Uyakhumbula uze uwe ngesikhathi usesemncane? Kungenzeka ukuthi walimala ingalo kumbe wahluzuka idolo. Usacabanga ukuthi umama wakho wakududuza njani? Engxenye wakugezisa isilonda wasekubopha ngeqhele ngapha ukhala. Kodwa indlela akuthulisa ngayo yakwenza wezwa ngcono. Ngaleso sikhathi kwakulula ukuthola ukududuzwa.

Kodwa nxa sikhula impilo iqhubeka isiba nzima. Izinhlupho zona ziyabe zilokho zisanda kanti induduzo yona kube nzima ukuyithola. Nxa usukhulile akusafanani langesikhathi usesemncane lapho owawuthuliswa khona ngumama nxa sokunzima. Ake uhlole izibonelo ezilandelayo.

• Wake wabuzwa yini ubuhlungu bokuphelelwa ngumsebenzi? UJulian uthi ngesikhathi aze axotshwe emsebenzini waba lesithuli njalo wakhathazeka kakhulu. Ayezibuza khona yikuthi, ‘Imuli yami ngizayinakekela njani? Phezu kokusebenza nzima kangaka iminyaka yonke le kungani bengixotshe mahlayana nje?’

• Mhlawumbe ukhathazwa yikuchitheka komtshado wakho. URaquel uthi, “Ngathi sengibalekelwe ngumkami ezinyangeni ezingu-18 ezedluleyo, ngezwa angani ngembeswe liyezi elimnyama. Kwakungani inhliziyo yami yehlukaniswe phakathi. Ngangifuthelwa enhliziyweni lasemzimbeni. Kwangethusa sibili.”

• Kungenzeka ukuthi ukhathazwa ngumkhuhlane omubi ongelathemba lokuthi uzakutshiya uphila. Engxenye lawe wawuke ufikelwe ngumcabango owafikela uJobe owathi: “Ngiyanengwa yikuphila kwami, kangifisi ukuhlala kokuphela.” (UJobe 7:16, The Holy Bible in Ndebele) Mhlawumbe uzwa njengendoda okuthiwa nguLuis esileminyaka edlula engu-80 eyathi, “Ngezinye izikhathi ngifisa lokufa.”

• Mhlawumbe uyayidinga induduzo ngenxa yokufelwa ngumuntu omthandayo. URobert ulandisa esithi, “Ngesikhathi ngisizwa ukuthi indodana yami ife engozini yendizamtshina angizange ngikukholwe. Kodwa ngemva kwesikhathi ngaqalisa ukuzwa ubuhlungu, ubuhlungu iBhayibhili elibufanisa lobenkemba egwaza umphefumulo wakho.”—ULukha 2:35.

URobert, uLuis, uRaquel loJulian bayithola induduzo ngezikhathi bephakathi kobunzima. Bamthola umuntu owayengabapha induduzo engcono kakhulu, uNkulunkulu uSomandla. Usiduduza njani? Kambe ukuthi lawe angakududuza?

Umphostoli uPhawuli uthi uJehovaa ‘nguNkulunkulu wenduduzo yonke, osiduduzayo kuzo zonke izinhlupheko zethu.’ (2 KwabaseKhorinte 1:3, 4) Ngamazwi la iBhayibhili lisitshela ukuthi uNkulunkulu uyenelisa ukunceda loba ngubani njalo akula bunzima obungehlula uBaba wethu osezulwini ukuthi asiduduze kubo.

Akumelanga sigoqe izandla nxa sifuna ukuthi uNkulunkulu asiduduze. Phela akwenzakali ukuthi sithole uncedo kudokotela singazange siyembona. Umphrofethi u-Amosi wabuza: “Ababili bayahamba bebonke ngaphandle kokuba bevumelene ukwenzanjalo na?” (U-Amosi 3:3) Yikho iMibhalo isitshela ukuthi: “Sondelani phansi kukaNkulunkulu laye uzasondela kini.”—UJakhobe 4:8.

Kuyini okungasenza sibe leqiniso lokuthi uNkulunkulu angasondela kithi? Okokuqala, usitshela ephindaphinda ukuthi ufuna ukusincedisa. (Khangela lebhokisi.) Okwesibili, kulobufakazi babantu abake baduduzwa nguNkulunkulu abaphila kudala labaphila khathesi.

