OFakazi BakaJehova Babaphatha Njani Abangaseyiwo Malunga Ebandla Labo?
Siyazama ukuthi sithande bonke abantu, sibe lomusa kubo futhi sibahloniphe. Nxa umuntu wayenguFakazi kaJehova abesesima ukukhonza kumbe ayekele ukwenza ezinye izinto eziphathelane lokukhonza, siyazama ukumncedisa ukuthi aqinise ubungane bakhe loJehova, simqinisekise lokuthi siyamthanda.—ULukha 15:4-7.
Kwezinye izikhathi izenzo zomuntu zingenza ukuthi acine esesuswa ebandleni. (1 KwabaseKhorinte 5:13) Kodwa siyazama ngamandla ukumncedisa ukuthi angacini esesuswa ngoba siyabathanda kakhulu abantu esikhonza labo. Lanxa engaze esuswe, siyabe silokhu simhlonipha futhi simthanda ngoba iBhayibhili lisikhuthaza ukuthi senze njalo.—UMakho 12:31; 1 UPhetro 2:17.
Kuyini okwenza umuntu acine esuswa ebandleni?
IBhayibhili lithi nxa umKhristu angenza isono esikhulu abeseyekela ukutshintsha kumele asuswe ebandleni. (1 KwabaseKhorinte 5:11-13) Likubeka kucace ukuthi yiziphi izono ezinkulu ezingenza umuntu acine esesuswa. Izono lezi ezinkulu zigoqela ukudakwa, ukubulala, ukuhlukuluza abemuli lokutshontsha kanye lokuthi umuntu athi etshadile abeselala lomuntu ongasimkakhe.—1 KwabaseKhorinte 6:9, 10; KwabaseGalathiya 5:19-21; 1 KuThimothi 1:9, 10.
Nxa umuntu angenza isono esikhulu akutsho ukuthi uyahle asuswe ebandleni khonapho khonapho. Abadala bebandlaa bayaqala bezame ukumncedisa ukuthi atshintshe, atshiye okubi akwenzayo. (KwabaseRoma 2:4) Bayazama ukumncedisa kuhle, bemnene futhi belomusa ukuze abakutshoyo kuthophele enhliziyweni yakhe. (KwabaseGalathiya 6:1) Lokhu kungenza umuntu lo ananzelele okubi abekwenza abesephenduka. (2 KuThimothi 2:24-26) Kodwa nxa bengazama ukumncedisa kanengi yena abeseqhubeka esenza lokho iBhayibhili elithi akuqondanga futhi engaphenduki, kuyabe sekumele asuswe ebandleni. Nxa sekunjalo abadala bayanika isaziso ebandleni esokuthi umuntu lo kasenguyeFakazi kaJehova.
Abadala benza okusemandleni abo ukuthi bamncedise kuhle umuntu owenze isono, bemnene futhi belomusa ukuze abakutshoyo kuthophele enhliziyweni yakhe
Kunceda ngani ukususa umuntu oqhubeka esenza isono esikhulu? Kwenza ukuthi ibandla lihlale lilandela imithetho kaNkulunkulu emayelana lokuziphatha. Kanti njalo kuyavikela abanye ukuthi bangacini sebeyengwa ngumuntu lo ukuthi labo benze okubi. (1 KwabaseKhorinte 5:6; 15:33; 1 UPhetro 1:16) Nxa umuntu owenza isono engasuswa, angacina etshiya into embi abeyenza abesezimisela ukutshintsha.—KumaHebheru 12:11.
OFakazi bakaJehova bamphatha njani umuntu oyabe esesusiwe ebandleni?
IBhayibhili lithi amaKhristu kumele ‘ayekele ukuba lobudlelwano’ lomuntu oyabe esusiwe ebandleni njalo ‘engaqali ukudla lomuntu onjalo.’ (1 KwabaseKhorinte 5:11) Yikho nxa umuntu engasuswa asisabi lobungane laye njengakudala. Kodwa lokho akusatsho ukuthi sesimlahlele iganga. Uyabe evunyelwe ukuthi eze emihlanganweni yethu njalo nxa angafika, abanye oFakazi bakaJehova bangambingelela nxa befuna.b Siyabe silokhu simhlonipha. Angacela lokuthi abadala bamncedise ukuthi abuyele ebandleni.
