Wosoo kan dat gebeed dij helpe?

As Pamela ruuterkreege hät dat sai krääwt har, sai hät dai dokters sijn hülps söcht. Åwer sai hät uk beert tau God hülp forlangt dat sai sich drëgt krëg mit dai slim krankhët. Hät dat gebeed eer hulpe?

Pamela hät sägt: “Solang as ik dai dokterig weegen dem krääwt måke däir, feelmåls däir ik mij ängste. Åwer ik däir beere tau Jehovaa God un den däir ik mij ruig forneeme un krëg mij drëgt dårmit ån sër unruig ware. Ik häw nog feel waidåg, åwer dat gebeed helpt mij gaur gedanke häwe. Wen dai lüür mij fråge wosoo as ik bün, ik säg: ‘Ik bün ni gaud, åwer ik bün ruig!’”

Is wår wij bruuke ni luure bet wat slimes in oosen leewend passijrt taum den beere. Hüütsendåg wij ale daue problems mitmåke, groot urer klain, un feelmåls wij bruuke hülp dat wij oos dårmit drëgt krijge. Koine dai gebeeds oos wirklig helpe?

Ine Bijbel stäit: “Smijt oiwer Jehovaa wat’s duu dråge must, un hai däit dij stüte. Däit nij ais erlaube dat dai gerecht taum falen kümt.” (Salmo 55:22) Is sër gaud dit waite is ni wår? Den, wosoo kan dat gebeed dij helpe? Wen’s duu beere däist tau God soo as em gefale däit, hai wart dij helpe dat’s duu dij drëgt krijgst mit dai slimhëte im leewend. (Sai dai tåfel “Seegens wat’s duu krijge kast doir dat gebeed”.)

Seegens wat’s duu krijge kast doir dat gebeed

Duu warst ruig

“Måkt tau God bekand ales wat jij wile, un dai freere fon God, wat oiwer al forståen is, wart juuch härts un gedanke forwåre doir Jësus Kristus.” (Filipenses 4:6 un 7) Wen’s duu tau God al dijn problems un kopbreeken fortelst, hai wart dij helpe ruig blijwe un waite wat’s duu måke kast, lijkerst wen dat uk ni licht is.

Duu warst klauk

“Wen air fon juuch kain klaukhët hät, dat dai bijblijwe däit tau God forlange - weegen hai däit dat tau ale mit fraiwile geewe, åne dat forbaire - un hai däit dat em geewe.” (Tiago 1:5) Wen wij slimhëte doirsete in oosem leewend is ni licht gaur daile uutsuike. Den, wen wij beere tau God un forlange klaukhët, hai wart oos helpe andenke an dai gaur formånen wat ine Bijbel ståe.

Duu warst trööst un krijgst kraft

“Tau ales bün ik stark doir dem wat mij kraft giwt.” (Filipenses 4:13) Jehovaa, is dai Almächtig God. Dårweegen, hai kan dij kraft geewe dat’s duu dij drëgt krijgst mit dai swårhëte urer dat uuthule. (Isaías 40:29) Ine Bijbel stäit uk dat Jehovaa is dai God fon al tröösten. Hai kan oos trööste “in al oos pruiwen”. (2 Coríntios 1:3 un 4)

BEER TAU GOD

Jehovaa däit oos ni andrijwe taum mit gewald tau em beere. Airer, hai däit mit lijb oos nööge taum dat måke. (Jeremias 29:11 un 12) Un wen’s duu denke däist dat God nij ais dijn gebeeds antwoort hät? Dau ni traurig ware dårweegen un låt ni nå. Wiman’s hijr andenke: Papa un mama wat sijn kiner lijbe, daue ni ümer eer kiner helpe soo as dai dat wile un uk ni in dai stuun woo dai kiner dat wile. Kan sin dai papa un mama häwe aine beeter uutweeg tau eer kiner. Åwer, air dail kan man säge: gaur papa un mama daue eer kiner ümer helpe.

Jehovaa God is oos Fåter un däit oos sër lijbe. Hai wil dij helpe! Wen’s duu andenke däist an dat wat ine Bijbel stäit oiwer dat gebeed un däist dårnå leewe, gans sicher Jehovaa wart dijn gebeeds up dai best årt antwoore! (Salmo 34:15 un Mateus 7:7 bet 11)