KAPITEL 05
Dai Bijbel is ain fain geschenk wat Jehovaa oos geewt hät
Jehovaa hät tau oos ain fain geschenk geewt: Dai Bijbel. Ine Bijbel ståe 66 klaine buiker, åwer kan sin dat’s duu dij fråge däist: ‘Fon woo kümt dai Bijbel? Wee man hööre dai gedanke wat dårin sin?’ Taum dat antwoore, wiman’s saie wat passijrt is mit dai Bijbel dat wij dai leese koine bet hüüt hen.
1. Wen dai kërls dai Bijbel sreewe häwe, woweegen säge wij dat dai God sij Woord is?
Kërls häwe dai Bijbel sreewe doir 1.600 jåre lang. Dai airst klain bauk wat dår in is, is sreewe woore in jår 1513 airer as Kristus sijn tijd un dai lätst in dai jår 98 nå Kristus sijn tijd. Dai wat dai Bijbel sreewe häwe, wäire ni ale oiwerain. Wek däire schåp uppasse, däire fische un wäire köönigs. Lijkerst soo, dai gans Bijbel däit t’hoopstime. Woo kan dat sin? Weegen dai Bijbel kümt fon God! (Lees 1 Tessalonicenses 2:13) Dai wat dai Bijbel sreewe häwe, häwe ni sreewe dat wat sai denke däire, åwer sai “häwe fortelt wat fon God kaim, soo as dai hailig gaist eer lenke däir”. (2 Pedro 1:21)a (Kijk dai nåt.) Doir sijn hailig gaist God hät sijn gedanke tau dës kërls weese. Den sai häwe God sijn gedanke sreewe. (2 Timóteo 3:16)
2. Tau wem hät God dai Bijbel måkt?
God hät dai Bijbel måkt tau “al gëgende, rass, språk un folk”. (Lees Apocalipse 14:6) Sin Bijbels up mër språke as irgends air anerd bauk, weegen God wul dat dai lüür dai leese schule. Bijnå ale, koine dai beschaids fone Bijbel leese, däit nischt woo sai wåne daue urer wat fon språk fortele sai.
3. Wosoo hät Jehovaa dai Bijbel behüütet?
Feel slime daile sin mit dai Bijbel passijrt, åwer kair mësch un kair dail hät Jehovaa sij beschaid forstöört, weegen Jehovaa hät dat ni erlaubt. Dai Bijbel sreewe woore is up swak dail, soo as leerer un papiro, ain früüsch sort papijr. Den wosoo häwe wij dai Bijbel bet hüüt hen? Dat is passijrt weegen kërls wat God sij Woord lijbe däire un häwe dai feelmåls genau nåsreewe. Anerd problem sin dai lüür wääst wat macht oiwer dai andrer hare un wule dai Bijbel uutrote, åwer Jehovaa hät sij woord behüütet. Sin ümer lüür wääst wat dai Bijbel behüüte däire, nog dat sai doodblijwe müste. Dai Bijbel sägt: “God sij woord blijwt up ümer.” Dat is wirklig wår. (Isaías 40:8)
DAU MËR LËRE
Wait wosoo as God sijn gedanke weese hät tau dai wat dai Bijbel sreewe häwe, wosoo hät hai dai Bijbel behüütet un wat hät hai måkt dat wij ale dai Bijbel leese koine.
4. Ine Bijbel stäit fon wem kümt dai
Kijk dai VIDEO, lees 2 Timóteo 3:16 un nåheer fortel oiwer dai frågen hijr uuner:
Wen dai kërls dai Bijbel sreewe häwe, woweegen säge wij dat dai God sij Woord is?
Koine wij oos sicher sin dat God sijn gedanke weese hät tau wek kërls hijr upe Ër? Wat denkst duu?
Air arbëdsmësch kan ain braif srijwe, åwer dai wöör dårin sin dai her sijn. Dai lüür häwe dai Bijbel sreewe, åwer dai wöör dårin sin God sijn.
