Lingaphuzi Ukuyababona
Selokhu iWebhusayithi yethu yahlelwa kutsha, sebebanengi abantu abafaka izicelo zokufunda iBhayibhili. Izindlela ezintsha zokutshumayela obala lazo zibangele ukuthi izicelo lezi zengezeleleke. Nxa iwofisi legatsha lizamukela izicelo lezi liyazithumezela masinyane lapho okumele ziyekhona. Ngokwesibonelo nxa umuntu ofuna ukufunda angafaka isicelo ku-jw.org, igatsha liyasithumezela kubadala abasensimini lapho umuntu lo ahlala khona kungakedluli amalanga amabili. Kodwa kulemibiko etshengisa ukuthi abanye abacela ukufunda bayahlala amaviki amanengi kungakafiki muntu ukuzobafundisa. Kuyini esingakwenza ukuze sibe leqiniso lokuthi siyabavakatshela abantu laba isifiso sabo sokufunda singakapheli?—Mak. 4:14, 15.
Nxa ungahlangana lomuntu ofuna ukufunda kodwa engahlali ensimini yenu, ungapholisi amaseko kodwa gcwalisa ifomu elithi Sicela Uyebona (S-43) ubusulinika unobhala webandla lenu emhlanganweni webandla olandelayo. Unobhala kumele athumezele isicelo leso ebandleni elifaneleyo kumbe asithumezele egatsheni esebenzisa i-akhawunti yeBandla ku-jw.org kungakedluli amalanga amabili. Abadala kumele bahlale bephosa ilihlo kuWebhusayithi yethu. Nxa bangatshelwa ukuthi kulomuntu ofuna ukufunda ensimini yabo kumele bahlele ukuthi umuntu lowo ayebonwa masinyane. Loba ngubani ocelwa ngabadala ukuthi ayebona umuntu lowo, kumele ahle ayembona masinyane. Nxa ungamthola engekho tshiya ibizo lakho lenombolo zakho zocingo kanye lokuthi unguFakazi kaJehova.