Kungani OFakazi BakaJehova Bengenzi Loba Yini Etshengisa Ukuthi Baqakathekisa Amazwe Abahlala Kuwo?

OFakazi bakaJehova bayabahlonipha ohulumende kanye lamafulegi amazwe abo. Siyabahlonipha lalabo abakhetha ukusalutha ifulegi, ukuhlabela ingoma yesizwe kanye lokwenza i-pledge.

Kodwa thina oFakazi bakaJehova asizenzi izinto lezi ngoba ziphikisana lalokho okutshiwo liBhayibhili. Siyafisa ukuthi abanye bahloniphe lokho esikukholwayo ngoba lathi siyakuhlonipha lokho abakukhethayo.

Okusesihlokweni lesi

• Lokho okutshiwo liBhayibhili

• Kuthiwani nxa uhulumende efake umthetho wokuthi wonke umuntu kumele enze lezozinto?

• Likhona yini icele oFakazi bakaJehova abalithathayo kwezombusazwe?

Lokho okutshiwo liBhayibhili

Ake sixoxe ngokunye okutshiwo liBhayibhili ngendaba le.

• NguNkulunkulu kuphela okumele simkhonze. IBhayibhili lithi: “NguJehova uNkulunkulu wakho okumele umkhonze njalo nguye yedwa okumele umenzele inkonzo engcwele.” (ULukha 4:8) Izikhathi ezinengi ama-pledge ayenziwayo kanye lengoma zesizwe ezihlatshelwayo zijayele ukuba lamazwi ayisithembiso sokuthi sizathanda ilizwe lethu ukwedlula loba yini. Lokhu yikho okwenza oFakazi bakaJehova bakubone kungafanelanga ukwenza izinto lezi.

  OFakazi bakaJehova bakholwa ukuthi ukusalutha ifulegi kufanana lokukhonza izithombe, okuyinto iBhayibhili elithi akumelanga siyenze. (1 KwabaseKhorinte 10:14) Abanye abachwayisisa ngezembali bayavuma ukuthi amafulegi aluphawu lwesizwe olukhonzwayo. Ngokwesibonelo, omunye obona ngezembali okuthiwa nguCarlton J. H. Hayes wabhala wathi: “Ifulegi yinto ekhonzwa kakhulu yilabo abaqakathekisa amazwe abo.”a Umlobi okuthiwa nguDaniel P. Mannix wakhuluma ngamaKhristu akuqala wathi: ‘AmaKhristu ayesala ukwenza imihlatshelo eyayisenzelwa ababusi abangamaRoma futhi lamuhla lokhu kufanana lokwala ukusalutha ifulegi.’b

  Lanxa singayisaluthi ifulegi asisoze siyidabule, siyitshise kumbe senze loba yini etshengisa ukuthi asiyihloniphi.

• Bonke abantu bayafanana kuNkulunkulu. (ImiSebenzi 10:34, 35) IBhayibhili lithi ‘ngomuntu oyedwa uNkulunkulu wenza zonke izizwe zabantu.’ (ImiSebenzi 17:26) Lokhu ngokunye okwenza oFakazi bakaJehova bakubone kungaqondanga ukuthi baqakathekise kakhulu umhlobo othile kumbe ilizwe elithile. Sihlonipha wonke umuntu kungelani lokuthi uhlala ngaphi kumbe ukuthi uvela kuliphi ilizwe.—1 UPhetro 2:17.

Kuthiwani nxa uhulumende efake umthetho wokuthi wonke umuntu kumele enze lezozinto?

OFakazi bakaJehova abaphikisani lohulumende. Sikholwa ukuthi ohulumende bayingxenye yohlelo uNkulunkulu aluvumele ukuthi lube khona. (KwabaseRoma 13:1-7) Sikholwa lokuthi amaKhristu kumele alalele iziphathamandla.—ULukha 20:25.

Kodwa kuthiwani nxa kulomthetho kahulumende ophikisana lokaNkulunkulu? Kwezinye izikhathi siyake sihambise isicelo emthethwandaba sicela ukuthi uhulumende atshintshe umthetho ayabe ewufakile.c Kodwa nxa kungavumi, sikhetha ‘ukulalela uNkulunkulu umbusi kulokuthi silalele abantu.’—ImiSebenzi 5:29.

Likhona yini icele oFakazi bakaJehova abalithathayo kwezombusazwe?

Hatshi. OFakazi bakaJehova abazingeni ezombusazwe. Ukungasaluthi ifulegi lokungahlabeli ingoma yesizwe kanye lokungenzi i-pledge akutsho ukuthi siphikisana lohulumende okhona loba ukuthi sifuna ukufaka omunye. Kodwa silandela lokho okutshiwo liBhayibhili mayelana lokwenza izinto lezi.