5. Feel wule dai Bijbel schåle ni mër geewe, åwer sai häwe dat ni måkt kreege
Wen dai Bijbel wirklig God sij Woord is, gans sicher däir hai dai behüüte. Doir feel jåre lang, sin slime daile mit dai Bijbel passijrt. Kërls wat kraft hare oiwer dai andrer un dai schefs fone religion, wule dat dai Bijbel ni mër geewe däir un dat dai lüür ni dai leese schule. Feel häwe ales måkt wat sai küüne taum dai Bijbel behüüte, nog dat sai doodblijwe däire dårweegen. Wiman’s air kërl kene wat dit måkt hät. Kijk dai VIDEO un nåheer fortel oiwer dai frågen hijr uuner:
Nuu dat’s duu al waiten kreegen häst wat dai lüür måkt häwe taum dai Bijbel behüüte, häst duu mër lust taum dai Bijbel leese? Woweegen?
Lees Salmo 119:97 un nåheer fortel oiwer dai fråg hijr uuner:
Woweegen häwe feel lüür ales måkt wat sai küüne taum dai Bijbel nåsrijwe un uutdaile, lijkerst dat dårweegen sai doodblijwe müste?
6. Air bauk tau jërer sort mësch
Dai Bijbel is dat bauk wat dai lüür mër nåsreewe un uutdailt häwe. Lees Atos 10:34, 35 un nårheer fortel oiwer dai frågen hijr uuner:
Woweegen wil God dat dai Bijbel nåsreewe un uutdailt wart up sofeel språke?
Wat däit dij dülst gefale ine Bijbel?
Bijnå
100%
fone lüür upm wild,
koine dai Bijbel leese up ain språk dat sai forståe daue
Dai gans Bijbel urer wek stük fon dai kan leest ware in mër as
3 duusend
språke
5 biljone
Dit sin wofeel Bijbel sin al måkt woore,
nog mër as irgends anerd bauk
WEK DAUE SOO SÄGE: “Dai Bijbel is bloos ain ul bauk wat dai lüür sreewe häwe.”
Wat däist duu hijr oiwer denke?
Wat däit oos wijse dat dai Bijbel God sij Woord is?
WAT HÄWE WIJ HIJR LËRT?
Dai Bijbel is God sij Woord un hai wul dat dai lüür ine ganse wild dai leese schule.
Denk dij ais nå
Wen dai Bijbel sägt God hät wek kërls lenkt taum dai Bijbel srijwe, wat bedüürt dat?
Wat däit dij bewunre oiwer wofeel Bijbels nåsreewe un uutdailt woore sin? Sin feel slime daile mit dai Bijbel passijrt, un nog soo dai giwt bet hüüt hen, wat denkst duu dåroiwer?
Duu häst lërt ales wat God måkt hät dat’s duu dai Bijbel leese kast. Wat fornimst duu dåroiwer?
TAUM MËR WAITE
Lees wat passijrt is mit dai Bijbel fone anfang an, bet dai Bijbels wat wij hüütsendåg häwe.
“Wosoo hät dai Bijbel al dës tijd lang uuthule?” (Wåkt Up!, november 2007)
Sai drai gefärlig daile wat mit dai Bijbel passijrt sin un wosoo koine wij dai bet hüüt hen häwe.
“Dai Bijbel: Ain bauk wat leewig bleewe is” (Wat Bekandmökt, numer 4 2016)
Sai gefärlig daile wat dai lüür doirset häwe taum dai Bijbel nåsrijwe.
Dai Bijbel is feelmåls nåsreewe un dai lüür häwe dat måkt sogår up andrer språke. Woo kast duu dij sicher sin dat dai ni aners woore is?
“Is dai Bijbel ümstelt woore?” (Stäit in jw.org taum leesen)
a Nåt: In dai kapitel 07 wiman’s lëre dat dai hailig gaist is dai kraft wat God benutst taum sijne wile måke.