INkosi uDavida yayiludinga usizo lukaNkulunkulu njengathi namuhla ngoba yayihlala ihlangana lezinhlupho. Ngesinye isikhathi wacela uJehova wathi: “Zwana ukukhala kwami ngicela umusa, nxa ngikhala kuwe ngicela usizo.” UJehova wamphendula, ngoba uDavida uphinda athi: “Ngiyancedwa. Inhliziyo yami iyaqolotsha ngentokozo.”—AmaHubo 28:2, 7.

UMSEBENZI KAJESU WOKUDUDUZA BONKE ABALILAYO

UNkulunkulu waphathisa uJesu umsebenzi oqakathekileyo wokududuza abantu. Omunye umsebenzi uNkulunkulu awuphathisa uJesu ‘ngowokubopha izinhliziyo ezidabukileyo’ ‘lokududuza abalilayo.’ (U-Isaya 61:1, 2) Njengoba iziphrofetho zazitshilo, uJesu wayelozwelo ngabantu ‘ababekhathele lababesindwa.’—UMathewu 11:28-30.

UJesu waduduza abantu ngokubanika iseluleko esisebenzayo, ngokubaphatha ngomusa langokubelapha. Ngelinye ilanga indoda eyayilobulephero yancenga uJesu yathi: “Aluba uthanda ungangihlambulula.” Efuqwa yisihawu uJesu wamphendula esithi: “Ngiyathanda. Hlanzeka!” (UMakho 1:40, 41) Lamanje indoda le yasila.

INdodana kaNkulunkulu ayisekho lapha emhlabeni ukuze isiduduze. Kodwa uYise uJehova uqhubeka encedisa labo abadinga usizo kuye ngoba ‘unguNkulunkulu wenduduzo yonke.’ (2 KwabaseKhorinte 1:3) Khangela izindlela ezine uNkulunkulu azisebenzisayo ukuze asiduduze.

• IBhayibhili. “Ngoba konke okwalotshwa kudala kwalotshelwa ukusifundisa, ukuze kuthi ngokubekezela langokukhuthazwa yimibhalo sibe lethemba.”—KwabaseRoma 15:4.

• Umoya Ongcwele KaNkulunkulu. Ngemva kokufa kukaJesu ibandla lobuKhristu lalidinga ukududuzwa. IBhayibhili lisitshela ukuthi uNkulunkulu wabaduduza esebenzisa umoya wakhe ongcwele. (ImiSebenzi 9:31) Umoya ongcwele kaNkulunkulu ulamandla amakhulu. UNkulunkulu uyawusebenzisa ukuze aduduze loba ngubani owudingayo.

• Umthandazo. IBhayibhili lithi, “lingakhathazeki ngalutho, kodwa ezintweni zonke, ngokukhuleka langokuncenga, ngokubonga, bekani izicelo zenu kuNkulunkulu. Ukuthula kukaNkulunkulu okudlula ukuqedisisa konke, kuzalinda izinhliziyo zenu lezingqondo zenu.”—KwabaseFiliphi 4:6, 7.

• AmaKhristu Esikhonza Lawo angasinika induduzo esiyidingayo ngezikhathi zobunzima. Umphostoli uPhawuli wakhuluma ngabazalwane ngokuthi ‘bayinduduzo kuye’ ngezikhathi ‘zosizi lokuhlukuluzwa.’—KwabaseKholose 4:11; 1 KwabaseThesalonika 3:7.

Kungenzeka usuzibuza ukuthi izinto lezi eseziqanjiwe zingamduduza njani umuntu sibili. Asihlolisise ukulandisa kwabantu esike saxoxa ngabo ekuqaliseni. Njengabo ungacina usukubona ukuthi uNkulunkulu uyasigcwalisa isithembiso sakhe esithinta inhliziyo esithi: “Ngizaliduduza njengomama eduduza umntanakhe.”—U-Isaya 66:13.

