha eFrance, kwathi ngelanga elilandelayo sahanjiswa eSwitzerland. Safika egatsheni leSwitzerland phakathi kwamabili futhi abafowethu beKhomithi Yegatsha lababalisi beSikolo Sokuqeqetshelwa INkonzo labomkabo basamukela ngazo zombili, basigona, basinika ukudla okutshisayo kanye le-chocolate emnandi yeSwitzerland. Sazibonela ukuthi bayasithanda.

Sacelwa ukuthi sike siye eGhana okwesikhatshana, sasesibuyela eCôte d’Ivoire izinto sezingconywana. Indlela abafowethu labodadewethu abatshengisa ngayo ukuthi bayasithanda yasincedisa kakhulu ngezikhathi lezi ezinzima. Mina loDebbie sihlala sikhumbuzana ukuthi lanxa abantu bakaJehova besaziwa ngokuthi bayathandana akumelanga ngitsho lakancane sikukhohlwe lokho abasenzela khona. Ngokuhamba kwesikhathi sazibonela ukuthi ubunzima esasidlule kubo babusifundisa ukubekezelela ubunzima obukhulu esasizahlangana labo phambili.

UKUYA EMIDDLE EAST

Ngo-2006 samukela incwadi eyayivela emawofisini ethu amakhulu, abafowethu babesicela ukuthi siye eMiddle East. Langalesosikhathi kwasokumele siye endaweni entsha, sifunde ulimi olutsha, lamasiko amatsha. Lalapha futhi izinto zazingamanga kuhle kwezombusazwe njalo abantu babedabukene phakathi ngenxa yezinto ababezikholwa. Kodwa kwakusithokozisa kakhulu ukubona abantu bakaJehova bemanyene njalo belandela lokho okukhulunywa yinhlanganiso lanxa babekhuluma izindimi ezitshiyeneyo. Sasibathanda kakhulu abafowethu labodadewethu ngoba babeqhubeka bethembekile lanxa babephikiswa ngabemuli, abafunda labo, abasebenza labo kanye labomakhelwane.

Ngo-2012 sangena umhlangano oqakathekileyo owenzelwa eTel Aviv, e-Israel. Asisoze safa sawukhohlwa umhlangano lo! Phela abantu bakaJehova babecine ukuhlangana ndawonye bebanengi kangaka ngePhentekhosti lika-33 C.E.

Phakathi kweminyaka leyo, sasike sithunywe ukuyatshumayela emazweni lapho umsebenzi wethu owawungavunyelwa khona. Sasisebenzisa amabhuku ethu ekutshumayeleni njalo singena lemihlangano. Kwakugcwele amasotsha ayehlomile futhi kwakulendawo ezinengi lapho abantu ababesetshwa khona kodwa sasizizwa sivikelekile ngoba sasizama ukwenza izinto ngonanzelelo silabamemezeli abalutshwana.

UKUBUYELA E-AFRICA

Ngo-2013 sacelwa ukuthi siyesebenzela egatsheni eliseKinshasa eCongo. Ilizwe leli likhulu futhi lihle kakhulu kodwa abantu abanengi bayazidubekela njalo kwakuhlala kulezimpi ezinengi. Sathi sitshelwa ukuthi siyabuyela eAfrica, sathi: “Ah! yizinto ezincane lezi i-Africa siyayazi.” Kodwa kwakulezinto ezinengi okwakumele sizifunde. Ngokwesibonelo, kwakungalula ukuhamba ngoba izindawo ezinengi zazingelamigwaqo kumbe amabhriji. Kodwa kunengi kakhulu okuhle esakubonayo. Ngokwesibonelo, indlela abafowethu ababethokoza ngayo lanxa babengelazinto ezinengi empilweni, indlela ababekhuthele ngayo emsebenzini wokutshumayela, lokubona ukuqinisela kwabo behamba imango emide ukuze bangene imhlangano emincane lemikhulu. Kwazicacela sibili ukuthi okwakusenza umsebenzi woMbuso uphumelele yikuthi uJehova wayesincedisa futhi esibusisa. Kunengi kakhulu esakufunda ngesikhathi siseCongo njalo labangane bethu babelokhu besibabanengi.

Ekupheleni kuka-2017 sacelwa ukuthi siyesebenza egatsheni leSouth Africa. Leli ligatsha elikhulu kulawo wonke esake sasebenza kuwo futhi lomsebenzi esasiwenza wawumutsha kithi. Lalapha futhi kwasekumele sifunde izinto ezintsha kodwa lokho esasikufundile singakabuyi lapha kwasinceda kakhulu. Siyabathanda kakhulu abafowethu labodadewethu asebekhonze uJehova bethembekile okweminyaka leminyaka. Kuyasimangalisa kakhulu ukubona abafowethu labodadewethu abaseBhetheli bemanyene lanxa belamasiko atshiyeneyo futhi bekhuluma indimi ezinengi ezitshiyeneyo. UJehova uyababusisa kakhulu abantu bakhe abanike ukuthula nxa bezama ukugqoka ubuntu obutsha lokusebenzisa izimiso eziseLizwini lakhe.

Eminyakeni yonke le sikhonza uJehova sithole imisebenzi etshiyeneyo, safunda amasiko amatsha lendimi ezintsha. Khona bekungalula, kodwa sizibonele indlela uJehova asitshengise ngayo ukuthi uyasithanda esebenzisa inhlanganiso yakhe labafowethu labodadewethu abatshiyeneyo. (Hubo. 144:2) Asithandabuzi ngitsho lakancane ukuthi esikufunde ngesikhathi sisenkonzweni yesikhathi sonke kusincede samthanda kakhulu uJehova.

Ngibabonga ngingaqedi abazali bami, umkami uDebbie, labafowethu labodadewethu abatshiyeneyo. Njengoba siqhubeka sikhonza uJehova uMfundisi wethu omkhulu siyakwazi ukuthi kusaselokunengi okufanele sikufunde.