Abasusiweyo ebandleni bakhululekile ukuza emihlanganweni yethu
Manje kwenzakalani nxa umuntu otshadileyo angasuswa ebandleni kodwa umkakhe labantwabakhe baqhubeke bengoFakazi bakaJehova. Uyabe engasakhonzi ndawonye lemuli yakhe kodwa uyaqhubeka elilunga lemuli. Njengoba bayabe behlala bonke, ubuhlobo babo abutshintshi njalo kuyabe kumele baqhubeke bemphatha kuhle.
Umuntu osuswayo ebandleni engacela ukuthi abadala bamncedise. Abadala laba bazamncedisa kuhle besebenzisa iMibhalo njalo bamncenge lokuthi aphenduke abesebuyela kuNkulunkulu. (UZakhariya 1:3) Nxa angatshiya okubi abekwenza abesetshengisa ukuthi uyafuna sibili ukulandela lokho okutshiwo liBhayibhili, uyaphinda abe lilunga lebandla. Ibandla ‘lizamthethelela ngesihle njalo limduduze,’ lilandela lokho okwenziwa ngamaKhristu eKhorinte ngesikhathi umuntu owayeyisoni etshintsha indlela zakhe.—2 KwabaseKhorinte 2:6-8.
Abake basuswa ebandleni bathini?
Nanku okunye okwatshiwo ngabanye oFakazi bakaJehova abake basuswa ebandleni basebephenduka kuNkulunkulu:
“Ngathi sengibuyela ebandleni ngangicabanga ukuthi abadala bazangibuza ukuthi ngangisenzani iminyaka yonke le ngisusiwe. Kodwa bona baphonguthi ‘Ungakhangeli okusemuva, wena cabanga ngozakwenza khathesi kusiya phambili.’ Ngemva kwalokho ngazizwa ngikhululekile kakhulu.”—UMaria ose-United States.
“Ibandla lalikulindele ngabomvu ukuphenduka kwami. Ngazizwa ngiqakathekile. Abafowethu labodadewethu engikhonza labo bangincedisa ukuthi ngibone ukuthi uJehova usengithethelele lokuthi labo bangithethelele. Lokhu kwanginceda ukuthi ngicabange ngokuphambili hatshi okusemuva. Abadala labo babehlala bengincedisa ukuthi ngiqinise ubungane bami loJehova. Babengiduduza, bengincedisa lokuthi ngibone ukuthi uJehova ulokhu esangiqakathekisa lokuthi uyangithanda.”—UMalcom ose-Sierra Leone.
“Kuyangithokozisa ukuthi uJehova ubathanda kakhulu abantu bakhe okokuthi kafuni ukuthi inhlanganiso yakhe ingcoliswe. Abanye abantu abangazwisisiyo bangabona angani ukususa umuntu yisihluku. Kodwa kuqakathekile ukwenza njalo, futhi kutshengisa ukuthi uJehova uyasithanda. Ngiyambonga kakhulu uBaba wethu osezulwini ngenxa yothando lwakhe langokuthi unguNkulunkulu othethelelayo.”—USandi ose-United States.
a Abadala ngamadoda alingisela uKhristu futhi balomsebenzi wokufundisa iMibhalo lokwelusa abantu bakaJehova. Babelusa ngokubancedisa ezintweni ezitshiyeneyo langokubakhuthaza. Abawuholeli umsebenzi lo.—1 UPhetro 5:1-3.
b Lanxa kungajayelekanga, kungenzakala ukuthi umuntu atshiye ibandla abeseqalisa ukwenza konke okusemandleni akhe ukuthi alingcolise kumbe atshotshozele abanye ukuthi benze okubi. Nxa lokho kungenzakala silandela umlayo oseBhayibhilini othi ‘singambingeleli’ lowomuntu.—2 UJohane 9-11.