UKUPHELELWA NGUMSEBENZI

USetha uthi: “Mina lomkami saphelelwa ngumsebenzi ngasikhathi sinye. Saqeda iminyaka emibili siphila ngokukhangezwa yizihlobo lokubambabamba lapha lalaphana. Ngenxa yalokho umkami uPriscilla wayesehlala ehlulukelwe njalo lami ngasengizibona ngingumuntu owehlulekayo.

“UPriscilla yena wancedwa yikuhlala ecabanga amazwi kaJesu akuMathewu 6:34 athi akufanelanga sikhathazeke ngelakusasa ngoba usuku ngalunye lulezalo izinhlupho. Okunye okwamnika amandla okubekezela yimithandazo eyayisuka enhliziyweni. Mina ngaduduzwa kakhulu liHubo 55:22. Njengomhubi ngakujikela kuJehova konke ukukhathazeka kwami njalo ngakubona ukuthi wayengisekela. Lanxa umsebenzi sengawuthola, siyazama sibili ukusebenzisa amazwi kaJesu akuMathewu 6:20-22 asikhuthaza ukuthi singazidingeli izinto ezinengi. Okusithokozisa kakhulu yikuthi sesilobudlelwano obuhle loNkulunkulu njalo lathi sesithandana kakhulu.”

UJonathan uthi: “Kwaba mnyama phambili ngesikhathi ukwehla komnotho kubangela ukuthi ibhizimusi yethu encane ibe lezikwelede ezinengi. Kwakungani sisebenzele idonki efileyo okweminyaka engu-20. Mina lomkami saqalisa ukuxabana ngenxa yemali. Ikhadi lokuthenga ngesikwelede (credit card) sasingasalisebenzisi sisesaba ukuthi ngeke balivume.

“Kodwa iLizwi likaNkulunkulu kanye lomoya wakhe ongcwele kwasisiza ukuthi senze izinqumo ezinhle. Ngafunda ukwamukela loba yiwuphi umsebenzi njalo safunda lokusebenzisa kuhle imali. Njengoba singoFakazi bakaJehova, sancedwa ngabanye esikhonza labo. Babesiqinisa njalo besincedisa ngesikhathi izinto zinzima kakhulu.”

UMTSHADO UNGACHITHEKA

URaquel uthi: “Ngesikhathi umkami engibalekela ngezwa ubuhlungu, ngafuthelana njalo ngahlulukelwa. Kodwa uNkulunkulu wangiduduza sibili ngoba ngangisithi ngingathandaza ngizizwe sengingcono. Kwakungani uNkulunkulu uyayithoba inhliziyo yami.

“Ngiyambonga ngenxa yeLizwi lakhe iBhayibhili ngoba lehlisa ubuhlungu lokufuthelana engangikuzwa. Ngawafaka enhliziyweni amazwi omphostoli uPhawuli akuRoma 12:21 athi: ‘Linganqotshwa ngokubi, kodwa nqobani ububi ngobuhle.’

“Omunye umngane wami wanginceda ngabona ukuthi kwakufanele ngikwamukele okwakungehlele. Wangibalela umTshumayeli 3:6 njalo ngomusa wangitshela ukuthi kulesikhathi sokuyekela okunye kudlule. Kwakuyiseluleko esiqinileyo kodwa yiso engangisidinga. Khathesi sengayekela ukucabanga ngohlupho lwami kodwa sengihlala ngisenza izinto ezingilethela intokozo.”

U-Elizabeth uthi: “Ungachithekelwa ngumtshado uyabe ukudinga ukusekelwa. Mina ngancedwa ngumngane wami owayengiqinisa nsukuzonke. Wayelozwelo, engiduduza njalo wangenza ngabona ukuthi bakhona abantu abangithandayo. Ngileqiniso lokuthi uJehova wasebenzisa yena ukuze angiduduze ebuhlungwini engangiphakathi kwabo.”

NXA UGULA LOBA USUGUGILE

ULuis okukhulunywe ngaye esihlokweni sokuqala ulomkhuhlane omubi wenhliziyo osuphose wambulala kabili. Uphila ngokumpontshelwa umoya emaphatshini ngemitshina okwamahora angu-16 ngelanga. Uthi: “Ngihlala ngithandaza kuJehova. Nxa ngiqeda ukuthandaza ngihle ngiwuzwe umoya kaNkulunkulu ungiqinisa. Umkhuleko uyanginceda ngibe lesibindi sokuqinisela ngoba ngilokholo lokuthi uJehova uyangikhathalela.”

UPetra oseleminyaka edlula engu-80 uthi: “Zinengi izinto engifisa ukuzenza kodwa umzimba awusavumi. Kungizwisa ubuhlungu ukubona amandla ami ephela kancane kancane. Kuyangidina ukuthi sokumele ngiphile ngamaphilisi. Ngihlala ngicabanga ngendlela uJesu ancenga ngayo uYise ukuthi nxa kwakungenzakala ubunzima ayesekhangelane labo bukhitshwe. UJehova wamphendula ngokumnika amandla. Lami uJehova uyangiqinisa. Ngikhuleka nsukuzonke njalo ngizwa sengingcono kakhulu nxa ngiqeda ukukhuluma loNkulunkulu.”—UMathewu 26:39.

UJulian oseleminyaka engu-30 ebulawa ngumkhuhlane ohlasela ubuchopho lomfukula (multiple sclerosis) uthi: “Lanxa sengisebenzisa isitulo sabagogekileyo, ukuhlala ngincedisa abanye kwenza ngijabule. Ukupha kungabudambisa ubuhlungu, ngesikhathi esifananayo uJehova uyasigcwalisa isithembiso sakhe sokuthi ngezikhathi zobunzima uzasinika amandla. Njengomphostoli uPhawuli lami ngithi: ‘Ngingazenza zonke izinto ngaye onginika amandla.’”—KwabaseFiliphi 4:13.

NXA UFELWE

U-Antonio uthi: “Angizange ngikukholwe ukuthi ubaba wayesefile. Phela kwakudlule amalanga amahlanu eqalekile enganyikinyeki ngoba etshaywe yimota. Okubuhlungu yikuthi yena wayezihambela ngenyawo engeqanga umthetho womgwaqo. Kwakungaselanto engangingayenza. Ngangizama ukuzibamba izinyembezi nxa ngilomama kodwa sengingedwa zazijuluka. Ngangihlala ngizibuza ukuthi ubaba ufeleni.

“Ngalezonsuku ezazinzima ngangihlala ngicela uJehova ukuthi angiqinise njalo angenze ngihlaliseke. Kancane kancane ngangilokhu ngisiba ngcono. Ngakhumbula ukuthi iBhayibhili lithi sonke sehlelwa ‘yizikhathi ezimbi ezisifikela silibele.’ Njengoba uNkulunkulu engaqambi amanga ngilokholo lokuthi ubaba uzavuka ngiphinde ngimbone.”—UmTshumayeli 9:12; UJohane 11:25; KuThithusi 1:2.

URobert okukhulunywe ngaye esihlokweni esisekuqaliseni laye wayelemicabango enjalo. Uthi: “Mina lomkami uMaribel sancedwa yikuhlala sikhuleka kuJehova okwasenza saba lokuthula okuvela kuNkulunkulu okukhulunywa ngakho kwabaseFiliphi 4:6, 7. Lokhu kwasenza senelisa ukutshela intathelizindaba ngethemba esilalo lokuthi abafileyo bazavuswa. Lanxa ingozi yendizamtshina yabulala indodana yethu, okusithokozisayo yikuhlala sicabanga ngezikhathi ezinengi ezijabulisayo sindawonye.

“Lapho abanye oFakazi besitshela ukuthi basibonile ku-TV sikhuluma ngokholo lwethu ngesibindi sabatshela ukuthi kwakungenxa yokuthi babesikhulekela. Ngileqiniso lokuthi uJehova wayesiduduza ngamazwi aqinisayo ababesitshela wona.”

Izibonelo esesixoxe ngazo zisitshengisa ukuthi uNkulunkulu uyenelisa ukududuza bonke abantu. Kambe ukuthi lawe angakududuza? Kungelani lokuthi ulohlupho olunganani uJehova angenelisa ukukududuza.b Ungaya kuye uzayithola induduzo. UnguNkulunkulu “wenduduzo yonke.”​—2 KwabaseKhorinte 1:3.